អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

ប្រជាពលរដ្ឋខ្វះខាតចំនួន១៥គ្រួសារក្នុងឃុំរមេញទទួលអំណោយពីសាខាកាកបាទក្រហមកម្ពុជាខេត្តតាកែវ

នាព្រឹកថ្ងៃទី០៩ ខែកុម្ភៈ ឆ្នាំ២០១៧ លោកជំទាវ​នូ សុវណ្ណនី ប្រធានគណៈកម្មាធិការសាខា ​រួមដំណើរដោយ​មន្ត្រីសាខា​អនុសាខា​បានចុះសួរសុខទុក្ខ​និង​នាំយកអំណោយ​មនុស្សធម៍​របស់សាខា​ទៅចែកជូន​ប្រជាពលរដ្ឋ​ដែលមាន​ការខ្វះខាត​ចំនួន១៥ គ្រួសារក្នុង​ឃុំរមេញ ស្រុកកោះ​អណ្តែត ខេត្តតាកែវ ។


នាឱកាសនោះ លោកជំទាវ​បានពាំនាំ​ការផ្តាំផ្ញើ​សួរសុខទុក្ខ​ពីសំណាក់ ឯកឧត្តមប្រធាន​កិត្តិយសសាខា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា ដល់បងប្អូន​ប្រជាពលរដ្ឋ​ដែលបាន​ជួបការ​លំបាកនាពេលនេះ។ 
អំណោយ​ដែលចែកជូនបងប្អូនទាំង១៥ គ្រួសារនាពេលនេះរួមមាន៖ អង្ករ២៥គីឡូក្រាម មុង១ សារុង១ ក្រម៉ា១ ភួយ១ កន្ទេល១ មី១កេស ។

ពិធីបិទវគ្គបណ្តុះបណ្តាលគ្រូបង្គោលស្តីពីអនាម័យទឹកស្អាតក្នុងគ្រាអាសន្ននៅខេត្តព្រៃវែង

សាខាកក្រកខេត្តព្រៃវែង៖ នៅរសៀលថ្ងៃទី០៨ ខែកុម្ភៈ ឆ្នាំ២០១៧ នៅសាខា​កាកបាទក្រហម​កម្ពុជា​ខេត្តព្រៃវែង ​ឯកឧត្តមឧកញ៉ា​ សុខ ផេង​អនុប្រធាន​អចិន្រ្តៃយ៍​គណៈកម្មាធិការសាខា​បានអញ្ជើញចូលរួម​ក្នុងពិធីបិទ​វគ្គបណ្តុះបណ្តាល​គ្រូបង្គោល​ស្តីពី​អនាម័យ​ទឹកស្អាត​ក្នុងគ្រាអាសន្ន​នៅសាខា​កាកបាទក្រហមកម្ពុជា​ខេត្តព្រៃវែង។ 


សមាសភាព​ដែលបាន​អញ្ជើញ​ចូលរួមមាន តំណាងពីទីស្នាក់ការ​កណ្តាល​កាកបាទក្រហមកម្ពុជា ​តំណាង​សហព័ន្ធអន្តរជាតិ​សមាជិក សមាជិក គណៈកម្មាធិការ​តំណាងមន្ទីសុខាភិបាល​មន្ទីអភិវឌ្ឍន៍ជនបទ​ក្រុមប្រតិបត្តិសាខា​តំណាងសាខា​ខេត្តស្វាយរៀង​អ្នកសម្របសម្រួល​និងសិក្ខាកាម​សរុប ចំនួន ៣៥នាក់។

 

វគ្គបណ្តុះបណ្តាលនេះ​ប្រព្រឹត្តិទៅក្រោម​ជំនួយឧបត្ថម្ភ​បច្ចេកទេស និងថវិកាពីសហព័ន្ធអន្តរជាតិ កាកបាទក្រហម អឌ្ឍចន្ទក្រហម និងកាកបាទក្រហមកម្ពុជា នៃគម្រោង "ការពង្រឹងសមត្ថភាពត្រៀមបង្ការ និងឆ្លើយតបផ្នែកអនាម័យទឹកស្អាតក្នុងគ្រាអាសន្ន"។

 

