អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

កិច្ចប្រជុំរៀបចំទិវា៨ ឧសភា របស់សាខាកាកបាទក្រហមកម្ពុជាខេត្តព្រៃវែង

សាខាកក្រក​ខេត្តព្រៃវែង​៖ នៅព្រឹក​ថ្ងៃទី ​១៥​ ខែមិថុនា ​ឆ្នាំ ២០១៧​ នៅសាខា​កាកបាទក្រហម​កម្ពុជា​ ខេត្តព្រៃវែង​ ដឹកនាំ​ដោយ​ ឯកឧត្តម ឧកញ៉ា សុខ ផេង អនុប្រធាន​អចិន្រ្តៃយ៍​គណៈកម្មាធិការ​សាខា ​បានបើក​កិច្ចប្រជុំ​ស្តីពី​ការរៀបចំ​ទិវាពិភពលោក​ កាកបាទក្រហម​ អឌ្ឍចន្ទ​ក្រហម​ ៨ ឧសភា ​ឆ្នាំ ២០១៧​ នៅ សាខាកាកបាទក្រហម​កម្ពុជា​ខេត្តព្រៃវែង​ ដែលនឹង​ប្រព្រឹត្តិ​ទៅនៅថ្ងៃ​ទី ​២៣ ខែមិថុនា​ ឆ្នាំ ២០១៧ ​ខាងមុខ ។

 

កិច្ចប្រជុំនេះ​មានការ​អញ្ជើញ​ចូលរួម​ពី ឯកឧត្តម ឧកញ៉ា លោក លោកស្រី សមាជិក សមាជិការ គណៈគម្មាធិការ​សាខា​ មន្រ្តី​ប្រតិបត្តិ​សាខា ​តំណាង​មន្ទីរ ​អង្គភាព​ ជុំវិញខេត្ត ​និងអនុសាខា​ក្រុង ​ស្រុក ​ទាំង១៣ ដែលមានអ្នក​ចូលរួម​សរុប ចំនួន ៥៥នាក់។

 

កិច្ចប្រជុំនេះ​ធ្វើឡើង​ក្នុងគោលបំណង​ ពិនិត្យ​សកម្មភាព​ការងារ ​ពិភាក្សា ​ផ្លាស់ប្តូរ​យោបល់ ​បែងចែក​ភារកិច្ច នឹងដាក់​ចេញ នូវសកម្មភាព​ចម្បងៗមួយ​ចំនួន ដើម្បី​អោយ​អង្គពិធី ​ដែលគ្រោង​រៀបចំ​នាពេល​ខាងមុខ​ អាចប្រព្រឹត្តិ​ទៅបាន​ដោយរលូន ​និងប្រកប​ដោយភាព​ជោគជ័យ។
ឆ្លៀតក្នុង​ឱកាសនោះ​ ឯកឧត្តម​ប្រធានអង្គ​ប្រជុំ ក៍បានអំពាវ​នាវ ដល់សមាជិក ​សមាជិកា​ នៃកិច្ចប្រជុំ​ ត្រូវខិតខំ​ផ្សព្វផ្សាយ​ និង បន្តកៀរគ ​ថវិកា ពីសប្បុរសជន​ គ្រប់មជ្ឈដ្ឋាន ដើម្បីជួយ​ឧបត្ថម្ភ​តាមការ​ស្ម័គ្រចិត្ត គាំទ្រដល់ សកម្មភាព​មនុស្សធម៌ របស់​សាខាខេត្ត។

 

ប្រជាជនរងគ្រោះដោយខ្យល់កន្រ្តាក់ទទួលអំណោយពីសាខាកាកបាទក្រហមកម្ពុជាខេត្តកណ្តាល

សាខា កក្រក ​ខេត្តកណ្តាល ៖ ព្រឹក​ថ្ងៃទី​ ១៥ ខែ មិថុនា ​ឆ្នាំ២០១៧​ សាខា​កាកបាទក្រហមកម្ពុជា​ខេត្តកណ្តាល​ ដឹកនាំ​ដោយឯកឧត្តម ជាវ តាយ​ ប្រធាន​គណៈកម្មាធិការ​សាខា​ ព្រមទាំងក្រុម​ ការងារ​សាខា​ និង អនុសាខា​ បានចុះសួរសុខទុក្ខ​ និងនាំយក​អំណោយមនុស្សធម៌​ទៅផ្តល់​ជូនបងប្អូន​ប្រជាពលរដ្ឋ​រងផល​ប៉ះពាល់​ដោយ​គ្រោះមហន្តរាយ​ ខ្យល់កន្ត្រាក់​ មកពី​ភូមិពាម​ និងភូមិ​ក្រោលគោ ​ឃុំសំបួរមាស​ស្រុកមុខ​កំពូល សរុប​ចំនួន ៥៧ ​គ្រួសារ មានសមាជិក​សរុប ១៧៥ នាក់ (ក្នុងនោះ​ផ្ទះរលំ​ដល់ដី​ចំនួន ៨ ខ្នង និង ៤៩ ខ្នងទៀត​រងគ្រោះ​ជាមធ្យម)​ នៅបរិវេណ​សាលាបឋម​សិក្សា​ក្រោលគោ ។

