អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

សាខាកាកបាទក្រហមកម្ពុជាខេត្ត កំពង់ស្ពឺ ចុះសួរសុខទុក្ខ គ្រួសាររងគ្រោះដោយខ្យល់កន្ត្រាក់ នៅ ស្រុកគងពិសី និង បសេដ្ឋ

សាខាកក្រកខេត្តកំពង់ស្ពឺ ៖ នាព្រឹក​ថ្ងៃចន្ទ ៩រោច ​ខែពិសាខ ឆ្នាំកុរ ឯកស័ក ព.ស. ២៥៦៣​ ត្រូវនឹងថ្ងៃទី ២៧ ខែ ឧសភា ឆ្នាំ ២០១៩ សាខា​កាកបាទក្រហមកម្ពុជា​ ខេត្តកំពង់ស្ពឺ ដឹកនាំ​ដោយលោកស្រី​ អោម ចន្នា នាយិកាសាខា និងសហការី​ បានអញ្ជើញចុះ​សួរសុខទុក្ខ និង​នាំយកអំណោយ​មនុស្សធម៌​របស់កាកបាទក្រហ​មកម្ពុជា ជូនដល់ប្រជាពលរដ្ឋ​រងគ្រោះដោយសារ​ខ្យល់កន្ត្រាក់ ​ចំនួន ១៦គ្រួសារ ក្នុងនោះ​រលំទាំងស្រុង ​៣គ្រួសារ ស្ថិតនៅ​ស្រុកគងពិសី និង​ស្រុកបសេដ្ឋ ខេត្តកំពង់ស្ពឺ។

ក្នុងឱកាសនោះដែរ លោកស្រីនាយិកា បានពាំនាំ​នូវប្រសាសន៍ផ្តាំ​ផ្ញើសាកសួរសុខ​ទុក្ខនិងក្តីនឹក​រលឹកពីសំណាក់សម្តេចកិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ​ប្រធានកាកបាទក្រហម​កម្ពុជា ដែល​ជានិច្ចកាល សម្តេចតែងតែគិតគូរពីសុខទុក្ខ​របស់បងប្អូនប្រជាពលរដ្ឋ​ក្រីក្រ ដែលមានទុក្ខ​លំបាក ជនរងគ្រោះ ​ជនងាយរងគ្រោះ​ គ្រប់ប្រភេទ ដោយ​មិនប្រកាន់​រើសអើងវណ្ណៈ ជាតិសាសន៌ ពណ៌សម្បុរ ឬនិន្នាការនយោបាយអ្វីឡើយ។

អំណោយដែលបាន​ផ្តល់ជូនគ្រួសារដែលរងគ្រោះធ្ង​ន់ធ្ងររួមមាន ៖ អង្ករ ២៥គីឡូក្រាម មី ១កេស ត្រីខ ១០កំប៉ុង ប្រេងឆា ១ដប ទឹកត្រី​ទឹកស៉ីអ៉ីវ ១យួរ នំធុង ១ធុង ទឹកដោះគោ ១កំប៉ុង តង់១ កន្ទេល១ សារុង១ ក្រមា១ ភួយ១ មុង១ និងថវិកាចំនួន ១៥០,០០០រៀល។
សម្រាប់គ្រួសារដែល​រងគ្រោះមធ្យម​រួមមាន ៖ អង្ករ ២៥គីឡូក្រាម មី ១កេស ត្រីខ ១០កំប៉ុង ប្រេងឆា ១ដប ទឹកត្រីទឹកស៉ីអ៉ីវ ១យួរ នំធុង ១ធុង ទឹកដោះគោ ១កំប៉ុង តង់១ សារុង១ ក្រមា១ ភួយ១ មុង១ និងថវិកាចំនួន ១០០,០០០រៀល។
សម្រាប់គ្រួសារដែលរងគ្រោះ​ស្រាលទទួលបាន ៖ អង្ករ ២៥គីឡូក្រាម មី ១កេស ត្រីខ ១០កំប៉ុង ប្រេងឆា ១ដប ទឹកត្រីទឹកស៉ីអ៉ីវ​ ១យួរ នំធុង ១ធុង ទឹកដោះគោ ១កំប៉ុង និង​ថវិកាចំនួន ៥០,០០០រៀលផងដែរ៕

 

សាខាកាកបាទក្រហមកម្ពុជាខេត្ត ព្រៃវែង ចុះសួរសុខទុក្ខ គ្រួសាររងគ្រោះដោយខ្យល់កន្ត្រាក់ នៅឃុំត្រពាំងស្រែ ស្រុកមេសាង

សាខាកក្រក ខេត្តព្រៃវែង ៖ នៅថ្ងៃចន្ទ ៩រោច​ ខែពិសាខ ឆ្នាំកុរ ឯកស័ក ព.ស. ២៥៦៣​ ត្រូវនឹង​ ថ្ងៃទី២៧ ខែឧសភា ឆ្នាំ២០១៩​ ឯកឧត្តម ឧកញ៉ា សុខ ផេង​អនុប្រធានអចិន្ត្រៃយ៍​គណៈកម្មាធិការ​សាខា តំណាង​ ឯកឧត្តម ជា សុមេធី​ ប្រធានគណៈកម្មាធិការ​សាខាខេត្ត បានដឹកនាំ​ក្រុមប្រតិបត្តសាខា​ ក្រុមការងារ​អនុសាខាស្រុកមេសាង​ អ្នកស្ម័គ្រចិត្ត យុវជន​កាកបាទក្រហមកម្ពុជា ​បានចុះសួរសុខទុក្ខ ​និងនាំយកអំណោយ​មនុស្សធម៌ចែកជូន​ដល់គ្រួសាររងគ្រោះ​ដោយសារខ្យល់កន្ត្រាក់​ចំនួន ៦គ្រួសារ (រងគ្រោះធ្ងន់ធ្ងរ ១គ្រួសារ និងមធ្យម ៥គ្រួសារ) នៅឃុំត្រពាំងស្រែ ​ស្រុកមេសាងខេត្តព្រៃវែង។

