អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

កាកបាទក្រហមកម្ពុជាចូលរួម អបអរ សាទរ "ទិវា មនុស្ស ចាស់កម្ពុជា និងទិវា មនុស្សចាស់ អន្តរជាតិ

កក្រក​ ៖ ដើម្បីចូលរួម អបអរសាទរ​ "ទិវាមនុស្ស ចាស់កម្ពុជា និងទិវា មនុស្សចាស់​អន្តរជាតិ ១​ តុលា​"​ និងដើម្បី​ផ្តល់ឱកាស​ដល់មន្ត្រី-បុគ្គលិក​ជើងចាស់ និងអ្នក​បន្តវេន បាន​ជួបជុំគ្នា ចែករំលែក​បទពិសោធន៍​គ្នាទៅវិញទៅមក​ផងនោះ នៅព្រឹកថ្ងៃទី​ ៤​ ខែតុលា​ ឆ្នាំ២០១៧​ នេះ​ កាកបាទក្រហម​កម្ពុជា​ ដែលមាន​ សម្តេចព្រះមហាក្សត្រី​ នរោត្តម​ មុនិនាថ​ សីហនុ​ ព្រះវររាជ​មាតា​ជាតិខ្មែរ​ គង់ប្រថាប់ជា​ព្រះប្រធាន​កិត្តិយស​ និងសម្តេចកិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន​ បានរៀបចំ​ឱ្យមាន​ពិធី​ជួបជុំ និងសំណេះ​សំណាល​មួយជាមួយ​និវត្តជន និង​ក្រុមគ្រួសា​រមន្ត្រី-បុគ្គលិក​ដែល​បានទទួល​មរណភាព ចំនួន​ ៧៣នាក់ ដែលធ្លាប់​បម្រើការងារមនុស្សធម៌​ជាមួយ​កាកបាទក្រហម​កម្ពុជា នាពេលកន្លងមក ដោយមាន​ការអញ្ជើញ​ចូលរួម​ពី ថ្នាក់ដឹកនាំ-មន្ត្រី និង​យុវជន​កាកបាទក្រហម​កម្ពុជា​ នៅ​ភោជនីយដ្ឋាន​ឡឺប្រេស៊ីដង់​ រាជធានី​ភ្នំពេញ។

 

ទន្ទឹមនឹងប្រសាសន៍ផ្តាំ​ផ្ញើសួរសុខ​ទុក្ខនិងក្តី​នឹករលឹកពី​ សម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធានកាកបាទក្រហម​កម្ពុជា​ លោកជំទាវ​អគ្គលេខាធិការ បានអាននូវសារលិខិត​របស់សម្តេច​អគ្គមហាសេនាបតីតេជោ​ ហ៊ុន​ សែន​ នាករដ្ឋមន្ត្រីនៃព្រះរាជាណាចក្រ​កម្ពុជា​ ក្នុងឱកាស​ទិវាមនុស្ស​ចាស់កម្ពុជា​ និងទិវាមនុស្សចាស់អន្តរជាតិ​ លើកទី​ ១៩​​ ជូនចំពោះ​និវត្តជន​ និងមន្ត្រី-បុគ្គលិក​ទាំងអស់​ដែល​បានអញ្ជើញ​ចូលរួម។

 

ក្នុងពិធីសំណេះសំណាលនោះ និវត្តជន បានរំលឹកឡើងវិញ​នូវអនុស្សាវរីយ៍ដ៏សែនកំសត់ និងការពុះពារគ្រប់ឧបសគ្គតាមដងផ្លូវដ៏សែនលំបាក ដើរឆ្លងកាត់ចម្ការមីន កាត់វាល ចូលព្រៃ និងទីជនបទដាច់ស្រយ៉ាល ក្នុងប្រតិបត្តិការមនុស្សធម៌ធំៗកន្លងមក ដើម្បីនាំយកអំណោយជូនដល់ដៃជនរងគ្រោះ។

 

