អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

សាខាកាកបាទក្រហមកម្ពុជា ខេត្តព្រះសីហនុ ប្រារព្ធសន្និបាតសាខា អាណត្តិទី៥ (២០១៩-២០២៥)

កក្រក ៖ យោងតាមលក្ខន្តិកៈ និងវិធាន​នៃនីតិក្រមរបស់​កាកបាទក្រហមកម្ពុជា​ ក្នុងផ្នែកទី ៦ វិធានទី ៣៣ ស្តីពីសន្និបាតសាខា​ និងយោងមាត្រា ២៤ កថាខណ្ឌទី​ ៣ នៃលក្ខន្តិកៈកាកបាទក្រហម​កម្ពុជា នៅព្រឹកថ្ងៃចន្ទ ១០កើត ខែពិសាខ​ ឆ្នាំកុរ ឯកស័ក ព.ស ២៥៦៣ ​ត្រូវនឹងថ្ងៃទី ១៣ ​ខែឧសភា ឆ្នាំ២០១៩​ សាខាកាកបាទក្រហមកម្ពុជា ​ខេត្តព្រះសីហនុ បានប្រារព្ធ​សន្និបាតសាខា​កាកបាទក្រហមកម្ពុជា ​ខេត្តព្រះសីហនុ ​អាណត្តិទី៥ (២០១៩-២០២៥)។

សន្និបាតនេះ បានប្រព្រឹត្តទៅក្រោមអធិបតីភាព​ លោកជំទាវ ពុំ ចន្ទីនី ​អគ្គលេខាធិការ កាកបាទក្រហមកម្ពុជា និងអញ្ជើញ​ចូលរួមពី ឯកឧត្តម​ ជាម ហ៊ីម អនុប្រធានកិត្តិយស​អាណត្តិទី៥ ព្រមទាំង​គណៈកិត្តិយស សមាជិក-សមាជិកាពេញសិទ្ធិ ​មន្ត្រីបច្ចេកទេសទី​ស្នាក់ការកណ្តាល​ យុវជនកាកបាទក្រហម​កម្ពុជា អ្នកស្ម័គ្រចិត្តសរុបចំនួន ១៥៥នាក់ នៅសាលប្រជុំ​សាលាខេត្តព្រះសីហនុ។

គោលបំណងសំខាន់នៃ​សន្និបាតនេះគឺ៖ 
១- ពិនិត្យ និងអនុម័តរបាយការណ៍​សកម្មភាពការងារ និងរបាយការណ៍​ហិរញ្ញវត្ថុ ក្នុងអាណត្តិទី៤​ និងផែនការទិសដៅអាណត្តិទី៥ (២០១៩-២០២៥)
២- បោះឆ្នោតជ្រើសរើស ​គណៈកម្មាធិការសាខាអាណត្តិទី៥ 
៣- ប្រកាសសេចក្ដីសម្រេចតែងតាំង​ ប្រធាន អនុប្រធានកិត្តិយសសាខា

ក្នុងឱកាសនោះ សន្និបាតសាខា​ បានបោះឆ្នោតជ្រើសរើស​សមាសភាពគណៈកម្មាធិការ​សាខា អាណត្តិទី៥ ដែលមានសមាសភាព ១៥រូប។ យោងកំណត់​ហេតុកិច្ចប្រជុំលើកទី១​នៃគណៈកម្មាធិការសាខា អាណត្តិទី៥ សម្រេចឯកភាពគ្នាជា​ឯកឆន្ទ ជ្រើសរើស ឯកឧត្តម យន្ត មីន​ ជាប្រធាន ឯកឧត្តម​ លូ គឹមឈន់ ឯកឧត្តម ម៉ាង ស៊ីណេត​ លោកជំទាវ គឹម ញ៉ ជាអនុប្រធាន ​លោកជំទាវ ប្រាក់ ច័ន្ទសុខា​ ហេរញ្ញឹកសាខា និង ឯកឧត្តម ណុប ហេង ជាលេខាធិការ​សាខា។

តំណាងគណៈកម្មាធិការ​សាខាកាកបាទក្រហម​កម្ពុជា ខេតព្រះសីហនុ អាណត្តិទី៥ ឯកឧត្តម យន្ត មីន បានធ្វើការប្តេជ្ញាចិត្តយ៉ាងមុតមាំគឺ៖ 
១/ កាន់ខ្ជាប់នូវគោលការណ៍គ្រឹះទាំង៧​ នៃចលនាអន្តរជាតិកាកបាទក្រហម​ និងអឌ្ឍចន្ទក្រហម មាន៖
-ភាពមនុស្សធម៌ -ភាពមិនលំអៀង -អព្យាក្រឹតភាព -ឯករាជភាព -សេវាកម្មស្ម័គ្រចិត្ត -ឯកភាព និងសកលភាព។
២/ យកចិត្តទុកដាក់ប្រតិបត្តិ​តាមគោលការណ៍​ណែនាំ របស់កាកបាទក្រហមកម្ពុជា​ ដើម្បីបំពេញភារកិច្ចមនុស្សធម៌បានជោគជ័យ។
៣/ រក្សាសាមគ្គីភាព​ក្នុងជួរគណៈកម្មាធិការ​សាខា និងទទួលយកការប្រឹក្សាជាមួយគណៈកិត្តិយសសាខា និងឯកភាពរួមគ្នាដោះស្រាយបញ្ហាប្រឈម ដោយស្មារតី​ទទួលខុសត្រូវខ្ពស់។
៤/ ដឹកនាំតម្រង់ទិស​ ក្រុមប្រតិបត្តិសាខាឱ្យអនុវត្តបាន​ល្អនូវភារកិច្ច ស្របតាមយុទ្ធសាស្រ្ត​កាកបាទក្រហមកម្ពុជា ដែលក្នុងនោះមានវិស័យស្នូល ៤រួមមាន៖ -ការគ្រប់គ្រង​គ្រោះមហន្តរាយ -សុខភាព​ និងការថែទាំសុខភាពសហគមន៍ -លើកកម្ពស់​គោលការណ៍គ្រឹះ និងតម្លៃ​មនុស្សធម៌របស់ចលនា -អភិវឌ្ឍស្ថាប័ន ​និងអភិវឌ្ឍធនធាន បង្កើនគំនិតក្នុងការកៀរគររកមូលនិធិពីសប្បុរសជនពីគ្រប់មជ្ឈដ្ឋាន​ ដើម្បីបម្រើការ​មនុស្សធម៌របស់សាខា និងយកចិត្ត​ទុកដាក់ណែនាំអនុសាខា ឱ្យបំពេញ​ភារកិច្ចមនុស្សធម៌​ឱ្យបានល្អ​ ស្របតាមវិស័យស្នូលទាំង៤នៃយុទ្ធសាស្រ្ត​កាកបាទក្រហមកម្ពុជា។ 
៥/ យកចិត្តទុកដាក់បន្ត​ការងារពង្រីកអ្នកស្ម័គ្រចិត្ត​កាកបាទក្រហមកម្ពុជា​នៅមូលដ្ឋាន និងពង្រឹងសកម្មភាព​អប់រំសុខភាពសហគមន៍។
៦/ យកចិត្តទុកដាក់ពង្រីក​ និងពង្រឹងសកម្មភាពយុវជន​កាកបាទក្រហមកម្ពុជា នៅគ្រឹះស្ថាន​សិក្សា ជាគំរូក្នុងការងារ​មនុស្សធម៌ ​ក្នុងគ្រឹះស្ថានសិក្សា និងសង្គម៕

