អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

jQuery Carousel
ព័ត៌មានថ្មីៗ

ប្រជាជនរងគ្រោះដោយអគ្គិភ័យទទួលអំណោយពីសាខាកាកបាទក្រហមកម្ពុជារាជធានីភ្នំពេញ

សាខាកក្រករាជធានីភ្នំពេញ៖ នាព្រឹកថ្ងៃទី ១២ ខែ ធ្នូ ឆ្នាំ ២០១៧​នេះ ក្រុមការងារ​អនុសាខា​កាកបាទក្រហមកម្ពុជា​ ខណ្ឌសែនសុខ ដឹកនាំដោយ លោក ​សក់ ច័ន្ទកញ្ញារិទ្ធ ប្រធាន​គណៈកម្មាធិការ​អនុសាខា បានចុះសាកសួរ​សុខទុក្ខ និងនាំ​យកអំណោយ​មនុស្សធម៌ទៅផ្តល់​ជូនប្រជាពលរដ្ឋ​ដែលរងគ្រោះដោយសារអគ្គីភ័យឆេះ​ផ្ទះសម្បែង​អស់៥ខ្នងផ្ទះ ស្មើនឹង៥គ្រួសារ កាលពីរសៀល​ថ្ងៃទី ១១ ខែ ធ្នូ​ ឆ្នាំ ២០១៧ ស្ថិតនៅភូមិផ្សារ​ទឹកថ្លា សង្តាត់ទឹកថ្លា ។​

 

នាឱកាសនោះ លោកប្រធាន​គណៈកម្មាធិការ​អនុសាខា បានពាំនាំនូវ​ការចូលរួមសោកស្តាយ​ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហម​កម្ពុជា ជាមួយគ្រួសារ​រងគ្រោះ និងសូមឲ្យមេត្តាកាត់ចិត្ត កុំអស់សង្ឃឹម ឲ្យតែនៅមាន​ជីវិតរស់នៅ គឺបងប្អូនអាចប្រកប​របររកទទួលទាន ដើម្បីស្តារជីវភាពគ្រួសារ​ឡើងវិញ ។ ជាមួយគ្នានោះ​ លោកក៏សូមអំពាវនាវ​ក្រើនរំលឹកដល់​បងប្អូនប្រជាពលរដ្ឋ​ទាំងអស់សូមប្រុងប្រយត័្ន​ឲ្យបានខ្ពស់ក្នុងការបង្ការចំពោះគ្រោះអគ្គីភ័យនេះ ។

 

អំណោយមនុស្សធម៌ដែល​គ្រួសារនីមួយៗទទួលបានរួមមាន៖ ថវិកាចំនួន៦០មុឺនរៀល មី២កេស ទឹកបរិសុទ្ធ១កេស ទឹកក្រូច១កេស​ ​ទឹកដោះគោ១០កំប៉ុង ស្ករស១១កញ្ចប់ អំបិល១គីឡូក្រាម តែ១០កញ្ចប់ មុង១ ភួយ១ កន្ទេល១ ខ្នើយ១ តង់១ ។ ក្នុងនោះក្រុមការងាររបស់​ក្រសួងសុខាភិបាល បានចូលរួមជួយឧបត្ថម្ភនូវ ថវិកាចំនួន៤០ម៉ឺនរៀល និងគ្រឿងឧបភោគ​បរិភោគចំនួន៤មុខ ៕

 

ពិធីប្រគល់អណ្ដូងទឹកស្អាតជូនប្រជាជនស្រុកឆែបរបស់កាកបាទក្រហមកម្ពុជា

កក្រក ៖ នៅព្រឹកថ្ងៃទី១២ ខែធ្នូ ឆ្នាំ២០១៧ នេះ កាកបាទក្រហម​កម្ពុជា ដែលមាន​សម្ដេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានរៀបចំ​ពិធីប្រគល់​អណ្ដូងទឹកស្អាត​ចំនួន១៥ ឱ្យប្រើប្រាស់​ជាផ្លូវការ ជូន​ប្រជាពលរដ្ឋ​ចំនួន ៣៤៥ គ្រួសារ ស្មើនឹង ១,២៥៤ នាក់។ ពិធីនេះប្រព្រឹត្ត​ទៅនៅភូមិគុណភាព ​ឃុំឆែបពីរ ស្រុកឆែប ខេត្តព្រះវិហារ ដោយមានការ​ចូលរួម​ពីសំណាក់ ឯកឧត្ដមវេជ្ជ. អ៊ុយ សំអាត នាយក នាយកដ្ឋានគ្រប់គ្រង​គ្រោះមហន្តរាយ កាកបាទក្រហមកម្ពុជា និងមានការអញ្ជើញ​ចូលរួមពីលោក រ៉ាត់ សោភា អនុប្រធានគណៈកម្មាធិការ សាខាកាកបាទ​ក្រហមកម្ពុជា ខេត្តព្រះវិហារ មន្ត្រីសាខា-អនុសាខា យុវជន និងប្រជាពលរដ្ឋចំនួន ៨០ នាក់។

