អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

jQuery Carousel
ព័ត៌មានថ្មីៗ

កាកបាទក្រហមកម្ពុជាជួបសំណេះសំណាលមន្ត្រីចូលនិវត្តន៍ និងក្រុមគ្រួសារអ្នកដែលបានទទួលមរណភាព

ស្របពេលដែលប្រជាពលរដ្ឋកម្ពុជាកំពុងប្រារព្ធពិធីកាន់បិណ្ឌ និងភ្ជុំបិណ្ឌ និងដើម្បីអបអរទិវាមនុស្សចាស់កម្ពុជា និងទិវាមនុស្សចាស់អន្តរជាតិលើកទី ១៨ ដែលនឹងប្រារព្ធនៅថ្ងៃទី ១ ខែតុលា ឆ្នាំ២០១៦ ខាងមុខនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យលោកជំទាវ ពុំ ចន្ទីនី អគ្គលេខាធិការ រៀបចំពិធីជួបជុំសំណេះសំណាល នៅរសៀលថ្ងៃទី ២៣ ខែកញ្ញា ឆ្នាំ២០១៦ នេះ ជាមួយនិវត្តជន និងក្រុមគ្រួសារអ្នកដែលបានទទួលមរណភាព ចំនួន ៦៧នាក់ ដែលធ្លាប់បម្រើការងារមនុស្សធម៌ជាមួយកាកបាទក្រហមកម្ពុជា នាពេលកន្លងមក ដោយមានការអញ្ជើញចូលរួមពី ថ្នាក់ដឹកនាំ-មន្ត្រី និងយុវជនកាកបាទក្រហមកម្ពុជា។

 

លោកជំទាវអគ្គលេខាធិការ បានមានប្រសាសន៍ថា ពិធីនេះ រៀបចំឡើងដើម្បីផ្តល់ឱកាសដល់មន្ត្រី-បុគ្គលិកជើងចាស់ និងអ្នកបន្តវេន បានជួបជុំគ្នា និងចែករំលែកបទពិសោធន៍។ និវត្តជន បានរំលឹកឡើងវិញនូវអនុស្សាវរីយ៍ដ៏សែនកំសត់ និងការពុះពារគ្រប់ឧបសគ្គតាមដងផ្លូវដ៏សែនលំបាក ដើរឆ្លងកាត់ចម្ការមីន កាត់វាល ចូលព្រៃ និងទីជនបទដាច់ស្រយ៉ាល ក្នុងប្រតិបត្តិការមនុស្សធម៌ធំៗកន្លងមក ដើម្បីនាំយកអំណោយជូនដល់ដៃជនរងគ្រោះ។

 

ជាមួយគ្នានោះ និវត្តជនបានថ្លែងថា ទោះបីពួគគាត់បានចូលនិវត្តរ៍ហើយក្តី តែពួកគាត់មានមោទនភាព ចំពោះ វឌ្ឍនភាព និងសមិទ្ធផលធំធេង របស់កាកបាទក្រហមកម្ពុជា ក្រោមការដឹកនាំប្រកបដោយគតិបណ្ឌិតនៃ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានធ្វើឱ្យកាកបាទក្រហមកម្ពុជា មានការទទួលស្គាល់ទាំងថ្នាក់ជាតិ និងនៅលើឆាកអន្តរជាតិ ហើយ សម្តេចកិត្តិព្រឹទ្ធបណ្ឌិត នៅតែនឹករលឹក ចងចាំ មិនភ្លេចពីស្នាដៃជាច្រើនដែលមន្ត្រី-បុគ្គលិកជំនាន់មុន បានកសាងឡើង ហើយបន្សល់ទុកជាមូលដ្ឋានគ្រឹះ នៃការបន្តអភិវឌ្ឍដល់អ្នកបន្តវេន ពិសេស ថែមទាំងគិតគូរពីសុខទុក្ខរបស់ពួកគាត់គ្រប់ពេលវេលា មិនភ្លេចមួយគ្រាឡើយ។

 