 

ក្នុងឱកាស​នោះ​ ឯកឧត្តម​ បាននាំមក​នូវការផ្តាំ​ផ្ញើសួរសុខទុក្ខ​ពីឯកឧត្តម​បណ្ឌិត ម៉ៅ ភិរុណ ប្រធានកិត្តិយស​សាខា ជាពិសេស​ពីសំណាក់​សម្តេចកិត្តិ​ព្រឹទ្ធបណ្ឌិត ​ប៊ុន រ៉ានី ហ៊ុនសែន ប្រធានកាកបាទ​ក្រហមកម្ពុជា ដែល​ជានិច្ចកាល​ សម្តេចកិត្តិ​ព្រឹទ្ធបណ្ឌិតប្រធាន តែងតែ​គិតគូរពី​សុខទុក្ខ និងជីវភាព​រស់នៅ​របស់បងប្អូនប្រជាពលរដ្ឋជាប្រចាំ ពិសេសជនងាយរងគ្រោះ និង ជនរងគ្រោះទាំងអស់គ្មានការរើសអើងជាតិសាសន៍ សាសនា ឬ និន្នាកា​នយោបាយ​អ្វីឡើយ។

 

គ្រួសាររងគ្រោះ​នីមួយៗទទួលបាន ៖​ ​ អង្ករ ២៥ គីឡូក្រាម មី ១ កេស ត្រីខកំប៉ុង ១ យួរ ទឹកត្រី ១ យួរ ទឹកស៊ីអ៊ីវ ១ យួរ អំបិលសុខភាព ១ កញ្ចប់ តែ ១ កញ្ចប់ និងថវិកា ចំនួន ៥ ម៉ឺនរៀល ៕

 

ពិធីប្រគល់ផ្ទះរបស់សាខាកាកបាទក្រហមកម្ពុជាខេត្តសៀមរាបជូនស្រ្តីមេម៉ាយទីទ័លក្រ

សាខាកក្រក​ខេត្តសៀមរាប​៖ នៅព្រឹក​ថ្ងៃទី ​១៣​ ខែមិថុនា​ ឆ្នាំ២០១៧​ ផ្ទះមនុស្សធម៌​ទី១៨​ របស់​សាខា​កាកបាទក្រហម​កម្ពុជា​ ខេត្តសៀមរាប​ ត្រូវបាន​លោកជំទាវ​ គួយ ណាលីន​ អនុប្រធាន​គណៈកម្មាធិការ​សាខា​ និង​សហការី​ ប្រគល់​ជូនអ៊ំ​ស្រី ​សោម រ៉ង់​ អាយុ៦០ឆ្នាំ​ ជាស្ត្រី​មេម៉ាយ​ទីទ័ល​ក្រខ្លាំង​ ត្រូវមើល​ថែទាំ​កូនប្រុស​ពិការ​គោមខ្នង​ផង​ រស់នៅ​ភូមិខ្សាច់​ ឃុំកំពង់ថ្កូវ​ ស្រុក​ក្រឡាញ់​។ ផ្ទះ​មនុស្សធម៌​នេះមាន​ទំហំ ៤ម៉ែត្រ​x​៥ម៉ែត្រ​ សង់​ពីឈើ​ តម្កល់​លើជើង​តាង​ កម្ពស់​ពីដី​ ១,៦ម៉ែត្រ​ ប្រក់ស័ង្ក​សី ​ក្រាលក្តារ ​ជញ្ជាំង​ក្ដារ ។

 

