អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

យុវជនកាកបាទក្រហមកម្ពុជា ចុះជួយសម្រួលចរាចរណ៍នៅតាមគោលដៅ ក្នុងទីរួមខេត្តព្រះសីហនុ

សាខាកក្រកខេត្តព្រះសីហនុ​ ៖ កាលពីថ្ងៃអាទិត្យ ​១២រោច ខែអាសាឍ ឆ្នាំកុរ ​ឯកស័ក ព.ស.២៥៦៣ ​ត្រូវនឹងថ្ងៃទី ២៨ ខែកក្កដា ​ឆ្នាំ២០១៩ ក្រុមការងារសាខា​កាកបាទក្រហមកម្ពុជា ខេត្តព្រះសីហនុ​ បានដឹកនាំកម្លាំងយុវជនកាកបាទក្រហម​កម្ពុជា ចុះជួយសម្រួល​ចរាចរណ៍នៅតាមគោលដៅចំនួន​ ២កន្លែងរួមមាន ស្តុបកាល់តិច និងស្តុបផ្សារលើ ដែល​មានការចូលរួមសម្របសម្រួល​ពីមន្ត្រីសាខា កងកម្លាំង​ប៉ូលីសចរាចរណ៍ខេត្ត គ្រូទីប្រឹក្សាយុវជន និងយុវជន​កាកបាទក្រហមកម្ពុជា​ សរុបចំនួន ៣៤នាក់ (ស្រី ១១នាក់) ​មានរយៈពេល ២ថ្ងៃ ដោយគិតចាប់ថ្ងៃទៅ ២៧ ដល់ទី ​២៨ ខែកក្កដា ឆ្នាំ២០១៩ ដែលប្រព្រឹត្ត​ទៅនៅក្នុងទីរួមខេត្តព្រះសីហនុ។

ការចុះជួយសម្រួល​ចរាចរណ៍នេះ ធ្វើឡើងក្នុងគោលបំណង​ជួយផ្សព្វផ្សាយដល់សាធារណជន​ទូទៅ ដើម្បីយល់ដឹងជាមូលដ្ឋានអំពី​ច្បាប់ចរាចរណ៍ផ្លូវគោក​នៃព្រះរាជាណាចក្រកម្ពុជា ​និងដើម្បីចូលរួម​កាត់បន្ថយនូវអត្រារងគ្រោះថ្នាក់ផ្សេងៗ ដែល​បណ្តាលមកពីការបើកបរ​ខ្វះការប្រុងប្រយ័ត្ន ​និងបើកបរត្រូវមាន​សុជីវធម៌ សីលធម៌ ចេះយោគយល់អធ្យាស្រ័យគ្នា​ទៅវិញទៅមក ដើម្បី​ចៀសវាងនូវគ្រោះថ្នាក់ ចរាចរណ៍​ដែលអាចកើតឡើងជាយថាហេតុ និងជាពិសេស​ក្នុងន័យសំដៅរួមគ្នា​ធ្វើឱ្យចរាចរណ៍ក្នុងខេត្ត ​ក៏ដូចជាក្នុងប្រទេស​យើងទាំងមូលមានរបៀបរៀបរយ​ និងធ្វើដំណើរ​ប្រកបដោយសុវតិ្ថភាព៕

សាខាកាកបាទក្រហមកម្ពុជាខេត្តកណ្តាល ចុះអប់រំផ្សព្វផ្សាយពីសុវត្ថិភាពចរាចរណ៍ ស្ថិតនៅក្នុងសង្កាត់តាខ្មៅ ក្រុងតាខ្មៅ ខេត្តកណ្តាល

សាខា កក្រក ខេត្តកណ្តាល​ ៖ នៅព្រឹកថ្ងៃអាទិត្យ ​១២រោច ខែអាសាឍ ឆ្នាំកុរ ​ឯកស័ក ព.ស.២៥៦៣​ ត្រូវនឹងថ្ងៃទី២៨ ខែកក្កដា ឆ្នាំ២០១៩ ​សាខាកាកបាទក្រហម​កម្ពុជាខេត្តកណ្តាល​ បានដឹកនាំកម្លាំង​យុវជនកាកបាទក្រហមកម្ពុជា និងគ្រូទីប្រឹក្សា ​សរុបចំនួន ២៨ នាក់ ស្រី ១០នាក់ ​បានចុះអប់រំផ្សព្វផ្សាយ​ពីសុវត្ថិភាពចរាចរណ៍ដល់ប្រជាពលរដ្ឋ​ទូទៅ នៅចំណុច​ផ្លូវកែងស្តុបចំនួន​២រួមមាន៖ ផ្លូវកែងស្តុប ( ១១៥-២១ ) និងផ្លូវកែងស្តុប ( ១១០-២១) ស្ថិតនៅក្នុងសង្កាត់​តាខ្មៅ ក្រុងតាខ្មៅ ខេត្តកណ្តាល​។ ចំពោះការចុះអនុវត្ត​ការងារសុវត្ថិភាពចរាចរណ៍នៅតាមស្តុប​គោលដៅនីមួយៗគឺ៖ ក្នុង​គោលបំណងសំដៅជួយដាស់តឿនក្រើន​រម្លឹកបន្ថែមទៀតដល់ប្រជាពលរដ្ឋទូទៅ ដែលបាននិង​កំពុងធ្វើដំណើរតាមដងផ្លូវ ​សូមមានការភ្ញាក់រឭក​ខ្ពស់ ត្រូវចេះគោរពច្បាប់ចរាចរណ៍ ភ្លើងសញ្ញា ​ស្លាកសញ្ញា គំនូសសញ្ញា​ចរាចរណ៍ និងការបើកបរត្រូវ​មានសុជីវធម៌ សីលធម៌ ព្រមទាំងចេះយោគយល់អធ្យាស្រ័យ​ឲ្យគ្នាទៅវិញទៅមក ដើម្បីចៀសវាង​នូវគ្រោះថ្នាក់ចរាចរណ៍ដែល​អាចកើតមានឡើងជាយថាហេតុ និងជាពិសេសក្នុង​ន័យសំដៅរួមគ្នាធ្វើឱ្យចរាចរណ៍​ក្នុងក្រុង ក៏ដូចជានៅទូទាំង​ប្រទេសទាំងមូល មានរបៀបរៀបរយ និង​ការធ្វើដំណើរប្រកប​ដោយសុវតិ្ថភាព ៕