ក្នុងឱកាសនោះ ឯកឧត្តមគណៈអធិបតី បានធ្វើការផ្តាំផ្ញើដល់សិក្ខាកាមទាំងអស់ជាគ្រូបង្គោលត្រូវយកចំណេះដឹងដែលទទួលបាននាពេលនេះ ធ្វើការបណ្តុះបណ្តាល និងផ្សព្វផ្សាយបន្តទៅដល់អ្នកស្ម័គ្រចិត្ត និងសហគមន៍ដើម្បីធ្វើអោយប្រជានជននៅក្នុងសហគមន៍របស់គាត់មានសុខភាពល្អ ជៀសផុតពីជម្ងឺឆ្លងនានានៅពេលមានគ្រោះមហន្តរាយកើតឡើង។

 

ជាលទ្ធផលក្រោយវគ្គបណ្តុះបណ្តាលសិក្ខាកាមទទួលបានលទ្ធផលល្អប្រសើរ ៣៤% និទ្ទេសល្អ ៥៨% និងនិទ្ទេសល្អបង្គួរ ៨%។​

 

កាកបាទក្រហមកម្ពុជាប្រគល់អណ្តូងទឹកស្អាតដល់ប្រជាជនក្នុងស្រុកចំនួន៣នៅខេត្តព្រះវិហារ

កក្រក៖ឯឧ វេជ្ជ អ៊ុយ សំអាត​ចូលរួម​ប្រគល់​ឱ្យប្រើប្រាស់​ជាផ្លូវការ​អណ្តូងទឹកស្អាត​ចំនួន១៩ ​កាលពីព្រឹក​ថ្ងៃទី១១ ខែកុម្ភៈ ឆ្នាំ២០១៧ នេះ (មានលេខរៀងពី​ ទី១៥៦ ដល់ទី១៧៤)ជូនប្រជាជន​ខ្វះខាត​ទឹកប្រើប្រាស់​ចំនួន៣១១គ្រួសារ ស្មើនឹងមនុស្ស៩៧៥នាក់ នៅឃុំជាំក្សាន្ត ឃុំទឹកក្រហម ឃុំព្រីងធំ នៃស្រុកជាំក្សាន្ត និងមជ្ឈមណ្ឌល​តម្បាញសូត្រ​កម្ពុជា ក្នុងក្រុងព្រះវិហារ​ខេត្ត ព្រះវិហារ។

 

ក្នុងឱកាស​ប្រគល់អណ្តូងទឹក​ទាំងនោះ ឯកឧត្តមវេជ្ជ. អ៊ុយ សំអាត នាយក នាយកដ្ឋាន​គ្រប់គ្រង​គ្រោះមហន្តរាយ កាកបាទក្រហមកម្ពុជា​និងលោកជំទាវ ចឹកហេង ប្រធានគណៈកម្មាធិការ​សាខាខេត្ត ព្រះវិហារ​ក្នុងឱកាសនោះ​ឯកឧត្តម អ៊ុយ សំអាត​បាននាំនូវ​ប្រសាសន៍ថា កាកបាទក្រហមកម្ពុជា ដែលមាន​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន​បានចាត់តាំង និងផ្តាំផ្ញើ​ដល់ប្រជាពលរដ្ឋ​ទាំងអស់​ដោយមិន​រើសអើង សូមបងប្អូន​មេត្តាបញ្ជូនកូនៗទៅសាលារៀនឱ្យបានគ្រប់ៗគ្នា ធ្វើជាពលរដ្ឋល្អក្នុងសង្គមជាតិ និងចូលរួម​អនុវត្តគោល នយោបាយភូមិ-ឃុំមានសុវត្ថិភាព ដោយជៀសវាង​ឱ្យបានដាច់ខាតនូវការប្រើប្រាស់​គ្រឿងញៀន គ្រឿងស្រវឹង ដែលជាប្រភព​នៃអំពើហិង្សា ចោរកម្ម និងអសន្តិ សុខ។ ទន្ទឹមនឹងនេះ សូមថែរក្សាសុខភាពឱ្យបានល្អ ដោយត្រូវ​បរិភោគ​ទឹកដាំពុះ ហើយចូលរួមដាំដំណាំ ឬបន្លែផ្សេងៗជុំវិញ​អណ្តូងដើម្បី​ជាប្រយោជន៍​ដល់សហគមន៍ និងថែរក្សាសមិទ្ធផលទាំងនេះឱ្យបានគង់វង្សយូរអង្វែង។


