អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

វគ្គបណ្តុះបណ្តាលជនបង្គោលស្តីពី សុខភាពមនុស្សចាស់ នៅខេត្តព្រៃវែង

សាខាកក្រក​ខេត្តព្រៃវែង៖ ​នៅព្រឹក​ថ្ងៃទី​ ០៤​ ខែកក្កដា​ ឆ្នាំ២០១៧​ នៅសាខា​កាកបាទក្រហម​កម្ពុជា​ ខេត្តព្រៃវែង​ បានបើក​វគ្គបណ្តុះបណ្តាល​ជនបង្គោល​ស្តីពី​ សុខភាព​មនុស្សចាស់ ​ស្ថិតក្រោម​អធិបតីភាព​ ឯកឧត្តម​ឧកញ៉ា សុខ ផេង​ អនុប្រធាន​អចិន្ត្រៃយ៍​គណៈកម្មាធិការ​សាខា។

 

វគ្គ​បណ្តុះបណ្តាល​នេះប្រព្រឹិត្តិទៅ ​ក្រោមកិច្ច​សហការណ៍​ជាមួយកាកបាទក្រហ​មកម្ពុជា ​ដែលបានការ​ឧបត្ថម្ភថវិកា​ដោយសហព័ន្ធ​អន្តរជាតិ​ កាកបាទក្រហម​ និងអឌ្ឍចន្ទក្រហម ​មានរយៈពេល ០២ថ្ងៃ ​ចាប់ពីថ្ងៃទី ៤ ដល់ទី ៥ ខែកក្កដា ឆ្នាំ ២០១៧ មានសិក្ខាកាម​ចូលរួម សរុបចំនួន ៣០នាក់ ស្រី ៨នាក់ មកពីអនុសាខា​ស្រុកពាមរក៍ ជាស្រុកគោលដៅ​សម្រាប់អនុវត្ត​សកម្មភាពគម្រោង។

 

គោលបំណងនៃវគ្គបណ្តុះបណ្តាលគឺ៖
១.ដើម្បីអោយ​អ្នកស្ម័គ្រចិត្ត​កាកបាទក្រហម​ មានសមត្ថភាព​គ្រប់គ្រាន់​ក្នុងការជួយ​អប់រំផ្សព្វផ្សាយ​សារគន្លឹះ ស្តីពីការ​ការពារ​ជំងឺមិនឆ្លង និង​ថែទាំដល់​ប្រជាពលរដ្ឋដែល​មានអាយុច្រើន​រស់នៅក្នុង​សហគមន៍​ អោយមានសុខភាពល្អ​។​


២.ដើម្បីកែលម្អរ​គុណភាព​ជីវិតរបស់​ប្រជាជន​ ដែលមានអាយុ​ច្រើនរស់​នៅក្នុងសហគមន៍​ជនបទ ​ទទួលបានក្តីសង្ឃឹម​ ការគោរព ​និងការ​លើកកម្ពស់​សេចក្តីថ្លៃថ្នូ ​តាមរយៈការ​ការពារជម្ងឺ​មិនឆ្លង​ និងការថែ​ទាំសុខភាព។

 

វគ្គបណ្តុះបណ្តាលស្តីពី ការគ្រប់គ្រងគ្រោះមហន្តរាយ និងការប៉ាន់ប្រម៉ាណហានិភ័យនៅតាមសាលារៀន

សាខាកក្រកខេត្តកំពង់ឆ្នាំង ៖ កាលពីព្រឹក​ថ្ងៃទី ៥ ខែកក្កដា ឆ្នាំ២០១៧ សាខា​កាកបាទក្រហម​កម្ពុជា ​ខេត្តកំពង់ឆ្នាំង​ ដឹកនាំដោយ​លោក ប្រាក់ សោភ័ណ្ឌ​ នាយក​សាខា រួមជាមួយ​នឹង មន្ត្រីសម្រប​សម្រួល​គម្រោង នៃនាយកដ្ឋាន​គ្រប់គ្រង​គ្រោះមហន្តរាយ ​កាកបាទក្រហម​កម្ពុជា ​បានចូលរួម​បើកវគ្គ​បណ្តុះបណ្តាល​ស្តីពី ការគ្រប់គ្រង​គ្រោះមហន្តរាយ​ និងការប៉ាន់ប្រម៉ាណ​ហានិភ័យ​នៅតាមសាលារៀន​ដោយមាន​ការអញ្ជើញចូលរួម​ពី ទីប្រឹក្សាយុវជន ​យុវជន​កាកបាទក្រហម​កម្ពុជា​៣គោលដៅ ​សរុបចំនួន ៣៥នាក់ ស្ថិត​នៅខេត្ត​កំពង់ឆ្នាំង។

