សាខាកក្រក​ខេត្តសៀមរាប៖​នៅព្រឹក​ថ្ងៃទី​២៧​ខែកុម្ភៈ​ឆ្នាំ២០១៧​សាខា​កាកបាទក្រហម​កម្ពុជា​ខេត្តសៀមរាប​បានប្រារព្ធ​ពិធី​សម្ពោធ​ដាក់ឱ្យ​ប្រើប្រាស់​អគារ​ទីស្នាក់ការ​អនុសាខា​កាកបាទក្រហម​កម្ពុជា ស្រុក​ជីក្រែង​ដែលស្ថិតនៅ​ភូមិកំពង់ក្ដី២​ឃុំកំពង់ក្ដី​ស្រុកជីក្រែង​(ជាប់ផ្លូវជាតិលេខ៦) ដោយមានការអញ្ជើញ​ចូលរួម​ជាគណៈអធិបតីពី​សំណាក់​ឯកឧត្តម​បណ្ឌិត ឃឹម ប៊ុនសុង ប្រធានគណៈកម្មាធិការសាខា​កាកបាទក្រហម​កម្ពុជា ខេត្តសៀមរាប។ មានប្រសាសន៍នាឱកាសនោះ ឯកឧត្តមបានឱ្យដឹងថា អគារទីសា្នក់ការ​អនុសាខា​កាកបាទក្រហម​កម្ពុជា​ស្រុកជីក្រែង​ដ៏ថ្មី​សន្លាងនេះ ​គឺជា​សមិទ្ធិផល​ទី៤ ​របស់សាខា​កាកបាទក្រហម​កម្ពុជា​ខេត្តសៀមរាប​ហើយ​អគារ​នេះគឺ​បានការ​ឧត្តម​គាំទ្រ​ថវិកា​ដោយ​ ឯកឧត្តម​ និង​លោកជំទាវ​ផ្ទាល់ ដែលត្រូវ​បានដំណើរ​ការសាងសង់​តាំងពី​ខែមេសា និង​រួចរាល់​ជាស្ថាពរ​នៅខែសីហា ឆ្នាំ២០១៦។

ក្នុងនោះផងដែរ សប្បុរសជន​ដែល​អញ្ញើញ​ចូលរួម​ក្នុងពិធី​សម្ពោធ​ដាក់ឱ្យ​ប្រើប្រាស់​ជាផ្លូវការ​នូវអនុសាខា​កាកបាទក្រហម​កម្ពុជា ស្រុកជីក្រែងនេះ បានចូលរួម​ថវិកាសរុបប្រមាណ៤.៨៩០ ដុល្លាអាមេរិក និង២លានរៀល​ប្រគល់​ជូន​អនុសាខា​ស្រុកជីក្រែង ដើម្បី​ចាត់ចែង​និងទ្រទ្រង់​សកម្មភាព​មនុស្សធម៌ក្នុងភូមិសាស្ត្ររបស់ខ្លួន។

នៅក្នុងពិធីនេះដែរ ឯកឧត្តម​និង​លោកជំទាវ បានប្រគល់ផ្ទះ​មនុស្សធម៌ជានិមិត្តរូប ចំនួន៤ខ្នង ជូនដល់ទុរគត៌ជន៤គ្រួសារ។