ឯឧ បានបញ្ជាក់យ៉ាងច្បាស់​នូវអនុសាសន៍​សម្តេចប្រធានថា"បើនិយាយអំពី​សុខមាលភាព​គឺដាច់ខាតត្រូវតែមានទឹកស្អាត បើគ្មានទឹកស្អាត​យើងមិនអាចធានាពី​សុខភាពសាធារណ:របស់ប្រជាជនបានឡើយ"។

 

ជាកិច្ចឆ្លើយតប ប្រជាជន​អាណាព្យាបាល បានសំដែងនូវការដឹងគុណដោយក្តីរំភើប និងថ្លែងអំណរ​អរគុណដ៏ជ្រាលជ្រៅ​បំផុតជូន ចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបាន​ផ្តល់អំណោយ​ដ៏ថ្លៃថ្លាទាំងនេះ និងសូមប្តេជ្ញាខិតខំ​ថែរក្សារាល់​សមិទ្ធផល​ទាំងនេះឲ្យ បានជាប្រយោជន៍ដ៏យូរអង្វែងទៅថ្ងៃអនាគត។

 

សូមបញ្ជាក់ថា គិតចាប់ពីឆ្នាំ ២០១២ ដល់ឆ្នាំ ២០១៧ កាកបាទ ក្រហមកម្ពុជា បានផ្តល់អណ្តូង​ទឹកស្អាត​ជូនប្រជាពលរដ្ឋ​ក្នុងខេត្ត ព្រះវិហារបានចំនួន ១៧៤ អណ្តូង៕ ទោះបីការផ្តល់អណ្តូងទឹកស្អាតជូនប្រជាពលរដ្ឋនៅតាមឃុំជាប់ ព្រំដែន ក្នុងស្រុកជាំក្សាន្ត និងស្រុកឆែប បានបញ្ចប់នាពេលនេះក្តី តែចំនួនតម្រូវការអណ្តូងទឹកស្អាតជូនប្រជាពលរដ្ឋតាមបណ្តាឃុំក្នុងស្រុកទាំងពីរដែលនៅជាប់ព្រំដែនថៃ ឡាវ នៅតែមានជាបន្តទៀត។

 

នៅក្នុងពិធីនោះដែរមានការចូលរួមពីបងប្អូនប្រជាពលរដ្ឋចំនួន៥០នាក់ យុវជនកាកបាទក្រហមកម្ពុជា១០នាក់ អ្នកស្ម័គ្រចិត្ត៥នាក់ និងលោកមេភូមិ ឃុំ និងមន្រ្តីអនុសាខាកាកបាទក្រហមកម្ពុជា ស្រុកជាំក្សាន្ត សរុប៧៥ នាក់។

 

កាកបាទក្រហមកម្ពុជាផ្តល់អំណោយមនុស្សធម៌ដល់មន្រ្តីរបស់ខ្លួនដែលកំពុងសម្រាកនៅមន្ទីរពេទ្យព្រះកេតុមាលា

កក្រក​ ៖​នៅទីស្នាក់ការកណ្តាល​នារសៀល​ថ្ងៃទី១០ ​ខែកុម្ភៈ ឆ្នាំ២០១៧ នេះ ​កាកបាទក្រហមកម្ពុជា​ ដែលមាន​សម្តេចកិត្តិព្រឹទ្ធបណ្ឌិ​ប៊ុន រ៉ានី ហ៊ុនសែន ជាប្រធាន​បានឧបត្ថម្ភផ្លែឈើ​ ទឹកផ្លែឈើ និងថវិកាមួយចំនួន​ជូនក្រុមគ្រួសារឯកឧត្តម នេត សុផាន់ណា នាយករង នាយកដ្ឋាន​គ្រប់គ្រងគ្រោះ​មហន្តរាយ​កាកបាទក្រហមកម្ពុជា ដែលមានជំងឺក្រពះធ្ងន់ធ្ងរ កំពុងសម្រាកព្យាបាល​នៅមន្ទីរពេទ្យ​ព្រះកេតុមាលា​រាជធានីភ្នំពេញ។

 

