អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
សេចក្តីជូនដំណឹងស្តីពីការវះកាត់ ឆែបមាត់ ឆែបក្រអម មាត់ធ្មេញ និងពិការមុខមាត់ផ្សេៗ
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
jQuery Carousel
ព័ត៌មានថ្មីៗ
...

សន្និបាតវិសាមញ្ញរបស់សាខាកាកបាទក្រហមកម្ពុជាខេត្តកំពង់ធំ

សាខាកក្រកខេត្តកំពង់ធំ៖​ នាព្រឹកថ្ងៃ​ទី៣​០​ ខែ​មីនា​ ឆ្នាំ២០១៦​ សាខា​កាកបាទក្រហម​កម្ពុជា​ខេត្តកំពង់ធំ​ បានរៀបចំ​សន្និបាត​វិសាមញ្ញ ​បន្តអាណត្តិទី៤​ ក្រោម​អធិបតីភាព​លោកជំទាវ​ ពុំ ចន្ទីនី អគ្គលេខាធិការ​ កាកបាទក្រហម​កម្ពុជា ​និងមានការ​ចូលរួម​ពីឯកឧត្តម​ អ៊ុត សំអន​ ប្រធាន​គណៈកម្មាធិកា​រសាខា​កាកបាទក្រហម​កម្ពុជា​ ខេត្តកំពង់ធំ​ និងមានការចូលរួម​ពី​សមាជិក​ពេញសិទ្ធិ​ចំនួន​ ១៤៤នាក់ និង​តំណាង​សមាជិកភាព​មក​ពីក្រសួង​ ស្ថាប័ន​ អង្គភាព​ និង​អ្នក​សង្កេតការណ៍​ចំនួន​ ៥​នាក់​ ជាសមាជិក​ សមាជិកា ​មន្ត្រីប្រតិបត្តិសាខា​ យុវជន​ និង​អ្នកស្ម័គ្រចិត្ត សរុប​ចំនួន​ ២០១នាក់​ ហើយ​ពិធីនេះ​បានប្រារព្ធ​ធ្វើឡើង​នៅក្នុង​សាលប្រជុំ​សាលា​ខេត្តកំពង់ធំ​។


សន្និបាត​វិសាមញ្ញនេះ​ក្នុង​គោលបំណង​ បូកសរុប​លទ្ធផល​ការងារ​ និង​ការងារ​ហិរញ្ញវត្ថុ​ រយៈពេល​ ៣ឆ្នាំ ​និងអនុវត្ត​ផែនការបន្ត​ អភិវឌ្ឍសាខា​ នូវ​អាណត្តិទី៤​ បន្ត ២០១៦-២០១៩​ និង​ធ្វើការ​បោះឆ្នោត​អនុម័ត​ជ្រើសរើស ​គណៈកម្មាធិការ​សាខា ​បន្ត​អាណត្តិ​ទី ៤។

 

ក្នុងមីទ្ទីញ​អង្គសន្និបាត​វិសាមញ្ញ​សាខាបន្ត​អាណត្តិ​ទី៤ បាន​ដំណើរការ​យ៉ាង​ផុលផុស​ និង​បាន​បោះឆ្នោត​អនុម័ត​សម្រេច​បានជ្រើសរើស​សមាជិក​គណៈកម្មាធិការ​សាខា​ចំនួន ១៤រូប និង​សមាជិក​បម្រុងចំ​នួន​ ២រូប និងប្រកាស ដែលមាន​រាយនាម​ដូចខាងក្រោម៖


