អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

jQuery Carousel
ព័ត៌មានថ្មីៗ

វគ្គបណ្តុះបណ្តាល ស្តីពីអនាម័យទឹកស្អាតក្នុងគ្រាមានអាសន្ននៅខេត្តកំពង់ធំ

សាខាកក្រក ខេត្តកំពង់ធំ ៖ ថ្ងៃទី ២១ ខែ វិច្ឆិកា ឆ្នាំ ២០១៧​ កាកបាទក្រហម​កម្ពុជា​ សហការ​ជាមួយសាខា​កាកបាទក្រហម​កម្ពុជា ខេត្តកំពង់ធំ បើកវគ្គ​បណ្តុះបណ្តាល​ ស្តីពីអនាម័យ​ទឹកស្អាត​ក្នុងគ្រាមានអាសន្ន ដល់ប្រធាន​ក្រុមអ្នកស្ម័គ្រចិត្ត​តាមបណ្តា ឃុំគោលដៅ​ចំនួន ៣០ រូប មកពី​ស្រុកស្ទោង និងស្រុកកំពង់ស្វាយ វគ្គនេះ​មានរយៈពេល ៣ ថ្ងៃ ចាប់ពី​ថ្ងៃទី ២១ ដល់ថ្ងៃទី ២៣ ខែ វិច្ឆិកា ឆ្នាំ២០១៧ ដែល​រៀបចំដោយ ការិយាល័យ​ការពារជម្ងឺឆ្លង និងមិនឆ្លង នាយកដ្ឋាន​សុខភាព ក្រោមការ​ឧបត្ថម្ភគាំទ្រ ដោយសមាគមជាតិ​កាកបាទក្រហម​ជប៉ុន តាមរយៈ សហព័ន្ធអន្តរជាតិ​កាកបាទក្រហម អឌ្ឍចន្ទក្រហម ​ប្រចាំតំបន់អាស៊ី-ប៉ាស៊ីហ្វិក ក្រោម​អធិបតីភាព លោក​ជំទាវទូច ស៊ីថុល ហិរញ្ញឹកគណៈកម្មាការសាខា​ខេត្តកំពង់ធំ។

 

កញ្ញា វេនឌី នេអូ មន្ត្រីអនាម័យ​ទឹកស្អាតសហព័ន្ធ​អន្តរជាតិ​កាកបាទក្រហម អឌ្ឍចន្ទ​ក្រហម​ប្រចាំតំបន់អាស៊ីប៉ាស៊ីហ្វិក​បានលើកឡើងថា វគ្គបណ្តុះបណ្តាល​នេះមានគោលបំណង ចង់ឲ្យសិក្ខាកាម​យល់ដឹងអំពីគោលការណ៍ ​និងវិធីសាស្ត្រក្នុង​ការអនុវត្តន៍​ស្តីពីអនាម័យ​ទឹកស្អាតក្នុង​គ្រាអាសន្ន យល់ដឹង​អំពីជម្ងឺផ្សេងៗដែលទាក់ទង​អនាម័យទឹកស្អាត​ក្នុងគ្រាអាសន្ន​ និងការលើកកម្ពស់​ផ្នែកសុខភាព ស្វែងយល់​អំពីការដំឡើង ប្រើប្រាស់​និង ថែទាំឧបករណ៍​បន្សុទ្ធទឹកប្រភេទAP700CL ។

 

ក្នុងមតិសំណេះ​សំណាល លោកជំទាវ ទូច ស៊ីថុល បានលើកឡើង​ថាការផ្គត់ផ្គង់​ទឹកស្អាត គឺពិតជា​មានសារសំខាន់​ណាស់ ដែលយើង​ទាំងអស់​ត្រូវយកចិត្ត​ទុកដាក់ ព្រោះទឹកវាប្រពភ​នៃជីវិតដែល​យើងត្រូវការ​ប្រើប្រាស់​ប្រចាំថ្ងៃ​ស្របពេល​ដែលអាកាសធាតុ​ប្រែប្រួល គ្រោះមហន្តរាយ​ផ្សេងៗ ដើម្បីចូលរួម​ចំណែកឲ្យមានប្រសិទ្ធភាព​ក្នុងការលើកកម្ព​ស់សុខភាព និងថែទាំ​សុខភាពក្នុង​សហគមន៍​បងប្អូនត្រូវ​ការប្រើប្រាស់​ទឹកស្អាត ។