មានប្រសាសន៍​ក្នុងឱកាសនោះ​លោកជំទាវ​ គួយ ណាលីន​ ក្នុងនាម​ឯកឧត្តម​បណ្ឌិត​ ឃឹម ប៊ុនសុង ប្រធានគណៈកម្មាធិការ​សាខា​ ពិសេសបាន​ពាំនាំនូវការផ្ដាំ​ផ្ញើសួរ​សុខទុក្ខ​ពីសម្ដេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន​ ប្រធាន​កាកបាទក្រហម​កម្ពុជា​ ដែលតែងតែ​ព្រួយបារម្ភ​ និងយក​ចិត្តទុក​ដាក់គិតគូ​ចំពោះ​សុខភាពប្រជាពលរដ្ឋ​គ្រប់រូប​ មិនប្រកាន់​វណ្ណៈ ពណ៌សម្បុរ ​ជំនឿសាសនា ឬនិន្នាការ​នយោបាយ​ណាមួយ​ឡើយ។ លោកជំទាវ​ ក៏បាន​បន្តថា ​សូមអ៊ំស្រី​សម្អាត ​ថែរក្សា​ ផ្ទះថ្មីនេះ​ដើម្បីបាន​ជាជម្រកដ៏​កក់ក្តៅ​តរៀងទៅ ត្រូវបន្តមើលថែកូន​ឱ្យគាត់​សុខភាពល្អ។ នេះជាការបង្ហាញនូវការយក​ចិត្តទុកដាក់​ចំពោះប្រជាពលរដ្ឋ​គ្រប់រូបពីសំណាក់​ថ្នាក់ដឹកនាំ​ ពិសេសគឺ​កាកបាទក្រហម​កម្ពុជា ដូច​ដែលបាន​លើកឡើងថា “កាកបាទក្រហមកម្ពុជាមានគ្រប់​ទីកន្លែង ​សម្រាប់​គ្រប់ៗគ្នា” និង “ទីណាមាន​ទុក្ខលំបាក ទីនោះមាន​កាកបាទក្រហម​កម្ពុជា” ។

 

អំណោយ​សង្កត់ផ្ទះរួមមាន៖ មុង១ ភួយ១ សារុង១ ក្រមា១ កន្ទេល១ អង្ករ ៥០គីឡូក្រាម មី១កេស ត្រីខ១យួរ ទឹកត្រី១យួរ ទឹកបរិសុទ្ធ​៥យួរ ទូរទស្សន៍១ សម្ភារៈផ្ទះបាយ និងថវិកា​មួយចំនួន​ផងដែរ ៕

 

កាកបាទក្រហម កម្ពុជាផ្តល់អំណោយជូនសមាគមតន្រ្តីសំនៀងជនពិការ

កក្រក​ ៖​ នៅព្រឹកថ្ងៃទី​ ១៣ ខែមិថុនា​ ឆ្នាំ២០១៧​ នេះ កាកបាទក្រហម កម្ពុជា​ ដែលមាន​សម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ជាប្រធាន​ បានផ្តល់ថវិកា​ គ្រឿងឧបភោគ​-បរិភោគ​ សម្ភារៈ​ប្រើប្រាស់​ និងអាហារ​ថ្ងៃត្រង់​មួយពេល​ ជូនដល់​ជនពិការ​ចំនួន​ ៨៦នាក់​ នៃសមាគម​តន្ត្រីសំនៀង​ជនពិការ ​ដែលមាន​ទីតាំងស្ថិត​នៅភូមិជំរៅ​ សង្កាត់គោករកា​ ខណ្ឌព្រែកព្រៅ​ រាជធានីភ្នំពេញ។

 

ក្នុងឱកាស​ជួបសំណេះ​សំណាល​នោះ លោកជំទាវ​ ម៉ែន​ នារីសោភ័គ​ អគ្គលេខាធិការរង​ទី ១ កាកបាទក្រហមកម្ពុជា​ បាន​ពាំនាំ​ប្រសាសន៍​របស់​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ដែលផ្តាំផ្ញើ​ការសួរសុខទុក្ខ​ ក្តីនឹករលឹក​ ជាពិសេស​ គិតគូរ​ពីការរស់​នៅប្រចាំថ្ងៃ​របស់ជន​ពិការទាំងអស់។​ ជាមួយគ្នា​នោះ​ លោកជំទាវ​ ក៏​បានផ្តាំ​ផ្ញើលើក​ទឹកចិត្ត ដល់​ការតស៊ូ​របស់​ក្រុមជនពិការ ដើម្បី​រស់នៅ​ក្នុងសង្គម​ដោយសេចក្តីថ្លៃថ្នូរ និងស្មើមុខ​ស្មើមាត់ ​ព្រមទាំង​អំពាវនាវ​ ដល់​សប្បុរសជន​ មេត្តាជួយឧបត្ថម្ភ​គាំទ្រ​បន្ថែមទៀត​ដល់​ជនពិការ ដើម្បីឈាន​ទៅលុប​បំបាត់ការ​រើសអើង​ចំពោះជន​ពិការ​នៅកម្ពុជាយើង។

 