 

សាខាកាកបាទក្រហមកម្ពុជាខេត្តកណ្តាលប្រារព្ធ ខួបលើកទី១៥៦ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៩

សាខា កក្រក ខេត្តកណ្តាល​ ៖ នៅព្រឹកថ្ងៃសៅរ៍ ៨កើតខែពិសាខ​ ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី ១១ ខែឧសភា ឆ្នាំ២០១៩ ​សាខាកាកបាទក្រហម​កម្ពុជា ខេត្តកណ្តាល​ បានប្រារព្ធមិទ្ទីង​អបអរខួបលើកទី១៥៦ ទិវាពិភពលោក​កាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៩ ​ក្រោមប្រធានបទ “ខ្ញុំ ❤ កាកបាទក្រហមកម្ពុជា” ​នៅបរិវេណទីស្នាក់ការ​សាខា ។ ពិធីនេះបានប្រព្រឹត្ត​ទៅក្រោមអធិបតីភាព​ដ៏ខ្ពង់ខ្ពស់លោកជំទាវ​កិត្តិសង្គហបណ្ឌិត ឃួន សុដារី​អនុប្រធានកាកបាទក្រហម​កម្ពុជា តំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហម​កម្ពុជា និងឯកឧត្តម​បណ្ឌិត ម៉ៅ ភិរុណ ប្រធាន​កិត្តិយសសាខា ព្រមទាំងមាន​ការនិមន្ត និងអញ្ជើញ​ចូលរួមពីគណៈកិត្តិយស ​គណៈកម្មាធិការសាខា សមាជិក​សមាជិកាព្រឹទ្ធសភា​ រដ្ឋសភា រាជរដ្ឋាភិបាល ក្រុមប្រឹក្សា​ខេត្ត គណៈអភិបាលខេត្ត មន្ទីរ-អង្គភាពនានា​ជុំវិញខេត្ត អ្នកស្ម័គ្រចិត្ត ​យុវជនកាកបាទក្រហម​កម្ពុជា សហភាព​សហព័ន្ធយុវជនកម្ពុជាខេត្ត កាយរឹទ្ធិជាតិ​កម្ពុជា ឯកឧត្តម លោកជំទាវ​ លោកឧកញ៉ា តំណាងក្រុមហ៊ុន អាជីវករ សប្បុរសជនជាតិ​ អន្តរជាតិ សរុបប្រមាណ ជាង២,០០០ នាក់។ ការប្រារព្ធ​ទិវានេះក្នុង​គោលបំណង រំឭកដល់ថ្ងៃកំណើត​របស់លោក ហង់រី ឌុយណង់ ដែលជាស្ថាបនិក​របស់កាកបាទក្រហម​អន្តរជាតិ ,ផ្សព្វផ្សាយពីប្រវត្តិ​ចលនាកាកបាទក្រហម ​អឌ្ឍចន្ទក្រហម ,ច្បាប់មនុស្សធម៌​អន្តរជាតិ និងកៀរគររកមូលនិធិពី​សប្បុរសជន ដើម្បីត្រៀម​ឆ្លើយតបឲ្យបានទាន់​ពេលវេលាក្នុងការ​ជួយសង្រ្គោះជនរងគ្រោះ និងងាយរងគ្រោះផងដែរ ។ 
សូមបញ្ជាក់ជូនថា​ ថវិកាដែលទទួល​ពីសប្បុរសជន​នៅក្នុងពិធីនេះ សរុបចំនួន ៦១០,២២២ ដុល្លារ ៕

សាខាកាកបាទក្រហមកម្ពុជាខេត្តកំពង់ធំ នាំយកអំណោយមនុស្សធម៌ ជូនប្រជាពលរដ្ឋ រងផល ប៉ះពាល់ដោយខ្យល់កន្រ្តាក់ ស្ថិតក្នុងស្រុកស្ទោង

សាខាកក្រកខេត្តកំពង់ធំ៖​ នាព្រឹកថ្ងៃសុក្រ៧កើត​ ខែពិសាខ ឆ្នាំកុរ ឯកស័ក ព.ស ២៥៦២ ត្រូវនិង​ថ្ងៃទី ១០ ខែ ឧសភា ឆ្នាំ២០១៩នេះ ឯកឧត្តម សុខ លូ ​ប្រធានគណៈកម្មាធិការ​សាខាកាកបាទក្រហម​កម្ពុជាខេត្តកំពង់ធំ បាននាំយកអំណោយ​មនុស្សធម៌ ទៅផ្តល់ជូន​ប្រជាពលរដ្ឋចំនួន​សរុប៨០ គ្រួសារ ​លើ ៦ ឃុំ ស្មើនិង ២១ភូមិ ដែលរងប៉ះពាល់​ដោយសារខ្យល់កន្រ្តាក់​ក្នុងនោះមាន ​រលំផ្ទះទាំងស្រុង​ចំនួន ១៧ខ្នង របើកដំបូល​ផ្ទះចំនួន ៦៣ខ្នង កាលពីវេលាម៉ោង​ ៥.៣០ នាទី ក្នុងថ្ងៃទី ០៤ ខែ ឧសភា ឆ្នាំ២០១៩ ស្ថិតក្នុង​ស្រុកស្ទោង ខេត្តកំពង់ធំ ។