 

លោកជំទាវបានផ្តាំផ្ញើ ដល់សិក្ខាកាមទាំងអស់​ត្រូវយកចំនេះដឹង​ដែលបានសិក្សារៀនសូត្រយកទៅផ្សព្វផ្សាយដល់បងប្អូន​ប្រជាពលរដ្ឋនៅក្នុងសហគមន៍ឲ្យបានទូលំទូលាយ​ដើម្បីសុខមាលភាពនិងយកឧបករណ៍បន្សុទ្ធទឹកប្រើប្រាស់ឲ្យចំគោលដៅ ។ ត្រូវធ្វើការផ្សព្វផ្សា​យដល់ប្រជាជន ឲ្យពួកគាត់ចេះ​ថែរក្សា និងជួយជួសជុល​ក្នុងការករណី​មានការខូចខាត​តិចតួច ឲ្យគាត់​យល់ថា គាត់គឺជាម្ចាស់​កម្មសិទ្ធិរួមនៃឧបករណ៍​នោះផងដែរ។

 

វគ្គបំប៉នស្តីពី យេនឌ័រ និងពិពិធភាព នៅខេត្តស្វាយរៀង

សាខាកក្រកខេត្ត​ស្វាយរៀង៖នៅថ្ងៃទី ២១ ខែ វិច្ឆិកា ឆ្នាំ ២០១៧ នៅទីស្នាក់ការ​សាខាកាកបាទក្រហមកម្ពុជា​ខេត្តស្វាយរៀង បានបើកបំប៉ន​ស្តីពី (យេនឌ័រ និង​ពិពិធភាព) វគ្គបណ្តុះបណ្តាល​នេះមានរយៈពេល​ពីរថ្ងៃ ចាប់ពីថ្ងៃទី ២១ ដល់ថ្ងៃទី ២២ ខែ វិច្ឆិកា ឆ្នាំ ២០១៧ ដោយមានការ​សម្របសម្រួលពី មន្ត្រីថ្នាក់​កណ្តាលកាកបាទក្រហម​កម្ពុជា និងមន្ត្រីជំនាញ​មកពីក្រសួង​កិច្ចការនារី ។ 


 ក្រោមការឧបត្ថម្ភ​ថវិកាពីសហពន្ធ័​អន្តរជាតិ​កាកបាទក្រហម អឌ្ឈចន្ទក្រហម​ តាមរយៈកាកបាទក្រហម​កម្ពុជា ។


ពិធីនេះបានការអញ្ជើញ​ចូលរួមពី ​លោកជំទាវ មុំ ចន្ធី នាយិការរង​នាយកដ្ឋានសុខភាព ​កាកបាទក្រហមកម្ពុជា លោក សរ វណ្ណា នាយកសាខា ព្រមទាំងលោក​ លោកស្រីជា​ក្រុមប្រតិបត្តិ​សាខាទាំង ២៥ រាជធានីខេត្តសរុបចំនួន ២៦ នាក់ ស្ត្រី ៨ នាក់ ។
 លោកជំទាវ មុំ ចន្ធី បានជម្រាប​ជូនពីគោលបំណង​ នៃវគ្គនេះគឺ​ដើម្បីលើកកម្ពស់​គោលនយោបាយ​យេនឌ័រ និងពិពិធភាព បង្កើនចំណេះដឹង និងសមត្ថភាព អំពីយេនឌ័រ និងពិពិធភាព ដល់មន្ត្រី​កាកបាទក្រហមកម្ពុជា ព្រមទាំងយក​ចំណេះដឹង ទាំងនេះ​ទៅផ្សព្វផ្សាយបន្ត និង សមាហរណកម្ម​នៅក្នុងផែនកា​រអភិវឌ្ឈន៍របស់សាខា ។ 


