• ភាសាខ្មែរ
  • English
សង្គ្រោះជីវិត​ ផ្លាស់ប្តូរផ្នត់គំនិត
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
Press Release May 8, 2018
1/1

កាកបាទក្រហមកម្ពុជាចុះសួរសុខទុក្ខ លោកយាយ ប៉ុយ យាវ បង្កើតសព លោក វឿន នី អតីតមន្ត្រីកាកបាទក្រហមកម្ពុជា ដែលមានជីវភាពខ្វះខាតខ្លាំង ស្រុកសង្កែ ខេត្តបាត់ដំបង

កក្រក ៖ នៅរសៀលថ្ងៃចន្ទ ទី២១ ខែធ្នូ ឆ្នាំ២០២០នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យមន្ត្រីចុះសួរសុខទុក្ខ និងនាំយកអំណោយមនុស្សធម៌ជួយសម្រាលការលំបាកផ្នែកជីវភាពដល់លោកយាយ ប៉ុយ យាវ អាយុ ៧៧ឆ្នាំ ត្រូវជាម្តាយបង្កើតសព លោក វឿន នី អតីតមន្ត្រីកាកបាទក្រហមកម្ពុជា ដែលមានជីវភាពខ្វះខាតខ្លាំង ដោយ មានចៅនៅក្នុងបន្ទុកចំនួន៣នាក់ដែលត្រូវចិញ្ចឹម ស្ថិតនៅភូមិ ថ្មី ឃុំ កំពង់ព្រៀង ស្រុកសង្កែ ខេត្តបាត់ដំបង ។

ក្នុងឱកាសជួបសំណេះសំណាលនោះ ឯកឧត្តមវេជ្ជ.​ អ៊ុយ​ សំអាត​ នាយកនាយកដ្ឋានគ្រប់គ្រងគ្រោះមហន្តរាយ​ កាកបាទក្រហមកម្ពុជា​ បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតអាសូរ ចំពោះលោក យាយ ប៉ុយ យាវ ហេីយថ្វីបើអំណោយទាំងនេះបន្តិចបន្តួចក្តី​ តែអាចជួយសម្រាលការលំបាកផ្នែកជីវភាពបានមួយគ្រា និងសូមឱ្យលោកយាយថែទាំសុខភាពឱ្យបានល្អ អនុវត្តតាមវិធានការនានារបស់ក្រសួងសុខាភិបាល ទម្លាប់រស់នៅធម្មតាតាមបែបគន្លងថ្មី ដើម្បីជៀសផុតពីជំងឺកូវីដ-១៩។

ទន្ទឹមនឹងនេះ បន្ទាប់ពីទទួលដំណឹងថា លោកតា សុះ សេន អាយុ ៩៦ឆ្នាំ​ ត្រូវជាឪពុកបង្កើតសព លោក វឿន នី ដែលទើបតែទទួល មរណភាពកាលពីពេលថ្វីៗនេះ ឯកឧត្តម ក៏បានពាំនាំប្រសាសន៍ ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចូលរួមសោកស្តាយ និងចូលរួមរំលែកទុក្ខ ជាមួយក្រុមគ្រួសារសព និងសូមឧទ្ទិសដល់ដួងវិញ្ញាណក្ខន្ធនៃសពបានទៅកាន់សុខគតិភព កុំបីឃ្លៀងឃ្លាតឡើយ។

លោកយាយ ប៉ុយ យ៉ាវ បានសម្តែងនូវការដឹងគុណយ៉ាងជ្រាល ជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ច តែងគិតគូរពីការលំបាកបន្ទាប់ពីកូនរបស់គាត់ដែលបានស្លាប់ទៅដោយគ្មានការរើសអើងអ្វីឡើយ។

សូមបញ្ជាក់ថា អំណោយផ្តល់ជូនរួមមាន ៖ អង្ករ ១០០គីឡូក្រាម មី ៤កេស ត្រីខ ៤០កំប៉ុង ទឹកស៊ីអ៊ីវ ២យួរ ទឹកត្រី ២យួរ ឃីត (មុង ភួយ សារុង ក្រមា អាវយឺត) ២កញ្ចប់ និងថវិកា ១០លានរៀល៕