សុន្ទរកថា លោកជំទាវ ប៊ុន រ៉ានី ហ៊ុនសែន
ប្រធានកាកបាទក្រហមកម្ពុជា ថ្លែងក្នុងពិធីទទួលសញ្ញាបត្របណ្ឌិតកិត្ដិយសផ្នែកមនុស្សធម៌
នៃសាកលវិទ្យាល័យកម្ពុជា
- សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ជាទីគោរពដ៏ខ្ពង់ខ្ពស់
- បណ្ឌិត ហារុហ៊ីសា ហាន់ដា (Haruhisa Handa) ប្រធានមូលនិធិអន្ដរជាតិដើម្បីសិល្បៈ និងវប្បធម៌ នៃប្រទេសជប៉ុន និងជា អធិការបតី នៃ សាកលវិទ្យាល័យកម្ពុជា
- ឯកឧត្ដម លោកជំទាវ លោក លោកស្រី ភ្ញៀវកិត្ដិយសជាតិ និងអន្ដរជាតិ
- លោក លោកស្រី បណ្ឌិត សាស្ដ្រាចារ្យ ព្រមទាំង ប្អូនៗ និងក្មួយៗ និស្សិត ទាំងអស់ជាទីមេត្រី !
ថ្ងៃនេះ ខ្ញុំមានសេចក្ដីរីករាយ និងមានមោទនភាពយ៉ាងក្រៃលែង ដោយបានទទួល សញ្ញាបត្រ បណ្ឌិតកិត្ដិយសផ្នែកមនុស្សធម៌ នៃសាកលវិទ្យាល័យកម្ពុជា ដែលជាសាកលវិទ្យាល័យមួយ ើតចេញពី នយោបាយ ៉ នាំមុខនៅកម្ពុជា។ ក្នុងឱកាសដ៏ឧឡារិកនេះ ខ្ញុំសូមថ្លែងអំណរគុណយ៉ាងជ្រាលជ្រៅបំផុត ជូនចំពោះថ្នាក់ដឹកនាំគណៈកម្មាធិការពិនិត្យ និង វាយតម្លៃ ជាពិសេស បណ្ឌិតអធិការបតី ហារុហ៊ីសា ហាន់ដា (Haruhisa Handa) ឯកឧត្ដម បណ្ឌិត កៅ គឹមហួន ព្រមទាំង បណ្ឌិត សាស្ដ្រាចារ្យ និងសមាជិកទាំងអស់ នៃសាកលវិទ្យាល័យកម្ពុជា ដែលបានផ្ដល់ជ័យលាភី បណ្ឌិតកិត្ដិយស ផ្នែកមនុស្សធម៌ ដល់រូបខ្ញុំ ។
កិត្ដិយសដ៏ថ្លៃថ្លាដែលខ្ញុំទទួលបាននៅថ្ងៃនេះ ជាសក្ខីភាពមួយដែលមិនត្រឹមតែបញ្ជាក់ នូវការទទួលស្គាល់របស់សាកលវិទ្យាល័យកម្ពុជាចំពោះការខិតខំរបស់ខ្លួនខ្ញុំផ្ទាល់ ក្នុងឋានៈជាពលរដ្ឋខ្មែរមួយរូប ជាប្រធានកាកបាទក្រហមកម្ពុជា និង ជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ( National Champion for Asia-Pacific Leadership Forum = APLF) ប៉ុណ្ណោះទេ ឡារិកនេះ ា និង ម ប៉ុន្ដែវាជាការបង្ហាញនូវការយកចិត្ដទុកដាក់ និងការចាប់អារម្មណ៍ខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងប្រជាជនកម្ពុជាទាំងមូលក្នុងការចូលរួមជួយសង្គ្រោះប្រជាជនគ្រប់គ្រាមានអាសន្ន និងគ្រោះមហន្ដរាយ ដើម្បីលើកស្ទួយជីវភាពរស់នៅរបស់ប្រជាជនដែលងាយរងគ្រោះ ព្រមទាំងការប្រយុទ្ធទប់ស្កាត់ការរីករាលដាលមេរោគអេដស៍ និងជំងឺអេដស៍ ដើម្បីបញ្ចៀស ឱ្យរួចផុតពីការប៉ះពាល់ដល់សុខភាព និងដល់អាយុជីវិតប្រជាជនយើង។