នៅក្នុងឱកាសនោះ​ដែរឯកឧត្តម សុខ លូ ប្រធានគណៈកម្មាធិការ​សាខាកាកបាទក្រហម​កម្ពុជា ខេត្តកំពង់ធំ បានពាំនាំនូវប្រសាសន៏​ផ្តាំផ្ញើរសាកសួរសុខទុក្ខ​ពីសំណាក់សម្តេច​កិតិ្តព្រឹទ្ធបណ្ឌិត ប៊ុន រានីហ៊ុនសែន ​ប្រធានកាកបាទក្រហមកម្ពុជា ​ចូលរួមសោកស្តាយ​ជាមួយបងប្អូន​ប្រជាពលរដ្ឋ ដែលរងគ្រោះ​ដោយសារខ្យល់​កន្ត្រាក់បណ្តាលឱ្យខូចខាត​ទ្រព្យសម្បត្តិ​អស់ជាច្រេីន និងសូមឱ្យបងប្អូន​មានការប្រុងប្រយ័ត្នខ្ពស់​ នៅពេលភ្លៀងត្រូវបិទទូរស័ព្ទ បើនៅ​តាមទីវាលត្រូវរកកន្លែង​ដែលមាន​សុវត្តិភាពជ្រក ។

បន្ថែមក្នុងពេលនោះដែរ ឯកឧត្តម ​ប្រធានសូមឱ្យប្រជាពលរដ្ឋ​ទាំងអស់សូមបើកបរ​ត្រូវពាក់មួក​សុវត្តិភាព និងសូមមានការ​ប្រុងប្រយ័ត្នខ្ពស់ ត្រូវគោរពច្បាប់​ចរាចរណ៏ ហើយរស់នៅប្រកប​ដោយអនាម័យជានិច្ច ដើម្បីជៀសផុតពី​ជំងឺផ្សេងៗ ។

សម្ភារផ្តល់ជូនក្នុងមួយ​គ្រួសារទទួលបាន ៖ អង្ករ ៣០គីឡូក្រាម មី១កេស ត្រីខ១០ កំប៉ុង មុង១ ភួយ១ សារុង១ ក្រមា ១ ។
ចំណែកគ្រួសាររង​ប៉ះពាល់រលំផ្ទះទាំងស្រុង​ចំនួន ១៧គ្រួសារទទួលបាន អង្ករ៣០គីឡូក្រាម ​មី១កេស ត្រីខ១០កំប៉ុង មុង១ ភួយ១ សារុង១ ក្រមា១ តង់១ កន្ទេល១ ឆ្នាំង២ ។
រួមទាំងប្រគេន​ព្រះសង្ឃ​ក្នុងវត្ត ឈើទាល នូវអង្ករ​ចំនួន ៥០គីឡូក្រាម មី២កេស ត្រីខ ២០កំប៉ុង ទឹកសុទ្ធចំនួន២កេស ទឹកផ្លែឈើ​ចំនួន ២កេស និងថវិកាចំនួនមួយចំនួន៕

 

សាខាកាកបាទក្រហមកម្ពុជាខេត្តព្រៃវែង សួរសុខទុក្ខ គ្រួសាររងគ្រោះដោយសារខ្យល់កន្ត្រាក់ នៅឃុំព្រៃទទឹង និងឃុំស្វាយជ្រុំ ស្រុកមេសាង

សាខាកក្រក ខេត្តព្រៃវែង ៖ នៅថ្ងៃសុក្រ ​៧កើត ខែពិសាខ​ ឆ្នាំកុរ ឯកស័ក ព.ស. ២៥៦២ ត្រូវនឹង ​ថ្ងៃទី១០ ខែឧសភា ឆ្នាំ២០១៩​ ឯកឧត្តម ជា សុមេធី​ ប្រធានគណៈកម្មាធិការ​អនុសាខាខេត្ត បាន​ដឹកនាំគណៈកម្មាធិការសាខា ក្រុមប្រតិបត្ត​សាខា ក្រុមការងារ​អនុសាខាស្រុកមេសាង ​អ្នកស្ម័គ្រចិត្ត យុវជន​កាកបាទក្រហមកម្ពុជា បានចុះសួរសុខទុក្ខ ​និងនាំយកអំណោយ​មនុស្សធម៌ចែកជូន​ដល់គ្រួសាររងគ្រោះដោយសារ​ខ្យល់កន្ត្រាក់ចំនួន ១៩គ្រួសារ (រងគ្រោះធ្ងន់ធ្ងរ ១៦គ្រួសារ និងមធ្យម ៣គ្រួសារ) នៅឃុំព្រៃទទឹង និងឃុំស្វាយជ្រុំ ​ស្រុកមេសាងខេត្តព្រៃវែង។

នាឱកាសនោះ ឯកឧត្តម ជា សុមេធី ​បានពាំនាំនូវប្រសាសន៍ផ្តាំផ្ញើរ​សាកសួរសុខទុក្ខ​ពីសំណាក់​សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហម​កម្ពុជា ដែលជានិច្ចកាល​ សម្តេចតែងតែយកចិត្តទុកដាក់ គិតគូរ​ពីសុខមាលភាព​ប្រជាពលរដ្ឋទូទៅ ដោយមិនប្រកាន់​និន្នាការនយោបាយ​អ្វីឡើយ សម្ដេចក៏តែងតែមានការព្រួយបារម្មណ៍​ ពីសុខទុក្ខប្រជាពលរដ្ឋ​គ្រប់កាលៈតេសៈ ជាពិសេស​បងប្អូនដែលកំពុងទទួលរងគ្រោះថ្នាក់ដោយ​គ្រោះធម្មជាតិ ដែលបំផ្លាញ​នូវទ្រព្យសម្បត្តិ ​និងផលដំណាំដូច្នេះ។