យ៉ាងណាម៉ិញ ទិវាមនុស្សចាស់ឆ្នាំនេះ ប្រព្រឹត្តទៅក្រោមប្រធានបទ “សមាគមមនុស្សចាស់ គឺជាយន្តការដ៏សំខាន់ជួយអភិវឌ្ឍសុខុមាលភាពមនុស្សចាស់ ក្នុងសហគមន៍ និងសង្គមជាតិ” ដែលជាទិវាមួយសម្រាប់រំលឹកគុណដល់មនុស្សចាស់ និងលើកកម្ពស់មនសិការទទួលខុសត្រូវរបស់ប្រជាពលរដ្ឋទូទាំងប្រទេស ក្នុងការចូលរួមកសាងសង្គមជាតិមួយ ។

កាកបាទក្រហមកម្ពុជា ចុះសួរសុខទុក្ខចាស់ជរាស្ត្រីមេម៉ាយ

នៅព្រឹកថ្ងៃទី ២២ ខែកញ្ញា ឆ្នាំ២០១៦ នេះ ក្រុមការងារកាកបាទក្រហមកម្ពុជា ដឹកនាំដោយ លោកជំទាវ ពុំ ចន្ទីនី អគ្គលេខាធិការ រួមជាមួយ សាខាកាកបាទក្រហមកម្ពុជា ខេត្តតាកែវ បានចុះសួរសុខទុក្ខចាស់ជរា ស្ត្រីមេម៉ាយ និងប្រជាពលរដ្ឋទីទ័លក្រតាមផ្ទះ ចំនួន ៩គ្រួសារ រស់នៅ ឃុំចំបក់ និងឃុំត្រពាំងក្រសាំង នៃស្រុកបាទី ខេត្តតាកែវ។

 

ទន្ទឹមនឹងការនាំយកអំណោយមនុស្សធម៌រួមមាន អង្ករ មី ត្រីខ មុង ភួយ សារុង ក្រមា និងថវិកា មកជូនគ្រួសារនីមួយៗ លោកជំទាវអគ្គលេខាធិការ បានមានប្រសាសន៍ផ្តាំផ្ញើសួរសុខទុក្ខ និងក្តីនឹករឮកពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលយកចិត្តទុកដាក់ចំពោះសុខទុក្ខរបស់ប្រជាពលរដ្ឋគ្រប់ពេលវេលា ដោយមិនប្រកាន់ពីនិន្នាការនយោបាយអ្វីឡើយ។ លោកជំទាវ បានផ្តាំផ្ញើដល់ប្រជាពលរដ្ឋ សូមយកចិត្តទុកដាក់ថែរក្សាសុខភាព ដោយមានអនាម័យល្អក្នុងការរស់នៅ ត្រូវសម្អាតបរិស្ថានជុំវិញផ្ទះ លុបបំបាត់ជម្រកសត្វមូសដែលជាភ្នាក់ងារចម្លងជំងឺគ្រុនឈាម ពិសេស ត្រូវបរិភោគទឹកដាំឆ្អិនជានិច្ច។

 

បន្ទាប់ពីចុះសួរសុខទុក្ខ និងចែកអំណោយមនុស្សធម៌រួចមក ក្រុមការងារ បានធ្វើការផ្សព្វផ្សាយពីបញ្ហាសុខភាពអនាម័យ និងការបន្សុទ្ធទឹកដើម្បីទទួលទានដោយប្រើប្រាស់ធុងចម្រោះ និងដាំឆ្អិន ព្រមទាំង ការប្រើប្រាស់បង្គន់អនាម័យ ជូនដល់ប្រជាពលរដ្ឋដែលរស់នៅក្នុងភូមិទៀតផង៕

 