សាខាកក្រកខេត្តស្ទឹងត្រែង ៖​នៅព្រឹក​ថ្ងៃទី​២៧ ​ខែកុម្ភៈ​ ឆ្នាំ២០១៧នេះ ​ឯកឧត្តមវេជ្ជ.​អ៊ុយ សំអាត​ នាយក​នាយកដ្ឋាន​គ្រប់គ្រង​គ្រោះមហន្តរាយ ​កាកបាទក្រហម​កម្ពុជា ​និង​មាន​ការអញ្ជើញ​ចូលរួម​ពីឯកឧត្តម ឈាង ឡាក់ ប្រធាន​គណៈកម្មាធិការ​សាខា និង​លោក លោកស្រី ដែលជា​សមាជិក សមាជិកា​គណៈកម្មាធិការ​សាខា និង​អនុសាខា បានអញ្ជើញ​ចុះសួរសុខទុក្ខ​ និងនាំយក​អំណោយ​មនុស្សធម៌ ​របស់កាកបាទក្រហម​កម្ពុជា ដែលមាន​សម្ដេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ជាប្រធាន ចែកជូន​ដល់ប្រជាពលរដ្ឋ​ងាយរងគ្រោះ​បំផុតចំនួន​១៩១គ្រួសារ​ មកពី​៥ឃុំ ស្រុកសៀមប៉ាង ខេត្ត​ស្ទឹងត្រែង​ ដែលពិធីនេះ​ប្រព្រឹត្ត​ទៅក្នុង​បរិវេណ​សាលាស្រុក​សៀមប៉ាង។

នៅក្នុងឱកាស​សំណេះសំណាល​ជាមួយ​គ្រួសារ​ទទួលផល​ ឯកឧត្តមវេជ្ជ. បាន​មានប្រសាសន៍​ផ្ដាំផ្ញើ​សួរសុខទុក្ខ​ពីសំណាក់ សម្ដេចកិត្តិ​ព្រឹទ្ធ បណ្ឌិត​ ប្រធាន​កាកបាទក្រហម​កម្ពុជា ដល់បងប្អូន​ប្រជាពលរដ្ឋងាយ​រងគ្រោះបំផុត​ទាំងអស់ និងបានណែនាំ​ដល់​បងប្អូន សូមថែរក្សា​អនាម័យ និងពិសារ​ទឹកឆ្អិន។ ជាងនេះទៅទៀត សូមបងប្អូនទាំងអស់ សូមកុំពិសារគ្រឿងស្រវឹង និងត្រូវមានស្មារតីប្រុងប្រយ័ត្ន ជានិច្ចនៅពេលធ្វើ ដំណើរ ទៅទីជិតឬឆ្ងាយ ព្រមទាំងកុំរើសអើងអ្នករស់នៅជាមួយមេរោគអេដស៍។

ប្រជាពលរដ្ឋងាយរងគ្រោះទាំងអស់បានថ្លែងអំណរគុណដល់កាកបាទក្រហមកម្ពុជាដែលមានសម្ដេច ព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ គង់ប្រថាប់ជាព្រះប្រធានកិត្តិយស និងសម្ដេចកិត្តិព្រឹទ្ធបណ្ឌិតជាប្រធាន ជានិច្ចកាលតែងតែយកព្រះទ័យ និងចិត្តទុក ដាក់ចំពោះប្រជាពលរដ្ឋដែលងាយរងគ្រោះ គ្រប់ទិសទីដោយមិនប្រកាន់វណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ។

សាខាកក្រកខេត្តរតនគិរី ៖កាលពីព្រឹក​ថ្ងៃទី​២៦​ខែកុម្ភៈ​ឆ្នាំ២០១៧ នេះ​កាកបាទ​ក្រហមកម្ពុជា​ ដែលមាន​សម្ដេច​កិត្តិព្រឹទ្ធបណ្ឌិត​  ប៊ុន  រ៉ានី ហ៊ុនសែន​ជាប្រធាន​បានផ្ដល់​អំណោយ​មនុស្សធម៌​ជូនដល់ប្រជាពលរដ្ឋ​ងាយរងគ្រោះ​បំផុត​ចំនួន​៤២០គ្រួសារ​មកពី​ឃុំទាំង៦​រួមមាន​ឃុំឡាមិញ ឃុំស៉ើង ឃុំកក់ ឃុំទីងចាក់ ឃុំកិៈចុង និងឃុំលុងឃុង នៃស្រុកបរកែវ​ខេត្តរតនគិរី​ដែលពិធី​នេះប្រព្រឹត្ត​ទៅក្នុង​បរិវេណ​សាលា​ឃុំ​ឡាមិញ។