លោក​ ចាប​ តូ​ តំណាងឱ្យ​ជនពិការ​ទាំងអស់​ បានសម្តែង​នូវការដឹងគុណ​យ៉ាង​ជ្រាលជ្រៅចំពោះ​ សម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ដែលជាមាតា​មនុស្សធម៌​ តែងគិតគូរ​ យកចិត្តទុកដាក់​ និងជួយ​ឧបត្ថម្ភ​ដល់ក្រុម​ជនពិការ​ជាបន្តបន្ទាប់​ ដោយមិនមាន​ការរើសអើង​អ្វីឡើយ។

 

សូមបញ្ជាក់ថា​ អំណោយ​ប្រគល់ជូន​សមាគម​តន្ត្រីសំនៀង​ជនពិការ​រួមមាន​ ៖ អង្ករ ២តោន មីយើង ៥០កេស ត្រីខ ៥កេស ទឹកស៊ីអ៊ីវ ២៤ដប ទឹកត្រី ២៤ដប ​ទឹកបរិសុទ្ធ ១០កេស​ ទឹកក្រូច ១០កេស អាហារវីតាមីន​ ២០កេស និង​ថវិកា ៥លានរៀល។​ ដោយឡែក​ សម្រាប់​ជនពិការ​ទាំង​ ៨៦នាក់​ ក្នុងម្នាក់ៗទទួលបាន​ ៖ ថវិកា ៥ម៉ឺន​រៀល មុង១ ភួយ១ សារុង ១ ក្រមា១​ និងអាហារ​ថ្ងៃត្រង់​មួយពេល៕

វគ្គ បណ្តុះបណ្តាល គ្រូបង្គោល គម្រោង សាកល្បង "សុខភាព មនុស្សចាស់"

កក្រក៖  នាព្រឹក ថ្ងៃទី  ១៣  ខែមិថុនា  ឆ្នាំ២០១៧ ​លោកជំទាវ​ ពុំ ចន្ទីនី​ អគ្គលេខាធិការ​កាកបាទក្រហម​កម្ពុជា ​បានអញ្ជើញ​ជាអធិបតី ​ក្នុងពិធី​បើកវគ្គ​បណ្តុះបណ្តាល​គ្រូបង្គោល​គម្រោង​សាកល្បង​ "សុខភាពមនុស្សចាស់"​ មានរយៈពេល៣ថ្ងៃ ​ចាប់ពីថ្ងៃទី​ ១៣ដល់១៥ ខែមិថុនា ​ឆ្នាំ២០១៧ ដែលមាន​ការសម្របសម្រួល​បច្ចេកទេស​ពីសហព័ន្ធ​អន្តរជាតិ​ (IFRC)​ និងហ្សឺណែវ​ និង កាកបាទក្រហម​ថៃ ​កាកបាទក្រហម​ប៊ុលហ្គារី ​កាកបាទក្រហម​ម៉ុងហ្គោលី ​និងតំណាង​គ្រូបង្គោល​មកពី ​មន្ត្រីទីស្នាក់ការ​កណ្តាល​ និងសាខា​កាកបាទក្រហម​កម្ពុជា ​រាជធានី​-ខេត្តទាំង ​២៥ ព្រមទាំងមាន​អ្នកចូលរួម​សរុប​ទាំងអស់​ចំនួន​ ៣៤នាក់។

 

វគ្គបណ្តុះបណ្តាល​នេះមាន​គោលបំណង​ បង្កើន​ការយល់ដឹង​ឲ្យកាន់តែ​ច្បាស់ ​ក្នុងការថែរក្សា​សុខភាព​មនុស្សចាស់​ឲ្យរស់នៅ​បានល្អប្រសើរ​ជាងមុន​ ដល់គ្រូបង្គោល​ ហើយ ​កាកបាទក្រហម​កម្ពុជា​នឹងមាន​គម្រោងសាក​ល្បង​ចំនួន៣​ខេត្ត​ មាន ខេត្តព្រៃវែង ខេត្តស្វាយរៀង និងខេត្តកំពត ក្នុងគោលបំ​ណងសិក្សាស្វែងយល់​នូវតម្រូវការ​ជាក់ស្តែង​ដែលពាក់ព័ន្ធ​នឹងសុខមាលភាព​របស់ប្រជាពលរដ្ឋ​វ័យចំណាស់។