 

វគ្គបណ្ដុះបណ្ដាលនេះ​ប្រព្រឹត្តទៅ​នៅក្នុង​រយៈពេល​៣ថ្ងៃ ចាប់ពី​ថ្ងៃទី ៥-៦-៧ ខែ​កក្កដា ឆ្នាំ២០១៧ ក្នុងគោលបំណង​ដូចតទៅ៖


១-រកឲ្យឃើញ​នូវមុខសញ្ញា​គ្រោះមហន្តរាយ​នានា ដែលភ្លាប់​មានក្នុង​សាលារៀន
២-គ្រប់គ្រងមុខ​សញ្ញា​គ្រោះមហន្តរាយក្នុង​សាលារៀនឲ្យបាន
៣-រកអោយឃើញ​ហានិភ័យ​នានា​ដែលអាច​កើតមានឡើង​ក្នុងសាលារៀន
៤-វាស់ស្ទង់សម្ថតភាព​ហានិភ័យ និងសមត្ថភាព​របស់យើង​ ដើម្បី​ដោះស្រាយ៕

 

ពិធីប្រគល់អណ្តូងទឹកស្អាតជូនប្រជាជននៅខេត្តរតនគីរី

សាខាកក្រកខេត្តរតនគិរី ៖ នាព្រឹក​ថ្ងៃទី០២ ខែ ​កក្កដា​ ឆ្នាំ ២០១៧ ​នេះ កាកបាទក្រហម​កម្ពុជា​ ដែលមាន​សម្តេចកិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ជាប្រធាន​ បានប្រគល់​ឱ្យប្រើប្រាស់​ជាផ្លូវការ​អណ្តូងទឹក​ស្អាត​ ចំនួន១៥ (មានលេខរៀង​ពីទី ០៤២ដល់ទី ០៥៦) ក្រោម​អធិបតី​ភាព ឯកឧត្តមវេជ្ជ. អ៊ុយ សំអាត ​នាយក ​នាយកដ្ឋាន​គ្រប់គ្រង​គ្រោះមហន្តរាយ​ កាកបាទក្រហម​កម្ពុជា​ និងមាន​ការអញ្ជើញ​ប្រគល់​ឱ្យប្រើប្រាស់​ជាផ្លូវ​ការអណ្តូង​ទឹកស្អាត​ចូលរួមពី សមាជិក សមាជិការ គណៈកម្មាធិការ​សាខា ព្រម​ទាំងនាយក​ សមាជិក សមាជិកា ​សាខា និង​អនុសាខា​ ជូនប្រជាជន​នៅតំបន់​ដាច់ស្រយាល​និង​ផ្លូវពិបាក​ធ្វើដំណើរ​ ព្រមទាំង​ខ្វះខាតទឹក​ប្រើប្រាស់​ចំនួន ២៧៥ គ្រួសារ​ស្មើនឹង ២.០២៩ នាក់​ រស់នៅ​ឃុំ ត្រពាំងក្រហម ​ឃុំ ស្រែ អង្រ្គង ឃុំ សេរីមង្គល ឃុំ តឺន ឃុំ តាអ៊ង ស្រុក កូនមុំ និង ឃុំ បរខាំ ស្រុកអូរ​យ៉ាដាវ។

 

នៅក្នុង​ពិធីប្រគល់​នោះផង​ដែរ ឯកឧត្តម​វេជ្ជ. បានពាំនាំ​បណ្តាំផ្ញើ​របស់​សម្តេច​កិត្តិព្រឹទ្ធ​បណ្ឌិត​ប្រធាន​ ដោយក្នុងនោះ​ឯកឧត្តម​បានអំពាវនាវ​អោយបងប្អូន​ប្រជាពលរដ្ឋ​ជួយ រក្សា​អណ្តូង​អោយយូរ​អង្វែង និង​មានអនាម័យ​ជុំវិញអណ្តូង ព្រមទាំង​បានផ្តល់​សារសុខភាព​រួមមានៈ
១- ស្ត្រីចាប់ពីវ័យ​បន្តពូជ​ត្រូវទៅទទួល​សេវាពី​មណ្ឌលសុខភាព​ដើម្បីកាត់បន្ថយ​អត្រាឈឺស្លាប់​របស់កុមារអាយុក្រោមប្រាំឆ្នាំ។ 