ជាមួយគ្នានោះ និវត្តជនបានថ្លែងថា ទោះបីពួកគាត់បាន ចូល​និវត្តរ៍ហើយក្តី តែពួកគាត់មានមោទនភាព ចំពោះវឌ្ឍនភាព និងសមិទ្ធផលធំធេងរបស់កាកបាទក្រហមកម្ពុជា ក្រោម​ការដឹកនាំប្រកបដោយគតិបណ្ឌិតនៃ សម្តេចកិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ដែលបានធ្វើឱ្យកាកបាទក្រហមកម្ពុជា មានការទទួលស្គាល់ទាំងថ្នាក់ជាតិ និងនៅលើឆាក​អន្តរជាតិ ហើយ​សម្តេច​កិត្តិព្រឹទ្ធបណ្ឌិត នៅតែនឹក​រលឹក ចងចាំមិនភ្លេចពីស្នាដៃជាច្រើនដែលមន្ត្រី-បុគ្គលិក​ជំនាន់​មុន បានកសាងឡើង ហើយបន្សល់ទុក ជា​មូលដ្ឋានគ្រឹះ នៃការបន្តអភិវឌ្ឍ ដល់អ្នកបន្តវេន ជាពិសេស ថែមទាំងគិតគូរពីសុខទុក្ខរបស់ពួកគាត់ គ្រប់​ពេលវេលា មិនភ្លេច​មួយគ្រាណាឡើយ។

 

យ៉ាងណាម៉ិញ ទិវាមនុស្សចាស់ឆ្នាំនេះ​ ប្រព្រឹត្តទៅ​ ក្រោមប្រធានបទ «សមាគម​មនុស្សចាស់ គឺជាយន្តការ​ដ៏សំខាន់ក្នុងការចូលរួមបង្កើនសេដ្ឋកិច្ច​ សង្គមកិច្ច​ វប្បធម៌​ គ្រួសារ​ និងសង្គមជាតិ» ដែលជាទិវាមួយ​សម្រាប់ រំលឹកគុណដល់មនុស្សចាស់នៅកម្ពុជា​ ក៏ដូចជា​មនុស្សចាស់​នៅទូទាំង​សាកលលោក​ដែរ ហើយ​ក៏មានគោលបំណង​លើកកម្ពស់​មនសិការ​ទទួលខុស​ត្រូវរបស់​ប្រជាពលរដ្ឋទូទាំង​ប្រទេស ជាពិសេស​ ក្នុងការចូលរួមកសាង​សង្គមជាតិ​មួយ ដែលមាន​ការយកចិត្តទុកដាក់​កាន់តែខ្ពស់ ចំពោះសុខុមាលភាព​របស់ប្រជាពលរដ្ឋ​គ្រប់វ័យ ពិសេស ចំពោះ​មនុស្សចាស់។

 

ជាចំណងដៃក្នុងឱកាសជួបជុំនេះ និវត្តជន និងក្រុមគ្រួសារអ្នកទទួលមរណភាពទាំង​ ៧៣នាក់ បានទទួលអំណោយមនុស្សធម៌ ក្នុងម្នាក់ៗ ថវិកា ២លានរៀល​ និងការពិសារអាហារសាមគ្គីមួយពេលទៀតផង៕

