អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

jQuery Carousel
ព័ត៌មានថ្មីៗ

វគ្គផ្សព្វផ្សាយអំពីចលនាអន្តរជាតិកាកបាទក្រហម អឌ្ឍចន្ទក្រហមនៅខេត្តសៀមរាប

សាខាកក្រកខេត្តសៀមរាប៖ នៅព្រឹកថ្ងៃទី៣១ ខែមករា ឆ្នាំ២០១៧ សាលាគរុកោសល្យ និងវិក្រឹតការខេត្តសៀមរាប លោកស៊ុំ សំអន នាយកសាខាកាកបាទក្រហមកម្ពុជាខេត្តសៀមរាប ចូលរួមក្នុងវគ្គផ្សព្វផ្សាយអំពីចលនាអន្តរជាតិកាកបាទក្រហម អឌ្ឍចន្ទក្រហម និងផ្នែកខ្លះនៃច្បាប់មនុស្សធម៌អន្តរជាតិ ជូនដល់គរុសិស្ស ឆ្នាំទី២ ជំនាន់ទី៣៤ នៃសាលាគរុកោសល្យ និងវិក្រឹតការខេត្តសៀមរាបសរុបចំនួន២១៤នាក់ ស្រី១៤៤នាក់ ។

 

មានប្រសាសន៍នាឱកាសនោះលោកនាយកបានឱ្យដឹងថា វគ្គផ្សព្វផ្សាយនេះអនុវត្តឡើងក្នុងគោលបំណងផ្ដល់នូវការយល់ដឹងបន្ថែមអំពីចលនាអន្តរជាតិកាកបាទក្រហម អឌ្ឍចន្ទក្រហម និងផ្នែកខ្លះនៃច្បាប់មនុស្សធម៌អន្តរជាតិឱ្យបានកាន់តែទូលំទូលាយ ជូនដល់គរុសិស្សឆ្នាំទី២ ដែលនឹងត្រូវក្លាយជាលោកគ្រូ អ្នកគ្រូ ហើយត្រូវចេញទៅបំពេញភារកិច្ចរបស់ខ្លួននៅក្នុងសហគមន៍វិញ។ ចំណេះដឹងដែលទទួលបានពីការផ្សព្វ ផ្សាយនេះ សូមប្អូនៗជាគរុសិស្សជួយផ្សព្វផ្សាយបន្តទៀតឱ្យបានកាន់តែទូលំទូលាយនៅក្នុងសហគមន៍របស់ខ្លួន។

 

គ្រួសារសពក្រឡាប់គោយន្តបានទទួលអំណោយពីអនុសាខាកាកបាទក្រហមកម្ពុជាស្រុកសង្គមថ្មី

សាខាកក្រកខេត្តព្រះវិហារ៖ នៅរសៀលថ្ងៃទី​៣០​ខែ​មករា ឆ្នាំ​២០១៧​ នេះ លោក រស់ ហេង ​ប្រធាន​កិត្តិយស ​អនុសាខា​កាកបាទក្រហមកម្ពុជា​ស្រុកសង្គមថ្មី​បាននាំយក​អំណោយ​មនុស្សធម៌​ចំនួន១គ្រួសារ ចូលរួម​រំលែកទុក្ខ​យ៉ាងក្រៀមក្រំ​ជាមួយគ្រួសារសព​ដែលបណ្តាល​មកពីក្រឡាប់ គោយន្ត​សង្កត់ស្លាប់​នៅភូមិប្រធាតុ ឃុំចំរើន​ស្រុកសង្គមថ្មី ខេត្តព្រះវិហារ ។

 

ក្នុងឱកាសនោះ​លោកប្រធាន​កិត្តិយស​អនុសាខាកាកបាទក្រហមកម្ពុជា ស្រុកសង្គមថ្មី បានសំដែងនូវការសោកស្តាយចំពោះការ បាត់បង់សាច់ញាតិជាទីស្រឡាញ់ របស់គ្រួសារសព និងសូមបួងសួងដល់វិញ្ញាណក្ខន្ធសព សូមបានទៅកាន់សុគតិភពកុំបីឃ្លៀង ឃ្លាតឡើយ។

 

ជាមួយគ្នានោះអនុសាខាបាននាំយកសម្ភារៈផ្តល់ជូនរួមមាន ៖ អង្ករ ២០ គីឡូ មី១កេស ត្រីខ ១០កំប៉ុង ទឹកស៊ីអ៊ីវ១ យួរ និងថវិកាមួយចំនួន និងថវិកាលោក សៀង សារិត ២០០,០០០រៀល ផងដែរ។

