• ភាសាខ្មែរ
  • English
សង្គ្រោះជីវិត​ ផ្លាស់ប្តូរផ្នត់គំនិត
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
Press Release May 8, 2018
1/2
2/2

ពិធីទទួល និងប្រគល់អាវពោង និងសម្ភារៈផ្សព្វផ្សាយស្តីពីវិធានការទប់ស្កាត់ជំងឺកូវីដ-១៩ជូនសាខាកាកបាទក្រហមកម្ពុជា ទាំង២៥ រាជធានី-ខេត្ត

កក្រក ៖ នៅថ្ងៃព្រហស្បតិ៍ ទី២៥ ខែមិថុនា ឆ្នាំ២០២០នេះ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានទទួលអំណោយជាសាប៊ូដុំ ជែលលាងដៃ និងសម្ភារផ្សព្វផ្សាយស្តីពីវិធានការទប់ស្កាត់ជំងឺកូវីដ-១៩ ពី គណៈកម្មាធិការអន្តរជាតិកាកបាទក្រហម (ICRC) និងប្រគល់អំណោយទាំងនេះ រួមជាមួយ អាវពោងចំនួន ៩,០៥០អាវ ជូនសាខាកាកបាទក្រហមកម្ពុជា ទាំង២៥ រាជធានី-ខេត្ត សម្រាប់បំពេញប្រតិបត្តិការមនុស្សធម៌។ពិធីនេះប្រព្រឹត្តទៅទីស្នាក់ការកណ្តាលកាកបាទក្រហមកម្ពុជា ក្រោមអធិបតីភាព លោកជំទាវ ពុំចន្ទីនី អគ្គលេខាធិការកាកបាទក្រហមកម្ពុជា

និងលោក Roman Paramonov ប្រធានបេសកកម្ម ICRC ប្រចាំនៅកម្ពុជា ព្រមទាំងអញ្ជើញចូលរួមពី តំណាង គណៈកម្មាធិការសាខា-ក្រុមប្រតិបត្តិសាខា ទាំង២៥រាជធានី-ខេត្ត និងមន្ត្រីពាក់ព័ន្ធនៃទីស្នាក់ការកណ្តាល។

ក្នុងឱកាសនោះ លោក Roman Paramonov បានថ្លែងនូវការកោតសរសើរចំពោះកាកបាទក្រហមកម្ពុជា ដែលបានបំពេញបេសកកម្មមនុស្សធម៌ប្រកបដោយប្រសិទ្ធភាពខ្ពស់នាពេលកន្លងមក ជាពិសេស ក្នុងការចូលរួមចំណែកជាមួយរាជរដ្ឋាភិបាលកម្ពុជា ក្នុងការប្រយុទ្ធនឹងជំងឺកូវីដ-១៩ នៅកម្ពុជា ប្រកបដោយភាពជោគជ័យ ដែលអាចចាត់ទុកថាជាគំរូមួយសម្រាប់ពិភពលោក។

ជាមួយគ្នានេះ លោកជំទាវ អគ្គលេខាធិការ បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ និងក្តីនឹករលឹកដ៏ជ្រាលជ្រៅចំពោះ សាខាកាកបាទក្រហមកម្ពុជា ទាំង២៥រាជធានី-ខេត្ត ជាពិសេសសូមថ្លែងនូវការកោតសរសើរចំពោះសាខាទាំងអស់ដែលបានយកចិត្តទុកដាក់ ខិតខំប្រឹងប្រែងបំពេញការងារចុះជួយដល់ប្រជាពលរដ្ឋរងគ្រោះ និងងាយរងគ្រោះបំផុតបានយ៉ាងទាន់ពេលវេលា សក្តិសមជាជំនួយការឱ្យអាជ្ញាធរសាធារណៈក្នុងវិស័យមនុស្សធម៌។

ទន្ទឹមនឹងនេះ លោកជំទាវ អគ្គលេខាធិការ បានគូសបញ្ជាក់អំពីរចនាសម្ព័ន្ធ តួនាទី និងភារកិច្ចរបស់គណៈកម្មាធិការ-ក្រុមប្រតិបត្តិសាខា និងបានធ្វើការណែនាំដល់សាខាទាំងអស់ អំពីរបៀបប្រេីប្រាស់បណ្តាញទំនាក់ទំនង របៀបរបបធ្វេីរបាយការណ៍ និងការងារផ្សព្វផ្សាយ។ល។ ដេីម្បីបង្កេីនប្រសិទ្ធភាពការងារ។ បន្ថែមពីនេះ លោកជំទាវ បានផ្តល់អនុសាសន៍ដល់សាខាទាំងអស់ ក្នុងការត្រៀមបង្ការ និងឆ្លេីយតបគ្រោះទឹកជំនន់នារដូវវស្សានេះ ក៏ដូចជាគ្រោះអគ្គិភ័យ ខ្យល់ព្យុះ ខ្យល់កន្ត្រាក់ និងគ្រោះមហន្តរាយធម្មជាតិនានា។ សូមបន្តអនុវត្តនូវវិធានការនានារបស់រាជដ្ឋាភិបាល ក្នុងការទប់ស្កាត់រលកទី២ នៃជំងឺកូវីដ-១៩ និងទប់ស្កាត់ការផ្ទុះឡើងនៃជំងឺគ្រុនឈាម ដែលអាចកេីតមាននារដូវវស្សានេះ។ សូមយកចិត្តទុកដាក់ បន្តផ្សព្វផ្សាយជាប្រចាំអំពីសុវត្ថិភាពចរាចរណ៍ជូនដល់ប្រជាពលរដ្ឋ និងបន្តផ្តល់អំណោយជាស្បៀង-សម្ភារជូនប្រជាពលរដ្ឋងាយរងគ្រោះបំផុត ដើម្បីជួយសម្រាលដល់ជីវភាពក្នុងអំឡុងពេលនៃជំងឺកូវីដ-១៩នេះ៕