 

មានប្រសាសន៍នាឱកាសនោះ ឯកឧត្ដមវេជ្ជ. បានពាំនាំនូវប្រសាសន៍សួរសុខទុក្ខ និងសេចក្ដីនឹករលឹក ពីសំណាក់ សម្ដេចកិត្តិព្រឹទ្ធបណ្ឌិត ប្រធាន និងមានប្រសាសន៍ផ្ដាំផ្ញើ ដល់ប្រជាពលរដ្ឋ ដែលចូលរួមក្នុងពិធីនោះមាន៖ 
១, សូមថែរក្សាសុខភាពឱ្យបាន​ល្អប្រសើរ ជាពិសេសត្រូវពិសាទឹកឆ្អិនជាប្រចាំ
២, សូមចូលរួមថែរក្សាសមិទ្ធផលនេះឱ្យបានគង់វង្សយូអង្វែង
៣, ត្រូវមានការប្រុងប្រយ័ត្ន និងស្វែង​រកព័ត៌មានឱ្យបានគ្រប់គ្រាន់ មុននឹងធ្វើចំណាកស្រុក ជៀសវាងចាញ់បោកជនខិលខូច។ 
៤, ត្រូវជៀសឱ្យឆ្ងាយពីគ្រឿងញៀន គ្រឿងស្រវឹង ជាពិសេសការប្រើប្រាស់អំពើហិង្សាគ្រប់រូបភាព។

ប្រជាពលរដ្ឋដែលចូលរួមក្នុងឱកាសនោះ ស្ត្រីម្នាក់ៗទទួលបាន សារុង១ និងបុរសៗ ទទួលបាន ក្រមា១។ ក្រោយពីទទួល​បានសមិទ្ធផលនេះ ប្រជាពលរដ្ឋ​មានសេចក្ដីរំភើបក្រៃលែង និងបានសម្ដែង​នូវសេចក្ដីដឹងគុណ និងថ្លែងអំណរគុណ​ចំពោះសម្ដេចកិត្តិព្រឹទ្ធបណ្ឌិត ប្រធាន ដែលជានិច្ចកាល​តែងតែគិតគូរពីសុខទុក្ខប្រជាពលរដ្ឋដោយ​មិនប្រកាន់វណ្ណៈ ជាតិសាសន៍ ពណ៌សម្បុរ ឬនិន្នាការនយោបាយឡើយ។

សូមបញ្ជាក់ថា អណ្ដូងចំនួន១៤ ស្ថិតនៅក្នុង​ឃុំឆែបពីរ ស្រុកឆែប និងអណ្ដូង​ចំនួន១ ស្ថិតនៅឃុំរតនៈ ស្រុករវៀង ខេត្តព្រះវិហារ៕

 

 

កាកបាទក្រហមកម្ពុជាចុះជួយច្រូតកាត់ស្រូវប្រជាពលរដ្ឋដែលខ្វះខាតកម្លាំងពលកម្ម

កក្រក​ ៖​ ស្របពេលដែល ប្រជាកសិករ ខ្មែរ​កំពុងនាំគ្នា​ប្រមូលផល​ស្រូវ នៅព្រឹកថ្ងៃទី​ ១១​ ខែធ្នូ​ ឆ្នាំ២០១៧​ នេះ​ សម្តេច​កិត្តិ​ព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ស្ត្រីទី១​ នៃកម្ពុជា​ និងជាប្រធាន​កាកបាទក្រហមកម្ពុជា​​ រួមជាមួយថ្នាក់ដឹកនាំ-ភរិយាថ្នាក់ដឹកនាំ​ មន្ត្រីរាជការ​ យុវជន​ អ្នកស្ម័គ្រចិត្ត​ និងប្រជាពលរដ្ឋជាច្រើននាក់​ទៀត បាននាំគ្នា បានប្រមាណជាង​ ២ហិកតា​ ជូនប្រជាពលរដ្ឋ​ដែលខ្វះខាត​កម្លាំងពលកម្ម​ រស់នៅភូមិព្រៃខ្វាវ​ ឃុំត្រពាំងធំខាងជើង​ ស្រុកត្រាំកក់​ ខេត្តតាកែវ។

 

ជាមួយគ្នានោះ​ សម្តេចកិត្តិព្រឹទ្ធបណ្ឌិត​ និងគណៈប្រតិភូ​ បានចូលរួម​ជាមួយប្រជាពលរដ្ឋ ​ជួយបោកស្រូវ​ ដាល់អំបុក និងទស្សនា​សមិទ្ធផល​កសិផលនានា​ និងសិប្បកម្មដំដែក​​នៅក្នុងភូមិ​ ព្រមទាំងចុះសំណេះសំណាល​-សួរសុខទុក្ខ​ លោកយាយ​លោកតា​ ប្រជាពលរដ្ឋ​ដែលអញ្ជើញ​ចូលរួមទៀតផង៕

