អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

សាខាកាកបាទ ក្រហមកម្ពុជា ខេត្តកណ្តាលប្រារព្ធទិវាពិភពលោកប្រយុទ្ធប្រឆាំងនឹងជំងឺអេដស៍

សាខា កក្រក ខេត្តកណ្តាល ៖ ព្រឹកថ្ងៃទី ០៤ ខែ ធ្នូ ឆ្នាំ២០១៧ សាខា កក្រក ​ខេត្តកណ្តាល សហការជាមួយមន្ទីរ​សុខាភិបាលខេត្ត​ បានរៀបចំ​មិទ្ទីង​ទិវាពិភពលោក​ប្រយុទ្ធនឹង​ជំងឺអេដស៍ ១ ធ្នូ ឆ្នាំ២០១៧ ក្រោមប្រធានបទ " កម្ពុជាប្តេជ្ញា​ឆ្ពោះទៅសម្រេច​បាននូវគោលដៅ​សូន្យបី និង ៩៥.៩៥.៩៥ នាឆ្នាំ ២០២៥ " នៅបរិវេណ​សាលាស្រុក​កណ្តាលស្ទឹង ។ ពិធីនេះបានប្រព្រឹត្ត​ទៅក្រោម​អធិបតី ភាពឯកឧត្តម ជាវ តាយ ​ប្រធាន​គណៈកម្មាធិការសាខា​ ព្រមទាំង​មានការអញ្ជើញ​ចូលរួមពីក្រុមការងារ​របស់សាខា​ សប្បុរសជន ភរិយាថ្នាក់ដឹកនាំ ​គណ:កម្មាធិការអនុសាខា​ ស្រុក និងប្រជាពលរដ្ឋ​អ្នកផ្ទុកមេរោគអេដស៍ ចំនួន ១៨០ នាក់ផងដែរ ។


សូមបញ្ជាក់​ជូនថា នៅក្នុងមិទ្ទិង​ទិវាពិភពលោកប្រយុទ្ធ​ប្រឆាំងនឹង​ជំងឺអេដស៍ ១ ធ្នូ ដែលបាន​ប្រារព្ធឡើងពេលនេះ​ ក៏មានការផ្តល់​អំណោយមនុស្សធម៌​ជូនអ្នកកំពុងរស់នៅ​ជាមួយមេរោគអេដស៍​ចំនួន ១៨០ នាក់ ក្នុងនោះ ថវិកាសរុប​ចំនួន ៩,៨៦០,០០០ រៀល ដោយ​ក្នុងម្នាក់ៗ​ទទួលបាន​នូវថវិកាចំនួន ៥ មឺុនរៀល អង្ករ ២៥ គីឡូក្រាម មី ១ កេស ត្រីខ ១ យួរ និង ទឹកបរិសុទ្ធ ១ កេស ។ ជាមួយគ្នានេះសាខាក៏បានឧបត្ថម្ភថវិកាមួយចំនួន​ដល់អ្នកថែទាំ​អ្នកជំងឺអេដស៍ ​ទីប្រឹក្សាយុវជន ,យុវជនកាកបាទក្រហម និងអ្នកស្ម័គ្រចិត្តកាកបាទក្រហម​កម្ពុជាដែល​បានចូលរួម​ផងដែរ ៕

យុវជនកាកបាទ ក្រហមកម្ពុជា ខេត្តបាត់ដំបងសួរសុខទុក្ខសាស្រ្តាចារ្យដែលរងគ្រោះដោយគ្រោះថ្នាក់ចរាចរណ៍