 

កាកបាទក្រហមកម្ពុជាប្រគល់អណ្តូងទឹកស្អាតជូនស្រុកសៀមបូកស្រុកថាឡាបរិវ៉ាត់និងក្រុងស្ទឹងត្រែង

កក្រក ៖ នៅព្រឹកថ្ងៃទី៣១ ខែមករា ឆ្នាំ២០១៧ នេះ កាកបាទក្រហមកម្ពុជា​ដែលមាន​ សម្តេចកិត្តិព្រឹទ្ធបណ្ឌិត ​ប៊ុន រ៉ានី ហ៊ុនសែន ​ជាប្រធាន​បាន​ប្រគល់អណ្តូង​ទឹកស្អាត​ចំនួន២០​( មានលេខរៀងពីទី៥១ ដល់ ទី៧០ )​ ជូនប្រជាជន​ខ្វះខាត​ទឹកប្រើប្រាស់​ចំនួន៣៧៧គ្រួសារ​ស្មើនឹង​មនុស្ស ២,១៨២នាក់​រស់នៅ​ឃុំចំនួន៧​នៃស្រុកសៀមបូក​ស្រុកថាឡាបរិវ៉ាត់​និងក្រុងស្ទឹងត្រែង​ខេត្តស្ទឹងត្រែង។

 

ក្នុងឱកាស​ប្រគល់អណ្តូងទឹក​ទាំងនោះ​ឯកឧត្តម ពិត ចំណាន​សមាជិក​គណៈកម្មាធិការកណ្តាល​កាកបាទក្រហមកម្ពុជា​បានពាំនាំ​ប្រសាសន៍​សួរសុខទុក្ខ​ពីសំណាក់​សម្តេចកិត្តិព្រឹទ្ធបណ្ឌិត​ប្រធានកាកបាទក្រហមកម្ពុជា​និងផ្តាំផ្ញើ​ដល់​ប្រជាពលរដ្ឋទាំងអស់​សូមបញ្ជូនកូនៗ​ទៅ​សាលារៀន​ឱ្យបានគ្រប់ៗគ្នា​ធ្វើជាកូនល្អ​សិស្សល្អ​ពលរដ្ឋល្អ​ក្នុងសង្គមជាតិ​និងចូលរួម​អនុវត្ត​គោលនយោបាយ​ភូមិ-ឃុំ​មានសុវត្ថិភាព ដោយជៀសវាង ឱ្យបានដាច់ខាតនូវការប្រើប្រាស់គ្រឿងញៀន គ្រឿងស្រវឹង ដែលជាប្រភពនៃអំពើហិង្សា ចោរកម្ម និងអសន្តិសុខ។ ទន្ទឹមនឹងនេះ សូមថែរក្សាសុខភាពឱ្យបានល្អដោយត្រូវបរិភោគទឹកដាំពុះហើយចូលរួមដាំដំណាំ ឬបន្លែផ្សេងៗជុំវិញអណ្តូងដើម្បីជាប្រយោជន៍ដល់សហគមន៍និងថែរក្សាសមិទ្ធផលទាំងនេះឱ្យបានគង់វង្សយូរអង្វែង។

 

ជាកិច្ចឆ្លើយតបប្រជាជន អាណាព្យាបាល និងសិស្សានុសិស្ស បានសំដែងនូវការដឹងគុណដោយក្តីរំភើប និងថ្លែងអំណរអរគុណដ៏ជ្រាលជ្រៅបំផុតជូនចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានផ្តល់អំណោយដ៏ថ្លៃថ្លាទាំងនេះ និងសូមប្តេជ្ញាខិតខំថែរក្សារាល់សមិទ្ធផលទាំងនេះឲ្យបានជាប្រយោជន៍ដ៏យូរអង្វែងទៅថ្ងៃអនាគត។

 

សូមបញ្ជាក់ថា គិតចាប់ពីឆ្នាំ២០១០ ដល់ឆ្នាំ ២០១៦ កាកបាទក្រហមកម្ពុជាបានដោះស្រាយបញ្ហាទឹកស្អាតជូនប្រជាពលរដ្ឋរាប់ម៉ឺនគ្រួសារនៅទូទាំងប្រទេស ក្នុងនោះ បានផ្តល់អណ្តូងទឹកស្អាត (អណ្តូងស្នប់-លូចំរុះ) ស្រះទឹកសហគមន៍ និងស៊ីទែនទឹកបានចំនួនរាប់ពាន់ហើយបាននិងកំពុងផ្តល់ជូនប្រជាពលរដ្ឋជាបន្តបន្ទាប់ទៀត៕

