អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

jQuery Carousel
ព័ត៌មានថ្មីៗ

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានទទួលជួបសវនាការ និងសម្តែងការគួរសមជាមួយប្រតិភូគណៈកម្មាធិការអន្តរជាតិកាកបាទក្រហម (អាយ. ស៊ី. អរ. ស៊ី)

នៅ​ទី​ស្នាក់​ការ​កណ្តាល​កាកបាទ​ក្រហម​កម្ពុជា​ នាព្រឹកថ្ងៃទី​ ២៣​ ខែ​ មករា​ ឆ្នាំ​ ២០១៧​ នេះ​ សម្តេច​កិត្តិ​ព្រឹទ្ធ​បណ្ឌិត​​ ប៊ុន​ រ៉ានី​ ហ៊ុនសែន​ ប្រធាន​កាកបាទ​ក្រហម​កម្ពុជា​ បាន​អនុញ្ញាត​ទទួល​ជួប​សវនាការ​ និង​សម្តែង​ការ​គួរ​សម​ជា​មួយ​ប្រតិភូ​គណៈកម្មាធិការ​អន្តរជាតិ​កាកបាទ​ក្រហម​ (អាយ​.​ ស៊ី​.​ អរ.​ ស៊ី)​ ដើម្បី​ជម្រាប​លា​ក្នុង​ពេល​បញ្ចប់​បេសកកម្មនៅ​កម្ពុជា​របស់​ លោក​ ​ Bart Vermeiren ប្រធាន​បេសកកម្ម​ប្រចាំ​ព្រះរាជាណាចក្រ​កម្ពុជា​ ហើយ​នឹង​ត្រូវ​ចូល​កាន់តំណែង​បន្ត​ដោយ​ លោក​ Roman ParaMonov​ ។

 

នៅ​ក្នុង​ជំនួប​នេះ​ សម្តេច​កិត្តិ​ព្រឹទ្ធ​បណ្ឌិត​ប្រធាន​ បាន​សម្តែង​នូវ​ការ​ស្វាគមន៍​ដល់​គណៈប្រតិភូ​ អាយ​.​ ស៊ី​.​ អរ​. ស៊ី​ ព្រម​ទាំង​បាន​កោត​សរសើរ​ដល់​កិច្ច​សហ​ប្រតិបត្តិការ​រវាង​ស្ថាប័ន​ទាំងពីរ​ ដែល​តែងតែ​ជួប​ពិភាក្សា​ការងារ​ជា​មួយ​គ្នា​យ៉ាង​ទៀងទាត់​ប្រកប​ដោយ​ភាព​រលូន​ និងការ​ទទួល​ខុស​ត្រូវ​ខ្ពស់​នា​ពេល​កន្លង​មក។

 

ជាកិច្ចឆ្លើយតប​ លោក​ Bart Vermeiren បាន​សម្តែង​នូវ​ការ​អរគុណ​ដ៏​ជ្រាល​ជ្រៅ​ចំពោះ​ សម្តេច​កិត្តិ​ព្រឹទ្ធ​បណ្ឌិត​ប្រធាន​ ដែល​បាន​អនុញ្ញាត​ឱ្យ​គណៈប្រតិភូ​បាន​ចូល​សម្តែង​ការគួរ​សម​ និងបាន​ផ្តល់​ឱកាស​ជាពិសេស​ដល់​រូប​លោក​ផ្ទាល់​បាន​ជួប​សំណេះសំណាល​មុន​ពេល​បញ្ចប់​នូវ​បេសកកម្ម​ការ​ទូត​របស់​ខ្លួន។​ ជា​មួយ​គ្នា​នោះ ​លោក​ Bart Vermeiren ក៏​បាន​ឧទ្ទេស​នាម​នូវ​ លោក​ Roman ParaMonov ដែល​ជា​អ្នក​បន្ត​វេន​ពី​រូប​លោក​ ជូន​ដល់​សម្តេច​កិត្តិ​ព្រឹទ្ធ​បណ្ឌិត​ប្រធាន​ទៀត​ផង។

 

ជាទីបញ្ចប់​ សម្តេច​កិត្តិ​ព្រឹទ្ធ​បណ្ឌិត​ប្រធាន​ បាន​ជូន​ពរ​ដល់​គណៈប្រតិភូ​ សូម​មាន​សុខភាព​ល្អ​សុភមង្គល​ក្នុង​ក្រុម​គ្រួសារ​ ព្រម​ទាំង​ជោគជ័យ​ក្នុង​ការ​បំពេញ​ការងារ​របស់​ខ្លួន៕

