អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

សាខាកាកបាទក្រហមកម្ពុជា ខេត្តកំពង់ស្ពឺ ចុះសួរសុខទុក្ខ ប្រជាពលរដ្ឋរងគ្រោះដោយអគ្គីភ័យនៅភូមិចំនួន២ ឃុំចំនួន២ ស្រុកចំនួន២ ខេត្តកំពង់ស្ពឺ។

សាខាកក្រក ​ខេត្តកំពង់ស្ពឺ ៖ នារសៀល​ថ្ងៃច័ន្ទ ៤កើត ខែចេត្រ ឆ្នាំច សំរឹទ្ធិស័ក ព.ស.២៥៦២​ ត្រូវនឹង​ថ្ងៃទី ៨ ខែ មេសា ឆ្នាំ២០១៩ សាខា​កាកបាទក្រហមកម្ពុជា​ ខេត្តកំពង់ស្ពឺ ​ដឹកនាំដោយ​លោកស្រី អោម ចន្នា នាយិកាសាខា និងសហការី ​បានចុះសួរសុខទុក្ខ ​និងនាំយកអំណោយ​មនុស្សធម៌របស់​កាកបាទក្រហម​កម្ពុជា ជូនប្រជាពលរដ្ឋរងគ្រោះ​ដោយសារភ្លើង​ឆេះផ្ទះចំនួន​ ២គ្រួសារ ស្ថិតនៅភូមិចំនួន២ នៃស្រុកថ្ពង និង ស្រុកឧត្តុង ខេត្តកំពង់ស្ពឺ។

ក្នុងឱកាសនោះដែរ ​លោកស្រីនាយិកា បានសម្ដែងនូវ​ការសោកស្ដាយចំពោះ​ឧបទ្ទវហេតុភ្លើងឆេះ​ផ្ទះនេះ ហើយកុំអស់សង្ឃឹម ត្រូវខិតខំ​ប្រកបរបរចិញ្ចឹម​ជីវិតដើម្បីសម្រាលនូវជីវភាពរស់នៅ​លើសពីនេះសូមបងប្អូនប្រជាពលរដ្ឋទាំងអស់​ មេត្តាប្រុងប្រយ័ត្ន​ភ្លើងទៀនផ្សេងៗ ជៀសវាងកើត​ឡើងដូចករណីខាងលើ។

អំណោយដែលបានផ្តល់​ជូនរួមមាន ៖ អង្ករ ៥០គីឡូក្រាម មី ១កេស ត្រីខ ១០កំប៉ុង ប្រេងឆា ១ដប ទឹកត្រីទឹកស៊ីអ៊ីវ ១យួរ ទឹកដោះគោ ១កំប៉ុង តង់១ សារុង១ ក្រមា១ មុង១ កន្ទេល១ ភួយ ១ នំធុង ១ធុង និងថវិកាមួយចំនួនរៀល​ផងដែរ៕

 

វគ្គបណ្ដុះបណ្ដាលជាមូលដ្ឋានស្តីពីប្រវត្តិចលនា កាកបាទក្រហម អឌ្ឍចន្ទក្រហម គោលការណ៏គ្រឹះទាំង៧នៃចលនា និងវិជ្ជាសង្រ្គោះបឋម ជូនដល់កំលាំងកងទ័ពជើងទឹកមូលដ្ឋានសមុទ្ររាម

សាខាកក្រកខេត្តព្រះសីហនុ ៖ នៅព្រឹកថ្ងៃចន្ទ​ ៤កើត ខែចេត្រ ឆ្នាំច សំរឹទ្ធិស័ក ព.ស.២៥៦២​ ត្រូវនឹង​ថ្ងៃទី ៨ ខែ មេសា ឆ្នាំ២០១៩ សាខា​កាកបាទក្រហមកម្ពុជា ​ខេត្តព្រះសីហនុ បានរៀបចំពិធីបើក​វគ្គបណ្ដុះបណ្ដាលជាមូលដ្ឋានស្តីពី​ប្រវត្តិចលនា កាកបាទក្រហម អឌ្ឍចន្ទ​ក្រហម គោលការណ៏គ្រឹះ​ទាំង៧នៃចលនា និងវិជ្ជា​សង្រ្គោះបឋម ជូនដល់​កំលាំងកងទ័ព​ជើងទឹកមូលដ្ឋាន​សមុទ្ររាម ក្រោមវត្តមាន ឯកឧត្តម ឧត្តមសេនីយ៍ត្រី គី យ៉ាដេត នាយសេនាធិការ​រងមូលដ្ឋានរាម រួមជាមួយនឹងវត្តមាន​ លោក អុប ពុទ្ធា ប្រធានការិយាល័យ​សង្គ្រោះបឋម កាកបាទក្រហមកម្ពុជា​ គ្រូបង្គោល ក្រុមប្រតិបត្តិសាខា និងកំលាំងកងទ័ព​សរុបចំនួន ២៣នាក់។ វគ្គបណ្ដុះបណ្ដាលនេះ ​មានរយៈពេល ២ថ្ងៃ ចាប់ពីថ្ងៃទី ៨ដល់ថ្ងៃទី៩ ខែ មេសា ឆ្នាំ ២០១៩ នៅ​គិលានដ្ឋានមូលដ្ឋានសមុទ្ររាម​ ខេត្តព្រះសីហនុ។