ក្នុងឱកាសប្រគល់​អំណោយនោះ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា ​បានពាំនាំ​ប្រសាសន៍ផ្តាំផ្ញើ​សួរសុខទុក្ខ​ចំពោះអ្នកជំងឺដែលជាមន្ត្រីសកម្មបានបម្រើ​ការងារ​មនុស្សធម៌ជាមួយ​កាកបាទក្រហមកម្ពុជា​ជាច្រើនឆ្នាំ ហើយបន្សល់ទុក​នូវស្នាដៃជាច្រើន។ ទន្ទឹមនឹងនេះ លោកជំទាវ​អគ្គលេខាធិការ សូមជូនពរឯកឧត្តម នេត សុផាន់ណា ឆាប់បាន​ជាសះស្បើយ​ពីជំងឺហើយបាន​ត្រឡប់មក​បម្រើការងារ​មនុស្សធម៌ដូចដើមវិញ។

 

ភរិយា និងកូនស្រីរបស់អ្នកជំងឺ ដែលមកទទួលអំណោយនាឱកាសនោះ បានសំដែងនូវ​ការដឹងគុណចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែ​គិតគូរពី​សុខទុក្ខ​របស់កូនចៅ​ក្រោមឱវាទក៏ដូចជាប្រជាពលរដ្ឋ​រងគ្រោះបំផុតដែរ និងសូមជូនពរ សម្តេច​កិត្តិព្រឹទ្ធបណ្ឌិត មានសុខភាពល្អ ប្រាជ្ញាវៀងវៃ អាយុយ៉ឺនយូរដើម្បីដឹកនាំ​កាកបាទក្រហមកម្ពុជា​ឱ្យបានយូរ​អង្វែងតទៅ។ ជាមួយគ្នានេះ ក្រុមគ្រួសារអ្នកជំងឺ ក៏បានថ្លែងអំណរគុណចំពោះមន្ត្រី-បុគ្គលិក និងយុវជន​កាកបាទក្រហម​កម្ពុជា ដែលបាននាំគ្នា​ទៅបរិច្ចាគឈាម​ជួយអ្នកជំងឺ​ដែលត្រូវការឈាម​ជាច្រើនប្លោក៕

ជនរងគ្រោះ៦ គ្រួសារទទួលអំណោយពីកាកបាទក្រហមកម្ពុជា

កក្រក ៖ នៅទីស្នាក់ការកណ្តាល ​នារសៀល​ថ្ងៃទី៩ ខែកុម្ភៈ ឆ្នាំ២០១៧ នេះ​ កាកបាទក្រហមកម្ពុជា ​ដែលមាន​សម្តេច​កិត្តិព្រឹទ្ធបណ្ឌិត​ប៊ុន រ៉ានី ហ៊ុនសែន ជាប្រធាន​បាន​ឧបត្ថម្ភគ្រឿងឧបភោគ-បរិភោគ​សម្ភារៈ​ប្រើប្រាស់​និងថវិកា​មួយចំនួន​ជូន គ្រួសាររងគ្រោះ​ចំនួន ៦គ្រួសារ​កំពុង​សម្រាកព្យាបាល​នៅមន្ទីរពេទ្យ​ព្រះកុសុមៈ​រាជធានីភ្នំពេញ​ក្នុងនោះរួមមាន ៖

១/ លោក ជួប ជឿន អាយុ ៣៥ឆ្នាំ មកពីខេត្តកំពត រងគ្រោះដោយឆក់ខ្សែភ្លើងធ្ងន់ធ្ងរ​
២/ លោក ហុង ដាឡូត អាយុ ២៣ឆ្នាំ មកពីខេត្តកំពង់ចាម រងគ្រោះដោយឆក់ខ្សែភ្លើងធ្ងន់ធ្ងរ
៣/ អ្នកស្រី ឆន សាយឿន អាយុ ៤៨ឆ្នាំ មកពីខេត្តកំពង់ឆ្នាំង រងគ្រោះរលួយសាច់ដោយប្រើថ្នាំ
៤/ លោក ប៊ូ សំណាង អាយុ ១៩ឆ្នាំ មកពីខេត្តបាត់ដំបង រងគ្រោះដោយឆក់ខ្សែភ្លើងធ្ងន់ធ្ងរ
៥/ លោក អៀង ភាស អាយុ ២៣ឆ្នាំ មកពីខេត្តកំពង់ចាម រងគ្រោះដោយឆក់ខ្សែភ្លើងធ្ងន់ធ្ងរ
៦/ លោក កុយ ហួត អាយុ ៣២ឆ្នាំ មកពីខេត្តកំពង់ធំ រងគ្រោះដោយរលាកភ្លើងធ្ងន់ធ្ងរ។

 