 

សាខាកាកបាទក្រហមកម្ពុជាខេត្តសៀមរាបចូលរួមមរណៈទុក្ខគ្រួសារកុមារលង់ទឹកស្លាប់

សាខាកក្រកខេត្តសៀមរាប៖ នៅព្រឹកថ្ងៃទី២០ ខែមករា ឆ្នាំ២០១៧ លោកស៊ុំ សំអន នាយកកាកបាទក្រហមកម្ពុជាខេត្តសៀមរាប បានដឹកនាំក្រុមប្រតិបត្តិសាខា អនុសាខាជីក្រែង នាំយកគ្រឿងឧបភោគបរិភោកចូលរួមរំលែកមរណៈទុក្ខ ជាមួយក្រុមគ្រួសារសពកុមាររងគ្រោះលង់ទឹកស្រះស្លាប់ ចំនួន២នាក់ កាលពីរសៀល ពីថ្ងៃទី១៩ ខែមករា ឆ្នាំ២០១៧ វេលាម៉ោង ១.៣០នាទី មានឈ្មោះដូចខាងក្រោម៖ 

១. កុមារា ហុក លីដា អាយុ ៦ឆ្នាំ 
 ២. កុមារា មី គឹមស្រេង អាយុ ៥ឆ្នាំ កុមារទាំ២នាក់ រស់នៅភូមិកំពង់ម្កាក់ ឃុំគោកធ្លកក្រោម ស្រុកជីក្រែង ខេត្តសៀមរាប។

មានប្រសាសន៍ចូលរួមរំលែកទុក្ខនាឱកាសនោះ លោកនាយកបានពាំនាំការរំលែកនូវមរណទុក្ខ​ពីថ្នាក់ដឹកនាំមានឯកឧត្តមបណ្ឌិត ឃឹម ប៊ុន សុង ប្រធានគណៈកម្មាធិការសាខា និងលោកជំទាវ ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមក្រហមកម្ពុជា ចូលរួមសោកស្ដាយជាមួយក្រុមគ្រួសារ ដែលបានបាត់បង់កូនៗទាំង២នាក់។ សូមឱ្យវិញ្ញាណក្ខន្ធចៅៗទាំង២បានទៅកាន់សុគតិភព។


គ្រឿងឧបភោគបរិភោគចូលរួមបុណ្យសពមាន៖ អង្ករ១០០គីឡូក្រាម ទឹកបរិសុទ្ធ១០យួរ មុង២ ភួយ២ សារុង២ ក្រមា២ និងថវិកា ៤០ម៉ឺនរៀល ជាមួយគ្នានោះ អនុសាខាស្រុកជីក្រែងចូលរួមថវិកា២០ម៉ឺនរៀលផងដែរ។

ចាស់ជរាគ្មានទីពឹងទទួលអំណោយពីសាខាកាកបាទក្រហមកម្ពុជាខេត្តរតនគីរី

ខេត្តរតនគិរី ៖ នៅរសៀល ថ្ងៃទី២០ ខែមករា ឆ្នាំ២០១៧ លោក ឌឹម ណាត នាយកសាខាកាកបាទក្រហមកម្ពុជាខេត្តរតនគិរី និងអនុសាខាកាកបាទក្រហមស្រុកលំផាត់ បានចុះសួរសុខទុក្ខ និងនាំយកអំណោយមនុស្សធម៌ជូនលោកយាយចាស់ជរាគ្មានទីពឹងម្នាក់ឈ្មោះស្រី ទូច អាយុ៨៧ ឆ្នាំ រស់នៅភូមិដីឡូត៍ ឃុំជ័យឧត្តម ស្រុកលំផាត់ ហើយមានជីវភាពក្រលំបាករស់នៅម្នាក់ឯងគ្មានកូនចៅបានអ្នកជិតខាងមើលថែ។ 


ក្នុងឱកាសនោះលោកនាយសាខា ក៍បានពាំនាំបណ្តាំផ្ញើសួរសុខទុក្ខពីឯកឧត្តម ថង សាវុន ប្រធានគណៈកម្មាធិការសាខា ដោយផ្តាំផ្ញើអ្នកជិតខាងបន្តជួយមើលថែ យកអាសារលោកយាយផង។