វគ្គបណ្ដុះបណ្ដាលនេះរៀបចំឡើងក្នុង​គោលបំណង ដើម្បីបង្កើន​សមត្ថភាព និងក្លាយជា​គ្រូបង្គោលវិជ្ជាសង្គ្រោះបឋមដើម្បី​បណ្តុះបណ្តាល ផ្សព្វផ្សាយ​បន្តដល់មិត្តភក្ដិនៅចំណុច​ឈរជើងនៅតាមកោះនីមួយៗ និងកងកំលាំងនានារបស់មូលដ្ឋាន​ ដើម្បីជួយសង្រ្គោះជន​រងគ្រោះ កងកំលាំង ប្រជាពលរដ្ឋ​នៅក្នុងសហគមន៍ ​ដោយឧប្បទវហេតុផ្សេងៗប្រកបដោយសុវត្ថិភាព និងចូលរួម​សកម្មភាពមនុស្សធម៌ ​ប្រកបដោយគុណភាព និងប្រសិទ្ធភាពផងដែរ៕

 

ពិធីបំពាក់កន្សែងដល់យុវជន កាកបាទក្រហមកម្ពុជា ថ្មី នៅខេត្តស្វាយរៀង

សាខាកក្រក​ខេត្តស្វាយរៀង៖ នៅថ្ងៃចន្ទ ៤កើត ខែចេត្រ ឆ្នាំច សំរឹទ្ធិស័ក ព.ស ២៥៦២ ត្រូវនឹង​ថ្ងៃទី ៨ ខែមេសា ឆ្នាំ២០១៩ នៅទីស្នាក់ការ​សាខា​កាកបាទក្រហមកម្ពុជា​ខេត្តស្វាយរៀង​ បានរៀបចំពិធី​បំពាក់កន្សែងដល់យុវជន កាកបាទក្រហម​កម្ពុជា ថ្មី ចំនួន ៤៧ នាក់ មកពីវិទ្យាល័យ​ស្វាយរៀង ២៨ នាក់ វិទ្យាល័យ ហ៊ុនសែន ចេក ១៩ នាក់ ក្រោមអធិបតីភាព​ លោកជំទាវ ហៅ ច័ន្ទសិរីទេពី ​ចៅ ភិរុណ អនុប្រធាន​គណៈកម្មាធិការសាខា និងមាន​ការចូលរួម​ពី បុគ្គលិកសាខា ​ទីប្រឹក្សា និង​យុវជនកាកបាទក្រហម​កម្ពុជា សរុប ៦០ នាក់ ។


ក្នុងឱកាសនោះ លោកជំទាវ ​អនុប្រធានគណៈកម្មាធិការ​សាខា បាននាំមក​នូវការផ្ដាំផ្ញើ​ការសួរសុខទុក្ខ​ដោយក្ដីស្រឡាញ់ និង​នឹករលឹកបំផុត​ពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ជូនចំពោះ​ គណៈអធិបតី ភ្ញៀវកិត្តិយស និងសមាជិក​ទាំងអស់ ដែលមានវត្តមាន​នៅទីនេះ សូម​មានសុខភាពល្អ​បរិបូរណ៍ ប្រាជ្ញា​ឈ្លាសវៃ កម្លាំងពលំ​មាំមួន សម្រាប់បំពេញ​សកម្មភាពការងារ​មនុស្សធម៌ និងការងារសង្គម​បន្ដទៀត ។
លោកជំទាវ ក៏បាន​ថ្លែងនូវការកោតសរសើរ​ចំពោះគណៈគ្រប់គ្រង​នៃវិទ្យាល័យ និងយុវជន​កាកបាទ ក្រហមកម្ពុជា ដែលតែង​តែយកចិត្តទុក​ដាក់ពង្រឹង និងពង្រីក​បណ្ដាញយុវជន និង​សកម្មភាព​មនុស្សធម៌ កាកបាទក្រហមកម្ពុជា ដូចភ្លៀង​រលឹមចាប់តាំង​ពីការបង្កើតក្លឹប​យុវជន រហូត​មកដល់បច្ចុប្បន្ននេះ ។


