អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

កាកបាទក្រហមកម្ពុជាប្រគល់អណ្តូងទឹកស្អាតជូនប្រជាជននៅឃុំស្វាយចេក

កក្រក៖​នៅព្រឹកថ្ងៃទី១៨​ខែកុម្ភៈ​ឆ្នាំ ២០១៧​កន្លងទៅ​កាកបាទក្រហមកម្ពុជា​ដែលមាន​សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន​បាន​ចាត់តាំង​ឯឧ វេជ្ជ អ៊ុយ សំអាត ចូលរួម​សម្ពោធ​និងប្រគល់​ឱ្យប្រើប្រាស់​ជាផ្លូវការ​អណ្តូងទឹកស្អាត​ចំនួន១៥​(មានលេខរៀងពីទី០២៥ ដល់ទី ០៣៩) ជូនបងប្អូន​នៅមណ្ឌលអភិវឌ្ឍន៍​យោធិនពិការ៣១៧ តេជោភ្នំឆ័ត្រ ដែលកំពុង​មានបញ្ហា​កង្វះខាតទឹក​ប្រើប្រាស់ចំនួន ១២៤គ្រួសារ​ស្មើមនុស្ស​៥០១នាក់​ឋិតនៅ ឃុំស្វាយចេក ស្រុកស្វាយចេក ខេត្តបន្ទាយមានជ័យ​ជាលើកទី២។

 

ក្នុងឱកាស​ប្រគល់អណ្តូង​ទឹកទាំងនោះ ឯកឧត្តមវេជ្ជ.អ៊ុយ សំអាត បានពាំនាំនូវប្រសាសន៍​ផ្តាំផ្ញើសាកសួរសុខទុក្ខពី​សំណាក់សម្តេចកិត្តិព្រឹទ្ធ បណ្ឌិតប្រធាន និងផ្តាំផ្ញើដល់ប្រជាពលរដ្ឋ​ទាំងអស់មេត្តា​ចូលរួមថែរក្សា​សុខភាព ហូបស្អាត ផឹកស្អាត រស់នៅស្អាត ដោយឡែក​ចំពោះស្ត្រី​មានទម្ងន់​ត្រូវទៅពិនិត្យ​សុខភាព​តាមការណែនាំ​ពីគ្រូពេទ្យ និងសុំទៅ​សម្រាលកូន​នៅមណ្ឌលសុខភាព ឬមន្ទីពេទ្យរដ្ឋ​ដែលនៅជិតផ្ទះបងប្អូន ទន្ទឹមនឹងនេះ សូមថែរក្សា​សុខភាព​ឱ្យបានល្អ ដោយត្រូវ​បរិភោគទឹកដាំពុះ ហើយចូលរួមដាំដំណាំ ឬបន្លែផ្សេងៗជុំវិញបរិវេណអណ្តូងទឹក ដើម្បីជាប្រយោជន៍​ដល់សហគមន៍ ហើយជួយថែរក្សាសមិទ្ធផលទាំងនេះឱ្យបានគង់វង្សយូរអង្វែង។ បន្ថែមលើនោះបានអំពាវនាវ​បងប្អូនចូលរួមអនុវត្ត​គោលនយោបាយ​ភូមិ-ឃុំមានសុវត្ថិភាព ដោយជៀសវាង​ឱ្យបានដាច់ខាត​នូវការប្រើប្រាស់គ្រឿងញៀន គ្រឿងស្រវឹង ដែលជាប្រភព​នៃអំពើហិង្សា ចោរកម្ម និងអសន្តិសុខ។

 

ជាកិច្ចឆ្លើយតប បងប្អូនទាំងអស់ មានសេចក្តីរំភើបរីករាយ បានសំដែងនូវការដឹងគុណ និងថ្លែងអំណរអរគុណដ៏ជ្រាលជ្រៅបំផុតជូន ចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានផ្តល់អំណោយដ៏ថ្លៃថ្លាទាំងនេះ និងសូមប្តេជ្ញាខិតខំថែរក្សារាល់សមិទ្ធផលទាំងនេះឲ្យបានជាប្រយោជន៍ដ៏យូរអង្វែងទៅថ្ងៃអនាគត។

 