សាខាកាកបាទក្រហមកម្ពុជាខេត្តស្ទឹងត្រែង សួរសុខទុក្ខ គ្រួសាររងគ្រោះដោយសារខ្យល់កន្រ្តាក់ មកពី ឃុំអន្លង់ជ្រៃ ក្នុងស្រុកថាឡបរិវ៉ាត់ ខេត្តស្ទឹងត្រែង

សាខាកក្រកខេត្តស្ទឹងត្រែង៖ នាព្រឹកថ្ងៃសៅរ៍ ១១រោច ខែអាសាឍ​ ឆ្នាំកុរ ឯកស័ក ព.ស.២៥៦៣​ ត្រូវនឹងថ្ងៃទី២៧ ខែកក្កដា ​ឆ្នាំ២០១៩នេះ លោកស្រី សន សុខា​ អនុប្រធានគណៈកម្មាធិការ​សាខាកាកបាទក្រហមកម្ពុជាខេត្តស្ទឹងត្រែង រួមជាមួយ លោក ​លោកស្រី សមាជិក សមាជិកា​ គណៈកម្មាធិការសាខា លោកនាយកប្រតិបត្តិសាខា ប្រធានកិត្តិយស​អនុសាខាស្រុកថាឡាបរិវ៉ាត់​ ក្រុមប្រតិបត្តិសាខា ព្រម​ទាំងយុវជនស្ម័គ្រចិត្តកាកបាទក្រហមកម្ពុជាខេត្តស្ទឹងត្រែង​ បានអញ្ជើញចុះ​សាកសួរសុខទុក្ខនិងនាំយកអំណោយ​ មនុស្សធម៌ ទៅផ្តល់ជូនគ្រួសាររងគ្រោះដោយសារ​ខ្យល់កន្រ្តាក់ចំនួន ២០​ខ្នង ស្មើនឹង២០គ្រួសារ មកពីភូមិអន្លង់ស្វាយ ​ឃុំអូររៃរងគ្រោះ១៨គ្រួសារ, ភូមិអន្លង់ជ្រៃ ឃុំអន្លង់ជ្រៃ​ចំនួន២គ្រួសារ ក្នុងស្រុកថាឡបរិវ៉ាត់ ​ខេត្តស្ទឹងត្រែង។

នាឱកាសនោះ លោកស្រីក៏បានពាំនាំ​ប្រសាសន៍ផ្តាំផ្ញើសាកសួរសុខទុក្ខ​និងក្តីនឹករលឹកពីសំណាក់ឯកឧត្តម ឈាង ឡាក់ ប្រធានគណៈកម្មាធិការ​សាខាកាកបាទក្រហមកម្ពុជាខេត្ត​ ដែលជានិច្ចកាល ឯកឧត្តម តែងតែគិតគូរសុខទុក្ខបងប្អូនប្រជាពលរដ្ឋក្រីក្រ​ជួបទុក្ខលំបាក ជនរងគ្រោះ ​ជនងាយរងគ្រោះ ជាពិសេសជនរងគ្រោះដោយគ្រោះមហន្តរាយខ្យល់​កន្ត្រាក់នេះផ្ទាល់ ដោយមិនប្រកាន់​រើសអើងវណ្ណៈជាតិសាសន៍ ពណ៍សម្បុរ ឬនិន្នាការនយោបាយ​ អ្វីទាំងអស់។

ទន្ទឹមគ្នានេះដែរ​ លោកស្រីក៏បានអំពាវនាវដល់​ប្រជាពលរដ្ឋទាំងអស់ត្រូវ​យកចិត្តទុកដាក់ចំពោះបញ្ហាសុខភាព-អនាម័យ ក្នុងការរស់នៅប្រចាំថ្ងៃ​ ការគោរពច្បាប់ចរាចរណ៍ ការបង្ការជម្ងឺ​ឆ្លងនានា ជាពិសេសជំងឺគ្រុនឈាមដែលកំពុងរាលដាល​យ៉ាងខ្លាំងទៅលើកុមារតូចៗ ហើយក៏សូមឱ្យបងប្អូន​ប្រជាពលរដ្ឋមានការប្រុងប្រយ័ត្នខ្ពស់​ នៅពេលដែល​មានភ្លៀងធ្លាក់ហើយមាន​ខ្យល់ខ្លាំង សូមបងប្អូនប្រជាពលរដ្ឋ​ទាំងអស់រកទីកន្លែងណាដែលមានសុវត្ថិភាព​ដើម្បីធានាបាននូវសុវត្តិភាព​ ក្រែងមានគ្រោះថ្នាក់​កើតឡើងជាយថាហេតុណាមួយ ។