កាកបាទក្រហមកម្ពុជាប្រគល់១លានដុល្លាអាមេរិកជូនមន្ទីរពេទ្យគន្ធបុប្ផា

នៅព្រឹក​ថ្ងៃទី ១៣​ ខែមិថុនា​ ឆ្នាំ២០១៧​ នេះ​ កាកបាទក្រហម​កម្ពុជា​ ដែលមាន​សម្តេច​កិត្តិព្រឹទ្ធបណ្ឌិត​ ប៊ុន រ៉ានី ​ហ៊ុនសែន​ ជាប្រធាន​ បានផ្តល់​ថវិកា​ $1.000.000 ​(មួយលានដុល្លារអាមេរិក)​ ជាលើកទី ៦ ​ជូន​មូលនិធិ​គន្ធបុប្ផា​ ដែលពិធីនេះ​ប្រព្រឹត្តទៅ​នៅទីស្នាក់ការ​កណ្តាល​កាកបាទក្រហម​កម្ពុជា។

 

ក្នុងឱកាសនោះ ​លោកជំទាវ ពុំ ចន្ទីនី អគ្គលេខាធិការ កាកបាទក្រហម​កម្ពុជា ​បានពាំនាំ​ប្រសាសន៍​ផ្តាំផ្ញើ​សួរសុខទុក្ខ​ ក្តីសោមនស្សរីករាយ​ និង​ការ​កោតសរសើរ​ពីសំណាក់ ​សម្តេច​កិត្តិព្រឹទ្ធបណ្ឌិត​ប្រធាន​ ជូនចំពោះ​គណៈប្រតិភូ​ ជាពិសេស​ ក្រុមគ្រូពេទ្យ ​និងបុគ្គលិក​នៃមន្ទីរពេទ្យ​គន្ធបុប្ផា​ទាំងអស់ ​ដែលបាន​ខិតខំប្រឹងប្រែង​ព្យាបាល​ជំងឺជូនស្ត្រី​មានផ្ទៃពោះ​ឆ្លងទន្លេ​និងកុមារ​កម្ពុជា​រាប់ពាន់​ រាប់ម៉ឺននាក់ ​ឱ្យរួចផុត​ពីសេចក្តីស្លាប់ ​និងពិការភាព​។ ជាមួយគ្នានោះ​ លោកជំទាវ​ ក៏បានពាំនាំ​ប្រសាសន៍​សម្តេច​កិត្តិព្រឹទ្ធបណ្ឌិត​ ដែលផ្តាំ​សួរសុខទុក្ខ​ចំពោះ​លោក ​បេអាត រិចនឺ​ ដែលបាន​កំពុងសម្រាក​ ក្រោយការ​ព្យាបាលជំងឺ​ និងបួងសួង ​លោកឆាប់បាន​ជាសះស្បើយ​ ផ្តល់ជា​កម្លាំងចិត្ត ​ដល់ការ​បន្តទ្រទ្រង់​មន្ទីរពេទ្យ​គន្ធបុប្ផា​ដើម្បី​កុមារ​កម្ពុជា។

 

ជាកិច្ច​ឆ្លើយតប លោកវេជ្ជ​. ដេនីស ឡូរ៉ង់ (Denis LAURENT) ប្រធាន​ប្រតិបត្តិ​មូលនិធិ​គន្ធបុប្ផា ​និង​លោកជំទាវ​វេជ្ជ. យក់ សម្បត្តិ​ អគ្គនាយិកា​រដ្ឋបាល​និងហិរញ្ញវត្ថុ ​ទីប្រឹក្សា​ក្រសួងសុខាភិបាល​ ព្រមទាំង​គណៈប្រតិភូ ​បានថ្លែងអំណរគុណ​ដល់សណ្តាន​ចិត្តរបស់​ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ដែលនៅ​តែបន្ត​ជួយឧបត្ថម្ភ​គាំទ្រ​ថវិកា ១លានដុល្លារ ​បាន ៦ឆ្នាំ ជាបន្តបន្ទាប់​តាំងពីឆ្នាំ ២០១២រៀងមក ដើម្បី​លើកទឹកចិត្ត​ដល់បុគ្គលិក​ទាំងអស់​បន្តនូវ​ការបំពេញ​ភារកិច្ច​របស់ខ្លួន​ឱ្យកាន់តែ​មានប្រសិទ្ធភាព​ និងទទួល​បានគាំទ្រកាន់តែច្រើន​ពីសំណាក់​ជាតិ និងអន្តរជាតិ ជាពិសេស​ចំពោះប្រជាជន​កម្ពុជាឱ្យ​មានទំនុកចិត្ត​ក្នុងការ​នាំកូន​ៗរបស់ខ្លួន​មកព្យាបាល៕

 