ពិធីចុះបឋមសិលាសាងសង់អនុសាខាកាកបាទក្រហមកម្ពុជាស្រុកពួក

សាខាកក្រកខេត្តសៀមរាប៖ នៅព្រឹកថ្ងៃទី ២៩ ខែកញ្ញា ឆ្នាំ២០១៧ លោកជំទាវ គួយ ណាលីន ឃឹមប៊ុនសុង អនុ​ប្រធាន​គណៈកម្មាធិការ​សាខា​កាកបាទក្រហម​កម្ពុជា​ ខេត្តសៀមរាប​ និងសហការី ​មាន​អញ្ជើញ​ចូលរួម​ពិធីក្រុងពាលី និងបញ្ចុះបឋម​សិលា សាងសង់​អគារទីស្នាក់ការ​អនុសាខា​កាកបាទក្រហម​កម្ពុជា ស្រុកពួក ដែលមាន​ទីតាំងស្ថិត​នៅភូមិ​ពួកថ្មី ឃុំពួក ស្រុកពួក ខេត្តសៀមរាប។ តាមប្លង់ ​អគារនេះ​មានក្រលាផ្ទៃ ១៣៦ម៉ែត្រការ៉េ ត្រូវសាងសង់​លើផ្ទៃដីទំហំ ២,០៣០ម៉ែត្រការ៉េ សាងសង់ឡើង​ដើម្បី​បម្រើ​ការងារមនុស្សធម៌ ដល់​ជនរងគ្រោះ និងងាយរង​គ្រោះ​នៅមូលដ្ឋាន។

 

សូមបញ្ជាក់ថា៖ នេះជាទីស្នាក់ការ​អនុសាខាទី១១ នៅក្នុងខេត្ត​សៀមរាប ហើយក៏ជា​ទីស្នាក់ការ​អនុសាខាទី១០ ដែល​សាងសង់​ដោយ គណៈកម្មាធិការ​សាខា​កាកបាទក្រហម​កម្ពុជា ខេត្តសៀមរាប អាណត្តិទី៤នេះ ។

សាខាកាកបាទក្រហមកម្ពុជាខេត្តកណ្តាលទទួលទេយ្យទានពីព្រះចៅអធិការវត្តចេតិយថ្មី

សាខាកក្រកខេត្តកណ្តាល៖ ព្រឹកថ្ងៃទី ២៨ ខែ កញ្ញា ឆ្នាំ​ ២០១៧នេះ ក្រុមការងារ​សាខា​កាកបាទក្រហម​កម្ពុជា ខេត្តកណ្តាល​ ដឹកនាំដោយ​ឯកឧត្តម ហាក់ ប៊ុនធឿន អនុប្រធាន​គណៈកម្មាធិការ​សាខា​ និងជាតំណាង​ឯកឧត្តម ជាវ តាយ ប្រធាន​គណៈកម្មាធិការ​សាខា បានអញ្ជើញ​ទៅទទួល​ទេយ្យទាន​សប្បុរសធម៌ពីព្រះតេជគុណ ភោគ ជ័យរិទ្ធិ ព្រះចៅអធិការ​វត្តចេតិយថ្មី ឃុំវិហារហ្លួង ស្រុកពញាឮ ។

 

ក្នុងឱកាសនោះ​ ព្រះអង្ដមាន​សង្ឃដីកាគាំទ្រ និងមានទឹក​ព្រះទ័យ​រីករាយ ក្នុងការចូលរួម​ចំណែកជាមួយសកម្មភាព​មនុស្សធម៌​របស់កាកបាទក្រហម​កម្ពុជា ។

 

ជាការឆ្លើយតប​ ឯកឧត្តម​អនុប្រធានគណៈកម្មាធិការ​សាខា បាន​មានប្រសាសន៍​ថ្លែងអំណរ​ចំពោះព្រះតេជគុណព្រះចៅ​អធិការវត្ត ដែលជានិច្ចកាល​នៅរៀងរាល់​ឆ្នាំព្រះអង្គ​តែងបានឧបត្ថម្ភ​អំណោយ​ដល់សាខា​ខេត្ត និងបានសន្យា​ចាត់ចែងប្រើ ប្រាស់នូវ​ទេយ្យទាន​ទាំងនេះ ដើម្បីជួយដល់​ជនរង​គ្រោះគ្រប់ប្រភេទ ឲ្យស្របតាមគោលការណ៍​គ្រឹះទាំង៧ប្រការ​របស់ចលនា​កាកបាទក្រហម ។

 