អំណោយដែលបានផ្តល់​ជូនក្នុង១គ្រួសារៗទទួលបាន៖ អង្ករ៣០គក្រ ត្រីខ១យួរ មី១កេស តង់១ ឃីត១កញ្ចប់(អាវ មុង ភួយ សារុង ក្រម៉ា) ថវិកាចំនួន៥០,០០០រៀល​ ព្រមទាំងស័ង្គសី ១៧០សន្លឹក​ ដែកគោលមួក ១២គក្រ ប្រគល់ជូនតាម រយៈអនុសាខាស្រុក ​ដើម្បីបែងចែកជូន​ដល់ប្រជាពលរដ្ឋរងគ្រោះតាមទំហំនៃការខូចខាតជាក់ស្តែង​របស់គ្រួសារនីមួយៗ ។

 

យុវជនកាកបាទក្រហមកម្ពុជាចុះអប់រំសុវត្ថិភាពចរាចរណ៍តាមស្តុបគោលដៅចំនួន២ ក្នុងរាជធានីភ្នំពេញ

សាខាកក្រក​រាជធានីភ្នំពេញ ៖ នាព្រឹកថ្ងៃសៅរ៍​ ១១រោច​ ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី​ ២៧​ ខែ​ កក្កដា​ ឆ្នាំ​ ២០១៩​នេះ​ គម្រោងសុវត្ថិភាពចរាចរណ៍​សាខាកាកបាទក្រហមកម្ពុជា​ រាជធានីភ្នំពេញ​ ដោយមានយុវជន​កាកបាទក្រហមកម្ពុជា​ ចំនួន៤០នាក់ រួមជាមួយគ្រូទីប្រឹក្សាចំនួន២នាក់​ និងមានការចាត់ចែងពី​មន្រ្តីប្រតិបត្តិសាខា បានចុះអប់រំសុវត្ថិភាពចរាចរណ៍​តាមស្តុបគោលដៅចំនួន២​ ក្នុងរាជធានីភ្នំពេញ រួមមាន៖​ ស្តុបណានជីង និងស្តុបដេអិន​ ។

នៅតាមបណ្តាស្តុប​គោលដៅនីមួយៗ​ យុវជនយើងខ្លះ​បានឈរកាន់ទង់បញ្ជាចរាចរណ៍​ ខ្លះឈរអំពាវនាវតាមឧឃោសនស័ព្ទ​ ខ្លះឈរកាន់បដាដែលមាន​ខ្លឹមសារពាក់ព័ន្ធនឹង​សុវត្ថិភាពចរាចរណ៍​ ខិតខំដោយយកចិត្តទុកដាក់​ ក្នុងគោលបំណង​សំដៅជួយដាស់​តឿនក្រើនរំលឹកបន្ថែមទៀត​ដល់ប្រជាពលរដ្ឋយើងដែលធ្វើដំណើរតាមដង​ផ្លូវសូមមានការភ្ញាក់រលឹក ​ចេះគោរពច្បាប់​ចរាចរណ៍ ភ្លើងសញ្ញា ផ្លាកសញ្ញា គំនូសសញ្ញា​ និងបើកបរត្រូវមានសុជីវធម៌ ​សីលធម៌ ចេះ​យោគយល់អធ្យាស្រ័យ​គ្នាទៅវិញទៅមក ដើម្បី​ចៀសវាងនូវ​គ្រោះថ្នាក់ចរាចរណ៍ដែលអាច​កើតឡើងជាយថាហេតុ​ និងជាពិ​សេសក្នុងន័យសំដៅរួមគ្នា​ធ្វើឱ្យចរាចរណ៍ក្នុងរាជធានីភ្នំពេញ ក៏ដូចជាក្នុង​ប្រទេសយើងទាំង​មូលមានរបៀបរៀបរយ​ និងធ្វើដំណើរប្រកប​ដោយសុវតិ្ថភាព​ ៕

 

វគ្គផ្សព្វផ្សាយអប់រំក្នុងសហគមន៍អំពីការបង្ការ និងការពារជំងឺគ្រុនឈាម ដល់ប្រជាពលរដ្ឋ នៅភូមិ តាវែង ឃុំ តាវែងក្រោម ស្រុកតាវែង ខេត្តរតនគិរី

