អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

ពិធីបិទ វគ្គបណ្តុះបណ្តាល ស្តីពី “គន្លឹះដើម្បីភាពជោគជ័យ និងភាពជាអ្នកដឹកនាំ

កក្រក៖ នាព្រឹក​ថ្ងៃទី ​២៨ ខែកក្កដា ឆ្នាំ២០១៧ លោកជំទាវ ​ពុំ ចន្ទីនី​ អគ្គលេខាធិការ​បានអញ្ជើញ​ជាអធិបតីភាព​ក្នុង​ពិធីបិទ ​វគ្គបណ្តុះបណ្តាល​ ស្តីពី “គន្លឹះ​ដើម្បីភាព​ជោគជ័យ ​និងភាពជា​អ្នកដឹកនាំ”​ ដែលមានរយៈពេល ៤ថ្ងៃ គឺចាប់ពីថ្ងៃទី ២៥ ដល់ ២៨ ខែកក្កដា ឆ្នាំ២០១៧ ដែលមានអ្នកចូលរួមជាមន្ត្រីទីស្នាក់ការកណ្តាល​ និងមន្ត្រី អ្នកស្ម័គ្រចិត្ត សាខា​រាជធានី​ភ្នំពេញ សរុបចំនួន ៧២នាក់។

ក្នុងឱកាស​នោះដែរ លោកជំទាវ​អគ្គលេខាធិការ​ កាកបាទក្រហម​កម្ពុជា សូមថ្លែង​អំណរគុណ ​លោកគ្រូ Cristopher Lee និងក្រុមការងារ​ដែលបាន​យកចិត្តទុក​ដាក់បង្រៀន ​ដល់មន្ត្រី​ អ្នក​ស្ម័គ្រចិត្ត​ ហើយ​វគ្គនេះ “គន្លឹះដើម្បី​ភាពជោគជ័យ​ និងភាពជា​អ្នកដឹកនាំ” (Operacy) ផ្តល់នៅ​គោលគំនិត​ឲ្យយើង​គ្រប់គ្នា ៖
- មនុស្សយើងកើតមកដើម្បីជោគជ័យ មិនបរាជ័យទេ
- បណ្តុះ​គំនិត​វិជ្ជមាន ដើម្បី​ទទួលជោគជ័យ
- គ្មាននរណាម្នាក់​កើតមក​គ្មានកំហុស​ទេ តែយើង​មិនត្រូវ​ធ្វើនូវកំហុស​ដដែលៗ ហើយ​កំហុស គឺជាបទពិសោធន៍
- សត្រូវរបស់​ភាពជោគជ័យ​នោះ គឺភាពភ័យ​ខ្លាចហើយ​ វគ្គ​បណ្តុះបណ្តាល​នេះ “គន្លឹះ​ដើម្បីភាព​ជោគជ័យ និង​ភាពជា​អ្នកដឹកនាំ” (Operacy) និយាយថា បើចង់​ជោគជ័យ​ត្រូវប្រកាន់​គោលការណ៍ ៥ នោះគឺ៖ ការផ្លាស់ប្តូរ, គោរពនូវភាព​ផ្សេងៗគ្នា, ការរួម​បញ្ចូលគ្នា, ការត្រួត​បញ្ជា​ខ្លួនឯង និងភាព​រីករាលដាល។

