អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

ប្រជាជនរងគ្រោះដោយខ្យល់កន្ត្រាក់ទទួលអំណោយពីសាខាកាកបាទក្រហមកម្ពុជាខេត្តបាត់ដំបង

សាខាកក្រកខេត្តបាត់ដំបង៖ ​នៅព្រឹក​ ថ្ងៃទី​ ១៣​ខែ ​ឧសភា​ ឆ្នាំ២០១៧​ ក្រុម​ការងារ​សាខា​កាកបាទក្រហមកម្ពុជា​ខេត្តបាត់ដំបង​បាន​ ដឹកនាំ​ដោយ លោក​ ងី សែត​ អនុគណៈកម្មាធិការ​សាខា​តំណាង​ឯកឧត្តម​បណ្ឌិត ប៊ុត គឹមស៊ាន ប្រធាន​គណៈកម្មាធិការ​សាខា ​និងសហការី​ ព្រមទាំង​អនុសាខា​ស្រុក​បាន​ចុះសួរសុខ​ ទុក្ខនិងនាំយក​អំណោយ​មនុស្សធម៌​ផ្តល់ជូន​បងប្អូន​ប្រជាពលរដ្ឋ ​ចំនួន​៥០​គ្រួសារ​ ក្នុងនោះ​ធ្ងន់​ធ្ងរ​ចំនួន៩​គ្រួសារ ដែលរងគ្រោះ​ដោយខ្យល់​កន្រ្តាក់​កាលពី​យប់ថ្ងៃទី៦​ខែឧសភា​ឆ្នាំ២០១៧​ ដែលបណ្តាល​អោយឃុំចំនួន៣រងផលប៉ះពាល់​ក្នុងនោះ​ឃុំសិរី​មានជ័យ ចំនួន២០គ្រួសារ /ធ្ញន់ធ្ញ​រចំនួន៣គ្រួសារ ​សាលារៀន​មួយ/ ឃុំសន្តិភាព ចំនួន ៩គ្រួសារ​/ធ្ងន់ធ្ងរចំនួ ន២គ្រួសារ សាលារៀន​មួយ និងឃុំជ្រៃ​សីមា ចំនួន ២១គ្រួសារ ធ្ញន់ធ្ញរចំនួន៤​គ្រួសារ​នៃស្រុក​សំពៅលូ ខេត្តបាត់ដំបង ។

 

អំណោយ​ផ្តល់​ជូនក្នុងមួយ​គ្រួសារ​រួមមាន ៖ អង្ករ២៥គីឡូក្រាម មី ១០កញ្ចប់ ត្រីខ ៥កំប៉ុងទឹកបរិសុទ្ធវិឃែរ១កេស ក្រមា១ សារ៉ុង១ ទឹកក្រូច២យូ និងថវិកា ២ម៉ឺនរៀល​ផងដែរ៕បញ្ជាក់៖ទឹកក្រូច​ជាអំណោយ​ព្រះគ្រូអនុគណ​ស្រុកសំពៅលូន។

ខេត្តព្រះវិហារបំពាក់កន្សែងដល់យុវជនកាកបាទ ក្រហមកម្ពុជា វិទ្យាល័យគូលែន

សាខាកក្រកខេត្តព្រះវិហារ៖​កាលពី​ល្ងា​ចថ្ងៃទី​១២​ ខែ ឧសភា​ ឆ្នាំ​ ២០១៧​ សាខា​កាកបាទក្រហម​កម្ពុជា​ ខេត្តព្រះវិហារ ​បាន​បើកវគ្គ​បណ្តុះបណ្តាល​ជាមូលដ្ឋាន​ និងបំពាក់​កន្សែង​ដល់​យុវជន​កាកបាទ ក្រហម​កម្ពុជា​ វិទ្យាល័យ​គូលែន​ចំនួន ​នាក់ ៤២ ស្រី ៣០ នាក់ នៅវិទ្យាល័យ​គូលែន​ ឋិតក្នុង​ឃុំគូលែន​ត្បូង ស្រុកគូលែន​ ខេត្តព្រះវិហារ។

 