កាកបាទក្រហមកម្ពុជាជួយសំណេះសំណាលជាមួយប្រតិភូកាកបាទក្រហមឥណ្ឌា

កក្រក៖ នាព្រឹក​ថ្ងៃទី​ ១២​ ខែមិថុនា​ ឆ្នាំ២០១៧​ លោកជំទាវ​ ពុំ ចន្ទីនី​ អគ្គលេខាធិការ​កាកបាទក្រហម​កម្ពុជា​ បានទទួល​ជួបសំណេះសំណាល ​ជាមួយ​ លោក Shankarlal Dayalal Raval តំណាង​គណៈប្រតិភូ​សមាគមជាតិ​កាកបាទក្រហម​ឥណ្ឌា ​រដ្ឋគូចារ៉ាត់​ ក្នុងបេសកកម្ម​ផ្សព្វផ្សាយ ​និងលើកកម្ពស់​ការយល់ដឹង​អំពី​ការបរិច្ចាក​ភ្នែក​ និងសរីរាង្គ​ ក្នុង៦៨​ប្រទេស​ជុំវិញ​ពិពភលោក​ នៅទីស្នាក់ការ​កណ្តាល​កាកបាទក្រហម​កម្ពុជា។

 

លោកជំទាវ​អគ្គលេខាធិការ ​កាកបាទក្រហម​កម្ពុជា​ បានពាំនាំ​ផ្តាំផ្ញើ​សួរសុខទុក្ខ ​ពីសំណាក់​សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា ជូនកាកបាទ​ក្រហម​ឥណ្ឌា ​ជាមួយ​គ្នានោះ​ដែរ លោកជំទាវ​អគ្គលេខាធិការ​ ជម្រាប​ជូនអំពី​បេសកកម្ម​ វិស័យស្នូល​ទាំង៤​ របស់​កាកបាទក្រហម​កម្ពុជា​ អំពីគម្រោង​ និងកម្មវិធី​ ដែលបាន​នឹងកំពុង​ប្រតិបត្តិការ​ជួយដល់​ជនក្រីក្រ ​និងជនងាយ​រងគ្រោះ​ទាំងឡាយ។

 

លោក Shankarlal Dayalal Raval ​សូមកោតសរសើរ​ និង​ថ្លែងអំណរគុណ ​លោកជំទាវ​អគ្គលេខាធិការ​ ជាពិសេស​សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន​ ប្រធាន​កាកបាទក្រហម​កម្ពុជា​ ដែលបាន​អនុញ្ញាត​ឲ្យចូលជួប​សំណេះសំណាល​នៅពេលនេះ ​ហើយលោក​ Shankarlal Dayalal Raval​ បានបន្ថែម​ទៀតថា ​ការធ្វើទស្សនកិច្ច​ដើម្បីលើក​កម្ពស់ស្មារតី​ សាមគ្គីភាព​ មិត្តភាព​ និង​សហប្រតិបត្តិ​ការរវាង​កាកបាទក្រហម​ឥណ្ឌា ​និងកាកបាទក្រហម​កម្ពុជា​នាពេលអនាគត។

 

ប្រតិភូកាកបាទក្រហមកម្ពុជាចូលក្រាបបង្គំគាល់ និងថ្វាយព្រះពរសម្តេចម៉ែ

កក្រក​ ៖​ នៅព្រឹកថ្ងៃទី ៧ ខែមិថុនា ឆ្នាំ២០១៧​ នេះ​ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន​ ប្រធាន​កាកបាទក្រហម​កម្ពុជា​ បានដឹកនាំ​គណៈប្រតិភូ​ កាកបាទក្រហម​កម្ពុជា ​ចូលក្រាប​បង្គំគាល់​ និងថ្វាយព្រះ​ពរ សម្តេច​ព្រះមហាក្សត្រី នរោត្តម មុនិនាថ សីហនុ ព្រះវររាជ​មាតាជាតិ​ខ្មែរ ក្នុង​សេរីភាព សេចក្តី​ថ្លៃថ្នូរ និងសុភមង្គល និង​ជាព្រះប្រធាន​កិត្តិយស​កាកបាទក្រហម​កម្ពុជា​ សូមទ្រង់​មានព្រះកាយ​ពល​មាំមួន​ ព្រះបញ្ញាញាណ​វាងវៃ ព្រះសុខភាព​ល្អ​បរិបូរណ៍ ព្រះជន្មាយុ​យ៉ឺនយូរ ដើម្បី​គង់ប្រថាប់​ជាម្លប់ដ៏ត្រជាក់​ត្រជុំដល់​ប្រជារាស្ត្រ​ទូទាំងប្រទេស ជានិច្ច​និរន្តរ៍​តរៀងទៅ។

 