 

វគ្គបណ្ដុះបណ្ដាល ផ្ដល់សិទ្ធិអំណាចដល់យុវជន ក្នុងសហគមន៍

កក្រក ៖ នាព្រឹកថ្ងៃទី១១ ខែធ្នូ ឆ្នាំ២០១៧ នៅទីស្នាក់ការ​កណ្ដាល កាកបាទក្រហម​កម្ពុជា បានរៀប​ចំវគ្គបណ្ដុះបណ្ដាល​ ការផ្ដល់សិទ្ធិអំណាច​ដល់យុវជន ក្នុងសហគមន៍ Youth Empowerment in Community Action Program  ក្រោមប្រធានបទ​ " យុវជនចូលរួម​ចំណែកដើម្បី​សុវត្ថិភាព​សហគមន៍ ​និងបរិស្ថានស្អាត" ។ វគ្គបណ្ដុះបណ្ដាល​នេះ ប្រព្រឹត្តិទៅ ក្រោមអធិបតី​ភាព ឯកឧត្ដម យូ ឡាណា អគ្គលេខាធិការ​រងទី២ កាកបាទក្រហម​កម្ពុជា ដោយមាន​ការអញ្ជើញ​ចូលរួម​ពី មន្ត្រីបច្ចេកទេស មន្ទីរបរិស្ថាន​រាជធានីភ្នំពេញ មន្ត្រីទីស្នាក់ការកណ្ដាល និងយុវជន​កាកបាទក្រហម​កម្ពុជា ប្រចាំគ្រឹះស្ថាន​ឧត្តមសិក្សា ទាំង ២១ ក្នុងរាជធានីភ្នំពេញ សរុបចំនួន ១១០ នាក់។

 

វគ្គបណ្ដុះបណ្ដា​លនេះ នឹងប្រព្រឹត្ត​ទៅនៅថ្ងៃទី១១ ខែធ្នូ ឆ្នាំ២០១៧ ដែលនឹងផ្ដោត​សំខាន់ទៅ​លើចំណុច​សំខាន់ៗមួយចំនួន រួមមាន៖


១- ជំរុញយុវជន​ឱ្យមានភាពក្លាហាន​ក្នុងការនិយាយជាសាធារណៈ
២- របៀបនៃការ​ធ្វើការងារ​ក្នុងសហគមន៍
៣- ផលប្រយោជន៍​នៃបរិស្ថានស្អាត និងផល ប៉ះពាល់នៃ​ការបំពុលបរិស្ថាន
៤- ការផ្ដល់សិទ្ធិអំណាច​ដល់យុវជន​ក្នុងការអនុវត្តការងារ និង
៥- ការជំរុញឱ្យយុវជន និស្សិត និងប្រជាជនកម្ពុជា ចូលរួមថែរក្សា អនាម័យ បរិស្ថាន។

 

គួរបញ្ជាក់ផង​ដែរថា វគ្គនេះរៀបចំឡើងបាន បន្ទាប់ពីមន្រ្តី​កាកបាទក្រហមកម្ពុជា បាទទួលវគ្គ បណ្ដុះបណ្ដាល នៅទីក្រុង​ម៉ានីល ប្រទេស​ហ្វីលីពីន ដែលរៀបចំ គាំទ្រ និងសម្រប​សម្រួល ដោយមន្ដ្រី សហព័ន្ធអន្ដរជាតិ ប្រចាំនៅ​ទីក្រុងបាងកក៕ 

 

កាកបាទក្រហមកម្ពុជា អបអរយុទ្ធនាការ ១៦ថ្ងៃ ដើម្បីលុបបំបាត់អំពើហិង្សាលើស្ត្រី និងកុមារ

កក្រក៖ នាព្រឹកថ្ងៃទី ៩ ខែធ្នូ ឆ្នាំ២០១៧ ​កាកបាទក្រហម​កម្ពុជា ទទួលបាន​កិត្តិយសពី​ លោកជំទាវ ឃួន សុដារី អនុប្រធាន​កាកបាទក្រហមកម្ពុជា​និងជាតំណាង​ដ៏ខ្ពង់ខ្ពស់ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ​បានអញ្ជើញ​ជាអធិបតីភាព ​ក្នុងពិធីអបអរ​យុទ្ធនាការ ១៦ថ្ងៃ (២៥ វិច្ឆិកា ២០១៧ - ១០ ធ្នូ ២០១៧) ដើម្បីលុបបំបាត់​អំពើហិង្សា​លើស្ត្រី និងកុមារ ក្រោម​ប្រធានបទ “មិនទុកនរណា​ម្នាក់ចោល : បញ្ឈប់អំពើ​ហិង្សាលើស្ត្រី និងក្មេងស្រី”។ ក្នុងពិធីអបអរ​យុទ្ធនាការ ១៦ថ្ងៃនេះ​មានអ្នកចូលរួម​សរុបចំនួន ២១៦នាក់ មានតំណាង​ក្រសួងកិច្ចការ​នារី តំណាងសហព័ន្ធ​អន្តរជាតិ សាកលវិទ្យាធិការ និងយុវជន​កាកបាទក្រហមកម្ពុជា។