កាកបាទក្រហមកម្ពុជាសួរសុខទុក្ខលោកជំទាវផ្លេក ភិរុណ

នៅព្រឹកថ្ងៃទី២០ ខែកញ្ញា ឆ្នាំ២០១៦ នេះ លោកជំទាវ ពុំ ចន្ទីនី អគ្គលេខាធិការ និងថ្នាក់ដឹកនាំ-មន្ត្រីកាកបាទក្រហមកម្ពុជា បានអញ្ជើញចុះសួរសុខទុក្ខ លោកជំទាវ ផ្លេក ភិរុណ មានជន្មាយុ ៩៦ឆ្នាំ ដែលជាអតីតប្រធានកាកបាទក្រហមកម្ពុជា ក្នុងឆ្នាំ១៩៧៤-១៩៧៥ និងពីឆ្នាំ១៩៧៩-១៩៩២។

 

ក្នុងឱកាសនោះ លោកជំទាវអគ្គលេខាធិការ ក៏បានពាំនាំនូវប្រសាសន៍ផ្ដាំផ្ញើសួរសុខទុក្ខ និងក្ដីនឹករឭកពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាលតែងយកចិត្តទុកដាក់ និងមិនភ្លេចពីគុណបំណាច់របស់អតីតថ្នាក់ដឹកនាំ-មន្ត្រីកាកបាទក្រហមកម្ពុជា ដែលបានលះបង់ទាំងកម្លាំងកាយ-ចិត្ត បម្រើការងារមនុស្សធម៌ជូនសមាគមជាតិរហូតដល់ចូលនិវត្តរ៍នោះឡើយ។

ទន្ទឹមនឹងឱកាសនៃរដូវកាលកាន់បិណ្ឌ និងការឈានដល់ថ្ងៃបុណ្យភ្ជុំបិណ្ឌនាពេលខាងមុខឆាប់ៗនេះ លោកជំទាវអគ្គលេខាធិការ បាននាំយកគ្រឿងបរិភោគ និងថវិកាមួយចំនួន ជូនលោកជំទាវ ផ្លេក ភិរុណ ព្រមទាំងបួងសួងជូនពរដល់លោកជំទាវ មានសុខភាពល្អ និងមានជន្មាយុយ៉ឺនយូរ។

 

កាកបាទក្រហមកម្ពុជា ដែលមានសម្ដេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ គង់ប្រថាប់ជាប្រធានកិត្តិយស និងមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានកាកបាទក្រហមកម្ពុជា ជានិច្ចកាលតែងយកចិត្តទុកដាក់ចំពោះសុខទុក្ខ អតីតមន្ត្រីដែលចូលនិវត្តន៍ ចាស់ជរា ប្រជាពលរដ្ឋជួបការលំបាក ជនរងគ្រោះ និងជនងាយរងគ្រោះគ្រប់ប្រភេទដោយមិនប្រកាន់វណ្ណៈ ពូជសាសន៍ ព័ណ៌សម្បុរ ឬនិន្នាការនយោបាយឡើយ៕

កាកបាទក្រហមកម្ពុជាបើកវគ្គបណ្ដុះបណ្ដាល វិជ្ជាសង្គ្រោះបឋម

 នៅព្រឹកថ្ងៃទី ១៩ ខែកញ្ញា ឆ្នាំ២០១៦ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានអញ្ជើញជាអធិតីភាពក្នុងពិធីបើកវគ្គបណ្ដុះបណ្ដាល វិជ្ជាសង្គ្រោះបឋម ដែលមានរយៈពេល៥ថ្ងៃ ពីថ្ងៃទី១៩-២៣ ខែកញ្ញា ឆ្នាំ២០១៦ ដល់គ្រូបង្គោលជាទីប្រឹក្សាយុវជន និងយុវជនកាកបាទក្រហមកម្ពុជា នៃគ្រឹះស្ថានឧត្តមសិក្សា និងមធ្យមសិក្សាសរុបចំនួន ៣០នាក់ នៅទីស្នាក់ការកណ្ដាលកាកបាទក្រហមកម្ពុជា។ 

 