អំណោយរួមមានៈ អង្ករ ៥០ គីឡូក្រាម មី មួយកេសតូច ត្រីខ មួយ យួរ មុង ភួយ សារ៉ុង ក្រមារ មួយ ទឹកត្រី បីដប ទឹកស៊ីអីវមួយ យួរ ប្រេងឆា មួយដប និង ថវិកា ២០ម៉ឺនរៀល ថវិកាផ្ទាល់របស់សាលាស្រុកលំផាត់ ៕

សាខាកាកបាទក្រហមកម្ពុជាខេត្តកំពង់ធំ បើកកិច្ចប្រជុំបូកសរុបលទ្ធផលការងារប្រចាំឆ្នាំ

សាខាកក្រក ខេត្តកំពង់ធំ ៖ នៅថ្ងៃទី១៩ ខែមករា ឆ្នាំ២០១៧ សាខាកាកបាទក្រហមកម្ពុជាខេត្តកំពង់ធំបានបើកកិច្ចប្រជុំបូកសរុបលទ្ធផល ការងារប្រចាំឆ្នាំ២០១៦ ទិសដៅអភិវឌ្ឍន៍ឆ្នាំ២០១៧ ដោយមានការចូលរួមពីសំណាក់ លោកជំទាវ ឃួន ឃុនឌី ប្រធានស្តីទីគណៈកម្មាធិការសាខា ពិធីនេះមានការចូលរួមពីលោក លោកស្រី ប្រធាន អនុប្រធាន សមាជិក សមាជិកាគណៈកម្មាធិការសាខាខេត្ត ក្រុង ស្រុក និងក្រុមប្រតិបត្តិផងដែរ ។

 

លោកស្រីឌុក ស៊ីដា នាយិកាប្រតិបត្តិសាខា បានធ្វើរបាយការណ៍សង្ខេបទាក់ទង​ការអនុវត្តន៍​ការងារ​ក្នុងឆ្នាំ២០១៦ ។ កិច្ចប្រជុំនេះមានគោលដៅឆ្លុះបញ្ចាំងចំណុចវិជ្ជមាន ចំណុចអវិជ្ជមានក្នុង​សកម្មភាពការងារលើវិស័យស្នូលទាំងបួន។  អាស្រ័យដោយកត្តាបម្រែបម្រួលអាកាសធាតុជាសកល និងឥទ្ធិពលនៃរដូវវស្សាឆ្នាំ២០១៥ ទឹកជំនន់មានសភាពតូចជាងបណ្តាឆ្នាំមុនគួបផ្សំ និង​ភ្លៀងបង្អុរ​តិចផងនោះឈានចូលមកដល់រដូវប្រាំង២០១៦ធ្វើឲ្យតំបន់ជាច្រើនជួបនិងភាពរាំងស្ងួតខ្វះខាតទឹកស្រោចស្រពដំណាំដាំដុះនិងធ្វើឲ្យសាខាជួបបញ្ហាប្រឈមជាច្រើនដែលត្រូវរិះរកដំណោះស្រាយដូចជាប្រជាពលរដ្ឋច្រើនគ្រួសារខ្វះស្បៀងអាហារ និងខ្វះទឹកប្រើប្រាស់ក្នុងដំណាក់កាលរដូវវស្សា​ភ្លៀងបាន​អំណោយផលល្អធ្វើឲ្យការងារបង្ករបង្កើនផលមានការប្រសើរឡើង។

 