ពិធីនេះ​ប្រព្រឹត្ត​ទៅក្រោម​វត្តមាន ឯកឧត្តម យុង គឹមហ៊ាន នាយក​សាខា​កាកបាទក្រហម​កម្ពុជា​ ខេត្តព្រះវិហារ ​មន្រ្តី​អភិវឌ្ឍន៍​សាខា ​និងមានការ​ចូលរួម​ពីគណៈកម្មាធិការ​អនុសាខា​ស្រុកគូលែន​ លោក​នាយក​វិទ្យាល័យ​គូលែន ទីប្រឹក្សា​យុវជន​ និងយុវជន​កាកបាទក្រហម​កម្ពុជា​ សរុបចំនួន ៥០ នាក់ ។

 

នៅក្នុង​ឱកាសនោះ​ផងដែរ​ឯកឧត្តម​ នាយក​សាខាកាកបាទក្រហម​កម្ពុជា​ ខេត្តព្រះវិហារ ​មានប្រសាសន៍​ថាកាកបាទក្រហម​កម្ពុជា ក្រោមការ​ដឹកនាំ​របស់ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ​ជាប្រធាន ​សម្តេច​តែងតែ​គិតគូរ​ពីយុវជន​ ធ្វើយ៉ាងណា​អោយយុវជន​ក្លាយជា​ធន ធាន​ដ៏មាន​សមត្ថភាព ​ចូលរួម​ក្នុងសម្មភាព​មនុស្សធម៌​ និងចូលរួម​ចំណែក​ក្នុងការអភិវឌ្ឍន៍​ប្រទេស ជាតិ​។ ឯកឧត្តម​ក៏បានផ្តាំ​ផ្ញើប្អូនៗ​យុវជន នូវចំនុចមួយ​ចំនួនដូចខាងក្រោម៖

 

-ត្រូវខិតខំរៀន​សូត្រដើម្បី​ក្លាយខ្លួន​ជាសិស្ស​គំរូ មិត្តល្អ កូនល្អ ។
-ត្រូវជៀស​អោយឆ្ងាយ​ពីគ្រឿងញៀន 
-ត្រូវគោរព​ច្បាប់ក្នុង​ពេលបើកបរ
-កុំប្រើ​គ្រឿង​ស្រវឹង​ក្នុងវ័យសិក្សា
-ត្រូវចេះ​សាមគ្គីគ្នា ​ចេះជួយ​យកអសារគ្នា 
-ត្រូវរៀបចំ​ផែនការ​សកម្មភាព​សម្រាប់​អនុវត្ត និងមានរបាយការណ៍​ជូនទៅ​អនុសាខា​អំពី​សកម្មភាព​របស់ខ្លួន ។
-ចូលរួម​ធ្វើអនាម័យ​បរិស្ថាន​ក្នុងសាលា​ជាប្រចាំ។

 

ក្នុងនោះ​សាខា​កាកបាទក្រហម​កម្ពុជា ខេត្តព្រះវិហារ​បានផ្តល់​ថវិកា​មូលនិធិ​ជូនក្លឹប​យុវជន​កាកបាទក្រហមកម្ពុជា វិទ្យាល័យ​គូលែន ចំនួន ២០០,០០០ រៀលគត់​ និងសម្ភារ​សង្គ្រោះបឋម​មួយកញ្ចប់។


 

កាកបាទក្រហមកម្ពុជាប្រគល់ស្រះទឹកនិងអណ្ដូងទឹកស្អាតដល់ខេត្តពោធិ៍សាត់

កក្រក ៖ ​នៅរសៀល​ថ្ងៃទី​១២​ ខែ​ឧសភា​ ឆ្នាំ​២០១៧​ នេះ​ កាកបាទក្រហម​កម្ពុជា​ ដែលមាន​សម្ដេច​កិត្តិ​ព្រឹទ្ធ​បណ្ឌិត​ ប៊ុន រ៉ានី ហ៊ុនសែន​ ជាប្រធាន​ បានរៀបចំ​ពិធី​ប្រគល់​ស្រះទឹក​ចំនួន​២ និង​អណ្ដូងទឹក​ស្អាត​ចំនួន​១៦ ឱ្យ​ប្រើប្រាស់​ជាផ្លូវការ​ ក្រោមអធិបតីភាព​ លោកជំទាវ ម៉ែន នារីសោភ័គ អគ្គលេខាធិការ​រងទី១​ កាកបាទក្រហ​មកម្ពុជា​ និងមាន​ការអញ្ជើញ​ចូលរួម​ពី ឯកឧត្តម​បណ្ឌិត ម៉ៅ ធនិន ប្រធាន​កិត្តិយស​សាខា​ និងមន្ត្រីសាខា-អនុសាខា ជូនប្រជាពលរដ្ឋ​ចំនួន​៤៤៨​គ្រួសារ​ ប្រើប្រាស់​ជាផ្លូវការ​ ដែល​ពិធីនេះ​ប្រព្រឹត្ត​ទៅ​ក្នុងបរិវេណ​វត្តធម្ម​សិរីមង្គល នៅភូមិព្រៃ​ស្រ​គុម្ព ឃុំស្យា ស្រុក​កណ្ដៀង ខេត្ត​ពោធិ៍សាត់។