នៅក្នុង​ឱកាស​សំណេះសំណាល​ជាមួយ​គ្រួសារ​ទទួលផលឯកឧត្តម​វេជ្ជ. អ៊ុយ សំអាត នាយក​នាយកដ្ឋាន​គ្រប់គ្រង​គ្រោះមហន្ត រាយកាកបាទក្រហមកម្ពុជ​ បានមាន​ប្រសាសន៍ផ្ដាំផ្ញើ​សួរសុខទុក្ខ​ពីសំណាក់ ​សម្ដេច​កិត្តិព្រឹទ្ធបណ្ឌិត ប្រធាន​កាកបាទក្រហម​កម្ពុជា ដល់បងប្អូន​ប្រជាពលរដ្ឋ​ងាយរងគ្រោះ​បំផុត​ទាំងអស់ និងបានណៃនាំ​ដល់បងប្អូន សូមថែរក្សា​អនាម័យ និងពិសារ​ទឹកឆ្អិន។ ជាង នេះ​ទៅទៀត សូមបងប្អូន​ទាំងអស់ សូមកុំពិសារ​គ្រឿងស្រវឹង និងត្រូវមាន​ស្មារតី​ប្រុងប្រយ័ត្ន​ជានិច្ច​នៅពេល​ធ្វើដំណើរ​ទៅទីជិត​ ឬឆ្ងាយ ព្រមទាំង​កុំរើសអើង​អ្នករស់​នៅជាមួយ​មេរោគអេដស៍។

ប្រជាពលរដ្ឋ​ងាយរងគ្រោះ​ទាំងអស់រំភើប ត្រេកអរ​រហូតស្រក់​ទឹកភ្នែក និងបានថ្លែង​អំណរ​គុណដល់កាកបាទក្រហម​កម្ពុជា ដែល មានសម្ដេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរគង់ប្រថាប់ ជាព្រះប្រធានកិត្តិយស និងសម្ដេច​កិត្តិព្រឹទ្ធ បណ្ឌិត ជាប្រធាន ជានិច្ចកាល​តែងតែយកព្រះទ័យ និងចិត្តទុកដាក់​ចំពោះ​ប្រជាពលរដ្ឋ​ដែលងាយរងគ្រោះ​ គ្រប់ទិសទីដោយមិន ប្រកាន់វណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ។

អំណោយដែល​ចែកជូនគ្រួសារ​នីមួយៗមាន៖ អង្ករ ៣០គីឡូក្រាម មី ១កេស ត្រីខ ១០កំប៉ុង មុង១ ភួយ១ សារុង១ ក្រមា១ និងថវិកាមួយចំនួន៕

កាលពីថ្ងៃទី​២៦​កុម្ភៈ​២០១៧​វេលាម៉ោង​១៣ម៉៣០នាទី នៅ​អនុសាខា​កក្រក​ស្រុកលើកដែក​ខេត្តកណ្តាលក្រុមការងារ​ប្រាក់កម្ចី“វើលម៉េត” មានឯកឧត្តម កៀង វឌ្ឍនៈ រួម​ជាមួយអាជ្ញាធរ​មូលដ្ឋាន​លោក​មេឃុំ មេភូមិ និង​អ្នកស្ម័គ្រចិត្ត​កក្រក​បានប្រគល់​ប្រាក់កម្ចី ខ្នាតតូចជូន​ប្រជាជន​នៅភូមិព្រែកតូច និងភូមិ ព្រែកដាច់ស្រុកលើកដែកខេត្តកណ្តាលចំនួន១៤គ្រួសារដើម្បី​យកទៅ​ប្រកបរបរ​អាជីវកម្មបង្កើនជីវភាព​រស់នៅ​ឱ្យ មាន ភាពប្រសើរ ។