អតីតសិស្សពូកែនិទ្ទេស A ឆ្នាំ២០១៦ ដែលមានជំងឺរលាកទងសួតធ្ងន់ធ្ងរទទួលអំណោយពីកក្រក

កក្រក​ ៖​ នៅទីស្នាក់ការ​កណ្តាល​ នារសៀលថ្ងៃទី ២៦​ ខែកក្កដា​ឆ្នាំ២០១៧ នេះ កាកបាទក្រហម​កម្ពុជា ដែលមាន​សម្តេច​កិត្តិព្រឹទ្ធបណ្ឌិត ​ប៊ុន រ៉ានី ហ៊ុនសែន ជាប្រធាន​ បានចាត់ឱ្យ​ លោកជំទាវ ​ម៉ែន នារីសោភ័គ អគ្គលេខាធិការរងទី ១​ កាកបាទក្រហម​កម្ពុជា​ យកសម្ភារៈ​ និងថវិកា​មួយចំនួន​ជូនដល់​ យុវជន​ ហេង​ ដូរ៉ង្គ​ អាយុ​ ១៩ឆ្នាំ​ អតីតសិស្ស​ពូកែនិទ្ទេស​ A ឆ្នាំ២០១៦​ ដែលមាន​ជំងឺរលាក​ទងសួត​ធ្ងន់ធ្ងរ​ កំពុង​សម្រាកព្យាបាល​នៅបន្ទប់​សង្គ្រោះបន្ទាន់​នៃមន្ទីរពេទ្យ​កាល់ម៉ែត។

 

ក្នុងពេលប្រគល់​អំណោយនោះ លោកជំទាវ អគ្គលេខាធិការ​រងទី ១ បានពាំនាំ​នូវប្រសាសន៍​របស់ សម្តេចកិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ដែលផ្តាំ​ផ្ញើនូវការ​សួរសុខទុក្ខ ក្តីអាណិតអាសូរ​ ចំពោះ​យុវជន​ ហេង​ ដូរ៉ង្គ​ ដែល​ធនធាន​មនុស្សវ័យ​ក្មេងរបស់​សង្គមជាតិ​ និងជូនពរ ឆាប់​បានជា​សះស្បើយពីជំងឺ​ត្រឡប់ទៅសិក្សារៀនសូត្រ​បន្តទៀត។

ឪពុកម្តាយ​បង្កើតរបស់​ យុវជន​ ហេង​ ដូរ៉ង្គ​ ដែលមក​ទទួលអំណោយ​នាឱកាសនោះ បានសំដែង​ក្តីរំភើប​ឥតឧបមា​ ដោយទទួលបាន​ការគិតគូរ​ និងយកចិត្ត​ទុកដាក់​ ពីកាកបាទក្រហម​កម្ពុជា ក្រោមការ​ដឹកនាំ​របស់ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ក៏ដូច​ជារាជ​រដ្ឋាភិបាល​កម្ពុជា​ ក្រោមការ​ដឹកនាំ​របស់​សម្តេច​តេជោ ហ៊ុន​ សែន​ និងការចូលរួម​ពីសាកលវិទ្យាល័យ​ ព្រមទាំងក្រុម​យុវជន​កាកបាទក្រហម​កម្ពុជា​ ដែលបាន​ជួយដល់ថ្លៃ​ព្យាបាល​ ពិសេសគឺ​ ផ្តល់កម្លាំងចិត្ត​ និងលើក​ទឹកចិត្ត​ ដែលជា​គុណបំណាច់​មិនអាច​កាត់ថ្លៃបាន។​

 

សូមបញ្ជាក់ថា​ យុវជន​ ហេង​ ដូរ៉ង្គ​ មានទីលំនៅ​នៅភូមិ​ស្រែព្រីង​ សង្កាត់​កំពង់ឆ្នាំង​ ក្រុងកំពង់ឆ្នាំង​ ខេត្តកំពង់ឆ្នាំង​ ជាអតីតសិស្សពូកែនិទ្ទេស​ A ឆ្នាំ២០១៦​ បច្ចុប្បន្ន​កំពុងមានជំងឺ​ស្របពេល​កំពុង​សិក្សាថ្នាក់ឆ្នាំសិក្សា​មូលដ្ឋាន​ផ្នែក​វេជ្ជសាស្ត្រ​នៃសាកល​វិទ្យាល័យ​វិទ្យាសាស្ត្រ​សុខាភិបាល៕

 

វគ្គផ្សព្វផ្សាយស្តីពី ច្បាប់មនុស្សធម៌អន្តរជាតិនៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ

កក្រក៖ ​នៅព្រឹក​ថ្ងៃទី​ ២៥ ខែកក្កដា ឆ្នាំ២០១៧ លោកជំទាវ ហួន ច័ន្ទបូរ៉ា នាយិកា ​នាយកដ្ឋាន​ទំនាក់ទំនង​ និងលោក រ៉ូម៉ាន់ ផារ៉ាម៉ូនូវ​ ប្រធាន​បេសកកម្ម​ អាយ.ស៊ី.អរ.ស៊ី ប្រចាំ​ប្រទេស​កម្ពុជា​ នៃ​គណៈកម្មាធិការ​អន្តរជាតិ​កាកបាទក្រហម​ (អាយ.ស៊ី.អរ.ស៊ី) ដែលមាន​ការសម្រប​សម្រួល ​ពីសាខា​កាកបាទក្រហម​កម្ពុជា​ ខេត្តកំពង់ស្ពឺ បានបើកវគ្គ​ផ្សព្វផ្សាយ​ស្តីពី ច្បាប់មនុស្សធម៌​អន្តរជាតិ និងការប៉ះទង្គិច​ប្រដាប់​អាវុធ ក្នុងពេលបំពេញ​បេសកកម្ម នៅប្រទេស​អាហ្វ្រិក​កណ្តាល ជូននាយ​ទាហាន​សិក្ខាកាម នៃសាលា​ហ្វឹកហ្វឺន​កងកម្លាំងរក្សា​សន្តិភាព​ពហុជាតិ សរុបចំនួន ១៧៦ នាក់ (ស្រី ១៦ នាក់)។

 

វគ្គបណ្តុះបណ្តាល​នេះគឺ បញ្ជ្រាប​ការយល់ដឹង​អំពី តួនាទី និងភារកិច្ច​របស់​កាកបាទក្រហម​កម្ពុជា 
និង​ការបំពេញ​បេសកកម្ម​របស់ អាយ.ស៊ី.អរ.ស៊ី នៅប្រទេស​អាហ្វ្រិក​កណ្តាល​ ជូនដល់​នាយទាហាន​ដែលត្រូវទៅ​បំពេញបេសកកម្ម​នៅទីនោះ សម្រាប់​ធ្វើការ​ទំនាក់ទំនង​ក្នុងគ្រាអាសន្ន​ចាំបាច់​ណាមួយ។

 

សិក្ខាសាលាផ្សព្វផ្សាយច្បាប់ស្តីពីការគ្រប់គ្រងគ្រោះមហន្តរាយនៅខេត្តកំពត

ថ្ងៃទី ២៦ ខែ កក្កដា ឆ្នាំ២០១៧ កាកបាទក្រហម​កម្ពុជា​ បានរៀបចំ​សិក្ខាសាលា​ផ្សព្វផ្សាយ​ច្បាប់​ស្តីពី​ការគ្រប់គ្រង​គ្រោះមហន្តរាយ ​នៅសណ្ឋាគារ​កំពត​ឌីយ៉ាម៉ង់ ក្នុងទីរួម​ខេត្តកំពត ។ ពិធីនេះ​ប្រព្រឹត្ត​ទៅក្រោមអធិបតីភាព​លោកជំទាវ ពុំ ចន្ទីនី អគ្គលេខាធិការ​កាកបាទក្រហម​កម្ពុជា និងមានការអញ្ជើញ​ចូលរួមជាកិត្តិយសពី ឯកឧត្តម លោកជំទាវ​ថ្នាក់ដឹកនាំ​ខេត្តកំពត គណៈកម្មាធិការជាតិ​គ្រប់គ្រង​គ្រោះ មហន្តរាយ​ ទីស្នាក់ការ​កណ្តាល​កាកបាទក្រហម​កម្ពុជា មន្ត្រីសាខា និងអនុសាខា​កាកបាទក្រហម​កម្ពុជា ខេត្តចំនួន ៩ ក្នុងទូទាំង​ព្រះរាជាណា​ចក្រ​កម្ពុជា សរុប ចំនួន ៦០ នាក់ ។ 

