អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

កាកបាទក្រហម កម្ពុជា ផ្តល់ថវិកា គ្រឿងបរិភោគ និងសម្ភារ ជូនបុរសពោះម៉ាយឈ្មោះ ធួក ម៉ៅ

កក្រក​ ៖​ នៅរសៀលថ្ងៃចន្ទ ១៣រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១១ ខែមិថុនា ឆ្នាំ២០១៨ នេះ កាកបាទក្រហម​កម្ពុជា (កក្រក) ដែលមាន សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់ថវិកា គ្រឿងបរិភោគ និង​សម្ភារប្រើប្រាស់​មួយចំនួន ជូនបុរសពោះម៉ាយឈ្មោះ ធួក ម៉ៅ អាយុ ៣៦ឆ្នាំ ដើម្បីសម្រាល​ដល់ការស្នាក់នៅ ក្នុងពេលមើលថែទាំ​កូនតូចអាយុ ៤ឆ្នាំ ដែលនឹងត្រូវវះកាត់ព្យាបាលជំងឺត្បៀតពោះវៀន នៅមន្ទីរពេទ្យ។

ក្នុងឱកាសនោះ​ លោកជំទាវ ម៉ែន នារីសោភ័គ អគ្គលេខាធិការរងទី ១ កក្រក បានពាំនាំប្រសាសន៍របស់ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ដែលផ្តាំផ្ញើ​សួរសុខទុក្ខ និងលើកទឹកចិត្ត​ដល់ លោក ធួក ម៉ៅ ឱ្យបន្តខិតខំ​តស៊ូប្រកបរបរ​ចិញ្ចឹមជីវិត និងមើលថែទាំកូនឱ្យ​បានល្អ អនុវត្តតាម​ការណែនាំរបស់គ្រូពេទ្យ។

លោក ធួក ម៉ៅ បានថ្លែងអំណរគុណ​យ៉ាងជ្រាលជ្រៅ​ចំពោះ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានជួយ​ឧបត្ថម្ភ លើកទឹកចិត្ត និងផ្តល់ក្តីសង្ឃឹមដល់ប្រជាជន​ជួបការលំបាកដោយគ្មានការរើសអើង​អ្វីឡើយ៕

កាកបាទក្រហមកម្ពុជាសម្រេចផ្តល់អណ្តូងស្នប់ ជូនប្រជាពលរដ្ឋខ្វះខាតទឹកប្រើប្រាស់ នៅខេត្តក្រចេះ, ស្ទឹងត្រែង និង ខេត្តមណ្ឌលគិរី

កក្រក​ ៖ ដើម្បីបន្តដោះស្រាយ​តម្រូវការទឹក​នៅតាមទីជនបទ​ដាច់ស្រយាល នៅថ្ងៃទី ៧ ខែមិថុនា ឆ្នាំ២០១៨ នេះ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា បានសម្រេច​ផ្តល់អណ្តូង​ស្នប់ធំ ចំនួន ៤១អណ្តូង គិតជាទឹកប្រាក់​ចំនួន ៩៩.៨៧២ដុល្លារ​អាមេរិក (ប្រាំបួនម៉ឺនប្រាំបួនពាន់ប្រាំបីរយ​ចិតសិប​ពីរដុល្លារអាមេរិក) ជូនប្រជាពលរដ្ឋ​ខ្វះខាត​ទឹកប្រើប្រាស់​ចំនួន ៧៧៣គ្រួសារ ស្មើមនុស្ស ៣.៨៨០នាក់ រស់នៅតំបន់​ដាច់ស្រយាល និងតាមបណ្តោយ​ព្រំដែនកម្ពុជា-ឡាវ ក្នុងនោះ អណ្តូង​ចំនួន ១៥ សម្រាប់ខេត្តក្រចេះ, ១៤អណ្តូង សម្រាប់ខេត្តស្ទឹងត្រែង និង ១២អណ្តូង សម្រាប់ខេត្តមណ្ឌលគិរី។