សម្ភារៈផ្តល់ជូនរួមមាន៖ 
-រងគ្រោះធ្ងន់ធ្ងរ​(ប្រភេទ ក)៖ អង្ករ ២៥គ.ក កន្ទេល១ តង់ ១ មី ១កេស ត្រី ខ ១យួរ ឃីត ១កញ្ចប់(មុង ភួយ ក្រមា សារ៉ុង) អាវ ២ និងថវិកាចំនួន ១០០,០០០រៀល។ 
-រងគ្រោះមធ្យម(ប្រភេទ ខ)៖អង្ករ ២៥គ.ក ​កន្ទេល១ មី ១កេស ត្រី ខ ១យួរ ឃីត ១កញ្ចប់(មុង ភួយ ក្រមា សារ៉ុង) អាវ ២​ និងថវិកាចំនួន ៥០,០០០រៀល។

ដោយឡែក ឯកឧត្តម ជា សុមេធី ប្រធាន​គណៈកម្មាធិការសាខា​ បានឧបត្ថម្ភ​ថវិកាផ្ទាល់ខ្លួនបន្ថែមក្នុង ១គ្រួសារ ចំនួន ៥០,០០០រៀល។

 

សាខាកាកបាទក្រហមកម្ពុជា ខេត្តក្រចេះប្រារឰ ខួបទី ១៥៦ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០១៩

សាខាកក្រកខេត្តក្រចេះ ៖ សាខាកាកបាទក្រហម​កម្ពុជា ខេត្តក្រចេះ​ បានប្រារព្វពិធីមិទ្ទិញ​អបអរសាទរខួបលើកទី ១៥៦ ទិវាពិភពលោក​កាកបាទក្រហម អឌ្ឍចន្ទក្រហម ៨ ឧសភា ឆ្នាំ ២០១៩ ក្រោមប្រធានបទ “ខ្ញុំ ❤កាកបាទក្រហមកម្ពុជា” នាព្រឹកថ្ងៃសុក្រ ៧កើត ខែពិសាខ ឆ្នាំកុរ ឯកស័ក ព.ស ២៥៦២ ត្រូវនិងថ្ងៃទី ១០ ខែឧសភា ឆ្នាំ២០១៩​ នៅសាលមហោស្រព​ខេត្តក្រចេះ ក្រោមអធិបតីភាព ​ឯកឧត្តមកិត្តិបណ្ឌិត ​ពេជ្រ ប៊ុនធិន រដ្ឋមន្រ្តីក្រសួង​មុខងារសាធារណៈ ដោយមានការអញ្ជើញ​ចូលរួមពីសំណាក់ ឯកឧត្តម លោកជំទាវ ​លោកឧកញ៉ា លោក លោកស្រី នឹងសប្បុរសជន ​សរុបចំនួន ៥០០ នាក់។

ក្នុងឪកាសនោះឯកឧត្តម ធុន គ្រី​ ប្រធានគណៈកម្មាធិកា​រសាខាកាកបាទក្រហម​កម្ពុជា ខេត្តក្រចេះបានអាននូវរបាយការណ៍​សកម្មភាពរបស់សាខា​ដែលបានធ្វើកន្លង​មក និងមានការអញ្ជើញ​អានសេចក្តីថ្លែងការណ៍របស់សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហមកម្ពុជា ដោយ​ឯកឧត្តម វ៉ា ថន ប្រធាន​កិត្តិយសសាខា រួចមក។

ឯកឧត្តមកិត្តិបណ្ឌិត ពេជ្រ ប៊ុនធិន​ បានមានមតិសំណេះសំណាល នឹងបាន​កោតសរសើរ ចំពោះ​សកម្មភាពរបស់សាខាកាក​បាទក្រហមកម្ពុជា ខេត្តក្រចេះ​ដែលបានធ្វើកន្លងមក​ តែងចុះជួយបាន​ទាន់ពេលវេលា នូវរាល់បញ្ហា និងភាពប្រឈមនានា​ របស់ប្រជាពលរដ្ឋនៅក្នុងមូលដ្ឋានខេត្ត ជាពិសេសឯកឧត្តម បានសង្កត់ធ្ងន់ ទៅលើការដឹកនាំ​ដ៏វៀងវៃ ប្រកបដោយគតិបណ្ឌិត​ និងសន្តានចិត្ត ​របស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ​ដែលធ្វើឲ្យមជ្ឈដ្ឋានជាតិ ​អន្តរជាតិ ទទួលស្គាល់​ តាមរយៈសកម្មភាពមនុស្សធម៌ ទៀងត្រង់ ស្របតាមគោលការណ៍គ្រឹះទាំង ៧​ ប្រការរបស់ចលនា​កាកបាទក្រហមកម្ពុជា ។

ឯកឧត្តមកិត្តិបណ្ឌិត​ បានបញ្ជាក់បន្ថែមថា ថវិកាចូលរួម​ឧបត្ថម្ភរបសសប្បុរសជន​ទាំងអស់ គឺពិតជា​បានចូលរួមធ្វើបុណ្យដ៏​ធំធេងណាស់ ​បើគិតតាមផ្លូវព្រះពុទ្ធ​សាសនា ពីព្រោះថវិកាដែលយើង​គ្រប់គ្នាបានឧបត្ថម្ភនេះ គឺពិតជាបាន​ជួយទៅដល់ដៃ ជនក្រីក្រ ជនងាយ​រងគ្រោះនិង ជនរងគ្រោះ​ដោយគ្រោះ​ធម្មជាតិផ្សេងៗ កុមារកំព្រា កុមារគរថ្លង់​ និងជនចាស់ជរា​គ្មានទីពឹង​យ៉ាងពិតប្រាកដ។

បន្ទាប់មក ឯកឧត្តម​កិត្តិបណ្ឌិត ក៏បានទទួលថវិកា​ឧបត្ថម្ភពីសប្បុរសជន​ដែលបានចូលរួម​ក្នុងឱកាសនោះសរុប​ថវិកាចំនួន 102,611 $ (មួយរយពីរពាន់​ប្រាំមួយរយដប់មួយដុល្លារ)៕

 

សាខាកាកបាទក្រហមកម្ពុជា ខេត្តព្រៃវែងប្រារឰ ខួបទី ១៥៦ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០១៩