សូមបញ្ជាក់ថា គិតចាប់ពីឆ្នាំ២០១៦ ដល់ឆ្នាំ២០១៧ កាកបាទក្រហមកម្ពុជា បានផ្តល់អណ្តូងទឹកស្អាតជូនប្រជាពលរដ្ឋក្នុងខេត្តបន្ទាយមានជ័យបានចំនួន ៣៩អណ្តូងហើយ។ ទោះបីការផ្តល់អណ្តូងទឹកស្អាតជូនប្រជាពលរដ្ឋនៅតាមឃុំជាប់ ព្រំដែន កម្ពុជា ថៃ បានមួយចំនួននាពេលនេះក្តីតែចំនួនតម្រូវការអណ្តូងទឹកស្អាតជូនប្រជាពលរដ្ឋតាមបណ្តាឃុំនានាក្នុងខេត្តដែលនៅជាប់ព្រំដែនថៃ នៅតែមានមានតម្រូវការ អណ្តូងទឹកស្អាតបន្ថែមទៀត។ ពិសេសនៅមណ្ឌលអភិវឌ្ឍន៍យោធិនពិការ៣១៧ តេជោភ្នំឆ័ត្រក៏នៅមានតម្រូវការអណ្តូងបន្ថែមទៀត ពីព្រោះបច្ចុប្បន្នមានលំហូរបងប្អូនថ្មីមករស់នៅ ទីនេះបន្ថែមទៀតជាបន្តបន្ទាប់។

 

ទិវាបោសសម្អាតឧទ្យានសហស្សវត្សរ៍កាកបាទក្រហមកម្ពុជានៅខេត្តសៀមរាប

សាខាកក្រកខេត្តសៀមរាប៖ ព្រឹកថ្ងៃទី១៨​ខែកុម្ភៈ​ឆ្នាំ២០១៧នេះ ​ដើម្បីអបអរសាទរ​ខួបលើកទី៦២​នៃថ្ងៃកំណើត​កាកបាទក្រហមកម្ពុជា (១៨ កុម្ភៈ ១៩៥៥-១៨ កុម្ភៈ ២០១៧)​អ្នកស្ម័គ្រចិត្ត​ទីប្រឹក្សា យុវជន​កាកបាទក្រហម​កម្ពុជា និយោជិត​សាខាកាកបាទក្រហមកម្ពុជា​ខេត្ត មន្ត្រីនៃ​ខ័ណ្ឌរដ្ឋបាលព្រៃឈើ នៃមន្ទីរកសិកម្ម រុក្ខាប្រមាញ់ និងនេសាទ​ខេត្តសៀមរាប​សរុប១៥៨នាក់​ធ្វើការបោសសម្អាត​ស្លឹកឈើងាប់ ជម្រះស្មៅ​ធ្វើជាផ្លូវការពារ​ភ្លើងឆេះដែលអាចរាលដាល​ដល់ដើមឈើ​ក្នុងឧទ្យានសហស្សវត្សរ៍​កាកបាទក្រហមកម្ពុជា​ជាជាយថាហេតុណា​មួយផង ហើយជាពិសេស​ដើម្បីបញ្ជាក់ពី​សកម្មភាព​ចូលរួមរបស់ប្អូនៗយុវជន​កាកបាទក្រហមកម្ពុជា ដូចដែលពាក្យស្លោក​បានលើកឡើង​ថា “យុវជនកំពុងនាំគ្នាធ្វើកម្មភាព” ផងដែរ។ ជាមួយគ្នានេះដែរមន្ត្រីដែលមកពី ខណ្ឌរដ្ឋបាលព្រៃឈើខេត្ត​គឺជាមន្ត្រីជំនាញ ពួកគាត់បានធ្វើការតាក់តែង កាប់មែកឈើដែលចាស់ៗ និងកាប់កូនឈើតូចៗគ្មានប្រយោជន៍ចោល ដើម្បីឱ្យដើម​របស់វាអាច​លូតលាស់បានល្អ ។

 

សូមបញ្ជាក់ផងដែរ​ថា ឧទ្យានសហស្សវត្សរ៍ កាកបាទក្រហមកម្ពុជា ដែលស្ថិត​លើទឹកដី​សៀមរាប អង្គរនេះ បានដាំដុះឡើងតាំងពីឆ្នាំ ១៩៩៩ មកម្ល៉េះ ក្រោមអធិបតីភាព​ខ្ពង់ខ្ពង់សម្តេចព្រះមហាក្សត្រី នរោត្តម មុនិនាថ សីហនុ ព្រះប្រធានកិត្តិយស​កាកបាទក្រហមកម្ពុជា ដែលមាន មានទំហំប្រមាណជិត ៥ ហិកតា និងមានដើមឈើ​ប្រមាណជាង២៤៦០ដើម។