វគ្គនេះមានការសម្របសម្រួលបច្ចេកទេសពី មន្ត្រីជំនាញវិជ្ជាសង្គ្រោះបឋមនៃទីស្នាក់ការកណ្ដាលកាកបាទក្រហមកម្ពុជា និងឧបត្ថម្ភគាំទ្រពីកាកបាទក្រហមដាណឺម៉ាក ក្នុងគោលបំណងផ្ដល់ចំណេះដឹង ពង្រឹងសមត្ថភាពបន្ថែមដល់គ្រូបង្គោល និងផ្សព្វផ្សាយបន្តពីវិជ្ជាសង្គ្រោះបឋមនេះនៅតាមសាលារៀន និងសហគមន៍របស់ខ្លួន៕

កាកបាទក្រហមកម្ពុជា សួរសុខទុក្ខ ស្រ្តីមេម៉ាយមានជំងឺ ចាស់ជរាគ្មានទីពឹង

នាព្រឹកថ្ងៃទី ១៩ ខែ កញ្ញា ឆ្នាំ ២០១៦ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា និងសហការី ព្រមទាំងមានការសម្របសម្រួលពីអនុសាខាខណ្ឌទួលគោក បានចុះសួរសុខទុក្ខ និងនាំយកអំណោយមនុស្សធម៌ជូនដល់ស្រ្តីមេម៉ាយ មានជំងឺ ចាស់ជរាគ្មានទីពឹងសរុបចំនួន ៥គ្រួសារ មកពីភូមិដប់ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ។

 

ក្នុងឱកាសនោះដែរ លោកជំទាវ បានពាំនាំនូវសេចក្ដីនឹករលឹកពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែគិតគូរសុខទុក្ខដល់ប្រជាពលរដ្ឋក្រីក្រ ពិសេស ចាស់ជរាគ្មានទីពឹង កុមារកំព្រា ស្រ្តីមេម៉ាយ និងបានផ្ដាំផ្ញើដល់ពួកគាត់ឲ្យខិតខំថែរក្សាសុខភាព មានអនាម័យក្នុងការរស់នៅ ហើយត្រូវប្រកាន់ខ្ជាប់នូវ ហូបស្អាត ផឹកស្អាត និងរស់នៅស្អាត។

 

អំណោយក្នុង១គ្រួសារទទួលបានរួមមាន៖ អង្ករ ៣០គីឡូក្រាម មី ១កេស ត្រីខ ១០កំប៉ុង សារុង១ មុង១ ភួយ១ ក្រមា១ និងថវិកាមួយចំនួន៕

 

កាកបាទក្រហមកម្ពុជាចូលរួមអបអរទិវាពិភពលោកសង្គ្រោះបឋម

 នៅព្រឹកថ្ងៃទី១៧ ខែកញ្ញា ឆ្នាំ២០១៦ នេះ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានអញ្ជើញជាអធិបតីក្នុងទិវាពិភពលោកសង្គ្រោះបឋម ក្រោមប្រធានបទ "ការសង្គ្រោះបឋមដោយយុវជន និងដើម្បីយុវជន" ដែលប្រព្រឹត្តទៅនៅសាកលវិទ្យាល័យភូមិន្ទភ្នំពេញ ដោយមានការអញ្ជើញចូលរួមពី តំណាងសហព័ន្ធអន្តរជាតិ កាកបាទក្រហម អឌ្ឍចន្ទក្រហម តំណាងកាកបាទក្រហមដាណឺម៉ាក តំណាងកាកបាទក្រហមជប៉ុន ទីប្រឹក្សាយុវជន និងយុវជនកាកបាទក្រហមកម្ពុជា សរុបចំនួន ២៨២នាក់។

 