សាខា កក្រក ​ខេត្តរតនគិរី៖ នៅរសៀល​ ថ្ងៃទី ២៦ ខែកក្កដា​ ឆ្នាំ២០១៩ លោក ​ឌឹម ណាត នាយក សាខាកាកបាទក្រហម​ ខេត្តរតនគិរី ​បានដឹកនាំមន្ត្រីសាខា​ និងអ្នកស្ម័គ្រចិត្តប្រចាំ​ស្រុកតាវែង ចំនួន ១៧ នាក់ ស្រី ៧ នាក់​ ចុះផ្សព្វផ្សាយអប់រំក្នុង​សហគមន៍អំពី​ការបង្ការ និងការពារជំងឺ​គ្រុនឈាម ដល់ប្រជាពលរដ្ឋប្រមាណចំនួន​ ១៥៥ នាក់ នៅភូមិ តាវែង​ ឃុំ តាវែងក្រោម ស្រុកតាវែង​ ខេត្តរតនគិរី។

ឆ្លៀតក្នុងឱកាសនោះ​ លោកនាយកក៏បាន​ជម្រាបជូន ពីប្រវត្តិចលនា​កាកបាទ ក្រហម ​អឌ្ឍចន្ទក្រហម និងសកម្មភាព​នានាតាមវិស័យ​ស្នូលទាំង៤របស់​កាកបាទក្រហមកម្ពុជា ។ បន្ទាប់មក​ក៏បានផ្តល់ជូនសារសំខាន់ៗទាក់ទង​នឹងការការពារ ​និងការត្រៀមបង្ការ​ជំងឺគ្រុន ឈាមរួមមាន៖

-ដើម្បីការពារជំងឺ​គ្រុនឈាម ត្រូវរួមគ្នាបំបាត់​ជម្រកមូសខ្លាតាមរយៈ​ការកាប់ឆ្ការព្រៃ និង លាងសំអាតពាងឬអាងទឹក ​ហើយគ្របវាអោយបានជិតល្អ
-កប់ឬកម្ទេចចោល​វត្ថុដក់ទឹកនៅ ជិតផ្ទះ ដូចជា​សំបកកំប៉ុង សំបកកង់ឡាន-ម៉ូតូ ។ល។
-ត្រូវសម្រាន្ត​ក្នុងមុងជានិច្ច និង​ស្លៀកពាក់ខោអាវ​អោយជិតៗ
-ករណីសង្ស័យថា​អ្នកជំងឺមានជំងឺ គ្រុនឈាម​ ដោយមានរោគសញ្ញា​ដូចក្នុងខិត្តប័ណ្ណ ត្រូវបញ្ជូនអ្នកជំងឺទៅមន្ទីរពេទ្យ/មណ្ឌលសុខភាពដើម្បី​ទទួលការព្យាលបាលអោយ​បានត្រឹមត្រូវ។

ផងដែរលោកនាយក​ក៏បានណែនាំបន្ថែម​ដល់អ្នកស្ម័គ្រចិត្ត ​ជួយណែនាំបន្ថែមដល់​ប្រជាពលរដ្ឋក្នុងមូលដ្ឋាន របស់ខ្លួន​ អោយបានយល់ និង​ការចូលរួម ទប់​ស្កាត់ការរីករាលដាលជំងឺគ្រុន​ឈាមទាំងអស់គ្នា ។ ក្នុងនោះសាខា​បានចែកជូន ខិត្តប័ណ្ណ​ អប់រំអំពីការបង្ការ ​និងការពារជំងឺគ្រុនឈាម ​និង សាប៊ូដុំសម្រាប់លាងដៃដល់​អ្នកចូលរួមទាំងអស់ ផងដែរ។

 

វគ្គ ផ្សព្វផ្សាយមូលដ្ឋានគ្រឹះចលនាកាកបាទក្រហម អឌ្ឍចន្ទក្រហម និងវិជ្ជាសង្គ្រោះបឋម ជូនដល់យុវជនកាកបាទក្រហមកម្ពុជា នៅ ឃុំកណ្កែក ស្រុកប្រាសាទបាគង

សាខាកក្រកខេត្តសៀមរាប៖ ​នៅថ្ងៃសុក្រ ១០រោចខែអាសាឍ​ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទទី ២៦ខែកក្កដាឆ្នាំ២០១៩ សាខា​កាកបាទក្រហមកម្ពុជា ខេត្តសៀមរាប​ ការិយាល័យអភិវឌ្ឍសាខា ដឹកនាំ​ដោយលោកលិវ ឡន​ និងមន្រ្តី២រូប បានបើកវគ្គ ផ្សព្វផ្សាយ​មូលដ្ឋានគ្រឹះចលនា​កាកបាទក្រហម អឌ្ឍចន្ទក្រហម ​និងវិជ្ជាសង្គ្រោះបឋម ជូនដល់យុវជន​កាកបាទក្រហមកម្ពុជា​ ចំនួន៤៣នាក់ ស្រី ៣៦នាក់ នៅវិទ្យាល័យ ​ហ៊ុនសែន ស្វាយធំ​ ស្ថិតនៅ ឃុំកណ្កែក ស្រុកប្រាសាទបាគង ​។ វគ្គនេះរៀបចំឡើង ក្នុងគោលបំណងផ្ដល់​នូវចំណេះដឹងអំពីចលនា កាកបាទក្រហម​ អឌ្ឍចន្ទក្រហម អំពីវិជ្ជា​សង្គ្រោះបឋម ដើម្បី បណ្តុះស្មារតី​មនុស្សធម៌ ចេះចែករំលែក ​និងជួយសង្គ្រោះជន​រងគ្រោះដោយ​ឧបទ្ទវហេតុ​ផ្សេងៗ បានទាន់ពេលវេលា ។ ​ហើយនៅចុងបញ្ចប់​នៃកម្មវិធីផ្សព្វផ្សាយ គឹបាន​បញ្រ្ជាបអំពីវិធីកំចាត់​ជំរកមូសខ្លា និងវិធីការពារជម្ងឺ​ គ្រុនឈាម។