ទន្ទឹមនឹងនេះ ខ្ញុំយល់ថា ជ័យលាភីនេះ ជាបុព្វសិទ្ធិមួយដ៏ខ្ពង់ខ្ពស់ ដែលភ្ជាប់ខ្ញុំទៅនឹងសហគមន៍បញ្ញវ័ន្ដ និងឥស្សរជនឆ្នើមៗ ដែលសាកលវិទ្យាល័យកម្ពុជា បានផ្ដល់សញ្ញាប័ត្របណ្ឌិតកិត្ដិយស ក្នុងនោះរួមមាន សម្ដេច អគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ឯកឧត្ដម គាត ឈន់ ឧបនាយករដ្ឋមន្ដ្រី រដ្ឋមន្ដ្រីក្រសួង សេដ្ឋកិច្ច និងហិរញ្ញវត្ថុ ឯកឧត្ដម សុខ អាន ឧបនាយករដ្ឋមន្ដ្រី រដ្ឋមន្ដ្រីទទួលបន្ទុក ទីស្ដីការ គណៈរដ្ឋមន្ដ្រី លោក រីឃី តាកក្រាល (Mr. Rikhi Thakral) ជនជាតិសិង្ហបូរី ជានាយកប្រតិបត្ដិក្រុមហ៊ុន តាកក្រាលគ្រូប លោក ម៉ាស្សាយុរ៉ូ ហ្ស៊ីអូកាវ៉ា (Mr. Masajuro Shiokawa) ជនជាតិជប៉ុន ជាអតីតរដ្ឋមន្ដ្រី ហិរញ្ញវត្ថុជប៉ុន លោកស្រី សាស្ដ្រាចារ្យ កាធីរីន ម៉ារហ្សាល (Mrs. Katherin Marshall) ជនជាតិអាមេរិកាំង ជាអតីតអនុប្រធាន ធនាគារពិភពលោក ក៏ដូចជាឥស្សរជនថ្នាក់ដឹកនាំ ជាតិ និងអន្ដរជាតិ មួយចំនួនផ្សេងទៀត ។
- សម្ដេចអគ្គមហាសេនាបតីតេជោ ជាទីគោរពដ៏ខ្ពង់ខ្ពស់
- ឯកឧត្ដម លោកជំទាវ លោក លោកស្រី
- ប្អូនៗ និង ក្មួយៗ និស្សិតទាំងអស់ ជាទីមេត្រី !
ប្រទេសកម្ពុជា បានជួបនូវវិបត្ដិនយោបាយ និងសង្គ្រាមអូសបន្លាយជិតបីទសវត្សរ៍ ជាពិសេស គឺការធ្លាក់ក្រោមរបបប្រល័យពូជសាសន៍ ៣ ឆ្នាំ ៨ខែ ២០ថ្ងៃ ដែលពុំធ្លាប់មានសោះនៅក្នុងប្រវត្ដិសាស្ដ្រកម្ពុជា។ ក្នុងយុគសម័យនៃមហាវិនាសកម្មនោះ ក្រៅពីការកាប់សម្លាប់ប្រជាជនកម្ពុជាស្លូតត្រង់ ពួកប្រល័យពូជសាសន៍ ប៉ុល ពត បានបំផ្លិចបំផ្លាញហេដ្ឋារចនាសម្ព័ន្ធគ្រប់វិស័យរបស់ប្រទេសជាតិ ឱ្យហិនហោចដល់ឬសគល់។ ក្រោយថ្ងៃរំដោះ ជាប្រវត្ដិសាស្ដ្រ ៧ មករា ១៩៧៩ ផ្ដើមចេញពីបាតដៃទទេ យើងបានប្រឹងប្រែងកសាងប្រទេសជាតិឡើងវិញលើគ្រប់វិស័យ។