នាឱកាសនោះ ឯកឧត្តម ឧកញ៉ា ​បានពាំនាំនូវ​ប្រសាសន៍ផ្តាំផ្ញើរ​សាកសួរសុខទុក្ខ​ពីសំណាក់​សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហម​កម្ពុជា ដែលជានិច្ចកាល ​សម្តេចតែងតែ​យកចិត្តទុកដាក់ ​គិតគូរពីសុខមាលភាព​ប្រជាពលរដ្ឋទូទៅ ​ដោយមិនប្រកាន់​និន្នាការនយោបាយ​អ្វីឡើយ សម្ដេចក៏តែងតែមាន​ការព្រួយបារម្មណ៍ ​ពីសុខទុក្ខប្រជាពលរដ្ឋ​គ្រប់កាលៈទេសៈ ​ជាពិសេស​បងប្អូន​ដែលកំពុង​ទទួលរងគ្រោះថ្នាក់ដោយ​គ្រោះធម្មជាតិ ដែលបំផ្លាញ​នូវទ្រព្យសម្បត្តិ ​និងផលដំណាំដូច្នេះ។

សម្ភារៈផ្តល់ជូនរួមមាន៖
-រងគ្រោះធ្ងន់​ធ្ងរ(ប្រភេទ ក)៖ អង្ករ ២៥គ.ក កន្ទេល១ តង់ ១ មី ១កេស ត្រី ខ ១យួរ ឃីត ១កញ្ចប់(មុង ភួយ ក្រមា សារ៉ុង) អាវ ២ និងថវិកាចំនួន ១០០,០០០រៀល។ 
-រងគ្រោះមធ្យម(ប្រភេទ ខ)៖អង្ករ ២៥គ.ក កន្ទេល១ មី ១កេស ត្រី ខ ១យួរ ឃីត ១កញ្ចប់(មុង ភួយ ក្រមា សារ៉ុង) អាវ ២ និងថវិកាចំនួន ៥០,០០០រៀល។

ដោយឡែក ទីប្រឹក្សាយុវជន​វិទ្យាល័យមេសាង បានឧបត្ថម្ភ​ថវិកាផ្ទាល់ខ្លួន​បន្ថែមក្នុង ១គ្រួសារ ចំនួន ១០,០០០រៀល។

ក្នុងឱកាសនោះ ឯកឧត្តម ឧកញ៉ា សុខ ផេង ​អនុប្រធានអចិន្ត្រៃយ៍​គណៈកម្មាធិការ​សាខា បានឧបត្ថម្ភថវិកាផ្ទាល់ខ្លួនចំនួន ១២០,០០០រៀល និងលោក កែវ ពិសី ប្រធានគណៈកម្មាធិការអនុសាខាស្រុកមេសាង បានឧបត្ថម្ភថវិកា​ផ្ទាល់ខ្លួនចំនួន ១០០,០០០រៀល ដល់ប្អូនស្រី ១នាក់ដែលរងគ្រោះ​ដោយសារខ្យល់កន្ត្រាក់​បាក់រលំផ្ទះលើ​បណ្តាលអោយ​ខូចកង់ ដើម្បីទិញ​កង់ថ្មីសម្រាប់ធ្វើ​ដំណើរទៅ​សាលារៀន។

 

ចាស់ជរាគ្មានទីពឹងនៅភូមិភារកិច្ច សង្កាត់ប៉ាលហាល ក្រុងព្រះវិហារទទួលអំណោយមនុស្សធម៌

សាខាកក្រក​ខេត្តព្រះវិហារ៖​នៅព្រឹក​ថ្ងៃទី ២៧ ខែឧសភា ឆ្នាំ២០១៩ នេះ ឯកឧត្តម ​យុង គឹមហ៊ាន នាយកប្រតិបត្តិសាខា​កាកបាទក្រហម​កម្ពុជា ខេត្តព្រះវិហារ ​បាននាំយក​អំណោយមនុស្សធម៌​ទៅផ្តល់ជូន​លោកយាយ រស់ សុផាត អាយុ ៨៦ឆ្នាំ ជាចាស់ជរា​គ្មានទីពឹង​ ហើយមានជីវភាព​ខ្វះខាត និង​មានកូនប្រុស​ម្នាក់កំពុងមានជម្ងឺ​ប្រចាំកាយផងដែរមានទីលំនៅនៅភូមិ​ភារកិច្ចសង្កាត់​ប៉ាលហាល ក្រុងព្រះវិហារ ខេត្តព្រះវិហារ ។