 

មានប្រសាសន៍​នាឱកាស​នោះ លោកជំទាវ​ អគ្គលេខាធិការ​រងទី១​ បានពាំនាំ​នូវប្រសាសន៍​សួរសុខទុក្ខ ​និងសេចក្ដី​នឹករលឹក ​ពីសំណាក់ សម្ដេច​កិត្តិព្រឹទ្ធបណ្ឌិត​ ប្រធាន និងមាន​ប្រសាសន៍​ផ្ដាំផ្ញើ ​ដល់​ប្រជាពលរដ្ឋ ដែល​ចូលរួម​ក្នុងពិធី​នោះមាន៖ 
១, សូមថែរក្សា​សុខភាព​ឱ្យបាន​ល្អប្រសើរ ជាពិសេស​ត្រូវពិសារ​ទឹកឆ្អិនជាប្រចាំ
២, សូមចូលរួម​ថែរក្សា​សមិទ្ធផល​នេះឱ្យបានគង់វង់​យូអង្វែង និង
៣, សូមមាន​ការប្រុងប្រយ័ត្ន​ជានិច្ច ​ចំពោះបញ្ហា​បម្រែបម្រួល​អាកាសធាតុ​ ជាពិសេស​គ្រោះធម្មជាតិ​មួយចំនួន ដូចជា រន្ទះបាញ់ ខ្យល់កន្ត្រាក់ និងគ្រោះរាំងស្ងួតជាដើម។

 

ប្រជាពលរដ្ឋ​ដែលចូលរួម​ក្នុង​ឱកាសនោះ​ ម្នាក់ៗ​ទទួល​បាន សារុង១ ក្រមា១ និងថវិកា​មួយចំនួន។ ដោយឡែក​ចាស់ៗទទួលបានអង្ករ៣០គីឡូក្រាម និងមី១កេសបន្ថែមទៀត។ ក្រោយពីទទួលបានសមិទ្ធផលនេះ ប្រជាពលរដ្ឋ​មានសេចក្ដី​រំភើប​ក្រៃលែង​ និងបានសម្ដែង​នូវសេចក្ដី​ដឹងគុណ​ និងថ្លែង​អំណរ​គុណ​ចំពោះសម្ដេច​កិត្តិព្រឹទ្ធបណ្ឌិត​ ប្រធាន ដែល​ជានិច្ចកាល​តែងតែ​គិតគូ​ពីសុខទុក្ខ​ប្រជាពលរដ្ឋ​ដោយមិន​ប្រកាន់​វណ្ណៈ ជាតិសាសន៍ ពណ៌សម្បុរ ឬនិន្នាការ​នយោបាយ​ឡើយ។

 

សូមបញ្ជាក់ថា ដែល​ស្រះទឹកទី១មានទំហំ ៣៥ម៉ែត្រ គុណនឹង ៥០ម៉ែត្រ និងជម្រៅ៣ម៉ែត្រ និងទី២មានទំហំ ៤០ម៉ែត្រ គុណនឹង ៥០ម៉ែត្រ និងជម្រៅ៣ម៉ែត្រ នៅស្រុក​កណ្ដៀង អណ្ដូងចំនួន៧ នៅក្នុងសង្កាត់ចំនួន៥ នៃក្រុង​ពោធិ៍សាត់ អណ្ដូងចំនួន៥ នៅឃុំចំនួន៥ នៃស្រុក​ក្រគរ អណ្ដូងចំនួន៤ នៅឃុំចំនួន២ នៃស្រុក​បាកាន ខេត្ត​ពោធិ៍សាត់៕