សាខាកក្រក ខេត្តព្រៃវែង៖ នៅថ្ងៃព្រហស្បតិ៍​ ៦កើត ខែពិសាខ ឆ្នាំកុរ ឯកស័ក ព.ស. ២៥៦២ ត្រូវនឹង ថ្ងៃទី៩ ខែឧសភា​ ឆ្នាំ២០១៩ សាខា​កាកបាទក្រហមកម្ពុជា ខេត្តព្រៃវែង​ បានរៀបចំប្រារព្ធពិធី​អបអរខួបទី ១៥៦ ទិវា​ពិភពលោក​ កាកបាទក្រហម ​អឌ្ឍចន្ទក្រហម ៨ ឧសភា ២០១៩ ក្រោមប្រធានបទ «ខ្ញុំ ❤️ កាកបាទក្រហមកម្ពុជា»​ ក្នុងគោលបំណង​កៀរគររកមូលនិធិ​ជួយឧបត្ថម្ភគាំទ្រ​ដល់សកម្មភាពមនុស្សធម៌​របស់សាខា។ អង្គពិធី នេះប្រព្រឹត្តិទៅ​ស្ថិតក្រោមអធិបតីភាព ​សម្តេចក្រឡាហោម ស ខេង ឧបនាយករដ្ឋមន្ត្រី​ រដ្ឋមន្ត្រីក្រសួងមហាផ្ទៃ ​ដែលមានអ្នកចូលរួម​សរុប ចំនួន ១,៥០៩នាក់។ ក្នុងទិវានេះ សាខាបាន​ទទួលថវិកាឧបត្ថម្ភ​ពីសប្បុរសជន​គ្រប់មជ្ឍដ្ឋាន​ជាបណ្តោះអាសន្ន​ ចំនួន ៩៣៧,៩០៨ដុល្លារ។ តាមរយះការចូលរួម​ឧបត្ថម្ភគាំទ្រ​ដោយ ស្ម័គ្រចិត្ត របស់សប្បុរសជន​ អាជីវករ ពាណិជ្ជករ ព្រះសង្ឃ និងមន្រ្តី​រាជការគ្រប់​លំដាប់ថ្នាក់​នាពេល នេះ បាន បង្ហាញអោយ​ឃើញពីការចូលរួម​ ជឿជាក់ និងទុកចិត្តមក​លើកាកបាទក្រហម​កម្ពុជា ក្រោមការ​ដឹកនាំដ៍ប៉ិន​ប្រសព្វ របស់ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ប្រធានកាកបាទក្រហម​កម្ពុជា។

កាកបាទក្រហមកម្ពុជា ប្រារឰមិទ្ទីងថ្នាក់ជាតិ អបអរខួបទី ១៥៦ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០១៩

កក្រក​ ៖​ នៅព្រឹកថ្ងៃពុធ​ ៥កេីត ខែពិសាខ ឆ្នាំកុរ​ ឯកស័ក​ ព.ស.២៥៦២ ត្រូវនឹងថ្ងៃទី ៨ ខែឧសភា ឆ្នាំ២០១៩ នេះ កាកបាទក្រហមកម្ពុជា ​ដែលមានសម្តេចព្រះមហាក្សត្រី​ នរោត្តម មុនិនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្តិយស ​និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន​ បានប្រារឰមិទ្ទីងថ្នាក់ជាតិ ​ដើម្បីអបអរខួបទី ១៥៦​ ទិវាពិភពលោក​កាកបាទក្រហម និងអឌ្ឍចន្ទក្រហម ៨ ឧសភា ២០១៩​ ក្រោមប្រធានបទ​ «ខ្ញុំ​ ❤️️ កាកបាទក្រហមកម្ពុជា​» និងអបអរខួប​ ១០០ឆ្នាំ​ នៃការបង្កេីតសហព័ន្ធអន្តរជាតិ​នៃសមាគមកាកបាទក្រហម​ អឌ្ឍចន្ទក្រហម​ (១៩១៩-២០១៩)​ នៅទីស្នាក់ការកណ្ដាល ក្រោមអធិបតីភាពដ៏ខ្ពង់ខ្ពស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

បន្ថែមពីការថ្លែងអំពីវឌ្ឍនភាពរបស់​កាកបាទក្រហមកម្ពុជា ក្នុងឱកាសនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា បានក្រាបបង្គំទូលថ្វាយនូវ​ព្រះមហាករុណាទិគុណដ៏ជ្រាលជ្រៅបំផុត​ថ្វាយ ព្រះករុណា​ ព្រះមហាក្សត្រ និងសម្តេច​ព្រះមហាក្សត្រី​ ព្រះវររាជមាតាជាតិ​ខ្មែរ ជាទីគោរពសក្ការៈដ៏ខ្ពង់ខ្ពស់បំផុត ដែល​ជានិច្ចកាល ព្រះអង្គទាំងទ្វេតែងតែ​ព្រះរាជទាននូវព្រះរាជកិច្ចគាំទ្រគ្រប់កាលៈទេសៈ​ដល់កាកបាទក្រហម​កម្ពុជា និងថ្លែងអំណរគុណដ៏ជ្រាលជ្រៅចំពោះ សម្តេចតេជោ​ ហ៊ុន​ សែន​ នាយករដ្ឋមន្ត្រី ដែលតែងតែបានផ្តល់នូវកិត្តិយ​សអញ្ជេីញជាអធិបតី​ដ៏ខ្ពង់ខ្ពស់ក្នុង​អង្គមិទ្ទីង​ ៨​ ឧសភា​ ជារៀងរាល់ឆ្នាំ​ ព្រមទាំង​ សម្ដេច ឯកឧត្ដម លោកជំទាវ​ លោកឧកញ៉ា លោក លោកស្រី អ្នកនាងកញ្ញា សប្បុរសជនជាតិ-អន្តរជាតិ ទាំងក្នុង និងក្រៅប្រទេស សមាជិកព្រឹទ្ធសភា រដ្ឋសភា រាជរដ្ឋាភិបាល វិស័យឯកជន ដៃគូសហប្រតិបត្តិការ​ទាំងអស់ ដែលតែងតែផ្ដល់​ការគាំទ្រទាំងស្មារតី សម្ភារ និងធនធានហិរញ្ញវត្ថុ ជួយជំរុញឱ្យសមាគមជាតិ​កាកបាទក្រហមមួយនេះ អាចបំពេញបាន​យ៉ាងសក្តិសមនូវតួនាទីជាជំនួយការឱ្យអាជ្ញាធរសាធារណៈ​ក្នុងវិស័យមនុស្សធម៌ និងជាជំហ៊ានៗ​ អាចសម្រេចបាននូវទស្សនៈ វិស័យរួម​ចំណែកពន្លឿនការកាត់បន្ថយភាពក្រីក្រ ការពារសេចក្តីថ្លៃថ្នូរ​របស់មនុស្សជាតិ និងការពារតម្លៃមនុស្សធម៌​របស់អ្នករងគ្រោះ និងអ្នកងាយរងគ្រោះបំផុត។