ក្នុងឱកាសនេះ ជាតំណាង​ក្រុមការងារ​ទាំងអស់​ឯកឧត្តម​បានមាន​ប្រសាសន៍ថ្លែង អំណរគុណ​ដល់ក្រុម​ការងារ​ប្រាក់កម្ចី​នៅមូលដ្ឋាន ​ដែលខិតខំ​អនុវត្តការងារ​បានល្អប្រសើរ​កន្លងមក និងជាពិសេសកោត​សរសើរដល់​ប្រជាពលរដ្ឋ ដែលបានរកប្រាក់នេះ ទៅរកទទួល​ទាន ដើម្បីបង្កើនជីវភាព រស់នៅចៀសឆ្ងាយពី​ភាពងាយរងគ្រោះនានា ហើយដែលបានបង្វិល​ប្រាក់​សងវិញគ្រប់ចំនួននិងទាន់ពេលវេលា​ជានិច្ច។

ប្រជាពលរដ្ឋទាំងអស់ ប្តេជ្ញាបន្តខិតខំរកទទួលទានដោយសុចរិត និងថ្លែងអំណរគុណ​ដល់ កក្រក ដែលមានសម្តេចកិត្តិព្រឺទ្ធ​បណ្ឌិតជាប្រធាន  ដែលបានផ្តល់ប្រាក់កម្ចីគ្មានការប្រាក់​នេះ ជូយប្រជាពលរដ្ឋដែលក្រីក្រ ខ្វះខាត ដើម្បីបង្កើនជីវភាពគ្រួសារ ដោយមិនប្រកាន់បក្សពួក ឬ គណបក្សនយោបាយណា​មួយឡើយ។

សាខាកក្រកខេត្តកំពង់ស្ពឺ៖ព្រឹកថ្ងៃទី២៣ ខែកុម្ភៈ ឆ្នាំ២០១៧ នៅទីស្នាក់ការ​សាខា​កាកបាទ ក្រហមកម្ពុជា ខេត្តកំពង់ស្ពឺ​បានបើកកិច្ច​ប្រជុំដើម្បី​ត្រៀម​រៀបចំ​ប្រារព្ធ​ទិវាពិភពលោក​កាកបាទក្រហម ​អឌ្ឍចន្ទក្រហម ៨ ឧសភា ២០១៧ នាពេលខាងមុខនេះ ក្រោមអធិបតីភាពឯកឧត្តម តុង សេង ប្រធានគណៈកម្មាធិការ​សាខាដែលមាន​ការអញ្ជើញ​ចូលរួម​ពីឯកឧត្តម លោកជំទាវ លោក លោកស្រី ជាសមាជិក សមាជិការ​គណៈកម្មាធិការសាខា មន្ត្រីប្រតិបត្តិសាខា និងប្រធាន​គណៈកម្មាធិការ​សាខា អនុសាខាស្រុក ក្រុងទាំង៨ សុបចំនួន ៣២នាក់។