 

សាខាកាកបាទក្រហមកម្ពុជា ខេត្តស្វាយរៀង បានប្រារព្ធសន្និបាតសាខា អាណត្តិទី៥

យោងតាមលក្ខន្តិកៈ​ និងវិធាននៃនីតិក្រម​របស់កាកបាទក្រហម​កម្ពុជា ក្នុងផ្នែកទី ៦ វិធានទី ៣៣ ស្តីពីសន្និបាតសាខា ​និងយោងមាត្រា ​២៤ កថាខណ្ឌទី ៣ នៃលក្ខន្តិកៈ​កាកបាទក្រហមកម្ពុជា ​នៅព្រឹកថ្ងៃព្រហស្បតិ៍ ៩រោច ខែអាសាឍ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី ២៥ ខែកក្កដា ឆ្នាំ២០១៩ សាខាកាកបាទក្រហមកម្ពុជា ​ខេត្តស្វាយរៀង បានប្រារព្ធ​សន្និបាតសាខា ​អាណត្តិទី៥ (២០១៩-២០២៥)។ ពិធីនេះធ្វើឡើង​ក្នុងបរិវេណសាលា​ខេត្តស្វាយរៀង។

សន្និបាតនេះ បានប្រព្រឹត្ត​ទៅក្រោមអធិបតីភាព​ លោកជំទាវ ពុំ ចន្ទីនី អគ្គលេខាធិការ​ កាកបាទក្រហមកម្ពុជា និងអញ្ជើញ​ចូលរួមពី លោកជំទាវ ដួង វណ្ណា ​អនុប្រធានកិត្តិយសសាខា ​ឯកឧត្តម ម៉ែន វិបុល ប្រធានគណៈកម្មាធិការ​សាខាអាណត្តិទី៤ និងជាប្រធាន​អង្គសន្និបាត ព្រមទាំង គណៈកិត្តិយស សមាជិក-សមាជិកាពេញសិទ្ធិ​ មន្ត្រីបច្ចេកទេសទីស្នាក់ការ​កណ្តាល ក្រុមប្រតិបត្តិសាខា ​យុវជនកាកបាទក្រហមកម្ពុជា ​សហភាពសហព័ន្ធ​យុវជនកម្ពុជា សរុប ​ចំនួន ២១៣នាក់។

ក្នុងអង្គសន្និបាត​អាណត្តិទី៥នេះដែរ កាកបាទក្រហម​កម្ពុជា ដែលមាន សម្តេចកិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ជាប្រធាន​ បានចាត់តាំង លោកជំទាវ ដួង វណ្ណា​ ជាប្រធានកិត្តិយស​សាខា ឯកឧត្តម ជុំ ហាត និងអនុប្រធាន​កិត្តិយស សរុបចំនួន ៩ រូប។

គោលបំណង​សំខាន់នៃសន្និបាតនេះគឺ៖ 
១- ស្តាប់ និងកែសម្រួល​ និងអនុម័តរបាយការណ៍​សកម្មភាពការងារ និងរបាយការណ៍​ហិរញ្ញវត្ថុ ក្នុងអាណត្តិទី៤ និងផែនការ​ទិសដៅអាណត្តិទី៥ (២០១៩-២០២៥)
២- បោះឆ្នោតជ្រើសរើស​ប្រធានគណៈកម្មាធិការ​សាខាអាណត្តិទី៥ 
៣- ប្រកាសសេចក្ដី​សម្រេចតែងតាំង ប្រធាន​ អនុប្រធានកិត្តិយសសាខា

ក្នុងឱកាសនោះ សន្និបាតសាខា​ បានបោះឆ្នោតជ្រើសរើស​សមាសភាពគណៈកម្មាធិការ​សាខា អាណត្តិទី៥ ដែលមានសមាសភាព ១៥រូប។​ យោងកំណត់ហេតុកិច្ច​ប្រជុំលើកទី១នៃ​គណៈកម្មាធិការសាខា អាណត្តិទី៥ សម្រេចឯកភាព​គ្នាជាឯកឆន្ទ ជ្រើសរើស ​ឯកឧត្តម ម៉ែន វិបុល ជាប្រធាន​គណៈកម្មាធិការសាខា លោកជំទាវ​ ហៅ ច័ន្ទសិរីទេពី​ ចៅ ភិរុណ ជា អនុប្រធាន​គណៈកម្មាធិការសាខា លោកជំទាវ ពៅ សុភាព ហេរញ្ញិក​គណៈកម្មាធិការសាខា​ និងលោកជំទាវ ភួង សារី ​ជាលេខាធិការ​គណៈកម្មាធិការសាខា។