សូមបញ្ជាក់ថា គិតចាប់តាំង​ពីឆ្នាំ ២០១០ រហូតដល់​បច្ចុប្បន្ននេះ កាកបាទក្រហម​កម្ពុជា បានដោះស្រាយបញ្ហាទឹកស្អាត​ជូនប្រជាពលរដ្ឋ​រាប់ម៉ឺនគ្រួសារ​នៅទូទាំងប្រទេស ក្នុងនោះ បានផ្តល់អណ្តូងទឹកស្អាត (អណ្តូងស្នប់-លូ) ស្រះទឹកសហគមន៍ និងស៊ីទែនទឹក។ល។ ជាក់ស្តែង ក្នុងឆ្នាំ ២០១៧ កន្លងទៅ បានផ្តល់អណ្តូងសរុបចំនួន ៤៣៣ និងជីក-ស្តារស្រះទឹកចំនួន ៧ ដែលជាប្រយោជន៍​សម្រាប់ប្រជាពលរដ្ឋចំនួន ១០.៤៦៩គ្រួសារ។ ដោយឡែក ក្នុងឆមាសទី ១ ឆ្នាំ២០១៨ នេះ កាកបាទក្រហមកម្ពុជា បានប្រគល់អណ្តូង​ឱ្យប្រើប្រាស់​ជាផ្លូវការចំនួន ៦៦ រួចមកហើយ ហើយ​អណ្តូងទាំង ៤១ ដែលសម្រេចផ្តល់​នៅពេលនេះ នឹងធ្វើពិធីប្រគល់​ជាបន្តបន្ទាប់៕

 

គ្រួសារងគ្រោះដោយខ្យល់កន្ត្រាក់ នៅភូមិគូលែនត្បូង ទទួលអំណោយពីសាខាកក្រកខេត្តព្រះវិហារ

សាខាកក្រកខេត្តព្រះវិហារ៖នៅព្រឹកថ្ងៃទី ៧ ខែមីថុនា ឆ្នាំ២០១៨នេះ​លោក រ៉ាត់ សោភា​ អនុប្រធានគណ:កម្មាធិការសាខា​កាកបាទក្រហម​កម្ពុជា ខេត្តព្រះវិហារ រួមជាមួយ​គណ:កម្មាធិការអនុសាខាកាកបាទ ក្រហម​ស្រុកគូលែន បាននាំ​យកអំណោយ​មនុស្សធម៌​ទៅផ្តល់ជូន​ដល់គ្រួសារងគ្រោះ​ដោយខ្យល់កន្ត្រាក់​កាលពីល្ងាចថ្ងៃទី ៦ ខែ មិថុនា ឆ្នាំ ២០១៨ ដែលបណ្តាល​អោយរលំធ្លាក់​ផ្ទះចេញពី ជើងតាងដល់ដី ចំនួន ២ខ្នងផ្ទះ និងរបើកដំបូល ១ខ្នងផ្ទះ សរុបចំនួន ៣ ខ្នងផ្ទះ ឋិត នៅភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ។

ក្នុងឧកាសនោះ​លោក រ៉ាត់ សោភា​ បានពាំនាំនូវ​ប្រសាសន៍​ផ្តាំផ្ញើសាក សួរសុខទុក្ខ​ពីសំណាក់ សម្តេចកិតិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា ដែលលោកតែងតែ​គិតគូរដល់សុខទុក្ខរបស់បងប្អូនគ្រប់ទីកន្លែង ដោយមិន​ប្រកាន់ពូជន៍សាសន៍ ព៍ណ៌សំបូរអ្វីឡើយ ពិសេសបងប្អូនដែលរងគ្រោះដោយគ្រោះថ្នាក់ដូចពេលនេះ ។

សម្ភារដែលផ្តល់​ជូនក្នុងមួយគ្រួសារៗ រួមមាន៖អង្ករ ២៥ គីឡូ មី ១ កេស ត្រីខ ១យួរ និង ទឹកស៊ីអ៉ីវ ១យួរ និងថវិកាមយយចំនួន ដោយ ឡែកគ្រួសារដែលផ្ទះធ្លាក់ពីជើងតាំង ០២ខ្នងផ្ទះ ទទួលបានតង់ ១ និង មុង១ ភួយ១ សារ៉ុង១ ក្រម៉ា១ ។