 

ក្នុងឱកាសដ៏ថ្លៃថ្លានេះ លោកជំទាវ​អនុប្រធាន បានមាន​ប្រសាសន៍ថា នេះជាលើក​ទី១ដែលកាកបាទក្រហម​កម្ពុជា បានសហការ​ជាមួយក្រសួង​កិច្ចការនារី រៀបចំ​យុទ្ធនាការនេះឡើង​ក្នុងគោលបំណង ​លើកកម្ពស់​សេចក្តីថ្លៃថ្នូរបស់​មនុស្សជាតិ លើកកម្ពស់​យេនឌ័រ លើកម្ពស់​វប្បធម៌អហិង្សា និងបំផុស​ឲ្យមានការចូលរួមពីយុវជន​ទាំងអស់ ដើម្បី​លុបបំបាត់​អំពើហិង្សាលើស្ត្រី និងកុមារ ព្រោះថាយុវជនជា​ភ្នាក់ងារក្នុងផ្លាស់ប្តូរ​ឥរិយាបថ​របស់សង្គមជាតិ ហើយយកចំណេះដឹង​ដែលកាកបាទក្រហម​កម្ពុជា បានចុះផ្សព្វផ្សាយ​ដល់យុវជនក្នុងយុទ្ធនាការ​ ១៦ថ្ងៃនេះ បន្តផ្សព្វផ្សាយ​ដល់មិត្តភក្តិ និងប្រជា​ពលរដ្ឋដែលនៅ​ជុំវិញខ្លួន ហើយដើម្បីលុប​បំបាត់វប្បធម៌​ហិង្សានេះបាន លុះត្រាតែចាប់ផ្តើម​ពីយើងទាំងអស់គ្នា។

ទីបញ្ចប់លោកជំទាវ​អនុប្រធាន បានថ្លែងអំណរគុណ ចំពោះការចូលរួម​របស់ ឯកឧត្តម លោកជំទាវ លោក លោកស្រី និងយុវជន​ទាំងអស់ដែលចំណាយ​ពេលវេលាដ៏មានតម្លៃ មកចូលរួម​ក្នុងពិធីអបអរយុទ្ធនាការ ១៦ថ្ងៃនេះ និងសូមជូនពរ ឲ្យមានសុខភាពល្អ សុភមង្គល និងសម្រេច​បានតាមបំណង​ប្រាថ្នា ព្រមទាំងពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

 

សូមបញ្ជាក់ ក្នុងកម្មវិធីបិទយុទ្ធនាការ ១៦ថ្ងៃ (បូពណ៌ស) ដើម្បីលុប​បំបាត់អំពើហិង្សាលើស្ត្រី និងកុមារ ក្រោមប្រធានបទ “មិនទុកនរណា​ម្នាក់ចោល : បញ្ឈប់អំពើហិង្សាលើស្ត្រី និងក្មេងស្រី” មានការ​សម្តែងឈុតអប់រំអំពីអំពើហិង្សា ក្នុងគ្រួសារ ដែលសម្តែង ដោយយុវជនកាកបាទក្រហមកម្ពុជា មកពីសាកលវិទ្យាល័យ ភូមិន្ទភ្នំពេញ និងសាកលវិទ្យាល័យ​ជាតិគ្រប់គ្រង ព្រមទាំងមានសំណួរ-ឆ្លើយអំពីយុទ្ធនាការ ១៦ថ្ងៃ និងបញ្ឈប់អំពើហិង្សាលើស្ត្រី និងកុមារ។

 