កាកបាទក្រហមកម្ពុជាចូលរួមបុណ្យសពទាហានមួកខៀវកម្ពុជា

កក្រក ៖ ​នៅព្រឹក​ថ្ងៃទី​១១ ខែ​ឧសភា​ ឆ្នាំ​២០១៧​នេះ សម្តេច​កិត្តិព្រឹទ្ធ​បណ្ឌិត​ ប៊ុន រ៉ានី ហ៊ុនសែន​ ប្រមុខដឹកនាំ​កាកបាទក្រហម​កម្ពុជា បានចាត់ចែង​ក្រុមការងារ​កាកបាទក្រហម​កម្ពុជា ដឹកនាំ​ដោយ ​លោកជំទាវ ម៉ែន នារីសោភ័គ អគ្គលេខាធិការ​រង​ទី១ នៃកាកបាទក្រហម​កម្ពុជា ​នាំយក​សាររំលែក​ទុក្ខដ៏ក្រៀមក្រំ​បំផុត និងបច្ច័យ​ចំនួន២០លានរៀល ទៅចូលរួម​បុណ្យ​សព លោកព្រិន្ទបាល​ទោ ស៊ាង នរិន្ទ ទាហាន​មួកខៀវកម្ពុជា ដែល​បាន​ពលីជីវិត​ដើម្បី​ជាតិ​មាតុភូមិ​កម្ពុជា និងអន្តរជាតិ នៅប្រទេស​អាហ្រ្វិកកណ្តាល។

ពិធីបុណ្យ​សព​លោកព្រិន្ទបាល​ទោ បានធ្វើឡើង​នៅគេហដ្ឋាន​របស់លោក​ផ្ទាល់ នៅខណ្ឌ​ទួលគោក រាជធានី​ភ្នំពេញ ។

ជាមួយនឹងការចូលរួមជាបច្ច័យ២០លានរៀលនេះ សម្តេច​កិត្តិព្រឹទ្ធ​បណ្ឌិត ដែលជា​មាតា​មនុស្សធម៌​នៅកម្ពុជា បាន​ចាត់ចែងនាំ​យក​នូវ​អំណោយ​ផ្សេងៗ ទៀតជូន​គ្រួសារសព​ ក្នុង​នោះមាន​ដូចជា​អង្ករ​ ២០០គ., ត្រីខ ៥យួរ, មី ៥កេស, អូវ៉ាន់ទី ១កេស, ស្ករស ១០គីឡូ, ទឹកក្រូច ១០កេស, ទឹកដោះគោ​ឆៅចំនួន១កេស និង គូលេន​កំប៉ុង ចំនួន១កេសផងដែរ។

សូមបញ្ជាក់ថា ទាហាន​មួកខៀវកម្ពុជា ៤រូប ដែល​ពិលី​ជីវិត​នោះរួម​មាន៖ លោក​ពលបាលឯក (ឋានន្តរស័ក្តពិតប្រាកដ​ អនុសេនីយ៍ទោ) អ៊ឹម សំ បុគ្គលិក​បើកបរ​ប៊ុលដូស៊ែរ, លោកអនុសេនីយ៍ត្រី ស៊ាន នរិន្ទ (ព្រិន្ទបាលទោ) ជំនួយការ​ត្រួតពិនិត្យ​គុណភាព, លោកពលបាល​ឯក មុំ តុលា (ព្រិន្ទបាលទោ) ជំនួយការ​បើកបរ​អ៊ិស្ការ​វ៉ាទ័រ និង លោក​អនុសេនីយ៍​ត្រី ម៉ៅ អេង (អនុសេនីយ៍ឯក) បុគ្គលិក​ពេទ្យផងដែរ៕

 

ប្រជាជនដែលមានជំងឺកំពុងសម្រាកនៅមន្ទីរពេទ្យទទួលអំណោយពីកាកបាទក្រហមកម្ពុជា

កក្រក​ ៖​ នៅ​រសៀល​ថ្ងៃទី​ ១១​ ខែ​ឧសភា​ ឆ្នាំ២០១៧​ នេះ​ លោកជំទាវ​ ពុំ​ ចន្ទីនី​ អគ្គលេខាធិការ​កាកបាទក្រហម​កម្ពុជា​ និងសហការី​ រួមជាមួយ​សាខា​កាកបាទក្រហម​កម្ពុជា​ ខេត្ត​ស្ទឹងត្រែង​ បានចុះសួរ​សុខទុក្ខ​ លោក​ ណយ​ បូផាន់​ អាយុ​ ៦៥ឆ្នាំ​ អតីត​មន្ត្រី​សាខា​កាកបាទក្រហម​កម្ពុជា​ ខេត្តស្ទឹងត្រែង​ ដែលមានជំងឺគ្រួស​ក្នុង​ប្រម៉ាត់​ និងជំងឺ​ថ្លើមប្រភេទ​ C កំពុង​សម្រាក​ព្យាបាល​នៅគេហដ្ឋាន​ស្ថិតនៅ​ភូមិកណ្តាល​ សង្កាត់ស្ទឹងត្រែង​ ក្រុងស្ទឹងត្រែង​ ខេត្តស្ទឹងត្រែង។

