អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
jQuery Carousel
ព័ត៌មានថ្មីៗ

យុវជនកាកបាទក្រហម កម្ពុជា ខេត្តបាត់ដំបងដាំកូនឈើជុំវិញស្រះ

កាលពីរសៀលថ្ងៃទី១៤ ខែកក្កដា ឆ្នាំ២០១៦ សាខា​កាកបាទក្រហមកម្ពុជា ខេត្តបាត់ដំបង ​ដឹកនាំដោយ លោក កង ប៊ន នាយកសាខា ​បានដឹកនាំយុវជនកាកបាទក្រហមកម្ពុជា​ខេត្តចំនួន ១០នាក់​ ស្រី៥ នាក់​ ចូលរួមកូនឈើជុំវិញ​ស្រះទឹកដែលមាន​ទំហំ ៤០ម៉ែត្រ×៦០ម៉ែត្រ ជំរៅ ៣ម៉ែត ដែលជាអំណោយដ៏ថ្លៃថ្លា​របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា​ ជូនប្រជាពលរដ្ឋក្រីក្រ​ ខ្វះខាតទឹកស្អាត​រស់នៅភូមិ គោកដូង ឃុំពាមឯក ស្រុកឯកភ្នំ ខេត្តបាត់ដំបង។

កាកបាទក្រហមកម្ពុជានាំយកអំណោយមនុស្សធម៌ជូនចាស់ជរានៅខេត្តកំពត

 នៅព្រឹកថ្ងៃទី ១៥ ខែ កក្កដា ឆ្នាំ ២០១៦ នេះ លោកជំទាវ ​ម៉ែន នារីសោភ័គ ​អគ្គលេខាធិការរងទី ១​ និងសហការី​ រួមជាមួយ​សាខា​កាកបាទក្រហមកម្ពុជា​ ខេត្តកំពត​បានចុះសួរសុខទុក្ខ ​និងនាំយក​អំណោយមនុស្សធម៌​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ប្រធាន​កាកបាទក្រហមកម្ពុជា ​ជូនលោកយាយ ​តុល ឃុន អាយុ ៩៤ឆ្នាំ និងកូនស្រីពីរនាក់ ម្នាក់អាយុ ៧៣ឆ្នាំ និងម្នាក់ទៀតអាយុ ៧០ឆ្នាំ រស់នៅភូមិក្រសាំង ឃុំឈូក ស្រុកឈូក ខេត្តកំពត។

 

លោកយាយជរាទាំងបីនាក់ ម្តាយ និងកូន មានក្តីរំភើបឥតឧបមា​ក្រោយបានទទួល​អំណោយ​ជាច្រើនពីសំណាក់​ សម្តេចកិត្តិព្រឹទ្ធបណ្ឌិត​ ទោះបីកន្លងមក ក្រុមការងារអនុសាខា-សាខា​កាកបាទក្រហមកម្ពុជា​ ខេត្តកំពត​ ធ្លាប់បានចុះសួរសុខទុក្ខ និងនាំយកអំណោយ​មកជូនហើយក៏ដោយ តែពេលនេះ​ រឹតតែមានភាពកក់ក្តៅថែមទៀតដោយសារ បានដឹងថា ក្រុមការងារចុះមកថ្ងៃនេះគឺ សម្តេចកិត្តិព្រឹទ្ធបណ្ឌិត បានចាត់តាំងដោយផ្ទាល់ ដែលបានឆ្លុះបញ្ចាំង​ពីការយកចិត្តទុកដាក់ខ្ពស់ចំពោះ​ចាស់ជរាមានជីវភាព​ខ្វះខាត ដោយមិនប្រកាន់និន្នាការនយោបាយអ្វីឡើយ ដូចពាក្យថាៈ “កាកបាទក្រហមកម្ពុជា​គ្រប់ទីកន្លែង សម្រាប់គ្រប់ៗគ្នា”។