ក្នុងឱកាសនោះ លោកជំទាវអគ្គលេខាធិការ បានមានប្រសាសន៍ផ្ដាំផ្ញើសួរសុខទុក្ខ និងក្តីនឹករលឹកពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល តែងយកចិត្តទុកដាក់ និងគិតគូរចំពោះយុវជនដែលជាធនធានដ៏សំខាន់មិនអាចខ្វះបាន ហើយដើរតួជាមិត្តអប់រំមិត្ត និងជាភ្នាក់ងារនៃការផ្លាស់ប្ដូរឥរិយាបថ។ ទន្ទឹមនឹងនោះ លោកជំទាវអគ្គលេខាធិការ ក៏បានថ្លែងអំណរគុណដល់កាកបាទក្រហមជប៉ុន និងកាកបាទក្រហមដាណឺម៉ាក ដែលបានជួយ ឧបត្ថម្ភ គាំទ្រ និងសហការជាមួយកាកបាទក្រហមកម្ពុជា ជាពិសេសក្នុងវិស័យសុខាភិបាល និងវិជ្ជាសង្គ្រោះបឋម។

 

ជាចុងក្រោយ លោកជំទាវអគ្គលេខាធិការ បានផ្ដល់ប្រសាសន៍ផ្ដាំផ្ញើ អប់រំ និងណែនាំដល់យុវជនដែលបានចូលរួមក្នុងកម្មវិធីនេះ ឱ្យត្រូវខិតខំសិក្សា ស្វែងយល់ពីវិជ្ជាសង្គ្រោះបឋមឲ្យបានច្បាស់លាស់ ព្រោះវិជ្ជានេះអាចឲ្យយើងជួយសង្គ្រោះជីវិតមនុស្សបានទាន់ពេលវេលា និងប្រកបដោយសុវត្ថិភាព៕

 

វគ្គបំប៉ន ស្តីពី “គោលការណ៍គ្រឹះ ច្បាប់មនុស្សធម៌អន្តរជាតិ ការងារទំនាក់ទំនងសាធារណៈ និងការបំពេញការងារប្រកបដោយសុវត្ថិភាពដល់សាខា

នៅព្រឹកថ្ងៃទី ១៥ ខែកញ្ញា ឆ្នាំ២០១៦ នេះ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បានអញ្ជើញជាអធិបតីក្នុងពិធីបើកវគ្គបំប៉ន ស្តីពី “គោលការណ៍គ្រឹះ ច្បាប់មនុស្សធម៌អន្តរជាតិ ការងារទំនាក់ទំនងសាធារណៈ និងការបំពេញការងារប្រកបដោយសុវត្ថិភាព” ជូនសមាជិក-សមាជិកាគណៈកម្មាធិការសាខា នាយក នាយិកា នាយករង នាយិការង និងមន្ត្រីទទួលបន្ទុកការងារទំនាក់ទំនងនិងផ្សព្វផ្សាយ ដែលអញ្ជើញមកពីសាខាកាកបាទក្រហមកម្ពុជាទាំង ២៥រាជធានី-ខេត្ត ព្រមទាំងអញ្ជើញចូលរួមពីតំណាងសហព័ន្ធអន្តរជាតិ និងថ្នាក់ដឹកនាំ-មន្ត្រីពាក់ព័ន្ធនៃទីស្នាក់ការកណ្តាល សរុបចំនួន ៦១នាក់។

 

វគ្គបំប៉ននេះ ប្រព្រឹត្តទៅរយៈពេល ២ថ្ងៃ (១៥-១៦ កញ្ញា ២០១៦) នៅទីស្នាក់ការកណ្តាលកាកបាទក្រហមកម្ពុជា ក្នុងគោលបំណង ៖

- ជំរុញ និងលើកកម្ពស់ការយល់ដឹងពីតួនាទី និងភារកិច្ចរបស់ក្រុមការងារទំនាក់ទំនងសាធារណៈ និងផ្សព្វផ្សាយរបស់គណៈកម្មាធិការសាខាអាណត្តិទី ៤ 
- បង្កើនសមត្ថភាពក្នុងការងារទំនាក់ទំនងខាងក្នុង-ក្រៅ ព្រមទាំងបង្កើនសកម្មភាពផ្សព្វផ្សាយអំពីចលនា គោលការណ៍គ្រឹះ បដិរូប ច្បាប់មនុស្សធម៌អន្តរជាតិ និងកាកបាទក្រហមកម្ពុជា ឱ្យបានកាន់តែទូលំទូលាយ និងមានប្រសិទ្ធភាពជាងមុន។
- ពង្រឹងបន្ថែមនូវក្របខ័ណ្ឌបំពេញការងារប្រកបដោយសុវត្ថិភាព ជូនមន្ត្រីកាកបាទក្រហមកម្ពុជា ក្នុងពេញប្រតិបត្តិការការងារមនុស្សធម៌៕