កិច្ចប្រជុំនេះ​ប្រព្រឹត្តទៅ​នៅក្នុង​របៀបវារៈសំខាន់ៗចំនួន៣ គឺ៖

១. កម្មវិធី​ប្រារព្វ​កំណត់​ថ្ងៃទី ២៤ ខែ មេសា ២០១៧

២.ត្រូវបន្ត​ផ្សព្វផ្សាយ​ស្វែងរកមូលនិធិពី​សប្បុរសជន​នានាអោយបានទូលំទូលាយ

៣.រៀបចំ​សមាសភាព​គណៈកម្មការរៀបចំមីទ្ទីង៕

សាខាកក្រកខេត្តកំពត ៖កាលពីរសៀលថ្ងៃទី២៣​ខែកុម្ភៈ​ឆ្នាំ២០១៧ សាខា​កាកបាទក្រហមកម្ពុជា ខេត្តកំពត​ដឹកនាំ​ដោយលោកវេជ្ជ.កែវ សុផាន់ នាយក​សាខា​បានអញ្ជើញ​ចូលរួម​បិទ​វគ្គបណ្តុះបណ្តាល​យល់ដឹង​ជាមូលដ្ឋាន​ស្តីពី​ប្រវត្តិ​ចលនាកាកបាទក្រហម អឌ្ឍចន្ទក្រហម និង កម្មវិធីវិជ្ជាសង្រ្គោះបឋម ដល់យុវជន​កាកបាទក្រហម​កម្ពុជាសរុបចំនួន ៨៧នាក់ នៅវិទ្យាល័យហ៊ុនសែន ត្រសេកកោង។

វគ្គនេះមាន​គោលបំណងដើម្បីឲ្យនិស្សិត​យុវជន​កាកបាទក្រហមកម្ពុជា យល់ដឹងពីប្រវត្តិចលនាកាកបាទក្រហម អឌ្ឍចន្ទក្រហម របៀបសង្រ្គោះ បឋម និងបន្ត​ផ្សព្វផ្សាយ​នូវវិជ្ជានេះ​ទៅតាម​សាលារៀនក៏ដូចជា​នៅតាម​សហគមន៍ផងដែរ៕

សាខាកក្រកខេត្តកោះកុង​ ៖​ នាព្រឹកថ្ងៃទី​២២ ខែកុម្ភៈ ឆ្នាំ២០១៧ សាខា​កាកបាទក្រហមកម្ពុជា​ខេត្តកោះកុង ​សហការ​ជាមួយ​មន្ទីរ​សុខាភិបាល ខេត្ត និង​មណ្ឌល​សុខភាព​ឃុំប៉ាក់ខ្លង​ បានរៀបចំ​ពិធីអបអរសាទរ ទិវាជាតិ​សុខភាព​មាតា ទារក និងកុមារ​២១​កុម្ភៈ​ នៅមណ្ឌល​សុខភាព​ឃុំប៉ាក់ ខ្លង ស្រុកមណ្ឌលសីមា ខេត្តកោះកុង ក្រោមអធិបតីភាព​លោកជំទាវ ឈួង ឆាលិក ប៊ុនលើត អនុប្រធានកិត្តិយសសាខា និងមាន​ការរួម​ពីគណៈកម្មាធិការសាខា​អនុសាខាស្រុក ក្រុមស្រ្តី​មេផ្ទះ​ជាច្រើនអ្នក។

ក្នុងឱកាសនោះ​ លោកជំទាវ​មិថុនា ភូថង សមាជិកគណៈកម្មាធិការសាខា បានឡើងអាន​នូវសារលិខិតរបស់​សម្តេចកិត្តិព្រឹត្តបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា​ និងជាឥស្សរជនឆ្នើមថ្នាក់ជាតិនៃ​ផែនការ​សកម្មភាព​រួមអគ្គលេខាធិការ​អង្គការ​សហប្រជាជាតិ​ដើម្បីសុខភាពស្ត្រី​ និងកុមារ​ ជូនអ្នកចូលរួមទាំងអស់។

ទន្ទឹមនឹងនោះ​ លោកជំទាវអនុប្រធានកិត្តិយស​សាខា បានមានប្រសាសន៍ផ្តាំផ្ញើសួរសុខទុក្ខ​ ពី​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន ដែល​តែងតែ​គិតគូរ​ជានិច្ច​ជាមួយ​ប្រជាពលរដ្ធ គ្រប់លំដាប់ថ្នាក់ជាពិសេសដូចជាថ្ងៃនេះស្រាប់​ ទោះលោក​មិន​បានមកដល់ផ្ទាល់​លោកតែងតែ​ឱ្យសាខា​រៀបចំកម្មវិធីនេះឡើងដើម្បី​ផ្សព្វផ្សាយ​នូវសារដ៏មានសារៈសំខាន់នេះ។