មានប្រសាសន៍​បើកវគ្គបំប៉ននេះ​លោក សរ វណ្ណា នាយកសាខា តំណាង​ឯកឧត្តម ម៉ែន វិបុល ប្រធានគណៈកម្មាធិការសាខា​ មានប្រសាសន៍​ថា កាកបាទក្រហមកម្ពុជា ក្រោមការ​ដឹកនាំប្រកប​ដោយគតិបណ្ឌិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា បានបង្កើន​ការយកចិត្តទុកដាក់ និងខិតខំ​ប្រឹងប្រែង​យ៉ាងខ្លាំង ដើម្បីអភិវឌ្ឈន៍​ធនធានមនុស្ស​ដែលមានសមត្ថភាព និងបទពិសោធន៍គ្រប់គ្រាន់​ និងប្រកប​ដោយទឹក ចិត្តមនុស្សធម៌ សំដៅចូលរួម​ចំណែក​អភិវឌ្ឈប្រទេសជាតិ ។

ប្រជាជនរងគ្រោះដោយខ្យល់កន្រ្តាក់នៅស្រុកបន្ទាយមាសទទួលអំណោយមនុស្សធម៌

សាខាកក្រក​ខេត្តកំពត ៖ នៅរសៀល​ថ្ងៃទី​ ២០ ខែ វិច្ឆិកា ឆ្នាំ២០១៧ សាខា​កាកបាទក្រហម​កម្ពុជា ​ខេត្តកំពត ដឹកនាំ​ដោយឯកឧត្តម ​លឹម សំបូរ សមាជិក​គណៈកម្មាធិការ​សាខា និង​សហការី ​បានចុះសួរ​សុខទុក្ខ និងនាំ​យកអំណោយ​មនុស្សធម៌​របស់កាកបាទក្រហម​កម្ពុជា ផ្តល់ជូន​ប្រជាពលរដ្ឋ​រងគ្រោះ​ដោយសារខ្យល់កន្ត្រាក់​សរុបចំនួន ៣៤គ្រួសារ មកពីឃុំវត្ត​អង្គខាងជើង ឃុំវត្តអង្គ​ខាងត្បូង ស្រុកបន្ទាយ​មាស ខេត្តកំពត។

 

នាឱកាសនោះ ឯកឧត្តម បាន​ពាំនាំមក​នូវប្រសាសន៍​ផ្តាំផ្ញើ​សួរសុខទុក្ខ​ពីសំណាក់​សម្តេច​កិត្តិព្រឹទ្ធ​បណ្ឌិតប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា ដែល​ជានិច្ចកាល សម្តេច​តែងតែ​គិតគូរពីសុខទុក្ខ​របស់បងប្អូនប្រជាពលរដ្ឋ​ដែលជួបការ​លំបាក ទីទ័លក្រ ជនងាយ​រងគ្រោះ មានជំងឺ ដោយមិនប្រកាន់​រើសអើងជាតិសាសន៍ វណ្ណៈ ពណ៌សម្បុរ ឬនិន្នាការ​នយោបាយ​អ្វីឡើយ និងសូ​មឲ្យបងប្អូន​ប្រជាពលរដ្ឋ​ទាំងអស់​ខិតខំថែរក្សា​សុខភាព​ឲ្យបានល្អ និងរស់នៅ​ប្រកបដោយ​អនាម័យ។

 

អំណោយ​ដែលផ្តល់ជូន​រួមមាន ៖ អង្ករ ៣០គីឡូក្រាម ត្រីខ ១០កំប៉ុង មី ១កេស ក្រមា១ មុង១ ភួយ១ សារុង១ និងថវិកាមួយ​ចំនួនផងដែរ៕

 

