អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

កាកបាទក្រហមកម្ពុជា សួរសុខទុក្ខ ចាស់ជរាគ្មានទីពឹង ស្ត្រីមេម៉ាយកូនច្រើន កុមារកំព្រា ជនពិការ និងអ្នករស់នៅជាមួយមេរោគអេដស៍ នៅ ស្រុកបរិបូរណ៌ ខេត្តកំពង់ឆ្នាំង

កក្រក​ ៖​ នៅព្រឹកថ្ងៃពុធ​ ៧កើត​ ខែស្រាពណ៍​ ឆ្នាំកុរ​ ឯកស័ក​ ព.ស.២៥៦៣​ ត្រូវនឹងថ្ងៃទី ៧​ ខែ​សីហា​ ឆ្នាំ​២០១៩​ នេះ​ សម្តេចកិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា​ និងគណៈប្រតិភូអមដំណើរ​ បានអញ្ជើញ​ជួបសំណេះសំណាល​ សួរសុខទុក្ខ និង​ផ្តល់អំណោយ​មនុស្សធម៌ដោយផ្ទាល់ ជូនដល់ចាស់ជរាគ្មានទីពឹង​ ស្ត្រីមេម៉ាយកូនច្រើន​ កុមារកំព្រា​ ជនពិការ​ និង​អ្នករស់នៅជាមួយ​មេរោគអេដស៍​ សរុបចំនួន​ ១,២៧៥គ្រួសារ​ រស់នៅភូមិចំនួន​១៣ ឃុំចំនួន​១០ នៃស្រុកបរិបូរណ៌​ ខេត្តកំពង់ឆ្នាំង។ កម្មវិធីនេះ​ បានប្រារព្ធ​ធ្វើឡើងនៅទីទួល​សុវត្ថិភាព​ ភូមិសេះស្លាប់​ ឃុំឆ្នុកទ្រូ​ ស្រុកបរិបូរណ៌​ ខេត្តកំពង់ឆ្នាំង។

គ្រួសារនីមួយៗទទួលបាន​ ៖ អង្ករ ៣០គីឡូក្រាម​ មី១កេស ត្រីខ១០កំប៉ុង ឃីត១​ (មុង១​ ភួយ១ សារុង១ ក្រមា១ អាវយឺត១)​ ទឹកសុទ្ធ១ដប នំបុ័ង១ដើម។ ជាមួយគ្នានេះ​ គ្រួសារនីមួយៗ​ នៅទទួលបាន ក្រណាត់ស ១ដុំ និងថវិកា១ម៉ឺនរៀលទៀត​ ជាអំណោយ​របស់ សម្តេចតេជោ​នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត។ ដោយឡែក​ សិស្សានុសិស្សចំនួន​ ២១៥នាក់​ ក្នុងម្នាក់ៗ​ទទួលបាន​ សៀវភៅ​ ២ក្បាល​ ប៊ិក​ ១ដើម​ និងថវិកា​ ១ម៉ឺនរៀល៕

 

វគ្គផ្សព្វផ្សាយអំពីលចលនាអន្តរជាតិកាកបាទក្រហម អឌ្ឍចន្ទក្រហម ដល់ថ្នាក់ដឹកនាំ និងសមាជិក សមាជិកា នៃសមាគមខ្មែរ-ចិននៅខេត្តសៀមរាប

សាខា កក្រក ខេត្តសៀមរាប៖ នៅព្រឹក​ថ្ងៃអង្គារ ៦កើត ខែស្រាពណ៍​ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី ៦ ខែសីហា ឆ្នាំ២០១៩​ សាខាកាកបាទក្រហមកម្ពុជា ​ខេត្តសៀមរាប សហការជាមួយសមាគមខ្មែរ-ចិន បើកការផ្សព្វផ្សាយ​អំពីលចលនាអន្តរជាតិ​កាកបាទក្រហម ​អឌ្ឍចន្ទក្រហម ដល់ថ្នាក់ដឹកនាំ និងសមាជិក ​សមាជិកា នៃសមាគមខ្មែរ-ចិន​។ វគ្គផ្សព្វផ្សាយនេះធ្វើ​នៅសាលារៀនចិន ចុងសាន ដោយមានការអញ្ជើញ​ចូលរួមជាគណៈអធិបតីពីសំណាក់ ​លោកឧកញ៉ាបណ្ឌិត ​ហ៊ុយ ភៀវ ​អនុប្រធានកិត្តិយសសាខា​កាកបាទក្រហមកម្ពុជា​ ខេត្តសៀមរាប។