 

គ្រួសារទីទ័លក្រ និងមានជម្ងឺទទួលអំណោយពីអនុសាខាកាកបាទក្រហមកម្ពុជាខណ្ឌសែនសុខ

សាខាកក្រករាជធានីភ្នំពេញ៖ នាព្រឹកថ្ងៃទី​១៧​ខែ​ កុម្ភៈ​ឆ្នាំ ២០១៧នេះ​ក្រុមការងារ​អនុសាខា​កាកបាទក្រហម​កម្ពុជា ខណ្ឌសែនសុខ​ដឹកនាំដោយ​លោកសក់ ច័ន្ទកញ្ញារិទ្ធ ​ប្រធាន​គណៈកម្មាធិការ​អនុសាខា បានចុះសាកសួរសុខទុក្ខ​និងនាំយកអំណោយ​មនុស្សធម៌​ទៅផ្តល់ជូន​ក្រុមគ្រួសារ​លោកតា​ អ៊ិន សាលូត ដែលមាន​ជីវភាពក្រខ្សត់ និងមានជម្ងឺកំពុងសម្រាកព្យាបាលនៅមន្ទីរពេទ្យ សព្វថ្ងៃគ្រួសារ​លោកតា​ស្នាក់នៅបន្ទប់ជួល​ ស្ថិតក្នុង​ភូមិសែនសុខទី១ សង្កាត់ឃ្មួញ​ ។

 

ទន្ទឹមនឹង​ការពាំនាំនូវ​ការផ្តាំផ្ញើសាកសួរ​សុខទុក្ខពីសំណាក់ សម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុន​ សែន​ ប្រធាន​កាកបាទក្រហមកម្ពុជា​ ជូនដល់ក្រុម​គ្រួសារលោកតា​, លោកប្រធាន​គណៈកម្មាធិការអនុសាខា បានគូសបញ្ជាក់ថា៖ កាកបាទក្រហមកម្ពុជា​មានគ្រប់ទីកន្លែង សម្រាប់គ្រប់ៗគ្នា​ ជាក់ស្តែង​ដូចជាពេលនេះ គឺការជួយរបស់កាកបាទក្រហមកម្ពុជា ដោយមិនប្រកាន់ពីនិន្នាការនយោបាយ ជាតិសាសន៍ សាសនា វណ្ណៈ ពណ៌ សម្បុរអ្វីទាំងអស់ ។

 

អំណោយមនុស្សធម៌​ដែលនាំយកមក​ប្រគល់ជូនរួមមាន៖​ រទេះរុញ១គ្រឿង​ គ្រឿងឧបភោគ​បរិភោគ​មួយចំនួន​ និងថវិកាចំនួន៣៣ម៉ឺនរៀល​ ៕

 

ពិធីបំពាក់កន្សែងយុវជនកាកបាទក្រហមកម្ពុជានៅខេត្តសៀមរាប

សាខាកក្រកខេត្តសៀមរាប៖​នៅព្រឹកថ្ងៃទី១៧​ខែកុម្ភៈ​ឆ្នាំ២០១៧សាខា​កាកបាទក្រហមកម្ពុជា​ខេត្តសៀមរាប​បានរៀបចំ​ពិធី​បំពាក់​កន្សែង​យុវជនកាកបាទក្រហមកម្ពុជា​ចំនួន១០៥នាក់​ស្រី៦៤នាក់​(-វិទ្យាល័យ​វ៉ារិន​៦២នាក់​ស្រី៣៩នាក់​-អនុវិទ្យាល័យរំដួល​២២នាក់​ស្រី១៧​និងអនុវិទ្យាល័យ​ស្រែណូយ​២១នាក់ ស្រី៩នាក់)​​ពិធីនេះធ្វើនៅវិទ្យាល័យ​វ៉ារិន ស្រុកវ៉ារិន​ក្រោម​អធិបតីភាព​លោកជំទាវ គួយ ណាលីន អនុប្រធានគណៈកម្មាធិការសាខា។

 