សាខាកក្រកខេត្តតាកែវ បំពាក់ឯកសណ្ឋានដល់យុវជន កាកបាទក្រហមកម្ពុជាវិទ្យាល័យគិរីវង់

ថ្ងៃអង្គារ ៧ រោច ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ៥ខែមិថុនា ឆ្នាំ ២០១៨ នៅក្នុងបរិវេនវិទ្យាល័យគិរីវង់ ស្រុកគិរីវង់​ ខេត្តតាកែវ មានកម្មវិធីបំពាក់ឯក​សណ្ឋានដល់យុវជន កាកបាទក្រហមកម្ពុជា ស្ថិតក្រោមអធីបតីភាព ឯកឧត្តម អ៊ូច ភា ​ប្រធានកិត្តិយសសាខា​កាកបាទក្រហមកម្ពុជា ខេត្តតាកែវ រួមដំណើរដោយ​លោកជំទាវ​ប្រធានគណៈកម្មាធិការ​សាខា សមាជិក សមាជិការ​គណៈកម្មាធិការសាខា ក្រុមប្រតិបត្តិ​សាខា អនុសាខាស្រុកគិរីវង់ បានបំពាក់​ឯកសណ្ឋាន​ដល់យុវជន​កាកបាទក្រហមចំនួន ២០០នាក់ និងទីប្រឹក្សារ៨នាក់ នាយក៤នាក់ និងមន្ត្រីការិយាល័យស្រុក១នាក់ សរុប២០១៣នាក់ មកពី៤វិទ្យាល័យ គឺ៖វិទ្យាល័យសុខអាន ទន្លាប់ ៥៣នាក់ វិទ្យាល័យសុខអាន សូបិណ៥៣នាក់  វិទ្យាល័យ សុខអាន ភ្នំ៥៣នាក់   និងវិទ្យាល័យ គិរីវង់៥៣នាក់ ដែលបានទទួល​វគ្គបណ្តុះបណ្តាល​មូលដ្ឋានស្តីពី គោលការណ៍គ្រឹះ​ចលនា វិជ្ជាសង្គ្រោះ​បឋម និងគោលនយោបាយ​យុវជន អ្នកស្ម័គ្រចិត្ត​កាកបាទក្រហមកម្ពុជា។
ក្រោយពីបំពាក់​ឯកសណ្ឋានរួច​ក៏បានផ្តល់ថវិកា​សម្រាប់ការធ្វើ​ដំណើរដល់យុវជន​កាកបាទក្រហមទាំង២០១៣នាក់ និងថតរូប​ទុកជាអនុស្សាវរីយ៍ផងដែរ។

កាកបាទក្រហមកម្ពុជា ប្រគល់អំណោយជាថវិកា អង្ករ និងមួកសុវត្ថិភាព ជូនដល់អនុសាខាកាកបាទក្រហមកម្ពុជា ខណ្ឌទាំង ១២ ក្នុងរាជធានីភ្នំពេញ

កក្រក​ ៖ នៅទីស្នាក់ការ​កណ្តាល នា​ព្រឹកថ្ងៃអង្គារ​ ៨កើត​ ខែជេស្ឋ ឆ្នាំច​ សំរឹទ្ធិស័ក​ ព.ស.២៥៦២​ ត្រូវនឹងថ្ងៃទី​ ២២ ខែឧសភា​ ឆ្នាំ២០១៨​ នេះ កាកបាទក្រហម​កម្ពុជា (កក្រក)​ ដែលមាន សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បាន​ប្រគល់អំណោយ​ជាថវិកាចំនួន​ ១២០លានរៀល​ អង្ករចំនួន ១០៨តោន ​និងមួក​សុវត្ថិភាពចំនួន​ ៦០០​ (ជាអំណោយ​ទទួលបានក្នុង​ឱកាសទិវា​ ៨​ ឧសភា​ ២០១៨)​ ជូនដល់​អនុសាខា​កាកបាទក្រហម​កម្ពុជា ខណ្ឌទាំង​ ១២ ក្នុងរាជធានីភ្នំពេញ​ ដោយ​អនុសាខានីមួយៗទទួលបានថវិកា​ ១០លានរៀល​ អង្ករចំនួន ៣០០ការុង ស្មើនឹង ៩តោន​ និងមួកសុវត្ថិភាព​ចំនួន​ ៥០។

 

ក្នុងឱកាសនោះ លោកជំទាវ ពុំ ចន្ទីនី អគ្គលេខាធិការ​កក្រក បានពាំនាំ​នូវប្រសាសន៍​របស់ សម្តេចកិត្តិព្រឹទ្ធបណ្ឌិតប្រធាន ​ដែលផ្តាំ​សួរសុខទុក្ខ និង​កោតសរសើរ​ ដល់អនុសាខា​ខណ្ឌទាំង១២ ដែលតែងតែចុះជួយ​ប្រជាពលរដ្ឋ​ងាយរងគ្រោះបំផុត ​និងអ្នកដែលត្រូវការ​ឱ្យជួយដល់​លំនៅឋាន​ដោយមិនទុកនរណាម្នាក់ចោល​ ក្នុងនោះមាន ​ចាស់ជរាឥតទីពឹង ​ជនពិការ កុមារកំព្រា​ ស្ត្រីមេម៉ាយ អ្នកមាន​ជំងឺរ៉ាំរ៉ៃ អ្នករស់នៅជាមួយ​មេរោគអេដស៍។ល។