 

សិក្ខាសាលា​នេះមាន​គោលបំណង​លើកកំពស់​ការយល់ដឹង​ជាសាធារណៈ​ស្តីពី​ច្បាប់គ្រប់គ្រង ​គ្រោះមហន្តរាយ​ លើកកំពស់​កិច្ចសហការល្អ ក្នុង​ការអនុវត្ត​ច្បាប់។​



កិច្ចប្រជុំ បូកសរុបលទ្ធផលការងារយុវជនកាកបាទក្រហមកម្ពុជា

នៅរសៀលថ្ងៃទី ២៤ ខែកក្កដា​ឆ្នាំ២០១៧ នេះ ទីស្នាក់ការ​កណ្តាល​កាកបាទក្រហម​កម្ពុជា ​បានរៀបចំ​កិច្ចប្រជុំ​ បូកសរុប​លទ្ធផល​ការងារ​យុវជន​កាកបាទក្រហម​កម្ពុជា​ឆមាសទី ១ ​និងលើកទិសដៅ​ការងារ​ឆមាសទី ២ ឆ្នាំ២០១៧ នៃគ្រឹះស្ថាន​ឧត្តមសិក្សា​ ចំនួន២១ ក្នុង​រាជធានី​ភ្នំពេញ ក្រោម​អធិបតី​ដ៏ខ្ពង់ខ្ពស់ លោកជំទាវ ឃួន សុដារី អនុប្រធាន​កាកបាទ​ក្រហម​កម្ពុជា និងអញ្ជើញ​ចូលរួម​ពីថ្នាក់​ដឹកនាំ-មន្ត្រី ប្រធាន​កិត្តិយស​ក្លឹប ទីប្រឹក្សា​យុវជន និងយុវជន​កាកបាទក្រហម​កម្ពុជា សរុប​ចំនួន ៩១ នាក់។

 

កិច្ចប្រជុំនេះ បានពិភាក្សា​លើ​ចំណុចខ្លាំង​ បញ្ហា​ប្រឈម​ នៃការអនុវត្ត​នូវភារកិច្ច​ និងការទទួលខុស​ត្រូវ​របស់​យុវជន​កាកបាទក្រហម​កម្ពុជា ក្នុងឆមាសទី ១ ពីខែមករា ​ដល់ខែ​មិថុនា ឆ្នាំ២០១៧ ដែលបាន​និងកំពុងធ្វើ ​ព្រមទាំង​ដាក់ចេញ​នូវទិសដៅ​សមស្រប​ក្នុងការ​អនុវត្ត​កញ្ចប់​សកម្មភាព​សម្រាប់​ឆមាស​ទី ២ ឆ្នាំ២០១៧ ដោយ​ដើរស្រប​តាមគោលការណ៍​គ្រឹះទាំង ៧ របស់ចលនា​ តាមរយៈ​ វិស័យ​ស្នូលទាំង ៤ នៃយុទ្ធសាស្ត្រ ២០១១-២០២០ របស់​កាកបាទក្រហម​កម្ពុជា។

 

ក្នុងឱកាសនោះ លោកជំទាវ ឃួន សុដារី បានផ្តល់​អនុសាសន៍ និងសំណូមពរ​សំខាន់​ចំនួន ៥ រួមមាន ៖


១/ សូមប្រធាន​កិត្តិយស​ក្លឹបយុវជន​កាកបាទក្រហម​កម្ពុជា​ បន្តជួយ​គាំទ្រឱ្យ​ក្លឹបយុវជន​ក្លាយជា​ថ្នាលមួយដើម្បី​បណ្ដុះបេះដូង​មនុស្សធម៌​ក្នុងជួរ​យុវជន និងនិស្សិត​នៅតាម​សាកលវិទ្យាល័យ។