នាឱកាសនោះផងដែរ​ សាខាបានចែកអំណោយ​មនុស្សធម៌ជូនស្រ្តីដែលទើបសម្រាល ស្រ្តីដែលមានផ្ទៃពោះ និងកុមារក្រោមអាយុ ០៥ ឆ្នាំ សរុប ២៧ នាក់​ ក្នុងម្នាក់ៗ ទទួលបាន​ ៖​ អង្ករ២២ គក្រ​ មី០១ កេស​ ទឹកដោះគោឆៅ ០១ ឡូ​ ទឹកផ្លែឈើ១២ កប៉ុង ទឹកសុទ្ធមួយ០១ យួរ​ និងថវិកា ៥០,០០០រៀល៕

កាលពីរសៀលថ្ងៃទី២៣ ខែកុម្ភៈ ឆ្នាំ២០១៧ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់មន្រ្តី កាកបាទក្រហមកម្ពុជា លោក តាំង សាមឿន លេខាធិការ​ សម្តេចកិត្តិព្រឹទ្ធបណ្ឌិត ព្រមជាមួយ​មន្រ្តី សាខា និងអនុសាខាកាកបាទក្រហមកម្ពុជាខេត្តកណ្តាលចុះសួរ សុខទុក្ខស្រ្តី ដែលទើបសម្រាលកូនចំនួន៣ រូប និងអ្នកត្រៀម​ សម្រាលចំនួន ៥ រូប។

នាពេលនោះ លោក តាំង សាមឿន បានផ្តាំផ្ញើរនូវការសួរសុខពីសំណាក់ សម្តេចកិត្តិព្រឹទ្ធបណ្ឌិតប្រធានជូនដល់ស្រ្តីដែលទើបសម្រាលកូន នឹងត្រៀមកំពុងសម្រាលកូននាថ្ងៃនេះ។ លោក តាំង សាមឿន បានជម្រាបជូនថា កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប្រធាន គឺបានខិតខំបំពេញនូវការងារមនុស្សធម៌របស់ខ្លួនប្រកបដោយប្រសិទ្ធភាព ក្នុងការជួយដល់បងប្អូនប្រជាពលរដ្ឋដែលបានរងគ្រោះ ដោយមហន្តរាយនានា ជាពិសេសសម្តេចកិត្តិព្រឹទ្ធបណ្ឌិតប្រធាន គឺតែងតែយកចិត្តទុក្ខដាក់យ៉ាងខ្លាំងចំពោះសុខភាពមាត និងទារក។ ក្នុងនោះកាកបាទក្រហមកម្ពុជា គឺតែងតែបានជួយជនរងគ្រោះ និងងាយរងគ្រោះនៅទូទាំងប្រទេស ដោយមិនមានការប្រកាន់នូវជាតិសាសន៍ ជំនឿសាសនា ឬនិន្នាការនយោបាយណាមួយឡើយ។

ជាកិច្ចឆ្លើយតប លោកស្រី វ៉ាន់ ស្រីរ័ត្ន អាយុ ២៤ ឆ្នាំ តំណាងស្រ្តីដែលទើបសម្រាលកូន បាមសម្តែងនូវការដឹងគុណយ៉ាងជ្រាលជ្រៅជូនដល់ សម្តេចកិត្តិព្រឹទ្ធបណ្ឌិតប្រធាន ដែលបានគិតគូរពីសុខមាលភាពស្រ្តី ទារក និងកុមារ ហើយលោកស្រីមានអារម្មណ៍រំភើបក្រៃលែង និងសូម ដឹងគុណចំពោះសម្តេចកិត្តិព្រឹទ្ធបណ្ឌិតប្រធាន។ ជាមួយគ្នានោះដែរ លោកស្រីក៏បានថ្លែងនូវការអរគុណដល់ក្រុមគ្រូពេទ្យ ដែលបានយកចិត្ត ទុកដាក់ជួយឲ្យលោកស្រីបានសម្រាលកូនដោយសុវត្ថភាព និងមិនមានការមានការប្រកាន់អ្វីចំពោះលោកស្រីដែលជាស្រ្តីក្រីក្រនោះ ហើយក៏ គ្មានការយកនូវថវិកាអ្វិនោះដែរ។