លោក ជំទាវ ឃួន ឃុន ឌី មានប្រសាសន៍ថាការឆ្លុះបញ្ចាំងលើសកម្មភាពអនុវត្តក្នុងមួយឆ្នាំកន្លងមក ដោយមានទិសដៅយុទ្ធសាស្រ្តរបស់ថ្នាក់ជាតិជាត្រីវិស័យ និងស្ថិតក្រោមការដឹកនាំរបស់​សម្តេចកិត្តិព្រឹទ្ធបណ្ឌិតប្រធាន និងការគាំទ្រររបស់គណៈកិត្តិយស និងករគ្រប់គ្រងផ្ទាល់​របស់​គណៈកម្មាធិការសាខា ក្រុមប្រតិបត្តិ អ្នកអនុវត្ត មានមន្ទីរអង្គភាពនឹងកិច្ចសហការល្អជាមួយដៃគូរ អភិវឌ្ឍន៍នានាវិស័យ ឯកជន សប្បុរសជន។ លើសពីនេះទៅទៀតបន្តលើកកម្ពស់ការងារគ្រប់គ្រងគ្រោះមហន្តរាយ ការត្រៀមបំរុង ការឆ្លើយតប​ជា​ប្រចាំ និងមានបញ្ជ្រាបបញ្ចូលនៅពិពិធភាពក្នុងសកម្មភាពនានាតាមវិស័យស្នូល បន្តពង្រឹងប្រព័ន្ធ​គ្រប់គ្រង​និងចែករំលែករបាយការណ៍ និងខិតខំប្រឹងប្រែងរកសមាជិកជួយ​ទ្រទ្រង់ដល់​កាកបាទក្រហម​កម្ពុជាខេត្ត ។

 

ចុងបញ្ចប់លោកជំទាវស្នើឲ្យអនុសាខាកាកបាទក្រហមទាំងអស់ត្រូវយកចិត្តទុកដាក់ទៅ លើយុវជនស្ម័គ្រចិត្តនៅតាមភូមិនិងបង្ក់នការរកមូលនិធិ ធនធានតាមរូបភាព​ ផ្សេងៗដែលសមស្រប ។

 

នាយចេកទទួលអំណោយមនុស្សធម៌ពីកាកបាទក្រហមកម្ពុជា

កក្រក ៖ នៅទីស្នាក់ការកណ្ដាលកាកបាទក្រហមកម្ពុជា នារសៀលថ្ងៃទី១៩ ខែមករា ឆ្នាំ២០១៧នេះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសហការី បានឧបត្ថម្ភនូវគ្រឿងឧបភោគ-បរិភោគ និងថវិកាមួយចំនួន ជាអំណោយមនុស្សធម៌របស់កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនជាប្រធាន ជូនដល់តារាកំប្លែង ” នាយចេក” ឈ្មោះដើម ឈុំ ប៊ុនឈឿន អាយុ ៦៣ឆ្នាំ តារាកំប្លែងជើងចាស់ មានទីលំនៅភូមិឆ្មារពួន ឃុំជើងកើប ស្រុកកណ្ដាលស្ទឹង ខេត្តកណ្ដាល ដែលកំពុងជួបទុក្ខផ្ទួនគ្នា ដោយភរិយាមានជំងឺត្រូវវះកាត់ រីឯម្តាយបង្កើតជរា មានជំងឺបេះដូងធ្ងន់ធ្ងរ កំពុងសម្រាកព្យាបាលនៅមន្ទីរពេទ្យជ័យជំនះ ក្រុងតាខ្មៅ ខេត្តកណ្តាល។

 

ក្រោយទទួលការសណ្តោសប្រណីពីកាកបាទក្រហមកម្ពុជា លោកឈុំ ប៊ុនឈឿន ហៅនាយចេក បានសម្ដែងនូវការដឹងគុណទាំងក្តីរំភើបចិត្តឥតឧបមា ព្រោះមាតាមនុស្សធម៌គឺ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជានិច្ចកាលតែងតែយកចិត្តទុកដាក់ចំពោះសិល្បករជើងចាស់ ដែលបានរួមចំណែកថែរក្សាសិល្បៈ វប្បធម៌ និងបន្សល់ទុកស្នាដៃជាច្រើនសម្រាប់យុវជនខ្មែរជំនាន់ក្រោយ៕

កិច្ចប្រជុំពិភាក្សាការងាររបស់សាខាកាកបាទក្រហមកម្ពុជាខេត្តព្រៃវែង

សាខាកក្រកខេត្តព្រៃវែងៈ នៅរសៀលថ្ងៃទី១៨ ខែមករា ឆ្នាំ២០១៧ នៅសាខាកាកបាទក្រហមកម្ពុជាខេត្តព្រៃវែងបានបើកកិច្ចប្រជុំស្តីពីការងារ​​គណៈកម្មាធិការសាខាស្ថិតក្រោមអធិបតីភាពឯកឧត្តម ជា សុមេធី ប្រធានគណៈកម្មាធិការសាខា និងមានការអញ្ជើញចូលរួមពី ឯកឧត្តម លោកឧកញ៉ា លោក លោកស្រី សមាជិក សមាជិកា គណៈកម្មាធិការសាខា ក្រុមប្រតិបត្តិសាខាសរុបចំនួន១៨រូប។