២/ សូមក្លឹប​យុវជនទាំងអស់ ដែល​ជាកម្លាំងចលករ​ដ៏សំខាន់ ក្នុងការ​ចូលរួម​ការងារ​សង្គម បន្តធ្វើ​សកម្មភាពឱ្យបាន​ផុសផុល​បន្ថែមទៀត ដើម្បីធានា​បានការផ្តល់​សេវាមនុស្សធម៌​ប្រកប​ដោយ​ប្រសិទ្ធភាព។


៣/ សូមបន្ត​ពង្រឹងកិច្ច​សហប្រតិបត្តិការ​ជាមួយ​ស្ថាប័ន ឬអង្គការ​ចាត់តាំង​យុវជន​ដទៃទៀត ដែលមាននៅក្នុងសង្គម​ឬសហគមន៍។


៤/ សូមយកចិត្ត​ទុកដាក់ យកក្លឹប​យុវជន​កាកបាទក្រហម​កម្ពុជា ធ្វើជា​កន្លែង​សិក្សារៀន​សូត្រ បណ្តុះ​ជំនាញ បំណិនជីវិត។ល។ ពិសេស ជួយដល់​និស្សិត​ក្រីក្របំផុត ដោយមិន​ឱ្យមាននិស្សិត​ណាម្នាក់​បោះបង់​ការសិក្សាដោយ​បញ្ហាជីវភាពឡើយ។


៥/ សូមយុវជន​កាកបាទក្រហម​កម្ពុជា​ទាំងអស់ ​មានសីលធម៌ សុជីវធម៌ គុណធម៌ ធ្វើជា​យុវជន​គំរូ ជួយដល់សង្គមជាតិ​ឱ្យមាន​សុខសន្តិភាព និងរីក​ចម្រើន​ទៅមុខ៕

 

វគ្គផ្សព្វផ្សាយជាមូលដ្ឋានស្ដីពីគោលការណ៍គ្រឹះរបស់ចលនាកាកបាទក្រហមដល់បណ្ឌិត្យសភានគរបាល

កក្រក ៖ ​នាព្រឹកថ្ងៃទី ២០ ខែ កក្កដា ឆ្នាំ២០១៧ កាកបាទក្រហម​កម្ពុជា សហការ​ជាមួយ​គណៈកម្មាធិការ​អន្តរជាតិ​កាកបាទក្រហម​ (អាយ.ស៊ី.អរ.ស៊ី) បានរៀបចំ​បើកវគ្គ​ផ្សព្វផ្សាយ​ជាមូលដ្ឋាន ​ស្ដីពី​គោលការណ៍​គ្រឹះរបស់​ចលនា​កាកបាទក្រហម ​អឌ្ឍចន្ទក្រហម​ មូលដ្ឋាន​ច្បាប់មនុស្សធម៌​អន្តរជាតិ​ និង​ការលើកកម្ពស់​តម្លៃ​មនុស្សធម៌​ ជូននិស្សិត​និងសិក្ខាកាម​ នៃសាលា​បណ្ឌិត្យ​សភា​នគរបាលកម្ពុជា​ ដែលមាន​ការអញ្ជើញ​ចូលរួម​ពី ប្រធាន​បេសកកម្ម​ អាយ.ស៊ី.អរ.ស៊ី មន្ត្រី​ការិយាល័យ​ផ្សព្វផ្សាយ ​នៃនាយកដ្ឋាន​ទំនាក់ទំនង និងសហការី ​រួមទាំង​សិក្ខាកាម​សរុបចំនួន ១៧៩នាក់ ស្ថិតនៅ​ក្នុងស្រុកកៀនស្វាយ​ ខេត្តកណ្ដាល។

 

វគ្គនេះប្រព្រឹត្តទៅ​នៅក្នុង​គោលបំណង ដើម្បីផ្សព្វផ្សាយ​បញ្ជ្រៀប​ការយល់ដឹង​អំពី គោលការណ៍គ្រឹះ​របស់ចលនា​កាកបាទក្រហម អឌ្ឍចន្ទក្រហម ​ច្បាប់មនុស្សធម៌​អន្តរជាតិ ​និងការលើកកម្ពស់​តម្លៃមនុស្សធម៌ ​ជូនដល់​សិក្ខាកាម​ទាំងអស់​ដែលជា​កងកម្លាំង​នគរបាល​កម្ពុជា​ផងដែរ៕