គោលបំណងនៃ​វគ្គផ្សព្វផ្សាយនេះគឺ ផ្ដល់នៅការយល់ដឹង​ឱ្យបានកាន់តែ​ទូលំទូលាយអំពី -ប្រវត្តិចលនាអន្តរជាតិកាកបាទក្រហម ​អឌ្ឍចន្ទក្រហម -សមាសភាគ និងបដិរូបកាកបាទក្រហម អឌ្ឍចន្ទក្រហម -គោលការណ៍គ្រឹះ​របស់ចលនាអន្តរជាតិ​កាកបាទក្រហម ​អឌ្ឍចន្ទក្រហម -ប្រវត្តិ ​សកម្មភាព កាកបាទក្រហមកម្ពុជា ​និងការកៀរគររកមូលនិធិ​ដើម្បីទ្រទ្រង់​សកម្មភាពមនុស្សធម៌ (សមាជិកភាព ...)។

បន្ទាប់ពីទទួលបានការ​ផ្សព្វផ្សាយរួច សមាជិក សមាជិកា​ នៃសមាគមខ្មែរ-ចិន ដែលបានចូលរួមនាពេលនោះមានការរីករាយ​ និងពេញចិត្តជាមួយ​សកម្មភាពមនុស្ស​ដ៏ប្រពៃរបស់ចលនា​អន្តរជាតិកាកបាទក្រហម អឌ្ឍចន្ទក្រហម ​ពិសេសកាកបាទក្រហម​កម្ពុជា ដែលមានសម្ដេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែនជាប្រធាន ​និងសាខាកាកបាទក្រហម​កម្ពុជា ខេត្តសៀមរាប ដែល​មានឯកឧត្តម ទៀ សីហា ជាប្រធានគណៈកម្មាធិការ​សាខា ហើយក៏​បានស្ម័គ្រចិត្តចូលជា​សមាជិកភាព​កាកបាទក្រហមកម្ពុជា​ នាពេលនោះ​ផងដែរ៕

 

វគ្គបំប៉នស្តីពី "អនាម័យទឹកស្អាត និងការលើកកម្ពស់អនាម័យក្នុងគ្រាអាសន្ន" នៅក្រុងព្រះវិហារ

សាខាកក្រក​ខេត្តព្រះវិហារ៖នៅព្រឹកថ្ងៃទី ០៦ ខែ សីហា ឆ្នាំ ២០១៩ ឯកឧត្តម យុង គឹមហ៊ាន​ នាយកប្រតិបត្តិ​សាខាកាកបាទ​ក្រហមកម្ពុជាខេត្តព្រះវិហារ ​បានអញ្ជើញ​ចូលរួម​ ក្នុងពិធីបើក​វគ្គបំប៉ន​ស្តីពី "អនាម័យទឹកស្អាត ​និងការលើកកម្ពស់​អនាម័យក្នុងគ្រាអាសន្ន" ជូនដល់​មន្ត្រីសាខា​ អនុសាខាក្រុង ប្រធានក្រុមអ្នកស្ម័គ្រចិត្ត​ និងអ្នកស្ម័គ្រ ចិត្ត​កាកបាទក្រហម​សរុប ២៨ នាក់ ស្រី១៩នាក់​មកពីសង្កាត់ប៉ាលហាល​ និងសង្កាត់កំពង់ប្រណាក​ នៃក្រុងព្រះវិហារ ខេត្តព្រះវិហារ ។

វគ្គបំប៉ននេះ បានទទួល​ការឧបត្ថម្ភពី​កាកបាទក្រហម​ជប៉ុន តាមរយៈ សហព័ន្ធ​អន្តរជាតិ កាកបាទក្រហម អឌ្ឍចន្ទក្រហម ​ដែលមានរយៈ ពេល​ ៣ថ្ងៃ (ពីថ្ងៃទី ៦-៨ ខែសីហា ឆ្នាំ២០១៩)។

នៅក្នុងឱកាសនោះ​ឯកឧត្តម យុង គឹមហ៊ាន ​នាយកប្រតិបត្តិ​សាខាមានសង្ឃឹមជឿជាក់​ថា អ្នកស្ម័គ្រចិត្តដែល បានចូលរួម​ក្នុងវគ្គបំប៉ននេះ និង​ទទួលបានចំណេះ​ដឹងថ្មីៗបន្ថែម ​សម្រាប់យកទៅ​ផ្សព្វផ្សាយក្នុងសហគមន៍។