អំណោយមនុស្សធម៌ ដែលសាខាបានទទួលរួមមាន ៖ អង្ករ ២៥០ គីឡូក្រាម មី ១៦ កេស ទឹកដោះគោ ៤០ កំប៉ុង ស្ករស ១១ គីឡូក្រាម តែ ២០ កញ្ចប់ ទឹកសុទ្ធ ១០ កេស ទឹកក្រូច ១៦ កេស សម្ភារដំណេក ១១ សម្រាប់ និងថវិកាចំនួន ៤៥ ម៉ឺនរៀល ។ ក្នុងពេលជា​មួយគ្នានេះ​ដែរព្រះចៅ អធិការវត្ត ក៏បានចែកទេយ្យទាន​ដល់ចាស់​ជរាទីទ័លក្រគ្មានទីពឹង លោកគ្រូ​អ្នកគ្រូ ព្រមទាំង​សិស្សានុសិស្ស​សាលាបឋម​សិក្សាវត្តចេតិយថ្មី សរុបចំនួន ៥០ នាក់ផងដែរ ។

 

គ្រួសាររងគ្រោះដោយអគ្គីភ័យនៅខណ្ឌពោធិ៍សែនជ័យទទួលអំណោយពីកាកបាទក្រហមកម្ពុជា

កក្រក​ ៖​ នៅព្រឹកថ្ងៃទី ២៨​ ខែកញ្ញា ឆ្នាំ២០១៧ នេះ កាកបាទក្រហម កម្ពុជា  ដែលមាន សម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានឧបត្ថម្ភ អំណោយ មនុស្សធម៌ រួមមាន គ្រឿងឧបភោគ-បរិភោគ​ សម្ភារៈប្រើប្រាស់​ និងថវិកាមួយ ចំនួន​ ជូនបុរសពោះម៉ាយ ឈ្មោះ ម៉ម ហេង អាយុ ៤៨ឆ្នាំ ដែលជួបទុក្ខផ្ទួនៗគ្នា ដោយត្រូវ ភរិយា ទើបស្លាប់ ចោលបាន ៥ខែ ហើយ បានរងគ្រោះ ដោយ ភ្លើងឆេះផ្ទះ​ កាលពីយប់ថ្ងៃទី១៨ ខែកញ្ញា ឆ្នាំ២០១៧ កន្លងទៅ ស្ថិតនៅក្នុងភូមិកន្ទោកខាងជើង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។​ សព្វថ្ងៃនេះ​ លោក​ ម៉ម​ ហេង​ និងកូន ២នាក់ ក្នុងបន្ទុក​ (កូនស្រីពៅអាយុ​ ១៧ឆ្នាំ​ មានជំងឺបេះដូងចំហ) កំពុងស្នាក់ នៅបណ្តោះអាសន្នជាមួយប្អូន​ នៅរាជធានីភ្នំពេញ។

 

ក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហម​កម្ពុជា បានពាំនាំប្រសាសន៍របស់ សម្ដេចកិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានផ្ដាំផ្ញើសួរសុខទុក្ខ ការអាណិតអាសូរ និងការសោកស្តាយចំពោះ លោក ម៉ម ហេង ដែលកំពុង​ជួបទុក្ខផ្ទួនៗគ្នានេះ។ ជាមួយគ្នានេះ លោកជំទាវអគ្គលេខាធិការរងទី១ បានលើកទឹកចិត្ត​ដល់លោក ម៉ម ហេង សូមកុំបាក់​ទឹកចិត្ត និងត្រូវខិត​ខំប្រកប​របរបន្តទៀតដើម្បីស្តារ​ជីវភាពគ្រួសារ និងផ្តល់ភាព​កក់ក្តៅដល់​កូនៗបន្តទៀត​ ព្រោះអំណោយ​មនុស្សធម៌ពេលនេះ​ អាចជួយផ្តល់​ជម្រកថ្មីសមរម្យដែរ។

 