ក្នុងឱកាស​ដ៏មហា​នក្ខត្តឫក្ស​នោះ​ សម្តេច​កិត្តិព្រឹទ្ធបណ្ឌិត​ បាន ថ្វាយ​ថវិកា​ចំនួន ១០ម៉ឺនដុល្លារ​អាមេរិក ចំពោះ​សម្តេច​ព្រះមហាក្សត្រី​ ព្រះវររាជ​មាតាជាតិខ្មែរ​ ហើយដែល​ព្រះរាជទ្រព្យនេះ​ ព្រះអង្គ​ នឹងយកទៅ​កសាង​មន្ទីរពេទ្យ​នៅឬស្សីកែវ​ ដែលមន្ទីរពេទ្យ​នេះ​ គឺជាអតីត​ស្នាព្រះហស្ត​របស់​ សម្តេច​ព្រះវររាជបិតា​ជាតិខ្មែរ​ ព្រះបរមរតន​កោដិ​ នរោត្តម​ សីហនុ​ កាលពីសម័យ​សង្គម​រាស្ត្រនិយម។

 

ទន្ទឹមនឹងនោះ​ សម្តេច​ព្រះមហាក្សត្រី​ ព្រះវររាជមាតា​ជាតិខ្មែរ​ បានប្រោស​ព្រះប្រទាន ​នូវព្រះរាជទ្រព្យ​ចំនួន ៣ពាន់ដុល្លារ​អាមេរិក​សម្រាប់​ឧបត្ថម្ភ​ដល់​កាកបាទក្រហម​កម្ពុជា ក្នុងត្រីមាសទី​ ៣​ (ខែកក្កដា​ សីហា​ និងខែកញ្ញា) ឆ្នាំ២០១៧នេះ ដើម្បីចូលរួម​សកម្មភាព​មនុស្សធម៌​របស់កាកបាទក្រហម​កម្ពុជា។

 

សម្តេច​កិត្តិព្រឹទ្ធ​បណ្ឌិត​ ប៊ុន​ រ៉ានី​ ហ៊ុនសែន បាន​សម្តែងនូវគារវ​ភក្តីដ៏​ខ្ពង់ខ្ពស់បំផុត និង​ព្រះមហាករុណា ទិគុណយ៉ាង​ជ្រាលជ្រៅបំផុត​ និងសូមប្តេជ្ញា​ដង្ហែតាម លំអាន​ព្រះវីរគំរូ​ដ៏ប្រពៃ​ថ្លៃថ្លានៃ​ សម្តេច​ព្រះមហាក្សត្រី ​ព្រះវររាជ​មាតាជាតិ​ខ្មែរ ព្រះប្រធាន​កិត្តិយស​កាកបាទក្រហម​កម្ពុជា ជាទីគោរព​សក្ការៈដ៏ខ្ពង់ខ្ពស់ ​ជារៀងដរាប៕

 