មានប្រសាសន៍​នាឱកាសនោះ​លោកជំទាវ​បានលើកឡើងថា៖ កម្ពុជាបានចាត់ទុក​យុវជនជា​ធនធានគន្លឹះ និងមានតម្លៃបំផុត​សម្រាប់ការអភិវឌ្ឍ​សេដ្ឋកិច្ច​សង្គមកិច្ច​វប្បធម៌​បរិស្ថាន​និងការ​រក្សាសន្តិភាព​ហើយនៅគ្រប់​សម័យកាល​គ្រប់សង្គម យុវជនជាកម្លាំងស្រួច​ដែលមាន​កម្លាំងកាយ-កម្លាំងចិត្ត​និងស្មារតីភ្លឺស្វាង​មានទឹកចិត្តក្លាហាន​ពុះពារមិនរារែកគ្រប់ឧបសគ្គ ការលំបាក​នានាពិសេស​យុវជនគឺជាសសរទ្រូង​របស់ប្រទេសជាតិ​ទាំងនៅពេល​បច្ចុប្បន្ន និងទៅអនាគត។ ជាមួយគ្នានេះដែរ កាកបាទក្រហមកម្ពុជា បានទទួលស្គាល់ថា​យុវជនកាកបាទក្រហមកម្ពុជា​គឺជាអ្នកស្ម័គ្រចិត្ត​វ័យក្មេង ដែលជា​កម្លាំងស្នូល​មួយដ៏មាន​សារៈសំខាន់​និងសកម្មបំផុត​ក្នុងការផ្ដល់​នូវសេវាកម្ម​មនុស្សធម៌ ប្រកបដោយ​ការប្ដេជ្ញាចិត្តខ្ពស់ និងការលះបង់ឥតងាករេ ស្របតាមប្រធានបទ "កាកបាទក្រហមកម្ពុជា​មានគ្រប់​ទីកន្លែង សម្រាប់គ្រប់ៗគ្នា"​និង "សង្រ្គោះជីវិត ផ្លាស់ប្ដូរផ្នត់គំនិត" នៃយុទ្ធសាស្ត្រ ២០១១-២០២០ របស់កាកបាទក្រហមកម្ពុជា៕

សហព័ន្ធអន្តរជាតិ ប្រគល់អំពូលប្រើថាមពលពន្លឺព្រះអាទិត្យដល់សាខាកាកបាទក្រហមកម្ពុជាខេត្តឧត្តរមានជ័យ

កក្រក ៖ នាព្រឹកថ្ងៃទី​១៦​ខែ​កុម្ភៈ​ឆ្នាំ​២០១៧ ​លោក មុំ ភិរក្ស​ប្រធាន ការិយាល័យ​ស្តារទំនាក់ទំនងគ្រួសារ នាយកដ្ឋាន​ទំនាក់ទំនង​កាកបាទក្រហមកម្ពុជា​បានធ្វើពិធីប្រគល់​អំពូល​ប្រើថាមពល​ពន្លឺព្រះអាទិត្យ ( solar lantern ) ដែលជាជំនួយ​របស់សហព័ន្ធអន្តរជាតិ​កាកបាទក្រហម អឌ្ឍចន្ទក្រហម ចំនួន​៩០​សម្រាប់​ដល់សាខា​កាកបាទក្រហមកម្ពុជា​ខេត្តឧត្តរមានជ័យ​ដើម្បីប្រគល់​ជូនមណ្ឌលសុខភាព​ដែលគ្មាន​ចរន្តអគ្គិសនី​ពិធីប្រគល់នេះ​ធ្វើនៅ​សាខាកាកបាទក្រហមកម្ពុជា​ខេត្តឧត្តរមានជ័យ ។

