1/1

នាព្រឹកថ្ងៃទី១៦  ខែវិច្ឆិកា ឆ្នាំ២០២១នេះ   នៅសាលាសង្កាត់ឃ្មួញ  ខណ្ឌសែនសុខ  សាខាកាកបាទក្រហមកម្ពុជា រាជធានីភ្នំពេញ បានបើកវគ្គបណ្តុះបណ្តាលជនបង្គោលសុវត្ថិភាពចរាចរណ៍ និងវិជ្ជាសង្គ្រោះបឋម  មានរយៈពេល២ថ្ងៃ ជូនដល់អ្នកស្ម័គ្រចិត្តកាកបាទក្រហមកម្ពុជា មកពីតាមបណ្តាភូមិនានាក្នុងសង្កាត់ឃ្មួញ សរុបចំនួន២៦នាក់ (ស្រី៨នាក់) ក្រោមវត្តមាន លោក ជិន ប៊ុនធឿន នាយកប្រតិបត្តិសាខា ។មានប្រសាសន៍បើកវគ្គនាឱកាសនោះ លោកជិន ប៊ុនធឿនបានគូសបញ្ជាក់ថា៖  ចាប់តាំងពីមុនរហូតមកដល់បច្ចុប្បន្ននេះ អ្នកស្មគ្រ័ចិត្តយើងពិតជាបានដើរតួនាទីយ៉ាងសំខាន់ណាស់ ក្នុងការចូលរួមការងារមនុស្សធម៌ដោយមិនចង់បានអ្វីតបស្នងមកវិញ គឺចូលរួមដោយស្មោះស្មគ្រ័ គ្មានប្រាក់បៀវត្សន៍ ឬប្រាក់ឧបត្ថម្ភ និងបានបូជាកម្លាំងកាយចិត្ត លះបង់ពេលវេលា   ជាអ្នកអប់រំផ្សព្វផ្សាយចលនា  ជាអ្នកជួយសង្គ្រោះ និងជាអ្នកផ្តល់ព័ត៌មានអំពីគ្រោះមហន្តរាយផ្សេងៗបានទាន់ពេលវេលា  នៅក្នុងមូលដ្ឋានរបស់ខ្លួន ។ លោកក៏បានលើកឡើងពីគោលបំណងនៃការបើកវគ្គបណ្តុះបណ្តាលនេះ គឺដើម្បីឲ្យសិក្ខាកាមជាអ្នកស្មគ្រ័ចិត្តទាំងអស់បានយល់ដឹងកាន់តែច្បាស់ និងក្លាយជាជនបង្គោលដែលមានសមត្ថភាពគ្រប់គ្រាន់អាចផ្សព្វផ្សាយបន្តពី  ច្បាប់ចរាចរណ៍ផ្លូវគោក អនុក្រឹត្យនៃការផាកពិន័យ ផ្លាកសញ្ញាចរាចរណ៍ ហានិភ័យនៃការបើកបរក្រោមឥទ្ធិពលគ្រឿងស្រវឹងជាដើម និងជាពិសេសវិជ្ជាសង្គ្រោះបឋមដែលជាមុខវិជ្ជាសំខាន់អាចជួយជនរងគ្រោះដោយប្រការផ្សេងៗដូចជា  សន្លប់បាត់បង់ស្មារតី បាក់ឆ្អឹង លង់ទឹក ពស់ចឹក ស្លាក់ រលាក និងរងរបួសបាន មុនពេលភ្នាក់ងារសង្គ្រោះឫឡានពេទ្យមកដល់ ហើយអ្វីដែលកាន់តែថ្មីនោះគឺរបៀបជួយជនរងគ្រោះក្នុងបរិបទជំងឺកូវីដ១៩  ។  មុននឹងប្រកាសបើកវគ្គបណ្តុះបណ្តាល  លោកនាយកប្រតិបត្តិសាខា  ក៏សូមឲ្យបងប្អូនជាសិក្ខាកាមទាំងអស់ ខិតខំយកចិត្តទុកដាក់ក្រេបជញ្ជក់ចំណេះដឹង ពីវគ្គនេះដើម្បីបង្កើនសមត្ថភាព  ក្នុងការបំពេញការងារមនុស្សធម៌របស់យើងនៅតាមមូលដ្ឋានឲ្យកាន់តែមានប្រសិទ្ធភាព  និងទទួលបានជោគជ័យថែមទៀត  ៕