 

តំណាង​អនុសាខានីមួយៗ​ បានថ្លែង​អំណរគុណ​យ៉ាងជ្រាលជ្រៅ​ចំពោះសម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ដែលដឹកនាំ​កាកបាទក្រហមកម្ពុជា​ ប្រកបដោយគតិបណ្ឌិត​ ការគិតគូរ​ យកចិត្តទុកដាក់​ តាមដាន​ និងដោះស្រាយភ្លាមៗដល់ទុក្ខលំបាក​របស់ប្រជាពលរដ្ឋ​។​ សម្រាប់អំណោយ​ដែលទីស្នាក់ការកណ្តាលបាន​ផ្តល់ជូនក្នុងថ្ងៃនេះ​ អនុសាខានីមួយៗ នឹងយកទៅ​ចាត់ចែងផ្តល់ជូន​ដល់អ្នកងាយ​រងគ្រោះបំផុត​ក្នុងបូរណភាពទឹកដី​នៃខណ្ឌ​នីមួយៗឲ្យមាន​ប្រសិទ្ធភាព ដោយមិនមាន​ការរើសអើង ប្រកាន់វណ្ណៈ ពូជសាសន៍ ព័ណ៌សម្បុរ ឬនិន្នាការ​នយោបាយអ្វីឡើយ។

 

សូមបញ្ជាក់ជូនថា កាកបាទក្រហម​កម្ពុជា បានផ្តល់​អំណោយ​មនុស្សធម៌ ដល់​អនុសាខាទាំង ១២ខណ្ឌ បានចំនួន ៧លើករួច​មកហើយ ហើយដែល​ថ្ងៃនេះ គឺជាការផ្តល់​ជូនលើកទី ៨​ ពីឆ្នាំ​ ២០១៥៕

 

សាខាកាកបាទក្រហមកម្ពុជា ខេត្តបាត់ដំបង ប្រារព្ធទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ ២០១៨

សាខាកក្រក​ខេត្តបាត់ដំបង៖ នៅព្រឹក​ថ្ងៃទី ២២ ខែ ឧសភា ឆ្នាំ ២០១៨ សាខា​កាកបាទក្រហម​កម្ពុជា ខេត្តបាត់ដំប​ង បានប្រារព្ធ​ទិវាពិភពលោក​កាកបាទក្រហម អឌ្ឍចន្ទក្រហម ៨ ឧសភា ឆ្នាំ ២០១៨ ខួបលើកទី ១៥៥ ក្រោមប្រធានបទ “កាកបាទក្រហម​កម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល”និងបំពាក់ឯកសណ្ឋាន​យុវជនកក្រក​ចំនួន១០០នាក់ ក្រោម​អធិបតីភាព ឯកឧត្តម ងួន រតនៈ​ប្រធានកិត្តិយស​សាខា​ កាកបាទក្រហម​កម្ពុជា ខេត្តបាត់ដំប​ង ឯកឧត្តម អ៊ុយ រី ​អនុប្រធាន​កិត្តិយស​សាខា​ឯកឧត្តម ចន្ទ័ សុផល​ទីប្រឹក្សា​រាជរដ្ឋាភិបាល និងឯកឧត្តមបណ្ឌិត ប៊ុត​គឹមស៊ាន​ប្រធានគណៈកម្មាធិការ​សាខា​ ដោយមាន​ការអញ្ជើញ​ចូលរួមពី ឯកឧត្តម លោកជំទាវ លោកឧកញ៉ា លោក លោកស្រី ​ជាសមាជិក សមាជិកាគណៈកម្មាធិការ​សាខា អនុសាខា ក្រុ​មប្រតិបត្តិសាខា មន្រ្តីរាជការ អង្គភាព​ជុំវិញខេត្ត យុវជន​កាយរិទ្ធិ សសយក យុវជន​កាកបាទក្រហម​កម្ពុជា សប្បុរសជនសរុបចំនួន ៧០០នាក់ ដែលប្រារព្ធ​ឡើងនៅសាលមហោ​ស្រប​ស្ទឹងសង្កែ​ក្រុងបាត់ដំបង។​