គ្រួសារមានជីវភាពខ្វះខាត ក្នុងស្រុករមាសហែកទទួលអំណោយពីសាខាកក្រកខេត្តស្វាយរៀង

សាខាកក្រកខេត្តស្វាយរៀង៖ ដើម្បីឆ្លើយតប ទៅនឹង តម្រូវការ  របស់ ប្រជាពលរដ្ឋ មានជីវភាព ខ្វះខាតជួបការលំបាក  នៅថ្ងៃសុក្រ ទី ៥ រោច ខែ មិគសិរ ឆ្នាំរកា នព្វស័ក ព.ស ២៥៦១ ត្រូវនឹង ថ្ងៃទី ០៨ ខែ ធ្នូ ឆ្នាំ ២០១៧ ក្រុមការងារ សាខាកាកបាទក្រហម កម្ពុជាខេត្តស្វាយរៀង  ដឹកនាំដោយ លោកជំទាវ ពៅ សុភាព ហេរញ្ញឹក គណៈកម្មា ធិការសាខា ព្រមទាំងក្រុម ប្រតិបត្តិសាខា មន្ត្រីអនុសាខា កាកបាទក្រហមកម្ពុជា ស្រុករមាសហែក  បាននាំយក​អំណោយ​មនុស្សធម៌ ចែក ជូន ចាស់ជរា ៥៣ គ្រួសារ កុមារកំព្រា ១០ គ្រួសារ ជនពិការ ៥ នាក់ និងគ្រួសារមាន​ជីវភាពខ្វះខាត ៥៩ គ្រួសារ សរុប ១២៧ គ្រួសារ មកពី ៤ ឃុំក្នុងស្រុករមាសហែក គឺឃុំ​អណ្តូងត្របែក ៣២ គ្រួសារ ត្រស់ ២៦ គ្រួសារ អំពិល ២៩ គ្រួសារ និងឃុំគគីរ ៤០ គ្រួសារ ។


ក្នុងឱកាសនោះលោកជំទាវ ពៅ សុភាព ហេរញ្ញឹកគណៈកម្មាធិការសាខា តំណាងឯកឧត្តម ម៉ែន វិបុល ប្រធានគណៈកម្មាធិការ​សាខា បានពាំនាំនូវការផ្តាំផ្ញើរ​ការសាកសួរសុខទុក្ខ​ពីសំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា ដល់ប្រជាពលរដ្ឋ​ទាំងអស់ដោយក្តីនឹករលឹក ហើយជានិច្ចជាកាល សម្តេច​តែងតែគិតគូពីសុខទុក្ខ​របស់បងប្អូនគ្រប់​ពេលវេលា ។

 

លោកជំទាវ ក៏សូមឲ្យបងប្អូនប្រជាពលរដ្ឋទាំងអស់​យកចិត្ត ទុកដាក់ពីសុខភាព រក្សាឲ្យបាន​នូវអនាម័យ​ទាំងការរស់នៅ និងការហូបចុក ដើម្បីចៀសវាង​ពីជម្ងឺដង្កាត់ផ្សេងៗមក​បៀតបៀន ព្រមទាំងសូមឲ្យ​បងប្អូនដែលរស់​នៅមូលដ្ឋានជាមួយគ្នា ត្រូវមានការ​សាមគ្គីគ្នា ចេះជួយទុក្ខធុរៈគ្នាទៅវិញ​ទៅមក និងចៀសវាងឲ្យឆ្ងាយ​ពីអំពើអសកម្មនានាដែលសង្គមជាតិ​ស្អប់ខ្ពើម ជៀសវាង​ឲ្យឆ្ងាយពីគ្រឿងញៀន ត្រូវគោរពច្បាប់​ចរាចរណ៍ ដើម្បីឲ្យភូមិ សង្កាត់យើងមាន​សុវត្ថិភាព និងរស់នៅប្រកប​ដោយភាពសុខដុមរមនា ។


ស្បៀង និងសម្ភារដែលបានចែកជូនទាំង ១២៧ គ្រួសារ ក្នុង ១ គ្រួសារទទួលបាន អង្ករ ៣០ គក្រ កន្ទេលបត់ ១ ត្រីខ ១០ កំប៉ុង ទឹកស៊ីអ៊ីវ ៦ ដប មី ១ កេសមុង ១ ភួយ ១ ក្រម៉ា ១ សារុង ១ ថវិកា ៤០,០០០ រៀល ។

អ្នករស់នៅជាមួយមេរោគអេដស៍នៅសាលាឃុំ អន្លង់វិលទទួលអំណោយពីសាខាកក្រកខេត្តបាត់ដំបង

កក្រក ៖ នាព្រឹក​ថ្ងៃពុធ ៣ រោច ខែ មិគសិរ ព.ស ២៥៦១ ត្រូវនឹង​ថ្ងៃទី ៦ ខែ ធ្នូ គ.ស ២០១៧ ​ឯកឧត្តម យូ ឡាណា ​អគ្គលេខាធិកា​រងទី២ កាកបាទក្រហម​កម្ពុជា និងមន្ត្រីសាខា​អនុសាខា បានអញ្ជើញជួបសំណេះសំណាល​សួរសុខទុក្ខ និង​នាំយកអំណោយ​មនុស្សធម៌ជូនបងប្អូន​អ្នករស់នៅជាមួយ​មេរោគអេដស៍ចំនួន៥គ្រួសារ​ (នៅសាលាឃុំ ​អន្លង់វិល ស្រុក សង្កែ ខេត្តបាត់ដំបង)។

 