ពេលនេះ យើងទាំងអស់គ្នាបាននិងកំពុងទទួលផលពីសុខសន្ដិភាព និងស្ថិរភាពនយោបាយ ព្រមទាំងឯកភាពទឹកដីដ៏ពេញលេញ ដែលកើតចេញពីនយោបាយ ឈ្នះ-ឈ្នះ របស់រាជរដ្ឋាភិបាល តាមរយៈកំណើនសេដ្ឋកិច្ចខ្ពស់ និងការកាត់បន្ថយភាពក្រីក្រ ក្នុងទសវត្សរ៍កន្លងទៅនេះ។ សុខសន្ដិភាព និងស្ថិរភាពនយោបាយ ដែលមិនធ្លាប់មានរាប់ទសវត្សរ៍ កន្លងមក បានអនុញ្ញាតឱ្យកម្ពុជាអនុវត្ដនូវកិច្ចការកែទម្រង់ក្នុងគ្រប់វិស័យ សំដៅកសាងធនធានមនុស្ស អភិវឌ្ឍសមត្ថភាពស្ថាប័ន ពង្រឹងហេដ្ឋារចនាសម្ពន្ធ័ សង្គម-សេដ្ឋកិច្ច និងបង្កើតបរិយាកាសអំណោយផលសម្រាប់ទាក់ទាញការវិនិយោគទាំងក្នុង និងក្រៅប្រទេស ក្នុងគោលដៅធានាបាននូវកំណើនសេដ្ឋកិច្ចខ្ពស់ និងការកាត់បន្ថយភាពក្រីក្រ។
បច្ចុប្បន្ន ទោះបីបាតុភូតនៃការប្រែប្រួលអាកាសធាតុ អតុល្យភាពនៃសេដ្ឋកិច្ចពិភពលោក និងវិបត្ដិហិរញ្ញវត្ថុ ដែលកើតមានក្នុងពេលថ្មីៗ នេះ បណ្ដាលឱ្យមានការធ្លាក់ចុះនៃសេដ្ឋកិច្ចពិភពលោក រួមមានទាំងការកើនថ្លៃនៃប្រេងឥន្ធនៈ និងស្បៀងអាហារ និងការចុះថ្លៃជាបន្ដបន្ទាប់នៃប្រាក់ដុល្លារអាមេរិក ក៏កម្ពុជា ធានាបាននូវស្ថិរភាពម៉ាក្រូសេដ្ឋកិច្ច និងកំណើនសេដ្ឋកិច្ចខ្ពស់ ដែលមិនធ្លាប់មាន ដោយគ្រប់គ្រងបាននូវអតិផរណា និងធានាស្ថិរភាពជារួមនៃអាត្រាប្ដូរប្រាក់។
ជាការពិត ទោះបីជាយើងទទួលបានជោគជ័យជាច្រើន ទាំងផ្នែកសេដ្ឋកិច្ច និងសង្គម ប៉ុន្ដែនេះមិនមែនមានន័យថា យើងបានរំដោះប្រជាជនយើងឱ្យរួចផុតពីភាពក្រីក្រទាំងអស់គ្នានោះទេ។ យើងនៅជួបប្រទះបញ្ហាប្រឈមជាច្រើន ជាពិសេសភាពក្រីក្ររបស់ប្រជាជន ដែលនៅសេសសល់ បញ្ហាប្រឈមផ្សេងទៀត បង្កឡើងដោយការប្រែប្រួលអាកាសធាតុ ក្នុងនោះរួមមាន គ្រោះមហន្ដរាយទឹកជំនន់ គ្រោះរាំងស្ងួត ជំងឺសាហាវរីករាលដាលថ្មីៗ មេរោគអេដស៍ និង ជំងឺអេដស៍។ល។ និង។ល។ គឺសុទ្ធតែជាបញ្ហាប្រឈមដ៏គួរឱ្យព្រួយបារម្ភ ដែលពុំអាចដោះស្រាយបានដោយបុគ្គល ដោយសហគមន៍ណាមួយ ដោយតួអង្គ ឬ ស្ថាប័នមនុស្សធម៌ណាមួយម្នាក់ឯងបានឡើយ។ ប្រការដែលចាំបាច់ យើងត្រូវខិតខំពង្រឹង កម្លាំងមនុស្សធម៌ កម្លាំងសាមគ្គីភាព និង វប្បធម៌ចែករំលែក ព្រមទាំងពង្រឹងភាពជាដៃគូ ដែលជាកម្លាំងដ៏សំខាន់ធ្វើឱ្យយើងទាំងអស់គ្នាយល់បានយ៉ាងស៊ីជម្រៅពីឬសគល់នៃបញ្ហា ហើយផ្ដល់នូវសក្ដានុពលដោះស្រាយបញ្ហាប្រឈមបានយ៉ាងមានប្រសិទ្ធភាព។