នាឱកាសនោះ លោកជំទាវអគ្គលេខាធិការរងទី១ បានមានប្រសាសន៍​ផ្តាំសួរសុខទុក្ខ​ពីសំណាក់​សម្តេចកិត្តិព្រឹទ្ធបណ្ឌិត​ប្រធានកាកបាទក្រហម​​កម្ពុជា ដែលជានិច្ចកាល សម្តេច គិតគូរពីសុខទុក្ខរបស់ប្រជាពលរដ្ឋគ្រប់ពេលវេលា។

 

អនុវត្តតាមអនុសាសន៍​របស់សម្តេចកិត្តិព្រឹទ្ធបណ្ឌិត​​ប្រធាន លោកជំទាវអគ្គលេខាធិការរងទី ១ បានពិគ្រោះពិភាក្សាជាមួយសាខា-អនុសាខា ស្តីពី ការរៀបចំសាងសង់ ផ្ទះ ផ្ទះបាយ បង្គន់អនាម័យ ជូនលោកយាយ និងខួងអណ្តូងទឹកស្អាត សម្រាប់ប្រជាពលរដ្ឋ​រស់ក្នុងភូមិក្រសាំង ប្រមាណជាង ២០គ្រួសារ ផងដែរ។

 

អំណោយមនុស្សធម៌ដែរ​បានផ្តល់ជូនលោកយាយទាំងបីនាក់រួមមាន ៖ អង្ករ ១០០គីឡូក្រាម មី ៥កេស ទឹកផ្លែឈើ ៤កេស ត្រីខ ៥០កំប៉ុង ទឹកស៊ីអ៊ីវ ៤យួរ ទឹកត្រី ៤យួរ ពងទាប្រៃ ៧៥គ្រាប់ ប្រេងឆា ១២ដប ឃីត៣ (មុង៣ ភួយ៣ សារុង៣ ក្រមា៣) ឆៃពៅ ១ក្រឡ ផ្អកឆាវ ១ក្រឡ ត្រីងៀតហើម ៥គីឡូក្រាម នំប៉័ង ៣ប្រអប់ធំ ខោអាវ ៣កំប្លេរ សាប៊ូម្សៅ ១៥កញ្ចប់ និងថវិកា៣០០,០០០រៀល ដែលសរុបជាថវិកាចំនួន ២លានរៀល។

 

ដោយឡែក លោកយាយម្នាក់អាយុ ៨៥ឆ្នាំ និងលោកតា​ម្នាក់អាយុ ៨៩ឆ្នាំ ដែលរស់នៅផ្ទះក្បែរនោះ បានទទួលអំណោយមនុស្សធម៌ ក្នុងម្នាក់ៗ ៖ មុង១ ភួយ១ សារុង១ ក្រមា១ ខោអាវ ១កំប្លេរ និងថវិកា ៥០,០០០រៀលផងដែរ៕

 

កាកបាទក្រហមកម្ពុជាផ្តល់ផ្ទះថ្មីមួយខ្នង ជូនគ្រួសារយោធិនពិការដោយគ្រាប់មីន

នៅព្រឹកថ្ងៃទី ១២ ខែកក្កដា ឆ្នាំ២០១៦ នេះ លោកជំទាវ ម៉ែន នារីសោភ័គ ​អគ្គលេខាធិការរងទី ១​ កាកបាទក្រហមកម្ពុជា​ និងសហការី​ រួមជាមួយ​សាខា​កាកបាទក្រហមកម្ពុជា ខេត្តកំពង់ឆ្នាំង បាន​អញ្ជើញផ្តល់ផ្ទះថ្មី​មួយខ្នង​ធ្វើអំពីឈើ​ប្រក់ស័ង្កសី ទំហំ ៥ម៉ែត្រ x ៧ម៉ែត្រ កម្ពស់ ៣ម៉ែត្រ ជាអំណោយ​ដ៏ថ្លៃថ្លា​របស់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនគ្រួសារ​លោក ស៊ីវ សីហា ជាយោធិន​ពិការ​ដោយគ្រាប់មីន​នៅសមរភូមិ​បន្ទាយលង្វែក ​(កាលពីឆ្នាំ ១៩៩១) អាយុ ៤២ឆ្នាំ រស់នៅ ភូមិព្រែកឆ្តោ ឃុំកំពង់អុស ស្រុកជលគិរី ខេត្តកំពង់ឆ្នាំង។