២- គោរពច្បាប់​ចរាចរ និង បើកបរ​ប្រកបដោយ​សុវត្ថិភាព។ 
៣- ជៀសវាង​ការប្រើប្រាស់​គ្រឿងញៀន និងគ្រឿងស្រវឹង។

ប្រជាពលរដ្ឋចំនួន ១០០ នាក់ ដែលចូលរួម​ក្នុងពិធីនោះ​ មានក្តីរីករាយ​ឥតឧបមា​ក្រោយទទួល​បានសមិទ្ធផលថ្មីនេះ​ ហើយស្ត្រី​ម្នាក់ៗទទួលបាន​ សារុង ១ ដោយឡែក​ចាស់ៗទទួលបាន​ថវិកាមួយចំនួន​បន្ថែមទៀត។

 

សូមបញ្ចាក់ថាៈ​ មកទល់​បច្ចុប្បន្ននេះ​កាកបាទក្រហម​កម្ពុជា បានផ្តល់​អណ្តូងទឹកស្អាត​ចំនួន ៥៦ អណ្តូង តាំងពីឆ្នាំ ២០១០មក ។ដោយឡែកនេះ​ជាជំហានទី៣​ ចំនួន ១៥ ចំណាយ​ទឹកប្រាក់​អស់ ៤១.៨១៥,៩៤ ដុល្លា​អាមេរិក។

 

ពិធីបំពាក់កន្សែងជូន យុវជនកាកបាទក្រហមកម្ពុជា វិទ្យាល័យសំឡូត

សាខាកក្រក​ខេត្តបាត់ដំបង ៖ ​នៅ​ ព្រឹកថ្ងៃទី​ ៣០ ខែមិថុនា​ ឆ្នាំ២០១៧ នេះ​ សាខា​កាកបាទក្រហម​កម្ពុជា ​ខេត្តបាត់ដំបង ​បានរៀបចំ​ពិធីបំពាក់កន្សែង​យុវជន​កាកបាទក្រហម​កម្ពុជា​ ចំនួន៣៣នាក់ ​(ស្រី២០នាក់) នៅវិទ្យាល័យ​ សំឡូត ​ស្រុកសំឡូត​ ដោយមាន​ការចូលរួម​ពីសំណាក់​ឯកឧត្តមបណ្ឌិត​ ប៊ុត គឹមស៊ាន ​ប្រធានគណៈកម្មាធិការ​សាខាខេត្ត ​ឯកឧត្តម សម កុសល នាយក​ នាយកដ្ឋាន​ធនធាន​មនុស្ស​កាកបាទក្រហម​កម្ពុជា និងមាន​ការអញ្ចើញពី​លោក លោកស្រី ​មន្រ្តីសាខា គណៈកម្មាធិការ​អនុសាខាស្រុក​ លោកគ្រូ អ្នកគ្រូ ជាច្រើនរូប ។


ឯកឧត្តម​ថ្លែងថា យុវជន គឺជា​ធនធាន​គន្លឹះ និងមាន​តម្លៃបំផុត​សម្រាប់​ការអភិវឌ្ឍ​សេដ្ឋកិច្ច សង្គមកិច្ច​ វប្បធម៌ បរិស្ថាន និងការរក្សា​សន្តិភាព ហើយនៅ​គ្រប់សម័យកាល​ គ្រប់សង្គម​ យុវជន​ជាកម្លាំងស្រួច​ដែលមានកម្លាំងកាយ​-កម្លាំងចិត្ត និងស្មារតី​ភ្លឺស្វាង​ មានទឹកចិត្ត​ក្លាហាន​ ពុះពារ​មិនរារែក​គ្រប់ឧបសគ្គ ​ការលំបាក​នានា ពិសេស​ យុវជន​គឺជាសសរទ្រូង​របស់ប្រទេសជាតិ​ទាំងនៅ​ពេលបច្ចុប្បន្ន ​និងទៅអនាគត។