កាកបាទក្រហមកម្ពុជាតម្កល់ទុកឯកសារផ្សព្វផ្សាយនៅតាមបណ្ណាល័យរាជធានីភ្នំពេញ

នាព្រឹក​ថ្ងៃទី ៦​ ខែមិថុនា​ ឆ្នាំ២០១៧​ នាយកដ្ឋាន​ទំនាក់ទំនង​នៃទីស្នាក់ការ​កណ្តាល​កាកបាទក្រហម​កម្ពុជា ​បាននាំ​យក​ឯកសារ​ផ្សព្វផ្សាយ​របស់​កាកបាទក្រហមកម្ពុជា​ទៅ​តម្កល់​ទុកក្នុង​បណ្ណាល័យ​៖
១) បណ្ណាល័យ​ហ៊ុន សែន នៃសាកល​វិទ្យាល័យ​ភូមិន្ទភ្នំពេញ 
២) បណ្ណាល័យ​ទីចាត់ការ​ហ្វឹកហ្វឺន​នៃអគ្គបញ្ជាការ​កងយុទ្ធពល​ខេមរភូមិន្ទ 
៣) បណ្ណាល័យ​មជ្ឈមណ្ឌល​ហ្វឹកហ្វឺន​ភ្នំជំរាយ​នៃកងរាជអាវុធហត្ថ​លើផ្ទៃប្រទេស 
៤) បណ្ណាល័យ​នៃសាលា​កងរាជអាវុធហត្ថ​លើផ្ទៃ​ប្រទេស 
៥) បណ្ណាល័យ​នៃសាលា​បណ្ឌិតសភា​នគរបាលជាតិ​កម្ពុជា 
ក្នុងគោលបំណង​ចែករំលែក​ព័ត៌មាន និងផ្តល់​ចំណេះដឹង​បន្ថែម​សម្រាប់​អ្នកអាន​ និងអ្នក​ស្រាវជ្រាវ​អំពីចលនា​អន្តរជាតិ​កាកបាទក្រហម ​អឌ្ឍចន្ទក្រហម​ ក្នុងបេសកម្ម​មនុស្សធម៌​កាកបាទក្រហម​កម្ពុជា ​ក្រោមការដឹកនាំ​របស់ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន។
ឯកសារ​រួមមាន៖
១- សៀវភៅ​ សម្តេច​កិត្តិព្រឹទ្ធ​បណ្ឌិត​ ប៊ុន រ៉ានី ​ហ៊ុនសែន​ ក្នុងការ​ដឹកនាំ​សកម្មភាព​មនុស្សធម៌​ នៃ 
កាកបាទក្រហមកម្ពុជា
២- សៀវភៅ​អបអរ​ឆ្នាំទី៦០ នៃការបង្កើត​សមាគមជាតិ​កាកបាទក្រហម​កម្ពុជា
៣- ទស្សនាវដ្តី​កាកបាទក្រហម​កម្ពុជា អបអរ​ខួបទី១៥៤ ទិវាពិភព​លោក ​កាកបាទក្រហម អឌ្ឍចន្ទក្រហម
៤- កម្រងច្បាប់​កាកបាទក្រហមកម្ពុជា
៥- ព្រះរាជក្រឹត្យ ​ស្តីពីការ​ទទួលស្គាល់​កាកបាទក្រហម​កម្ពុជា និង ព្រះរាជក្រឹត្យ​ ស្តីពី​ការប្រើប្រាស់ 
និង ការពារបដិរូប ​កាកបាទក្រហម​ អឌ្ឍចន្ទក្រហម
៦- យុទ្ធសាស្ត្រ ២០១១-២០២០ 
៧- របាយការណ៍​សកម្មភាព​ការងារឆ្នាំ២០១៥ និងផែនការ​សកម្មភាព​ការឆ្នាំ២០១៦
៨- កម្រង​ចម្រៀង​កាកបាទក្រហម​កម្ពុជា

ប្រជាជន៩ភូមិនៃស្រុកអង្គរជ័យទទួលបានអណ្តូងទឹកស្អាតពីកាកបាទក្រហមកម្ពុជា

កក្រក ៖ នៅ ថ្ងៃទី ៥​ ខែ​មិថុនា​ ឆ្នាំ២០១៧ ​នេះ​ សម្តេច​កិត្តិព្រឹទ្ធ​បណ្ឌិត ​ប៊ុន រ៉ានី​ ហ៊ុនសែន​ ប្រធានកាកបាទក្រហម​កម្ពុជា ​បានសម្រេច​ផ្តល់​ថវិកា​ចំនួន​ ៣១.៩២០ដុល្លារ ​(បីម៉ឺនមួយពាន់ប្រាំបួនរយម្ភៃដុល្លារអាមេរិក)​ ជាជំហាន​ទី​ ១ ដើម្បី​ខួងអណ្តូង​ទឹកស្អាត​ ចំនួន ១៩ ​ជូន​ប្រជាពលរដ្ឋខ្វះ​ខាត​ទឹក​ប្រើប្រាស់​ចំនួន ៣២៣គ្រួសារ ​ស្មើនឹង​មនុស្ស ១.៦១៥នាក់​ រស់នៅ​តំបន់ថ្ម​បាយក្រៀម​ ក្នុងភូមិ​ចំនួន៩​ ឃុំចំនួន៥​ ក្នុងស្រុកអង្គរជ័យ​ ស្រុកបន្ទាយមាស​ និងស្រុក​ដងទង់ នៃ​ខេត្តកំពត។

 

សូមបញ្ជាក់ថា​ ក្នុងរយៈពេល​ ៥ខែ​ ដើមឆ្នាំ២០១៧​ នេះ​ នៅទូទាំង​ប្រទេសកម្ពុជា​ កាកបាទក្រហម​កម្ពុជាបានផ្តល់​អណ្តូង​ចំនួន​ ២៣៦​ និងស្រះទឹក​ចំនួន​ ៤​ រួចមកហើយ។​ ដោយឡែក​ សម្រាប់​ខេត្តកំពត​ ពីឆ្នាំ២០១០​ ដល់ឆ្នាំ២០១៣​ បានទទួល​អណ្តូង​ចំនួន​ ៦៦​ និងឆ្នាំ២០១៦​ ចំនួន​ ១អណ្តូង​ រួចមក​ហើយ​៕

 

First Prev 45 46 47 48 49 Next Last