ស្ថិតក្នុងបរិយាកាស​នេះដែរ លោកជំទាវ​បានពាំនាំ​នូវអនុសាសន៍​របស់ សម្ដេ​ចកិត្ដិ្ដព្រឹទ្ធបណ្ឌិត ប៊ុន រ៉ានី ហ៊ុនសែន ផ្ញើជូនអង្គ​ពិធីទាំងមូល​នូវខ្លឹមសាររួមមាន៖
- សូមបន្ដខិតខំប្រឹងប្រែង​រៀនសូត្រ ដើម្បីពង្រឹង និងពង្រីក​ចំណេះដឹងរបស់ខ្លួន​ឱ្យកាន់តែប្រសើរ​ឡើងថែមទៀត ស្របតាមស្ថានភាព​រីកចម្រើនរបស់​ប្រទេសជាតិ ក្រោមការដឹកនាំ​ដ៏ឈ្លាសវៃ របស់ សម្ដេចតេជោនាយករដ្ឋមន្ដ្រី។


- បន្ដពង្រឹង និងពង្រីក​បណ្ដាញយុវជន កក្រក ពីក្នុង​ចំណោមនិស្សិត​នៅសាកលវិទ្យាល័យ ដើម្បីផ្ដល់​ឱកាសឱ្យពួកគេចូលរួម​ការងារមនុស្សធម៌ ជាប់ជាប្រចាំ។
- សូមយកចិត្តទុកដាក់​ចំពោះសិស្ស និស្សិត និងយុវជនកាកបាទក្រហម​កម្ពុជា ដែលមានជីវភាព​ខ្វះខាត ហើយកំពុង​សិក្សានៅក្នុងសាកល​វិទ្យាល័យជាមុន និងសិស្ស និស្សិត កុមារកំព្រា​ ចាស់ជរា នៅតាមសហគមន៍ជាក្រោយ ។
- បន្តលើកទឹកចិត្តដល់សមាជិកយុវជន កក្រក ដែលសកម្មនឹងការងារទៅតាមលទ្ធភាព ដើម្បីឱ្យពួកគេមានឆន្ទៈបន្ដសកម្មភាពមនុស្សធម៌នានាឱ្យបានកាន់តែច្រើនថែមទៀត។
- បន្ដលើកកម្ពស់នូវវប្បធម៌ចែករំលែក មិត្តអប់រំមិត្ត អ្នកចេះច្រើនបង្រៀនអ្នកចេះតិច អ្នកចេះតិចបង្រៀនអ្នកមិនចេះសោះ ទៅកាន់សិស្ស និស្សិត និងយុវជន កក្រក នៅក្នុងសាកលវិទ្យាល័យ និងសហគមន៍នានា។


- សូមបន្ដធ្វើសកម្មភាពទាំងឡាយណាដែលផ្ដល់ប្រយោជន៍ដល់សង្គមជាតិ ដោយធ្វើខ្លួនជាកូនល្អ និស្សិតល្អ សិស្សល្អ និងពលរដ្ឋល្អ​ ជៀសវាងចាញ់បោក​ការឃោសនារបស់ជន​អគតិមួយក្ដាប់ តូចដែលតែង​តែបំពុលសង្គមតាមគ្រប់រូបភាព។

យុវជនកាកបាទក្រហមកម្ពុជា នៃវិទ្យាល័យអង្គរ បាន ផ្សព្វផ្សាយពីសុវត្ថិភាពចរាចរណ៍ និងចែកខិតប័ណ្ណ ដល់លោកគ្រូអ្នកគ្រូ សិស្សនុសិស្ស