 

ទិវានេះប្រព្រឹត្ត​ទៅនៅក្នុងគោលបំណង៖
-រំលឹកដល់ថ្ងៃកំណើតរបស់​លោក ហង់រី ឌុយណង់ ដែលជាស្ថាបនិក​របស់កាកបាទក្រហម
-យល់ដឹងអំពីប្រវត្តិចលនារបស់​កាកបាទក្រហម អឌ្ឍចន្ទក្រហម និងច្បាប់មនុស្សធម៌​អន្តរជាតិ
-កៀរគររកមូលនិធិ​ពីសប្បុរសជន​ទាំងអស់ និងឆ្លើយតបឲ្យបានទាន់ពេលវេលាក្នុងការ​ជួយសង្រ្គោះ និងជនងាយរងគ្រោះ​ផងដែរ។

 

សូមបញ្ជាក់ថា៖ ក្នុងទិវានេះដែរ សាខាកាកបាទក្រហម​កម្ពុជា ខេត្តបាត់ដំបងបាន​ទទួលថវិកា​បណ្តោះអាសន្នពី​សប្បុរសជន​ទាំងអស់​បានចំនួន ១២២​,២១៦ដុល្លា (ដប់ពីម៉ឺនពីរពាន់ពីរយដប់ប្រាំមួយដុល្លារ) សម្រាប់​បន្តបំពេញ​បេសកកម្ម​មនុស្សធម៌​ក្នុងខេត្តបាត់ដំបង​បន្តទៀត៕​

 

សាខាកាកបាទក្រហមកម្ពុជាខេត្តស្វាយរៀង ប្រារព្វ ខួបទី ១៥៥ ទិវាពិភពលោកកាកបាទក្រហម អឌ្ឈចន្ទក្រហម ៨ ឧសភា ២០១៨

សាខាកក្រកខេត្តស្វាយរៀង៖ ថ្ងៃចន្ទ ៧កើត ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ២១ ខែ ឧសភា ឆ្នាំ ២០១៨ នៅសាលប្រជុំ​សាលាខេត្តស្វាយរៀង សាខាកាកបាទក្រហម​កម្ពុជាខេត្តស្វាយរៀង បានប្រារព្វ​អង្គមេទិញ ដើម្បីអបអរ​សាទរខួបទី ១៥៥ ទិវាពិភពលោក​កាកបាទក្រហម អឌ្ឈចន្ទក្រហម ៨ ឧសភា ២០១៨ ក្រោម​ប្រធានបទ កាកបាទក្រហមកម្ពុជា​មានគ្រប់ទីកន្លែង សម្រាប់គ្រប់ៗគ្នា មិនទុក​នរណាមា្នក់​ចោល ។


ពិធីនេះបានការអញ្ជើញ​ចូលរួមពីលោកជំទាវ​កិត្តិសង្គហបណ្ឌិត ម៉ែន សំអន ឧបនាយក​រដ្ឋមន្ត្រី រដ្ឋមន្ត្រីក្រសួងទំនាក់ទំនង​ជាមួយរដ្ឋសភា ព្រឹទ្ធសភា និង អធិការកិច្ច ឯកឧត្តម សៅ សុខា អគ្គមេបញ្ជាការរងកងយោទ្ធពលខេមរភូមិន្ទ និងជាមេបញ្ជារកាកងរាជអាវុធហត្ថលើផ្ទៃប្រទេស លោកជំទាវ ពុំ ចន្ទីនី អគ្គលេខាធិការ កាកបាទក្រហម​កម្ពុជា ឯកឧត្តម ម៉ែន វិបុល អភិបាលខេត្ត និងជាប្រធានគណៈកម្មាធិការសាខា ឯកឧត្តម លោកជំទាវ លោក លោកស្រីជា​ថ្នាក់ដឹកនាំ មន្ត្រីរាជការ បុគ្គលិក​ក្រុមហ៊ុនឯកជននានា សប្បុរសជន ទីប្រឹក្សា និង​យុវជនកាកបាទក្រហម​កម្ពុជា អ្នកស្មគ្រ័ចិត្ត ​ក្រុមកាយរិទ្ធិ សហភាពយុវជន សរុបចំនួន ៤៥០ នាក់ ។ 