មានប្រសាសន៍​នាឱកាសនោះ ឯកឧត្តម ​បានពាំនាំនូវការ​ផ្ដាំផ្ញើសួរសុខទុក្ខ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា និង​ជាឥស្សរជន​ឆ្នើមថ្នាក់ជាតិ​នៃវេទិការភាពជាអ្នកដឹកនាំ​ប្រចាំតំបន់​អាស៊ីប៉ាស៊ីហ្វិក ​ចំពោះការឆ្លើយតប​មេរោគអេដស៍-ជំងឺអេដស៍ នៅកម្ពុជា ដែលតែងតែយកចិត្តទុកដាក់​គិតគូរចំពោះ​ប្រជាពលរដ្ឋ​គ្រប់រូប មិនប្រកាន់វណ្ណៈ ពណ៌សម្បុរ ​ជំនឿសាសនា ឬនិន្នាការនយោបាយណា​មួយឡើយ។

 

ឯកឧត្តម ​បានបន្តថា ថ្វីត្បិត​តែអំណោយ​មនុស្សធម៌ដែល​បាននាំយកមកជូននាពេលនេះមានចំនួន​តិចតួចក្ដី តែនេះជាការជួយគ្នា​ក្នុងគ្រាលំបាក ហើយក៏ជាការបង្ហាញ​នូវការយកចិត្តទុកដាក់ចំពោះ​ប្រជាពលរដ្ឋ​គ្រប់រូបពីសំណាក់​ថ្នាក់ដឹកនាំ​ ពិសេសគឺកាកបាទក្រហម​កម្ពុជា ដូចដែលបានលើកឡើងថា “កាកបាទក្រហម​កម្ពុជាមានគ្រប់ទី​កន្លែង សម្រាប់គ្រប់ៗគ្នា” និង “ទីណាមាន​ទុក្ខលំបាក ទីនោះមានកាកបាទក្រហមកម្ពុជា” និងក្តីអាណិត អាសូរ ចំពោះបងប្អូនទាំងអស់ ដោយបានបញ្ជាក់ថា នេះគឺជាបញ្ហាមួយធ្វើឲ្យយើងទាំងអស់គ្នា រួមសហការគ្នាដោះស្រាយ ដើមី្បឈានទៅគ្រប់គ្រងឲ្យបាន នូវការឆ្លងរាលដាលនៃជំងឺអេដស៍។ ធ្វើការលើកទឹកចិត្តដល់​បងប្អូនទាំងអស់កុំឲ្យអស់ក្តីសង្ឃឹម ព្រោះជំងឺអេដស៍នាពេលបច្ចុប្បន្ន យើងមាន​ថ្នាំប្រឆាំង ហើយតែបងប្អូន​គោរពឲ្យបានទៅតាមវេជ្ជ​បញ្ជារបស់គ្រូពេទ្យ និងថែរក្សាសុខភាពខ្លួន​ឱ្យបានល្អ នោះយើងនឹង​អាចរស់រាន​ដូចពលរដ្ឋទូរទៅដែរ។

 

អំណោយដែល​បានផ្ដល់ជូន ១គ្រួសារទទួលបាន៖ - មុង១ - ភួយ១ - សារុង១ - ក្រមា១ - មី១កេស - ត្រីខ១យួ- អង្ករ៣០គីឡូក្រាម ទឹកសុទ្ធ១កេស និងថវិកា ៥ម៉ឺនរៀល។

 

សាខាកាកបាទក្រហមកម្ពុជា ខេត្តតាកែវសួរសុខទុក្ខកម្មកររោងចក្រដែលបានដួលសន្លប់ដោយសារពុលសំលៀកបំពាក់

សាខាកាកបាទក្រហម​កម្ពុជា ខេត្តតាកែវ ៖​ នៅព្រឹកថ្ងៃ ពុធ ៣ រោជ ខែមិគសិរ​ ឆ្នាំរកា​ ព.ស២៥៦១​ ត្រូវនឹងថ្ងៃទី​ ០៦ ខែធ្នូ ឆ្នាំ​ ២០១៧​ នេះ​ ឯកឧត្តម ឡាយ វណ្ណៈ ប្រធានកិត្តិយស​សាខា​កាកបាទក្រហម​កម្ពុជា ខេត្តតាកែវ ​រួមដំណើរដោយ​ លោកជំទាវ នូ សុវណ្ណនី ​ប្រធានគណៈកម្មាធិការ​សាខា​ បានអញ្ជើញ​សួរសុខទុក្ខបងប្អូន​កម្មកររោងចក្រ​ដែលបាន​ដួលសន្លប់ដោយសារ​ពុលសំលៀកបំពាក់​ខូវប៊យ ចំនួន​ ១៩០នាក់​ កាលពីព្រឹកថ្ងៃទី៦​ នេះ​ នៅរោងចក្រ ជេឌី ​តូក្យូស៊ីម៉ា ស្ថិតក្នុង​ឃុំពុធសរ ស្រុកបាទី ខេត្តតាកែវ​ ពេលនេះកំពុង​សម្រាកព្យាបាល​នៅក្នុង​មន្ទីរពេទ្យបង្អែក​ស្រុកបាទីចំនួន​ ១៦៧នាក់ និងនៅ​មណ្ឌលសុខភាព ​ពុធសរ ស្រុកបាទី ចំនួន​ ២៣នាក់។ 