ក្នុងឱកាស​នោះដែរ ឯកឧត្តមនាយក​សាខាក្រហមកម្ពុជា ​ខេត្តព្រះវិហារ បានពាំនាំ​នូវប្រសាសន៍​ផ្តាំផ្ញើសាកសួរសុខទុក្ខពី​ឯកឧត្តម អ៊ុន ចាន់ដា ប្រធា​នកិត្តិយសសាខា​កាកបាទក្រហម​កម្ពុជាខេត្តព្រះវិហារ ដែលឯកឧត្តមតែងតែ​គិតគូរពី​សុខទុក្ខ​របស់ប្រជាពល រដ្ឋជានិច្ច ពិសេស​ចាស់ជរាគ្មានទីពឹង​ពោលគឺទីណា​មានការលំបាក ទីនោះមានកាកបាទក្រហម​កម្ពុជា និងបានផ្តាំ​ផ្ញើអោយមាន​អានាម័យក្នុងការហូបស្អាត​ជាប្រចាំទឹកត្រូវដាំ​អោយពុះមុនហូប ។

សម្ភារផ្តល់ជូន​រួមមាន៖អង្ករ ២៥គីឡូ មី ១កេស ត្រីខ ១យួរ ទឹកស៊ីអីវ ១យួរ ឃីត ១ (មុង១ ក្រមា១ ភួយ១ សារុង១) និងថវិកាមួយចំនួន ។

 

សាខាកាកបាទក្រហមកម្ពុជាខេត្តកណ្តាល ដឹកនាំកម្លាំងយុវជនកាកបាទក្រហមកម្ពុជា ចុះជួយសម្រួលចរាចណ៍ នៅក្នុងក្រុងតាខ្មៅ

សាខា កក្រក ខេត្តកណ្តាល ៖ នៅព្រឹកថ្ងៃអាទិត្យ ៨រោច ខែពិសាខ ឆ្នាំកុរ ឯកស័ក ព.ស.២៥៦៣​ ត្រូវនឹងថ្ងៃទី ២៦ ខែ ឧសភា​ ឆ្នាំ២០១៩ សាខា​កាកបាទក្រហមកម្ពុជា​ខេត្ត បានដឹកនាំ​កម្លាំងយុវជន​កាកបាទក្រហម​កម្ពុជា មកពីវិទ្យាល័យ​ចំនួន២ក្នុង​ក្រុងតាខ្មៅ គឺ ៖ វិទ្យាល័យហ៊ុនសែន​តាខ្មៅ ១៤ នាក់ ​និងវិទ្យាល័យ​ហ៊ុនសែន​សេរីភាព ១៤ នាក់ សរុបរួម​ ២៨ នាក់ ស្រី ១៨ នាក់​ ចុះជួយសម្រួល​ចរាចណ៍នៅចំណុច​ផ្លូវកែងស្តុប​ចំនួន ២កន្លែង ៖ ចំណុចទី១​ ផ្លូវកែងស្តុប ( ១១៥- ២១ ) និងចំណុចទី២​ ផ្លូវកែងស្តុប ( ១១០- ២១) ស្ថិតនៅក្នុងក្រុងតាខ្មៅ ខេត្តកណ្តាល ។

ចំពោះកាអនុវត្ត​សកម្មភាពការងារ​សុវត្ថិភាពចរាចរណ៍​នៅចំណុចគោលដៅ​ជាប្រចាំ​រាល៉ថ្ងៃអាទិត្យ​នេះ ក្នុងគោលបំណងជួយ​ផ្សព្វផ្សាយដល់​សាធារណជនទូទៅ ដើម្បី​យល់ដឹងជាមូលដ្ឋាន​អំពីច្បាប់ចរាចរណ៍​ផ្លូវគោកនៃព្រះរាជាណាចក្រ​កម្ពុជា និង​ដើម្បីចូលរួម​កាត់បន្ថយនូវអត្រា​រងគ្រោះថ្នាក់​ផ្សេងៗ ដែល​បណ្តាលមក​ពីការបើកបរខ្វះ​ការប្រុងប្រយ័ត្ន និង​ការមិនគោរព​ច្បាប់ចរាចរណ៍​ជាដើម ។ ក្នុងពេលអនុវត្ត​ការងារសុវត្ថិភាព​ចរាចរណ៍នៅចំណុចគោលដៅ​ទាំងពីរនេះ​ យុវជនកាកបាទក្រហម​កម្ពុជា បានធ្វើការ​ផ្សព្វផ្សាយដល់​ប្រជាពលរដ្ឋទូទៅ ដែលបាន​ធ្វើដំណើរ​ឆ្លងកាត់ មានចំនួន​សរុបប្រមាណជិត ៥,០០០ នាក់ និងយានយន្ត​ ប្រមាណជាង ២,០០០ គ្រឿង នៅក្នុងរយៈពេល​ ១ ម៉ោង និង ៣០ នាទី ៕

 

សាខាកាកបាទក្រហមកម្ពុជា ខេត្តព្រះសីហនុ ប្រារព្ធ ខួបលើកទី១៥៦ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៩