សាខា កក្រក ខេត្តសៀមរាប៖ ក្នុងគោលបំណង​ចូលរួមទប់ស្កាត់ និងកាត់បន្ថយ​គ្រោះថ្នាក់ចរាចរណ៍​នារដូវបុណចូលឆ្នាំខែ្មរ​ប្រពៃណី​ជាតិខាងមុខនេះ នៅព្រឹកថ្ងៃសៅរ៍​២កើត ខែចេត្រ ឆ្នាំច សំរឹទ្ធិស័ក ព.ស ២៥៦២ ត្រូវនឹងទី ៦ ខែមេសា ឆ្នាំ២០១៩ យុវជនកាកបាទក្រហម​កម្ពុជា៣៤នាក់ នៃវិទ្យាល័យ​អង្គរ បានសហការ​ជាមួយក្រុមតន្រ្តីជនពិការ​អនុវត្តសកម្មភាព​ផ្សព្វផ្សាយអម​ដោយបទចំរៀង​សុវត្ថិភាពចរាចរណ៍ និងចែកខិតប័ណ្ណសុវត្ថិភាពចរាចរណ៍ដល់​លោកគ្រូអ្នកគ្រូ សិស្សនុសិស្ស​ក្នុងឱកាសដែល​វិទ្យាល័យបានរៀបចំ​ប្រារព្ធពិធី សង្ក្រានឆ្នាំថ្មី។ 


នាពេលនោះផងដែរ​មន្រ្តីសាខាកាកបាទក្រហមកម្ពុជា​ខេត្ត និងលោកស្រីនាយិកា​វិទ្យាល័យអង្គរ បានចូលរួមផ្តល់បច្ចេកទេស សម្ភារ និងរបៀប​ផ្សព្វផ្សាយដល់ពួកគាត់​ដើម្បីអនុវត្តសកម្មភាពដោយរលូ​នមានដូចជា៖ ផ្សព្វផ្សាយព័ត៌មានពី​ស្ថានភាពគ្រោះថ្នាក់ចរាចរណ៍ ​វិធីពាក់មួក ឱ្យបានត្រឹមត្រូវ​ តាមរយៈយុវជនអនុវត្តសកម្មភាព​ផ្ទាល់ ហើយមានសិស្សានុសិស្ស​ឡើងអនុវត្ត ជាបន្តបន្ទាប់ ​ចែកខិតប័ណ្ណស្តីពីស្លាក​សញ្ញាចរាចរណ៍សំខាន់ៗ ច្បាប់​ផាកពិន័យ​អន្តរការ សារសុវត្ថិភាព ​ថ្ងៃនេះ ថ្ងៃស្អែកកុំឱ្យមាន​គ្រោះថ្នាក់ចរាចរណ៍ សរុបចំនួន ៥៣៥សន្លឹក និងមួកសុវត្ថិភាព​ចំនួន ២ ដែលសម្ភារ​ទាំងនេះ មានការឧបត្ថម្ភ​ពីមន្ទីរសាធារណការ ​និងដឹកជញ្ជូន​ខេត្តសៀមរាប។

សាខាកាកបាទក្រហមកម្ពុជាខេត្តកណ្តាល ប្រគល់ឱសថប្រភេទ Paracetamol និង Multivitamin ដល់អនុសាខា កាកបាទក្រហមកម្ពុជាស្រុក-ក្រុងទាំង១១

សាខា កក្រក ខេត្តកណ្តាល ៖ នៅរសៀល​ថ្ងៃសៅរ៍ ២កើត ខែចេត្រ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី​ ០៦ ខែមេសា ឆ្នាំ២០១៩ សាខា​កាកបាទក្រហមកម្ពុជា​ខេត្តកណ្តាល​ បានរៀបចំពិធី​ប្រគល់ឱសថប្រភេទ Paracetamol ចំនួន ៣២០ ប្រអប់ និង Multivitamin ចំនួន ៣១០ ប្រអប់ ដល់​អនុសាខា កាកបាទក្រហមកម្ពុជា​ស្រុក-ក្រុងទាំង១១ ​ដើម្បីបន្តទៅចែកជូន​ដល់មណ្ឌលសុខភាព​ចំនួន ៩៨ ទូទាំងខេត្ត នៅទីស្នាក់ការ​សាខា ។ ពិធីនេះប្រព្រឹត្ត​ទៅក្រោមវត្តមាន​លោកវេជ្ជបណ្ឌិត គួយ ប៊ុនធឿន​ អនុប្រធាន​គណៈកម្មាធិការសាខា និងមានការអញ្ជើញ​ចូលរួមជាកិត្តិយស​ពីសមាជិកសមាជិកា​គណៈកម្មាធិការសាខា លោកលោកស្រី​តំណាងអនុសាខាគ្រប់​ស្រុក-ក្រុង និងមន្ត្រីក្រុមប្រតិបត្តិសាខា សរុបចំនួន ១៧ នាក់ ។