នាឱកាសនោះ ស្រ្តីដែលទើបសម្រាលកូនរួចក៏បានទទួលនូវសម្ភារៈបរិក្ខាសម្រាប់ម្តាយ និងទារក រួមមាន ខោអាវ ខ្នើយ ស្រោមដៃស្រោមជើង និងមុងសម្រាប់ទារក និងសម្រាប់ម្តាយមាន សារុង ១ មុង១ ភួយ១ ព្រមទាំងថវិកាមួយចំនួន ដែលជាការឧបត្ថម្ភពី កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិតជាប្រធាន សាខាកាកបាទក្រហមកម្ពុជាខេត្តកណ្តាល និងថវិកាពីឯកឧត្តម លឹម គានហោ។

កក្រក ៖​ នៅព្រឹក​ថ្ងៃទី​២១​ ខែកុម្ភៈ​ ឆ្នាំ២០១៧​ នេះ​ កាកបាទក្រហមកម្ពុជា​ ដែលមាន​សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ជាប្រធាន​ និងជា ឥស្សរជន​ឆ្នើមថ្នាក់ជាតិ​នៃផែនការ​សកម្មភាព​រួមអគ្គលេខាធិការ​ អង្គការ​សហ ប្រជាជាតិ​ដើម្បី​សុខភាពស្ត្រី​ និងកុមារ​ បានប្រារព្ធទិវា​ជាតិ សុខភាព​មាតា​ ទារក​ និងកុមារ​ ដោយមានការ​អញ្ជើញ​ចូលរួមពី​មន្ត្រី-បុគ្គលិក​កាកបាទក្រហម កម្ពុជា​ ទីស្នាក់ការ​កណ្តាល​ សាខាខេត្ត កណ្តាល​ និងអនុសាខា​ស្រុកលើកដែក​ ព្រមទាំង អ្នកស្ម័គ្រចិត្ត យុវជន​កាកបាទក្រហមកម្ពុជា​ ស្ត្រីមានផ្ទៃពោះ​ និងមានកូនតូច​ សរុបប្រមាណ​ ២១០នាក់​ នៅទីស្នាក់ការ​អនុសាខាកាកបាទក្រហមកម្ពុជា​ ស្រុកលើកដែក​ ខេត្តកណ្តាល។

ក្នុងពិធីសំណេះសំណាល​ជាមួយ​បងប្អូនស្ត្រី​ទាំងអស់​ដែលបាន​ចូលរួម​នាឱកាសនោះ លោកជំទាវ​ ពុំ​ ចន្ទីនី​ អគ្គលេខាធិការ​ កាកបាទក្រហម កម្ពុជា​ បានពាំនាំ​ប្រសាសន៍ផ្តាំផ្ញើ​សួរសុខទុក្ខ​ពីសំណាក់​ សម្តេចកិត្តិព្រឹទ្ធបណ្ឌិត​ប្រធាន​កាកបាទក្រហមកម្ពុជា​ និងអានសារលិខិត​ទាំងស្រុង របស់សម្តេចប្រធាន​ ដោយគូសបញ្ជាក់ពីអនុសាសន៍សំខាន់បីគឺ​ ៖

១/​ សូមឱ្យស្ត្រីមានគភ៌ទាំងអស់ អញ្ជើញទៅពិនិត្យសុខភាព ពិគ្រោះយោបល់ជាមួយគ្រូពេទ្យ ឬឆ្មបជំនាញនៅមណ្ឌលសុខភាព ឬមន្ទីរពេទ្យដែលនៅជិតផ្ទះតាមកាលកំណត់ និងទទួលយកសេវាបង្ការ ព្យាបាល ថែទាំទាំងអស់ឱ្យបានទៀងទាត់​ និងទៅសម្រាលកូននៅមណ្ឌលសុខភាព ឬមន្ទីរពេទ្យ ជាមួយគ្រូពេទ្យ ឬឆ្មបជំនាញដែល​បានទទួល​ការបណ្ដុះបណ្ដាលត្រឹមត្រូវ។