ក្នុងឱកាស​ប្រគល់អំណោយ​នោះ លោកជំទាវ ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា​បានមានប្រសាសន៍​ផ្តាំផ្ញើ​សួរសុខទុក្ខ​ពីសំណាក់សម្តេច​កិត្តិព្រឹទ្ធបណ្ឌិត​ប្រធានកាកបាទក្រហមកម្ពុជា ដែលជានិច្ចកាល​យកចិត្តទុកដាក់​ចំពោះសុខទុក្ខ​ប្រជាពលរដ្ឋ​រងគ្រោះ​ដោយគ្រោះថ្នាក់​ផ្សេងគ្មាន​លទ្ធភាពព្យាបាលជំងឺ​និងសូមជូនពរ​ដល់អ្នកជំងឺ​ទាំងអស់ឆាប់បាន​ជាសះស្បើយ​ត្រឡប់ទៅជួបជុំ​គ្រួសារដូច​ដើមវិញ។

ទន្ទឹមនឹងអំណោយ​ក្នុងមួយគ្រួសារៗទទួលបាន ៖ អង្ករ ៣០គីឡូក្រាម មី២កេស ត្រីខ ២០កំប៉ុង ទឹកដោះគោឆៅ ១ឡូ ទឹកប្រទាលកន្ទុយក្រពើ ១ឡូ មុង១ ភួយ១ ក្រមា១ សារុង១ និងថវិកា ១លានរៀល គ្រួសាររងគ្រោះទាំងអស់ បានថ្លែងអំណរគុណ​យ៉ាងជ្រាលជ្រៅ​ចំពោះទឹកចិត្ត​សណ្តោស​ប្រណី​របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដល់ប្រជាពលរដ្ឋ​រងគ្រោះ​ជួបការលំបាក​ដោយមិនរើស​អើង វណ្ណៈ ពូជសាសន៍ ព័រណ៌សម្បុរ ឬនិន្នាការ​នយោបាយអ្វីឡើយ៕

 

ជនពិការដែលមានជំងឺស្អិតពោះវៀនធ្ងន់ធ្ងរទទួលអំណោយពីកាកបាទក្រហមកម្ពុជា

កក្រក​ ៖នៅទីស្នាក់ការ​កណ្តាល​នារសៀល​ថ្ងៃទី៩ ខែកុម្ភៈ​ឆ្នាំ២០១៧ នេះ​កាកបាទក្រហមកម្ពុជា​ដែលមាន​សម្តេចកិត្តិព្រឹទ្ធបណ្ឌិត​ប៊ុន រ៉ានី ហ៊ុនសែន​ជាប្រធាន​បានឧបត្ថម្ភ​គ្រឿងឧបភោគ-បរិភោគ សម្ភារៈ​ប្រើប្រាស់​និងថវិកាមួយ​ចំនួនជូន​កីឡាករ ​បុង ហុង ជាជនពិការ​និងជាម្ចាស់​មេដាយមាស វិញ្ញាសា​រត់ចម្ងាយ៤០០ម៉ែត្រ​ព្រឹត្តិការណ៍​អាស៊ាន-ប៉ារ៉ាហ្គេម ឬស៊ីហ្គេម​ជនពិការ លើកទី ៨ នៅប្រទេស​សិង្ហបុរី កាលពីឆ្នាំ ២០១៥ ហើយ​ដែលមាន​ជំងឺស្អិត​ពោះវៀន​ធ្ងន់ធ្ងរ កំពុងវះកាត់ និងសម្រាក​ព្យាបាល​នៅមន្ទីរពេទ្យព្រះកុសុមៈ។

 

ក្នុងឱកាស​ប្រគល់អំណោយនោះ លោកជំទាវ ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា បានមាន​ប្រសាសន៍ផ្តាំផ្ញើ​សួរសុខទុក្ខ​ពីសំណាក់ សម្តេចកិត្តិព្រឹទ្ធបណ្ឌិត​ប្រធាន​កាកបាទក្រហមកម្ពុជា ​ពោះកីឡាករ បុង ហុង និងសូមជូនពរ​ដល់អ្នកជំងឺ ឆាប់បាន​ជាសះស្បើយ​ ទៅបន្ត​ការហ្វឹកហាត់​ ដើម្បីចូលរូម​ប្រកួតអាស៊ាន-ប៉ារ៉ាហ្គេម​ នៅប្រទេសម៉ាឡេស៊ី នៅខែកញា​ ឆ្នាំ២០១៧​ ខាងមុខនេះ។