 

លោក ម៉ៅ ធនារក្ស ទទួលទេយ្យទានពីព្រះសង្ឃគង់ នៅវត្តសែនមនោរម្យ ខេត្តមណ្ឌលគិរី

សាខាកក្រកខេត្ត​មណ្ឌលគិរី ៖ នាព្រឹកថ្ងៃអង្គារ ៦កើត ខែស្រាពណ៍​ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី ៦ ខែសីហា ឆ្នាំ២០១៩ សាខាកាកបាទក្រហម​កម្ពុជា ខេត្តមណ្ឌលគិរី ដឹកនាំដោយ​លោក ម៉ៅ ធនារក្ស អនុប្រធានគណៈកម្មាធិកាសាខា ​និងសហការី បានអញ្ជើញទទួល​ទេយ្យទានពីព្រះសង្ឃព្រះនាម​ ព្រះវិមល្លថេរ សៅ យ៉ាន រាជាគណៈថ្នាក់កិត្តិយស ​នៅវត្តសែនមនោរម្យ ស្ថិត​នៅភូមិដើមស្រល់ សង្កាត់មនោរម្យ ​ក្រុងសែនមនោរម្យ ខេត្តមណ្ឌលគិរី។

ក្នុងឱកាសនោះដែរ លោក​អនុប្រធាន បានថ្លែងអំណរអរព្រះគុណយ៉ាង​ជ្រាលជ្រៅចំពោះព្រះតេជគុណដែលមានទឹកព្រះទ័យជ្រះថ្លានាំយកនូវទេយ្យទាន​មនុស្សធម៌ទាំងនេះប្រគល់ជូនសាខា ​ហើយសាខានឹងយកទេយ្យទានទាំងនេះ​ទៅចាត់ចែងទៅតាម​គោលការណ៍គ្រឹះរបស់ចលនា ជួយ​ជនងាយរងគ្រោះគ្រប់ប្រភេទ និងឆ្លើយតបឲ្យបានទាន់ពេលវេលា។

ទេយ្យទានដែលសាខា​បានទទួលរួមមាន ៖ អង្ករ ១តោន មី ១០១កេស ត្រីខ ២៥០កំប៉ុង ទឹកត្រី ២៦យួរ ទឹកស៊ីអ៊ីវ ២៨យួរ ចានដែក​ចំនួន៦៣ សូរទឹកកកចំនួន១១ ចានស្រាក​ចំនួន៤០ កំសៀវចំនួន១៦ និងបំពង់ទឹកក្ដៅ ១៥បំពង់ផងដែរ៕

 

 

សាខាកាកបាទក្រហមកម្ពុជា ខេត្តកោះកុង សួរសុខទុក្ខ គ្រួសាររងគ្រោះដោយសារខ្យល់កន្ទ្រាក់ នៅ ឃុំប៉ាក់ខ្លង ស្រុកមណ្ឌលសីមា

សាខាកក្រក ​ខេត្តកោះកុង ៖ នៅរសៀលថ្ងៃច័ន្ទ ៥កើត​ ខែស្រាពណ៍ ឆ្នាំកុរ ឯកស័ក​ ព.ស.២៥៦៣ ត្រូវនឹងថ្ងៃទី​ ៥ ខែសីហា ឆ្នាំ២០១៩ សាខា​កាកបាទក្រហមកម្ពុជា​ ខេត្តកោះកុង​ ដឹកនាំដោយ​ លោកជំទាវ មិថុនា ភូថង ប្រធាន​គណៈកម្មាធិការសាខា សហការជាមួយ​អនុសាខាកក្រក ស្រុកមណ្ឌល​សីមា រួមដំណើរជា​មួយអជ្ញាធរ​មូលដ្ឋាន បានអញ្ជើញ​ចុះសួរសុខទុក្ខ និង នាំយក​អំណោយមនុស្សធម៌ទៅចែកជូនគ្រួសាររងគ្រោះដោយសារ​ខ្យល់កន្ទ្រាក់កាលពី ថ្ងៃទី៤​ និងទី៥ ខែសីហា ឆ្នាំ២០១៩ ​ចំនួន​ ៣៣គ្រួសារ ស្មើនឹង៣៣ខ្នងផ្ទះ​ រស់នៅភូមិ១ ចំនួន០៩គ្រួសារ ភូម២ចំនួន១០គ្រួសារ​ ភូមិ៣ចំនួន១១គ្រួសារ និងភូមិបឹងកាឆាងចំនួន៣គ្រួសារ ក្នុងឃុំប៉ាក់ខ្លង ស្រុកមណ្ឌលសីមា ខេត្តកោះកុង ដែលបណ្តាលអោយខូចខាតហ្វីប្រូស៊ីម៉ង់ចំនួន ៦០១សន្លឹក ស័ង្កសីចំនួន១០៨សន្លឹក និងសម្ភារមួយចំនួនទៀត។