លោក ម៉ម ហេង បានសម្តែង​នូវការដឹងគុណ​ចំពោះ កាកបាទក្រហម​កម្ពុជា ក្រោមការ​ដឹកនាំរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាល​គិតគូរ មានក្តីមេត្តា ករុណា ផ្តល់ភាពកក់ក្តៅ និងលើកទឹកចិត្តដល់​ប្រជាជន​រងគ្រោះជួ​បការលំបាក ដោយគ្មាន​ការរើសអើង មិនប្រកាន់វណ្ណៈ ពូជសាសន៍ ព័ណ៌សម្បុរ ឬនិន្នាការនយោបាយអ្វីឡើយ។

 

សូមបញ្ជាក់ថា​ អនុសាខាកាកបាទក្រហម​កម្ពុជា​ ខណ្ឌពោធិ៍សែនជ័យ​ ក៏បានចុះសួរសុខ​ទុក្ខដល់ផ្ទះរងគ្រោះ​ និងបាន​ឧបត្ថម្ភគ្រឿង​ឧបភោគ-បរិភោគ​ ថវិកាមួយចំនួនរួចហើយដែរ៕

កាកបាទក្រហមកម្ពុជាផ្តល់ថវិកាសម្រាប់ខួងអណ្តូងទឹកស្អាតនៅស្រុកថាឡាបរិវ៉ាត់ និង ស្រុកកូនមុំ

កក្រក ៖ នៅថ្ងៃទី ២៦​ ខែកញ្ញា​ ឆ្នាំ២០១៧ នេះ សម្តេច​កិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា បានសម្រេច​ផ្តល់ថវិកា​ចំនួន ៣៣.៤៦៨ដុល្លារ (បីម៉ឺន​បីពាន់​បួនរយ​ហុកសិប​ប្រាំបីដុល្លារអាមេរិក)​ ដើម្បីខួងអណ្តូង​ទឹកស្អាត ចំនួន ៧​ ជូនប្រជាពលរដ្ឋ​ខ្វះខាតទឹក​ប្រើប្រាស់​ចំនួន ១៣៥គ្រួសារ ស្មើនឹង​មនុស្ស​ ៦២៣នាក់ រស់នៅ​ភូមិចំនួន២ ឃុំអន្លង់ជ្រៃ ក្នុងស្រុក​ថាឡាប​រិវ៉ាត់​ ខេត្តស្ទឹងត្រែង​ និងអណ្តូង​ទឹកស្អាតចំនួន​ ៥ទៀត​ ជូនប្រជាពលរដ្ឋចំនួន​ ១២៧គ្រួសារ​ ស្មើមនុស្ស​ ៦៣៣នាក់​ រស់នៅភូមិចំនួន​ ៤​ ឃុំចំនួន​ ៣​ នៃស្រុកកូនមុំ​ ខេត្តរតនគិរី។

 

សូមបញ្ជាក់ថា​ ក្នុងឆ្នាំ២០១៧​ នេះ​ ​ កាកបាទក្រហមកម្ពុជា​បានផ្តល់អណ្តូងចំនួន​ ២៥៥​ និងស្រះទឹកចំនួន​ ៤​ រួចមកហើយ​ សម្រាប់​ប្រជាពលរដ្ឋ​ខ្វះខាត​ទឹកស្អាត​ប្រើប្រាស់​ នៅទូទាំង​ប្រទេសកម្ពុជា៕

 

ប្រជាពលរដ្ឋ ទីទ័លក្រ ចាស់ជរា ទទួលអំណោយពីសាខាកក្រកខេត្តបាត់ដំបង

សាខាកក្រកខេត្តបាត់ដំបង៖ នៅព្រឹកថ្ងៃទី ២៦ខែកញ្ញា ឆ្នាំ២០១៧ លោកជំទាវ ឈួន ទូច ប៊ុតគឹមស៊ាន អនុប្រធាន​កិត្តិយស​សាខាកាកបាទក្រហម​កម្ពុជា ខេត្តបាត់ដំបង និងសហការី ព្រមទាំង​សប្បុរសជន អញ្ចើញមកពីសហរដ្ឋ អាមេរិច បានអញ្ជើញ​ជួបសំណេះ​សំណាល​សួរសុខទុក្ខ ​និងនាំយក​អំណោយ​មនុស្សធម៌ ជូនដល់ ប្រជាពលរដ្ឋ​ ទីទ័លក្រ ចាស់ជរា ក្នុងឃុំចំនួន២ គឺឃុំឈើទាល ១០ គ្រួសារ ឃុំតាគ្រាម ចំនួន១០ គ្រួសារ ស្រុកបាណន់ ខេត្តបាត់ដំបង ។