ជាមួយគ្នានោះ សម្តេចអគ្គមហាសេនាបតី​តេជោ ហ៊ុន សែន នាយករដ្ឋមន្ត្រីនៃ​ព្រះរាជាណាចក្រកម្ពុជា បានសម្តែង​នូវក្តីរីករាយ និងអបអរសាទរ​ចំពោះការប្រារព្ធ​ទិវាពិភពលោកកាកបាទក្រហម និងអឌ្ឍចន្ទក្រហម ព្រមទាំងបាន​វាយតម្លៃខ្ពស់ចំពោះបេសកកម្មរបស់​កាកបាទក្រហមកម្ពុជា ដែលបានធ្វើសកម្មភាព​មនុស្សធម៌កន្លងមក​ក្នុងការជួយ​ដល់ប្រជាពលរដ្ឋ​ងាយរងគ្រោះបំផុត​បានទាន់ពេលវេលា ដែលធ្វើឱ្យពួកគាត់ទទួល​បានភាពល្អប្រសើរ។

ទន្ទឹមនឹងនេះ សម្តេចតេជោនាយករដ្ឋមន្ត្រី​ បានកោតសរសើរ និងថ្លែងអំណរគុណ​យ៉ាងជ្រាលជ្រៅដល់ សប្បុរសជន ជាតិ និងអន្តរជាតិ​ទាំងអស់ ដែលបានចំណាយនូវថវិកាទ្រព្យ​ធនផ្ទាល់ខ្លួន ចូលរួមចំណែកជាមួយសកម្មភាពមនុស្សធម៌​របស់កាកបាទក្រហមកម្ពុជា​ដើម្បីបម្រើលើវិស័យ​មនុស្សធម៌​ ហើយតាមរយៈប្រធាន​បទឆ្នាំនេះ «ខ្ញុំ​ ❤️️ កាកបាទក្រហមកម្ពុជា​» គឺពិតជាមានន័យ​គ្រប់គ្រាន់​សម្រាប់ឆ្លេីយតបនឹង​អ្នកដែល​មានលទ្ធភាពផ្តល់ជំនួយ​ និងអ្នកដែលទទួល​បានផលពីការ​ផ្តល់ជំនួយ​នៃកាកបាទក្រហមកម្ពុជា៕

លោកជំទាវ ទាង អេង ទៀសីហា សួរសុខទុក្ខ ប្រជាពលរដ្ឋរងគ្រោះ ដោយខ្យល់កន្ក្រាក់ និង អគ្គីភ័យ នៅស្រុកអង្គរជុំ ខេត្ត

សាខា កក្រក ខេត្តសៀមរាប៖ នៅព្រឹកថ្ងៃទី ៨ ខែ ឧសភា ឆ្នាំ២០១៩ នៅទីស្នាក់ការ​អនុសាខាកាកបាទក្រហម​ស្រុកអង្គរជុំ ​លោកជំទាវ ​ទាង អេង ទៀសីហា អនុប្រធាន​គណៈកម្មាធិការ​សាខាកាកបាទក្រហម​កម្ពុជា ខេត្តសៀមរាប​ តំណាង​ឯកឧត្តម ​ទៀ សីហា ប្រធាន​គណៈកម្មាធិការ​សាខា និងសហការី​ ជួបសំណេះសំណាល ​និង នាំយកអំណោយ​មនុស្សធម៌ផ្ដល់​ជូនបងប្អូន​ប្រជាពលរដ្ឋ​រងគ្រោះធម្មជាតិ​ដោយខ្យល់កន្ក្រាក់​ និង អគ្គីភ័យ ចំនួន​១២គ្រួសារ មកពី​៣ឃុំ ក្នុងស្រុក​អង្គរជុំ ខេត្តសៀមរាប ក្នុងនោះ​ឃុំស្រែខ្វាវ ​រលំផ្ទះ១ខ្នង របើកដំបូល​ធ្ងន់ធ្ងរ ០៨ខ្នង , ឃុំ គោកដូង របើកដំបូល​ផ្ទះធ្ងន់ធ្ងរ ២ខ្នង និង ឃុំចារ​ឈូក ឆេះផ្ទះ១ខ្នង ។

ក្នុងនាមឯកឧត្តម​ ទៀ សីហា ប្រធាន​គណៈកម្មាធិការ​សាខា លោកជំទាវ ​ទាង អេង ទៀសីហា ក៏បានមានប្រសាសន៍​សំណេះសំណាល​ជាមួយបងប្អូន​ប្រជាពលរដ្ឋ ដែលរងគ្រោះ​រលំផ្ទះ និង អគ្គីភ័យ​ទាំងបីឃុំ ព្រមទាំង​សម្ដែងនូវការ​សោកស្តាយ​ជាពន់ពេក ចំពោះ​បងប្អូនដែលបាន​រងគ្រោះនូវឧបទ្ទេវហេតុ ដោយខ្យល់កន្ទ្រាក់ ធ្វើឲ្យខូចខាត​ផ្ទះសម្បែង ។ លោកជំទាវ​ក៏បានបន្តទៀតថា ក្នុងនាម​កាកបាទក្រហមកម្ពុជា ដែល​មានសម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហមកម្ពុជា មិនដែលទុកឲ្យ​បងប្អូនប្រជាពលរដ្ឋ​រងការលំបាក ក្នុងគ្រោះមហន្តរាយ​ណាមួយដែលបាន​កើតឡើង ក្នុងមូលដ្ឋាន​របស់ប្រជាពលរដ្ឋ​ឡើយ ដូចពាក្យស្លោក​លើកឡើងថា “កាកបាទក្រហមកម្ពុជា​មានគ្រប់ទីកន្លែង សម្រាប់​គ្រប់ៗគ្នា-មិនទុកនរណា​ម្នាក់ចោល ” ខ្ញុំ ♥️ កាកបាទក្រហម​កម្ពុជា ។