 

លោក ស៊ីវ សីហា និងប្រពន្ធឈ្មោះ ទូច សុខន ពិការ​ពីកំណើត អាយុ ៤២ឆ្នាំ ព្រមទាំងកូន ៤នាក់ បានលើកដៃសំពះ​ថ្លែងអំណរគុណ​យ៉ាងជ្រាលជ្រៅ​បំផុតរកអ្វី​ប្រៀបផ្ទឹម​ពុំបាន​ ចំពោះ សណ្តាន​ចិត្តដ៏ថ្លៃថ្លា​របស់ សម្តេច​កិត្តិព្រឹទ្ធបណ្ឌិត​ប្រធានកាកបាទក្រហមកម្ពុជា ដែលបានផ្តល់​គេហដ្ឋានដ៏​សែនកក់ក្តៅ និងមាន​តម្លៃមួយខ្នងនេះ ដែលគ្រួសារ​លោកមិនធ្លាប់​នឹកស្រម៉ៃថាមាន​នឹងមានដូច​ថ្ងៃនេះ។ កន្លងមក គ្រួសារ លោក ស៊ីវ សីហា រស់នៅលើទូក ដោយពុំមាន​ដីធ្លីសម្រាប់រស់នៅឡើយ។

លុះដល់​កូនធំៗត្រូវសិក្សារៀនសូត្រ ទើបគ្រួសារមួយនេះ បានឡើងគោកមក ស្នាក់អាស្រ័យ​ជាមួយ​បងប្អូន លើដីអ្នកជិតខាង។ សាខាកាកបាទក្រហមកម្ពុជា ខេត្តកំពង់ឆ្នាំង បានដោះស្រាយ ទិញដី ទទឹង ១១ម៉ែត្រ បណ្តោយ​ទល់ច្រាំងទន្លេ ជូនជាកម្មសិទ្ធិ​ដល់គ្រួសារ​លោក ស៊ីវ សីហា និងបាន​ស្នើសុំ សម្តេច​កិត្តិព្រឹទ្ធបណ្ឌិត សាងសង់​ផ្ទះមួយខ្នង​ខាងលើនេះជូនតម្លៃ ៧,៤៤៧ដុល្លារ។

ជាមួយនឹង​ការប្រគល់​ជូនផ្ទះនេះ សម្តេចកិត្តិព្រឹទ្ធបណ្ឌិត បានឧបត្ថម្ភ អង្ករ មី ត្រីខ មុង ភួយ សារុង ក្រមា កន្ទេល សម្ភារៈផ្ទះបាយ និងថវិកាចំនួន ២០០,០០០រៀលទៀតផង។

 

ជាមួយគ្នា​នោះ ចាស់ៗ និងប្រជាពលរដ្ឋ​ក្រីក្រ​នៅក្នុង​ភូមិព្រែកឆ្តោ ចំនួន ៤០គ្រួសារ បានទទួលអំណោយ​មនុស្សធម៌​ពីកាកបាទក្រហម​កម្ពុជា ដែលក្នុងមួយ​គ្រួសារទទួលបាន ៖ អង្ករ ៣០គីឡូក្រាម មី ១កេស ត្រីខ ១០កំប៉ុង មុង១ ភួយ១ សារុង១ ក្រមា១ និងថវិកា ៥០,០០០រៀល៕

 

កាកបាទក្រហមកម្ពុជាចូលរួមបុណ្យសពប្រជាជនដែលមានជីវភាពក្រីក្រតោកយ៉ាកនៅខណ្ឌពោធិ៍សែនជ័យ

