អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

ទស្សនកិច្ចសិក្សារបស់គណៈប្រតិភូសាខាកាកបាទក្រហមកម្ពុជា ខេត្តត្បូងឃ្មុំនៅខេត្តសៀមរាប

សាខាកក្រក​ខេត្តសៀមរាប​៖ នារសៀល​ថ្ងៃទី​ ២២​ ខែមិថុនា​ ឆ្នាំ២០១៧ ​នៅ​វិទ្យាល័យ ​១០ មករា ​១៩៧៩ ​លោក ស៊ុំ សំអន​ នាយក​សាខា​កាកបាទក្រហម​កម្ពុជា​ ខេត្ត​សៀមរាប​ បាន​ទទួល​ស្វាគមន៍​ដំណើរ​ទស្សនកិច្ច​សិក្សា​របស់គណៈ​ប្រតិភូ​សាខា​កាកបាទក្រហម​កម្ពុជា ​ខេត្តត្បូងឃ្មុំ ​ដែលដឹកនាំ​ដោយ លោក ផៃ ផាន់ណា ប្រធាន​ការិយាល័យ​អភិវឌ្ឍសាខា​ខេត្តត្បូងឃ្មុំ ​អមដំណើរ​ដោយ មន្ត្រីសាខា​ ទីប្រឹក្សា និង​យុវជនកាកបាទក្រហម​កម្ពុជា​ ខេត្តត្បូងឃ្មុំ សរុប ២៨នាក់។

 

ដំណើរ​ទស្សនកិច្ចសិក្សា​នេះធ្វើឡើង​ក្នុងគោលបំណង៖ - ផ្លាស់ប្តូរ​បទពិសោធន៍​រវាងសាខា​កាកបាទក្រហកម្ពុជា​ ខេត្តសៀមរាប និងខេត្តត្បូងឃ្មុំ ​លើការងារ​គ្រប់គ្រង​ក្លឹបយុវជន​កាកបាទក្រហម​កម្ពុជា ​និងសកម្មភាព​នានា​របស់ក្លឹប។ - ចែករំលែក​បទពិសោធន៍​ និងពង្រីក​ចំណេះដឹង​លើការងារ​គ្រប់គ្រង​សាលារៀន វិន័យ​សាលា និងការអនុវត្ត​អនាម័យ​បរិស្ថាន​នៅក្នុង​សាលារៀន។

 

គ្រួសារស្ត្រីទីទ័លក្រ សម្រាលកូន និងខ្វះស្បៀងអាហារទទួលអំណោយពីសាខាកក្រកខេត្តកំពត

សាខាកក្រកខេត្តកំពត ៖ នៅ​ព្រឹកថ្ងៃ​ទី​២២​ ខែមិថុនា​ ឆ្នាំ២០១៧​ សាខា​កាកបាទក្រហម​កម្ពុជា​ ខេត្តកំពត​ ដឹកនាំ​ដោយ​លោកស្រី​ឡាយ សុភ័ក្រ្ត នាយិការង​សាខា ​និង​សហការី​ បាន​ចុះសួរ​សុខទក្ខ​ និង​នាំយកអំណោយ​មនុស្សធម៌​កាកបាទក្រហម​កម្ពុជា​ ផ្តល់ជូន​គ្រួសារ​ស្ត្រី​ទីទ័លក្រ សម្រាលកូន​ និងខ្វះស្បៀងអាហារ​សរុបចំនួន ៣គ្រួសារ ស្ថិតនៅ២ភូមិ ២ឃុំ ស្រុកទឹកឈូ ខេត្តកំពត។

 