 

ប្រជាពលរដ្ឋចាស់ជរា និងក្រីក្រខ្វះខាតស្បៀង ទទួលអំណោយមនុស្សធម៌ពីសាខាខេត្ត

សាខាកក្រក ខេត្តព្រះសីហនុ ៖ រសៀល​ថ្ងៃទី​ ១៩​ ខែកក្កដា ​ឆ្នាំ២០១៧​ ឯកឧត្តម​ យន្ត មីន​ ប្រធានកិត្តិយស ​សាខា​កាកបាទក្រហម​កម្ពុជា ខេត្តព្រះសីហនុ ​រួមដំណើរ​ដោយ ​សមាជិក​គណៈកម្មាធិការ​សាខា ​មន្ត្រីសាខា ​អនុសាខា ​បាន​អញ្ជើញ​ចុះសួរសុខទុក្ខ ​និងនាំយក​អំណោយ​មនុស្សធម៌​ ជូនដល់​ប្រជាពលរដ្ឋ​រងគ្រោះដោយសារ​ខ្យល់ព្យុះ ​និងខ្យល់កន្រ្ទាក់​ចំនួន ៧៥ គ្រួសារ មកពី​បួន​សង្កាត់ ក្នុង​ក្រុងព្រះសីហនុ ​នៅសាលា​ក្រុងព្រះ​សីហនុ ។

 

ក្នុងឱកាស​នោះដែរ ​ឯកឧត្តម​ប្រធាន​ បានពាំនាំ​នូវប្រសាសន៍ផ្ដាំ​ផ្ញើសួរសុខទុក្ខ​និងក្ដីនឹក​រលឹកពី​សំណាក់​សម្ដេច​កិត្តិព្រឹទ្ធបណ្ឌិ​ត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា​ ដែលជានិច្ចកាល ​សម្ដេច​តែងតែ​គិតគូសុខទុក្ខ​ប្រជាពលរដ្ឋ​ក្រីក្រ​មានទុក្ខលំបាក​ ជនរងគ្រោះ​ ជនងាយ​រងគ្រោះ​ ដោយមិន​ប្រកាន់​រើសអើង ​វណ្ណៈ ជាតិសាសន៍ ពណ៍សម្បុរ ឬនិន្នាការ​នយោបាយ​អ្វីឡើយ។ ឯកឧត្តម​សូមឲ្យប្រជាពលរដ្ឋ​ត្រូវចេះការពារ​នៅពេលមាន​គ្រោះមហន្តរាយ​កើតឡើង និងថែរក្សា អនាម័យ សុខភាព​ឲ្យបានល្អ។

 

អំណោយ​ដែលផ្ដល់​ជូនក្នុង​មួយគ្រួសារ​រួមមាន៖ អង្ករ ២៥ គីឡូ មី ១កេះ ត្រីខ ១០កំប៉ុង តង់មួយ កន្ទេល ១ ឃីត ១(ក្រម៉ា១ សារ៉ុង១ មុង១ និងភួយ១) និងថវិកា​មួយចំនួន ។ រីឯ​ប្រជាពលរដ្ឋ ​២គ្រួសារ​រងគ្រោះធ្ងន់ធ្ងរ​ជាងគេ ឯកឧត្តម​បានបន្ថែម​ថវិកាមួយ​ចំនួនទៀត។

 