អង្គប្រជុំបានធ្វើការពិភាក្សា និងដោះស្រាយនូវបញ្ហាប្រឈមនានា ដែលសាខាបានជួបប្រទះកន្លងមក ក៍ដូចជាសំណូមពរមួយចំនួន ដែលបានលើកឡើងដោយក្រុមប្រតិបត្តិសាខា និងបានធ្វើការកែសម្រួល និងអនុម័តដាក់អោយប្រើប្រាស់នូវផែនការសកម្មភាព និងថវិកា សម្រាប់សាខាអនុវត្តក្នុងឆ្នាំ២០១៧ នេះដែលក្នុងនោះរួមមានការសាងសង់ផ្ទះជូនគ្រួសារចាស់ជរាក្រីក្រ និងទុរគតជន ចំនួន ២៦ខ្នងផ្ទះ និងសាងសង់បង្គន់អនាម័យ ចំនួន ៥០បង្គន់ ផងដែរ។

 

គ្រួសាររងគ្រោះស្លាប់ដោយសារផ្ទុះមីននៅខេត្តត្បូងឃ្មុំទទួលអំណោយពីកាកបាទក្រហមកម្ពុជា

កក្រក ៖ កាលពីរសៀលថ្ងៃទី១៨ ខែមករា ឆ្នាំ២០១៧ ឯកឧត្តមវេជ្ជ. អ៊ុយ សំអាត នាយក នាយកដ្ឋានគ្រប់គ្រងមហន្តរាយកាកបាទក្រហមកម្ពុជារួមជាមួយមន្រ្តីសាខានិងយុវជនកាកបាទក្រហមកម្ពុជាខេត្តត្បូងឃ្មុំបានអញ្ជើញចុះចូលរួមរំលែកទុក្ខយ៉ាងក្រៀមក្រំ និងនាំយកនូវគ្រឿងឧបភោគ-បរិភោគមួយចំនួន និងថវិកាចំនួន១០លានរៀល ជាអំណោយរបស់កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ជូនដល់គ្រួសាសពលោកអនុសេនីយ៍ត្រី សួស យឿន អាយុ ៣៩ឆ្នាំ បានទទួលមរណភាព កាលពីរសៀលថ្ងៃទី១៦ ខែមករា ឆ្នាំ២០១៧ដោយសារផ្ទុះមីន (ក្នុងពេលកំពុងដោះមីន) នៅភូមិកោងកាងទី៣ ឃុំកោងកាង ស្រុកពញ្ញាក្រែក ខេត្តត្បូងឃ្មុំ។

 

ក្នុងមរណទុក្ខដ៏ក្តុកក្តួលនេះ ឯកឧត្តមវេជ្ជ.បានសម្ដែងនូវទុក្ខយ៉ាងក្រៀមក្រំ និងសូមបួងសួងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិក្នុងលោកទាំងអស់ សូមឲ្យវិញ្ញាណក្ខន្ធ លោកអនុសេនីយ៍ត្រី សួស យឿន បានទៅកាន់ក្នុងសុគតិភពជានិច្ចនិរន្តរ កុំបីឃ្លៀងឃ្លាតឡើយ៕

 

វេទិកាសាធារណៈស្ដីពីពិការភាពក្នុងការងារសុវត្ថិភាពចរាចរណ៍ នៅវិទ្យាល័យហ៊ុន សែន សៀមរាប