សាខាកក្រកខេត្តបាត់ដំបងៈ​​នៅថ្ងៃ​សៅរ៍១៤កើត​ ខែមិគសិរ​ ឆ្នាំរកា​ ព.ស. ២៥៦១​ ត្រូវនឹងថ្ងៃ​ទី២ ខែធ្នូ គ.ស. ២០១៧ លោក ដួង ជីវ័ន្ត​ ប្រធានកិត្តិយស​ក្លឹបយុវជន​ និងជា នាយក​វិទ្យាល័យ​សម្តេចឪ​ក្រុងបាត់ដំបង ​និងមានការ​ចូលរួម​ពីលោកគ្រូ​ទីប្រឹក្សា បាន​ដឹកនាំយុវជន​កាកបាទក្រហម​កម្ពុជា​ចំនួន១០នាក់​ស្រី១នាក់ ចុះសួរសុខទុក្ខ​និងនាំយក​ថវិកា​សប្បុរសជន​ជួយឧបត្ថម្ភ​លោកគ្រូ ប៉ាវ សាំងហេង សាស្រ្តាចារ្យ​វិទ្យាល័យសម្តេចឪ ដែល​មានគ្រោះថ្នាក់ដួល​ដាច់សរសៃ​ឈាមខួរក្បាល​កាលទៅកែ​វិញ្ញាសារ​ប្រលងបាក់ឌុប​នៅភ្នំពេញកាលពីខែសីហា ឆ្នាំ២០១៧ បច្ចុប្បន្ន​កុំពុងសម្រាក​ព្យាបាល​នៅគេហដ្ឋាន។​

 

សកម្មភាពនេះ គឺជាការឆ្លុះបញ្ចាំង​ពីការយកចិត្តទុក​ ដាក់របស់ថ្នាក់ដឹកនាំ​ក្លឹបយុវជន កាកបាទក្រហម​កម្ពុជា នៃវិទ្យាល័យសម្តេចឪ ស្រប តាមអនុសាសន៍របស់សម្ដេចកិត្តិព្រឹទ្ធ បណ្ឌិតប្រធាន គឺយកចិត្តទុកដាក់ចំពោះ លោកគ្រូ​អ្នកគ្រូ​សមាជិកយុវជន​ និងសិស្សក្នុង​វិទ្យាល័យ​របស់ខ្លួន​ជាមុន ចាំគិត​អ្នកនៅ​សហគមន៍ជាក្រោយ។

 

គួរបញ្ជាក់​ផងដែរថា អំណោយ​ប្រគល់ជូន​រួមមាន ថវិកា៧០ដុល្លារ​ដែលជាអំណោយ​របស់​សប្បុរសជនរួមមានលោក គីង ចាន់រើន ថវិកា​ចំនួន ៥០ដុល្លារ និង​លោក អ៊ុយ ឈាន ​ថវិកាចំនួន ២០ដុល្លារ តាមរយៈលោក​នាយកវិទ្យាល័យ​ផងដែរ។​

 

យុវជនកាកបាទ ក្រហមកម្ពុជា វិទ្យាល័យជ័យសែនចូលរួមសម្អាតសម្រាមតាមដងផ្លូវសាធារណៈ

សាខាកក្រកខេត្តព្រះវិហារ:​ នៅព្រឹក​ថ្ងៃសៅរ៍ ១៤ កើត ខែ មិកសិរ ឆ្នាំរកា ពុទ្ធសករាជ ២៥៦១ ត្រូវ​និងថ្ងៃទី ២ ខែ ធ្នូ ឆ្នាំ ២០១៧ នេះ​យុវជន​កាកបាទ ក្រហម​កម្ពុជា វិទ្យាល័យ​ជ័យសែន​ ចំនួន ៤០ នាក់ស្រី ២៥ នាក់ បានចូលរួម​ធ្វើការសម្អាត​សម្រាមតាម​ដងផ្លូវ​សាធារណ:​ នៅភូមិស្អាង​ ឃុំស្អាង ស្រុកជ័យសែន ​ខេត្តព្រះវិហារ ។

សកម្មភាពនេះ​ធ្វើឡើង​ក្នុងគោលបំណង​ រួមគ្នាសម្អាត​អនាម័យ​ សំដៅឱ្យ​មានសោភ័ណភាព​ល្អ មាន​អនាម័យ​ត្រឹមត្រូវ និងជាការ​ដាស់អារម្មណ៍​ដល់ប្រជាជន​ឱ្យចូលរួម​សម្អាត និងមាន​អនាម័យ​ល្អ ហើយ​ក៏ជាការទាក់ទាញ​អារម្មណ៍​ និងការផ្លាស់ប្តូរ​ឥរិយាបទ​ ពីការចោលសំរាម​ទីសាធារណៈ​មកដាក់ទី​កន្លែងត្រឹមត្រូវ​ផងដែរ

កាកបាទក្រហមកម្ពុជា ចូលរួមយុទ្ធនាការ ១៦ថ្ងៃ (បូពណ៌ស)