 

មានប្រសាសន៍នាឱកាសនោះ ​លោកជំទាវ បានពាំនាំ​នូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា ដែលតែងតែ​យកចិត្តទុកដាក់​គិតគូ​ចំពោះប្រជាពលរដ្ឋ​គ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយ​ណាមួយឡើយ។ លោកជំទាវ បានថ្លែង​អំណរគុណ​យ៉ាង​ជ្រាវជ្រៅចំពោះ សប្បុរសធម៌​មកពី​សហរដ្ឋអាមេរិក ដែលបាន​រួមចំណែកក្នុងការឧបត្ថម្ភ​តាមរយៈ សាខាខេត្តនិងបានដែលលះបង់ពេលវេលា ចូលរួមជា​មួយក្រុមការងារ​នាពេលនេះ ។

 

អំណោយមនុស្សធម៌​ដែលបានផ្ដល់ជូនមាន៖ អង្ករ៣០គឺឡូក្រាម មី១កេស ទឹកសុទ្ឌវីឃែ ១កេស សារុង១ ក្រមា១ ថវិកា២ម៉ឺនរៀល ក្នុង ឱកាសនោះផងដែលលោកជំទាវ និងសប្បុរសជនបានប្រគេន ទឹកសុទ្ធនិងបច្ច័យមួយចំនួយដល់ ព្រះសង្ឃ ក្នុងវត្តចំនួន២ គឺវត្តឈើទាល និងវត្តភ្នំខ្ពស់ និងបានឧបត្តម្ភថវិការមួយចំនួនដល់ប្រជាពលរដ្ឋ កុមារា កុមារីដែលបានចូលរួមផងដែរ 

 

សាខាកាកបាទក្រហមកម្ពុជាខេត្តព្រៃវែងចូលរួមមរណៈទុក្ខគ្រួសាររងគ្រោះដោយគ្រោះថ្នាក់ចរាចរណ៍

សាខាកក្រកខេត្តព្រៃវែង៖ នៅរសៀល​ថ្ងៃទី២៦ ខែកញ្ញា ឆ្នាំ២០១៧ សាខា​កាកបាទក្រហម​កម្ពុជា​ ខេត្តព្រៃវែង​ ដឹកនាំដោយ ឯកឧត្តម​ឧកញ៉ា សុខ ផេង អនុប្រធាន​អចិន្រ្តៃយ៍​គណៈកម្មាធិការ​សាខា​ និងសហការី ​បាននាំយក​អំណោយ​មនុស្សធម៌ ​ចូលរួម​រំលែក មរណៈទុក្ខចំពោះ​គ្រួសារ លោក មាស ពៅ មាន​ទីលំនៅ​បច្ចុប្បន្ន​នៅភូមិប្រាសាទ ឃុំប្រាសាទ ស្រុក​កំពង់ត្របែក​ ខេត្តព្រៃវែង ដែលគ្រួសារ​របស់​លោកបានជួបគ្រោះថ្នាក់​ចរាចរណ៍​កាលពីថ្ងៃទី ២០ ខែកញ្ញា ឆ្នាំ២០១៧ បណ្តាល​អោយ ភរិយា កូន កូនប្រសារ និងចៅ សរុប​មានចំនួន ៤នាក់ បានស្លាប់ ព្រមទាំងកូនចំនួន ២នាក់ ទៀត រងរបួសស្រាល ១នាក់ និងធ្ងន់ ១នាក់ កំពុង​សម្រាក​ព្យាបាល នៅមន្ទីរពេទ្យ​មិត្តភាពខ្មែរ សូវៀត។