សាខាកក្រកខេត្តសៀមរាប៖ នៅព្រឹកថ្ងៃទី១៧ ខែមករា ឆ្នាំ២០១៧ សាខាកាកបាទក្រហមកម្ពុជាខេត្តសៀមរាបសហការជាមួយអាជ្ញាធរឃុំកណ្ដែកនិងវិទ្យាល័យហ៊ុន សែនស្វាយធំ ស្រុកប្រាសាទបាគង ខេត្តសៀមរាប បានរៀបចំធ្វើវេទិកាសាធារណៈស្ដីពីពិការភាពក្នុងការងារសុវត្ថិភាពចរាចរណ៍ នៅវិទ្យាល័យ ហ៊ុន សែន សៀមរាប ដោយមានការចូលរួមពីសំណាក់លោក ស៊ុំ សំអន នាយកសាខាកាកបាទក្រហមកម្ពុជាខេត្តសៀមរាប និងមានវាគ្មិនអញ្ជើញចូលរួមមកពីមន្ទីរសាធារណការនិងដឹកជញ្ជូនខេត្ត មន្ទីរសង្គមកិច្ច អតីតយុទ្ធជន និងយុវនិតិ សម្បទាខេត្ត ស្នងការនគរបាលខេត្ត និងតំណាងអង្គការជនពិការអន្តរជាតិ និងមានយុវជនកាកបាទក្រហមកម្ពុជា និងសិស្សានុសិស្សនៃវិទ្យាល័យ ហ៊ុន សែន ស្វាយធំ ចូលរួមសរុបចំនួន ១៥៦នាក់ ស្រី៦២នាក់ (ជនពិការ ១១នាក់ ស្រី ៣នាក់) ក្រោមការជួយឧបត្ថមគាំទ្រពីអង្គរ LIGHT FOR THE WORLD។

 

វេទិកានេះបានរៀបចំឡើងក្នុងគោលបំណង៖ លើកកម្ពស់សិទ្ធជនពិការក្នុងការចូលរួមការងារសង្គម និងលប់បំបាត់ការរើសអើងគ្រប់រូបភាពលើជនពិការ។ គាំទ្រឱ្យមានផ្លូវ និងជម្រាលសម្រាប់ជនពិការដើម្បីប្រើប្រាស់សម្រាប់ទទួលសេវាសាធារណៈក្នុងសង្គម។ បង្ហាញពីអត្រាគ្រោះថ្នាក់ស្លាប់ របួស និងពិការ ដោយសារគ្រោះថ្នាក់ចរាចរណ៍។ បង្កើនការពាក់ពួកសុវត្ថិភាពរបស់សិស្សានុសិស្សតាមរយៈការយល់ដឹងពីការផ្សព្វផ្សាយនេះ។

 

សាខាកាកបាទក្រហមកម្ពុជាចូលរួមបុណ្យសពកូនប្រុសលោកស្រី អ៊ឹង សុទ្ធា

សាខាកក្រកខេត្តព្រះវិហារ៖នៅរសៀលថ្ងៃទី១៨ ខែមករា ឆ្នាំ២០១៧ នេះលោកជំទាវចឹក ហេង ប្រធានគណៈកម្មាធិការសាខាកាកបាទ ក្រហមកម្ពុជាខេត្តព្រះវិហារ បាននាំយកអំណោយមនុស្សធម៌ចូលរួមរំលែកទុក្ខយ៉ាងក្រៀមក្រំជាមួយលោកស្រី អ៊ឹង សុទ្ធា ប្រធានគណៈ កម្មាធិការអនុសាខាកាកបាទក្រហមកម្ពុជាស្រុកត្បែងមានជ័យ ដែលកូនប្រុសរបស់គាត់បានស្លាប់មកពីជំងឺនៅភូមិអណ្តូងពោធិ៍ សង្កាត់កំពង់ប្រណាក ក្រុងព្រះវិហារ ខេត្តព្រះវិហារ។

 

ក្នុងឱកាសនោះលោកជំទាវប្រធានគណៈកម្មាធិការសាខាកាកបាទក្រហមកម្ពុជាខេត្តព្រះវិហារបានសំដែងនូវការសោកស្តាយចំពោះការបាត់បង់កូនប្រុសជាទីស្រឡាញ់ របស់គ្រួសារសព និងសូមបួងសួងដល់វិញ្ញាណក្ខន្ធសព សូមបានទៅកាន់សុគតិភពកុំបីឃ្លៀងឃ្លាតឡើយ។

 

ជាមួយគ្នានោះសាខាបាននាំយកសម្ភារផ្តល់ជូនរួមមាន ៖ អង្ករ១០គីឡូ មី៤កេស ត្រីខ២០កំប៉ុង ទឹកស៊ីអ៊ីវ២យួរ ទឹកត្រី១យួរ អំបិល ១កញ្ចប់ ប៊ីចេង ២គីឡូ ទឹកបរិសុទ្ធ៦កេស ថវិកាមួយចំនួន និងថវិកាឯកឧត្តម ម៉ុម ចន្ទលី អនុប្រធានកិត្តិយសសាខាចំនួន២០០,០០០ រៀលគត់។