កក្រក ៖ ក្នុងសកម្មភាព​បន្ត យុទ្ធនាការ​ ១៦ថ្ងៃ (បូពណ៌ស) ក្រោម​ប្រធានបទ​ “មិនទុកនរណា​ម្នាក់ចោល : បញ្ឈប់អំពើហិង្សា​លើស្ត្រី និង​ក្មេងស្រី” នាព្រឹកថ្ងៃទី ២ ខែធ្នូ​ ឆ្នាំ២០១៧ លោកជំទាវ ​ម៉ែន នារីសោភ័គ អគ្គលេខាធិការរងទី ១ ​កាកបាទក្រហម​កម្ពុជា រួមជាមួយ​ លោកស្រី កេត ម៉ារឌី ប្រធាន​នាយកដ្ឋាន​ការពារផ្លូវច្បាប់​នៃក្រសួង​កិច្ចការនារី បានជួបសំណេះ​សំណាល និងធ្វើ​បឋកថា និងរៀបចំ​កម្មវិធី​សំណួរ-ចម្លើយ ជាមួយ​យុវជន​កាកបាទក្រហម​កម្ពុជា ប្រមាណ ៨០នាក់ ស្តីពី ​យុទ្ធនាការ ១៦ថ្ងៃ បញ្ឈប់​អំពើហិង្សា​លើស្ត្រី និងក្មេងស្រី និងការ​ចូលរួមរបស់​យុវជន និស្សិតក្នុង​ការចូលរួមលើកកម្ពស់​វប្បធម៌​អហិង្សា សីលធម៌សង្គម តម្លៃស្ត្រី និងគ្រួសារ​ខ្មែរ។

 

ក្នុងនាមគណៈដឹកនាំ​សាកលវិទ្យាល័យ ​និងនិស្សិត លោក សេង ប៊ុនធឿន សាកល​វិទ្យាធិការរង បានថ្លែងអំណរអរ​គុណចំពោះកាកបាទ​ក្រហមកម្ពុជា ដែលបាន​រៀបចំឲ្យមាន​យុទ្ធនាការ ១៦ថ្ងៃ នេះឡើង ហើយបានយក​ចំណេះដឹង​ដ៏មានសារៈសំខាន់​សម្រាប់សង្គមជាតិ​មកផ្សព្វផ្សាយ​ឲ្យនិស្សិត-យុវជន បាន​យល់ជ្រួតជ្រាបពីការបញ្ឈប់​អំពើហិង្សា​ក្នុងសង្គមជាតិ។

 

សូមបញ្ជាក់​ សាកលវិទ្យាល័យ​ជាតិគ្រប់គ្រង ជាសាលវិទ្យាល័យ​ទី៣ នៃសាលវិទ្យាល័យ​ទាំង ៤ ដែលកាកបាទក្រហម​កម្ពុជា បានជ្រើសរើស​ចុះផ្សព្វផ្សាយ​អំពី យុទ្ធនាការ ១៦ថ្ងៃ (២៥ វិច្ឆិកា ២០១៧ - ១០ ធ្នូ ២០១៧) បញ្ឈប់​អំពើហិង្សា​លើស្ត្រី និងកុមារ។

 

ប្រជាជនរងគ្រោះដោយអគ្គិភ័យទទួលអំណោយពីសាខាកាកបាទក្រហមកម្ពុជា ខេត្តកណ្តាល

សាខា កក្រក ខេត្តកណ្តាល ៖ ព្រឹកថ្ងៃទី ០២ ខែ ធ្នូ ឆ្នាំ ២០១៧​ ក្រុមការងារ​សាខាកាកបាទក្រហម​កម្ពុជា​ខេត្តកណ្តាល​ ដឹកនាំដោយ​ឯកឧត្តម ជាវ តាយ ប្រធាន​គណៈកម្មាធិការ​សាខា ​បានចុះសាក​សួរសុខទុក្ខ ​និងនាំយកអំណោយ​មនុស្សធម៌​ទៅចែកជូន​ដល់ប្រជាពលរដ្ឋ​ ដែលរងគ្រោះ​ដោយអគ្គិភ័យឆេះ​ផ្ទះអស់ទាំងស្រុង ​សរុបចំនួន ២ គ្រួសារ សមាជិក ២៤ នាក់ នៅភូមិ​តាខ្មៅ៣ សង្កាត់តាខ្មៅ ក្រុងតាខ្មៅ ។