គ្រួសាររងគ្រោះដោយអគ្គីភ័យទទួលអំណោយពីសាខាកាកបាទក្រហមកម្ពុជាខេត្តពោធិ៍សាត់

សាខាកក្រកខេត្តពោធិ៍សាត់​៖​នៅព្រឹកថ្ងៃទី​១៦​ខែកុម្ភៈ​ឆ្នាំ២០១៧​នេះ​សាខា​កាកបាទក្រហមកម្ពុជា​ខេត្តពោធិ៍សាត់​ដឹកនាំដោយ​ ឯកឧត្តម​ខូយ សុខា​អនុប្រធាន​កិត្តិយស​ និងឯកឧត្តម​ខូយ រីដា​ប្រធាន​គណៈកម្មាធិការសាខា​បានចុះសួរ​សុខទុក្ខ​ និងនាំយកអំណោយ​មនុស្សធម៌​កាកបាទក្រហមកម្ពុជា​ ដែលមាន​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ជាប្រធាន​ ចែកជូន​ គ្រួសាររងគ្រោះ​ដោយសារភ្លើងឆេះផ្ទះចំនួន​ ៦គ្រួសារ​ និងចាស់ជរាគ្មានទីពឹងចំនួន ៥៤នាក់ សរុប​ ៧០គ្រួសារ​ មកពីឃុំសំរោង​ និងឃុំផ្ទៈរុង​ ក្នុងស្រុកភ្នំក្រវ៉ាញ​ ខេត្តពោធិ៍សាត់។

 

នៅក្នុងឱកាសនោះ​ ឯកឧត្តមអនុប្រធានកិត្តិយសសាខា​ បានពាំនាំ​ការផ្តាំផ្ញើសួរសុខទុក្ខ​ពីសម្តេចកិត្តិព្រឹិទ្ធបណ្ឌិត ប៊ុន រ៉ានី ហ៊ុនសែន​ ប្រធានកាកបាទក្រហមកម្ពុជា​ និងក្នុងនាម​សាខាកាកបាទក្រហមកម្ពុជា​ ខេត្តពោធិ៍សាត់​ សូមសំដែងការសោកស្តាយ​ជាមួយក្រុមគ្រួសារ​រងគ្រោះភ្លើងឆេះផ្ទះទាំងអស់​ និងគ្រួសារ​ក្រីក្រចាស់ជរា​គ្មានទីពឹង​ដែលបានមកទទួលអំណោយ​ថ្ងៃនេះ។

 

គ្រួសាររងគ្រោះដោយភ្លើងឆេះផ្ទះ​ ៦គ្រួសារ​ ក្នុងមួយគ្រួសារៗទទួលបាន​ ៖​អង្ករ៥០ គីឡូក្រាម​ មី១កេស​ ត្រីខ១០កំប៉ុង​ ទឹកត្រី១ យួរ ទឹកសុីអ៊ីវ​១យួរ​ឃីត១​តង់១​ កន្ទេល១​ និងថវិកា ១០ម៉ឺនរៀល។​ ដោយឡែក​គ្រួសារក្រីក្រ ចាស់ជរាគ្មានទីពឹងចំនួន​៥៤គ្រួសារក្នុងមួយគ្រួសារៗទទួលបាន​ ៖​អង្ករ ២៥គីឡូក្រាម​ មី១កេស​ ត្រីខ​១០កំប៉ុង​ទឹកត្រី១យួរ​ទឹកសុីអីុវ១យួរ​ និងថវិកា២ម៉ឺនរៀល។​

 

ទន្ទឹមនឹងនោះ​ ឯកឧត្តម​អនុប្រធានកិត្តិយសសាខា​ បានប្រគេន​ព្រះសង្ឃគង់​នៅវត្តបត់រំដួល​នូវ​ អង្ករ ៥០គីឡូក្រាម​ទឹកសុទ្ធ២កេស​ និងបច្ច័យ​​២០០ដុល្លារ​ សម្រាប់ជួយកសាងវត្ត៕

 

កាកបាទក្រហមកម្ពុជាផ្តល់ថវិកា ខួងអណ្តូងទឹកស្អាតនៅខេត្តរតនគិរី

កក្រក ៖ នៅថ្ងៃទី​១៥ ខែកុម្ភៈ​ឆ្នាំ២០១៧​នេះ​សម្តេចកិត្តិព្រឹទ្ធបណ្ឌិត​ប៊ុន រ៉ានី​ហ៊ុនសែន​ប្រធាន​កាកបាទក្រហមកម្ពុជា​បានសម្រេច​ផ្តល់ថវិកា​ចំនួន៣៩.០៥២​(បីម៉ឺនប្រាំបួនពាន់សូន្យរយហាសិបពីរ)​ដុល្លារអាមេរិក​ដើម្បី​ខួងអណ្តូង​ទឹកស្អាត​ចំនួន១៤​ផ្សេងទៀត​ជូនប្រជាពលរដ្ឋ​ខ្វះខាត​ទឹកប្រើប្រាស់​ចំនួន​៣៥០គ្រួសារ​ស្មើនឹង​មនុស្ស១,៦៦០នាក់​រស់នៅ​ឃុំប៉ក់ញ៉ៃ ឃុំប៉ាតេ និងឃុំយ៉ាទុង នៃស្រុកអូយ៉ាដាវ ខេត្តរតនគិរី។