ក្នុងឱកាសនោះដែរ ​លោកជំទាវ មិថុនា ភូថង ប្រធានគណៈកម្មាធិការ​សាខា បានពាំនាំនូវប្រសាសន៍ផ្តាំ​ផ្ញើសួរសុខទុក្ខ និង​សោកស្តាយពីសំណាក់​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ប្រធានកាកបាទក្រហមកម្ពុជា ដែលជានិច្ច​ជាកាលសម្តេច តែងតែគិតគូរអំពី​សុខទុក្ខរបស់បងប្អូន​ប្រជាពលរដ្ឋនៅគ្រប់ទីកន្លែង ដោយមិនមាន​ការប្រកាន់ ពូជសាសន៍​ ពណ៌សម្បុរ និន្នាការនយោបាយ​អ្វីឡើយ។​ ជាមួយគ្នានេះ​ លោកជំទាវ បានអំពាវនាវ​ដល់បងប្អូន​ប្រជាពលរដ្ឋ​ទាំងអស់ ពិសេសបងប្អូន​ប្រជានេសាទ ត្រូវមានការប្រុងប្រយ័ត្នខ្ពស់​ពីបាតុភូតខ្យល់​កន្ត្រាក់ ផ្គរ រន្ទះ រលក ​សមុទ្រធំៗខ្ពស់ៗ។​ ទន្ទឹមនឹងនេះ​ បងប្អូនប្រជាពលរដ្ឋថែ​ទាំសុខភាព​ឱ្យបានល្អ ជាពិសេសទៅ​លើកុមារតូចៗ ត្រូវស្លៀកខោ​អាវវែង និងគេង​នៅក្នុងមុងជ្រលក់ថ្នាំ​ដើម្បីការពារ​ជំងឺគ្រុនឈាមដែល​កំពុងរីករាលដាល​ ព្រមទាំងចេះសម្អាត​អនាម័យជុំវិញខ្លួន និងចូលរួម​គោរពច្បាប់ចរាចរណ៍ទាំ​ងអស់គ្នា។

គ្រួសារនីមួយៗទទួលបាន​ ៖ អង្ករចំនួន ២៥គីឡូក្រាម មី១កេស ត្រីខ១០កំប៉ុង តង់១ និងអាវយឺត២ ។ ដោយឡែក ហ្វីប្រូស៊ីម៉ង់ ៦០១សន្លឹក ស័ង្កសី ១០៨សន្លឹក ឆ្លើយតប ទៅតាមទំហំនៃការខូចខាតរបស់​គ្រួសាររងគ្រោះនីមួយៗ៕

 

សាខាកាកបាទក្រហមកម្ពុជា ខេត្តសៀមរាប សួរសុខទុក្ខ កញ្ញា លាន ចន្ទ្រា កំពុងសម្រាកព្យាបាលជំងឺ (វះកាត់សន្លាក់) នៅមន្ទីរពេទ្យបង្អែក

សាខា កក្រក ខេត្តសៀមរាប៖ នៅរសៀលថ្ងៃអាទិត្យ  ​៤កើត ខែស្រាពណ៍ ឆ្នាំកុរ​ ឯកស័ក ព.ស ២៥៦៣ ត្រូវនឹងថ្ងៃទី ៤ ខែសីហា​ ឆ្នាំ២០១៩ លោកជំទាវ ទាង អេង​ ទៀសីហា អនុប្រធានគណៈកម្មាធិការ​សាខាកាកបាទក្រហមកម្ពុជា​ ខេត្តសៀមរាប តំណាង​ ឯកឧត្តម ទៀ សីហា ប្រធាន​គណៈកម្មាធិការ​សាខាកាកបាទ​ក្រហមកម្ពុជា និងសហការី ​បានអញ្ជើញសួរសុខទុក្ខ និងនាំ​យកអំណោយ​មនុស្សធម៌ផ្ដល់ជូន​ កញ្ញា លាន ចន្ទ្រា អាយុ ២៣ឆ្នាំ ក្រីក្រ កំព្រាឪពុក មានទីលំនៅ​ក្នុងស្រុកចំការលើ ​ខេត្តកំពង់ចាម កំពុងសម្រាក​ព្យាបាលជំងឺ​ (វះកាត់សន្លាក់) នៅមន្ទីរពេទ្យបង្អែក​ខេត្តសៀមរាប។