មានប្រសាសន៍​សំណេះសំណាល​ក្នុងឱកាសនោះ ​ឯកឧត្តមប្រធាន​គណៈកម្មា ធិការ​សាខា​ បានលើកឡើង​ពីការយកចិត្តទុកដាក់​គិតគូរដល់​សុខទុក្ខ​ប្រជាពលរដ្ឋ​ងាយរងគ្រោះ ​និងអ្នករងគ្រោះ​ដោយគ្រោះ​មហន្តរាយផ្សេងៗ​នៅតាមមូលដ្ឋាន​នានា ពីសំណាក់​សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទ ក្រហមកម្ពុជា ​ដោយមិនប្រកាន់​ពីនិន្នាការ​នយោបាយ​ ជាតិសាសន៍ ​សាសនា វណ្ណៈ ពណ៌សម្បុរ​អ្វីទាំងអស់ពោល​គឺ ( ទីណាមានទុក្ខ​លំបាក ទីនោះមាន​កាកបាទក្រហម​កម្ពុជា ចាំជួយ​សម្រាលការ​លំបាកជានិច្ច ) ។


អំណោយ​មនុស្សធម៌​ដែលបានឧបត្ថម្ភ​ជូនក្នុង ១ គ្រួសារទទួល​បានមាន ៖ អង្ករ ២៥ ​គីឡូក្រាម មី ១ កេស ត្រីខ ១យួរ ទឹកត្រី ១ យួរ ទឹកសីុអីុវ ១ យួរ ទឹកសុទ្ធអង្គរពូរ៉ូ ១ កេស ទឹកដោះ គោខាប់ ៤ កំប៉ុង ស្ករស ១ កញ្ចប់ តែ ៥ កញ្ចប់ អំបិល​សុខភាព ១ កញ្ចប់ សម្ភារៈ​ផ្ទះបាយ ១៦ មុខ ចំនួន ១ឈុត សម្ភារៈដំណេក ៤ មុខ និងថវិកាចំនួន ១ លាន ២០ មឺុនរៀល ៕

សាខាកាកបាទក្រហមកម្ពុជា ខេត្តព្រះវិហារ ប្រារព្ធទិវា អន្តរជាតិនៃអ្នកស្ម័គ្រចិត្ត

សាខាកក្រកខេត្តព្រះវិហារ ៖ នៅព្រឹកថ្ងៃសៅ ១៤ កើត ខែ មិកសិរ ព.ស ២៥៦១ ត្រូវនិងថ្ងៃទី​ ២ ខែ ធ្នូ គ.ស ២០១៧​ នេះសាខា​កាកបាទក្រហម​កម្ពុជា​ ខេត្តព្រះវិហារ ​បានប្រារព្ធទិវា អន្តរជាតិ​នៃអ្នកស្ម័គ្រចិត្ត ​៥ ធ្នូ ២០១៧ ក្រោម​ប្រធានបទ "អ្នកស្ម័គ្រចិត្ត​ដើម្បី​អភិវឌ្ឍន៍ខ្លួន​អ្នកនិងសង្គម"​ ក្រោមវត្តមាន លោក រ៉ាត់ សោភា ប្រធានស្តីទី​សាខា​កាកបាទក្រហម​កម្ពុជា ខេត្តព្រះវិហារ និងមានការ​ចូលរួមពី ប្រធាន​កិត្តិយស-អនុប្រធានកិត្តិយស​អនុសាខា ថ្នាក់ដឹកនាំ-មន្ត្រីអនុសាខា​កាក បាទក្រហមកម្ពុជា​ ស្រុកគូលែន មន្ត្រីប្រតិបត្តិសាខា អ្នកស្ម័គ្រចិត្ត និងយុវជន​កាកបាទក្រហម​កម្ពុជា ប្រចាំវិទ្យាល័យ​គូលែន សរុប ៧២ នាក់។​

 