តំណាងគណៈកម្មាធិការ​សាខាកាកបាទក្រហម​កម្ពុជា ខេត្តស្វាយរៀង​ អាណត្តិទី៥ ឯកឧត្តម ម៉ែន វិបុល បានធ្វើការ​ប្តេជ្ញាចិត្តយ៉ាងមុតមាំគឺ 
- កាន់ខ្ជាប់នូវគោលការណ៍​គ្រឹះទាំង៧ នៃចលនាអន្តរជាតិ​កាកបាទក្រហម ​អឌ្ឍចន្ទក្រហម មាន៖ -ភាពមនុស្សធម៌ -ភាពមិនលំអៀង ​-អព្យាក្រឹតភាព -ឯករាជភាព -សេវាកម្មស្ម័គ្រចិត្ត​ -ឯកភាព និងសកលភាព។
~ យកចិត្តទុកដាក់​ប្រតិបត្តិតាមគោលការណ៍ណែនាំ ​របស់កាកបាទក្រហមកម្ពុជា​ ដើម្បីបំពេញភារកិច្ចមនុស្សធម៌បានជោគជ័យ។
~ រក្សាសាមគ្គីភាពក្នុងជួរគណៈកម្មាធិការ​សាខា និងទទួលយកការប្រឹក្សាជាមួយ​គណៈកិត្តិយសសាខា និងឯកភាពរួមគ្នាដោះស្រាយ​បញ្ហាប្រឈម ដោយស្មារីទទួលខុសត្រូវខ្ពស់។
- ដឹកនាំតម្រង់ទិស ក្រុមប្រតិបត្តិ​សាខាឱ្យអនុវត្តបាន​ល្អនូវភារកិច្ច​ ស្របតាមយុទ្ធសាស្រ្តកាកបាទក្រហមកម្ពុជា ដែលក្នុងនោះមាន​វិស័យស្នូល៤រួមមាន៖ -ការគ្រប់គ្រង​គ្រោះមហន្តរាយ -សុខភាព និងការថែទាំសុខភាពសហគមន៍​ -លើកកម្ពស់គោលការណ៍គ្រឹះ ​និងតម្លៃមនុស្សធម៌​របស់ចលនា -អភិវឌ្ឍស្ថាប័ន និងអភិវឌ្ឍ​ធនធាន បង្កើនគំនិត​ក្នុងការកៀរគររក​មូលនិធិពីសប្បុរសជន​ពីគ្រប់មជ្ឈដ្ឋាន ដើម្បីបម្រើការមនុស្សធម៌របស់​សាខា និងយកចិត្ត​ទុកដាក់ណែនាំអនុសាខា ឱ្យ​បំពេញភារកិច្ចមនុស្សធម៌ឱ្យបានល្អ ស្របតាមវិស័យ​ស្នូលទាំង៤ នៃយុទ្ធសាស្រ្ត​កាកបាទក្រហមកម្ពុជា។ 
~ យកចិត្តទុកដាក់បន្តការងារពង្រីក​អ្នកស្ម័គ្រចិត្តកាកបាទក្រហម​កម្ពុជានៅមូលដ្ឋាន និងពង្រឹងសកម្មភាពអប់រំ​សុខភាពសហគមន៍។
- យកចិត្តទុកដាក់​ពង្រីក និងពង្រឹងសកម្មភាព​យុវជនកាកបាទក្រហម​កម្ពុជា នៅគ្រឹះស្ថាន​សិក្សា ជាគំរូក្នុងការងារមនុស្សធម៌​ ក្នុងគ្រឹះស្ថានសិក្សា និងសង្គម។

 

សាខាកាកបាទក្រហមកម្ពុជា ខេត្តកំពង់ធំ សួរសុខទុក្ខ ប្រជាពលរដ្ឋដែលមានជីវភាពខ្វះខាត ចាស់ជរាគ្មានទីពឹង ជនពិការ ស្រ្តីមេម៉ាយគ្មានទីពឹងក្នុងឃុំបាក់ស្នា ស្រុកបារាយណ៍

សាខាកក្រក​ខេត្តកំពង់ធំ៖ នាព្រឹកថ្ងៃពុធ ៨រោច​ ខែអាសាឍ ឆ្នាំកុរ​ ឯកស័ក ព.ស២៥៦៣ ត្រូវនឹងថ្ងៃទី ២៤​ ខែ កក្កដា ឆ្នាំ​ ២០១៩នេះ​ សាខាកាកបាទក្រហម​កម្ពុជា ខេត្តកំពង់ធំ ដឹកនាំ​ដោយ ឯកឧត្តម​ សុខ លូ ប្រធានគណៈកម្មាធិការសាខា​កាកបាទក្រហមកម្ពុជា ​ខេត្តកំពង់ធំ និងសហការី​ បានចុះសាកសួរសុខទុក្ខ​ និងនាំយកអំណោយ​ មនុស្សធម៌ ទៅចែកជូន​ដល់ប្រជាពលរដ្ឋដែល​មានជីវភាពខ្វះខាត ​ចាស់ជរាគ្មានទីពឹង ជនពិការ​ ស្រ្តីមេម៉ាយគ្មានទីពឹង​ ចំនួន ៧៤គ្រួសារ មកពីភូមិ​ចំនួន៧ ក្នុងឃុំបាក់ស្នា ស្រុកបារាយណ៍​ ខេត្តកំពង់ធំ។