បន្ទាប់ពីបានដឹងថាមានបុរសកម្សត់ម្នាក់ដែលមានជីវភាពក្រីក្រតោកយ៉ាករស់នៅខណ្ឌពោធិ៍សែនជ័យរាជធានីភ្នំពេញ គ្មានប្រាក់រៀបចំបុណ្យសពប្រពន្ធផងនោះ នៅព្រឹកថ្ងៃទី ១៣ ខែកក្កដា ឆ្នាំ២០១៦ នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឲ្យ លោកជំទាវ ម៉ែន នារីសោភ័គ អគ្គលេខាធិការរងទី ១ និងសហការី ចុះចូលរួមរំលែកមរណទុក្ខ និងនាំយកបច្ច័យចំនួន ១លានរៀល អង្ករ ១០០គីឡូក្រាម មី ៥កេស ទឹកក្រូច ៥កេស និងត្រីខ ៥០កំប៉ុង សម្រាប់ចូលបុណ្យ ៧ថ្ងៃផងដែរ។

 

លោកជំទាវអគ្គលេខាធិការរងទី១ បានមានប្រសាសន៍ផ្តាំផ្ញើចូលរួមរំលែកទុក្ខពីសំណាក់ សម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា ជាមួយក្រុមគ្រួសារសព ចំពោះការបាត់បង់ ភរិយា ម្តាយ និងសាច់ញាតិជាទីស្រឡាញ់ និងសូមបួងសួងដល់វិញ្ញាណក្ខន្ធសព សូមបានទៅកាន់សុគតិភពកុំបីឃ្លៀងឃ្លាតឡើយ។

 

លោក ចាន់ មុន្នី អាយុ ៥៤ឆ្នាំ ត្រូវជាស្វាមីនៃសព បានឱ្យដឹងថាៈ ភរិយារបស់លោកឈ្មោះ ឃឹម ជីន ជាជនពិការដោយសារជំងឺលើសឈាម ៧ឆ្នាំមកហើយ បានទទួលមរណភាព កាលពីថ្ងៃទី ០៩ ខែកក្កដា ឆ្នាំ២០១៦ កន្លងទៅ ក្នុងជន្មាយុ ៥៥ឆ្នាំ។

គ្រួសាររបស់លោក មានជីវភាពក្រខ្សត់ជាខ្លាំង និងមិនមានលទ្ធភាពធ្វើបុណ្យឱ្យប្រពន្ធតាមប្រពៃណីទេ ប៉ុន្តែ ក្រុមគ្រួសារលោក បានទទួលថវិកាឧបត្ថម្ភពី លោក យឹម សារ៉ាន់ អធិការនគរបាលខណ្ឌពោធិ៍សែនជ័យ សម្រាប់ថ្លៃបូជាសព។

 

លោក ចាន់ មុន្នី បានសំដែងនូវក្តីរំភើបឥតឧបមា និងដឹងគុណចំពោះ សម្តេចកិត្តិព្រឹទ្ធបណ្ឌិត ដែលបានឧបត្ថម្ភគ្រឿងឧបភោគ-បរិភោគមួយចំនួន និងបច្ច័យចំនួន ១លានរៀល សម្រាប់សម្រាលការលំបាកក្នុងការចាត់ចែងរៀបចំបុណ្យ ៧ថ្ងៃ ក្នុងពេលខាងមុខ៕

 

សាខាកាកបាទក្រហមកម្ពុជាខេត្តប៉ៃលិនចែកអំណោយដល់ចាស់ជរាគ្មានទីពឹង

ព្រឹកថ្ងៃទី ១២ ខែ កក្កដា ឆ្នាំ ២០១៦ សាខាកាកបាទក្រហមកម្ពុជា ខេត្តប៉ៃលិន ដឹកនាំដោយ លោក សូ កង នាយកប្រតិបត្តិសាខា និងយុវជនកក្រកខេត្ត បានចុះសាកសួរសុខទុក្ខ និងនាំយកអំណោយមនុស្សធម៌ផ្តល់ជូន លោកតា ខុន ផល្លា អាយុ ៧៥ឆ្នាំ និងលោកយាយ វ៉ា ស៊ីខេន អាយុ ៧៣ឆ្នាំទាំងពីរនាក់ប្តីប្រពន្ធ ជាជនចាស់ជរាគ្មានទីពឹងមានជំងឺហើមជើង និងមានជីវភាពខ្វះខាត ជួបការលំបាកនៅភូមិបរថ្មី សង្កាត់បរយ៉ាខា ក្រុងប៉ៃលិន ខេត្តប៉ៃលិន។