លោកជំទាវកិត្តិសង្គហបណ្តិត ម៉ែន សំអន ក្នុងនាមសម្តេចកិត្តិ ព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសំដែងនូវការកោតសរសើរ និងថ្លែងអំណរគុណ ជូនចំពោះឯកឧត្តម លោកជំទាវ លោកឧកញ៉ា លោក លោកស្រី ដែលបានអញ្ជើញចូលរួម និងបានផ្តល់ថវិកា ដ៍សន្ធឹកសន្ធាប់នាពេលនេះ ជាទឹកចិត្តដ៍ប្រពៃ និងថ្លៃថ្លាបំផុត សម្រាប់​សកម្មភាពមនុស្សធម៌​នៅថ្នាក់សាខា ដើម្បីឆ្លើយតបឲ្យបានទាន់ពេលវេលា​ជូនជនរងគ្រោះមហន្តរាយក្នុងខេត្ត ។ ក្នុងអង្គពិធីនេះ សាខាបាន​ទទួលថវិកាមុន និងក្រោយពិធីសរុបចំនួន​ប្រមាណជាង ៥០០.០០០ ដុល្លារ ។

 

ប្រជាពលរដ្ឋរងគ្រោះដោយខ្យល់កន្ត្រាក់ទទួលអំណោយពីកាកបាទក្រហមកម្ពុជា

កក្រក ៖ នៅថ្ងៃអាទិត្យ  ៦កើត ខែជេស្ឋ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២០ ខែឧសភា ឆ្នាំ២០១៨ កាកបាទក្រហមកម្ពុជា ដែលមានសម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ផ្ដល់អំណោយ​មនុស្សធម៌ជូន​ប្រជាពលរដ្ឋរងគ្រោះ​ដោយសារខ្យល់កន្ត្រាក់ចំនួន ៤៣គ្រួសារ ស្មើនឹង៤៣ខ្នងផ្ទះ (៦ខ្នងផ្ទះដួល​រលំទាំងស្រុង) កាលពីថ្ងៃទី១៧-១៨ ខែឧសភា ក្នុង​ស្រុកថ្ពង និងស្រុកឧដុង្គ ខេត្តកំពង់ស្ពឺ។

 

ក្នុងឱកាសសំណេះ​សំណាលនោះ លោកវេជ្ជ. អ៊ុយ សំអាត នាយក នាយកដ្ឋាន​គ្រប់គ្រងគ្រោះមហន្តរាយ កាកបាទ​ក្រហមកម្ពុជា បានពាំនាំប្រសាសន៍សម្តេចកិតិ្តព្រឹទ្ធបណ្ឌិត ប្រធាន ដែលបានផ្តាំផ្ញើសួរសុខទុក្ខ និងសេចក្ដី​សោកស្តាយ​ចំពោះខ្យល់កន្ត្រាក់​ដែលបានកើតឡើង ព្រម​ទាំងបានលើកទឹកចិត្តនិងផ្ដល់អនុសាសន៍​ ដល់ប្រជាពលរដ្ឋ​រងគ្រោះដែលមក​ទទួលអំណោយ សូមមានស្មារតីប្រុងប្រយ័ត្នជានិច្ចនូវគ្រោះមហន្តរាយផ្សេងៗ ដូចជា ទឹកជំនន់ រន្ទះ និងខ្យល់កន្ត្រាក់។ សូមថែរក្សាសុខភាពឱ្យបានល្អប្រសើរ ដោយត្រូវរស់​នៅស្អាត និងពិសារ​ទឹកឆ្អិនជានិច្ច ។ មួយវិញ​ទៀត ត្រូវចេះស្រឡាញ់​រាប់អាន យកអាសាគ្នា​ទៅវិញទៅមក និងចៀសវាងការប្រើប្រាស់គ្រឿងញៀន និងគ្រឿងស្រវឹងផ្សេងៗ ដែលនាំឱ្យមានអំពើហិង្សា​កើតឡើង ​ព្រមទាំងត្រូវគោរព​ច្បាប់ចរាចរណ៍​ដើម្បីបង្កាពី​គ្រោះថ្នាក់ផ្សេងៗដែលអាចកើត​មានឡើង។