ក្នុងឱកាសនោះ​ លោកប្រធានស្តីទី​សាខាកាកបាទក្រហម​កម្ពុជា ខេត្តព្រះវិហារ បានពាំនាំ​ប្រសាសន៍របស់​ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ដែលផ្តាំផ្ញើ​សួរសុខទុក្ខ ​ថ្លែងអំណរគុ​ណ និងកោតសរសើរ​យ៉ាងជ្រាលជ្រៅ​ចំពោះអ្នកស្ម័គ្រចិត្ត​ទាំងអស់ ដែលបាន​បរិច្ចាគ ធនធាន ពេលវេលា កម្លាំងកាយ-ចិត្ត ចូលរួមចំណែកជួយដល់​ជនរងគ្រោះ និង​ជនងាយរងគ្រោះ​នៅក្នុង​សហគមន៍ និងនៅតាម​គ្រឹះស្ថានសិក្សានានា​។

 

លោកបានគូស​បញ្ជាក់បន្ថែមថា​ទិវាអន្តរ ជាតិនៃ​អ្នកស្ម័គ្រចិត្ត គឺជា​ការលើកកម្ពស់​ការចូលរួម​ដោយស្ម័គ្រចិត្តក្នុងការងារ​មនុស្សធម៌របស់​ចលនាកាកបាទក្រហម អឌ្ឍចន្ទក្រហម ដែលមាន​អាយុកាល ១៥៤ឆ្នាំមកហើយ។ ទិវានេះ បានផ្តោតលើគុណ​តម្លៃនៃការងារ​ស្ម័គ្រចិត្ត ដែលជាឆ្អឹងខ្នង​របស់ចលនា​កាកបាទក្រហម អឌ្ឍចន្ទក្រហម និងជាកម្លាំង​ប្រតិបត្តិករ​មនុស្សធម៌​ប្រកបដោយ​ប្រសិទ្ធភាព និងទាន់​ពេលវេលា។ ជាក់ស្តែងអ្នកស្ម័គ្រចិត្ត​បានធ្វើសកម្មភាព​យ៉ាងសកម្ម ក្នុងការផ្តល់​ក្តីសង្ឃឹម និងភាពកក់ក្តៅ​ដល់អ្នកងាយ​រងគ្រោះបំផុត​បានទាន់ពេលវេលា​ និងគ្រប់ទីកន្លែង។

 

ដើម្បីលើកទឹកចិត្ត​ដល់អ្នកស្ម័គ្រចិត្ត ដែលបាន​ចូលរួមក្នុង​ឱកាសនេះសាខា កាកបាទក្រហម​កម្ពុជា ខេត្តព្រះវិហារ បានផ្ដល់ជូន​នូវប័ណ្ណសរសើរ សាប៊ូ និង​ថវិកានិងមួយ​ចំនួនផងដែរ និងបានផ្តល់​ជូនយុវជនកាកបាទក្រហម​កម្ពុជាចំនួន ៤០ នាក់ ម្នាក់ៗសៀវភៅ ៤ ក្បាល ប៊ិច ២ ដើម ថវិកា ៥,០០០ រៀលផងដែរ។

 

សាខាកាកបាទក្រហមកម្ពុជា ខេត្តព្រៃវែងទិវាពិភពលោក ប្រយុទ្ធនឹងជម្ងឺអេដស៍ ០១ ធ្នូ

សាខាកក្រកខេត្តព្រៃវែង៖ នៅរសៀល​ថ្ងៃទី ០១ ខែ​ធ្នូ ឆ្នាំ២០១៧ ឯកឧត្តម​ឧកញ៉ា ​សុខ ផេង អនុប្រធាន​អចិន្រ្តៃយ៍​គណ:កម្មាធិការ​សាខា តំណាង ​ឯកឧត្តម ជា សុមេធី ប្រធាន​គណ:កម្មាធិកា​សាខា បាន​ដឹកនាំសមាជិក​គណៈកម្មាធិការ​សាខា ក្រុមប្រតិបត្តិ​សាខា មន្រ្តី​អនុសាខា​ស្រុក ទីប្រឹក្សា​យុវជន យុវជន​កាកបាទក្រហម និង​អ្នកស្ម័គ្រចិត្ត​កាកបាទក្រហម​កម្ពុជា បានចុះសួរ​សុខទុក្ខ និងនាំយក​អំណោយ​មនុស្សធម៌ ចែកជូនដល់​កុមារកំព្រា​ដែលងាយរង​គ្រោះដោយ​មេរោគ​អេដស៍/ជម្ងឺអេដស៍ ចំនួន ២២នាក់ ស្រី ១២នាក់ ស្ថិតក្នុងស្រុកពារាំង​ ខេត្តព្រៃវែង និងធ្វើការ​ផ្សព្វផ្សាយ​សារលិខិត សម្តេច​កិត្តិព្រឹទ្ធ​បណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហម​កម្ពុជា ក្នុងឱកាស​ទិវាពិភពលោក​ ប្រយុទ្ធនឹង​ជម្ងឺអេដស៍ ០១ ធ្នូ ឆ្នាំ ២០១៧ តាមទិសស្លោក "ឆាប់ធ្វើ​តេស្តឈាម ឆាប់​ព្យាបាល ឆ្ពោះទៅបញ្ចប់អេដស៍"។