នាឱកាសនោះ​ លោកស្រី​ បានពាំនាំ​មកនូវ​ប្រសាសន៍​ផ្តាំផ្ញើសួរ​សុខទុក្ខពី​សំណាក់​សម្តេច​កិត្តិព្រឹទ្ធ​បណ្ឌិត​ប៊ុន រ៉ានី ហ៊ុន សែន ប្រធាន​កាកបាទក្រហម​កម្ពុជា​ ដែលជានិច្ចកាល​សម្តេច​តែងតែ​គិតគូរ​ពីសុខទុក្ខ​ប្រជាពលរដ្ឋ ដែលមាន​ការលំបាក​ទីទ័ល​ក្រ មានជំងឺ ​និងជនងាយ​រងគ្រោះ​គ្រប់ប្រភេទ​ដោយមិន​ប្រកាន់​រើសអើង​វណ្ណៈ ជាតិសាសន៍​ ពណ៌សម្បុរ​ ឬនិន្នាការ​នយោបាយ​អ្វីឡើយ​ និងសូមឱ្យ​បងប្អូន​ប្រជាពលរដ្ឋ​ទាំងអស់ខិតខំ​ថែរក្សា​សុខភាព​ឱ្យបានល្អ​ រស់នៅប្រកប​ដោយអនាម័យ​ និងយកកូន​ទៅចាក់ថ្នាំ​ការពារឱ្យ​បានទៀងទាត់តាម​ការណាត់​ជួបរបស់​គ្រូពេទ្យ។

 

អំណោយ​ផ្តល់​ជូនរួមមាន ៖ អង្ករ ៣០គីឡូក្រាម​ ត្រីខ១០កំប៉ុង​ ទឹកបរិសុទ្ធ ​២កេស មី ១កេស ក្រមា១ សារុង១ មុង១ ភួយ១ និងថវិកាមួយចំនួន។ ដោយឡែក​គ្រួសារ​សម្រាល​កូនឧបត្ថម្ភ​បន្ថែម​ទឹកដោះ​គោឆៅ១ឡូ​ និងឃីត​ទារក១ឈុតផងដែរ៕

 

ប្រធានផ្នែកសហប្រតិបត្តិការ កាកបាទ ក្រហម អន្តរជាតិ ចុះពិនិត្យ កម្មវិធីសុវត្ថិភាពសហគមន៍

សាខាកក្រកខេត្តព្រះវិហារ៖​នៅថ្ងៃ​២១​ខែ មិថុនា​ ឆ្នាំ២០១៧​ នេះ​នៅ​សាខា​កាកបាទក្រហម​កម្ពុជា​ ខេត្តព្រះវិហារ​ លោក ជំទាវ ចឹក ហេង ប្រធាន​គណៈកម្មាធិការ​សាខា ​ខេត្ត​ព្រះវិហារ​ បានជួប​សម្តែង​ការសម ជាមួយ​ លោក អាយ ក្រាត ប្រធានផ្នែក​សហប្រតិបត្តិការ​កាកបាទ ក្រហម​អន្តរជាតិ​ប្រចាំបាងកក​ និងក្រុមការងារ​កម្មវិធី​សុវត្ថិភាព​សហគមន៍​ទីស្នាក់ការ​កណ្តាល​កាកបាទក្រហម​កម្ពុជា ។ បន្ទាប់ពី​បានសម្តែង​ការគួរសមរួចក្រុម​ការងារបាន​បន្តដំណើរ​ចុះពិនិត្យ​ការផ្សព្វ ផ្សាយ​ពីគ្រាប់មីន ​ប្រាក់កម្ចី​ និងស្រាវជ្រាវ​រកគ្រួសារ នៅ​ភូមិ​ឈើទាលគង ​និងភូមិ​អានសេះ ​ឃុំជាំក្សាន្ត​ ស្រុក​ជាំក្សាន្ត ​ខេត្ត​ព្រះវិហារ។

កិច្ចប្រជុំស្តីពីការលើកកម្ពស់ការយល់ដឹងពីការងារព័ត៌មាន និងការងាររបាយការណ៍នៅខេត្តកណ្តាល