 

អ្នកស្រី វិត ចាន់ថា ភរិយារបស់អ្នកជំងឺ ដែលមកទទួលអំណោយនាឱកាសនោះ បានថ្លែងអំណរគុណ​យ៉ាងជ្រាលជ្រៅ​ចំពោះសម្តេច​កិត្តិ ព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាលយកចិត្តទុកដាក់​ចំពោះ​អ្នកជំងឺពិការ​ជួបការលំបាក ដោយមិន​រើសអើង មិនប្រកាន់វណ្ណៈ ពូជសាសន៍ ឬនិន្នាការ​នយោបាយអ្វីឡើយ។

 

សូមបញ្ជាក់ថា​អ្នកស្រី​ វិត​ ចាន់ថា​ ក៏ជាជនពិការ​ ហើយជាកីឡាការនីរត់ប្រណាំង​ អាស៊ាន-ប៉ារ៉ាហ្គេម ដូចគា្នដែរ​។ កាលឆ្នាំ២០១៥​ គាត់ទទួលបានចំណាត់ថ្នាក់លេខ ៤​ ហើយលើកនេះ​ គាត់ប្តេជ្ញាខិតខំ​យកមេដាយឱ្យបាន៕

 

កិច្ចប្រជុំត្រៀមរៀបចំ ទិវា ពិភពលោក កាកបាទក្រហមអឌ្ឍចន្ទក្រហម៨ ឧសភា ឆ្នាំ២០១៧

កក្រក​ ៖​ ដើម្បីត្រៀមរៀបចំ ទិវាពិភពលោក កាកបាទក្រហម​ អឌ្ឍចន្ទក្រហម​ ៨​ ឧសភា​ ឆ្នាំ​២០១៧​ ដែលនឹងចូលមកដល់ក្នុងពេលខាងមុខ​នៅព្រឹកថ្ងៃទី​៩​ ខែកុម្ភៈ​ ឆ្នាំ២០១៧​ នេះ​ អនុគណៈកម្មការខ្លឹមសារ​ ឯកសារ​ ពិព័រណ៌​ និងផ្សព្វផ្សាយ​ ដែលមាន​ លោកជំទាវ​ ឃួន​ សុដារី​ អនុប្រធាន កាកបាទក្រហមកម្ពុជា​ ជាប្រធានបានរៀបចំកិច្ចប្រជុំលើកទី​ ១​ ដើម្បី​បែងចែកតួនាទី និងភារកិច្ចរបស់សមាជិក​ សមាជិកា អនុគណៈកម្មការ​ សម្រាប់អនុវត្តការងារឱ្យមាន ប្រសិទ្ធភាព។

 

កិច្ចប្រជុំនេះ​ប្រព្រឹត្ត ទៅនៅទីស្នាក់ការកណ្តាលកាកបាទក្រហមកម្ពុជា​ ដោយមានការអញ្ជើញចូលរួមពី​ថ្នាក់ដឹកនាំ​សមាជិក​ សមាជិកា​សរុបចំនួន​២១នាក់​៕

 

កិច្ចប្រជុំបូកសរុបការងារផលិតទឹកបរិសុទ្ធរបស់សាខាកាកបាទក្រហមកម្ពុជាខេត្តបាត់ដំបង

សាខាកក្រកខេត្តបាត់ដំបង៖ នៅសាលប្រជុំ​សហគ្រាស​ផលិតទឹកបរិសុទ្ធ​វីឃែរ​ នាព្រឹកថ្ងៃទី០៦ខែ​កុម្ភ ឆ្នាំ២០១៧នេះ​សាខាកាកបាទក្រហមកម្ពុជា​ខេត្តបាត់ដំបង​ បានរៀបចំពិធីបើកកិច្ចប្រជុំបូកសរុបលទ្ធផលការងារប្រចាំឆ្នាំ២០១៦ និងទិសដៅផែនការឆ្នាំ២០១៧​ក្រោមអធិបតីភាព​ ឯកឧត្តម​ចន្ទ័ សុផល​ប្រធានកិត្តិយសសាខា​និងឯកឧត្តមបណ្ឌិតប៊ុត គឹមស៊ាន ប្រធានគណៈកម្មាធិការសាខាកាកបាទក្រហមកម្ពុជាខេត្ត ។​ សមាសភាព​ចូលរួមក្នុង​កិច្ចប្រជុំ​ឱកាសនោះរួមមាន៖​ឯកឧត្តម​លោកជំទាវ​ លោក​ លោកស្រី ក្នុងជួរ​គណៈកិត្តិយស​ គណៈកម្មាធិការ មន្រ្តីប្រតិបត្តិសាខា​ អនុសាខា​ ប្រធាន​ក្រុមកាកបាទក្រហម​ឃុំសង្កាត់ លោកគ្រូ​ទីប្រឹក្សាយុវជនសរុប៣២រូប។