មានប្រសាសន៍ទៅកាន់​លោកតាលោកយាយបងប្អូន​ប្រជាពលរដ្ឋ​ទាំងអស់ ឯកឧត្តម​ប្រធានគណៈកម្មាធិការ បានពាំនាំនូវការផ្ដាំផ្ញើសួរ​សុខទុក្ខពីសំណាក់សម្ដេច​កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា​ ដែលសម្តេចតែងតែ​យកចិត្តទុកដាក់គិតគូរ​ជាប់ជានិច្ចចំពោះសុខទុក្ខប្រជាពលរដ្ឋជាទូទៅ ជាពិសេស​ជនរងគ្រោះ និងងាយរងគ្រោះ ​ដោយមិនប្រកាន់ពីវណ្ណៈ​ ពណ៌សម្បុរ ជំនឿសាសនា ឬនិន្នាការនយោបាយអ្វីឡើយ ពោល ​"ទីណាមានការលំបាក​ ទីនោះមាន​កាកបាទក្រហមកម្ពុជា" ។

ឯកឧត្តមបានគូសបញ្ជាក់ថា​ កាកបាទក្រហមកម្ពុជា ក្នុងនាម​ជាជំនួយការឲ្យអាជ្ញាធរ​សាធារណៈលើវិស័យមនុស្សធម៌​ គឺបានដើរតួនាទីយ៉ាងសកម្ម​ ក្នុងការចុះជួយដល់ប្រជាពលរដ្ឋ​ដែលរងគ្រោះ​ និងងាយរងគ្រោះដោយប្រការផ្សេងៗ​ នៅតាមមូលដ្ឋានទូទាំង២៥រាជធានីខេត្ត​ និងគ្រប់ទីកន្លែងដោយមិនឲ្យប្រជាពលរដ្ឋណាម្នាក់ជួបការលំបាកដោយ​យើងមិនបានដឹងនោះទ្បើយ​ សំដៅចូលរួមជួយកាត់បន្ថយភាពក្រីក្ររបស់ប្រជាពលរដ្ឋយើង​ឱ្យធ្លាក់មកនៅកំរិតទាបបំផុត ។

ជាទីបញ្ចប់ ឯកឧត្តម​ប្រធានគណៈកម្មាធិការសាខា ក៏សូមអំពាវនាវ​ដល់គ្រួសារទាំងអស់​ត្រូវប្រុងប្រយ័ត្នការពារកុំឱ្យមូសខ្លាខាំ ត្រូវ​គេងក្នុងមុង និងត្រូវ​បំបាត់ជម្រកមូសជុំវិញផ្ទះ ​និងក្នុងសហគមន៍របស់ខ្លួន ដេីម្បីជៀសវាងជំងឺគ្រុនឈាម​ដែលកំពុងរាលដាលលើ​មនុស្សគ្រប់វ័យ និងត្រូវជៀស​ឱ្យឆ្ងាយយពីគ្រឿងញៀន​ គ្រឿងស្រវឹង​ និងល្បែងស៊ីសង​ ដែលជាប្រភពនៃអំពេីហិង្សា​ ចោរកម្ម​​ ព្រមទាំងចូលរួមគោរពច្បាប់ចរាចរណ៍​ បេីកបរដោយប្រុងប្រយ័ត្ន​ ពាក់មួកសុវត្ថិភាពឲ្យបានត្រឹមត្រូវ​ និងហាមដាច់ខាតការបេីកបរក្រោមឥទ្ធិពល​នៃគ្រឿងស្រវឹង​ ។

កាកបាទក្រហមកម្ពុជា ផ្សព្វផ្សាយជាមូលដ្ឋានស្ដីពីគោលការណ៍គ្រឹះរបស់ចលនាអន្តរជាតិកាកបាទក្រហម និងអឌ្ឍចន្ទក្រហម ច្បាប់មនុស្សធម៌អន្តរជាតិ ជូនដល់និស្សិតនៃសាកលវិទ្យាល័យកម្ពុជា

កក្រក ៖ នាព្រឹកថ្ងៃពុធ​ ៨រោច ខែអាសាឍ ឆ្នាំកុរ ឯកស័ក ព.ស. ២៥៦៣​ ត្រូវនឹងថ្ងៃទី ២៤​ ខែ កក្កដា ឆ្នាំ២០១៩នេះ ការិយាល័យផ្សព្វផ្សាយ​កាកបាទក្រហមកម្ពុជា​ បានចុះធ្វើការផ្សព្វផ្សាយជា​មូលដ្ឋានស្ដីពីគោលការណ៍គ្រឹះរបស់ចលនា​អន្តរជាតិកាកបាទក្រហម ​និងអឌ្ឍចន្ទក្រហម ​ច្បាប់មនុស្សធម៌អន្តរជាតិ ​ជូនដល់និស្សិតនៃសាកលវិទ្យាល័យ​កម្ពុជា ក្រោមវត្តមាន​លោកបណ្ឌិត ស៊ុយ សារ៉េត ឧបការី​ សាកលវិទ្យាធិការ និងជាទីប្រឹក្សាក្លឹបយុវជន​កាកបាទក្រហមកម្ពុជា ប្រចាំ​សាកលវិទ្យាល័យកម្ពុជា ​និងលោក គង់វង្ស សីហ៍វិសាល ប្រធានការិយាល័យផ្សព្វផ្សាយ​ កាកបាទក្រហមកម្ពុជា ព្រមទាំង​មានការចូលរួមពី​ លោកគ្រូទីប្រឹក្សាយុវជន​កាកបាទក្រហមកម្ពុជា​ ក្រុមការងារការិយាល័យ​ផ្សព្វផ្សាយទីស្នាក់ការកណ្ដាល​កាកបាទក្រហមកម្ពុជា ​យុវជនកាកបាទក្រហមកម្ពុជា ​និងនិស្សិតចូលរួមសរុប​ចំនួន ១២៧នាក់ ដែលធ្វើ​ឡើងនៅសាលប្រជុំ នៃសាកលវិទ្យាល័យកម្ពុជា។