សាខា កក្រក ខេត្តកណ្តាល ៖​នៅរសៀល​ថ្ងៃទី​ ២១​ ខែ​ មិថុនា​ ឆ្នាំ២០១៧​ សាខា​កាកបាទក្រហម​កម្ពុជា​ខេត្ត កណ្តាល​ បានរៀបចំ​ពីធិបិទ​កិច្ចប្រជុំ ​ស្តីពី​ការលើកកម្ពស់​ការយល់ដឹង​ពីការងារ​ព័ត៌មាន​ និងការងារ​របាយការណ៍​ នៅសាលប្រជុំ​ទីស្នាក់ការ​សាខា​ ។ ពិធីនេះ​បានប្រព្រឹត្ត​ទៅក្រោម​អធិបតីភាព​ឯកឧត្តម​ ជាវ តាយ​ ប្រធាន​គណៈកម្មាធិការ​សាខា ​និងដោយមាន​ការអញ្ជើញ​ចូលរួម​ជាកិត្តិយស​ពីសមាជិក​គណ:កម្មាធិការ​សាខា​ ក្រុមប្រតិបត្តិ​សាខា​ មន្រ្តីអនុសាខា​កាកបាទក្រហម​កម្ពុជា​ស្រុក​-ក្រុង​ទាំង១១​ សរុប​មាន​ចំនួន ៣៦ នាក់ ។

 

គោលបំណង​នៃកិច្ចប្រជុំ​ គឺលើកកម្ពស់​ការយល់ដឹង​ពីបែបបទ​នៃការផ្តល់​ព័ត៌មាន​ និងការងារ​ធ្វើរបាយការណ៍​ទៅតាម​ទម្រង់​បែបបទ​ត្រឹមត្រូវ​ ដើម្បី​ធានា​ឲ្យមាន​ការ​ឯកភាព​ និង​ងាយស្រួល​ក្នុងការ​បូកសរុប ។ សូមបញ្ជាក់​ជូនថា​ កិច្ចប្រជុំ​នេះមាន​រយៈពេល​ ១ ថ្ងៃ ដែល​បានដំណើរ​ការចាប់​តាំងពី​ម៉ោង ៨ ព្រឹក​រហូត​ដល់ម៉ោង​ ៣ និង ៣០ នាទីរសៀល ៕

 

វគ្គបណ្តុះបណ្តាលស្តីពី ពិការភាពក្នុងការងារសុវត្ថិភាពចរាចរណ៍ដល់អ្នកស្ម័គ្រចិត្ត

សាខាកក្រកខេត្តកំពត ៖  នៅរសៀល​ថ្ងៃទី​២០​ ខែមិថុនា​ ឆ្នាំ២០១៧​ សាខា​កាកបាទក្រហម​កម្ពុជា​ ខេត្តកំពត​ បានរៀបចំ​ពិធីបិទ​វគ្គ​បណ្តុះបណ្តាល​ស្តីពី ​ពិការភាព​ក្នុងការងារ​សុវត្ថិភាព​ចរាចរណ៍ដ​ល់អ្នក​ស្ម័គ្រចិត្ត​កាកបាទក្រហម​កម្ពុជា​ចំនួន ១៩នាក់​ ក្រោមអធិបតី​ភាព ឯកឧត្តម​ សម កុសល​ នាយក នាយកដ្ឋាន​ធនធាន​មនុស្ស​ កាកបាទក្រហម​កម្ពុជា​ ដែលមាន​ការអញ្ជើញ​ចូលរួម​ពី ឯកឧត្តម​ លោកជំទាវ​ លោក លោកស្រី ជាសមាជិក ​សមាជិកា​គណៈកម្មាធិការ​សាខា ​យុវជន​កាកបាទក្រហម​កម្ពុជា ​និងសិស្សានុសិស្ស​មកពី​វិទ្យាល័យ​ចំនួន៤​ ស្ថិតក្នុង​ក្រុងកំពត​ ខេត្តកំពត។

 

វគ្គបណ្តុះបណ្តាល​នេះ​ ប្រព្រឹត្ត​ទៅក្នុង​រយៈពេល​២ថ្ងៃ​ ចាប់ពី​ថ្ងៃទី​១៩ ដល់ថ្ងៃ​ទី២០ ​ខែមិថុនា ​ឆ្នាំ​២០១៧ ក្នុង​គោលបំណង​ ដើម្បី​ពង្រឹង​និងពង្រីក​សមត្ថភាព​យល់ដឹង​ស្ដីពី​សុវត្ថិភាព​ចរាចរណ៍​ ការកាត់បន្ថយ​អត្រាស្លាប់​ដោយសារ​គ្រោះថ្នាក់​ចរាចរណ៍ និងធ្វើការ​អប់រំផ្សព្វផ្សាយ​បន្តដល់​សាលារៀន ​និងនៅតាម​សហគមន៍ផងដែរ៕