កាកបាទក្រហមកម្ពុជាសួរសុខទុក្ខលោកយាយ យិន ហេនអតីតជំនួយការរដ្ឋបាលរបស់កាកបាទក្រហមកម្ពុជា

កក្រក ៖​រសៀលថ្ងៃទី​៣១​ខែមករា​ឆ្នាំ២០១៧​នេះ លោកជំទាវ ​ពុំ ចន្ទីនី ​អគ្គលេខាធិការ​កាកបាទក្រហមកម្ពុជា​និងសហការី​បានអញ្ជើញ​ចុះសួរសុខទុក្ខ​លោកយាយ ​យិន ហេន ​អាយុ​៨៧ឆ្នាំ​អតីត​ជំនួយការ​រដ្ឋបាល​និងជានិវត្តន៍ជន​កាកបាទក្រហមកម្ពុជា​ដែលមាន​ជំងឺរលាក​ប្រព័ន្ធប្រសាទទី៧​មានអាការៈទាញមាត់​និងពិបាក​ក្នុងការទំពា​អាហារ​ដែលកំពុងសម្រាក​នៅគេហដ្ឋាន​ស្ថិតនៅផ្លូវ២១០​សង្កាត់ទឹកល្អក់៣​ខណ្ឌទួលគោក​រាជធានីភ្នំពេញ។

 

ទន្ទឹមនឹង​គ្រឿងឧបភោគ-បរិភោគ សម្ភារៈប្រើប្រាស់​និងថវិកាមួយចំនួន​ជាអំណោយមនុស្សធម៌​កាកបាទក្រហមកម្ពុជា​លោកជំទាវអគ្គលេខាធិការ​បានផ្តាំផ្ញើសួរសុខទុក្ខ​ពីសំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ប្រធានកាកបាទក្រហមកម្ពុជា ជូនដល់លោកយាយ យិន ហេន​ត្រូវខិតខំថែរក្សា​សុខភាព និងទៅតាមដានជំងឺនេះជាមួយលោកគ្រូពេទ្យឲ្យបានទៀងទាត់ កុំឲ្យជំងឺនេះឈានទៅរកសភាពធ្ងន់ធ្ងរជាងនេះ និងជូនពរលោកយាយឆាប់ជាសះស្បើយ។

 

ស្រ្តីឆ្លងទន្លេស្លាប់កូននិងមានជីវភាពខ្វះខាតទទួលអំណោយពី សាខាកាកបាទក្រហមកម្ពុជាខេត្តព្រះវិហារ

សាខាកក្រក ខេត្តព្រះវិហារ ៖នៅរសៀលថ្ងៃទី​​​​៣០ ខែមករា ឆ្នាំ២០១៧ លោកស្រីហែម សុភ័ក្រមុនី មន្ត្រីសាខាកាកបាទក្រហមកម្ពុជាខេត្តព្រះវិហារ បានចុះសួរសុខទុក្ខនិងនាំយកអំណោយមនុស្សធម៌ទៅចែកជូនដល់គ្រួសារលោកស្រី ស៊ុន សុឃា អាយុ៣៣ឆ្នាំ​ទើបឆ្លងទន្លេរួចស្លាប់កូនហើយមានជីវភាពខ្វះខាតនៅភូមិថ្មី​ សង្កាត់កំពង់ប្រណាក ក្រុងព្រះវិហារ ខេត្តព្រះវិហារ ។

 

នាឱកាសនោះលោកស្រីបានមានប្រសាសន៍ផ្តាំផ្ញើសួរសុខទុក្ខ និងក្តីនឹករលឹកពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាជានិច្ចកាលយកចិត្តទុកដាក់ និងផ្តល់ក្តីអាណិតស្រឡាញ់ចំពោះប្រជាពលរដ្ឋរងគ្រោះ និងងាយរងគ្រោះគ្រប់ប្រភេទគ្រប់ពេលវេលា ទីកន្លែង គ្រប់ស្រទាប់វណ្ណៈដោយពុំមានប្រកាន់ពូជសាសន៍ ឬនិន្នាការនយោបាយអ្វីឡើយ។

 