សាខាកក្រក​ខេត្តព្រះសីហនុ ៖ នៅព្រឹកថ្ងៃសៅរ៍​ ៧រោច ខែពិសាខ ​ឆ្នាំកុរ ឯកស័ក ព.ស.២៥៦៣ ​ត្រូវនឹងថ្ងៃទី ២៥ ខែឧសភា ​ឆ្នាំ២០១៩ សាខា​កាកបាទក្រហមកម្ពុជា ​ខេត្តព្រះសីហនុ ​បានប្រារព្ធ​មិទ្ទីងអបអរខួប​លើកទី១៥៦ ទិវាពិភពលោក​កាកបាទក្រហម អឌ្ឍចន្ទក្រហម​ ៨ ឧសភា​ ឆ្នាំ២០១៩​ ក្រោមប្រធានបទ “ខ្ញុំ ❤ កាកបាទក្រហម​កម្ពុជា នៅសាលប្រជុំ​សណ្ឋាគារ សុខាម៉ូតែល។

ពិធីនេះបានប្រព្រឹត្ត​ទៅក្រោម​អធិបតីភាព​ដ៏ខ្ពង់ខ្ពស់ ឯកឧត្តម សាយ សំអាល់ ​ប្រធាន​ក្រុមការងារ​ថ្នាក់ជាតិចុះជួយ​ខេត្តព្រះសីហនុ និងរដ្ឋមន្រ្តី​ក្រសួងបរិស្ថាន ឯកឧត្តម​អ្នកឧកញ៉ា កុក អាន ប្រធានកិត្តិយសសាខា ឯកឧត្តម យន្ត មីន​ ប្រធានគណៈកម្មាធិការ​សាខា ព្រមទាំងមាន​ការនិមន្ត និងអញ្ជើញ​ចូលរួមពីគណៈកិត្តិយស​ គណៈកម្មាធិការ​សាខា សមាជិក​សមាជិកា រាជរដ្ឋាភិបាល​ ក្រុមប្រឹក្សាខេត្ត គណៈអភិបាលខេត្ត មន្ទីរ​-អង្គភាពនានាជុំវិញ​ខេត្ត អ្នកស្ម័គ្រចិត្ត យុវជន​កាកបាទក្រហមកម្ពុជា សហភាពសហព័ន្ធយុវជន​កម្ពុជាខេត្ត កាយរឹទ្ធិជាតិ​កម្ពុជា ឯកឧត្តម លោកជំទាវ​ លោកឧកញ៉ា តំណាង​ក្រុមហ៊ុន អាជីវករ សប្បុរស​ជនជាតិ អន្តរជាតិ សរុបប្រមាណ​ ជាង២,០០០ អង្គ/នាក់ ក្នុងគោលបំណង៖
១.រំលឹក​ដល់ថ្ងៃកំណើតរបស់​លោក ហង់រី ឌុយណង់ ដែល​ជាស្ថាបនិករបស់​កាកបាទក្រហម
២.យល់ដឹង​ពីប្រវត្តិ​ចលនាកាកបាទក្រហម និង​អឌ្ឍចន្ទក្រហម និង​ច្បាប់មនុស្សធម៌​អន្តរជាតិ
៣.កៀរគរ​រកមូលនិធិពី​សប្បុរសជន ដើម្បី​ត្រៀមឆ្លើយតបឲ្យ​បានទាន់ពេលវេលា​ក្នុងការជួយសង្រ្គោះជនរងគ្រោះ និងងាយរងគ្រោះ។

សូមបញ្ជាក់ផង​ដែរថា៖ សាខាកាកបាទក្រហម​កម្ពុជា ខេត្តព្រះសីហនុ បានទទួល​ថវិកា​ពីសប្បុរសជនសរុប​ចំនួន ១,៦១០,៩២៧ ដុល្លារអាមេរិក៕

 

សាខាកាកបាទក្រហមកម្ពុជា ខេត្តកំពង់ស្ពឺ បានប្រារព្ធ ខួបលើកទី១៥៦ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០១៩

សាខាកក្រក​ខេត្តកំពង់ស្ពឺ ៖ ព្រឹកថ្ងៃ​ព្រហស្បត្តិ៍ ៥រោច ខែពិសាខ ឆ្នាំកុរ ឯកស័ក ព.ស.២៥៦៣ ​ត្រូវនឹង​ថ្ងៃទី ២៣ ខែឧសភា ឆ្នាំ២០១៩ សាខា​កាកបាទក្រហម​កម្ពុជា ខេត្តកំពង់ស្ពឺ ​បានប្រារព្ធ​ពិធីអបអរ​ខួបលើកទី​១៥៦ ទិវាពិភពលោក​កាកបាទក្រហម ​និងអឌ្ឍចន្ទក្រហម​ ៨ ឧសភា ឆ្នាំ២០១៩ ​ក្រោមប្រធានបទ “ខ្ញុំ ❤កាកបាទក្រហមកម្ពុជា” ក្រោមអធិបតីភាព​ឯកឧត្តម ហ៊ុន ម៉ានី គណៈកិត្តិយស​សាខាកាកបាទក្រហម​កម្ពុជា ខេត្តកំពង់ស្ពឺ និងមានការ​ចូលរួមពី​លោកជំទាវ ពុំ ចន្ទីនី អគ្គលេខាធិការ​កាកបាទក្រហមកម្ពុជា ​និងបាននំាយកថវិកា​កាកបាទក្រហមកម្ពុជា​ចំនួន ៥,០០០,០០០រៀល ព្រម​ទាំងមានការ​ចូលរួម ឯកឧត្តម លោកជំទាវ ​លោកឧញ្ញ៉ា លោក លោកស្រី អ្នកនាងកញ្ញា តាមស្ថាប័ន នានា សប្បុរសជន អាជីវក សរុបចំនួន ២,៥២៥នាក់។