 

ជាមួយគ្នានេះ​កាកបាទក្រហម​កម្ពុជា ​បានទទួល​ស្គាល់ថា​ យុវជន​កាកបាទក្រហម​កម្ពុជា ​គឺជាអ្នកស្ម័គ្រចិត្ត​វ័យក្មេង ​ដែលជាកម្លាំង​ស្នូលមួយ​ដ៏មានសារៈសំខាន់​ និងសកម្ម​បំផុត ក្នុងការផ្ដល់​នូវសេវាកម្ម​មនុស្សធម៌ ប្រកប​ដោយការ​ប្ដេជ្ញា​ចិត្តខ្ពស់ ​និងការលះបង់​ឥតងាករេ​ ស្របតាម​ប្រធានបទ​ "សង្រ្គោះជីវិត ផ្លាស់ប្ដូរផ្នត់គំនិត" នៃ​យុទ្ធសាស្ត្រ ២០១១-២០២០ របស់​កាកបាទក្រហម​កម្ពុជា៕ក្នុងឱកាស​នោះឯកឧត្តម​ប្រធាន​គណៈកម្មាធិការ​សាខា​បានឧបត្ថម្ភ​ថវិកា​១០០$ដល់ក្លឹប​យុវជននិង​បានឧបត្ថម្ភ​បង្គន់​អនាម័យ​ចំនួន១ ដល់សាលា​បឋមសិក្សា​អភិវឌ្ឍន៍​សំឡូត​ និងអណ្តូងទឹក​ចំនួន១ដល់​អនុវិទ្យាល័យ​ចម្កង​គួយ​តាមសំណើរ​របស់អនុសាខា​ស្រុកផងដែរ។

កាកបាទក្រហមកម្ពុជា ចូលរួមរំលែកទុក្ខក្រុមគ្រួសារគ្រោះថ្នាក់ចរាចរណ៍

កក្រក ៖ ដោយក្តី​សង្វេគ​ជាពន់ពេក​ចំពោះ​ករណី​ចោរឆក់​បណ្តាល​ឱ្យប្តី-ប្រពន្ធ​មួយគូ​ បានបាត់​ស្លាប់បង់ជីវិត​ និងបន្សល់ទុក​កូនប្រុសតូច​ម្នាក់ឱ្យកំព្រា​ឯការទៀតនោះ​ នៅរសៀល​ថ្ងៃទី​ ៣០ ខែមិថុនា​ ឆ្នាំ២០១៧​ នេះ កាកបាទក្រហម​កម្ពុជា​ ដែលមាន​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ជាប្រធាន​ បានចាត់ឱ្យ ឯកឧត្តម​វេជ្ជ.​ អ៊ុយ​ សំអាត​ នាយក​នាយកដ្ឋាន​គ្រប់គ្រង​គ្រោះមហន្តរាយ​ និងយុវជន​កាកបាទក្រហម​កម្ពុជា ​ចូលរួម​រំលែកទុក្ខ​ដ៏ក្រៀមក្រំ​ និងនាំយក​បច្ច័យ​ គ្រឿងឧបភោគ-​បរិភោគ ​ទៅចូលរួម​បុណ្យសព លោក មាន ពិសី អាយុ២៨ឆ្នាំ និង​លោកស្រី ខាន់ ច័ន្ទវត្តី អាយុ២៧ឆ្នាំ ដែលបាន​ទទួលមរណភាព​កាលពីវេលាម៉ោង ២១ម៉១០នាទី ថ្ងៃទី២៨ ខែមិថុនា ឆ្នាំ២០១៧ ដោយ​គ្រោះថ្នាក់ចរាចរណ៍​ក្នុងពេល​ចោរឆក់​ខ្សែក។

 

ពិធី​បុណ្យសព​ធ្វើនៅ​វត្តទឹកថ្លា ស្ថិតនៅ​សង្កាត់ទឹកថ្លា ​ខណ្ឌសែនសុខ ​រាជធានីភ្នំពេញ។  ក្នុងសមានទុក្ខ​ដ៏ក្រៀមក្រំនេះ​ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ប្រធាន​កាកបាទក្រហម​កម្ពុជា ​សូមចូលរួម​រំលែកទុក្ខ​ដ៏ក្រៀមក្រំ​ជាមួយ​ក្រុមគ្រួសារ​សព​ និងសូមឧទ្ទិស​បួងសួង​ដល់វិញ្ញាណក្ខន្ធ ​ប្ដីប្រពន្ធ​ទាំងពីរ ​បានទៅកាន់​សុគតិភព​ កុំបីឃ្លៀងឃ្លាត​ឡើយ។