 

ជាមួយនឹង​ប្រសាសន៍​ផ្តាំផ្ញើ​សួរសុខទុក្ខ​ពីសម្តេច​កិត្តិព្រឹទ្ធ​បណ្ឌិត​ ប៊ុន​ រ៉ានី​ ហ៊ុនសែន​ ប្រធាន​កាកបាទក្រហម​កម្ពុជា​ និងជូនពរ​លោក​ ណយ​ បូផាន់​ ឆាប់ជា​សះស្បើយ​ពីជំងឺ​ផងនោះ​ លោកជំទាវ​អគ្គលេខាធិការ​ បាន​នាំយក​អំណោយ​កាកបាទក្រហមកម្ពុជា​ រួមមាន​ គ្រឿងឧបភោគ-បរិភោគ​សម្ភារៈប្រើប្រាស់​ និងថវិកាមួយចំនួនជូនផងដែរ។

បន្ទាប់មក​ ក្រុមការងារមនុស្សធម៌​ បានបន្តចុះសួរសុខទុក្ខ​ និងនាំយកអំណោយមនុស្សធម៌ជូន​ ចាស់ជរាគ្មានទីពឹង​ និងគ្រួសារជនពិការ-មានជំងឺ​ ចំនួន​ ៤គ្រួសារទៀតផង៕

 

វគ្គយល់ដឹងជាមូលដ្ឋានដល់យុវជនកាកបាទក្រហមកម្ពុជា

សាខាកក្រករាជធានីភ្នំពេញ៖ នាល្ងាចថ្ងៃទី​ ១១ ខែ​ ឧសភា ឆ្នាំ​ ២០១៧នេះ​ នៅអនុវិទ្យាល័យ​ សម្តេច​ ហ៊ុន​ សែន​ ព្រៃវែង​ សាខា កាកបាទក្រហម​កម្ពុជា​ រាជធានីភ្នំពេញ​ បានរៀបចំ​ពិធីបិទ​វគ្គយល់ដឹង​មូលដ្ឋាន​ជូនដល់​ទីប្រឹក្សា​យុវជន​ និងយុវជន​កាកបាទក្រហម​កម្ពុជា​ ប្រចាំ​អនុវិទ្យាល័យ​សរុប​ចំនួន​៧០នាក់ (ស្រី៤៧នាក់) ដោយបាន​ការចូលរួម​ជាអធិបតី​ពី​ លោក សុង តុញ នាយក​អនុវិទ្យាល័យ​ ដែលវគ្គ​យល់ដឹង​នេះបានចាប់​ដំណើរការ​អស់រយៈពេល​១ថ្ងៃ​កន្លងមក​ដោយលើក​យកមេរៀន​ចំនួន៥​មកបង្ហាត់​បង្ហាញ​រួមមាន៖


១/ ប្រវត្តិចលនា​កាកបាទក្រហម ​អឌ្ឍចន្ទក្រហម​ និងសមាគមជាតិ​កាកបាទក្រហម​កម្ពុជា 
២/ តួនាទី និងភារកិច្ច​យុវជន​កាកបាទក្រហម​កម្ពុជា 
៣/ គ្រោះមហន្តរាយ និង​ការគ្រប់គ្រងគ្រោះ​មហន្តរាយ 
៤/ សុវត្ថិភាព​ចរាចរណ៍​ផ្លូវគោក 
៥/ វិជ្ជាសង្គ្រោះបឋម​ ។