 

បន្ទាប់ពីអាន​សេចក្តីថ្លែងការណ៍​របស់ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ប្រធានកាកបាទក្រហម​កម្ពុជារួចមក ឯកឧត្តម ហ៊ុន ម៉ានី បានថ្លែងអំណរគុណ​ដល់សប្បុរសជន​ទាំងអស់ដែល​បានជួយគាំទ្រ និងចំណាយថវិកា​ផ្តាល់ខ្លួនផ្តល់​ជូនសាខាកាកបាទក្រហម​កម្ពុជា ខេត្ត​កំពង់ស្ពឺ ដើម្បីឲ្យ​សាខាមាន​លទ្ធភាពគ្រប់គ្រាន់ជួយ​ដល់ប្រជាពលរដ្ឋ​ងាយរងគ្រោះ និងរងគ្រោះដោយ​គ្រោះធម្មជាតិ​នានាបានទាន់​ពេលវេលា។

គូសបញ្ជាក់​ផងដែរ នៅក្នុងពិធីនេះ សាខាកាកបាទក្រហ​មកម្ពុជា ខេត្តកំពង់ស្ពឺ ​ទទួលបានឧបត្ថម្ភ​គាំទ្រជាថវិកាពីសប្បុរសជន​ទាំងអស់ សរុបចំនួន ២៤០,០៨៦ ​ដុល្លារអាមេរិក៕

 

សាខាកាកបាទក្រហមកម្ពុជាខេត្តក្រចេះ ផ្តល់អំណោយមនុស្សធម៌ ដល់គ្រួសាររងគ្រោះដោយខ្យល់កន្រ្តាក់ នៅ ស្រុកព្រែកប្រសព្វ ខេត្តក្រចេះ

សាខាកក្រកខេត្តក្រចេះ ៖ នៅព្រឹកថ្ងៃ​ព្រហស្បតិ៍​ ៥រោច ខែពិសាខ ឆ្នាំកុរ ​ឯកស័ក ព.ស ២៥៦៣​ ត្រូវនិងថ្ងៃទី ២៣ ខែឧសភា ​ឆ្នាំ ២០១៩ នេះ ​សាខាកាកបាទក្រហម​កម្ពុជាខេត្តក្រចេះ ​ដឹកនាំដោយ​លោក គង់ សុជាតិ លេខាធិការសមាជិក​គណៈកម្មាធិការ​សាខា សមាជិក​សមាជិការ មន្រ្តីអនុសាខា​ស្រុកព្រែកប្រសព្វ ​បាននាំយកអំណោយ​មនុស្សធម៌​កាកបាទក្រហម​កម្ពុជា ខេត្តក្រចេះ ​ទៅចែកជូនដល់​គ្រួសាររងគ្រោះ​ដោយខ្យល់កន្រ្តាក់ ចំនួន ២០ គ្រួសារ នៅមូលដ្ឋាន​ឃុំសោប និងឃុំជ្រោយ​បន្ទាយ ស្រុកព្រែកប្រសព្វ ខេត្តក្រចេះ ។

នៅក្នុងឱកាស​សំណះសំណាល​នោះដែរ លោកបាន​ចូលរួមសោកស្តាយ​ជាខ្លាំង ជាមួយ​បងប្អូនប្រជាពលរដ្ឋ​ដែលរងគ្រោះដោយសារ​ខ្យល់កន្ត្រាក់​នេះដែលបាន​បណ្តាលឱ្យខូចខាត់​ទ្រព្យសម្បត្តិ និងរងរបួស​ដោយហេតុការណ៏នេះ ព្រមទាំង​បានសំណូមពរដល់​បងប្អូន​ប្រជាពលរដ្ឋមាន​ការប្រុងប្រយ័ត្នខ្ពស់ ​នៅពេលភ្លៀងត្រូវបិទទូរស័ព្ទ បើនៅតាម​ទីវាលត្រូវ​រកកន្លែងដែល​មានសុវត្ថិភាពជ្រក ។

ជាមួយគ្នា​នេះលោក​ ក៏បានពាំនាំផ្តាំ​ផ្ញើសួរសុខទុក្ខពីសំណាក់ ​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហម​កម្ពុជា ជូនដល់បង​ប្អូនប្រជាពលរដ្ឋទាំងអស់​ឱ្យថែទាំសុខភាព​ឱ្យបានល្អ ត្រូវរស់នៅស្អាត ពិសា​ទឹកឆ្អិន ប្រកប​ដោយអនាម័យល្អជានិច្ច។

សូមបញ្ជាក់ថា​អំណោយ​ដែលចែកជូនគ្រួសារ​រងគ្រោះនាពេលនោះ​សម្រាប់គ្រួសាររង​គ្រោះស្រាល ១១ គ្រួសារ ក្នុង១គ្រួសារទទួលបាន៖ អង្ករ ២៥ គីឡូក្រាម , មី ១ កេស, ត្រីខ ១០ កំប៉ុង និងថវិកាមួយចំនួន ដោយឡែកសម្រាប់គ្រួសារ​រងគ្រោះធ្ងន់ ៩ ក្នុង១គ្រួសារ​ទទួលបាន៖ អង្ករ ២៥ គីឡូក្រាមសារ៉ុង ១, ភួយ ១, មុង ១, ក្រម៉ា ១, មី ១ កេស, ត្រីខ ១០ កំប៉ុង, តង់ ១ និងថវិកាមួយចំនួន៕