មានប្រសាសន៍នាឱកាសនោះ​ លោកជំទាវអនុប្រធានគណៈកម្មាធិការសាខា ​បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី​ ហ៊ុនសែន ប្រធានកាកបាទក្រហម​កម្ពុជា ក៏ដូចជាឯកឧត្តមប្រធាន​គណៈកម្មាធិការសាខា​ សូមប្អូនស្រីកុំអស់សង្ឃឹម ត្រូវមាន​ទំនុកចិត្តជឿជាក់​លើគ្រូពេទ្យជំទាញ ត្រូវខំថែរក្សាសុខភាពដើម្បីឆាប់​បានជាសះស្បើយ។ ពេលត្រលប់ទៅស្រុកកំណើត​វិញត្រូវសម្រាក​ឱ្យបានគ្រប់គ្រាន់ បើមានសភាពមិនស្រួល​សូមប្រញាប់ទៅកាន់មន្ទីរ​ពេទ្យដែលនៅជិត ហើយក្នុងបើមានការ​ចាំបាច់សូមទំនាក់ទំនង សាខា ​ឬអនុសាខាកាកបាទក្រហម​កម្ពុជា នៅក្នុងភូមិសាស្ត្រនោះ។

អំណោយមនុស្សធម៌ដែល​បានផ្ដល់ជូនមាន៖ មុង១ ភួយ១ សារុង១ ក្រមា១ អាយឺត២ អង្ករ៥០គីឡូក្រាម និងថវិកា១លានរៀល។

 

សាខាកាកបាទក្រហមកម្ពុជា ខេត្តត្បូងឃ្មុំ ចុះសួរសុខទុក្ខ ប្រជាពលរដ្ឋរងគ្រោះដោយខ្យល់កន្ត្រាក់នៅ ក្នុងឃុំកក់ និងឃុំមួយចំនួនទៀត ស្រុកពញាក្រែក

សាខាកក្រកខេត្តត្បូងឃ្មុំ ៖ នៅថ្ងៃទី៣ ខែសីហា ឆ្នាំ២០១៩នេះ ឯកឧត្តមបណ្ឌិត​ ជាម ច័ន្ទសោភ័ណ​ គណ:កិត្តិយសសាខាកាកបាទក្រហមកម្ពុជា ​ខេត្តត្បូងឃ្មុំ និងលោកជំទាវ​ ឡេង សុខា ប្រធានស្តីទី​គណ:កម្មាធិការសាខា​ រួមដំណើរដោយសមាជិក សមាជិកា​គណៈកម្មាធិការសាខា និងក្រុមប្រតិបត្តិសាខា​ អនុសាខាកាកបាទក្រហម​ស្រុកពញាក្រែក បានចុះសួរសុខទុក្ខ ​និងនាំយកអំណោយ ទៅចែកជូនប្រជាពលរដ្ឋ​ប្រជាពលរដ្ឋក្រីក្រ ៣៦គ្រួសារ ​និងប្រជាពលរដ្ឋរងគ្រោះដោយខ្យល់​កន្ត្រាក់២៥គ្រួសារ សរុបចំនួន សរុប៦១គ្រួសារ​នៅ ក្នុងឃុំកក់ និងឃុំមួយ​ចំនួនទៀត ស្រុកពញាក្រែក ខេត្តត្បូងឃ្មុំ។