 

បិទវគ្គយល់ដឹង មូលដ្ឋាន ជូន ដល់ទី ប្រឹក្សា យុវជន និងយុវជន កាកបាទក្រហម កម្ពុជារាជធានីភ្នំពេញ

សាខាកក្រក​រាជធានី​ភ្នំពេញ៖ នាល្ងាចថ្ងៃទី​ ២០ ខែ​ មិថុនា ឆ្នាំ​ ២០១៧នេះ​ នៅវិទ្យាល័យ​ទួលទំពូង​ សាខាកាកបាទក្រហម​កម្ពុជា​ រាជធានីភ្នំពេញ​ បានរៀបចំ​ពិធីបិទ​វគ្គយល់ដឹង​មូលដ្ឋាន​ជូនដល់​ទីប្រឹក្សា​យុវជន​ និងយុវជន​កាកបាទក្រហម​កម្ពុជា​ ប្រចាំវិទ្យាល័យ​សរុបចំនួន​៩៩នាក់(ស្រី៥៣នាក់)​ ដោយបាន​ការចូលរួម​ជាអធិបតីពី​ លោក នាង សុខលី ​នាយករង​វិទ្យាល័យ​ ដែល​វគ្គយល់ដឹង​នេះបានចាប់​ដំណើរការ​អស់រយៈពេល​១ថ្ងៃ​កន្លងមក​ប្រកបដោយ​ជោគជ័យ​ ជាលទ្ធផល​យុវជនទទួល​បាននិទ្ទេស​ល្អចំនួន​៧០ភាគរយ​ និងល្អបង្គួរ​៣០ភាគរយ ។

 

នាឱកាសនោះ​ លោកនាយករង​វិទ្យាល័យ​ បានថ្លែងអំណរគុណ​យ៉ាងជ្រាលជ្រៅ​ចំពោះ​សាខា​កាកបាទក្រហមកម្ពុជា​ រាជធានីភ្នំពេញ​ ដែលបាន​មកធ្វើការ​បើកវគ្គយល់ដឹង​មូលដ្ឋាន​ជូនដល់​យុវជន​កាកបាទក្រហម​ ប្រចាំវិទ្យាល័យ​របស់លោក​​ ដើម្បីជួយ​ជាពន្លឺ​ស្មារតី​ជូនក្មួយៗ​ទាំងអស់​ឲ្យបានយល់​ដឹងពីសារៈសំខាន់​ ក្នុងការ​អនុវត្ត និងបំពេញ​ភារកិច្ច​បេសកម្ម​មនុស្សធម៏​របស់ខ្លួន​ឲ្យបានកាន់តែ​ល្អប្រសើរ​ និងទទួលបាន​នូវជោគជ័យ​ថែមទៀត ។

 

សូមបញ្ជាក់ថា៖​ ក្នុងវគ្គយល់ដឹង​មូលដ្ឋាននេះ​គ្រូឧទ្ទេសនាម​បានលើក​យកមេរៀន​ចំនួន៥​មកបង្ហាត់បង្ហាញរួមមាន៖


១/ ប្រវត្តិចលនា​កាកបាទក្រហម​ អឌ្ឍចន្ទក្រហម​ និងសមាគមជាតិ​កាកបាទក្រហម​កម្ពុជា 
២/ តួនាទី ​និង​ភារកិច្ច​យុវជន​កាកបាទក្រហម​កម្ពុជា 
៣/ គ្រោះ​មហន្តរាយ និងការ​គ្រប់គ្រង​គ្រោះមហន្តរាយ 
៤/ សុវត្ថិភាព​ចរាចរណ៍​ផ្លូវគោក 
៥/ វិជ្ជាសង្គ្រោះបឋម​ ៕