 

កាកបាទក្រហមកម្ពុជា ផ្តល់អំណោយមនុស្សធម៌ជូនកុមារី ស៊ិន ស្រីហង្ស សិស្សពូកែ នៃវិទ្យាល័យសំឡូត ខេត្តបាត់ដំបង

កក្រក​​ ៖​ ដោយក្តីអាណិតអាណូរ​ និងមេីលឃេីញថា​ កុមារី​ម្នាក់​ជាមនុស្សពិការដៃជេីងពីកំណេីតហេីយ​ព្យាយាមតស៊ូ​រៀនសូត្របានពូកែផងនោះ​ នៅថ្ងៃព្រហស្បតិ៍​ ៥រោច​ ខែពិសាខ​ ឆ្នាំកុរ​ ឯកស័ក​ ព.ស.២៥៦៣​ ត្រូវនឹងថ្ងៃទី ២៣​ ខែឧសភា​ ឆ្នាំ២០១៩ នេះ កាកបាទក្រហមកម្ពុជា​ ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានជួបសំណេះ​សំណាល​ និងផ្តល់អំណោយមនុស្សធម៌ជូនកុមារី​ ស៊ិន​ ស្រីហង្ស​ អាយុ​ ១៧ឆ្នាំ​ ជាសិស្សពូកែរៀនថ្នាក់ទី​ ១១​ នៃវិទ្យាល័យសំឡូត​ ខេត្តបាត់ដំបង​។

ក្នុងឱកាសជួបសំណេះសំណាល​នោះ លោកជំទាវ ម៉ែន នារីសោភ័គ អគ្គលេខាធិការរងទី​ ១​ កាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើការសួរសុខទុក្ខ ក្តីអាណិត ស្រឡាញ់ចំពោះ​ ស្រីហង្ស​ ដែលមានចិត្តតស៊ូ​ ជម្នះគ្រប់ឧបសគ្គ​ ដេីម្បី​បានរស់រានមានជីវិត​ និងសិក្សារៀនសូត្របានពូកែដូច​មនុស្សធម្មតាដែរ។ សម្តេចកិត្តិព្រឹទ្ធបណ្ឌិត​ បានផ្តាំផ្ញេីលេីកទឹកចិត្តដល់​ ស្រីហង្ស​ ឱ្យបន្តអត់ធ្មត់​ តស៊ូ​ ប្រឹងប្រែង​រៀនសូត្របន្ថែមទៀត រហូតដល់បញ្ចប់ថ្នាក់ខ្ពង់ខ្ពស់ដេីម្បីអនាគតភ្លឺស្វាង។ ជាមួយនឹងអំណោយជាស្បៀង​ សម្ភារ​ និងថវិកាមួយចំនួន​ដេីម្បីសម្រាលការលំបាកក្នុងជីវភាពរស់នៅនោះ សម្តេចកិត្តិព្រឹទ្ធបណ្ឌិត​ នៅបានឧបត្ថម្ភថវិកា​សម្រាប់ការសិក្សារហូតបញ្ចប់ថ្នាក់មធ្យមសិក្សា​ទុតិយភូមិ​ទៀតផង។

ជាមួយគ្នានេះ​ កុមារី​ ស៊ិន​ ស្រីហង្ស​ និងម្តាយបង្កេីត​ បានសម្តែងនូវការដឹងគុណយ៉ាងជ្រាលជ្រៅចំពោះ​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធានកាកបាទក្រហមកម្ពុជា​ ដែលមានក្តីមេត្តា​ ករុណា​ លេីកទឹកចិត្ត​ និងផ្តល់ក្តីសង្ឃឹមចំពោះ​អ្នកដែលជួបទុក្ខលំបាក​។ ស្រីហង្ស​ សូមសន្យានិងប្តេជ្ញាខិតខំរៀនសូត្រឱ្យពូកែ​ ប្រណិប័តន៍​ឪពុកម្តាយ​ ចាស់ព្រឹទ្ធាចារ្យ​ លោកគ្រូអ្នកគ្រូ​ និងធ្វេីជាគំរូល្អដល់ជនពិការ​កាយសម្បទា​ដទៃទៀតនៅក្នុងសង្គម៕

 

សាខាកាកបាទក្រហមកម្ពុជា ខេត្តស្វាយរៀង សួរសុខទុក្ខ គ្រួសាររងគ្រោះដោយសារខ្យល់កន្ត្រាក់ ក្នុងស្រុកស្វាយជ្រំ