- ឯកឧត្តម សុខ លូ ជាប្រធានគណៈកម្មាធិការសាខា
- លោកជំទាវ ឃួន ឃុនឌី ជាអនុប្រធានគណៈកម្មាធិការសាខា
- លោកជំទាវ ទូច ស៊ីថុល ជាហិរញ្ញឹកគណៈកម្មាធិការសាខា
- ឯកឧត្តម ជា វ៉ាន់ចាន់ ជាលេខាគណៈកម្មាធិការសាខា
- លោកឧត្តមសេនីយ៍ ង៉ាង ស សមាជិក គណៈកម្មាធិការសាខា
- ឯកឧត្តម អ៊ុក កុសល សមាជិក គណៈកម្មាធិការសាខា
- លោក ឆាង កង សមាជិក គណៈកម្មាធិការសាខា
- លោកវេជ្ជ. ស្រី ស៊ីន សមាជិក គណៈកម្មាធិការសាខា
- លោក ធីវ វណ្ណធីរ សមាជិកា គណៈកម្មាធិការសាខា
- លោក សេង អាន សមាជិក គណៈកម្មាធិការសាខា
- លោក អៀង សុភាព សមាជិក គណៈកម្មាធិការសាខា
- លោក ជូ វុនធី សមាជិក គណៈកម្មាធិការសាខា
- លោក កើត រ័ត្ន សមាជិក គណៈកម្មាធិការសាខា
- លោកស្រី លឹម ផល្លា សមាជិកា គណៈកម្មាធិការសាខា 
- លោកស្រី ង៉ែត ណារីន សមាជិកាបម្រុង គណៈកម្មាធិការសាខា
- លោកស្រី ស៊ិន ស៊ីផាន សមាជិកាបម្រុង គណៈកម្មាធិការសាខា

 

ជាកិច្ចបញ្ចប់​ លោកជំទាវ​អគ្គលេខាធិការ​ បានកោតសរសើរ​នៅ​សកម្មភាព​មនុស្សធម៌​របស់​សាខា​កាកបាទក្រហម​កម្ពុជា​ ខេត្តកំពង់ធំ​ ដែរ​តែងតែ​បានជួយ​ដល់​ប្រជាពលរដ្ឋ​រងគ្រោះ ​និង​ងាយ​រងគ្រោះបា​នទាន់​ពេលវេលា ​និងសុំឲ្យ​គណៈកម្មាធិការ​សាខា​កាកបាទក្រហម​កម្ពុជា​ ខេត្តកំពង់ធំ​ ដែលទើប​នឹង​អនុម័ត​ជ្រើសរើស​ថ្មី ​ខិតខំ​ប្រឹងប្រែង​ជួយសាខា​ ដ៏ដូចជា​ប្រជាពលរដ្ឋ​រងគ្រោះ ​និង​ងាយរងគ្រោះ ​ឲ្យ​បាន​ល្អ និង​កាន់តែ​ប្រសើរជាង​មុន និងប្រកាស​បិទសន្និបាត​វិសាមញ្ញ​សាខា​កាកបាទក្រហមកម្ពុជា ​ខេត្តកំពង់ធំ បន្តអាណត្តិទី ៤។

...

សិល្បករ ហែម សារ៉ាតដែលមានជំងឺទឹកនោមផ្អែមនិងគ្រោះថ្នាក់ចរាចរណ៌ទទួលអំណោយពីកាកបាទក្រហមកម្ពុជា

កក្រក​ ៖​នៅព្រឹក​ថ្ងៃទី​៣០​ ខែមីនា​ ឆ្នាំ២០១៧​ នេះ​ កាកបាទក្រហម​កម្ពុជា​ ដែលមាន​សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ជាប្រធាន​ បានជួយ​ឧបត្ថម្ភ​គ្រឿង​ឧបភោគ​-បរិភោគ​ និង​ថវិកា​មួយ​ចំនួន​ ដល់​សិល្បករ​ ហែម សារ៉ាត អាយុ ៤៨ឆ្នាំ ​ជាអ្នកលេង​ភ្លេង​នៃនាយកដ្ឋាន​សិល្បៈ​ទស្សនីយភាព​ នៃក្រសួង​វប្បធម៌​ និង​វិចិត្រ​សិល្បៈ ​ដែលមាន​ជំងឺទឹកនោម​ផ្អែម​ ហើយ​បាន​ទទួល​រងគ្រោះថ្នាក់​ចរាចរណ៍​បណ្តាល​ឱ្យកាត់ជើង​ទាំងសង្ខាង​ កំពុង​សម្រាក​ព្យាបាល​នៅមន្ទីរពេទ្យ​ព្រះកុសុមៈ ​រាជធានី​ភ្នំពេញ​។

 