ក្នុងឱកាសនោះដែរ ឯកឧត្តមបណ្ឌិត គណ:កិត្តិយសសាខា ​បានពាំនាំប្រសាសន៍ផ្តាំផ្ញើ​សួរសុខទុក្ខ ពីសំណាក់ ​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ប្រធានកាកបាទក្រហមកម្ពុជា ​សម្ដេចតែងតែគិតគូរពីសុខទុក្ខ​បងប្អូនគ្រប់ពេលវេលា ដោយមិនឲ្យនរណាម្នាក់​ អត់អាហារ នៅរងារកំព្រា​ម្នាក់ឯងនោះឡើយ គឺទីណា​មានទុក្ខលំបាក មានកាកបាទក្រហមកម្ពុជា​ គ្រប់ទីកន្លែង គ្រប់ពេលវេលា ​និងមិនទុកនរណា​ម្នាក់ចោល ដោយមិនរើសអើង​ពូជសាសន៍ ពណ៍សម្បុរ ឬនិន្នាការនយោបាយ​អ្វីនោះឡើយ។ ឯកឧត្តមបណ្ឌិត ក៏បានសម្តែង​នូវការសោកស្តាយចំពោះគ្រោះ​មហន្តរាយដែលបានធ្វើឲ្យខូចខាតផ្ទះសម្បែង​របស់បងប្អូន និងសូមឲ្យបងប្អូន​រៀបចំផ្ទះសម្បែងឡើងវិញ ព្រម​ទាំងខិតខំប្រកបរបរចិញ្ចឹមជីវិត កក៍ដូចជា​ដាំដំណាំផ្សេងៗ ដើម្បីធ្វើឲ្យកម្រិត​ជីវភាព បានប្រសើរឡើងវិញ។

អំណោយដែលប្រគល់​ជូនប្រជាពលរដ្ឋមានជីវភាព​គ្រួសារចំនួន ៣៦គ្រួសារ ទទួលបានគ្រឿង​ឧបភោគបរិភោគ ព្រមទាំងថវិកា ចំនួន៥ម៉ឺនរៀល និងប្រជាពលរដ្ឋ​ដែលរងគ្រោះដោយខ្យល់កន្ត្រាក់​ចំនួន ២៥គ្រួសារ ទទួលបានឧបភោគ បរិភោគ និងថវិកាចំនួន១០ម៉ឺនរៀល ដោយឡែក​ប្រជាពលរដ្ឋរលំផ្ទះទាំងស្រុងទទួលបានថវិកា​បន្ថែមចំនួន៣០ម៉ឺនរៀល៕

 

កាកបាទក្រហមកម្ពុជា ផ្តល់អំណោយ ដល់ អ្នកស្រី ដូក សុផល ប្រកបរបរស៊ីឈ្នួលធ្វើចម្ការ ដែលប្តីអ្នកស្រី រងគ្រោះឆក់ខ្សែភ្លើងធ្ងន់ធ្ងរខណៈពេលកំពុងធ្វើការសំណង់

កក្រក​ ៖​ នៅទីស្នាក់ការកណ្តាល នាថ្ងៃសុក្រ ទី ២ ខែសីហា ឆ្នាំ២០១៩ នេះ កាកបាទក្រហមកម្ពុជា ដែលមាន​ សម្តេចកិត្តិព្រឹទ្ធបណ្ឌិត ប៊ុន រ៉ានី​ ហ៊ុនសែន ជាប្រធាន ​បានផ្តល់អំណោយ​សម្រាលការលំបាកដល់ អ្នកស្រី​ ដូក​ សុផល​ ប្រកបរបរស៊ីឈ្នួលធ្វើ​ចម្ការ​ ដែលប្តីអ្នកស្រីឈ្មោះ​ ហុង​ ម៉េងតាំង​ អាយុ​ ២៩ឆ្នាំ​ រងគ្រោះឆក់ខ្សែភ្លើង​ធ្ងន់ធ្ងរខណៈពេលកំពុង​ធ្វើការសំណង់។

ក្នុងឱកាសជួបសំណេះ​សំណាលនោះ ឯកឧត្តម​ ម៉ែន​ បូរីកា​ ប្រធានការិល័យភស្តុភា​រ កាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ គិតគូរពីជីវភាពរស់នៅ​ និងផ្តាំផ្ញើឱ្យថែទាំសុខភាពឱ្យបានល្អ​​ អនុវត្តតាមការណែនាំរបស់គ្រូពេទ្យ​ និងខិតខំបន្តប្រកបរបរប្រចាំជីវិត​ព្រោះអំណោយ​ផ្តល់ជូននេះ​អាចជួយសម្រាល​ការលំបាក​បាន​មួយគ្រាប៉ុណ្ណោះ។