 

វគ្គបណ្ដុះបណ្ដាល ស្តីពី “សុវត្ថិភាពយុវជននៅក្នុងសាលា”នៅប្រទេសម៉ាឡេស៊ី

កាលពីថ្ងៃទី៥ ដល់ទី៨ ខែកញ្ញា ឆ្នាំ២០១៦ កន្លងទៅនេះ កាកបាទក្រហមកម្ពុជា បានចាត់តាំងមន្ដ្រីទទួលបន្ទុកការងារយុវជន និងអ្នកស្ម័គ្រចិត្ត នៃនាយកដ្ឋានធនធានមនុស្ស ចំនួន ២នាក់ ទៅចូលរួមវគ្គបណ្ដុះបណ្ដាលវិធីសាស្រ្តនៃការសម្របសម្រួល ស្តីពី “សុវត្ថិភាពយុវជននៅក្នុងសាលា” (Youth In School Safety Facilitator Training) ដែលប្រព្រឹត្តទៅនៅទីស្នាក់ការកណ្តាល អឌ្ឍចន្ទក្រហមម៉ាឡេស៊ី ទីក្រុងគួឡាឡាំពួរ ប្រទេសម៉ាឡេស៊ី ដោយទទួលបានការគាំទ្រថវិកា និងបច្ចេកទេសពីសហព័ន្ធអន្ដរជាតិកាកបាទក្រហម អឌ្ឍចន្ទក្រហម ប្រចាំទីក្រុងបាងកក កាកបាទក្រហមកាណាដា និងអឌ្ឍចន្ទក្រហមម៉ាឡេស៊ីជាម្ចាស់ផ្ទះ។

 

ពិធីនេះប្រព្រឹត្តទៅក្រោមអធិបតីភាព Mr. Dato' Sayed A Rahman Bin Sayed Mohd អគ្គលេខាធិការ អឌ្ឍចន្ទក្រហមម៉ាឡេស៊ី ដោយមានសិក្ខាកាមចូលរួមសារុបចំនួន ២០នាក់ (ស្រី ៦នាក់) មកពីសមាគមជាតិ ចំនួន១១ នៃបណ្តាញយុវជនអាស៊ីអាគ្នេយ៍(SEAYN) និងមានការសម្របសម្រួលពី មន្រ្តី ៣នាក់ របស់សហព័ន្ធអន្តរជាតិកាកបាទក្រហម អឌ្ឍចន្ទក្រហម ប្រចាំនៅទីក្រុងបាងកក។

 

នាឱកាសនោះ សិក្ខាកាម ចូលរួមបានសិក្សាស្វែងយល់អំពីនីតិវិធី និងវិធីសាស្រ្ដសំខាន់ៗជាច្រើនដើម្បីពង្រីក និងពង្រឹងនូវចំណេះដឹង តាមបែបសម្របសម្រួល នេះទៅកាន់សិស្ស យុវជនកាកបាទក្រហម លោកគ្រូ អ្នកគ្រូ និងឪពុកម្ដាយរបស់សិស្ស។

 

បន្ទាប់ពីបានសិក្សាស្វែងយល់អំពីនីតិវិធី និងវិធីសាស្ដ្រសម្របសម្រួលអស់រយៈពេល២ថ្ងៃរួចមក សិក្ខាកាមទាំងអស់ បានសហកាគ្នារៀបចំចុះអនុវត្តវគ្គបណ្ដុះបណ្ដាលសុវត្ថិភាពយុវជននៅក្នុងសាលាគោលដៅចំនួនពីរ ដើម្បីកំណត់មុខសញ្ញាបង្កហានិភ័យ សមត្ថភាព និងការចូលរួមគាំទ្រពីលោកគ្រូ អ្នកគ្រូ ព្រមទាំងអាណាព្យាបាលសិស្ស ក្នុងគម្រោង “សុវត្ថិភាពយុវជននៅក្នុងសាលា”៕