មានមតិសំណេះសំណាលលោក​វេជ្ជបណ្ឌិត គួយ ប៊ុនធឿន ក្នុងនាម​ឯកឧត្តម គង់ សោភ័ណ្ឌ ប្រធានគណៈកម្មាធិការសាខា បានពាំនាំ​នូវប្រសាសន៍ផ្តាំផ្ញើសួរ​សុខទុក្ខពីសម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហម​កម្ពុជា ដោយសេចក្តី​នឹករឭកជាទីបំផុត ។ លោកវេជ្ជបណ្ឌិត​អនុប្រធានបានបញ្ជាក់ថា ៖ ឱសថទាំងពីរ​ប្រភេទខាងលើ ជាអំណោយ​របស់ឧត្តមសេនីយ៍ ឡាវ វ៉ាន់ មេបញ្ជាការរង បញ្ជាការដ្ឋាន​វិស្វកម្មកងពលតូច​ថ្មើរជើងលេខ៧០ ដែលបានឧបត្តម្ភ​ជាអំណោយតាមរយៈ​ឯកឧត្តមបណ្ឌិត ម៉ៅ ភិរុណ អភិបាលខេត្ត និងជាប្រធាន​កិត្តិយសសាខា ជូនដល់សាខា​កាកបាទក្រហមកម្ពុជាខេត្ត ដើម្បី​ចាត់ចែងចែកជូន​ដល់ប្រជាពលរដ្ឋ​ក្រីក្រ ដែលមានជំងឺ​ជាក់ស្តែងនៅក្នុងសហគមន៍ ៕

 

ពិធីបិទសិក្ខាសាលាស្ដីអំពីការផ្ទេរកម្មវិធីជូនមូលដ្ឋានគោលដៅ

កក្រក ៖ នាព្រឹកថ្ងៃសុក្រ ១កើត ​ខែចេត្រ ឆ្នាំច សំរឹទ្ធិស័ក ព.ស. ២៥៦២ ត្រូវនឹង​ថ្ងៃទី ៥ ខែ មីនា ឆ្នាំ ២០១៩ នេះ កាកបាទក្រហមកម្ពុជា ​បានរៀបចំពិធីបិទសិក្ខាសាលាស្ដីអំពីការផ្ទេរ​កម្មវិធីជូនមូលដ្ឋាន​គោលដៅ ក្រោមអធិបតីភាព ឯកឧត្តម​ យូ ឡាណា អគ្គលេខាធិការរងទី២ កាកបាទក្រហមកម្ពុជា​ និងលោក សោម សុខហេង នាយកសាខាកាកបាទក្រហម​កម្ពុជា ខេត្តកំពង់ចាម និងមាន​ការចូលរួមពីលោក លោកស្រី ជាសមាជិក សមាជិកាគណៈកម្មាធិការ​សាខា អនុសាខា គណៈកម្មាធិការ​គ្រប់គ្រងគ្រោះមហន្តរាយ​ស្រុក-ឃុំ អ្នកស្ម័គ្រចិត្ត ទីប្រឹក្សាយុវជន​ និងយុវជនកាកបាទក្រហម​កម្ពុជា សរុបចំនួន ២២នាក់ (ស្រី ៥នាក់) ដែលប្រព្រឹត្តទៅនៅសាលាបឋមសិក្សា​បាធាយ ខេត្តកំពង់ចាម។

សិក្ខាសាលារយៈពេល២ថ្ងៃចាប់ថ្ងៃី៤ ដល់៥ ខែមេសា ឆ្នាំ២០១៩ នេះ រៀបចំឡើងក្នុង​គោលបំណង ឆ្លុះបញ្ជាំងអំពីស្នាដៃសម្រេច​បានរបស់កម្មវិធី​កសាងភាពធន់ក្នុង​សហគមន៍ កំណត់និង​បន្តពង្រឹងបណ្ដាមេរៀនពិសោធន៍ នៅក្នុងកម្មវិធី​នានានៅខាងក្នុង និងខាងក្រៅ​សហគមន៍គោលដៅ​នៃសាខា និងជម្រុញដាក់សកម្មភាពនៃខ្នាត​គម្រូកសាងភាពធន់​ក្នុងសហគមន៍ទៅក្នុងផែនការអភិវឌ្ឍ​និងផែនការប្រតិបត្តិរបស់សាខាកាកបាទក្រហម​កម្ពុជាខេត្ត។