ជាលទ្ធផល​យុវជន​ទទួលបាន​និទ្ទេស​ល្អចំនួន៧០​ភាគរយ និង​មធ្យម៣០ភាគរយ ។

នាឱកាសនោះ​ លោកនាយក​អនុវិទ្យាល័យ បានថ្លែងអំណរ​គុណយ៉ាង​ជ្រាលជ្រៅ​ចំពោះ​សាខា​កាកបាទក្រហមកម្ពុជា​ រាជធានីភ្នំពេញ​ ដែល​បានមក​ធ្វើការ​បើក​វគ្គយល់ដឹង​មូលដ្ឋាន​ជូនដល់​យុវជន​កាកបាទក្រហម​ ប្រចាំ​អនុវិទ្យាល័យ​របស់លោក​​ ដើម្បីជួយ​ជាពន្លឺ​ស្មារតី​ជូនក្មួយៗ​ទាំងអស់​ឲ្យបាន​យល់ដឹង​ពីសារៈសំខាន់ ក្នុងការ​អនុវត្ត និងបំពេញ​ភារកិច្ច​បេសកម្ម​មនុស្សធម៏​របស់ខ្លួន​ឲ្យបាន​កាន់តែ​ល្អប្រសើរ និងទទួលបាននូវ​ជោគជ័យ​ថែមទៀត ៕

 

កាកបាទក្រហមកម្ពុជាប្រជុំការងារជាមួយកាកបាទក្រហមហ្វាំងឡង់។

ក្រក ៖ ​នាព្រឹក​ថ្ងៃទី​១១​ ខែ​ឧសភា​ ឆ្នាំ​២០១៧ ​នៅទី​ស្នាក់ការ​កណ្ដាល​កាកបាទក្រហម​កម្ពុជា ​ឯកឧត្តម ​យូ ឡាណា ​អគ្គលេខាធិការ​រងទី២​ កាកបាទក្រហម​កម្ពុជា ​បានជួប​ពិភាក្សា​ ជាមួយ​ លោកស្រី ​ម៉ារីយ៉ាន ប៉េកូឡា​ ទីប្រឹក្សា​ជាន់ខ្ពស់​ទទួល​បន្ទុកការងារ ​អភិវឌ្ឍន៍​ជនបទ ​នៃក្រសួងការ​បរទេស​ហ្វាំងឡង់​ ព្រមទាំងសហការី ​ដោយមាន​ការចូលរួម​ពីមន្ត្រីជំនាញ​កាកបាទក្រហម​កម្ពុជា និង​កាកបាទក្រហម​ហ្វាំងឡង់។

 

​កិច្ចពិភាក្សា​នេះក្នុង​គោលបំណង ៖
១. ចុះពិនិត្យ​តាមដាន​ការអនុវត្ត​សកម្មភាព ​ពិនិត្យ​វឌ្ឍនភាព​ និងប្រសិទ្ធភាព​នៃកម្មវិធី​កសាង​ភាពធន់​ក្នុងសហគមន៍​ ដែលគាំទ្រ​ដោយ​រដ្ឋាភិបាល​ហ្វាំងឡង់ តាមរយៈកាកបាទ​ក្រហម​ហ្វាំងឡង់​ ក្នុងខេត្ត​គោលដៅ រួមមាន​ ខេត្តកំពង់ចាម និង​ខេត្តត្បូងឃ្មុំ ​ក្នុងផែនការ​អនុវត្ត​ ឆ្នាំ២០១៦-២០១៨ និង


២. ពិនិត្យ​លទ្ធភាព​បន្តកិច្ច​សហប្រតិបត្តិការ​នាពេល​អនាគត។

មន្ត្រីជាន់ខ្ពស់​នៃក្រសួង​ការបរទេស​ហ្វាំងឡង់ ​ដោយមាន​ការចូលរួម​ពី មន្ត្រីជំនាញ​កាកបាទក្រហម​កម្ពុជា កាកបាទ​ក្រហម​ហ្វាំងឡង់ មាន​បេសកកម្ម ​ទៅកាន់​ខេត្ត​គោលដៅ​ទាំងពីរ ​ចាប់ពីថ្ងៃទី១១ និង១២ ខែឧសភា ឆ្នាំ២០១៧៕

 