អំណោយចែកជូនរួមមាន : អង្ករ២០ គីឡូ​ មី១ កេស ត្រីខ ១ យួ​​ ទឹកស៊ីអីវ យួរ មុង១ ភួយ១​ សារុង១ ក្រមា១​​ និងថវិកាមួយចំនួន។

ប្រជាពលរដ្ឋរងគ្រោះដោយអគ្គិភ័យទទួលអំណោយពីសាខាកាកបាទក្រហមកម្ពុជាខេត្តកំពត

សាខាកក្រក ខេត្តកំពត ៖ ព្រឹកថ្ងៃទី២៩ ខែមករា ឆ្នាំ២០១៧ ឯកឧត្តមចាន់ ចេស្តា ប្រធានកិត្តិយសសាខាកាកបាទក្រហមកម្ពុជាខេត្តកំពត រួមដំណើរដោយប្រធានគណៈកម្មាធិការសាខា និងសហការីបានចុះសួរសុខទុក្ខនិងនាំយកអំណោយមនុស្សធម៌ទៅផ្តល់គ្រួសារប្រជាពលរដ្ឋ រងគ្រោះដោយភ្លើងឆេះផ្ទះកាលពីវេលាម៉ោង១២ និង២៥នាទីរំលងអាធ្រាតថ្ងៃទី២៧ ខែមករា ឆ្នាំ២០១៧នៅភូមិកែបថ្មី ឃុំបឹងទូក ស្រុកទឹកឈូ ខេត្តកំពត។

 

នាឱកាសនោះឯកឧត្តមប្រធានកិត្តិយសសាខាបានពាំនាំមកនូវការផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះគ្រួសាររងគ្រោះដោយក្តីសោកស្តាយបំផុត ឯកឧត្តមបានផ្តាំដល់បងប្អូនប្រជាពលរដ្ឋទាំងអស់មេត្តាប្រុងប្រយ័ត្នចំពោះភ្លើងធូប ភ្លើងទៀន ភ្លើងចង្ក្រាន ពីព្រោះពេលនេះជារដូវក្តៅ ។

 

អំណោយដែលផ្តល់ជូនរួមមាន : សាខាឧបត្ថម្ភអង្ករ ៦០គីឡូក្រាម មី ២កេស ត្រីខ ២០កំប៉ុង ទឹកសុទ្ធ២ធុង ក្រមា២ សារុង២ មុង២ ភួយ២ កៅស៊ូតង់២ សម្ភារផ្ទះបាយ ២កញ្ចប់ និងថវិកា មួយចំនួន។

 

ពិធីបំពាក់កន្សែងយុវជនកាកបាទក្រហមកម្ពុជានៅខេត្តបាត់ដំបង

សាខាកក្រកខេត្តបាត់ដំបង ៖ នៅរសៀលថ្ងៃទី២៨ ខែមករា ឆ្នាំ២០១៧ នេះសាខាកាកបាទក្រហម​កម្ពុជាខេត្តបាត់ដំបងបានរៀបចំពិធីបំពាក់កន្សែងយុវជនកាកបាទក្រហមកម្ពុជាចំនួន៥០នាក់ (ស្រី៣៥នាក់) នៅវិទ្យាល័យសង្កែ ស្រុកសង្កែ ដោយមានការចូលរួមពីសំណាក់ឯកឧត្តម ប៊ុត គឹមស៊ាន ប្រធានគណៈកម្មាធិការសាខាខេត្ត និងមានការអញ្ចើញពីលោក លោកស្រី មន្រ្តីសាខា ប្រធានគណៈកម្មាធិការអនុសាខាស្រុក លោកគ្រូ អ្នកគ្រូ ជាច្រើនរូប ។


ឯកឧត្តមថ្លែងថា៖ យុវជនគឺជាធនធានគន្លឹះ និងមានតម្លៃបំផុតសម្រាប់ការអភិវឌ្ឍសេដ្ឋកិច្ច សង្គមកិច្ច វប្បធម៌ បរិស្ថាន និងការរក្សាសន្តិភាព ហើយនៅគ្រប់សម័យកាលគ្រប់សង្គម យុវជនជាកម្លាំងស្រួចដែលមានកម្លាំងកាយ-កម្លាំងចិត្ត និងស្មារតីភ្លឺស្វាងមានទឹកចិត្តក្លាហាន ពុះពារមិនរារែកគ្រប់ឧបសគ្គ ការលំបាកនានា ពិសេស យុវជនគឺជាសសរទ្រូងរបស់ប្រទេសជាតិទាំងនៅពេលបច្ចុប្បន្ន និងទៅអនាគត។