សាខាកាកបាទក្រហមកម្ពុជា ខេត្តព្រះសីហនុចុះសួរសុខទុក្ខប្រជាជនងាយរងគ្រោះនៅឃុំទួលទទឹង

សាខាកក្រក ខេត្តព្រះសីហនុ ៖ នៅព្រឹក​ថ្ងៃសុក្រ ​ទី១៧ ខែវិច្ឆិកា​ ឆ្នាំ២០១៧ ឯកឧត្តម ​សំ សំអាត អនុប្រធាន​គណៈកម្មាធិការ​សាខា​កាកបាទក្រហមខេត្ត​ រួមដំណើរ ​មន្រ្តីសាខា​ អនុសាខា ​បាននាំអំណោយ​មនុស្សធម៌ ​ទៅជូនលោកស្រី ​ស្វាយ ផុន អាយុ៤៩ ឆ្នាំ រស់នៅភូមិទួលទទឹង១ ឃុំទួលទទឹង ស្រុកព្រៃនប់ ដែល​រងគ្រោះ​ដោយអគ្គីភ័យ ។

 

នៅក្នុងពេល​នោះដែរ ឯកឧត្តម សំ សំអាត បានពាំនាំ​នូវក្តីអាណិត​អាសូរ សាកសួរ​សុក្ខទុក​និងក្តីនិក​រលឹកពីសំណាក់​ឯកឧត្តមប្រធាន​កិត្តិយស ឯកឧត្តម​ប្រធានគណៈកម្មាធិការ​សាខា ពិសេស​សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា ដែលជានិច្ចជាកាល​ផ្តល់ក្តីអាណិត​អាសូរចំពោះ​ប្រជាពលរដ្ឋ​រងគ្រោះ​គ្រប់ប្រភេទ ដោយមិន​គិតពីស្រទាប់​វណ្ណៈ ប្រកាន់ពូជ​សាសន៏ ឫនិន្នាការ​នយោបាយអ្វីឡើយ ។ ឯកឧត្តម​សុំឲ្យ​បងប្អូន​ទាំងអស់ មានការប្រុង​ប្រយ័ត្នខ្ពស់ ក្នុងការរៀបចំ​សម្ភារះក្នុង​ផ្ទះឲ្យបានល្អ មុននឹង​ចាកចេញ​ពីផ្ទះសំបែង​ទៅប្រកប​របបចិញ្ចឹមជីវិត ។

 

អំណោយ​ដែលបាន​ផ្តល់ជូនមានៈ អង្ករ ៥០ គីឡូក្រាម តង់ ១ ឃីត១ ( សារ៉ុង ១ ក្រមា ១ ភួយ ១ មុង ១ ) កន្ទេល ១ មី ១កេះ ត្រីខ ១០កំប៉ុង និងថវិកាមួយចំនួន។

 

សាខាកាកបាទក្រហមកម្ពុជា ខេត្តកំពង់ធំចុះសួរសុខទុក្ខប្រជាជនងាយរងគ្រោះនៅឃុំឈូកខ្សាច់

សាខាកក្រក ខេត្តកំពង់ធំ ៖ កាលពី​រសៀលថ្ងៃទី​ ១៦ខែវិច្ឆិកា​ ឆ្នាំ ២០១៧ លោកជំទាវ​ ឃួន ឃុនឌី អនុប្រធាន​គណៈកម្មាធិការ​ សាខាកាកបាទក្រហម​កម្ពុជា ខេត្តកំពង់ធំ និងមន្ត្រី​សាខា អនុ​សាខាស្រុកបារាយណ៍​ បានចុះ​សួរសុខទុក្ខ និងចែក​អំណោយជូន​ដល់ស្ត្រីរងគ្រោះ​ដោយសារមាន​ជងឺមហារីក ចំនួន១នាក់ ស្ត្រីក្រីក្រពិការ គ ថ្លង់ចំនួន ១នាក់ ចាស់ជរា​អាយុ ១០២ឆ្នាំ ១នាក់ ចាស់ជរាអាយុ ៩០ឆ្នាំ២ នាក់ គ្រួសារទីទល់ក្រ ១នាក់ នៅភូមិ​តាប្រុក ឃុំឈូកខ្សាច់​ ស្រុកបារាយណ៍ ។