 

សូមបញ្ជាក់ថា ​កាលពី​វេលាម៉ោង​២១ម៉១០នាទី​ ថ្ងៃទី២៨ ​ខែមិថុនា​ ឆ្នាំ២០១៧ ​មានករណី​ចោរឆក់​ខ្សែក មួយ​កើតឡើង​តាមបណ្ដោយ​ផ្លូវ២១៧ សង្កាត់​ដង្កោ ខណ្ឌដង្កោ ​រាជធានីភ្នំពេញ​។ បន្ទាប់​ចោរឆក់​កាបូប​ពីប្រពន្ធ​ដែលអង្គុយ​ពីក្រោយ​យកទៅ​បានសម្រេច​ ភ្លាមៗនោះ​បុរសជាប្តី​ ក៏ជិះម៉ូតូ​យ៉ាងលឿន​ព្យាយាម​ដេញតាមជនសង្ស័យ​ តែជាអកុសល​ជនរងគ្រោះ​ក៏​ជួបគ្រោះថ្នាក់​ចរាចរ​បណ្តាល​ឱ្យស្លាប់​ទាំងពីរ​នាក់ប្តី​ប្រពន្ធ​ ចោលកូន​តូចដែលមាន​អាយុមួយ​ខួប ដែលរង​របួសធ្ងន់​ផងនោះ​ឱ្យនៅកំព្រា៕

សាខាកក្រកខេត្តសៀមរាបប្រគល់ផ្ទះជូនចាស់ជរាគ្មានទីពឹង

សាខាកក្រកខេត្តសៀមរាប៖ នៅព្រឹក​ថ្ងៃទី​២៩​ ខែមិថុនា​ ឆ្នាំ២០១៧​ ផ្ទះមនុស្សធម៌​ទី២១ ​របស់​សាខា​កាកបាទក្រហម​កម្ពុជា​ ខេត្តសៀមរាប​ ត្រូវបាន​លោកជំទាវ ​គួយ ណាលីន​ អនុប្រធាន​គណៈកម្មាធិការសាខា​ និងសហការី ​ប្រគល់​ជូនគ្រួសារ​ លោកយាយ ​ពួយ រេន ​អាយុ៨៧​ឆ្នាំ ចាស់ជរា​ក្រីក្រ ​គ្មានទីពឹង​រស់នៅភូមិ​កំប្លើប​ ឃុំគោកដូង ​ស្រុកអង្គរជុំ ​ខេត្តសៀមរាប​។ ផ្ទះ​មនុស្សធម៌​នេះមាន​ទំហំ ៤ម៉ែត្រx៥ម៉ែត្រ​ សង់ពីឈើ​ តម្កល់លើ​ជើងតាង​ កម្ពស់​ពីដី១,៥ម៉ែត្រ​ ប្រក់ស័ង្កសី ​ក្រាលក្តារ ​ជញ្ជាំងក្ដារ​ និងតតាក​ប្រវែង ១,៦ម៉ែត្រ ​។

 