 

ក្នុងឳកាសនោះ ឯកឧត្តម​ ក៍បាននាំយកនូវ​ប្រសាសន៍ ផ្តាំផ្ញើសាកសួរ​សុខ​ទុក្ខ​ពីសំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទ​ក្រហមកម្ពុជា និងក្នុងនាម ឯកឧត្តមផ្ទាល់ សូមធ្វើការផ្តាំផ្ញើ​ដល់ក្មួយ​ៗ​ដែល​ផ្ទុកមេរោគ​អេដស៍ទាំងអស់​ ត្រូវលេប​ថ្នាំពន្យា​អោយបាន​ទៀងទាត់​ត្រឹមត្រូវ​តាមការ​ណែនាំ​របស់ក្រុមគ្រូពេទ្យ ចេះ​អនាម័យខ្លួនប្រាណ​អោយបានស្អាត​ និងពិសេសត្រូវ​ខិតខំប្រឹង​ប្រែង​​រៀនសូត្រ​អោយបានល្អ ប្រសើរ ដើម្បី​ក្លាយខ្លួន​ជាពលរដ្ឋល្អ ស​ម្រាប់ជួយ​បម្រើការងារ​សង្គមជាតិ ។

 

ចំពោះអំណោយ​ដែលបាន ចែកជូន​ក្នុង១នាក់​ទទួលបាន អង្ករ ២៥គក មី១កេស ត្រីខ ១យួរ និង​ថវិកាចំនួន ២០,០០០រៀល

 

សាខាកាកបាទក្រហមកម្ពុជា ខេត្តព្រះសីហនុប្រគល់ផ្ទះមនុស្សធម៌ ជូនប្រជាជនទីទ័លក្រ

សាខាកក្រកខេត្តព្រះសីហនុ ៖ នៅព្រឹកថ្ងៃទី០១ ខែធ្នូ ឆ្នាំ២០១៧ នេះ ឯកឧត្តម ​យន្ត មីន ​ប្រធាន​កិត្តិយសសាខា​កាកបាទក្រហម​កម្ពុជា ខេត្តព្រះសីហនុ​ និងសហការី ​បានអញ្ជើញ​ចុះជួបសំណេះសំណាល ​និងប្រគល់ផ្ទះ​មនុស្សធម៌ទី ០១ (មួយ) ដែលឧបត្ថម​ថវិការបស់ ​ឯកឧត្តមផ្ទាល់។ ផ្ទះនេះ​មានទំហំ ​៤ម៉ែត្រx៦ម៉ែត្រ ធ្វើពីឈើ​ ប្រក់ហ្វីប្រូត៍ ប្រគល់​ជូនគ្រួសារ​លោក ម៉ក់ ពៅ អាយុ៦៨ ឆ្នាំ និងប្រពន្ធ ទេព សារិន ទីទ័លក្រ រស់នៅ​ជាមួយ​កូនតូចៗចំនួន ២នាក់ ស្ថិត​នៅភូមិតាពៅ ឃុំតានៃ ស្រុកព្រៃនប់ ខេត្តព្រះសីហនុ ។

 