ក្នុងឱកាស​ប្រគល់​អំណោយ​មនុស្សធម៌​នោះ លោកជំទាវ​ ម៉ែន នារី​សោភ័គ​ អគ្គលេខាធិការ​រងទី ១​ កាកបាទក្រហម​កម្ពុជា​ បានពាំនាំ​ប្រសាសន៍​របស់​ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន​ ដែលផ្តាំ​ផ្ញើសួរសុខ​ទុក្ខ ក្តីអាណិត​អាសូរ​ ចំពោះ​លោក ហែម សារ៉ាត ដែលបាន​រងគ្រោះ​ដោយសារ​ឧបទ្ទវ​ហេតុ​នេះ និងសូមជូនពរ​ឱ្យលោក​ ឆាប់បាន​ជាសះស្បើយ ​ហើយ​ត្រឡប់​ទៅបម្រើ​ការងារ​ក្នុងវិស័យ​សិល្បៈប​ន្តទៀត​ ដើម្បី​ជ្រោមជ្រែង​ជីវភាព​គ្រួសារ​ឡើងវិញ។

 

អ្នកស្រី គង់ ចន្ថា អាយុ ៤៤ឆ្នាំ ត្រូវជាភរិយា​អ្នកជំងឺ​ បានសម្តែង​នូវការដឹងគុណ​យ៉ាងជ្រាល​ជ្រៅ​ចំពោះ ​សម្តេច​កិត្តិព្រឹទ្ធបណ្ឌិត​ ដែលជាមាតា​មនុស្សធម៌​ តែងមាន​ចិត្តសប្បុរស​ និងក្តី​អាណិត​អាសូរ​ចំពោះជន​រងគ្រោះ​ជួបការលំបាក​ ដោយមិន​មានការ​រើសអើង​ ប្រកាន់វណ្ណៈ ​ពូជសាសន៍​ ពណ៌សម្បុរ​ ឬនិន្នាការ​នយោបាយ​អ្វីឡើយ៕

 

...

លោកតេង តន ដែលកើតជំងឺខ្មៅជើងម្ខាងទទួលជំនួយពីកាកបាទក្រហមកម្ពុជា

កក្រក ៖​ នៅព្រឹក​ថ្ងៃទី​២៩​ ខែ​មីនា​ ឆ្នាំ​២០១៧​ នេះ ​សម្តេច​កិត្តិព្រឹទ្ធបណ្ឌិត​ ប៊ុន រ៉ានី​ ហ៊ុនសែន​ ប្រធាន​កាកបាទក្រហម​កម្ពុជា​បានជួយ​ឱ្យលោក​ តេង តន​ អាយុ​៦៥ឆ្នាំ​ កើតជំងឺ​ឡើង​ខ្មៅជើង​ម្ខាង​ហើយ​ស្អុយរ​លួយ​ រស់នៅ​ខេត្តកំពង់ធំ​ ឱ្យ​ទទួល​បានការ​ព្យាបាល​ដោយ​ឥតគិត​ថ្លៃក្នុង​បន្ទប់​សង្រ្គោះបន្ទា​ន់ ពី​ក្រុម​គ្រូពេទ្យ​នៃមន្ទីរ​ពេទ្យព្រះ​កុសុមៈ​ សហការ​ជាមួយ​ ក្រុម​គ្រូពេទ្យ​ស្ម័គ្រចិត្ត​សម្តេច​តេជោ ​(TYDA)។

 

ជាមួយ​គ្នានេះ ​កាកបាទក្រហម​កម្ពុជា​ដែលមាន​សម្តេច​កិត្តិព្រឹទ្ធបណ្ឌិត​ ប៊ុន រ៉ានី​ ហ៊ុនសែន​ ជា​ប្រធាន​ នៅជួយ​ឧបត្ថម្ភ​ ដល់ការ​បរិភោគ​ និងរស់​នៅ​ប្រចាំថ្ងៃ​ ក្នុង​អំឡុងពេល​កំពុង​សម្រាក​ព្យាបាល​នេះទៀត​ផង។

 