 

កាកបាទក្រហមកម្ពុជា​ដែលមាន​សម្តេចព្រះមហាក្សត្រី​នរោត្តម មុនិនាថ សីហនុ​ព្រះវររាជ​មាតាជាតិខ្មែរ​គង់ប្រថាប់​ជាព្រះប្រធាន​កិត្តិយស ជានិច្ចកាល​យកព្រះទ័យ​ទុកដាក់​ចំពោះ​សុខទុក្ខ​របស់ប្រជានុរាស្ត្រ​និងតែងតែ​ដោះស្រាយ​បញ្ហាទឹកស្អាត​ជូនប្រជានុរាស្ត្រ​ដែលខ្វះខាត​ទឹកប្រើប្រាស់​បាន​រាប់ម៉ឺន​គ្រួសារនៅ​ទូទាំងប្រទេស​ក្នុងនោះ​បានផ្តល់អណ្តូងទឹកស្អាត​ស្រះទឹក​សហគមន៍​និងស៊ីទែនទឹក​បានចំនួន​រាប់ពាន់​ហើយបាន​និងកំពុងផ្តល់​ជូនប្រជាពលរដ្ឋ​ជាបន្តបន្ទាប់ទៀត៕

 

ប្រជាជនរងគ្រោះដោយអគ្គីភ័យទទួលអំណោយពីអនុសាខាកាកបាទក្រហមកម្ពុជាស្រុកជាំក្សាន្ត

សាខាកក្រកខេត្តព្រះវិហារ ៖ នៅរសៀលថ្ងៃទី១៥ ខែកុម្ភៈ ឆ្នាំ២០១៧ លោក ហែម ថុន ប្រធានគណៈកម្មាធិការអនុសាខាកាកបាទក្រហមកម្ពុជាស្រុកជាំក្សាន្ត បានចុះសួរសុខទុក្ខនិងនាំយកអំណោយមនុស្សធម៌ផ្តល់ជូនស្រ្តីម៉េម៉ាយឈ្មោះ ម៉ង វន អាយុ៥០ ឆ្នាំ រងគ្រោះដោយភ្លើងឆេះផ្ទះ កាលពីយប់ថ្ងៃទី១៤ ខែកុម្ភៈ ឆ្នាំ២០១៧ ចំនួន១គ្រួសារស្ថិតនៅភូមិធម្មជាតិ ឃុំស្រអែម ស្រុកជាំក្សាន្ត ខេត្តព្រះវិហារ។

 

នាឱកាសនោះដែរ លោកប្រធានគណៈកម្មាធិការអនុសាខាកាកបាទក្រហមកម្ពុជាស្រុកជាំក្សាន្ត បានពាំនាំមកនូវប្រសាសន៍ផ្តាំផ្ញើសួរសុខ ទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះគ្រួសាររងគ្រោះដោយអគ្គីភ័យ និងបានសម្តែងនូវការសោកស្តាយដល់គ្រួសាររងគ្រោះ ដែលមិននឹកស្មានដល់ធ្វើអោយបាត់បង់ផ្ទះ និងសម្ភារប្រើប្រាស់ផ្សេងៗជាច្រើន ហើយលោកក៏បានផ្តាំផ្ញើដល់ប្រជាពលរដ្ឋទាំងអស់ត្រូវប្រុងប្រយ័ត្នគ្រោះថ្នាក់ផ្សេងៗដែលកើតឡើងជាយថាហេតុ ។

 

សម្ភារផ្តល់ជូនរួមមាន៖អង្ករ ២០គីឡូក្រាម ត្រីខ១០កំប៉ុង មី១ កេស ទឹកស៊ីអ៊ីវ១ យួរ ទឹកបរិសុទ្ធ៣ កេស ខោអាវ ២ កញ្ចប់ ក្រមា១ សារុង១ មុង១ ភួយ១ កៅស៊ូតង់១ និងថវិកាចំនួន៤០,០០០រៀល។