មានប្រសាសន៍​ក្នុងឱកាសនោះ​លោកជំទាវ​ គួយ ណាលីន​ ក្នុងនាម​ឯកឧត្តម​បណ្ឌិត​ ឃឹម ប៊ុនសុង​ ប្រធានគណៈកម្មាធិការ​សាខា ​ពិសេសបាន​ពាំនាំ​នូវការផ្ដាំ​ផ្ញើ​សួរសុខទុក្ខ​ពីសម្ដេច​កិត្តិព្រឹទ្ធបណ្ឌិត ​ប៊ុន រ៉ានី ហ៊ុនសែន​ ប្រធានកាកបាទក្រហម​កម្ពុជា​ ដែលតែងតែ​ព្រួយបារម្ភ​ និងយកចិត្តទុ​កដាក់​គិតគូ​ចំពោះ​សុខភាពប្រជាពលរដ្ឋ​គ្រប់រូប​ មិនប្រកាន់វណ្ណៈ ​ពណ៌សម្បុរ​ ជំនឿសាសនា​ ឬនិន្នាការ​នយោបាយ​ណាមួយ​ឡើយ។ លោកជំទាវ​ ក៏បានបន្តថា​ លោកយាយ​ ត្រូវចេះសម្អាត​ ថែរក្សា​ ផ្ទះថ្មីនេះ​ដើម្បីបាន​ជាជម្រក​ដ៏កក់ក្តៅ​តរៀងទៅ។ នេះជាការបង្ហាញ​នូវការយកចិត្តទុកដាក់​ចំពោះប្រជាពលរដ្ឋ​គ្រប់រូប​ពីសំណាក់ថ្នាក់ដឹកនាំ ពិសេសគឺកាកបាទក្រហម​កម្ពុជា ដូច​ដែលបាន​លើកឡើងថា ​“កាកបាទក្រហម​កម្ពុជា​មានគ្រប់ទី​កន្លែង ​សម្រាប់គ្រប់​ៗគ្នា” និង “ទីណាមាន​ទុក្ខលំបាក ​ទីនោះមាន​កាកបាទក្រហម​កម្ពុជា” ។

 

អំណោយ​សង្កត់ផ្ទះ​រួមមាន៖ មុង១ ភួយ១ សារុង១ ក្រមា១ កន្ទេល១ អង្ករ ៥០គីឡូក្រាម មី១កេស ត្រីខ១យួរ ទឹកត្រី១យួរ ទឹកបរិសុទ្ធ៥យួរ សម្ភារៈផ្ទះបាយ និងថវិកាមួយចំនួន។ សម្រាប់លោកតា លោកយាយ ដែលអញ្ជើញ​ចូលរួម​ចំនួន៥០ នាក់ ម្នាក់ៗទទួលបាន​ថវិកាមួយ​ចំនួនផងដែរ។ ជាមួយគ្នា​នេះដែរ​ព្រះតេជគុណ ព្រះនាម សូម សាម៉ន​ ព្រះអនុគណ​ស្រុកអង្គរជុំ ​បានឧបត្ថម្ភ​បន្ថែម​នូវសម្ភារៈផ្ទះបាយ​ មួយ​ចំនួន​ផងដែរ ។

 

វគ្គអប់រំផ្សព្វផ្សាយសុវត្ថិភាពចរាចរណ៍ផ្តោតលើហានិភ័យនៃការបើកបរក្រោមឥទ្ធិពលគ្រឿងស្រវឹង

សាខាកក្រករាជ​ធានីភ្នំពេញ៖ នាព្រឹកថ្ងៃទី​ ២៨​ ខែ​ ​មិថុនា ឆ្នាំ ២០១៧នេះ​ នៅសាកល​វិទ្យាល័យ​អាស៊ី​អឺរ៉ុប ​សាខា​កាកបាទក្រហម​កម្ពុជា​ រាជធានីភ្នំពេញ​ ដឹកនាំដោយ​ លោក​ គ្រួច​ សាមឿន​ នាយក​ប្រតិបត្តិ​សាខា​ បានរៀបចំ​បើកវគ្គ​អប់រំ​ផ្សព្វផ្សាយ​សុវត្ថិភាព​ចរាចរណ៍​ផ្តោតលើ​ហានិភ័យ​នៃការបើកបរ​ក្រោមឥទ្ធិពល​គ្រឿងស្រវឹង​រយៈពេល១ព្រឹក​ ​ជូនដល់ប្អូនៗ​និស្សិត​ប្រចាំ​សាកលវិទ្យាល័យ​ចំនួន៣០០នាក់ ​ដែល​វគ្គនេះ​បានការជួយ​ឧបត្ថម្ភគាំទ្រ​ពីអង្គការ​សម្ព័ន្ធអន្តរជាតិ​ទប់ស្កាត់​ផលប៉ះពាល​នៃគ្រឿងស្រវឹង​( IARD )​ ។