 

សាខាកាកបាទក្រហមកម្ពុជា ខេត្តតាកែវទទួលទេយ្យទានពីព្រះសង្ឃស្រុកព្រៃកប្បាស

សាខាកក្រកខេត្តតាកែវ៖ នៅព្រឹក​ថ្ងៃទី​ ២០​ ខែមិថុនា​ ឆ្នាំ២០១៧​ សាខា​កាកបាទក្រហម​កម្ពុជា​ ខេត្តតាកែវ​ លោកជំទាវ​ នូ សុវណ្ណនី ​ប្រធាន​គណៈកម្មាធិការ​សាខា​ រូមដំណើរ​ដោយ​ លោកយឹម ច័ន្ទថន​ នាយក​ប្រតិបត្តិ​សាខា ​សហការ​ជាមួយមន្ត្រី​ អនុសាខា និង​ក្រុម​ កាកបាទក្រហម​កម្ពុជា​ ឃុំពោរំចាក និង​ឃុំ ចំប៉ា ស្រុក​ព្រៃកប្បាស ខេត្តតាកែវ ​បានអញ្ជើញ​ទៅទទួល​ អំណោយ​ពីព្រះគ្រូ​ចៅអធិការ​វត្ត​ សមរ​លាវ​ ឃុំ ពោរំចាក​ និងវត្ត​ ជ្រោយជម្ពូពេជ្រ​ ឃុំចំប៉ា ស្រុក ព្រៃកប្បាស ខេត្តតាកែវ ។


នាឱកាសនោះ​លោកជំទាវ​ប្រធាន​បានជម្រាប​ជូន​អំពីប្រវត្តិ​ និង​ចលនា​កាកបាទក្រហម ​កម្ពុជា​ ហើយបានសន្យា​ថានឹង​យកសម្ភារៈ​ទាំងនេះ​ទៅជូន​ដល់ដៃ​ប្រជាពលរដ្ឋ​ដែលជួប​ការលំបាក​ក្នុងជីវភាព ​ឫមានជួប​គ្រោះមហន្តរាយ​ផ្សេងៗ។


អំណោយ​ដែលសាខា​បានទទួល​នាពេល​នោះរួមមាន៖ 
មុង១០០ ភួយ១០០ ខ្នើយ ១០០ ឆ្នាំង ១០០ ចានស្រាក់ ១៦ ទឹកត្រី១០យួរ​ ទឹកស៊ីអ៊ីវ ៥យួ បំពង់ទឹកក្តៅ៥៦ អង្ករ១០០ គីឡូក្រាម 
និងមាន​ថវិកា ​មួយលាន ​រៀលផងដែរ។

ពិធីបិទវគ្គយល់ដឹងជាមូលដ្ឋានជូនដល់យុវជនកាកបាទ ក្រហមកម្ពុជានៅវិទ្យាល័យជាំក្សាន្ត

សាខាកក្រកខេត្តព្រះវិហារ៖ នាល្ងាច​ថ្ងៃទី​ ១៧ ខែ​មិថុនា ឆ្នាំ​២០១៧​ នៅវិទ្យាល័យ​ជាំក្សាន្ត​ សាខា​កាកបាទក្រហម​កម្ពុជា​ ព្រះវិហារ​ បានរៀបចំ​ពិធីបិទ​វគ្គ​យល់ដឹង​ជាមូលដ្ឋាន​ជូន​ដល់​យុវជន​កាកបាទ ក្រហមកម្ពុជា​ ប្រចាំវិទ្យាល័យ សរុបចំនួន ១១៣ នាក់ ស្រី ៧៤ នាក់​ ក្រោម​វត្តមាន​ ឯកឧត្តម​ យុង គឹមហ៊ាន​ នាយក​ប្រតិបត្តិ នាយក​សាខា​កាកបាទក្រហមកម្ពុជា ​ខេត្តព្រះវិហារ​ ដែលវគ្គ​យល់ដឹងនេះ​បានចាប់​ដំណើរ​ការអស់រយៈពេល ​១ថ្ងៃ​កន្លងមក​ប្រកប​ដោយ​ជោគជ័យ​ ជាលទ្ធផល​យុវជន​ទទួលបាន​និទ្ទេស​ល្អចំនួន៧៥ ​ភាគរយ និងមធ្យម ២៥ ភាគរយ ។