អំណោយមនុស្សធម៌​ដែលបានផ្ដល់ជូន​នាឱកាសនោះមាន៖ 
- ចំពោះគ្រួសាររលំផ្ទះ និងឆេះផ្ទះ​មួយគ្រួសារទទួលបាន៖ មុង១ ភួយ១ សារុង១ ក្រមា១ ស័ង្កសី ១៦សន្លឹក មី១កេស ត្រីខ១យួរ អង្ករ៣០គីឡូក្រាម និងថវិកា​១សែន៥ម៉ឺនរៀល (ក្នុងនោះគ្រួសារភ្លើងឆេះផ្ទះបន្ថែមនូវ​សម្ភារៈ ផ្ទះបាយផងដែរ)។
- ចំពោះគ្រួសារ​ប៉ះពាល់ធ្ងន់ធ្ងរមួយ​គ្រួសារទទួល​បាន៖ មុង១,ភួយ១ សារុង១ ក្រមា១ ស័ង្កសី ១០សន្លឹក មី១កេស ត្រីខ១យួរ​ អង្ករ៣០គីឡូក្រាម​ និងថវិកា១សែនរៀល ៕

 

សាខាកាកបាទក្រហមកម្ពុជាខេត្តស្វាយរៀង សួរសុខទុក្ខ គ្រួសាររងគ្រោះដោយខ្យល់កន្ត្រាក់នៅ ឃុំជ្រៃធំ ស្រុករមាសហែក

សាខាកក្រក​ខេត្តស្វាយរៀង៖នៅថ្ងៃអង្គារ ៤កើត ខែពិសាខ ឆ្នាំកុរ សំរឹទ្ធិស័ក ព.ស២៥៦២ ត្រូវនឹង​ថ្ងៃទី ៧ ខែ ឧសភា ឆ្នាំ ២០១៩ ក្រុមការងារ​សាខា​កាកបាទក្រហម​កម្ពុជា​ខេត្តស្វាយរៀង ដឹកនាំដោយលោកជំទាវ ដួង វណ្ណា អនុប្រធាន​កិត្តិយសសាខា និងមានការ​ចូលរួមពី ឯកឧត្តម សៅ សុខា ព្រមទាំងសមាជិក​សមាជិកា​នៃគណៈកម្មាធិការ​សាខា និងក្រុមការងារ​បាននាំយកអំណោយ​មនុស្សធម៌ របស់សាខាចុះ​សួរសុខទុក្ខ និងចែកអំណោយ​ដល់គ្រួសាររង​គ្រោះដោយសារ​ខ្យល់កន្ត្រាក់កាលពីថ្ងៃទី ៥ ខែ ឧសភា ឆ្នាំ ២០១៩ បណ្តាលឲ្យប៉ះពាល់​ផ្ទះប្រជាពលរដ្ឋ​ចំនួន ៥៣ ខ្នង ក្នុងនោះខូចខាត​ទាំងស្រុងចំនួន ៧ ខ្នង ខូចខាត​មួយផ្នែក ៤៦ ខ្នង មកពី ៤ ភូមិក្នុង ឃុំជ្រៃធំ​ ស្រុករមាសហែក និងលង់ទឹកស្លាប់កុមារអាយុ ៣ ឆ្នាំម្នាក់ នៅភូមិម្រាម​ខាងត្បូង ឃុំម្រាម ស្រុករមាសហែក ។


ឆ្លើយតបទៅនឹង​ស្ថានភាពនេះ ឯកឧត្តម សៅ សុខា បានសំដែងនូវការអាណិត​អាសូរដល់ប្រជាពលរដ្ឋ​ដែលរងគ្រោះ ដោយបានខិតខំ​ប្រកបរបររកស៊ី​ចិញ្ចឹមជីវិតមាន​ជីវភាព នឹងផ្ទះសំបែង​រស់នៅសមរម្យ តែមួយរយៈពេលខ្លីតែប៉ុណ្ណោះ​បណ្តាលឲ្យខ្យល់កន្ត្រាក់​បំផ្លាញខូចខាត​ បែកបាត់ផ្ទះសម្បែង​គួរឲ្យសោកស្តាយ ដែលនេះ​ជាបាតុភូតធម្មជាតិ​ដែលយើងនឹកស្មាន​មិនដល់ ។

ឯកឧត្តម ក៏បានផ្តាំផ្ញើ​ដល់បងប្អូនប្រជាពលរដ្ឋ​ទាំងអស់ ត្រូវថែរក្សា​សុខភាព មានអនាម័យ​ល្អក្នុងការរស់នៅ ​ដាំដើមឈើជុំវិញផ្ទះដើម្បីការពារនៅពេលមាន​ខ្យល់បក់បោកខ្លាំង បិទទូរទស្សន៍ ទូរស័ព្ទ រកកន្លែងដែល​មានសុវត្ថិភាព​ពេលមានភ្លៀងផ្គរ មើលថែទាំ​កូនចៅកុំឱ្យលេងទឹក ​ប្រុងប្រយ័ត្នអគ្គីភ័យ​ ហើយប្រឹងប្រែង​ប្រកបរបរ​បន្ថែមទៀត ដើម្បីលើកស្ទួយកម្រិតជីវភាពគ្រួសារ ត្បិតអំណោយដែលបានផ្តល់ជូននាពេលនេះ គឺបានជួយសម្រាលការលំបាកមួយគ្រា​តែប៉ុណ្ណោះ ។ អំណោយដែលបានចែក​ជូនដល់គ្រួសារ​រងគ្រោះទាំង ៥៣ គ្រួសារ ក្នុង ១ គ្រួសារ​ទទួលបាន អង្ករ ៣០ គក្រ កន្ទេលបត់ ១ មី ១ កេស ទឹកស៊ីអ៊ីវ ១ យួ ត្រីខ ១០ កំប៉ុង ឃីត ១ កញ្ចប់ (មុង ភួយ ក្រម៉ា សារុង ) ថវិកា ៥០,០០០ រៀល ។ ដោយឡែក​គ្រួសាររងគ្រោះ​ទាំងស្រុង ៧ គ្រួសារក្នុង ១ គ្រួសារទទួល​បានបន្ថែម ក្រណាត់​កៅស៊ូតង់ ១ ធុងទឹកជ័រ ១ ឆ្នាំងបាយ សម្ល ២ ថវិកា ២០០,០០០ រៀល ។