ក្នុងការអនុវត្ដនូវស្មារតីនេះ រូបខ្ញុំផ្ទាល់ បានលះបង់ពេលវេលា និងបរិច្ចាគធនធានផ្ទាល់ខ្លួន ធ្វើសកម្មភាពមនុស្សធម៌ ទាំងក្នុងឋានៈជាប្រជាពលរដ្ឋមួយរូប និងក្នុងឋានៈជាប្រធានកាកបាទក្រហមកម្ពុជា ដែលមានការចូលរួមពីដៃគូសហប្រតិបត្ដិការ ពីសប្បុរសជនជាតិ-អន្ដរជាតិ ពីសមាជិក-សមាជិកា ពីមន្ដ្រី-បុគ្គលិក អ្នកស្មគ្រ័ចិត្ដ តាមសាខាខេត្ដ-ក្រុងទាំង ២៤ ដើម្បីចូលរួមចំណែកជាមួយរាជរដ្ឋាភិបាល ក្នុងបុព្វហេតុជួយសង្គ្រោះប្រជាជនគ្រប់ពេលវេលា គ្រប់គ្រាមានអាសន្ន គ្រោះមហន្ដរាយផ្សេងៗ ការលើកកម្ពស់ច្បាប់មនុស្សធម៌អន្ដរជាតិ លើកកម្ពស់តម្លៃមនុស្សធម៌ ការអប់រំថែទាំសុខភាព រក្សាអនាម័យតាមសហគមន៍ប្រយុទ្ធទប់ស្កាត់ការរីករាលដាលជំងឺឆ្លងផ្សេងៗ មានមេរោគអេដស៍ ជំងឺអេដស៍នៅគ្រប់ទីកន្លែងដោយពុំមានការរើសអើង និងផ្ដល់នូវការជឿទុកចិត្ដយ៉ាងកក់ក្ដៅជូនប្រជាពលរដ្ឋទូទៅ។
- សម្ដេចអគ្គមហាសេនាបតីតេជោ ជាទីគោរពដ៏ខ្ពង់ខ្ពស់
- ឯកឧត្ដម លោកជំទាវ លោក លោកស្រី ប្អូនៗ និង ក្មួយៗនិស្សិតទាំងអស់ ជាទីមេត្រី !
សម្រាប់ខ្ញុំ សកម្មភាពមនុស្សធម៌ មិនមែនជាវិទ្យាសាស្ដ្រ ឬ បច្ចេកទេសអ្វីដែលពិបាកយល់ និងពិបាកគិតនោះទេ។ សកម្មភាពមនុស្សធម៌ សម្រាប់ខ្ញុំ មានន័យយ៉ាងសាមញ្ញ គឺការរក្សាឱ្យបានភាពជាមនុស្សរបស់មនុស្សជាតិ។ ជាការពិត ក្នុងសភាពជាមនុស្សលោកដូចគ្នា ការបាត់បង់ តម្លៃមនុស្សធម៌ ជាការបំបាក់នូវភាពរីកចម្រើនរបស់សង្គម ការទាញទម្លាក់អារិយធម៌មនុស្សជាតិ ឱ្យធ្លាក់ចុះដល់ចំណុចសូន្យ។ សង្គមដែលមិនទ្រទ្រង់ តម្លៃមនុស្សធម៌ ពុំមែនជាសង្គមមានអារិយធម៌ខ្ពស់ត្រដែតជាទីកោតស្ងប់ស្ងែងឡើយ។ តម្លៃមនុស្សធម៌ សំដៅលើសិទ្ធិ និងសេចក្ដីថ្លៃថ្នូរជាសាកលរបស់មនុស្ស និងការជួយគ្នាទៅវិញ-ទៅមកនៅក្នុងគ្រាអាសន្ន។