 

លោកនាយកសាខា បានពាំនាំនូវក្តីអាណិត អាសូរ ពីសំណាក់លោកជំទាវបាន ស្រីមុំប្រធានគណៈកម្មាធិការសាខាខេត្ត ពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែគិតគូរពីសុខភាព ជីវភាព និងមិនប្រកាន់ពូជសាសន៍អ្វីឡើយ។

អំណោយផ្តល់ជូនរួមមាន ៖ អង្ករ ២៥គីឡូក្រាម មី ១ កេស ត្រីខ១ យួរ ទឹកស៊ីអីុវ ១ យួរ ទឹកត្រី ១ យួរ ទឹកសុទ្ធ ២កេស អំបិល១កញ្ចប់ មុង១ សារុង១ ក្រមា១ ភួយ១ និងថវិកា ១០០,០០០ រៀលគត់ ។

 

គួរបញ្ជាក់ថា កាលពីថ្ងៃទី៩ ខែកក្កដា កន្លងទៅ សាខាកាកបាទក្រហមកម្ពុជា ខេត្តប៉ៃលិន បាននាំពួកគាត់ទៅសម្រាកព្យាបាលនៅមន្ទីរពេទ្យបង្អែកខេត្តប៉ៃលិន តែមកដល់ថ្ងៃនេះជម្ងឺកាត់បានជាពីជម្ងឺ ហើយលោកនាយក និងក្រុមការងារបាននាំមកលំនៅដ្ឋានវិញ៕

 

សាខាកាកបាទក្រហមកម្ពុជា រាជធានីភ្នំពេញ ផ្សព្វផ្សាយវិជ្ជាសង្គ្រោះបឋមការពារ

នាព្រឹកថ្ងៃទី ១០ ខែ កក្កដា ឆ្នាំ ២០១៦នេះ ក្រុមការងារ​គម្រោង​វិជ្ជា​សង្គ្រោះបឋម​ សាខា​កាកបាទក្រហម​កម្ពុជា​ រាជធានីភ្នំពេញ​ ឧបត្ថម្ភ​ដោយ​កាកបាទក្រហម​ជប៉ុន​ ដឹកនាំដោយ​ លោក ឆេ យ៉ត​ មន្ត្រីគម្រោង​ បានចុះបង្ហាត់​បង្ហាញ​ផ្សព្វផ្សាយ​វិជ្ជាសង្គ្រោះបឋម​ការពារ (First Aid Prevention) រយៈពេល១ព្រឹក ​ដល់កុមារា កុមារី ប្រជាពលរដ្ឋ​នៅតាម​សហគមន៍​ចំនួន​ប្រមាណ៦៨នាក់ ​ក្នុងភូមិចំការស្បែង ​និងភូមិតិក្ខប្បញ្ញោ​ សង្កាត់សំរោងក្រោម​ ខណ្ឌពោធិ៍សែនជ័យ ។

ក្នុងនោះ​ក្រុមការងារ​បានលើបទប្រធានបទ​មកបង្ហាត់​បង្ហាញរួមមាន​៖ រលាក(ទឹកក្ដៅ ភ្លើង...) បាក់ឆ្អឹង លង់ទឹក សត្វទិច រន្ទះ និងស្លាក់។ ល។

គោលបំណង​នៃការចុះផ្សព្វផ្សាយនេះ​គឺ ដើម្បីឲ្យកុមារ ​និងប្រជាពលរដ្ឋទាំងអស់​ចេះនូវវិជ្ជាសង្គ្រោះបឋម ​ចេះបង្ការខ្លួន​កុំឲ្យមានគ្រោះថ្នាក់ ​និងសំដៅចូលរួម​ចំណែកសំរេច​នូវផែនការយុទ្ធសាស្ត្រ​កាកបាទក្រហមកម្ពុជា​(២០១១-២០២០) ដែលបាន​កំណត់ថា ក្នុង១គ្រួសារ​ត្រូវមាន​អ្នកចេះវិជ្ជាសង្គ្រោះបឋមម្នាក់ ៕