ថ្ងៃអង្គារ ៣រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី ២១ ខែ ឧសភា ឆ្នាំ ២០១៩ ក្រុមការងារ សាខាកាកបាទក្រហមកម្ពុជា ខេត្តស្វាយរៀង ​ដឹកនាំ ដោយ​លោកជំទាវ ពៅ សុភាព  ហេរញ្ញឹកគណៈកម្មាធិការ សាខា ​បាននាំយកអំណោយ​មនុស្សធម៌ របស់​សាខាចុះសួរសុខទុក្ខ និងចែកអំណោយដល់គ្រួសាររងគ្រោះដោយសារខ្យល់​កន្ត្រាក់កាលពីថ្ងៃទី ២០ ខែ ឧសភា ឆ្នាំ ២០១៩ បណ្តាល​ឲ្យប៉ះ ពាល់ផ្ទះប្រជាពលរដ្ឋ ​ក្នុងស្រុកស្វាយជ្រំ ​នៅឃុំដូនស ខូចខាតទាំងស្រុង ៣ ខ្នង ក្នុង​ស្រុករមាសហែក នៅ​ឃុំត្រពាំងស្តៅ ខូចខាត​ទាំងស្រុង ១ ខ្នង នៅឃុំចន្ត្រី ខូចខាតទាំងស្រុង ២ ខ្នង ប៉ះពាល់មួយផ្នែក ១ ខ្នង សរុបចំនួន ៧ ខ្នង សរុបខូចខាត​ទាំងស្រុងចំនួន ៦ ខ្នង ខូចខាត​មួយផ្នែក ១ ខ្នង និងរបួសមនុស្សម្នាក់(របួសស្រាល) ។ 


ឆ្លើយតបទៅនឹង​ស្ថានភាពនេះ លោកជំទាវ ពៅ សុភាព ហេរញ្ញឹកគណៈកម្មាធិការសាខា តំណាងឯកឧត្តម ម៉ែន វិបុល​ ប្រធានគណៈកម្មាធិការសាខា​ បាននាំមកនូវការផ្តាំផ្ញើ​សាកសួរសុខទុក្ខ​ពីសំណាក់សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ដែលជានិច្ចជាកាល​សម្តេចតែងតែគិតគូពី​សុខទុក្ខរបស់​បងប្អូនគ្រប់ពេលវេលា និងបានសំដែង​នូវការអាណិត​អាសូរដល់​ប្រជាពលរដ្ឋដែលរងគ្រោះ​ដោយបាន​ខិតខំប្រកបរបររកស៊ី​ចិញ្ចឹមជីវិត​មានជីវភាព នឹង​ផ្ទះសំបែងរស់នៅ​សមរម្យ តែមួយរយៈពេលខ្លី​តែប៉ុណ្ណោះបណ្តាល​ឲ្យខ្យល់កន្ត្រាក់​បំផ្លាញខូចខាត​ បែកបាត់ផ្ទះ​សប្បែងគួរឲ្យសោកស្តាយ ដែលនេះជាបាតុភូត​ធម្មជាតិដែល​យើងនឹកស្មានមិនដល់ ។ លោកជំទាវ​ក៏បានផ្តាំផ្ញើ​ដល់ប្រជាពលរដ្ឋទាំងអស់ត្រូវ​មានការប្រុងប្រយ័ត្ន​នៅពេលមានភ្លៀង​ផ្គរ រន្ទះត្រូវរកកន្លែង​ដែលមានសុវត្ថិភាព បិទទូរទស្សន៍ ទូរស័ព​ ដាំដើមឈើជុំវិញផ្ទះ ដើម្បីការពារ​ខ្យល់បក់​បោក​​ខ្លាំង និងត្រៀម​លក្ខណៈបង្ករបង្កើនផលព្រោះរដូវវស្សាហ៍​បានចូលមកដល់ហើយ ។


អំណោយដែលបាន​ចែកជូនគ្រួសាររងគ្រោះ​ទាំងស្រុង ៦ គ្រួសារក្នុង ១ គ្រួសារ ទទួលបាន អង្ករ ៣០ គ.ក្រ កៅស៊ូតង់ ១ ធុងទឹកជ័រ ១ ឆ្នាំងបាយ សម្ល ២ មី ១ កេស ត្រីខ ១០ កំប៉ុង ទឹកស៊ីអ៊ីវ ៦ ដប កន្ទេលបត់ ១ មុង ១ ភួយ ១ ក្រម៉ា ១ សារុង ១ ថវិកា ២០០.០០០ រៀល គ្រួសាររងគ្រោះស្រាល ១ គ្រួសារទទួល​បាន អង្ករ ៣០ គ.ក្រ មុង ១ ភួយ ១ សារុង ១ ក្រម៉ា ១ ថវិកា ១០០.០០០ រៀល សម្រាប់ជួសជុល​ផ្ទះឡើងវិញ ។

កាកបាទក្រហមកម្ពុជាឧបត្ថម្ភថវិកា ១លានដុល្លារអាមេរិក ជូនមូលនិធិគន្ធបុប្ផាកម្ពុជា ជាលើកទី២ ដែលត្រូវជាឆ្នាំទី ៨ (លើកទី ៨) សម្រាប់មន្ទីរពេទ្យគន្ធបុប្ផា