 

ក្នុងឱកាសនោះដែរ​ លោកជំទាវ ឃួន ឃុនឌី បានពាំនាំមក​នូវប្រសាសន៍ ផ្តាំផ្ញើរពី​សំណាក់សម្តេច​កិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ជានិច្ចកាល ​សម្តេចតែងតែ​គិតគូដល់​សុខទុក្ខប្រជាពលរដ្ឋ​ដែលមាន​ទុក្ខលំបាក ជនងាយរងគ្រោះ​គ្រប់ប្រភេទ ដូចជាអ្នកផ្ទុក​មេរោគអេដស៍ ជំងឺអេដស៍ ចាស់ជរាគ្មានទីពឹង ស្ត្រីមេម៉ាយគ្មានទីពឹង ស្ត្រីក្រីក្រ​ឆ្លងទន្លេ ដោយ​មិនរើស​អើង វណ្ណ: ជាតិសាសន៍ ពណ៍សម្បុរ ឬនិន្នាការ នយោបាយអ្វីឡើយ។ ក្នុងនោះដែរ​លោកជំទាវ​បានមានមតិ​ផ្តាំផ្ញើដល់​បងប្អូនទាំងអស់ អោយគិតគូរ​ពីសុខភាព និងអានាម័យខ្ពស់ ក្នុងការរស់នៅប្រចាំថ្ងៃ។

 

សំភារៈដែលបាន​ប្រគល់​ជូនក្នុងម្នាក់ៗ មាន : អង្ករចំនួន ៣០គីឡូ មី០១កេស ឃីត ០១កញ្ចប់ ត្រីខ ១០កំប៉ុង និងថវិកាមួយចំនួន។

ពិធីបិទ វគ្គបណ្តុះបណ្តាល កសាងសមត្ថភាព ដល់អ្នកស្មគ្រ័ចិត្ត និងយុវជនកាកបាទក្រហម កម្ពុជា

សាខាកក្រក ខេត្តត្បូងឃ្មុំ ៖ កាលពីរសៀលថ្ងៃទី ១៦ ខែវិច្ឆិកា ឆ្នាំ ២០១៧ នេះ សាខាកាកបាទក្រហម​កម្ពុជា ខេត្តត្បូងឃ្មុំ បានធ្វើពិធី​បិទ វគ្គបណ្តុះបណ្តាល ​កសាងសមត្ថភាព ​ដល់អ្នកស្មគ្រ័ចិត្ត ​និងយុវជនកាកបាទក្រហម​កម្ពុជា ក្រោយពីដំណើរ​ការអស់រយៈពេលបីថ្ងៃ​កន្លងទៅ និងមានអ្នកចូលរួម​ចំនួន ៦២ នាក់នៅសាលាវិទ្យាលយ័ ហ៊ុនសែនខ្នារ ក្នុងឃុំស្រឡប់ ស្រុក​ត្បូងឃ្មុំ ក្រោមអធិបតីភាព ឯកឧត្តម លី ឡេងប្រធាន​គណ:កម្មាធិការ​សាខា កាកបាទក្រហម​កម្ពុជា​ខេត្តត្បូងឃ្មុំ ។

 