 

ជាមួយគ្នានេះកាកបាទក្រហមកម្ពុជា បានទទួលស្គាល់ថាយុវជនកាកបាទក្រហមកម្ពុជា គឺជាអ្នកស្ម័គ្រចិត្តវ័យក្មេងដែលជាកម្លាំងស្នូលមួយដ៏មានសារៈសំខាន់ និងសកម្មបំផុតក្នុងការផ្ដល់នូវសេវាកម្មមនុស្សធម៌ប្រកបដោយការប្ដេជ្ញាចិត្តខ្ពស់ និងការលះបង់ឥតងាករេស្របតាមប្រធាន បទ "សង្រ្គោះជីវិត ផ្លាស់ប្ដូរផ្នត់គំនិត" នៃយុទ្ធសាស្ត្រ ២០១១-២០២០ របស់កាកបាទក្រហមកម្ពុជា៕

 

គ្រួសាររងគ្រោះដោយអគ្គិភ័យទទួលអំណោយពីសាខាកាកបាទក្រហមកម្ពុជាខេត្តព្រះសីហនុ

សាខាកក្រក ខេត្តព្រះសីហនុ ៖ នៅថ្ងៃទី២៧ ខែមករា ឆ្នាំ២០១៧ លោក​​ គាំ សុខុម នាយករងសាខាកាកបាទក្រហមខេត្តបាននាំអំណោយមនុស្សធម៌ទៅជូនលោក តើ បូរូ អាយុ៣៦ឆ្នាំ រស់នៅភូមិគរគី ឃុំបិតត្រាំង ស្រុកព្រៃនប់ដែលរងគ្រោះដោយអគ្គីភ័យ ។

 

នៅក្នុងពេលនោះដែរ លោក គាំ សុខុម បានពាំនាំនូវក្តីអាណិតអាសូរ សាកសួរសុក្ខទុកនិងក្តីនិករលឹកពីសំណាក់ឯកឧត្តមប្រធានគណះកម្មាធិការសាខា ឯកឧត្តមប្រធានកិត្តិយស ពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចជាកាលផ្តល់ក្តីអាណិតអាសូរ​ចំពោះប្រជាពលរដ្ឋរងគ្រោះគ្រប់ប្រភេទ ដោយមិនគិតពីស្រទាប់វណ្ណៈ ពូជសាសន៏​ ឫនិន្នាការនយោបាយអ្វីឡើយ ។

 

អំណោយដែលបានផ្តល់ជូនមានៈ អង្ករ ៥០គីឡូក្រាម ឃីត១ ( សារ៉ុង ១ ក្រមា ១ ភួយ ១ មុង ១និងសាប៊ូ ១គីឡូក្រាម ) តង់ ១ កន្ទេល ១ មី ១កេះ ទឹកស៊ីអ៊ីវ ១យួរ និងថវិកា ១០០.០០០ រៀល ។

អនុសាខាកាកបាទក្រហមកម្ពុជាខណ្ឌដង្កោចែកអំណោយចាស់ជរានៅសង្កាត់ព្រែកកំពឹស

សាខាកក្រករាជធានីភ្នំពេញ៖​ នាព្រឹកថ្ងៃទី​២៧ ខែ​មករា ឆ្នាំ២០១៧នេះ​ ក្រុមការងារអនុសាខាកាកបាទក្រហមកម្ពុជា​ខណ្ឌដង្កោ​ ​ដឹកនាំដោយលោក នុត​ ​ពុធដារ៉ា ប្រធានកិត្តិយសអនុសាខាបានចុះសាកសួរសុខទុក្ខ​ និងនាំយកអំណោយមនុស្សធម៌របស់កាកបាទក្រហមកម្ពុជាទៅផ្តល់ ជូនប្រជាពលរដ្ឋចាស់ជរា​មានជីវភាពខ្វះខាតចំនួន៥០គ្រួសារដែលរស់នៅសង្កាត់ព្រែកកំពឹស​ ។

 

នាឱកាសនោះ លោកប្រធានកិត្តិយសអនុសាខា បានលើកឡើងពីការយកចិត្តទុកដាក់គិតគូរខ្ពស់ដល់សុខទុក្ខប្រជាពលរដ្ឋយើងនៅតាមមូលដ្ឋានពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដោយមិនប្រកាន់ពីនិន្នាការនយោបាយ​ ជាតិសាសន៍ សាសនា វណ្ណៈ ពណ៌សម្បុរអ្វីទាំងអស់ ពោលគឺ(ទីណាមានការលំបាក ទីនោះមានកាកបាទក្រហមកម្ពុជា) ។