 

អំណោយ​ដែល​បានប្រគល់​ជូនរួមមាន៖ អង្ករ ៥០គក មី ២កេស ត្រីខ ២យួរ​ទឹកក្រូច ​២កេស ទឹកសុទ្ធ ២កេស និងថវិកា ចំនួន ១,៦០០,០០០រៀល។

 

កាកបាទក្រហមកម្ពុជាជួបប្រជុំជាមួយ គណៈប្រតិភូកាកបាទក្រហមហ្វាំងឡង់

កក្រក ៖ នៅទីស្នាក់ការ​កណ្តាល​កាកបាទក្រហម​កម្ពុជា​ នាព្រឹកថ្ងៃទី ២៦​ ខែកញ្ញា ឆ្នាំ២០១៧​ នេះ លោកជំទាវ ពុំ ចន្ទីនី អគ្គលេខាធិការ​ កាកបាទក្រហម​កម្ពុជា បានទទួល​ជួបប្រជុំ​ជាមួយ ​គណៈប្រតិភូ​កាកបាទក្រហម​ហ្វាំងឡង់​ ដែលដឹកនាំ​ដោយ លោក​ Toni Jokinen ប្រធាន​កម្មវិធី​អន្តរជាតិ​នៃកាកបាទក្រហម​ហ្វាំងឡង់​ ។ គោលបំណង​របស់ គណៈប្រតិភូ ​គឺដើម្បី​ពិនិត្យ​ការអភិវឌ្ឍន៍​គម្រោង​ពាក់កណ្តាល​អណត្តិ និងទិសដៅបន្ត ។ គណៈប្រតិភូនឹង​ចុះពិនិត្យ​គម្រាង គ្រប់គ្រង​គ្រោះមហន្តរាយ​នៅខេត្ត​កំពង់ចាម និង គម្រោង​សុខភាព នៅខេត្ត​ត្បូងឃ្មុំ។ 

បុរសពិការភ្នែកទាំងសងខាង ទទួលអំណោយពីសាខាកាកបាទក្រហមកម្ពុជាខេត្តសៀមរាប

សាខាកក្រកខេត្តសៀមរាប៖ នៅព្រឹកថ្ងៃទី ២៥ ខែកញ្ញា ឆ្នាំ២០១៧ លោកជំទាវ គួយ ណាលីន អនុប្រធាន​គណៈកម្មាធិការ​សាខា​កាកបាទកម្ពុជា ខេត្តសៀមរាប និងសហការី បានអញ្ជើញ​ជួបសំណេះ​សំណាល​សួរសុខទុក្ខ និងនាំយក​អំណោយ​មនុស្សធម៌ ជូនដល់​លោក ឃឹម នភាល័យ អាយ ៣៩ឆ្នាំ ពិការភ្នែកទាំង​សងខាង (ដោយសារជំងឺកញ្ជ្រឹល​តាំងពីអាយុ៧ឆ្នាំ មានស្រុកកំណើត នៅខេត្តកំពង់ចាម) បច្ចុប្បន្នស្នាក់​នៅបន្ទប់ជួល នៅភូមិកសិកម្ម សង្កាត់ស្រង៉ែ ក្រុងសៀមរាប។ មានមុខរបរ​ជាអ្នកចម្រៀង​តាម ហាង នៅក្នុង​ក្រុងសៀមរាប ដើម្បីទ្រទ្រង់​ជីវភាពប្រចាំថ្ងៃ។

 