ប្រជាពលរដ្ឋចាស់ជរា និងក្រីក្រខ្វះខាតស្បៀង ទទួលអំណោយមនុស្សធម៌ពីសាខាខេត្ត

សាខាកក្រកខេត្តបាត់ដំបង ៖ ​នាព្រឹក​ថ្ងៃទី ​២០​ខែកក្កដា​ ឆ្នាំ២០១៧​ ឯកឧត្តម​ ប៊ុត គឹមស៊ាន​ ប្រធាន​គណៈកម្មាធិការ​សាខា​ខេត្ត​បាត់ដំបង ​និង​សហការី ​បាន​ចុះ​សួរសុខទុក្ខ​ និងនាំ​យក​អំណោយ​មនុស្សធម៌​របស់សាខា​ជូនដល់​គ្រួសារ​ប្រជាពលរដ្ឋ​ចាស់ជរា ​និងក្រីក្រ​ខ្វះខាត​ស្បៀង ​ចំនួន២គ្រួសារ​រស់នៅភូមិ​បោះពោធិ៍ ឃុំ​អូរដំបង១ ស្រុកសង្កែរ​ខេត្តបាត់ដំបង ។​

 

ក្នុងឱកាស​នោះដែរ ​ឯកឧត្តម​ បានពាំនាំ​មកនូវ​ប្រសាសន៍​ផ្ដាំផ្ញើសាក​សួរសុខទុក្ខ​និង​ក្ដីនឹករលឹក​ពីសំណាក់ ​សម្ដេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា ​ដែលជានិច្ចកាល​ សម្ដេច​តែងតែ​គិតគូ​សុខទុក្ខ​បងប្អូន​ប្រជាពលរដ្ឋ​ក្រីក្រ ​ដែលមាន​ទុក្ខលំបាក​ ជនរងគ្រោះ ​ជនងាយរងគ្រោះ ​គ្រប់ប្រភេទ​ដោយមិន​ប្រកាន់រើស​អើងវណ្ណៈ ​ជាតិសាសន៍ ​ពណ៍សម្បុរ​ ឬនិន្នាការ​នយោបាយអ្វីឡើយ​ ហើយសូម​បងប្អូនប្រជាពលរដ្ឋ​ទាំងអស់​ មេត្តា​ខិតខំ​ថែរក្សា​សុខភាព​ឲ្យបានល្អ​ សម្អាត​បរិស្ថាន​ជុំវិញផ្ទះ ​មានអនាម័យ​ក្នុងការរស់នៅ ដោយប្រកាន់​ខ្ជាប់នូវ​ ហូបស្អាត ផឹកស្អាត និងរស់​នៅស្អាត។

 

អំណោយ​ដែលបាន​ផ្ដល់ជូន​រួមមាន ​៖ អង្ករ ៥០គីឡូក្រាម ត្រីខ ១០កំប៉ុង ភូយ១ ក្រមា១ មី ១កេស ទឹកបរិសុទ្ធវីឃែរ​១កេស ទឹកត្រី១យូ ទឹកស៊ីវ​១យូ និង គ្រឿង​ឧបភោគ​បរិភោគ ​សម្ភារៈប្រើប្រាស់​ ​មួយចំនួននិងថវិកា​ចំនួន​៥ម៉ឺនរៀលផងដែរ៕

បញ្ជាក់៖ ​គ្រឿងឧបភោគ​បរិភោគ ​សម្ភារៈ​ប្រើប្រាស់​ មួយចំនួន​ជាអំណោយ​ព្រះអនុគុណ​ស្រុកបវេល​តាមរយៈ​សាខាខេត្ត​។

 