កាកបាទក្រហមកម្ពុជាប្រគល់ថវិកា ជូនអង្គការសកម្មភាពលើយុវវ័យពិការដើម្បីអភិវឌ្ឍន៍

កាលពីរសៀលថ្ងៃទី ០៨ ខែ កក្កដា ឆ្នាំ ២០១៦​ នេះ​ នៅទីស្នាក់ការ​កណ្តាល​កាកបាទក្រហមកម្ពុជា​ លោកជំទាវ ម៉ែន នារីសោភ័គ អគ្គលេខាធិការរងទី ១ ​កាកបាទក្រហមកម្ពុជា​ បានប្រគល់​ថវិកា​ចំនួន ៥លានរៀល ​ជាអំណោយ​ដ៏ថ្លៃថ្លា​របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា​ ជូនអង្គការ​សកម្មភាព​លើយុវវ័យ​ពិការ​ដើម្បីអភិវឌ្ឍន៍​ ដែលមាន​អាស័យដ្ឋាន​ សង្កាត់បឹងទំពុន​ ខណ្ឌមានជ័យ រាជធានីភ្នំពេញ។

ថវិកា ៥លានរៀល​ ដែលផ្តល់ជូន​នេះ គឺសម្រាប់ឧបត្ថម្ភ​កម្មវិធី​ប្រគុំតន្ត្រី​ជនពិការ​សប្បុរសធម៌​លើកទី ៣ ឆ្នាំ២០១៦​ ក្រោមប្រធានបទ “រួមគ្នាចែករំលែក​ក្តីមេត្តា​ចំពោះជនពិការ” ដែលនឹងប្រារព្ធ​នៅឆាកតន្ត្រី​ផ្សាររាត្រី រាជធានីភ្នំពេញ ថ្ងៃទី ២៦ ខែ សីហា ឆ្នាំ ២០១៦ ខាងមុខ។ កម្មវិធី​ប្រគុំតន្ត្រី​នេះ ត្រូវបាន​បង្កើតឡើង​ក្នុងគោលបំណង​ដើម្បី ស្វែងរកថវិកា​ទ្រទ្រង់​ បង្កើនជីវភាព​រស់នៅ​ប្រចាំថ្ងៃ​របស់​ជនពិការ បង្ហាញ​ពីស្នាដៃ​សិល្បៈជាសាធារណៈ ​និងនាំយកនូវ​ក្តីសង្ឃឹមថ្មី​សម្រាប់ជនពិការ​នៅទូទាំង​ប្រទេសកម្ពុជា។

ក្នុងឱកាសនោះ​ លោកជំទាវ​អគ្គលេខាធិការរងទី ១ បានមានប្រសាសន៍​ផ្តាំផ្ញើ​សួរសុខទុក្ខ​ពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ​សួរសុខទុក្ខ​ដល់ជនពិការ​ទាំងអស់ ដែលជានិច្ចកាល​ សម្តេច តែងតែ​គិតគូរ ​លើកទឹកចិត្ត និងផ្តល់ក្តី​ស្រឡាញ់​ជូនជនពិការ​គ្រប់ៗគ្នា និងសូមជូនពរ​ដល់ការប្រគុំ​តន្ត្រីបានជោគជ័យ​ ទទួលបាន​ការគាំទ្រ​ច្រើនពី​សប្បុរសជន។

សូមបញ្ជាក់ថាៈ សម្តេចកិត្តិព្រឹទ្ធបណ្ឌិត ធា្លប់បានឧបត្ថម្ភ​ថវិកាដល់ការប្រគុំ​តន្ត្រីរបស់​អង្គការនេះ​ម្តងរួចមក​ហើយកាលពី​លើកទី ២ ឆ្នាំ២០១៥ និងបានចាត់​សហការី​ចុះចែកអំណោយ​ដល់អង្គការ​ម្តងរួច​ហើយដែរ៕