ការយល់ដឹងរបស់ខ្ញុំ អំពី មនុស្សធម៌ គឺជា ដំណើរជីវិតពិត ដែលខ្ញុំបានឆ្លងកាត់នូវជីវិតរស់នៅដោយទុក្ខវេទនា ព្រាត់ប្រាសពីប្ដីជាទីស្រឡាញ់ នៅក្នុងរបប ប៉ុល ពត ដែលបានអនុវត្ដនូវនយោបាយទុរគតភាវូបនីយកម្មនៅទូទាំងប្រទេស។ នៅពេលនោះប្រជាជនត្រូវបានជម្លៀសពីទីក្រុងទៅកាន់ទីជនបទចុងកាត់មាត់ញក ហើយពីកន្លែងមួយទៅកាន់កន្លែងមួយទៀត ប្រជាជនទូទៅត្រូវបានដាក់ឱ្យស្ថិតនៅក្នុងបរិវេណប្រមូលផ្ដុំ ធ្វើរួម ហូបរួម។ យើងម្នាក់ៗ គ្មាននៅសេសសល់កម្មសិទ្ធិអ្វីទាំងអស់ តាំងពីមធ្យោបាយ និងឧបករណ៍ផលិតកម្ម រហូតដល់ផ្ទះសម្បែង និងសម្ភារៈប្រើប្រាស់ សូម្បីតែចាន ស្លាបព្រា ឆ្នាំង ។ល។ ក៏គ្មានផង។ យើងមានសិទ្ធិត្រឹមបញ្ចេញកម្លាំងពលកម្មដ៏សែនវេទនា ដើម្បីប្ដូរមកវិញនូវការហូបចុកដ៏សែនខ្វះខាត និងស្រេកឃ្លាន។
ប្រការដែលគួរឱ្យព្រឺខ្លាច ដែលខ្ញុំបានជួបប្រទះក្រោយពេលរំដោះថ្ងៃ ៧ មករា ១៩៧៩ ដែលពួក ប៉ុល ពត បានបន្សល់ទុក គឺ ការព្រាត់ប្រាស ប្ដី-ប្រពន្ធ កូនចៅ និងបង-ប្អូន ការអត់ឃ្លានដែលបានគំរាមជីវិតប្រជាជន មិនមែនតែក្នុងគ្រួសារមួយ ឬ ភូមិ ឃុំ ស្រុក ឬ ខេត្ដមួយនោះទេ ប៉ុន្ដែ គឺ ទូទាំងប្រទេស ទាំងមូល។ ពិតមែនតែប្រទេសជាតិ ត្រូវបានរំដោះ យើងស្ថិតនៅក្នុងស្ថានភាពសល់តែបាតដៃទទេ។ នៅទូទាំងប្រទេស សុទ្ធសឹងតែជនភៀសខ្លួន នៅលើទឹកដីរបស់ខ្លួន។ នៅតាមផ្លូវតូច ផ្លូវធំ តាមទីក្រុង ទីប្រជុំជន និងជនបទទូទាំងប្រទេស យើងស្ថិតនៅក្នុងសភាពប្រហាក់ប្រហែលគ្នា គឺដើរទាំងហ្វូងៗ ក្នុងភាពហត់ហេវ ស្គមស្គាំង ស្លេកស្លាំង សម្លៀកបំពាក់រហែករយ៉ៃ ដើរដោយគ្មានស្បែកជើង នាំកូនចៅ ធ្វើដំណើរតម្រង់ទៅស្រុកកំណើត។
ទុក្ខវេទនា និងការព្រាត់ប្រាសទាំងអស់នេះ ខ្ញុំបានទទួលរងដោយផ្ទាល់នៅពេលព្រាត់ ពីស្វាមី ជាទីស្រឡាញ់ រស់នៅក្នុងរបប ប៉ុល ពត និងក្រោយមក ចូលរួមក្នុងសកម្មភាពមនុស្សធម៌នេះ ដើម្បីជួយសម្រាលទុក្ខលំបាករបស់ជនរងគ្រោះដោយផ្ទាល់ជាមួយស្វាមីខ្ញុំ ដែលជាថ្នាក់ដឹកនាំនាពេលនោះរហូតដល់បច្ចុប្បន្ននេះ។ ការរស់នៅក្នុងទុក្ខលំបាក ទាំងអស់នេះ ព្រមទាំង ការឃើញដោយផ្ទាល់ក្នុងការជួយសង្គ្រោះនេះ គឺជាកម្លាំងជំរុញ និងបង្កើតឡើងនូវការប្ដេជ្ញាចិត្ដដោយឥតរាថយរបស់ខ្ញុំក្នុងការបំពេញបេសកកម្មមនុស្សធម៌ ប្រកបដោយឆន្ទៈមុះមុត អង់អាចក្លាហាន លើកកម្ពស់តម្លៃមនុស្សធម៌ លើកកម្ពស់ការគោរពច្បាប់មនុស្សធម៌អន្ដរជាតិ ដើម្បីជួយជនរងគ្រោះដោយសារភាពក្រីក្រ ដោយសារគ្រោះមហន្ដរាយផ្សេងៗ ព្រមទាំងការប្រយុទ្ធទប់ស្កាត់នឹងការរីករាលដាលជំងឺអេដស៍ មេរោគអេដស៍ និងជំងឺឆ្លងគ្រប់ប្រភេទនៅគ្រប់ទីកន្លែង និងគ្រប់ពេលវេលាដោយពុំមានការរើសអើង និងបែងចែកឡើយ។ ជាងនេះទៅទៀត គោលបំណងដ៏សំខាន់របស់ខ្ញុំ គឺ ចូលរួមចែករំលែកនូវទុក្ខលំបាករបស់បង-ប្អូនជនរងគ្រោះ ដែលនៅសេសសល់ដោយសារសង្គ្រាម ភាពក្រីក្រ ដោយសារគ្រោះមហន្ដរាយធម្មជាតិ និងជំងឺរាតត្បាតផ្សេងៗ ហើយរឹតតែមិនចង់ឱ្យបង-ប្អូន កូនក្មួយជំនាន់ក្រោយ ជួបបញ្ហាដូចជនរងគ្រោះជំនាន់នោះផងដែរ។
- សម្ដេចអគ្គមហាសេនាបតីតេជោ ជាទីគោរពដ៏ខ្ពង់ខ្ពស់
- ឯកឧត្ដម លោកជំទាវ លោក លោកស្រី ប្អូនៗ និង ក្មួយៗនិស្សិតទាំងអស់ ជាទីមេត្រី !
ខ្ញុំយល់ថា មានតែសង្គមប្រកបដោយមនុស្សធម៌ទេ ដែលជាសង្គមមានភាពរីកចម្រើនកម្រិតខ្ពស់។ ហើយមានតែធ្វើដូច្នេះទេ ទើបយើងអាចកសាងសង្គមកម្ពុជាមួយ ដែលមានកោសិកាតភ្ជាប់គ្នា ប្រជាជនមានចំណេះដឹងជ្រៅជ្រះ និងវប្បធម៌រឹងមាំ ចាកផុតពីភាពក្រីក្រ និងចាកផុតពីជំងឺឆ្លងនានា មានធនធានមនុស្សកាន់តែប្រសើរឡើង កាត់បន្ថយភាពក្រីក្រ និងមានវិសមភាពសង្គមតិចតួច ការថែរក្សាមរតកបរិស្ថានកម្ពុជា កាន់តែល្អប្រសើរឡើង ជាពិសេសនឹងធ្វើឱ្យកម្ពុជាក្លាយទៅជាសង្គមមួយគ្មានការរើសអើង ចំពោះស្ដ្រី និងកុមារ ពោលគឺ ពលរដ្ឋទាំងអស់មានលទ្ធភាពប្រសើរ និងមានសិទ្ធិស្មើគ្នាចំពោះការរស់នៅ រួមទាំងសេវាថែទាំសុខភាព និងការអប់រំ ។