អ្នកស្រី​ ដូក​ សុផល​ បានថ្លែងអំណរគុណយ៉ាង​ជ្រាលជ្រៅបំផុតចំពោះ​ សម្តេចកិត្តិព្រឹទ្ធបណ្ឌិត ប៊ុន​ រ៉ានី​ ហ៊ុនសែន​ ដែល​បានលេីកទឹកចិត្ត​ និងជួយសម្រាលការ​លំបាកដល់គ្រួសាររបស់អ្នកស្រី​ ក៏ដូចជាប្រជាពលរដ្ឋជួបការលំបាក​ដោយគ្មានការរើសអើងអ្វីឡើយ។

អំណោយផ្តល់ជូនរួមមាន​ ៖​ អង្ករ​ ៦០គីឡូក្រាម​ មី​ ២កេស​ ត្រីខ​ ២០កំប៉ុង​ មុង១ ភួយ១​ សារុង១​ ក្រមា១​ ​និងថវិកាចំនួន​ ២០ម៉ឺនរៀល៕

 

សាខាកាកបាទក្រហមកម្ពុជា ខេត្តក្រចេះ នាំអំណោយចែកជូនគ្រួសាររងគ្រោះដោយខ្យល់កន្រ្តាក់ នៅ ឃុំស្រែចារ ស្រុកស្នួល

នៅរសៀលថ្ងៃព្រហស្បតិ៍ ១កើត​ ខែស្រាពណ៍ ឆ្នាំកុរ ឯកស័ក​ ព.ស ២៥៦៣ ត្រូវនិងថ្ងៃទី០១ ខែសីហា ​ឆ្នាំ ២០១៩ នេះ ឯកឧត្តម ធុន​ គ្រី ប្រធានគណៈកម្មាធិការ​សាខាកាកបាទក្រហម​កម្ពុជា ខេត្តក្រចេះ​ រួមដំណើរដោយលោក គង់ សុជាតិ ​លេខាធិការគណៈកម្មាធិការសាខា ​ក្រុមប្រតិបត្តិសាខា​ មន្រ្តីអនុសាខាស្រុកស្នួល​ បាននាំយកអំណោយ​មនុស្សធម៌របស់ សាខាកាកបាទក្រហមកម្ពុជា​ ខេត្តក្រចេះ ​ទៅចែកជូនដល់គ្រួសារ​រងគ្រោះដោយខ្យល់កន្រ្តាក់ ​ចំនួន ១៥គ្រួសារ នៅមូលដ្ឋាន​ឃុំស្រែចារ ស្រុកស្នួល​ ខេត្តក្រចេះ ។


នៅក្នុងឱកាសសំណះសំណាល​នោះដែរ ឯកឧត្តម បាន​សម្តែងការ​សោកស្តាយ​ជាខ្លាំង ជាមួយបងប្អូនប្រជាពលរដ្ឋដែលរងគ្រោះ​ដោយសារខ្យល់កន្ត្រាក់​នេះដែលបានបណ្តាលអោយ​ខូចខាត់ទ្រព្យសម្បត្តិ ​និងរងរបួសដោយហេតុការណ៏នេះ​ ព្រមទាំងបានផ្តាំផ្ញើសូមអោយបងប្អូន​មានការប្រុងប្រយ័ត្ន​ នៅពេលភ្លៀងត្រូវបិទទូរស័ព្ទ ​បើនៅតាមទីវាល​ត្រូវរកកន្លែង​ដែលមានសុវត្ថិភាពជ្រក ។


ជាមួយគ្នានេះ​ ឯកឧត្តម ក៏បានពាំនាំផ្តាំផ្ញើសួរ​សុខទុក្ខពីសំណាក់​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហមកម្ពុជា​ ដែលសម្តេចបានផ្ដាំផ្ញើ​ដល់បងប្អូនប្រជាពលរដ្ឋ​ទាំងអស់ឱ្យថែទាំ​សុខភាពឱ្យបានល្អ​ ត្រូវរស់នៅស្អាត ​ពិសាទឹកឆ្អិន និងគេងក្នុង​មុងជានិច្ច ពិសេស​សូមជួយមើលថែទាំ ​ក្មេងៗនិងចាស់ជរា អោយបានល្អ ។