សាខាកាកបាទក្រហមកម្ពុជាខេត្តកណ្តាលចែកអំណោយដល់ អ្នកផ្ទុកមេរោគអេដស៍

 ព្រឹកថ្ងៃទី ០៩ ខែ កក្កដា ឆ្នាំ ២០១៦​ ក្រុមការងារ​ សាខាកាកបាទក្រហមកម្ពុជា​ខេត្តកណ្តាល ដឹកនាំដោយ​ឯកឧត្តមបណ្ឌិត ​ម៉ៅ ភិរុណ ប្រធានកិត្តិយសសាខា​ និងឯឧត្តម ជាវ តាយ ប្រធាន គណៈកម្មាធិការសាខា និងប្រតិភូរួមដំណើរ ​បានចុះសួរសុខទុក្ខ និង​នាំយកអំណោយ​ចែក​ជូន​អ្នកផ្ទុកមេរោគអេដស៍​ចំនួន ១៧៦ នាក់ ស្រី ៧៨ នាក់ ក្នុងនោះកុមារ ១៥ នាក់ ក្នុងស្រុកមុខកំពូល នៅបរិវេណ​វត្តរតនៈបុប្ផារាម ហៅ វត្តព្រែកអញ្ចាញ ។

អំណោយ​ដែលបានចែកជូន​ក្នុងម្នាក់ៗ ទទួលបាន អង្ករ ២៥ គីឡូក្រាម មី ១ កេស ត្រីខ ១ យួរ ទឹកសុទ្ធ ១ កេស ប្រហុក ១ គីឡូក្រាម និងថវិកា ៦ ម៉ឺនរៀល ៕

 

កិច្ចប្រជុំ លើការប៉ាន់ប្រមាណសមត្ថភាពសាខានៅខេត្តស្ទឹងត្រែង

កាលពី​ព្រឹកថ្ងៃទី០៥ ខែកក្កដា ឆ្នាំ២០១៦ ​ក្រុមការងារ ​ស្នាក់ការកណ្តាល​ កាកបាទក្រហមកម្ពុជា ​បានបើក​កិច្ចប្រជុំ ​លើការប៉ាន់ប្រមាណ​សមត្ថភាព​សាខា ​( បូកា ដោយមាន​ការចូលរួមពីសំណាក់ ឯកឧត្ដម ឈាង ឡាក់ ប្រធានគណៈកម្មាធិការសាខា កាកបាទក្រហមកម្ពុជា​ខេត្តស្ទឹងត្រែង និង​ សមាជិក សមាជិកាគណ:កម្មាធិការសាខាសាខា អនុសាខា ក្រុមប្រតិបត្តិសាខា ទីប្រឹក្សាយុវជន អ្នកស្ម័គ្រចិត្តកាកបាទក្រហមកម្ពុជា សរុបចំនួន៤២នាក់។

 

កិច្ចប្រជុំនេះ​បានប្រារព្ធឡើង​នៅទីស្នាក់ការសាខា​កាកបាទក្រហមកម្ពុជា​ខេត្តស្ទឹងត្រែង ដែលមានរយៈពេល ២ ថ្ងៃ គឺចាប់ពីថ្ញៃទី ៥-៦ កក្កដា​២០១៦។

កាកបាទក្រហមកម្ពុជាចុះពិនិត្យសមិទ្ធផល គម្រោងអភិវឌ្ឍន៍សុខភាពសហគមន៍មូលដ្ឋាននៅខេត្តសៀមរាប

នៅព្រឹកថ្ងៃទី ០៥ ខែកក្កដា ឆ្នាំ២០១៦ នេះ ក្រុមការងារ​កាកបាទក្រហមកម្ពុជា​ ដឹកនាំ​ដោយ លោកជំទាវ ម៉ែន នារីសោភ័គ អគ្គលេខាធិការរងទី១ រួមជាមួយ ​សាខាកាកបាទក្រហមកម្ពុជា​ ខេត្តសៀមរាប បានចុះសួរ​សុខទុក្ខ​ប្រជាពលរដ្ឋ​ និងពិនិត្យសមិទ្ធផល ​ដែលទទួលបាន ​ពីការប្រើប្រាស់ អណ្តូង​ទឹកស្អាត ចំនួន ៤៧អណ្តូង ​របស់គម្រោងអភិវឌ្ឍន៍​សុខភាពសហគមន៍​មូលដ្ឋាន កាកបាទក្រហម​កម្ពុជា​ដែលមាន​អ្នកទទួលផល​ប្រមាណ ១,១៧៥គ្រួសារ​ នៅស្រុកជីក្រែង ខេត្តសៀមរាប។