នៅក្នុងពិធីនោះ លោក រស់ សុខន នាយករង​សាខា បានឡើងអានរបាយការណ៍​ អំពីលទ្ធផលនៃវគ្គបណ្តុះបណ្តាល ដោយបាន​បង្ហាញថាសិក្ខាកាមម្នាក់ៗ សុទ្ធតែមានការយល់ដឹងខ្ពស់ ក្នុងការសឹក្សាអស់រយៈពេល ៣ថ្ងៃមកនេះ និង​បន្ទាប់មក ឯកឧត្តម​ប្រធាន​គណ:កម្មាធិការ​សាខា បានអញ្ជើញ​ឡើងមានប្រសាសន៍សំណេះសំណាល​ទៅកាន់​បងប្អូន​អ្នកស្មគ្រ័ចិត្ត​និងក្មួយៗយុវជន​ទាំងអស់ ដោយបានគូសបញ្ជាក់ថា កាកបាទក្រហម​កម្ពុជាដែល​មានសម្តេច​កិត្តិព្រឹទ្ធបណ្ឌឹត ប៊ុន រ៉ានី ហ៊ុនសែនជា​ប្រធានបាន​ធ្វើសកម្មភាពមនុស្សធម៌​ជួយជនរងគ្រោះ​គ្រប់ប្រភេទ ដោយ​មិនប្រកាន់ ជាតិសាសន៍ និងនិន្នាការ​អ្វីឡើយ ហើយ​យុវជនក៍ជាចំណែកមួយ​ធ្វើសកម្មភាព​រួមចំណែក ជាកម្លាំង ឲ្យសមាគមជាតិ​ កាកបាទក្រហមបំពេញ​បេសកកម្មមនុស្សធម៌ ជួយជនរង​គ្រោះនានាហើយ​ដែលកន្លងមកក៍ទទួលបាន​ការបំពាក់ឯក​សណ្ឋាន បានជាច្រើនសាលាផង​ដែរនៅក្នុងខេត្ត ។

 

នៅពេលចប់កម្មវិធី​ ឯកឧត្តម ប្រធាន បាន​អញ្ជើញបំពាក់កន្សែង​ក្រហម ដល់យុវជន ទាំង៥០រូប ទីប្រឹក្សាយុវជន២រូប និងក៍បានប្រគល់​កាបូប​ឃីតសង្គ្រោះបឋម ជូនដល់​អ្នកស្មគ្រ័ចិត្ត ភូមិរូង ១០នាក់ផងដែរ ។

 

កិច្ចពិភាក្សាបញ្ចេញទស្សនៈយុវជន ស្តីពី "យុវជនកម្ពុជា រួមចំណែកឈានឆ្ពោះទៅបញ្ចប់អេដស៍"

កក្រក ៖ ដើម្បី​ឈានឆ្ពោះ​ចូលរួម​ទិវាពិភព​លោកប្រយុទ្ធ​នឹងជំងឺ​អេដស៍ ១ ធ្នូ ឆ្នាំ២០១៧ ​ខាងមុខ​នេះ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទ​ក្រហមកម្ពុជា និងជាឥស្សរជន​ឆ្នើមថ្នាក់​ជាតិនៃវេទិកា​ភាពជាអ្នក​ដឹកនាំ​តំបន់អាស៊ី-​ប៉ាស៊ីហ្វិក ​ឆ្លើយតប​មេរោគ​អេដស៍​ និងជំងឺអេដស៍​នៅកម្ពុជា ​បាន​រៀបចំឱ្យមាន​កិច្ចពិភាក្សា​បញ្ចេញ​ទស្សនៈ​យុវជន​ ស្តីពី "យុវជន​កម្ពុជា រួមចំណែក​ឈានឆ្ពោះ​ទៅបញ្ចប់​អេដស៍" ដោយមានការ​បកស្រាយពី​និស្សិតជា​វាគ្មិន​ចំនួន ៥នាក់ មកពី​សាកលវិទ្យាល័យ​ន័រតុន និង ៥នាក់​ទៀត មកពី​សាកលវិទ្យាល័យ​វេស្ទើន។

 

កម្មវិធីនេះប្រព្រឹត្តទៅ​នៅស្ថានីយ៍​ទូរទស្សន៍​ជាតិកម្ពុជា នាថ្ងៃទី ១៥ ខែវិច្ឆិកា ឆ្នាំ២០១៧ នេះ ក្រោម​អធិបតីភាព លោកជំទាវ ឃួន សុដារី អនុប្រធាន​កាកបាទក្រហមកម្ពុជា និងអញ្ជើញ​ចូលរួមពី ថ្នាក់ដឹកនាំ-មន្ត្រីកាកបាទក្រហម​កម្ពុជា អ្នកស្ម័គ្រចិត្ត យុវជន លោកគ្រូ អ្នកគ្រូ និងនិស្សិត សរុបប្រមាណ ១៥០នាក់។