ក្រុមគ្រួសារ​អ្នកជំងឺ មាន​ក្តីរំភើប​ និង​មាន​សង្ឃឹម​ឡើងវិញ​ ក្រោយ​បានការ​សណ្តោស​ប្រណី​ពី ​សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ជួយ​ដោះស្រាយ ​សម្រប​សម្រួល​ការព្យាបាល​ និង​ផ្គត់ផ្គង់​ការរស់នៅ​ ហើយ​ជឿជាក់​ថាអ្នក​ជំងឺ​នឹងមាន​សង្ឃឹម​រស់​តទៅ​ទៀត។

 

សូម​បញ្ជាក់ថា​ លោក តេង តន រស់នៅ​ភូមិព្រៃ​បន្លិច​ សង្កាត់​អាចារ្យលាក់ ​ក្រុងស្ទឹងសែន ​ខេត្ត​កំពង់ធំ ជាអតីត​មេភូមិ​ព្រៃបន្លិច​រយៈពេល ២៥ឆ្នាំ ហើយធ្លាប់​ទទួល​បាន​ប័ណ្ណ​សរសើរ​ពីរាជរដ្ឋាភិបាល​កម្ពុជា​ ដោយសារ​មាន​ស្នាដៃ​ល្អក្នុង​ការបម្រើ​ប្រជាជន​ ហើយដោយ​សារយក​ប្រាក់ព្យា​បាលជំងឺ​ ទើបធ្វើឱ្យជីវភាព​គ្រួសារ​បានធ្លាក់ដុន​ដាបជាខ្លាំង៕

 

...

វគ្គបំប៉នស្តីពីចលនា និងសកម្មភាពកាកបាទក្រហមសម្រាប់វេទិកាយុវជន

កក្រក៖ នាព្រឹក​ថ្ងៃ​ទី​២៩​ ខែ​មីនា​ ឆ្នាំ​២០១៧​ នៅទី​ស្នាក់ការ​កណ្តាល​កាកបាទក្រហម​កម្ពុជា ​បាន​រៀបចំ​វគ្គបំប៉ន​សម្រាប់​វេទិកា​យុវជន​ ស្តីពី​ "យុវជន​ និង​បេសកកម្ម​កាកបាទក្រហម​កម្ពុជា​" ដោយមាន​ការចូលរួម​ពីសំណាក់​លោកជំទាវ​ ម៉ែន នារីសោភ័គ អគ្គលេខាធិការ​រងទី១​ និង​ឯកឧត្តម​អគ្គលេខាធិការ​រងទី២​ កាកបាទក្រហម​កម្ពុជា​ ព្រមទាំង​មន្ត្រី​ជំនាញ​នៃនាយកដ្ឋាន​ ទំនាក់​ទំនង​ នាយកដ្ឋាន​ ធនធាន​មនុស្ស ​នាយកដ្ឋាន​សុខភាព​ និង​នាយកដ្ឋាន​គ្រប់គ្រង​គ្រោះមហន្តរាយ​ ជូន​ដល់​និស្សិត​មកសាកល​វិទ្យាល័យ​ភូមិន្ទ​នីតិសាស្ត្រ ​និង​វិទ្យាល័យ​សេដ្ឋកិច្ច​ និង​សាកល​វិទ្យាល័យ​ប៊ែលធី​ សរុប​ចំនួន ៤៤នាក់។

 

វគ្គ​បំប៉ន​នេះ ​ធ្វើឡើង​ក្នុង​គោលបំណង​ លើកម្ពស់​ និង​បង្កើន​ការយល់ដឹង​ឲ្យកាន់តែ​ច្បាស់​សកម្មភាព​មនុស្សធម៌​ ដល់​និស្សិត​ ព្រមទាំង​ធ្វើការ​ផ្សព្វផ្សាយ​គោលការណ៌​គ្រឹះទាំង​៧ ​និង​សកម្មភាព​មនុស្សធម៌​កាកបាទក្រហម​កម្ពុជា​ ដើម្បី​ត្រៀម​ចូលរួម​វេទិការ​យុវជន​ ដែលនឹង​ប្រព្រឹត្តទៅ ​នៅថ្ងៃទី​ ២១ ​ខែ​មេសា​ ឆ្នាំ២០១៧​ ខាងមុន​នេះ ​ដើម្បី​អបអរ​ខួបទី​ ១៥៤ ទិវា​ពិភពលោក​ កាកបាទក្រហម​ អឌ្ឍចន្ទ​ក្រហម​ ៨ ឧសភា ២០១៧ ក្រោម​ប្រធាន​បទ "កាកបាទក្រហម​កម្ពុជា​មានគ្រប់​ទីកន្លែង​ សម្រាប់គ្រប់ៗគ្នា"។

 

...