ប្រជាជនងាយរងគ្រោះនៅស្រុកថាឡាបរិវ៉ាត់ទទួលអំណោយពីកាកបាទក្រហមកម្ពុជា

កក្រក ៖ នៅ​ព្រឹក​ថ្ងៃទី​ ១១​ ខែ​ឧសភា​ ឆ្នាំ​២០១៧​ នេះ​ កាកបាទក្រហម​កម្ពុជា​ ដែលមាន​សម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ជាប្រធាន​ បានចាត់​ឱ្យថ្នាក់​ដឹកនាំ-មន្ត្រី​ ទីស្នាក់ការ​កណ្តាល​ និង​សាខា​កាកបាទក្រហម​កម្ពុជា​ ខេត្ត​ស្ទឹងត្រែង​ ចុះសួរ​សុខទុក្ខ​ និងផ្តល់​អំណោយ​មនុស្សធម៌​ជូន​ចាស់គ្មាន​ទីពឹង​ ស្ត្រី​មេម៉ាយ គ្រួសារ​ជនពិការ​ និងគ្រួសារ​ទីទ័លក្រ​ ចំនួន​ ៨២៤គ្រួសារ​ ដែលរស់នៅ​ក្នុងភូមិចំនួន​ ៤៤ ឃុំចំនួន​ ១១​ នៃស្រុក​ថាឡាបរិវ៉ាត់​ ខេត្ត​ស្ទឹងត្រែង។

ក្នុងឱកាស​សំណេះ​សំណាល​នោះ លោកជំទាវ​ ពុំ​ ចន្ទីនី អគ្គលេខាធិការ​ កាកបាទក្រហម​កម្ពុ​ជា បានពាំនាំ​ប្រសាសន៍​ សម្តេច​កិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា​ ដែលផ្តាំ​ផ្ញើគិតគូរ​ សួរសុខទុក្ខ​ និងពាំនាំ​នូវ​អនុសាសន៍​របស់​ សម្តេច​ ជម្រាប​ជូនប្រជាពលរដ្ឋ​ទាំងអស់រួមមាន​ ៖​ ១/​​​ សូមថែទាំ​សុខភាព​ឱ្យបានល្អ​ ត្រូវ​ការពារ​ខ្លួនកុំឱ្យ​មានជំងឺ​ ពិសេស​ ត្រូវរស់​នៅមាន​អនាម័យ​ និងពិសារ​ទឹកដាំឆ្អិន​។​ ២/​ សូមគោរព​ច្បាប់ចរាចរណ៍​ និងប្រុង​ប្រយ័ត្ន​ជានិច្ចរាល់​ពេលធ្វើ​ដំណើរតាម​ដងផ្លូវ។​ ៣/​ សូមអាណាព្យាបាល​ណែនាំកូន-ក្មួយ​ ឱ្យជៀសឆ្ងាយ​ពីគ្រឿងញៀន​ និងគ្រឿង​ស្រវឹង ដែលជា​ប្រភពនៃ​អំពើហិង្សា​ ចោរកម្ម​ ចារកម្ម​ និងអសន្តិសុខ។​ ៤/​ សូមស្ត្រី​មានផ្ទៃពោះ​ ទៅពិនិត្យផ្ទៃពោះឱ្យបានទៀងទាត់​ និងទៅសម្រាល​កូននៅមណ្ឌល​សុខភាព​ដើម្បី​សុខភាព​ និងសុវត្ថិភាព​ទាំងម្តាយ​ និងកូន។

 

ប្រជាពលរដ្ឋ​ទាំងអស់​ មានក្តីរំភើប​ និងសប្បាយ​រីករាយ​ឥតឧបមា​ ព្រោះបាន​កាកបាទក្រហម​កម្ពុជា​ ក្រោមការដឹកនាំ​របស់​សម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ចុះជួយ​សម្រាលទុក្ខ​លំបាក​ដល់ពួក​គាត់បាន​ទាន់ពេលវេលា​ និងមិនមាន​ការរើសអើង​អ្វីឡើយ។​

គ្រួសារ​នីមួយៗ​ទទួលបាន ៖ អង្ករ​ ៣០គីឡូក្រាម​ មី​ ១កេស​ ត្រីខ​ ១០កំប៉ុង​ មុង​ ១​ ភួយ​ ១​ សារុង​ ១​ និងក្រមា​ ១៕

កាកបាទក្រហមកម្ពុជាប្រារព្ធ ខួបទី ១៥៤ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៧