 

សូមបញ្ជាក់ថា ស្ថានីយ៍ទូរទស្សន៍​ជាតិកម្ពុជា និងបណ្តាស្ថានីយ៍​ទូរទស្សន៍មួយ​ចំនួនផ្សេង​ទៀត នឹងធ្វើការចាក់ផ្សាយ​កម្មវិធីនេះ នៅថ្ងៃទី ២៩-៣០ ខែវិច្ឆិកា និងថ្ងៃទី ១ ខែធ្នូ ឆ្នាំ២០១៧ ដើម្បីចូលរួម​ទិវាពិភពលោកប្រយុទ្ធ​នឹងជំងឺ​អេដស៍ ១ ធ្នូ ឆ្នាំ២០១៧ ក្រោមទិស​ស្លោក "ឆាប់ធ្វើ​តេស្តឈាម ឆាប់ព្យាបាល ​ឆ្ពោះទៅបញ្ចប់អេដស៍"៕

វគ្គបំប៉ន គ្រូបង្ហាត់វិជ្ជាសង្គ្រោះបឋម នៅខេត្តសៀមរាប

សាខាកក្រកខេត្តសៀមរាប៖ នៅព្រឹកថ្ងៃទី ១៤ ខែវិច្ឆិកា ឆ្នាំ២០១៧ លោកជំទាវ គួយ ណាលីន ឃឹមប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានអញ្ជើញជាអធិបតីក្នុងពិធីបើកវគ្គបំប៉ន គ្រូបង្ហាត់វិជ្ជាសង្គ្រោះបឋម នៅសណ្ឋាគារ ហាន គង់ ក្នុងខេត្តសៀមរាប។ វគ្គបំប៉ននេះនឹងដំណើរការរយៈពេល៣ថ្ងៃ ចាប់ទី១៤ដល់១៦ ខែវិច្ឆិកា ឆ្នាំ២០១៧ ដោយមានការសហការរវាងកាកបាទក្រហមកម្ពុជា និងកាកបាទក្រហមជប៉ុន ក្នុងគោលបំណង កែតម្រូវ ពិនិត្យបច្ចេកទេស និងសមត្ថភាពគ្រូបង្គោលវិជ្ជាសង្គ្រោះបឋមឡើងវិញនៅតាមសាខានីមួយៗ ដែលមានសិក្ខាកាមចូលរួមចំនួន ៤៥នាក់ មកពី២៥សាខារាជធានី/ខេត្ត។

 

មានប្រសាសន៍នាឱកាសនោះលោកជំទាវបានលើកឡើងថា ទោះបីយើងទាំងអស់គ្នាស្ថិតក្នុងយុគសម័យបច្ចេកវិទ្យាទំនើបក្តី ក៏ការសង្រ្គោះដោយមនុស្សដែលមានចំណេះដឹងជួយដល់ជនរងគ្រោះគ្រប់ប្រភេទ ក្នុងនោះគ្រោះមហន្តរាយដោយធម្មជាតិ ដោយមនុស្ស ពិសេសគ្រោះថ្នាក់ចរាចរណ៍ដែលកើតឡើងស្ទើរតែរាល់ថ្ងៃនោះ នៅតែមានសារៈសំខាន់ និងជាគន្លឹះក្នុងការជួយដល់អាយុជីវិតមនុស្សជាតិដដែល ហើយការងារនេះស្របតាមគោលការណ៍គ្រឹះនៃចលនាអន្តរជាតិ កាកបាទក្រហម អឌ្ឍចន្ទក្រហម ដែលសមាគមជាតិជាសមាជិកទាំងអស់តែងបានប្រកាន់ខ្ជាប់ក្នុងបេសកកម្មមនុស្សធម៌របស់ខ្លួន៕