ក្នុងឱកាសនោះដែរ ឯកឧត្តម យូ ឡាណា អគ្គលេខាធិការរងទី២ កាកបាទក្រហមកម្ពុជា បានថ្លែងអំណរគុណនិងកោតសរសើរដល់​មន្ត្រីកាកបាទក្រហមកម្ពុជា ដែលខិតខំប្រឹងប្រែង​បំពេញបេសកកម្ម​ការងារមនុស្សធម៌ ក្នុងការឆ្លើយតប​ទៅកាន់ជនរងគ្រោះ ​ជនងាយរងគ្រោះ​បានទាន់ពេលវេលា។ លើសពីនេះ​ទៀត មន្ត្រីកាកបាទក្រហមកម្ពុជាក៏បាន​បំពេញការងារ​បង្រៀនដល់ អ្នកស្ម័គ្រចិត្ត​កាកបាទក្រហម​កម្ពុជា នៅតាមភូមិ ឃុំ ដើម្បីឲ្យពួកគាត់បានទទួល​នូវចំណេះដឹងបន្ថែម​ក្នុងការត្រៀមបង្ការ ការអភិវឌ្ឍន៍ និងកសាងភាពធន់​នៅក្នុងសហគមន៍ផងដែរ៕

 

កាកបាទក្រហមកម្ពុជា ចុះសួរសុខទុក្ខ និងពិនិត្យស្ថានភាពជំងឺលោក គ្រួច សាមឿន

កក្រក​ ៖​ នៅរសៀលថ្ងៃព្រហស្បតិ៍​ ទី​ ៤​ ខែមេសា​ ឆ្នាំ២០១៩​ នេះ​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យលោកជំទាវ ម៉ែន នារីសោភ័គ អគ្គលេខា​ធិការរងទី ១ ចុះសួរសុខទុក្ខ​ និងពិនិត្យស្ថាន​ភាពជំងឺ​លោក​ គ្រួច​ សាមឿន​ ​អាយុ​ ៧១ឆ្នាំ​ សមាជិកបម្រុងគណៈកម្មាធិការ​សាខាកាកបាទក្រហមកម្ពុជា​ រាជធានីភំ្នពេញ​ និងជាអតីតនាយកសាខា​ រាជធានីភ្នំពេញ​ ដែលមានជំងឺកំពុងសម្រាកព្យាបាលនៅមន្ទីរពេទ្យកាល់ម៉ែត។

ក្នុងឱកាសនោះ លោកជំទាវ អគ្គលេខា​ធិការរងទី ១ បានពាំនាំប្រសាសន៍​របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ គិតគូរពីស្ថានភាពជំងឺ​ និងសូមជូនពរឆាប់បានជាសះស្បេីយ​មានសុខភាពល្អរឹងមាំឡេីងវិញ។

លោក​ គ្រួច​ សាមឿន​ បានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានគិតគូរពីសុខទុក្ខ​ ជាពិសេសលេីកទឹកចិត្តដល់មន្ត្រីក្រោមឱវាទ​ ក៏ដូចជា​ប្រជាពលរដ្ឋជួបការលំបាកដោយគ្មានការរេីសអេីងអ្វីឡេីយ​៕

 

កិច្ចប្រជុំលើកទី២ នៃគណៈកម្មាធិការសាខាកាកបាទក្រហមកម្ពុជា ខេត្តសៀមរាប

សាខា កក្រក ខេត្តសៀមរាប៖ នៅរសៀល​ថ្ងៃ ១៥ព្រហស្បត្តិ៍ ១៥រោច ​ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ០៤ ខែមេនា ឆ្នាំ២០១៩ នៅទីស្នាក់ការ​សាខាកាកបាទក្រហមកម្ពុជា ខេត្តសៀមរាប ​បានបើកកិច្ចប្រជុំលើកទី២ នៃគណៈកម្មាធិការ​សាខាកាកបាទក្រហម​កម្ពុជា ខេត្តសៀមរាប ​ក្រោមការដឹកនាំ​កិច្ចប្រជុំដោយ ឯកឧត្តម ទៀ សីហា ប្រធាន​គណៈកម្មាធិការសាខា និងឯកឧត្តម​ឧកញ៉ា សៀង ណាំ ប្រធាន​កិត្តិយសសាខា ព្រមទាំងមានការ​ចូលរួមពីសំណាក់ ឯកឧត្តម លោកជំទាវ​ អនុប្រធានកិត្តិយស ឯកឧត្តម លោកជំទាវ លោក អនុប្រធាន​ និងសមាជិក សមាជិកា គណៈកម្មាធិការ​សាខា រួមទាំងក្រុមប្រតិបត្តិ​សាខា សរុប៤៣រូប។

កិច្ចប្រជុំនេះត្រូវបាន​រៀបចំឡើងដោយមាន​របៀបវារៈសំខាន់ៗដូចខាងក្រោម៖
១- ការបង្ហាញសមាសភាព​ក្រុមប្រតិបត្តិសាខា​ជូនគណៈកម្មាធិការ​សាខាអាត្តិទី៥
២- របាយការណ៍​មូលនិធិសាខា
៣- ការត្រៀមប្រារព្ធ​ខួបលើកទី១៥៦ ទិវាពិភពលោក​កាកបាទក្រហម អឌ្ឍចន្ទក្រហម នៅខេត្តសៀមរាប