សញ្ញាបត្រ បណ្ឌិតកិត្ដិយសផ្នែកមនុស្សធម៌ ដែលខ្ញុំទទួលយកនាពេលនេះ បានបន្ថែមតម្លៃមួយកម្រិតធំថែមទៀត ទៅលើអ្វីៗ ដែលកាកបាទក្រហមកម្ពុជា បានអនុវត្ដកន្លងមកហើយកំពុងតែបន្ដអនុវត្ដប្រកបដោយប្រសិទ្ធភាព ក្នុងការពង្រឹង និងពង្រីកសកម្មភាពមនុស្សធម៌ ដើម្បីឆ្លើយតបទៅនឹងសេចក្ដីត្រូវការរបស់ប្រជាជនក្រីក្រ និងជនងាយរងគ្រោះ។
ជាមួយគ្នានេះ ដើម្បីឆ្លើយតបទៅនឹងការយកចិត្ដទុកដាក់ និងការផ្ដល់នូវជំនឿទុកចិត្ដមកលើរូបខ្ញុំតាមរយៈការផ្ដល់កិត្ដិយសនេះ ខ្ញុំសូមប្រកាសទទួលយកប្រកបដោយការប្ដេជ្ញាចិត្ដ ក្នុងការលើកកម្ពស់ការចូលរួមរបស់សង្គមជាតិទាំងមូលទាំងនៅក្នុងសង្គមស៊ីវិល ទាំងក្នុងវិស័យឯកជន ដើម្បីចូលរួមចំណែកកាត់បន្ថយភាពក្រីក្រ តាមរយៈការលើកកម្ពស់ភាពជាម្ចាស់ និងការចូលរួមរបស់សហគមន៍មូលដ្ឋាន ពង្រឹងភាពជាដៃគូ នៅគ្រប់លំដាប់ថ្នាក់ និងពង្រឹងកម្លាំងស្មគ្រ័ចិត្ដ ជាពិសេសការធ្វើឱ្យតម្លៃវប្បធម៌ខ្មែរ តម្លៃមនុស្សធម៌ តម្លៃស្មារតី សាមគ្គីភាព និង “វប្បធម៌ចែករំលែក” ជួយគ្នាទៅវិញ-ទៅមក ជាពិសេសជួយគ្នាក្នុងគ្រាក្រត្រូវតែបានលើកកម្ពស់ឱ្យកាន់តែរស់រវើកឡើងក្នុងសង្គមជាតិខ្មែរយើង ។
ជាទីបញ្ចប់ ក្នុងទិវាប្រកបដោយនក្ខតឫក្សនេះ ខ្ញុំម្ចាស់សូមថ្វាយព្រះពរចំពោះ ព្រះករុណា សម្ដេចព្រះវររាជបិតាជាតិខ្មែរ និង សម្ដេច ព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្ដិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់ និងក្នុងឱកាសបុណ្យចម្រើនព្រះជន្មវស្សា ដ៏ឧត្ដុងឧត្ដមនៃ ព្រះករុណា សម្ដេចព្រះ វររាជបិតា ជាតិខ្មែរ គម្រប់ ៨៦ យាងចូល ៨៧ ព្រះវស្សា សូម ព្រះអង្គ មានព្រះរាជសុខភាពល្អបរិបូណ៌ មានព្រះជន្មាយុយឺនយូរ ដើម្បីគង់ជានិម្មិតរូបនៃកម្លាំង ជួយពង្រឹងស្មារតីមនុស្សធម៌ ជាគំរូវីរភាព នៃស្មារតីស្រឡាញ់មនុស្សជាតិ និងជាម្លប់ដ៏ត្រជាក់ដល់ប្រជារាស្ដ្រគ្រប់រូប ជាកូន ជាចៅ ចៅទូតរបស់ព្រះអង្គរៀងដរាបតទៅ។ ខ្ញុំម្ចាស់ សូមព្រះបរមរាជានុញ្ញាត ឆ្លៀតយកឱកាសដ៏មហោឡារឹក នៃការប្រារឰព្រះរាជពិធីបុណ្យខួបលើកទី ៤ នៃការគ្រងព្រះបរមរាជសម្បត្ដិដ៏ឧត្ដុងឧត្ដមរបស់ ព្រះករុណា ព្រះមហាក្សត្រ នរោត្ដម សីហមុនី ជាទីសក្ការៈដ៏ខ្ពង់ខ្ពស់ ថ្វាយព្រះពរជ័យ បវរមហាប្រសើរ សូមព្រះអង្គ មានព្រះរាជសុខភាពល្អ បរិបូណ៌ ព្រះកាយពលមាំមួន ព្រះបញ្ញាញាណភ្លឺថ្លា ដើម្បីគង់ប្រថាប់ក្នុងព្រះមហាសិរីរាជសម្បត្ដិ គ្រប់គ្រងប្រជារាស្ដ្រកម្ពុជាយូរអង្វែងតរៀងទៅ។