 

អំណោយមនុស្សធម៌ដែលគ្រួសារនីមួយៗទទួលបានរួមមាន៖ អង្ករ៣០គីឡូក្រាម​ មី១កេស ត្រីខ១០កំប៉ុង មុង១ ភួយ១ សារុង១ ក្រមា១ និងថវិកាចំនួន៣ម៉ឺនរៀល​ ៕

 

កាកបាទក្រហមកម្ពុជា ចុះសួរសុខទុក្ខលោក ម៉ា សេរីដែលមានជំងឺមហារីកថ្លើមធ្ងន់ធ្ងរ

កក្រក​ ៖ កាលពីថ្ងៃទី២៩ ខែមករា ឆ្នាំ២០១៧ នេះ​កាកបាទក្រហមកម្ពុជា​ដែលមាន​សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន​តាមរយៈ​លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា​និងសហការីបានអញ្ជើញចុះសួរសុខទុក្ខ និងនាំយកនូវភេសជ្ជៈផ្លែឈើព្រមទាំងថវិកាមួយចំនួនផ្តល់ជូន​លោក ម៉ា សេរី ប្រធានផ្នែកកីឡាប្រចាំក្រុមហ៊ុនCBS មានទូរទស្សន៍​CTN MyTV CTN​ (International)និងទូរទស្សន៍CNC​ដែលកំពុងសម្រាកព្យាបាលជំងឺមហារីកថ្លើមប្រភេទBធ្ងន់ធ្ងរ​នៅមន្ទីរពេទ្យមិត្តភាពខ្មែរ-សូវៀត (ពេទ្យរុស្សី)។

 

ក្នុងឱកាសចុះសួរសុខទុក្ខនោះ​ លោកជំទាវ​អគ្គលេខាធិការរងទី១ បាននាំនូវប្រសាសន៍ផ្តាំផ្ញើសាកសួរសុខទុក្ខរបស់​សម្តេចកិត្តិព្រឹទ្ធបណ្ឌិត​ ប៊ុន រ៉ានី​ ហ៊ុនសែន​ ប្រធានកាកបាទក្រហមកម្ពុជា​ និងសូមជូនពរឱ្យលោក​ ម៉ា សេរី ជម្នះបាននូវជំងឺនាពេលនេះ​ដើម្បីបានបំពេញភារៈកិច្ចផ្នែកកីឡាបំរើជូនទស្សនិកជនទស្សនាបន្តទៀត​ និងដើម្បីជួបជុំផ្តល់ភាពកក់ក្តៅដល់ក្រុមគ្រួសារឡើងវិញ​។​ លើសពីនេះទៅទៀតគឺមិនត្រូវអស់សង្ឃឹមនោះទេព្រោះមានការគាំទ្រ​ និងលើកទឹកចិត្តពីសំណាក់ក្រុមគ្រួសារកូន ចៅ មិត្តភក្តិ និងបងប្អូន​ ជាពិសេសពីថ្នាក់ដឹកនាំរាជរដ្ឋាភិបាល​ និងកាកបាទក្រហមកម្ពុជា​ ដែលបានផ្តល់ជាកម្លាំងចិត្តជាបន្តបន្ទាប់ជាក់ស្តែងដូចជានៅពេលនេះជាដើម។

 

សូមបញ្ជាក់ថា​ លោកម៉ា សេរី បានធ្លាក់ខ្លួនឈឺធ្ងន់ធ្ងរក្នុងរយៈពេល៦ខែចុងក្រោយនេះដោយវិវត្តន៍កាន់តែធ្ងន់ធ្ងរនៅ៤ខែចុងក្រោយ​ និងបានព្យាយាមព្យាបាលជាបន្តបន្ទាប់​ ប៉ុន្តែមិនអាចជាសះស្បើយរហូតបច្ចុប្បន្ននេះបានកំពុងសំរាកព្យាបាលនៅមន្ទីរពេទ្យមិត្តភាពខ្មែរ-សូវៀត បន្ទាប់ ៣០៤​ ជាន់ទី៣​ អគារព្យាបាលមនុស្សចាស់ព្រះសីហនុរាជ៕

 

First Prev 39 40 41 42 43 Next Last