ចំពោះ​ការត្រៀមរៀបចំ​ប្រារព្ធខួបលើកទី១៥៦ ទិវាពិភពលោក​កាកបាទក្រហម អឌ្ឍចន្ទក្រហម នៅខេត្តសៀមរាប ក្រោមប្រធានបទ “ខ្ញុំ ❤️️ កាកបាទក្រហកម្ពុជា” ។ ជាលទ្ធផល​នៃកិច្ចប្រជុំនេះ​ បានសម្រេចថា ខួបលើក​ទី១៥៦ ទិវាពិភពលោក​កាកបាទក្រហម អឌ្ឍចន្ទក្រហម ​នៅខេត្តសៀមរាប នឹងប្រារព្ធធ្វើ​នៅព្រឹកថ្ងៃអាទិត្យ ២កើត ខែពិសាខ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី ០៥ ខែឧសភា ឆ្នាំ២០១៩។

 

កាកបាទក្រហមកម្ពុជា ចុះសួរសុខទុក្ខ និស្សិតមានជីវភាពខ្វះខាត ដែលកំពុងស្នាក់នៅនិងសិក្សានៅក្នុងវិទ្យាស្ថានវីឌីស៊ី ។

កក្រក​ ៖ ដើម្បីលើកទឹកចិត្ត​ និងចែករំលែកក្តីស្រឡាញ់ក្នុងពិធីបុណ្យចូលឆ្នាំខ្មែរខាងមុខនេះ​ នៅថ្ងៃព្រហស្បតិ៍​ ១៥រោច​ ខែផល្គុន​ ឆ្នាំច​ សំរឹទ្ធិស័ក​ ព.ស.២៥៦២​ ត្រូវនឹងថ្ងៃទី​ ៤​ ខែមេសា​ ឆ្នាំ២០១៩​ នេះ​ កាកបាទក្រហមកម្ពុជា​ ដែលមាន​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ជាប្រធាន​ បានចុះសួរសុខទុក្ខ​ និងផ្តល់អំណោយជួយស្រាលការលំបាកដល់និស្សិតមានជីវភាពខ្វះខាតចំនួន ៩៨នាក់​ ដែលកំពុងស្នាក់នៅ​និងសិក្សានៅក្នុងវិទ្យាស្ថានវីឌីស៊ី ដែលមានទីតាំងស្ថិតនៅ​សង្កាត់ទឹកថ្លា​ ខណ្ឌសែនសុខ​ រាជធានីភ្នំពេញ​។

ក្នុងឱកាសនោះ​ ឯកឧត្តម​ ពិត​ ចំណាន​ សមាជិកគណៈកម្មាធិការកណ្តាល​​ កាកបាទក្រហមកម្ពុជា​ បានពាំនាំប្រសាសន៍របស់​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ដែលផ្តាំផ្ញើការគិតគូរ​ សួរសុខទុក្ខ​ ក្តីអាណិត​ ស្រឡាញ់ចំពោះនិស្សិតទាំងអស់ដែល​ខិតខំលះបង់តស៊ូរៀនសូត្រផងហេីយឆ្លៀតពេលធ្វេីការរកចំណូលផ្គត់ផ្គង់ជីវភាពនិងការសិក្សាផង ហេីយជាពិសេស​ សូមថ្លែងនូវការកោតសរសេីរចំពោះក្រុមប្រឹក្សាភិបាល​ គណៈគ្រប់គ្រង​ គ្រូ​ នៃវិទ្យាស្ថាន​វីឌីស៊ី​ ដែលខិតខំប្រឹងប្រែងដោយមិនគិតពីផលចំនេញដេីម្បី​ចូលរួម​ចំណែក​អភិវឌ្ឍធនធានមនុស្ស​ ព្រមទាំងចូលរួមក្នុងកិច្ចការសង្គមផ្សេងៗ។​ ទន្ទឹមនឹងនេះ​ ឯកឧត្តម​ ពិត​ ចំណាន​ បានពាំនាំនូវការផ្តាំផ្ញើពីសំណាក់​ សម្តេចកិត្តិព្រឹទ្ធបណ្ឌិត​ ដល់ក្មួយៗនិស្សិតទាំងអស់ឱ្យ​ខិតខំតស៊ូ​ក្រេបយកចំណេះដឹង​ ដោយប្រកាន់ខ្ជាប់នូវសីលធម៌​ គុណធម៌​ និងចរិយាសម្បត្តិ​ ដើម្បីអនាគតភ្លឺស្វាង​ និងជាក្តីសង្ឃឹមរបស់ក្រុមគ្រួសារដែលកំពុងរង់ចាំភាពជោគជ័យរបស់ក្មួយៗ។