 

នាឱកាសនោះ​ឯកឧត្តម​នាយក​សាខា បានពាំនាំ​នូវការផ្តាំផ្ញើ​សាកសួរ​សុខទុក្ខ​ពីសំណាក់​សម្តេច​កិត្តិព្រឹទ្ធបណ្ឌិត​ប្រធាន​ ប៊ុន រ៉ានី ហ៊ុន សែន​ ជូនដល់​ក្មួយៗយុវជ​នទាំងអស់​ ព្រមទាំង​សូមកោត​សរសើរ​និងវាយតម្លៃ​ខ្ពស់ចំពោះ​លទ្ធផល​នៃការបញ្ចប់​វគ្គនា​ថ្ងៃនេះ​ ។​​ ឯកឧត្តម​នាយក​សាខា​សង្ឃឹម​ និងជឿជាក់​ថា​បន្ទាប់ពី​ប្អនៗសិស្សានុសិស្ស​បានឆ្លង​កាត់វគ្គ​យល់ដឹង​ជាមូលដ្ឋាន​នេះហើយ​ពិតជា​បានយល់​ច្បាស់​ពីប្រវត្តិ​ចលនា​ បដិរូប​ គោលការណ៍​គ្រឹះទាំង៧,​ តួនាទី​ភារកិច្ច​យុវជន​កាកបាទក្រហម​ និងវិជ្ជា​សង្គ្រោះបឋម​​ ដែលជាមុខ​វិជ្ជា​មូលដ្ឋាន​សម្រាប់​ជាគ្រឹះឲ្យ​ប្អូនៗយក​ទៅ​អនុវត្ត​សំដៅ​ជួយដល់​ជនរងគ្រោះ​ និងងាយរង​គ្រោះ​គ្រប់ប្រភេទ​ និងបាន​ផ្តាំផ្ញើ​អោយប្អូន​ៗជៀសឆ្ងាយ​ពីគ្រឿងញៀន បើកបរ​ត្រូវគោរព​ ច្បាប់ចរាចរ។ និងបាន​ផ្តល់ថវិកា​ចំនួន ២០០,០០០ រៀលគត់ និងសំពាធ​សង្រ្គោះ​បឋមមួយ ​សម្រាប់ប្រើប្រាស់​ក្នុងក្លឹប។

 

ពិធីប្រកាសទទួលស្គាល់សមាសភាព គណៈកម្មាធិការអនុសាខាកាកបាទក្រហមកម្ពុជាក្រុងស្ទឹងត្រែង

សាខាកក្រកខេត្តស្ទឹងត្រែង ៖ នៅរសៀល​ថ្ងៃទី ១៦​ ខែមិថុនា​ ឆ្នាំ ២០១៧ ឯកឧត្តម​ ឈាង ឡាក់​ ប្រធាន​គណៈកម្មាធិការ​សាខា ​បានអញ្ជើញ​ជាអធិបតី​ក្នុងពិធី​ប្រកាសទទួល​ស្គាល់​សមាសភាព ​គណៈកម្មាធិការ​អនុសាខា​កាកបាទក្រហម​កម្ពុជា​ក្រុងស្ទឹងត្រែង​ ស្រុក​ថាឡាបរិវ៉ាត់ ស្រុកសៀមបូក ។

 

ក្នុងពិធីនេះ​មានការអញ្ជើញ​ចូលរួម​ពី លោក លោកស្រី សមាជិក សមាជិកា ​គណៈកម្មាធិការ​សាខា​ ក្រុមប្រតិបត្តិ​សាខា​ ប្រធាន​កិត្តិយស​អនុសាខា​ក្រុង/ស្រុក មន្រ្តី​អនុសាខា​ក្រុង/ស្រុក និង យុវជន​កាកបាទក្រហម​កម្ពុជា ។

 