 

ប្រជាពលរដ្ឋមានជីវភាពខ្វះ ខាតនៅភូមិក្រឡាពាស ខេត្តព្រះវិហារទទួលអំណោយមនុស្សធម៌

នៅវេលាម៉ោង ១ រសៀលថ្ងៃទី១២ ខែ កញ្ញា ឆ្នាំ ២០១៦ នេះឯកឧត្តម យុង គីមហ៊ាន នាយកសាខា និងមន្រ្តីប្រតិបត្តិសាខាកាកបាទក្រហមកម្ពុជាខេត្តព្រះវិហារ បានចុះសាក សួរសុខទុក្ខ និងនាំយកអំណោយមនុស្សធម៌ចំនួន ០៧ គ្រួសារផ្តល់ជូនប្រជាពលរដ្ឋមានជីវភាពខ្វះ ខាតនៅភូមិក្រឡាពាស ឃុំព្រីងធំ ស្រុកជាំក្សាន្ត ខេត្តព្រះវិហារ។

 

ក្នុងឱកាសនោះឯកឧត្តមនាយកសាខាកាក បាទក្រហមកម្ពុជាខេត្តបានលើកឡើងថាបន្ទប់ពីបានទទួលព័ត៌មានថាបងប្អូនមានការខ្វះខាតក្នុងជីវ ភាពសាខាបាននាំយកសម្ភារជួយមកសម្រាលការខ្វះខាតរបស់បងប្អូននាពេលនេះ។ជា មួយគ្នានេះលោកមេឃុំព្រីងធំ តំណាងប្រជាពលរដ្ឋទាំង០៧ គ្រួសារ សូមថ្លៃងអំណរគុណដល់សម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា ដែលតែងតែគិតគូរពីសុខទុក្ខ របស់បងប្អូនប្រជាពលរដ្ឋគ្រប់ទីកន្លែង គ្រប់ពេលវេលា ។

 

ជាមួយគ្នានោះសាខាបានផ្តល់ជូនសម្ភារក្នុង១គ្រួសារៗទទួលបាន៖ អង្ករ ២០ គីឡូ មី១ កេស ត្រីខ ១០ កំប៉ុង ទឹកស៊ីអីុវ ១ យួរ ខោអាវ ២ កញ្ចប់ សារុង ១ មុង ១ ក្រមា ១ ភួយ ១ និងថវិកា ២០,០០០ រៀលគត់។

ប្រជាជនខ្វះខាតស្បៀង១គ្រួសារនៅភូមិសែនសំ ខេត្តឧត្តរមានជ័យ ទទួលអំណោយមនុស្សធម៌

 នៅរសៀលថ្ង្ងៃទី១២ ខែកញ្ញា ឆ្នាំ២០១៦ នេះ សាខាកាកបាទក្រហមកម្ពុជា ខេត្តឧត្តរមានជ័យ រួមជាមូយអនុសាខាកក្រក ស្រុកត្រពាំងប្រសាទ បានចុះសួរសុខទុក្ខ និងផ្តល់អំណោយមនុស្សធម៌ដល់គ្រួសារ លោកស្រី ព្រំ សារ៉ាំ ដែលកំពុងជួបការលំបាកខាងជីវភាព រស់នៅភូមិសែនសំ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ។

 

អំណោយផ្តល់ជូនរួមមាន ៖ អង្ករ ៥០គីឡូក្រាម មី ១កេស ត្រីខ១០កំប៉ុង មុង១ ភួយ១ ក្រមា១ ទឹកស៊ីអីវ ៦ដប និងថវិកា ៥ម៉ឺនរៀល៕

 

First Prev 42 43 44 45 46