ជាមួយគ្នានេះ និស្សិតទាំងអស់បានសម្តែងនូវការដឹងគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន​ រ៉ានី​ ហ៊ុនសែន​ ដែលជាមាតាគ្មានពីរនៃបេះដូងមនុស្សធម៌​ ចំពោះ​និស្សិតទាំងអស់​បានផ្តល់ក្តីអាណិតស្រឡាញ់យ៉ាងកក់ក្តៅ​ លើកទឹកចិត្ត​ និងផ្តល់ក្តីសង្ឃឹម​ដល់អ្នកជួបការលំបាកដោយគ្មានការរើសអើង មិនប្រកាន់វណ្ណៈ ពូជសាសន៍ សាសនា​ ពណ៌សម្បុរ​ ឬនិន្នាការនយោបាយអ្វីឡើយ។

និស្សិតម្នាក់ៗទទួលបាន​ ៖ អង្ករ​ ៣០គីឡូក្រាម​ មី ១កេស ត្រីខ ១០កំប៉ុង និងថវិកា​ ៥ម៉ឺនរៀល​៕

 

កិច្ចប្រជុំលើកទី១ ដើម្បីពិភាក្សា និងត្រួតពិនិត្យការងារទិវាពិភពលោក ៨ ឧសភា ២០១៩

ដំណើរឆ្ពោះ​ទៅកាន់ការប្រារព្ធ​ទិវា​ពិភពលោក​កាកបាទក្រហម ​និងអឌ្ឍចន្ទ​ក្រហម ៨ ឧសភា ២០១៩ ក្រោមប្រធានបទ «ខ្ញុំ ❤️ កាកបាទក្រហម​កម្ពុជា» ដែលនឹង​ប្រព្រឹត្តក្រោម​អធិបតីភាពដ៏ខ្ពង់ខ្ពស់ សម្តេចអគ្គមហាសេនាបតី​តេជោ ហ៊ុន សែន នាយករដ្ឋមន្ត្រី​នៃព្រះរាជាណាចក្រកម្ពុជា ...!!

នៅថ្ងៃពុធ ១៤រោច ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ៣ ខែមេសា ឆ្នាំ២០១៩ នេះ គណៈកម្មការរៀបចំខួបទី ១៥៦ ទិវា ៨ ឧសភា ឆ្នាំ២០១៩ ដែលមាន ​សម្តេចចៅហ្វាវាំង គង់ សំអុល អនុប្រធានអចិន្ត្រៃយ៍​កាកបាទក្រហម​កម្ពុជា ជាប្រធាន បានរៀប​ចំកិច្ចប្រជុំ​លើកទី១ ដើម្បី​ពិភាក្សា និងត្រួតពិនិត្យការងារ​ដែលសម្រេចបាន​របស់អនុគណៈកម្មការ​នីមួយៗ និងលើកទិសដៅសម្រាប់អនុវត្តការងារបន្តឱ្យ​មានប្រសិទ្ធភាព។

កិច្ចប្រជុំនេះ មានការអញ្ជើញ​ចូលរួមពីលោកជំទាវអនុប្រធាន​កាកបាទក្រហមកម្ពុជា ថ្នាក់ដឹកនាំ សមាជិក ​សមាជិកា សរុបចំនួន ៥២នាក់។

បន្ទាប់ពីកិច្ចប្រជុំ​នេះ លោកជំទាវ ឃួន សុដារី អនុប្រធាន​កាកបាទក្រហមកម្ពុជា តំណាង​ដ៏ខ្ពង់ខ្ពស់សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា បានអាន​និងប្រគល់​សារលិខិតជូនពររបស់​សម្តេចកិត្តិព្រឹទ្ធបណ្ឌិត ព្រមទាំង​ផ្លែឈើ និងផ្កាស្រស់ល្អ១កន្ត្រក ​គោរពជូន សម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល ក្នុងឱកាស​បុណ្យចូលឆ្នាំថ្មីប្រពៃណីជាតិ​ខ្មែរ ឆ្នាំកុរ ឯកស័ក ព.ស.២៥៦៣ ផងដែរ៕

 

First Prev 1 2 3 4 5 Next Last