ក្នុង​ឱកាសនោះ​ ឯកឧត្តម​ប្រធាន ​បាននាំ​យកនូវ​ប្រសាសន៍​ផ្តាំផ្ញើ ​សាកសួរ​សុខទុក្ខ ​និងក្តីនឹក​រលឹក​ពីសំណាក់ ​ឯកឧត្តម ម៉ុម សារឿន ប្រធាន​កិត្តិយស​សាខា ពិសេស​ពីសំណាក់ សម្តេច​កិត្តិព្រឹទ្ធ​បណ្ឌិត ​ប៊ុន រ៉ារី ហ៊ុនសែន​ ប្រធាន​កាក បាទក្រហមកម្ពុជា​ ជូនចំពោះ សមាជិក សមាជិកា​ ក្នុងអង្គ​ពិធីទាំងមូល​ ដែលទើបទទួល​ស្គាល់​នាពេលនេះ​ ត្រូវខិតខំ ​យកចិត្តទុកដាក់ ​បំពេញ​ភារកិច្ច​អោយបានល្អ​ គោរព​តាមគោលការណ៍​ គ្រឹះទាំង៧ ​របស់​ចលនា​ នឹងត្រូវ​ខិតខំ​កៀរគរ​រកថវិកា​ពីសប្បុរសជន ​ដើម្បី​ជួយគាំទ្រ​ដល់សកម្មភាព​មនុស្សធម៌​របស់អនុសាខា។

 

កាកបាទក្រហមកម្ពុជារៀបចំប្រារព្ធពិធីបុណ្យចម្រើនព្រះជន្មរបស់សម្តេចម៉ែ

កក្រក​ ៖​ នៅព្រឹក​ថ្ងៃទី​១៦​ ខែមិថុនា ​ឆ្នាំ២០១៧​ នេះ ​សម្តេច​កិត្តិព្រឹទ្ធបណ្ឌិត​ ប៊ុន រ៉ានី ​ហ៊ុនសែន​ ប្រធាន​កាកបាទក្រហម​កម្ពុជា​ និងថ្នាក់​ដឹកនាំ​-មន្ត្រី ​បុគ្គលិក​កាកបាទក្រហម​កម្ពុជា ​ព្រមទាំង​សប្បុរសជន​ ដៃគូ​សហប្រតិបត្តិការ​ជាច្រើននាក់ ​បានរៀបចំ​ពិធី​សូត្រមន្ត​ រាប់បាត្រ​ ប្រគេន​ព្រះសង្ឃ​ចំនួន ៨២​អង្គ ​ក្នុងឱកាស​បុណ្យចម្រើន​ព្រះជន្មវស្សា ​គម្រប់​ខួប៨១​ យាងចូល ៨២​ព្រះវស្សា​ នៅថ្ងៃទី​១៨ ​ខែមិថុនា​ ឆ្នាំ២០១៧​ ថ្វាយសម្ដេច​ព្រះមហាក្សត្រី ​នរោត្ដម ​មុនិនាថ សីហនុ​ ព្រះវររាជ​មាតា​ជាតិខ្មែរ​ ក្នុងសិរីភាព ​សេចក្តី​ថ្លៃថ្នូរ ​និងសុភមង្គល ​ព្រះប្រធាន​កិត្តិយស​កាកបាទក្រហម​កម្ពុជា​ ជាទីសក្ការៈដ៏ខ្ពង់ខ្ពស់។

 

សម្តេច​កិត្តិព្រឹទ្ធបណ្ឌិត​ប្រធាន និងសហការី​នៃកាកបាទក្រហម​កម្ពុជា​ទាំងអស់ សូមបួងសួង​សូមព្រះអង្គមាន​ព្រះរាជ​ជន្មាយុយឺន​យូរ ដើម្បី​គង់​ប្រថាប់​ជាម្លប់ដ៏​ត្រជាក់​ត្រជុំ ​នៃប្រជានុរាស្ត្រ​របស់ព្រះអង្គ​ជានិច្ច​និរន្តរ៍​តរៀង​ទៅ៕

 

First Prev 45 46 47 48 49 Next Last