មានប្រសាសន៍​ក្នុងឱកាសនោះ ឯកឧត្តម បានពាំនាំ​នូវការ​ផ្ដាំផ្ញើ​សួរសុខទុក្ខ​ពីសណាក់​ឯកឧត្តម​ ប្រធានគណៈកម្មាធិការ​សាខា ពិសេស​សម្ដេចកិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា ដែលតែងតែ​យកចិត្តទុកដាក់​គិតគូរចំពោះ​សុខទុក្ខ​ប្រជាពលរដ្ឋ​គ្រប់រូប មិន​ប្រកាន់វណ្ណៈ ពណ៌សម្បុរ​ ជំនឿសាសនា ឬនិន្នាការ​នយោបាយណា​មួយឡើយ ។ ឯកឧត្តម ក៏បាន​ផ្តាំផ្ញើដល់ សមាជិក​គ្រួសារទាំងអស់ ត្រូវចេះប្រុងប្រយ័ត្ន​ចំពោះអគ្គីភ័យ ត្រូវសម្អាត ថែរក្សា​ផ្ទះថ្មីនេះដើម្បី​បានជាជម្រក​ដ៏កក់ក្តៅ​តរៀងទៅ ។ ក្នុងនោះដែរ​ឯកឧត្តម​បានសម្រេច​ផ្តល់ អណ្តូង​លូមួយ និង​ចាក់សាប​ជុំវិញ សំរាប់​ប្រជាពលរដ្ឋ​ប្រើប្រាស់ជាសាធារណៈប្រមាណ ២០ គ្រួសារផងដែរ ។

 

អំណោយបន្ថែម​រួមមាន ៖ អង្ករ ២៥គីឡូ ឃីត ០១ (មុង១ -ភួយ១ -សារុង១ -ក្រមា១) -កន្ទេល១ -មី១កេស -ត្រីខ១យួ និងថវិកា​មួយចំនួន។

 

សាខាកក្រកខេត្តស្វាយរៀងប្រារព្ធ ទិវាពិភពលោកប្រយុទ្ធនឹងជំងឺអេដស៍

សាខាកក្រកខេត្តស្វាយរៀង៖ដើម្បី​ចូលរួម ​ទិវាពិភពលោក​ប្រយុទ្ធ​នឹងជំងឺអេដស៍ ​១ ធ្នូ ឆ្នាំ ២០១៧ តាមទិសស្លោក ​ឆាប់ធ្វើ​តេស្តឈាម ឆាប់ព្យាបាល​ ឆ្ពោះទៅ​បញ្ចប់​អេដស៍ និងលើកកម្ពស់​សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ប្រធាន​កាកបាទក្រហម​កម្ពុជា ជាឥស្សរជនឆ្នើម​ថ្នាក់ជាតិ​ នៃវេទិកាភាព​ជាអ្នកដឹកនាំ​តំបន់អាស៊ី-ប៉ាស៊ីហ្វិក​ឆ្លើយតប និងជំងឺអេដស៍​នៅកម្ពុជា  ។


នៅថ្ងៃសុក្រ ១៣ កើត ខែមិគសិរ ត្រូវនឹងថ្ងៃទី ១ ខែ ធ្នូ ឆ្នាំ ២០១៧ សាខា​​កាកបាទក្រហម​កម្ពុជាខេត្តស្វាយរៀង បានរៀបចំ​ប្រារព្ធធ្វើពិធី​សំណេះសំណាល​ និងចែកអំណោយ​ មនុស្សធម៌​ដល់កុមារ​កំព្រាដោយសា​រ​អេដស៍ អ្នករងគ្រោះរស់​នៅជាមួយ​មេរោគ​អេដស៍ ចំនួន ២៦៤ នាក់ មកពី​ ក្រុងស្វាយរៀង ៥៧ នាក់ ស្រុកកំពង់រោទិ៍ ៤៥ នាក់ ស្វាយទាប ៤៥ នាក់ រំដួល ៤០ ស្រុកស្វាយជ្រំ ៧០ នាក់ មកពីអង្គការស៊ីភីអិន​ផ្លាស់ ៧ នាក់ នៅទីស្នាក់ការ​សាខាខេត្ត ​ដែលពិធីនេះ បានការអញ្ជើញ​ចូលរួម​ពី ឯកឧត្តម ម៉ែន វិបុល ប្រធាន​គណៈកម្មាធិការ​សាខា ព្រមទាំងអស់​លោក លោកស្រី​ ជាសមាជិក សមាជិកា​នៃកណៈកម្មាធិកាសាខា​ លោក លោកស្រីតាម​មន្ទីរនានា​ជុំវិញខេត្ត ។ 