ចូល​បុណ្យគ្រួសារក្មេង​លង់ទឹកស្លាប់ម្នាក់ អង្ករ ៥០ គ.ក្រ ទឹកសុទ្ធ ១ កេស ទឹកក្រូច ១ កេស ទេយ្យទាន ១ កញ្ចប់ ថវិកា មួយចំនួន ។ ក្នុងឱកាសនោះ ឯកឧត្តម បានឧបត្ថម្ភថវិកាបន្ថែមដល់គ្រួសាររងគ្រោះទាំង ៥៣ គ្រួសារក្នុង ១ គ្រួសារ ថវិកា ២០០,០០០ រៀល ឧបត្ថម្ភដល់កងកម្លាំង និងប្រជាការពារ​ដែលបានជួយរុះរើ​និងសាងសង់ផ្ទះឡើងវិញ​ ថវិកា ៧,០០០,០០០ រៀល និងថវិកាចូលបុណ្យ​ក្មេងលង់ទឹក​តាមរយៈសាខាកាកបាទក្រហម​កម្ពុជាខេត្ត ថវិកា ១,០០០,០០០ រៀល ។

សាខាកាកបាទក្រហមកម្ពុជា ខេត្តសៀមរាប នាំយកអំណោយមនុស្សធម៌ជូនប្រជាពលរដ្ឋរងគ្រោះដោយខ្យល់កន្ត្រាក់នៅឃុំពួកស្រុកពួក

សាខា កក្រក ខេត្តសៀមរាប៖ នៅព្រឹកថ្ងៃទី ០៧ ខែឧសភា ឆ្នាំ២០១៩ លោកជំទាវ ទាង អេង ទៀសីហា អនុប្រធាន​គណៈកម្មាធិការសាខាកាកបាទក្រហម​កម្ពុជា ខេត្តសៀមរាប ​តំណាងឯកឧត្តម ទៀ សីហា ប្រធាន​គណៈកម្មាធិការសាខា ​និងសហការី ​បានអញ្ជើញ​ជួបសំណេះសំណាល​ និងនាំយកអំណោយមនុស្សធម៌​ជូនប្រជាពលរដ្ឋរងគ្រោះ​ដោយខ្យល់កន្ត្រាក់​នៅឃុំពួក(រលំ២ខ្នង-របើក១២ខ្នង)ឃុំសំរោង (របើក៦ខ្នង)​និងឃុំខ្នាត(រលំ២ខ្នង-របើក៧ខ្នង)ស្រុកពួក​ ខេត្តសៀមរាប​ សរុបចំនួន២៩គ្រួសារ ដែលរងគ្រោះ​ក្នុងអំឡុងដើម ​ខែឧសភា ឆ្នាំ២០១៩នេះ (ក្នុងនោះ រលំ៤ខ្នង-របើកដំបូល​ធ្ងន់ធ្ងរ២៥ខ្នង)។

មានប្រសាសន៍​នាឱកាសនោះ លោកជំទាវ​អនុប្រធាន បានពាំនាំ​នូវការផ្ដាំផ្ញើសួរ​សុខទុក្ខពី​សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ក៏ដូចជា​ឯកឧត្តម ទៀ សីហា ប្រធានគណៈកម្មាធិការ​សាខា ដែលតែងតែ​យកចិត្តទុកដាក់​គិតគូរចំពោះសុខទុក្ខ​ប្រជាពលរដ្ឋ​គ្រប់រូប មិនប្រកាន់វណ្ណៈ ពណ៌សម្បុរ ​ជំនឿសាសនា ឬនិន្នាការ​នយោបាយណា​មួយឡើយ។ លោកជំទាវបានសំដែងនូវ​ការសោកស្ដាយ​ចំពោះការខូចខាត​ផ្ទះសំបែង ទ្រព្យសម្បត្តិ​ដែលនេះជា​គ្រោះមហន្តរាយ​គ្មាននរណាម្នាក់ចង់​ជួបប្រទះឡើយ ហើយ​លោកជំទាវក៏​បានបន្តថា ថ្វីត្បិតតែ​អំណោយមនុស្សធម៌​ដែលបាននាំយកមកចែក​ជូនបងប្អូន​នាពេលនេះ មានចំនួន​តិចតួចក្ដី មិនសមល្មម​នឹងការខាតបង់​របស់បងប្អូន តែក៏អាចជួយសម្រាលទុក្ខ​លំបាករបស់បងប្អូន​បានមួយកម្រិត ​ហើយក៏ជាការបង្ហាញ​នូវការយកចិត្តទុកដាក់ចំពោះ​ប្រជាពលរដ្ឋគ្រប់រូបពី​សំណាក់ថ្នាក់ដឹកនាំ​ ពិសេសគឺកាកបាទក្រហម​កម្ពុជា ដែលមានសម្ដេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ​ជាប្រធាន ដូចដែលបាន​លើកឡើងថា “កាកបាទក្រហម​កម្ពុជាមានគ្រប់​ទីកន្លែង សម្រាប់គ្រប់ៗគ្នា -មិនទុកនរណា​ម្នាក់ចោល” ខ្ញុំ ♥️ កាកបាទក្រហមកម្ពុជា។

អំណោយមនុស្សធម៌​ដែលបានផ្ដល់ជូន៖
- គ្រួសាររលំ៖ មុង១ ភួយ១ សារុង១ ក្រមា១ ស័ង្កសី ១៦សន្លឹក មី១កេស ត្រីខ១យួរ អង្ករ៣០គីឡូក្រាម និងថវិកា១សែន៥ម៉ឺនរៀល។
- គ្រួសារប៉ះពាល់ធ្ងន់៖ មុង១ ភួយ១ សារុង១ ក្រមា១ ស័ង្កសី ១០សន្លឹក មី១កេស ត្រីខ១យួរ អង្ករ៣០គីឡូក្រាម និង​ថវិកា ១សែនរៀល។

 

First Prev 2 3 4 5 6 Next Last