 

មានប្រសាសន៍បើកកិច្ចប្រជុំ​ ឯកឧត្តម​ប្រធានប្រធានកិត្តិយសសាខា​ បានលើកឡើងថា៖​ នេះជាឱកាសដ៏មានតម្លៃ​ និងជាវេទិកាដ៏គាប់ប្រសើរ​ ដើម្បីឲ្យសមាជិកសមាជិកានៃអង្គប្រជុំអាចធ្វើការបូកសរុបលទ្ធផល​ វាយតម្លៃ​ និងដកស្រង់បទពិសោធន៍ការងារ​ ដែលបានអនុវត្តក្នុងឆ្នាំកន្លងទៅ​ ហើយអាចឲ្យយើងត្រួតពិនិត្យឡើងវិញនូវវឌ្ឍនភាពការងារ​ និងបញ្ហាប្រឈមនានា​ ក្នុងការអនុវត្តយុទ្ធសាស្ត្រ២០១១-២០២០​ របស់កាកបាទក្រហមកម្ពុជា​ ដែលបានផ្តោតលើវិស័យស្នូលទាំង៤​ ក្នុងន័យបង្កើនប្រសិទ្ធភាព​ និងជំនឿទុកចិត្តពីសំណាក់ថ្នាក់ដឹកនាំ​ ជាពិសេស​ដើម្បី​ឈានទៅ​សម្រេចបាន​នូវសមិទ្ធផល​ថ្មីបន្ថែមទៀត​ក្នុងបណ្តាឆ្នាំខាងមុខ​ ។

 

តមកកិច្ចប្រជុំ​បានចាប់ដំណើរ​កម្មវិធីរបស់ខ្លួន​ជាបន្តបន្ទាប់​ តាមរបៀបវារៈ​ដែលបានគ្រោងទុក​ប្រកបដោយការ​យកចិត្តដាក់​ និងស្មារតីទទួលខុសត្រូវខ្ពស់ ៕

 

វគ្គបណ្តុះបណ្តាលគ្រូបង្គោលស្តីពីអនាម័យទឹកស្អាតក្នងគ្រាអាសន្ននៅខេត្តព្រៃវែង

សាខាកក្រកខេត្តព្រៃវែង៖​នៅព្រឹក ថ្ងៃទី០៦​ខែកុម្ភៈ​ឆ្នាំ២០១៧ ឯកត្តមឧកញ៉ា​សុខ ផេង​អនុប្រធាន​អចិន្រ្តៃយ៍​គណៈកម្មាធិការ​សាខា​អញ្ជើញ​ជាអធិបតី​ក្នុងពិធីបើក​វគ្គបណ្តុះបណ្តាល​គ្រូបង្គោល​ស្តីពីអនាម័យ​ទឹកស្អាត​ក្នងគ្រាអាសន្ន​រយៈពេល៣ថ្ងៃ​គឺចាប់ពីថ្ងៃទី០៦ ដល់ទី០៨ ខែកុម្ភៈ ឆ្នាំ ២០១៧ ក្រោមការ​ឧបត្ថម្ភ​ជំនួយ​ផ្នែក​បច្ចេកទេសពីទីស្នាក់ការ​កណ្តាល​កាកបាទក្រហមកម្ពុជា និងសហព័ន្ធអន្តរជាតិ ​កាកបាទក្រហម និងអឌ្ឍចន្ទក្រហម។

 

សិក្ខាកាម​ដែលត្រូវ​បានអញ្ជើញ​ចូលរួមមាន២៨នាក់​មកពីទីស្នាក់ការកណ្តាល​កាកបាទក្រហមកម្ពុជា កាកបាទក្រហមស្វីស​ សាខាកាកបាទក្រហមកម្ពុជា​ខេត្តព្រៃវែង សាខាកាកបាទក្រហមកម្ពុជា​ខេត្តស្វាយរៀង មន្រ្តីអនុសាខា​ស្រុកពារាំង ស្រុកស៊ីធរ​កណ្តាល និងស្រុកពោធិ៍រៀង។