សូមបញ្ជាក់​ថាអំណោយ​ដែលបានចែកជូនគ្រួសារ​រងគ្រោះនាពេលនោះ​សម្រាប់គ្រួសាររង​ដោយខ្យល់កន្រ្តាក់ធ្ងន់ចំនួន៣គ្រួសារ ក្នុង១គ្រួសារ​ទទួលបាន៖ អង្ករ ៥០ គ.ក្រ, សារ៉ុង ១, ភួយ ១, មុង ១, ក្រម៉ា ១, មី ១ កេះ, ត្រីខ ១០ កំប៉ុង, តង់ ១ និង ថវិកា ២០០.០០០ រៀល និងគ្រួសាររងដោយខ្យល់កន្រ្តាក់មធ្យមចំនួន១២គ្រួសារ ក្នុង១គ្រួសារទទួលបាន៖ អង្ករ ២៥ គ.ក្រ, សារ៉ុង ១, ភួយ ១, មុង ១, ក្រម៉ា ១, មី ១ កេះ, ត្រីខ ១០ កំប៉ុង និង ថវិកា ៥០.០០០ រៀល ​ជាមួយគ្នានេះ​អនុសាខាកាកបាទក្រហម​កម្ពុជា ស្រុកស្នួល​បានឧបត្ថម្ភថវិកាជូន​គ្រួសាររងគ្រោះធ្ងន់ចំនួន ៣ ​គ្រួសារនូវថវិកា​ ៥០.០០០រៀលក្នុងមួយគ្រួសារនិងលោក​ ស៊ុំ ជួន​ ប្រធានក្រុមប្រឹក្សាស្រុកស្នួល បានឧបត្ថម្ភជូន​គ្រួសាររងគ្រោះធ្ងន់ចំនួន ៣ គ្រួសារនូវថវិកា​ ៥០.០០០ រៀលក្នុងមួយគ្រួសារផងដែរ។

វគ្គផ្សព្វផ្សាយស្ដីអំពីការអប់រំសុខភាពមនុស្សចាស់ និងជំងឺអេដស៏ ការលើកកម្ពស់សុខភាពមាតា ទារក និងកុមារ និងពិនិត្យសុខភាពនៅខេត្តកំពត

សាខាកក្រកខេត្តកំពត​ ៖ កាលពីព្រឹកថ្ងៃព្រហស្បតិ៍​ ១កើត ខែស្រាពណ៍ ឆ្នាំកុរ ឯកស័ក ​ព.ស.២៥៦៣ ត្រូវនឹងថ្ងៃទី ១ ខែសីហា ឆ្នាំ២០១៩ ​សាខាកាកបាទក្រហមកម្ពុជា​ ខេត្តកំពត បានចុះបើក​វគ្គផ្សព្វផ្សាយស្ដីអំពីការអប់រំសុខភាពមនុស្សចាស់ ​និងជំងឺអេដស៏ ​ការលើកកម្ពស់​សុខភាពមាតា ទារក និងកុមារ​ និងពិនិត្យសុខភាព ជូនដល់ប្រជាពលរដ្ឋ​ ដោយមានការ​ឧបត្ថម្ភគាំទ្រថវិកា​ដោយសហព័ន្ធអន្តរជាតិ​ ក្រោមវត្តមានលោកជំទាវ មុំ ចន្ធី នាយិកា​រងនាយកដ្ឋានសុខភាព​កាកបាទក្រហមកម្ពុជា និងកញ្ញា ឡាក់ មុន្នីរស្មី តំណាង​សហព័ន្ធអន្តរជាតិ​កាកបាទក្រហម ​អឌ្ឍចន្ទក្រហម ​និងមានការចូលរួម​ពី លោក លោកស្រី មន្ត្រីសាខា ​អនុសាខា​ អ្នកស្ម័គ្រចិត្ត​កាកបាទក្រហម​កម្ពុជា និងប្រជាពលរដ្ឋ​ចូលរួមសរុបចំនួន ៦៧នាក់ (ស្រី ៥២នាក់) ស្ថិតនៅភូមិអង្គ ​ឃុំត្រពាំងព្រីង​ ស្រុកទឹកឈូ ​ខេត្តកំពត។

វគ្គនេះមានគោលបំណង​ ដើម្បីផ្តល់នូវវិធីសាស្រ្តអប់រំ​សុខភាពមនុស្សចាស់​ ក្នុងសហគមន៍​ឲ្យកាន់តែមានប្រសិទ្ធិភាពនៅ​ពេលអនាគត និង​ជំងឺអេដស៍ និ​ងលើកកម្ពស់​សុខភាពមាតា ទារក ​និងកុមារ និងធ្វើការអប់រំ​ផ្សព្វផ្សាយបន្ត​ដល់មិត្តភក្តិ និងសហគមន៍​រៀងៗខ្លួនផងដែរ៕

 

First Prev 1 2 3 4 5 Next Last