វគ្គអប់រំ​ផ្សព្វផ្សាយ​នេះមាន​គោលបំណងគឺ៖​ 
១.​ ដើម្បីផ្តល់​ចំណេះដឹង​ និងដើម្បីផ្សព្វផ្សាយ​ច្បាប់​ចរារណ៍​ផ្លូវគោក​ ។
២.​ បង្ហាញពី​ស្ថានភាព​គ្រោះថ្នាក់​ចរាចរណ៍​នាពេលបច្ចុប្បន្ន 
៣.​ កត្តាផ្សេងៗ​ដែល​បណ្តាល​ឲ្យមាន​គ្រោះថ្នាក់ចរាចរណ៍ 
៤.​ កត្តាគួរ​យល់ដឹង​ចំពោះការបើក​បរប្រកប​ដោយសុវត្ថិភាព ​ជាពិសេស​បង្ហាញ​ពី ផលប៉ះពាល់​នៃការបើកបរ​ពេលស្រវឹង​ ។

៥ ការពារ​ជីវិតអ្នក​សូមកុំបើក​បរ​ក្រោមឥទ្ធិពល​គ្រឿងស្រវឹង ៕

គ្រួសាររងគ្រោះដោយគ្រោះថ្នាក់ចរាចរណ៍ទទួលអំណោយពីកាកបាទក្រហមកម្ពុជា

កក្រក៖ នា​រសៀល​ថ្ងៃទី​២៨ ​ខែមិថុនា​ ឆ្នាំ២០១៧ ​ឯកឧត្តម​ សម កុសល​ នាយក​ នាយកដ្ឋាន​ធនធាន​មនុស្ស ​កាកបាទក្រហម​កម្ពុជា​ បានអញ្ជើញ​ចុះសួរ​សុខទុក្ខ ​និងនាំយក​អំណោយ​មនុស្សធម៌​របស់​កាកបាទក្រហម​កម្ពុជា ដែលមាន​សម្ដេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ជាប្រធាន ​ជូនដល់​គ្រួសាររងគ្រោះ​ដោយសារ​បាក់ឆ្អឹង​ត្រគាក ឈ្មោះ វង្ស លី ប្រធានគណៈកម្មាធិការ​អនុសាខា​ ស្រុកព្រៃនប់ ​ខេត្តព្រះសីហនុ ​សព្វថ្ងៃ​កំពុងសម្រាក​ព្យាបាល​នៅមន្ទីរពេទ្យ​ ព្រះកុសុមៈ រាជធានីភ្នំពេញ។

 

ឆ្លៀតក្នុង​ឱកាស​នោះដែរ ​ឯកឧត្តម​ បានពាំនាំ​នូវប្រសាសន៍​ផ្ដាំផ្ញើ​សួរសុខទុក្ខ​និង​ក្ដីនឹករលឹក​ពីសំណាក់​សម្ដេច​កិត្តិព្រឹទ្ធបណ្ឌិត​ប្រធាន​កាកបាទក្រហម​កម្ពុជា​ ដែលជានិច្ចកាល​សម្ដេច​តែងតែ​គិតគូរ​សុខទុក្ខ​ប្រជាពលរដ្ឋ​ក្រីក្រ​ដែលមានទុក្ខលំបាក​ ជនរងគ្រោះ ​ជនងាយ​រងគ្រោះ​គ្រប់ប្រភេទ​ ដោយមិន​ប្រកាន់​រើសអើង​ ជាតិសាសន៍​ វណ្ណៈ ​ពណ៍សម្បុរ​ ឬនិន្នាការ​នយោបាយ​អ្វីឡើយ។

 

អំណោយ​ដែល​បានផ្ដល់​ជូនរួម​មាន ៖ ត្រីខ ១យួរ ទឹកដោះ​គោឆៅ​១យួរ មី ១កេស និង​ថវិកាមួយ​ចំនួន​ផងដែរ៕

 

ប្រជាពលរដ្ឋខ្វះខាតជីវភាពក្នុងឃុំក្រពុំឈូក ទទួលអំណោយពីសាខាកក្រកខេត្តតាកែវ

សាខាកក្រក ខេត្តតាកែវ ៖  នាព្រឹក​ ថ្ងៃទី ២៧​ ខែមិថុនា ​ឆ្នាំ ២០១៧​ លោកជំទាវ ​នូ សុវណ្ណនី ​ប្រធានគណៈកម្មាធិការ​សាខា​និងសហការី ​បានអញ្ជើញ​ចុះសួរសុខទុក្ខ​និងនាំយក​អំណោយ​មនុស្សធម៍​ទៅចែក​ជូនគ្រួសារ​ ប្រជាពលរដ្ឋ​ដែលជួប​ការខ្វះ​ខាត​ជីវភាព​សរុប ៥៤ គ្រួសារ ​ក្នុងនោះ​មាន៖ ៣៦ គ្រួសារ​ នៅភូមិ បន្ទាយធ្លាយ​ ឃុំព្រៃខ្លា និង ១៨ គ្រួសារ ក្នុងឃុំ​ក្រពុំឈូក ​ស្រុក​កោះអណ្តែត ​ខេត្តតាកែវ។