ប្រជាពលរដ្ឋ ដែលមក​ទទួលផល បាន​សម្តែងនូវក្តីរំភើប​ឥតឧបមា និងដឹងគុណយ៉ាង​ជ្រាលជ្រៅចំពោះ កាកបាទក្រហម​កម្ពុជា ដែលមាន សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដែលបានយកចិត្តទុកដាក់ ចំពោះ​សុខទុក្ខ​ប្រជាពលរដ្ឋ​ជួបការលំបាក​ដោយមិនរើសអើង មិនប្រកាន់វណ្ណៈ ពូជសាសន៍ ពណ៌សម្បុរ ឬនិន្នាការ​នយោបាយអ្វីឡើយ។

អំណោយ​ដែលគ្រួសារ​នីមួយៗទទួលបានរួមមាន៖ អង្គរ៣០គីឡូក្រាម មី១កេស ត្រីខ១០កំប៉ុង មុង១ ភួយ១ សារុង១ ក្រមា១ កៅស៊ូតង់១ និងថវិកាមួយចំនួន៕

 

សាខាកាកបាទក្រហមកម្ពុជា ខេត្តសៀមរាប ទទួលជួបសំណេះសំណាលជាមួយគណៈប្រតិភូកាកបាទក្រហមវៀតណាម

សាខាកក្រកខេត្តសៀមរាប៖ នៅរសៀលថ្ងៃសៅរ៍ ៥កើត ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ១៩ ខែឧសភា ឆ្នាំ២០១៨នេះ លោកជំទាវ ​គួយ ណាលីន ​ឃឹមប៊ុនសុង អនុប្រធាន​គណៈកម្មាធិការសាខាកាកបាទក្រហម​កម្ពុជា​ ខេត្តសៀមរាប​ បានទទួលស្វាគមន៍ ​និងសំណេះសំណាល​ជាមួយគណៈប្រតិភូកាកបាទក្រហម​វៀតណាម ដែល​ដឹកនាំដោយ លោកវេជ្ជបណ្ឌិត​ ត្រាន់ គួកហ៊ុង ​អនុប្រធានកាកបាទក្រហម​វៀតណាម ដែលពិធី​នេះប្រព្រឹត្តទៅនៅ​សាលប្រជុំសណ្ឋាគារ​បុរីអង្គរ រីសត និង ស្ប៉ា ។

 

ក្នុងឱកាសនោះ លោកជំទាវ អនុប្រធានគណៈកម្មាធិការសាខា បានពាំនាំប្រសាសន៍របស់ឯកឧត្តមបណ្ឌិតប្រធានគណៈកម្មាធិការសាខា ដែលបានមិនមកទទួលផ្ទាល់នាពេលនេះ លោកជំទាវក៏សូមសម្តែងនូវកិច្ចស្វាគមន៍យ៉ាង​កក់ក្តៅចំពោះ​ដំណើរទស្សនកិច្ច​របស់គណៈប្រតិភូ​កាកបាទក្រហម​វៀតណាម។ ជាមួយគ្នា​នេះដែរ លោកជំទាវ និងក្រុមប្រតិបត្តិ​សាខា បានធ្វើការបង្ហាញពីសមិទ្ធផល និងសកម្មភាពនានា​របស់សាខាកាកបាទក្រហមកម្ពុជា ខេត្តសៀមរាប ព្រមទាំងបានចែករំលែកនូវបទពិសោធន៍ក្នុងការធ្វើកម្មភាព​មនុស្សធម៌ និងការកៀរគរ​រកមូលនិធិសម្រាប់​ទ្រទ្រង់សមកម្មភាពមនុស្សធម៌របស់សាខា ក្នុងការ​ជួយសម្រាល​ការលំបាកជូន​ប្រជាជនរងគ្រោះ និងជនងាយ​រងគ្រោះគ្រប់ប្រភេទនៅក្នុងសហគមន៍។

នាឱកាសនេះដែរ លោកវេជ្ជបណ្ឌិត ត្រាន់ គួកហ៊ុង អនុប្រធានកាកបាទក្រហមវៀតណាម ក៏បានថ្លែងអំណរគុណ​យ៉ាងជ្រាលជ្រៅចំពោះសាខាកាកបាទក្រហម​កម្ពុជា ខេត្តសៀមរាប ដែលបានទទួលស្វាគមន៍យ៉ាងកក់ក្តៅ និងចែករំលែក​បទពិសោធន៍ ល្អៗជាច្រើន សម្រាប់អនុវត្តន៍​ការងារមនុស្សធម៌ តាមស្ថានភាពភូមិសាស្ត្រ ប្រជាសាស្ត្រ និងវប្បធម៌ ស្រមតាមគោលការណ៍គ្រឹះរបស់ចលនា​អន្តរជាតិកាកបាទក្រហម​ អឌ្ឍចន្ទក្រហម ដើម្បីផ្តល់សេវាកម្ម​មនុស្សធម៌ដល់ជនរងគ្រោះ និងជនងាយ​រងគ្រោះទាំងឡាយ។