យុវជនកាកបាទក្រហមកម្ពុជាខេត្តព្រះវិហារចូលរួមច្រូតស្រូវប្រជាជនទីទ័លក្រ

សាខាកក្រក ខេត្តព្រះវិហារ៖នៅព្រឹកថ្ងៃ ទី១៤ ខែ វិច្ឆិកា ឆ្នាំ ២០១៧ នេះលោក បេ នាង ប្រធានកិត្តិយសក្លឹប លោកគ្រូទីប្រឹក្សា និងយុវជនកាកបាទក្រហមកម្ពុជាប្រចាំវិទ្យាល័យរវៀង ចំនួន ១៩ នាក់ ស្រី ១០ នាក់ រួមជាមួយមន្ត្រីរាជការ កងកម្លាំង និងយុវជនសហភាពសហព័ន្ធយុវជនកម្ពុជា ខេត្តព្រះវិហារ បានចូលរួមច្រូតស្រូវ ដោយមានការចូលរួមពីសំណាក់ឯកឧត្តម អ៊ុន ចាន់ដា ប្រធានកិត្តិយស ​សាខាកាកបាទក្រហមកម្ពុជាខេត្តព្រះវិហារ ។

 

 គោលបំណងនៃការការចូលរួមច្រូតស្រូវនេះគឺសំដៅ ជួយប្រជាជនដែលមិនមានកម្លាំងគ្រប់គ្រាន់ ក្នុងការប្រមូលផល រួមមាន ស្ត្រីមេម៉ាយដែលមានកូនច្រើន ចាស់ជរាគ្មានទីពឹង គ្រួសាររស់នៅជាមួយមេរោគអេដស៍ជាដើម។ សូមបញ្ជាក់ជូនថា ការចូលរួមប្រមូលភោគផលស្រូវនេះ គឺយុវជនកាកបាទក្រហមកម្ពុជា​ខេត្ត ព្រះវិហារបានចួលរួមក្នុងសកម្មភាពនេះជារៀងរាល់ឆ្នាំ។

 

 

កាកបាទក្រហមកម្ពុជាប្រគល់អំពូលភ្លើងឋាមពលពន្លឺព្រះអាទិត្យដល់គ្រួសារក្រីក្រ

កក្រក​ ៖​ នៅរសៀលថ្ងៃទី​ ១៣​ ខែវិច្ឆិកា​ ឆ្នាំ២០១៧​ នេះ​ កម្មវិធី​សុវត្ថិភាព​សហគមន៍​នៃទីស្នាក់ការ​កណ្តាល​កាកបាទក្រហម​កម្ពុជា​ បានប្រគល់​អំពូលភ្លើង​ដើរដោយ​ឋាមពល​ពន្លឺព្រះអាទិត្យ​ចំនួន​ ៩០គ្រឿង​ ដល់សាខាកក្រក​ខេត្តពោធិសាត់ ដើម្បី​ចែកជូនបន្ត​ដល់គ្រួសារ​ក្រីក្រតាម​សហគមន៌​ដែលមិនទាន់​មានអគ្គីសនីប្រើប្រាស់។

ក្នុងឱកាសនោះ​ លោក​ មុំ​ ភិរក្ស​ ប្រធានកម្មវិធី​សុវត្ថិភាព​សហគមន៍ ​បានបញ្ជាក់ថា​ នេះជាលើកទី​ ៥ហើយ​ ដែល​កាកបាទក្រហម​កម្ពុជា​ បានទទួល​អំពូលចំនួន​ ៦៦៩គ្រឿង​ ពីសហព័ន្ធ​អន្តរជាតិ​កាកបាទក្រហម​និងអឌ្ឍច័ន្ទក្រហម​តាំងពីឆ្នាំ២០១៣​ ដល់ឆ្នាំ២០១៧នេះ។

សូមបញ្ជាក់ថា​ អំពូលទាំងនេះ​នឹងត្រូវចែក​ជូនដល់មណ្ឌល​សុខភាពដែល​គ្មានភ្លើង​ប្រើប្រាស់​ ក៏ដូចជាគ្រួសារក្រីក្រ​នៅតាមទីជនបទ​ដាច់ស្រយ៉ាល​ក្នុងខេត្តពោធិ៍សាត់៕

First Prev 2 3 4 5 6 Next Last