 

កាកបាទក្រហមកម្ពុជាផ្តល់អំណោយជូនប្រជាជនងាយរងគ្រោះនៅក្រុងព្រៃវែង

កក្រក៖ នៅថ្ងៃទី ១៨ ខែមករា ឆ្នាំ២០១៧ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា ឯកឧត្តម ឧកញ៉ា សុខ ផេង អនុប្រធានអចិន្ត្រៃយ៍គណៈកម្មាធិការសាខាកាកបាទក្រហម ខេត្តព្រៃវែង ព្រមទាំងក្រុមប្រតិបត្តិសាខា អនុសាខាបានចុះសួរសុខទុក្ខ និងនាំយកអំណោយកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ជូនចាស់ជរាគ្មានទីពឹង ស្ត្រីមេមាយ កុមារកំព្រា ជនពិកា និងអ្នករស់នៅជាមួយមេរោគអេដស៍ សរុបចំនួន៤០៧គ្រួសារ មកពី ១៥ភូមិ ៣ឃុំ ក្រុងព្រៃវែង ខេត្តព្រៃវែង។

 

ក្នុងឱកាសនោះដែរ លោកជំទាវអគ្គលេខាធិការ បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមបងប្អូនប្រជាពលរដ្ឋទាំងអស់សូមថែរក្សាសុខភាព ហូបស្អាត ផឹកស្អាត គេងក្នុងមុង កុំឲ្យមូសខាំចៀសវាងឆ្លងជំងឺផ្សេងៗ ស្ត្រីមានផ្ទៃពោះត្រូវទៅពិនិត្យសុខឲ្យបានបាន៤ដងមុនពេលសម្រាល និងសូមបងប្អូនប្រជាពលរដ្ឋទាំងអស់មេត្តាចូលរួមគោរពច្បាប់ចរាចរណ៍ ដើម្បីកាត់អត្រាគ្រោះថ្នាក់ចរាចរណ៍ និងចៀសវាងឲ្យឆ្ងាយពីគ្រឿងញៀន ព្រមទាំងអនុវត្តភូមិឃុំមានសុវត្ថិភាព។

គ្រួសារនីមួយៗទទួលបាន៖ អង្ករ ៣០គីឡូក្រាម មី ១កេស ត្រីខ ១០កំប៉ុង សារុង១ មុង១ ភួយ១ និងក្រមា១។

បន្ទាប់ពីបញ្ចប់ពិធីចែកអំណោយរួចមក លោកជំទាវ អគ្គលេខាធិការ និងប្រធានគណៈកម្មាធិការសាខា បានអញ្ជើញចុះសួរសុខទុក្ខ ចាស់ជរាគ្មានទីពឹងដោយមិនអាចមកទទួលណោយដល់ខ្នងផ្ទះ ចំនួន ៦គ្រួសារ ២ភូមិ ២ឃុំ ខេត្តព្រៃវែង។


ចាស់ជរាគ្មានទីពឹងទទួលបាន៖ អង្ករ ៣០គីឡូក្រាម មី ១កេស ត្រីខ ១០កំប៉ុង សារុង១ មុង១ ភួយ១ ក្រមា១ អំពូលប្រើដោយថាមពលព្រះអាទិត្យ(Solar) និងថវិកាមួយចំនួន។

 

បន្ទាប់ពីបញ្ចប់បេសកម្មចុះចែកអំណោយរួមមក លោកជំទាវ អគ្គលេខាធិការ ក៏បានប្រគល់ឧបករណ៍បន្សុទ្ធទឹក និងសម្លាប់មេរោគក្នុងទឹក ដែលឧបករណ៍នេះមានការបន្សុទ្ធ និងសម្លាប់មេរោគ ៧ដំណាក់កាល ជូនសាខាកាកបាទក្រហមកម្ពុជា ខេត្តព្រៃវែង ដើម្បីឲ្យសាខាប្រើប្រាស់ក្នុងមានគ្រោះមន្តរាយនានា ជាពិសេសគ្រោះមន្តរាយទឹកជំនន់ ហើយឧបករណ៍នេះកាកបាទក្រហមកម្ពុជា បានទទួលការឧបត្ថម្ភពីសហព័ន្ធអន្តរជាតិផងដែរ។

 

First Prev 48 49 50 51 52