២/​ សូមឱ្យថ្នាក់ដឹកនាំ​ មន្ត្រីរាជការ​ បុគ្គលិកសុខាភិបាល​ អ្នកផ្តល់សេវាទាំងអស់​ ពង្រីកចំណេះដឹង​ និងពង្រឹងសមត្ថភាពដើម្បីកាត់បន្ថយ​ការស្លាប់របស់មាតា​ ការស្លាប់របស់​ទារកក្នុងផ្ទៃ​ ការស្លាប់របស់ទារកទើបនឹងកើត និងការស្លាប់របស់កុមារក្រោមអាយុ៥ឆ្នាំ ឲ្យបានសម្រេច​តាមគោលដៅដែលបានកំណត់ទុក។

៣/​ សូមអំពាវនាវ​ដល់គ្រប់ស្ថាប័ន​ពាក់ព័ន្ធ​ទាំងអស់ ទាំងជាតិ និងអន្តរជាតិ សូមជួយ និងបន្តជួយវិនិយោគ គាំទ្រដល់ការងារ​សុខភាពមាតា ទារក និងកុមារនៅកម្ពុជា។

ក្នុងឱកាសនោះ​ ស្ត្រីមានផ្ទៃពោះ​ និងស្ត្រីមានកូនតូចចំនួន​១៨១នាក់​ ក្នុងម្នាក់ៗទទួលបាន​អំណោយមនុស្សធម៌ ៖​ មុង១​ ភួយ១​ សារុង១​ ក្រមា១​ និងថវិកា​ ១០.០០០រៀល​ (មួយម៉ឺនរៀល)៕

កក្រក ៖​នៅថ្ងៃទី​២០​ខែកុម្ភៈ​ឆ្នាំ២០១៧​ នេះ សម្តេចកិត្តិព្រឹទ្ធបណ្ឌិត​ប៊ុន រ៉ានី ហ៊ុនសែន​ ប្រធាន​ កាកបាទក្រហមកម្ពុជា​ បាន​សម្រេច​ផ្តល់​ថវិកា​ចំនួន ៣៦.១០០ដុល្លារ (បីម៉ឺនប្រាំមួយពាន់មួយរយដុល្លារអាមេរិក) ដើម្បី​ខួងអណ្តូង​ទឹកស្អាត​ចំនួន១៩​បន្ថែមទៀត​ជាជំហានទី២​ប្រចាំឆ្នាំ ២០១៧​ ជូនប្រជា ពលរដ្ឋ​ខ្វះខាតទឹកប្រើប្រាស់​ចំនួន៣២០គ្រួសារ​ស្មើនឹងមនុស្ស ១.១៤៣នាក់ រស់នៅ​ឃុំកន្ទួត និងឃុំ​រំដោះស្រែ ស្រុកជាំក្សាន្ត ខេត្តព្រះវិហារ (ជាប់ព្រំដែនថៃនិងឡាវ)។

សូមបញ្ជាក់ថា ចាប់តាំងពី​ឆ្នាំ២០១២ ដល់ឆ្នាំ២០១៦ ខេត្តព្រះវិហារ​បាន​ទទួលអណ្តូង​ទឹកស្អាតពីកាកបាទក្រហមកម្ពុជាសរុបចំនួន១៥៥ អណ្តូង។ ដោយឡែក​នៅដើមឆ្នាំ២០១៧ នេះ ខេត្តព្រះវិហារ បានទទួល​អណ្តូងចំនួន១៩ រួចមកហើយ៕