វគ្គបណ្តុះបណ្តាលយុវជនជាភ្នាក់ងារនៃការផ្លាស់ប្តូរឥរិយាបទនៅខេត្តកំពត

សាខាកក្រកខេត្តកំពត ៖ កាលពី​ព្រឹកថ្ងៃ​ទី១៨​ ខែកក្កដា​ ឆ្នាំ២០១៧ ​សាខា​កាកបាទក្រហម​កម្ពុជា​ខេត្តកំពត​ បានរៀបចំ​ពិធី​វគ្គបណ្តុះបណ្តាល​មួយ ក្រោម​ប្រធានបទ «យុវជន​ជាភ្នាក់ងារ​នៃ​ការផ្លាស់ប្តូរ​ឥរិយាបទ» ជូនដល់​យុវជន​កាកបាទក្រហម​កម្ពុជា​ ចំនួន ៤០នាក់ (ស្រី២០នាក់) មកពី​វិទ្យាល័យ​គោលដៅ​ចំនួន​៤ ដោយមាន​ការអញ្ជើញ​ចូលរួម​ជាគណៈអធិបតី​ពីសំណាក់​លោក តាក ហាប់ សមាជិក​គណៈកម្មាធិការសាខា​ ស្ថិតក្នុងក្រុងកំពត ខេត្តកំពត ។

 

វគ្គនេះមាន​គោលបំណង ដើម្បី​ពង្រឹងសមត្ថភាព​បន្ថែមដល់​យុវជន​កាកបាទក្រហម​កម្ពុជា​ ហើយយកចំណេះ​ដឹងទាំង​នេះជួយ​ផ្សព្វផ្សាយ​សាលារៀន​ និងសហគមន៍​រៀងៗខ្លួន​ឱ្យកាន់តែប្រសើរឡើង៕

 

គម្រោងអប់រំសុខភាពមនុស្សចាស់ របស់សាខាកាកបាទក្រហមកម្ពុជាខេត្តស្វាយរៀង

សាខាកក្រក​ខេត្តស្វាយរៀង៖ ថ្ងៃទី ​១៩ ខែ កក្កដា ឆ្នាំ ២០១៧ ការិយាល័យ​ការពារ​ជម្ងឺឆ្លង​ និង​មិនឆ្លង​ នាយកដ្ឋាន​សុខភាព​ កាកបាទក្រហម​កម្ពុជា​ ដឹកនាំ​ដោយលោក​បណ្ឌិត វ៉ា សុភក្រ័​ សហការ​ជាមួយ គម្រោង​អប់រំ​សុខភាព​មនុស្សចាស់​ នៃសាខា​កាកបាទក្រហម​កម្ពុជា​ខេត្តស្វាយរៀង​ មណ្ឌល​សុខភាព​មេសរថ្ង​ក បានចាប់ផ្តើម​ដំណើរ​ការវគ្គ​ទី ១​ ចុះអប់រំ​ផ្សព្វផ្សាយ​ស្តីពី​សុខភាព​មនុស្សចាស់ ​ដល់ប្រជាពលរដ្ឋ​ចំនួន ៤៣ នាក់ (ស្ត្រី ៣៥ នាក់) ដែលមាន​អាយុចាប់​ពី ៤៥-៦៥ ឆ្នាំ នៅភូមិបារាយណ៍ ​ឃុំមេស​រថ្ងក ស្រុកចន្ទ្រា ។

 

ក្រោមប្រធានបទ៖ ការប៉ាន់ប្រម៉ាណ​អំពីសុខភាព​ប្រជាជន ​ការពិនិត្យ​សម្ពាធឈាម​ ការវាស់(IBM) ការពិនិត្យទឹកនោម​មើលជាតិ​ស្ករ ការបង្ការជំងឺ​មិនឆ្លង ការហាត់​ប្រាណ ការសមាធិ​ និងការកំណត់​រកអ្នក​ត្រូវបញ្ជូនទៅ​ទទួលសេវ៉ា​នៅមណ្ឌល​សុខភាព ។ ក្នុងគោលបំណង​៖ ដើម្បីបង្ការ​ និងទប់ស្កាត់​ការរីករាល​ដាលនៃជម្ងឺមិន​ឆ្លងរួម​មាន៖ ជម្ងឺ​មហារីក ទឹកនោម​ផ្អែម ជំងឺសរសៃ​ឈាម​បេះដូង ឈឺ​សន្លាក់​ដៃជើង ​និង​ជំងឺផ្លូវ​ដង្ហើម​រ៉ាំរ៉ៃ ។

First Prev 64 65 66 67 68 Next Last