នៅថ្ងៃសុក្រ ១៤កើត ខែពិសាខ ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី១៧ ​ខែឧសភា ឆ្នាំ២០១៩ នេះ សម្តេចកិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា បាន​ទទួលជួបសវនាការ ​និងប្រគល់ថវិកា $1,000,000 (មួយលានដុល្លារអាមេរិក)​ ជាលើកទី ២ (ថវិកាទទួលបានពី​សប្បុរសជនក្នុងទិវា ​៨ ឧសភា ២០១៩) ជូនមូលនិធិ​គន្ធបុប្ផាកម្ពុជា​ ដែលមានគណៈប្រតិភូ​ដឹកនាំដោយ ឯកឧត្តម​អគ្គបណ្ឌិតសភាចារ្យ​ អូន ព័ន្ធមុនីរ័ត្ន ឧបនាយករដ្ឋមន្ត្រី ​រដ្ឋមន្ត្រីក្រសួងសេដ្ឋកិច្ច​និងហិរញ្ញវត្ថុ​ និងជាប្រធាន​ក្រុមប្រឹក្សា​បរធនបាល​នៃមូលនិធិ​គន្ធបុប្ផាកម្ពុជា ហើយដែល​ពិធីនេះប្រព្រឹត្តទៅ​នៅទីស្នាក់ការ​កណ្តាលកាកបាទក្រហម​កម្ពុជា។ ថវិកាចំនួន ១លានដុល្លារនេះ​ ក៏ត្រូវបានមូលនិធិ​គន្ធបុប្ផាកម្ពុជា ដែលមាន​ សម្តេចអគ្គមហាសេនាបតី​តេជោ ហ៊ុន សែន និង​សម្តេចកិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ​ជាប្រធានកិត្តិយស ប្រគល់ជូន​មន្ទីរពេទ្យគន្ធបុប្ផា ក្នុងពេលនោះដែរ។

ក្នុងឱកាសជួបសវនាការ​នោះ សម្តេចកិត្តិព្រឹទ្ធបណ្ឌិត​ប្រធាន បានសម្តែង​នូវក្តីសោមស្សរីករាយ​ និងស្វាគមន៍យ៉ាងកក់ក្តៅចំពោះ​ការអញ្ជើញដល់​របស់គណៈប្រតិភូ និង​កោតសរសើរ ជាពិសេស​ចំពោះ ស្ថាបនិកនៃមូលនិធិគន្ធបុប្ផាកម្ពុជា ​ក៏ដូចជា ក្រុមគ្រូពេទ្យ ​និងបុគ្គលិកនៃ​មន្ទីរពេទ្យគន្ធបុប្ផា​ទាំងអស់ ដែល​បានខិតខំប្រឹងប្រែងកៀរគររកមូលនិធិ​ ហើយជួយព្យាបាលជំងឺ​ជូនស្ត្រីមានផ្ទៃពោះ​ឆ្លងទន្លេ និងកុមារកម្ពុជា​រាប់ពាន់ រាប់ម៉ឺននាក់ ដែលជាផ្នែក​ក្នុងការកាត់បន្ថយ​អត្រាមរណៈ មាតា ទារក និងកុមារ​ និងចូលរួមកាត់​បន្ថយភាពក្រីក្រនៅកម្ពុជា។ ទន្ទឹមនឹងនោះ ​សម្តេចកិត្តិព្រឹទ្ធបណ្ឌិតប្រធាន​ ក៏បានរំលឹកពីប្រវត្តិស្នាដៃ​របស់ លោកវេជ្ជ. បេអាត រិចនឺ ដែលបានលះបង់​គ្រប់បែបយ៉ាង​ដើម្បីស្រោចស្រង់​អាយុជីវិតរបស់កុមារកម្ពុជា​បានរាប់លាននាក់ក្នុងពេល​កន្លងមក។

ឯកឧត្តមអគ្គបណ្ឌិត​សភាចារ្យ អូន ព័ន្ធមុនីរ័ត្ន​ បានថ្លែងអំណរគុណ​យ៉ាងជ្រាលជ្រៅចំពោះ​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ដែលបានអនុញ្ញាត​ឱ្យគណៈប្រតិភូបានចូលជួបសម្តែងការ​គួរសម និងបានជម្រាបជូនពីដំណើរ​ការនៃមូលនិធិ​គន្ធបុប្ផាកម្ពុជា ក៏ដូចជា​របាយការណ៍ឆ្នាំ២០១៨-២០១៩ ​ជាមួយនឹងការខិតខំប្រឹងប្រែងស្វែងរកមូលនិធិពី​វិស័យនានា និង​សប្បុរសជនគ្រប់មជ្ឈដ្ឋាន ដើម្បី​យកថវិកាប្រគល់ជូនមន្ទីរពេទ្យគន្ធបុប្ផា​ សម្រាប់ចាត់ចែង​ចំណាយប្រចាំថ្ងៃរបស់​មន្ទីរពេទ្យ។ ជាមួយ​គ្នានេះ ឯកឧត្តម​ បានថ្លែងអំណរគុណយ៉ាងជ្រាលជ្រៅ​ចំពោះកាកបាទក្រហម​កម្ពុជា ជាពិសេស សម្តេចតេជោ ​នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ដែលតែងតែ​គិតគូរ ជួយសម្រាល​ទុក្ខលំបាក និងទ្រទ្រង់​ដល់សុខុមាលភាព​របស់ស្ត្រី និងកុមារកម្ពុជានៅទូទាំងប្រទេស។

សូមបញ្ជាក់ថា នេះជាលើកទី ២ ​ដែលកាកបាទក្រហម​កម្ពុជា បានផ្តល់ថវិកា​ ១លានដុល្លារជូនមូលនិធិគន្ធបុប្ផាកម្ពុជា ហើយ​ដែលត្រូវជាឆ្នាំទី ៨ (៨លើក) សម្រាប់មន្ទីរពេទ្យ​គន្ធបុប្ផា គិតពីឆ្នាំ​ ២០១២ បន្តបន្ទាប់មក៕

 

First Prev 1 2 3 4 5 Next Last