កាកបាទក្រហមកម្ពុជាប្រគល់ថវិកាជូនអង្គការសង្រ្គោះជនអស់សង្ឃឹម

កក្រក​​៖ ​នារសៀលថ្ងៃទី១៥​ ខែកុម្ភៈ ​ឆ្នាំ២០១៧ ​លោកជំទាវ ​ពុំ​​ចន្ទីនី ​​អគ្គលេខាធិការ​ កាកបាទក្រហមកម្ពុជា​ បានអញ្ជើញជួបសំណេះសំណាល ​និងប្រគល់ថវិកា​មនុស្សធម៌​របស់​កាកបាទក្រហមកម្ពុជា​ ដែលមាន​ សម្ដេចកិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន​ ជាប្រធាន ​ជូនដល់ ​ប្រធានអង្គការ​សង្រ្គោះជនអស់​សង្ឃឹម ចំនួន​២០លានរៀល នៅទីស្នាក់ការកណ្ដាលកាកបាទក្រហមកម្ពុជា។

ប្រធានអង្គការ​សង្រ្គោះជនអស់សង្ឃឹម​ មានសេចក្ដីរីករាយ​សប្បាយចិត្ត​យ៉ាងខ្លាំង​ហើយ សូមថ្លែង​អំណរគុណ​ ដល់សម្ដេចកិត្តិព្រឹទ្ធបណ្ឌិត​ប៊ុន រ៉ានី​ហ៊ុនសែន​ប្រធានកាកបាទក្រហមកម្ពុជា​ដែលតែងតែ​ជួយឧបត្ថម​គិតគូសុខទុក្ខ​លំបាក​របស់ប្រជាពលរដ្ឋ​និងសូមជូនពរ​ដល់​សម្ដេចប្រធាន​ជួបតែសេចក្ដីសុខ​ទទួល​តែពុទ្ធពរ​ទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

សូមបញ្ជាក់ថា​៖​នេះជាលើកទី៧ហើយ​ដែលទីស្នាក់ការ​កណ្ដាល​កាកបាទក្រហមកម្ពុជា​បានឧបត្ថម្ភ​សម្រាប់​អង្គការ​សង្គ្រោះជនអស់​សង្ឃឹមផងដែរ៕

 

កាកបាទក្រហមកម្ពុជាប្រគល់ថវិកាជូនអង្គការគ្រួសារថ្មី

កក្រក ៖នារសៀល​ថ្ងៃទី​១៥​ខែកុម្ភៈ​ឆ្នាំ២០១៧​ នៅ​ទីស្នាក់ការ​កណ្ដាល​កាកបាទក្រហម​កម្ពុជា​ លោកជំទាវ ពុំ ចន្ទីនី​ អគ្គលេខាធិការ​កាកបាទក្រហមកម្ពុជា​បានអញ្ជើញ​ជួបសំណេះសំណាល​និង​ប្រគល់ថវិកា​ចំនួន២០លានរៀល​ជូនដល់​អគ្គនាយក​អង្គការ​គ្រួសារថ្មី​សម្រាប់​ឆ្នាំ ២០១៧។

 

បន្ទាប់ពីបាន​ទទួលនូវថវិកា​ អគ្គនាយក​អង្គការគ្រួសារថ្មី​មានសេចក្ដី​រំភើបក្រៃលែង​ និង​សូមថ្លែងអំណរគុណ​យ៉ាងជ្រាលជ្រៅ​ចំពោះ​លោកជំទាវអគ្គលេខាធិការ​និង​ថ្នាក់ដឹកនាំ​កាកបាទក្រហមកម្ពុជា​ជាពិសេស​សម្ដេចកិត្តិព្រឹទ្ធបណ្ឌិតប្រធាន​ដែលជានិច្ចកាល​តែងតែ​ជួយឧបត្ថម​គាំទ្រដល់​អង្គការគ្រួសារថ្មី​និងធ្វើឲ្យអង្គការ​គ្រួសារថ្មី​មានមូលនិធិ​ដើម្បីធ្វើ​សកម្មភាពផ្សេងៗ។


សូមបញ្ជាក់ថា ៖​នេះជាលើកទី៩​ហើយ ដែល​កាកបាទក្រហមកម្ពុជា​បានឧបត្ថម្ភ​ដល់​អង្គការគ្រួសារ​ថ្មីផងដែរ៕

First Prev 54 55 56 57 58 Next Last