នៅព្រឹក ថ្ងៃ ទី​ ៨​ ខែ​ឧសភា​ ឆ្នាំ​២០១៧​ នេះ​ កាកបាទក្រហម​កម្ពុជា ​ដែលមាន​សម្តេច​ព្រះមហាក្សត្រី ​នរោត្តម​ មុនិនាថ​ សីហនុ​ ព្រះវររាជ​មាតា​ជាតិ​ខ្មែរ​ ជាព្រះប្រធាន​កិត្តិយស ​និងសម្តេច​កិត្តិព្រឹទ្ធបណ្ឌិត ​ប៊ុន រ៉ានី ហ៊ុនសែន ជាប្រធាន បានប្រារព្ធ​មិទ្ទីង​ថ្នាក់ជាតិ​ ដើម្បីអបអរ​សាទរ​ខួបទី​ ១៥៤ ទិវា​ពិភព​លោក​កាកបាទក្រហម អឌ្ឍចន្ទ​ក្រហម​ ៨ ឧសភា ​ឆ្នាំ២០១៧​ ក្រោម​អធិបតីភាព​ដ៏ខ្ពង់ខ្ពស់​ សម្តេច​អគ្គ​មហាសេនា​បតីតេជោ ហ៊ុន សែន នាយក​រដ្ឋមន្ត្រី​នៃព្រះរាជាណាចក្រ​កម្ពុជា​ និងមាន​ការអញ្ជើញ​ចូលរួម​ពីឥស្សរជន​មក​ពីស្ថាប័ន​នីតិប្បញ្ញតិ​ នីតិប្រតិបត្តិ​ តំណាង​អង្គទូត​ ដៃគូ​សហប្រតិបត្តិការ​នៅក្នុង​ និងក្រៅ​ចលនា​កាកបាទក្រហម​ អឌ្ឍចន្ទក្រហម​ វិស័យឯកជន​ សប្បុរសជន​ មកពីគ្រប់​មជ្ឈដ្ឋានក្នុង-ក្រៅប្រទេស​ យុវជន​ អ្នកស្ម័គ្រចិត្ត​ សមាជិក​ សមាជិកា​កាកបាទក្រហម​កម្ពុជា​ សរុបប្រមាណ​ ៤ពាន់នាក់៕

កាកបាទក្រហមកម្ពុជាឧបត្ថម្ភថវិកាដល់ក្រុមប្រឹក្សាជាតិកម្ពុជាដើម្បីកុមារ

កក្រក៖​នាព្រឹក​ថ្ងៃទី​ ៦​ ខែ​ឧសភា​ ឆ្នាំ២០១៧​ លោកជំទាវ​ ពុំ ចន្ទីនី ​អគ្គលេខាធិការ​កាកបាទក្រហម​កម្ពុជា​ ដែលមាន​សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន​ ជាប្រធាន​ បានឧបត្ថម្ភ​ថវិកា​ចំនួន ១០លានរៀល​ ជូនលោកជំទាវ 
ប៊ូ សោភ័ណ អគ្គលេខាធិការរង​នៃ​អគ្គលេខាធិការដ្ឋាន​ តំណាង​ក្រុមប្រឹក្សាជាតិ​កម្ពុជា​ដើម្បី​កុមារ ​សម្រាប់ធ្វើ​ពិធី​អបអរសាទរ​ខួបលើកទី​៦៨ ​ទិវាកុមារ​អន្តរជាតិ​ ១មិថុនា​ និង​អបអរ​ខួប​លើកទី ៦ ​ទិវា​ពិភពលោកប្រឆាំង​ពលកម្ម​កុមារ ១២មិថុនា​ និងទិវា​កុមារកម្ពុជា ២០១៧ ដែលនឹង​ប្រារព្ធ​ធ្វើនៅ​ថ្ងៃទី ៨ ខែមិថុនា ឆ្នាំ២០១៧ ខាងមុខនេះ។

 

ក្នុងឱកាសនោះដែរ លោកជំទាវ ប៊ូ សោភ័ណ បានថ្លែង​អំណរ​អរគុណ​ដល់កាកបាទក្រហម​កម្ពុជា ជាពិសេស​ សម្តេច​កិត្តិព្រឹទ្ធបណ្ឌិត​ប្រធាន ដែល​បាន​ឧបត្ថម្ភគាំទ្រ​ដល់ក្រុម​ប្រឹក្សាជាតិ​កម្ពុជា​ដើម្បីកុមារ ​ហើយថវិកា​ដែលទទួល​បាននេះ​នឹងយកទៅ​រៀបចំ​មិទ្ទីង និងចុះសំណេះសំណាល​ជាមួយ​កុមារក្រីក្រ ​នៅតាម​សហគមន៍​ ដោយសហការ​ជាមួយ​ក្រសួង​សង្គមកិច្ច ​អតីតយុទ្ធជន និង​យុវ​នីតិសម្បទា​ និងដៃគូ​ពាក់ព័ន្ធនានា។

 

First Prev 53 54 55 56 57 Next Last