មានប្រសាសន៍នា​ឱកាសនោះ លោកជំទាវ​ បានពាំនាំ​នូវការ​ផ្ដាំផ្ញើ​សួរសុខទុក្ខ​ពីសំណាក់​សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែ​យកចិត្តទុកដាក់​គិតគូចំពោះ​ប្រជាពលរដ្ឋ​គ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការ​នយោបាយ​ណា​មួយឡើយ។ លោកជំទាវ ក៏បាន​បន្តថា ថ្វីត្បិត​តែអំណោយ​មនុស្សធម៌​ដែលបាននាំ​យកមកផ្ដល់​ជូននាពេល​នេះមានចំនួន​តិចតួចក្ដី តែនេះជាការ​ជួយគ្នា​ក្នុងគ្រា​លំបាក ហើយក៏ជា​ការបង្ហាញនូវ​ការយកចិត្ត​ទុកដាក់​ចំពោះ​ប្រជាពលរដ្ឋគ្រប់រូបពី​សំណាក់​ថ្នាក់ដឹកនាំ​ ពិសេសគឺ​កាកបាទក្រហម​កម្ពុជា ដូចដែល​បានលើក​ឡើងថា “កាកបាទក្រហមកម្ពុជា​មានគ្រប់ទី​កន្លែង សម្រាប់គ្រប់ៗគ្នា” និង “ទីណាមាន​ទុក្ខលំបាក ទីនោះមានកាកបាទក្រហមកម្ពុជា” ។

 

អំណោយ​មនុស្សធម៌​ដែលបាន​ផ្ដល់ជូនមាន៖ អង្ករ៥០គឺឡូក្រាម មី១កេស ត្រីខ២យួរ ទឹកត្រី១យួរ ទឹកស៊ីអ៊ី១យួរ និងថវិកា ៦២ម៉ឺនរៀលផងដែរ (ក្នុងនោះ -ថវិកាសាខា ៤០ម៉ឺនរៀល -លោក សូរ ប្លាតុង ប្រធាគណៈកម្មាធិការ​អនុសាខា​កាកបាទក្រហកម្ពុជា ក្រុងសៀមរាប ថវិកា ១០ម៉ឺនរៀល -លោកស្រី ធីវ រួន ប្រធាន​ក្រុម​កាកបាទក្រហម​កម្ពុជា ឃុំស្រង៉ែ ថវិកា ១២ម៉ឺនរៀល)

កិច្ចប្រជុំប្រចាំឆ្នាំ ថ្នាក់ដឹកនាំកាកបាទក្រហម-អឌ្ឍចន្ទក្រហម អាស៊ី-អាគ្នេយ៍ លើកទី១៤ នៅប្រទេសវៀតណាម

គណៈប្រតិភូ​កាកបាទក្រហម​កម្ពុជា​ដឹកនាំ​ដោយ​លោកជំទាវ​ ពុំ ចន្ទីនី អគ្គ​លេខា​ធិការ កាកបាទក្រហម​កម្ពុជាបាន​ចូលរួម​កិច្ចប្រជុំ​ប្រចាំឆ្នាំ ថ្នាក់ដឹកនាំ​កាកបាទក្រហម-អឌ្ឍចន្ទក្រហម អាស៊ី-អាគ្នេយ៍ លើកទី១៤ រយៈពេល​​២ថ្ងៃ ចាប់ពីថ្ងៃទី ២១​-២២​ ខែកញ្ញា ឆ្នាំ ២០១៧ នៅទីក្រុង​ហាណូយ ប្រទេសវៀតណាម ។

 

គោលបំណង​នៃកិច្ចប្រជុំ​នេះគឺ​ពិនិត្យ​ឡើងវិញ នូវការ​អនុវត្ត លទ្ធផល​កិច្ចប្រជុំ ប្រចាំឆ្នាំ លើកទី ១៣ ដែលបានប្រារព្ធ​នៅទីក្រុង​ហ្សាកាតា ប្រទេស​ឥណ្ឌូណេស៊ី និង​យុទ្ធសាស្រ្ត កាកបាទក្រហម-អឌ្ឍចន្ទក្រហម អាស៊ាន និង ចុះកិច្ចព្រមព្រៀងសហប្រតិបត្តិការ រវាងកាកបាទក្រហម​កម្ពុជា វៀតណាម និងឡាវ ផងដែរ ។​

First Prev 46 47 48 49 50 Next Last