 

កាកបាទក្រហមកម្ពុជា ចូលថ្វាយបង្គំគាល់ ទូលសួរសុខទុក្ខ សម្តេចព្រះធម្មលិខិត លាស់ ឡាយ

កក្រក​ ៖​ នៅថ្ងៃសុក្រ​ ៤កើត ខែជេស្ឋ ឆ្នាំច​ សំរឹទ្ធិស័ក ព.ស.២៥៦២​ ត្រូវនឹងថ្ងៃទី ១៨​ ខែឧសភា ឆ្នាំ២០១៨ នេះ សម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធាន​កាកបាទក្រហមកម្ពុជា​ បានចាត់ឱ្យ​សហការីដែល​ដឹកនាំដោយ​ លោកជំទាវ​ ពុំ​ ចន្ទីនី អគ្គលេខាធិការ ​និងលោកជំទាវ​ ម៉ែន​ នារីសោភ័គ​ អគ្គលេខាធិការរងទី១​ ចូលថ្វាយបង្គំ​គាល់​ ទូលសួរសុខទុក្ខ​ សម្តេចព្រះធម្មលិខិត​ លាស់​ ឡាយ​ ព្រះជន្មាយុ​ ១០៥ព្រះវស្សា​ សម្តេចព្រះសង្ឃ​នាយករងទី១​ និងជាព្រះប្រធានថេរសភាពុទ្ធសាសនា​នៃព្រះរាជាណាចក្រកម្ពុជា​ ដែលកំពុង​ព្យាបាល​អាពាធនៅ​វត្តសន្សំកុសល​ រាជធានីភ្នំពេញ។

 

ក្នុងឱកាសនោះ​ លោកជំទាវ ​អគ្គលេខាធិការ បានបង្គំទូលពី​ប្រសាសន៍របស់​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលគិតគូរ​ពីព្រះសុខភាព​ សម្តេច​ព្រះធម្មលិខិត​​ និងបួងសួងសូម​ សម្តេច​ព្រះធម្មលិខិត​ មានព្រះជន្មាយុយ៉ឺន​យូរតរៀង​ទៅដើម្បីបន្ត​ទ្រទ្រង់វិស័យ​ព្រះពុទ្ធសាសនា​ និងគង់ជាម្លប់ដ៏ត្រជាក់ដល់​ពុទ្ធបរិស័ទទាំងឡាយ។

សម្តេចព្រះធម្មលិខិត​ លាស់​ ឡាយ​ បានប្រទានពរ​ដល់សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ និងសម្តេចតេជោ​ ហ៊ុនសែន​ ដែលតែងតែគិតគូរ​ និងឧបត្ថម្ភគាំទ្រដល់​វិស័យព្រះពុទ្ធសាសនា​រៀងមក​ សូមសម្តេចទាំងទ្វេជួបប្រទះតែនឹង​ព្រះពុទ្ធពរទាំង​ ៥ប្រការ​ គឺអាយុ​ វណ្ណៈ​ សុខៈ​ ពលៈ​ និងបដិភាណ​ កុំបីឃ្លាងឃ្លៀតឡើយ។

ក្នុងឱកាសនោះដែរ​ លោកជំទាវ​អគ្គលេខាធិការ​ បានប្រគេន​ ទេយ្យវត្ថុ​ និងបច្ច័យ​ ជាអំណោយរបស់កាកបាទក្រហមកម្ពុជា​ រួមមាន​ អង្ករ​ ៣០០គីឡូក្រាម​ មី១០កេស​ ត្រីខ​ ២០០កំប៉ុង​ ទឹកក្រូច​ ៥កេស​ ទឹកសុទ្ធ​ ៥កេស​ ទឹកGlucena ២កេស​ ទឹកប្រទាលកន្ទុយក្រពើ​ ២កេស​ ទឹកត្រចៀកកាំ​ ១កន្ត្រក​ ផ្លែឈើ​ ១កន្ត្រក​ និងបច្ច័យចំនួន​ ១០លានរៀល៕

 

First Prev 1 2 3 4 5 Next Last