ឯកឧត្តម ម៉ែន វិបុល ប្រធាន​គណៈកម្មាធិកា​សាខា បានអាន​សារលិខិត​របស់សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទ​ក្រហមកម្ពុជា ព្រមទាំងធ្វើរបាយការណ៍សង្ខេប ស្តីពីការងារអេដស៍របស់សាខាដែលបានអនុវត្ត កន្លងមកនិងបច្ចុប្បន្ននូវ សកម្មភាព​ពហុវិស័យ​បើគិតពីការអនុវត្ត​សកម្មភាព ការជួយទៅដល់​អ្នកផ្ទុក មេរោគ​អេដស៍ដែលកន្លងមក​មានការ​រើសអើង​ខ្លាំង សូម្បីតែការ​បរិភោគ​ចំណីអាហារ ឬការរស់​នៅជាមួយគ្នា​ក៏មានការ​ភ័យខ្លាច​ឆ្លងដែរ តែពេលនេះ​មានការគាំទ្រ​ពីថ្នាក់ដឹកនាំ រាជរដ្ឋាភិបាលមានច្បាប់ អេដស៍ធ្វើឲ្យ​សារធារណជន​មានការ​យល់ដឹង ព្រមទាំង​ជួយឧបត្ថម្ភ​គាំទ្រទាំង​ស្មារតី និងសំភារៈធ្វើឲ្យជីវ ភាពរបស់ពួក​គេមានភាព​ប្រសើរឡើង ។


សម្ភារៈដែល​សាខាបាន​ឧបត្ថម្ភដល់ អ្នករស់​នៅជាមួយ​មេរោគអេដស៍ នាពេលនោះ​ចំនួន ២៥៧ នាក់ក្នុងម្នាក់ទទួល​បាន អង្ករ ៣០ គ.ក្រ មី ១ កេស ត្រីខកំប៉ុង ១០ កំប៉ុង ទឹកស៊ីអ៊ីវ ៦ ដប សាប៊ូដុំ ៤ ដុំ ទឹកដោះគោខាប់ ៥ កំប៉ុង មុង ១ ភួយ ១ សារុង ១ ក្រម៉ា ១ ថវិកា ៤០,០០០រៀល។

គ្រួសារក្រីក្រ ចាស់ជរា មកពីសង្កាត់ចំនួន៣ នៅក្រុងក្រចេះទទួលអំណោយមនុស្សធម៌

នៅរសៀល​ថ្ងៃទី ​៣០ ខែ វិច្ឆិកា ឆ្នាំ ២០១៧ នេះ ឯកឧត្តម​ ធុន គ្រី ប្រធាន គណៈកម្មាធិការ​សាខាកាកបាទក្រហម​កម្ពុជា​ ខេត្តក្រចេះ​ លោកជំទាវ​ ងិន វ៉ាន់នី ​សមាជិកា​ លោកស្រី​ ឈឹម សុធារី​ ហិរញ្ញិក លោក ទេព វាសនា សមាជិក​ គណះកម្មាធិការ​សាខា​ លោក យិន វណ្ណះ ​ប្រធាន​កិត្តិយស​អនុសាខា​ក្រុងក្រចេះ រួមនឹង​ លោក លោកស្រី ក្រុមប្រតិបត្តិ​សាខា លោក លោកស្រី មន្រ្តី​អនុសាខា បានចុះសួរ​សុខទុក្ខនឹងនាំ​យកអំណោយ​របស់ សាខា​កាកបាទក្រហម​កម្ពុជា ខេត្តក្រចេះ​ ទៅចែកជូន​គ្រួសារ​ក្រីក្រ​ ចាស់ជរា សរុប​ចំនួន ៣០ គ្រួសារ​ មកពីសង្កាត់ក្រចេះ សង្កាត់ក្រគរ នឹងសង្កាត់​កោះទ្រង់ នៅក្នុងបរិវេណ​ទីស្នាក់ការអនុសាខា​កាកបាទក្រហម​កម្ពុជា ក្រុងក្រចេះ ដោយគ្រួសារ​នីមួយៗទទួលបាន អង្ករ ៣០ គ.ក្រ, សារ៉ុង ១, ភួយ ១, ក្រម៉ា ១, មុង ១, មី ១ កេះតូច, ត្រីខ ១០ កំប៉ុង, នឹងថវិកាមួយចំនួន។

First Prev 56 57 58 59 60 Next Last