ក្នុងឱកាសទទួលជ័យលាភី បណ្ឌិតកិត្ដិយស ផ្នែកមនុស្សធម៌ នេះ ខ្ញុំសូមចែករំលែកនូវសេចក្ដីរីករាយនេះ ជាមួយសម្ដេចអគ្គមហាសេនាបតីតេជោ ហ៊ុន សែន ស្វាមីជាទីស្រឡាញ់របស់ខ្ញុំ និង កូនៗ របស់ខ្ញុំ ព្រមទាំងចៅៗទាំងអស់ ដែលតែងតែផ្ដល់កម្លាំងចិត្ដដល់ខ្ញុំ នៅក្បែរ និង គាំទ្រខ្ញុំគ្រប់កាលៈទេសៈទាំងអស់ ទាំងក្នុងជីវិតរស់នៅសាមញ្ញ ទាំងក្នុងជីវិតការងារបម្រើជាតិមាតុភូមិ។ សញ្ញាបត្រ បណ្ឌិតកិត្ដិយសផ្នែកមនុស្សធម៌ នេះ ជាមោទនភាព និងកិត្ដិយស ពុំមែនសម្រាប់តែខ្ញុំម្នាក់ឯង និងក្រុមគ្រួសារខ្ញុំនោះទេ តែជាការពិតវាជាក្ដីមោទនភាព និងកិត្ដិយសរបស់ថ្នាក់ដឹកនាំ មន្ដ្រី បុគ្គលិក កម្មករ អ្នកស្ម្រ័គចិត្ដ យុវជន សមាជិក-សមាជិកា កាកបាទក្រហមកម្ពុជា គ្រប់ៗរូបនៅទូទាំងព្រះរាជាណាចក្រកម្ពុជា នៅគ្រប់ជំនាន់ទាំងអស់ - ខ្ញុំសូមផ្ទេរជូនដល់គ្រប់ៗគ្នា ទោះមាន ឬ គ្មានវត្ដមាននៅក្នុងពិធីនេះនូវកិត្ដិយសដ៏ឧត្ដុងឧត្ដមថ្លៃថ្លានេះ។
នៅទីបញ្ចប់នេះ ខ្ញុំសូមថ្លែងនូវការដឹងគុណយ៉ាងជ្រាលជ្រៅចំពោះ សម្ដេច ឯកឧត្ដម ឧកញ៉ា លោកជំទាវ អង្គទូត អង្គការជាតិ-អន្ដរជាតិ និងដៃគូសហប្រតិបត្ដិការ លោក លោកស្រី នាងកញ្ញា សប្បុរសជន សមាជិក-សមាជិកាទាំងអស់ដែលបាននិងកំពុងចូលរួមសកម្មជានិច្ច ក្នុងពិធីនេះ ម្ពុជា ្ដិយស ូមិ ក្នុងបុព្វហេតុមនុស្សធម៌ និងបានចូលរួមអបអរលើកទឹកចិត្ដដល់រូបខ្ញុំ និងក្រុមគ្រួសារក្នុងពិធីទទួលសញ្ញាបត្របណ្ឌិតកិត្ដិយស ផ្នែកមនុស្សធម៌ នាពេលនេះ។
ខ្ញុំសូមគោរពជូនពរ សម្ដេច ឯកឧត្ដម ឧកញ៉ា លោកជំទាវ លោក លោកស្រី នាងកញ្ញា បណ្ឌិត សាស្ដ្រាចារ្យ និង សមាជិកទាំងអស់នៃ សាកលវិទ្យាល័យកម្ពុជា សូមបានប្រកបដោយពុទ្ធពរទាំង ៤ ប្រការ គឺ អាយុ វណ្ណៈ សុខៈ និង ពលៈ កុំបីឃ្លៀងឃ្លាត ឡើយ ។
សូមអរគុណ !