 

នាឱកាសនោះ​លោកជំទាវ​ប្រធាន​ ក៍បានមាន​ប្រសាសន៍​ផ្តាំផ្ញើសួរ​សុខទុក្ខ ​និងក្តីនឹក​រលឹកពី​សំណាក់​      សម្តេច​កិត្តិព្រឹទ្ធ​បណ្ឌិត ​ប៊ុន រ៉ានី ហ៊ុនសែន​ ប្រធាន​កាកបាទក្រហម​កម្ពុជា ​ជានិច្ចកាល​សម្តេចតែងតែ ​យកចិត្តទុកដាក់ ​និងផ្តល់​ក្តីអាណិត ​ស្រឡាញ់ ​ចំពោះប្រជាពលរដ្ឋ​រងគ្រោះ​ និងងាយរង​គ្រោះគ្រប់​ប្រភេទ​ គ្រប់ពេល​វេលា​គ្រប់ ទីកន្លែង គ្រប់​ស្រទាប់​វណ្ណៈ ដោយពុំមាន​ប្រកាន់ពូជ​សាសន៍ ឬ និន្នាការ​នយោបាយ​អ្វីឡើយ។


អំណោយ​ដែលផ្តល់​ជូនរួម​មាន : អង្ករ ២៥ គីឡូក្រាម មុង១ភួយ១ សារុង១ ក្រម៉ា១ កន្ទេល១ និងមី ១កេស។

 

កិច្ចប្រជុំពិនិត្យពាក់កណ្តាល កិច្ចព្រមព្រៀងជាមួយគណៈកម្មាធិការអន្តរជាតិកាកបាទក្រហម

កក្រក៖ នាព្រឹក​ថ្ងៃទី​២៧​ ខែមិថុនា​ ឆ្នាំ​២០១៧​ នៅទី​ស្នាក់ការ​កណ្តាល​ កាកបាទ​ក្រហម​កម្ពុជា ​មាន​រៀបចំ​កិច្ចប្រជុំ​ពិនិត្យ​ពាក់កណ្តាល​ កិច្ចព្រមព្រៀង​សហការ​រយៈពេល ​៣ឆ្នាំ២០១៦-២០១៨ រវាង​ កាកបាទក្រហម​កម្ពុជា​និង គណៈកម្មាធិការ​អន្តរជាតិ​កាកបាទក្រហម​ ក្រោម​អធិបតីភាព​ លោកជំទាវ​ម៉ែន ​នារីសោភ័គ ​អគ្គលេខាធិការ​រងទី ១​ កាកបាទក្រហម​កម្ពុជា​ និងលោក រ៉ូម៉ាន់ ផារ៉ាម៉ូនូវ ​ប្រធាន​បេសកកម្ម​ អាយ ស៊ី អរ ស៊ី ប្រចាំកម្ពុជា​ មានការចូលរួម​ពីសំណាក់​ឯកឧត្តម​ លោកជំទាវ​ លោក លោកស្រី​នាយកដ្ឋាន​ពាក់ព័ន្ធ​សរុប​ចំនួន ១៨ នាក់។

 

កិច្ចប្រជុំ​ក្នុង​គោលបំណង​ ចែករំលែក​ និងផ្លាស់ប្តូរ​បទពិសោធន៍​ ដែលទទួល​បានពីការ​បំពេញ​បេសកកម្ម​មនុស្ស​ក្នុងឆ្នាំ២០១៦​ និងឆ្នាំ២០១៧​កន្លង​ និងពិភាក្សា​អំពីបញ្ហា​និង ទិសដៅ​សម្រាប់​អនុវត្ត​បន្ត​ក្នុង​ឆមាសទី២​ ឆ្នាំ២០១៧ និង ឆ្នាំ ២០១៨ ខាងមុខ​បន្តទៀត។

 

 

First Prev 44 45 46 47 48 Next Last