 

គោលបំណង​នៃវគ្គបណ្តុះបណ្តាល រួមចំណែក​លើកកម្ពស់សុខភាព​ប្រជាជនក្នុងសហគមន៍តាមរយៈការពង្រឹង​សមត្ថភាពមន្រ្តី និងអ្នកស្ម័គ្រចិត្ត​កាកបាទក្រហម ឆ្លើយតបបានទាន់ពេលវេលា​នៅពេលមាន​គ្រោះមហន្តរាយ និងត្រៀមលក្ខណៈក្នុងការផ្តល់សេវាកម្ម​ផ្នែកអនាម័យទឹកស្អាតក្នុងគ្រាអាសន្ន។

ទស្សនៈកិច្ចសិក្សាស្វែងយល់អំពីបរិស្ថាន កសិកម្ម និងដាំដើមឈើរបស់យុវជនកាកបាទក្រហមកម្ពុជា

កក្រក ៖នៅថ្ងៃទី៦ ខែកុម្ភៈ ឆ្នាំ២០១៧ នេះ​យុវជនកាកបាទក្រហមកម្ពុជាប្រចាំគ្រឹះស្ថានសិក្សាក្នុងរាជធានីភ្នំពេញ​ និងទីប្រឹក្សាយុវជនប្រមាណ​១៦០នាក់​បានរៀបចំកម្មវិធីដំណើរទស្សនៈកិច្ចសិក្សា ស្វែងយល់ និងលើកកម្ពស់ចំណេះដឹងអំពីបរិស្ថាន និងកសិកម្ម និងដាំដើមឈើ ក្រោម​ប្រធានបទៈ​"យុវជនស្រឡាញ់បរិស្ថាន​ និងកសិកម្ម"​ នៅកសិដ្ឋានឬទ្ធីគិរីសែនមនោរម្យ​ស្ថិតនៅភូមិសំរោងជើងភ្នំ​ ឃុំសែនដី​ ស្រុកសំរោងទង​ ខេត្តកំពង់ស្ពឺ។

 

ដំណើរទស្សនកិច្ចសិក្សានេះ​ មានការអញ្ជើញចូលរួមពី​ ឯកឧត្តម សម កុសល នាយកនាយកដ្ឋាន ធនធានមនុស្ស កាកបាទក្រហមកម្ពុជា មន្ត្រី​ ទីស្នាក់ការកណ្តាល​-សាខាកាកបាទក្រហមកម្ពុជា​ ខេត្តកំពង់ស្ពឺ​ ទីប្រឹក្សាយុវជន យុវជន​ លោកគ្រូ អ្នកគ្រូ និងសិស្សានុសិស្សប្រមាណជាង ១៦០នាក់​ ក្នុងគោលបំណងផ្ដល់ឱកាសដល់យុវជនកាកបាទក្រហម​កម្ពុជា ប្រចាំគ្រឹះស្ថានឧត្តមសិក្សា ក្នុង រាជធានីភ្នំពេញ បានចូលរួមសិក្សាស្វែងយល់ និងលើកកម្ពស់ចំណេះដឹងកសិកម្ម ធារាសាស្រ្ត និងបរិស្ថាន នៅក្នុងសហគមន៍មូលដ្ឋាន  ដើម្បីផ្សារភ្ជាប់ជីវភាពយុវជនជាមួយសហគមន៍ បន្តផ្សព្វផ្សាយតាមរយៈ​សកម្មភាពបញ្ជ្រាបចំណេះដឹងទាំងនេះដល់ស្រទាប់យុវជន មហាជនឲ្យចេះថែរក្សា ស្រឡាញ់បរិស្ថាន ចូលរួមដាំដើមឈើ ធ្វើជាភ្នាក់ងារចូលរួមកសាងអភិវឌ្ឍសេដ្ឋកិច្ចជាតិ សេដ្ឋកិច្ចគ្រួសារ និងជាអ្នកនាំសារដល់សហគមន៍ តាមរយៈ​ សកម្មភាពផ្ទាល់របស់ខ្លួន៕

First Prev 51 52 53 54 55