ទន្ទឹមនឹងនោះ​ ក្រុមការងារ​បានចុះសួរសុខទុក្ខ​ប្រជាពលរដ្ឋ​ ចំនួន ១១គ្រួសារ ក្នុងនោះមាន ចាស់ជរា ជនពិការ អ្នកផ្ទុកមេរោគអេដស៍ ស្ត្រីមេម៉ាយ និងអ្នកស្ម័គ្រចិត្ត​កាកបាទក្រហមកម្ពុជា​កំពុងមាន​ជំងឺ ដែល​រស់នៅ​ ភូមិតាអុង ឃុំល្វែងឬស្សី ស្រុកជីក្រែង ខេត្តសៀមរាប ព្រមទាំង​បានផ្តល់អំណោយ​មនុស្សធម៌​ជូនគ្រួសារ​នីមួយៗទទួលបាន ៖ អង្ករ មី ត្រីខ ទឹកដោះគោខាប់ ស្ករស មុង ភួយ សារុង ក្រមា និងថវិកា ១០០,០០០រៀល។

នាឱកាសនោះ លោកជំទាវ​អគ្គលេខាធិការរងទី១ បានមានប្រសាសន៍​ផ្តាំផ្ញើសួរសុខទុក្ខ និងក្តីនឹក​រឮកពី សម្តេចកិត្តិ​ព្រឹទ្ធបណ្ឌិត ប្រធាន​កាកបាទក្រហមកម្ពុជា ដែលជានិច្ចកាល​យកចិត្តទុកដាក់​ចំពោះ​សុខទុក្ខរបស់​ប្រជាពលរដ្ឋ​គ្រប់ពេលវេលា ដោយមិនប្រកាន់​ពីនិន្នាការនយោបាយ​អ្វីឡើយ។ លោកជំទាវ បានផ្តាំផ្ញើដល់​ប្រជាពលរដ្ឋ សូមយកចិត្តទុកដាក់​ថែរក្សាសុខភាព ដោយគេងក្នុងមុង​ជៀសវាងមូសខាំកើត​ជំងឺគ្រុនឈាម និងសូមមាន​អនាម័យល្អក្នុង​ការរស់នៅ និងបរិភោគអាហារ ពិសេស ត្រូវបរិភោគ​ទឹកដាំឆ្អិនជានិច្ច ហើយ​សូមចូលរួម​ថែរក្សាសមិទ្ធផល​អណ្តូងទឹកទាំងអស់នេះ​ឱ្យល្អគង់វង្ស​យូរអង្វែង។

នៅក្នុងដំណើរ​បេសកកម្ម​មនុស្សធម៌​នោះដែរ ក្រុមការងារ​បានចុះពិនិត្យដំណើរ​ការសាងសង់​ទីស្នាក់ការអនុសាខា​ ស្រុកជីក្រែង​ ដែលជាការិយាល័យ​សម្រាប់មន្ត្រី-អ្នកស្ម័គ្រចិត្តអនុសាខា បំពេញកិច្ចការងារ​ឱ្យកាន់តែ​មានប្រសិទ្ធភាព ជួយសម្រាល​ការលំបាកដល់​ប្រជាពលរដ្ឋបាន​កាន់តែ​ច្រើន ដូចពាក្យថា កាកបាទក្រហម​កម្ពុជាមានគ្រប់ទីកន្លែង សម្រាប់គ្រប់ៗគ្នា ។ ដោយឡែក លោកជំទាវ ក៏បានលើកទឹកចិត្ត​ដល់អ្នកស្ម័គ្រចិត្ត​កាកបាទក្រហមកម្ពុជា ខេត្តកំពង់ធំ ដោយបាន​ឧបត្ថម្ភថវិកា​ក្នុងម្នាក់ៗ ១០០,០០០រៀលផងដែរ៕

First Prev 38 39 40 41 42