 

នាឱកាសនោះ ឯកឧត្តម​ប្រធានកិត្តិយសសាខា​ បានពាំនាំការ​ផ្តាំផ្ញេីសួរសុខទុក្ខពី​សំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា ដល់បងប្អូន​កម្មករ ទាំងអស់គ្នា ដែលកំពុងសម្រាក​ព្យាបាល នាពេលនេះ​ និងជូនពរឆាប់​បានសះស្បើយ​ដូចដើមវិញ។

 

ជាមួយគ្នានោះ​ សាខាកាកបាទក្រហមកម្ពុជា​ ខេត្តតាកែវ​ បានឧបត្ថម្ភដល់​កម្មករ-កម្មការីរង​គ្រោះទាំង១៩០នាក់ ក្នុងម្នាក់ៗទទួលបាន ៖​ ទឹកដោះគោឆៅ ១ឡូ​ និងថវិកា ៥ម៉ឺនរៀល៕

 

កាកបាទក្រហមកម្ពុជា ទទួលជួបសវនាការ និងសម្តែងការគួរសមជាមួយ លោក ម៉ាវ៉ាន់ ជីឡានី

នៅព្រឹកថ្ងៃពុធ ៣រោច ខែមិគសិរ ឆ្នាំរកា ព.ស ២៥៦១ ត្រូវនឹង​ថ្ងៃទី ៦ ខែធ្នូ​ ឆ្នាំ២០១៧ នេះ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា បានទទួល​ជួបសវនាការ ​និងសម្តែង​ការគួរសមជាមួយ ​លោក ម៉ាវ៉ាន់ ជីឡានី (Mr. Marwan Jilani) ប្រធាន​ក្រុមគាំទ្រ​កម្រងប្រទេស​របស់​សហព័ន្ធអន្តរជាតិ​ប្រចាំទីក្រុងបាងកក​ ដែលពិធីនេះ​ប្រព្រឹត្តទៅនៅទីស្នាក់ការ​កណ្តាល កាកបាទក្រហម​កម្ពុជា។

 

ក្នុងឱកាសនោះ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានសម្ដែង​នូវក្ដីសោមនស្ស​រីករាយក្រៃលែងដែលបានជួប​សំណេះសំណាល​ជាមួយ លោក ម៉ាវ៉ាន់ ជីឡានី និងគណៈប្រតិភូ ​ព្រមទាំងបាន​ថ្លែងអំណរគុណដល់ សហព័ន្ធអន្តរជាតិ​នៃសមាគម​កាកបាទក្រហម ​អឌ្ឍចន្ទក្រហម ដែលជាដៃគូ​សហប្រតិបត្តិការមនុស្សធម៌ដ៏​រលូន តែងតែ​ជួយឧបត្ថម្ភគាំទ្រ​ទាំងថវិកា និងសម្របសម្រួល​ការងារបច្ចេកទេស​ ដល់កាកបាទក្រហមកម្ពុជា ចាប់តាំងពីឆ្នាំ ១៩៩១មក ដើម្បី​ឆ្លើយតបទៅនឹង​តម្រូវការរបស់​ជនរងគ្រោះ និងជនងាយរងគ្រោះបំផុត បានទាន់​ពេលវេលា​ និងមានប្រសិទ្ធភាព។ ជាមួយគ្នានេះ សម្តេច​កិត្តិព្រឹទ្ធបណ្ឌិត បានរៀបរាប់ពីរចនាសម្ព័ន្ធ​ការងារ​របស់កាកបាទក្រហម​កម្ពុជា ដែលមានចាប់​ពីថ្នាក់កណ្តាល សាខា អនុសាខា ក្រុម រហូតដល់យុវជន​ និងអ្នកស្ម័គ្រចិត្ត ដែលសុទ្ធសឹង​ជាប្រតិបត្តិករ​មនុស្សធម៌បំពេញ​ការងារទៅ​តាមវិស័យស្នូលទាំង ៤ និងគោលការណ៍​គ្រឹះទាំង ៧ របស់ចលនា។

 