ការផ្សព្វផ្សាយនេះ ប្រព្រឹត្ត​ទៅនៅក្នុងគោលបំណង​ ដើម្បីឲ្យនិស្សិតមាន​ការយល់ដឹង​អំពីប្រវត្តិរបស់ចលនាកាកបាទក្រហម ​និងអឌ្ឍចន្ទក្រហម ​សមិទ្ធផលរបស់​កាកបាទក្រហម​កម្ពុជា និងផ្សព្វផ្សាយបន្ត​ទៅកាន់ទីសាធារណៈ សាលារៀន និង​សហគមន៍ផងដែរ៕

 

សាខាកាកបាទក្រហមកម្ពុជាខេត្តរតនគិរី ចុះផ្សព្វផ្សាយអប់រំក្នុងសហគមន៍អំពីការបង្ការ និងការពារជំងឺគ្រុនឈាម ដល់ប្រជាពលរដ្ឋ នៅ ស្រុកអណ្តូងមាស

សាខាកាកបាទក្រហម ​ខេត្តរតនគិរី បន្តចុះផ្សព្វ​ផ្សាយអប់រំ​ក្នុងសហគមន៍អំពី​ការបង្ការ និង​ការពារជំងឺគ្រុនឈាម ដល់ប្រជាពលរដ្ឋ​ចំនួន ១៣៥ នាក់ ស្រី៦៨ នាក់ ​នៅភូមិ លោម ឃុំម៉ាលិក​ ស្រុកអណ្តូងមាស ​ខេត្តរតនគិរី នាព្រឹក ថ្ងៃទី ២៤ ​ខែកក្កដា ឆ្នាំ២០១៩។

ឆ្លៀតក្នុងឱកាសនោះ ​លោក ឌឹម ណាត ​នាយកសាខា​ បានផ្សព្វផ្សាយសង្ខេ​បពីប្រវត្តិចលនា​កាកបាទក្រហម អឌ្ឍចន្ទក្រហម, សកម្មភាព​នានាតាមវិស័យស្នូលទាំង៤ ​និងសមាសភាពថ្នាក់ដឹកនាំ​កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត​ជាប្រធាន និងសាខាខេត្ត​ មានឯកឧត្តម ថង សាវុន ​ជាប្រធានផងដែរ។

នៅក្នុងការផ្សព្វផ្សាយសាខាបាន​ចែកជូននូវខិត្តប័ណ្ណ និង​ផ្តល់សារអប់រំអំពីការបង្ការ​ និងការពារជំងឺគ្រុនឈាម មួយចំនួនដល់​ប្រជាពលរដ្ឋដូចជា៖
-ដើម្បីការពារជំងឺគ្រុនឈាម ​ត្រូវរួមគ្នាបំបាត់ជម្រកមូស​ខ្លាតាមរយៈការកាប់ឆ្ការព្រៃ ​និង លាងសំអាតពាងឬអាងទឹក ហើយគ្របវា​អោយបានជិតល្អ
-កប់ឬកម្ទេចចោលវត្ថុដក់​ទឹកនៅ ជិតផ្ទះ ដូចជាសំបកកំប៉ុង​ សំបកកង់ឡាន-ម៉ូតូ ។ល។
-ត្រូវសម្រាន្តក្នុងមុង​ជានិច្ច និងស្លៀកពាក់​ខោអាវអោយជិតៗ
-ករណីសង្ស័យថាអ្នកជំងឺមាន​ជំងឺ គ្រុនឈាម ដោយមានរោគសញ្ញា​ដូចក្នុងខិត្តប័ណ្ណ ត្រូវបញ្ជូនអ្នកជំងឺទៅមន្ទីរពេទ្យ/មណ្ឌល​សុខភាពដើម្បីទទួលការព្យាល​បាលអោយបានត្រឹមត្រូវ។

លោកនាយកក៏បានសំណូម​ពរដល់អ្នកដែលបាន​ចូលស្តាប់ការផ្សព្វផ្សាយ​នាពេលនេះ ជួយបន្តដល់អ្នកនៅជុំវិញយើងអោយបានយល់ពីការ​ការពារ និងការចូលរួម​ទាំងអស់គ្នា ព្រោះថា​បើការពារតែផ្ទះយើង អ្នកជិតខាងមិនបានចូលរួមកាពារ នោះ​ការរីករាលដាលនៃជំងឺគ្រុនឈាម​នៅតែកើតមានដដែល។

 

First Prev 2 3 4 5 6 Next Last