ទន្ទឹមនឹងនេះ លោក ម៉ាវ៉ាន់ ជីឡានី បានថ្លែងអំណរគុណ​យ៉ាងជ្រាលជ្រៅចំពោះ សម្តេចកិត្តិព្រឹទ្ធ​បណ្ឌិតប្រធាកកាកបាទក្រហមកម្ពុជា ដែលបានអនុញ្ញាតឱ្យគណៈប្រតិភូចូលជួប​សម្តែងការ​គួរសម និងថ្លែងនូវការកោតសរសើរ​ចំពោះការរីកចម្រើនក្នុងការបំពេញបេសកកម្ម​កាកបាទក្រហមកម្ពុជា ក្រោមការដឹកនាំដ៏ឈ្លាសវៃរបស់ សម្តេចកិត្តិព្រឹទ្ធបណ្ឌិត​ប្រធាន ជាពិសេស ទទួលបាន​ការជឿទុកចិត្ត​ពីសំណាក់សប្បុរសជន និងភាពកក់ក្តៅពី​ប្រជាពលរដ្ឋ​គ្រប់មជ្ឈដ្ឋាន។ តាមរយៈនេះ ក្នុងនាមសហព័ន្ធ​អន្តរជាតិ នឹងនៅតែបន្តជួយឧបត្ថម្ភគាំទ្រដល់​កាកបាទក្រហមកម្ពុជា​គ្រប់កាលៈទេសៈ ហើយនិងបន្ត​ផ្សព្វផ្សាយ​ពីសមិទ្ធផលរបស់កាកបាទក្រហមកម្ពុជា ដែលសម្រេចក្នុងពេលកន្លងមក ជូនដល់សមាគមជាតិ​ដទៃទៀត ក៏ដូចពិភពលោកទាំងមូល៕

 

ប្រជាជនងាយរងគ្រោះ២គ្រួសារនៅខេត្តបាត់ដំបងទទួលអំណោយពីកាកបាទក្រហមកម្ពុជា

កក្រក​ ៖​ នៅព្រឹក ថ្ងៃអង្គារ៍ ​២ រោច ខែ មិគសិរ ព.ស ២៥៦១ ត្រូវនិង​ថ្ងៃទី​ ៥ ខែ ធ្នូ គ.ស ២០១៧​ កាកបាទក្រហមកម្ពុជា ​ដែលមាន សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ​បានផ្តល់គ្រឿង​ឧបភោគ​បរិភោគ និងថវិកាមួយ​ចំនួនដើម្បីជួយ​សម្រួលការ​លំបាក ដល់គ្រួសារ​ទីទល់ក្រដែល​មានអ្នកជម្ងឺក្នុងបន្ទុក ចំនួន​ ២ករណី​ គឺ​ ៖

១/ ករណីជនទីទ័លក្រទាំង​ ២នាក់​ ប្តី-ប្រពន្ធ​ (មានកូន​ ៣នាក់)​​ ដោយប្រពន្ធមានជំងឺដុំគីស ប្រចាំកាយ រស់នៅទីដាច់ស្រយាល​ក្នុងភូមិ ភ្ជាវ ឃុំត្រែង ស្រុករតនៈមណ្ឌល ខេត្តបាត់ដំបង។
២/​ កញ្ញា​ ឈាន នី អាយុ ១៧ ឆ្នាំ កំព្រាឪពុកមានជំងឺកូនកណ្តុរ​នៅបំពង់ក ធ្ងន់ធ្ងរ ដែលគ្មានលទ្ធភាពព្យាបាលនៅមន្ទីរពេទ្យ នៅសម្រាក​ព្យាបាលផ្ទះ ជាមួយយាយ​ជរាក្នុងភូមិ ​ឆាយរំពាត់​ ឃុំ កន្ទឺរ ២ ស្រុកបាណន់ ខេត្តបាត់ដំបង។

ក្នុងឱកាសនោះ ឯកឧត្ដម យូ ឡាណា អគ្គលេខាធិការ​រងទី ២ កាកបាទក្រហម​កម្ពុជា បានពាំនាំនូវ​ប្រសាសន៍​របស់ សម្តេចកិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ដែលផ្តាំផ្ញើ​នូវការសួរសុខទុក្ខ​ ក្តីអាណិតអាសូរ​ យ៉ាង​សោកសង្រេង​ និងផ្តាំផ្ញើប្រឹងប្រែង​ព្យាបាល និងពិសា​ចំណីអាហារ​តម ដើម្បីឆាប់​ជាសះស្បើយពីជំងឺ។

ក្រុមគ្រួសារទាំងពីរ ​បានសំដែងក្តីរំភើប​ និងដឹងគុណចំពោះ​ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ដែលដឹកនាំ​កាកបាទក្រហមកម្ពុជា ដោយយកចិត្តទុកដាក់​ គិតគូរពីសុខទុក្ខ ​ផ្តល់ក្តីមេត្តា​ ករុណា​ អាណិត​ ស្រឡាញ់​ ព្រមទាំងផ្តល់ក្តីសង្ឃឹម​ចំពោះប្រជាជន​ទូទៅជួបការ​លំបាកដោយ​គ្មានការរើសអើង​ មិនប្រកាន់វណ្ណៈ​ ពូជសាសន៍​ វណ្ណៈ​ ពណ៌សម្បុរ​ សាសនា​ ឬនិន្នាការនយោបាយ​អ្វីឡើយ៕

 

First Prev 3 4 5 6 7 Next Last