ខណ្ឌទាំង១២ ក្នុងរាជធានីភ្នំពេញ ទទួលអង្ករពីកាកបាទក្រហមកម្ពុជា

កក្រក ៖ ​នៅព្រឹក​ថ្ងៃទី​២៩​ ខែ​មីនា​ ឆ្នាំ​២០១៧​ នេះ​កាកបាទក្រហម​កម្ពុជា​ដែលមាន​សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន​ ជាប្រធាន​ បានប្រគល់​អំណោយ​ជាអង្ករ​ចំនួន​១៨០​តោន​ជូនដល់​អនុសាខា​កាកបាទក្រហម​កម្ពុជា​ខណ្ឌ​ទាំង​១២​ ក្នុង​រាជធានីភ្នំពេញ​ ដោយ​អនុសាខា​នីមួយៗ​ទទួល​បានអង្ករ​ចំនួន​១៥តោន។

 

ក្នុង​ឱកាស​នោះ ​លោក​ជំទាវ​ ពុំ ចន្ទីនី​ អគ្គលេខាធិការ​កាកបាទក្រហម​កម្ពុជា​បាន​ពាំនាំ​នូវ​ប្រសាសន៍​ផ្តាំសួរ​សុខទុក្ខ​ និង​កោតសរសើរ​ពីសំណាក់ ​សម្តេច​កិត្តិព្រឹទ្ធបណ្ឌិត​ប្រធាន​ ដល់​អនុ​សាខា​ខណ្ឌ​ទាំង១២​ ដែលតែងតែ​បាន​ធ្វើសកម្មភាព​ជាបន្ត​បន្ទាប់​តាម​គោលការណ៍​គ្រឹះទាំង​ ៧​ ចុះជួយ​ប្រជាពលរដ្ឋ​ងាយរង​គ្រោះបំផុត​ និងអ្នក​ដែលត្រូវការ​ឱ្យជួយ​ដល់​លំនៅឋាន​ក្នុងនោះ​មាន​ ចាស់​ជរា​ឥត​ទីពឹង​ ជនពិការ​ កុមារកំព្រា ​ស្ត្រីមេម៉ាយ ​អ្នកមាន​ជំងឺរ៉ាំរ៉ៃ ​អ្នករស់នៅ​ជាមួយ​មេរោគអេដស៍​។ល។ ​ហើយ​ថ្ងៃនេះទៀ​ត ទីស្នាក់ការ​កណ្តាល​កាកបាទក្រហម​កម្ពុជា​ បានផ្តល់ ​អង្ករចំនួន​ ១៥តោន​ ដល់​អនុសាខា​នីមួយៗ​ គឺសម្រាប់​អនុសាខា​យកទៅ​ចាត់ចែង​ផ្តល់ជូន​ដល់អ្នក​ងាយរង​គ្រោះបំផុត​ចំនួន​ ៥០០​គ្រួសារ​ ក្នុងបូរណភាព​ទឹកដី​នៃខណ្ឌ​នីមួយៗ​ឲ្យមាន​ប្រសិទ្ធភាព​ ដោយមិន​មាន​ការរើសអើង​ ប្រកាន់វណ្ណៈ​ ពូជសាសន៍​ ព័ណ៌សម្បុរ​ ឬនិន្នាការ​នយោបាយ​អ្វីឡើយ។

 

សូមបញ្ជាក់​ជូនថា ​កាកបាទក្រហម​កម្ពុជា​ បានផ្តល់​អំណោយ​មនុស្សធម៌ ​ដល់អនុសាខា​ទាំង​ ១២ខណ្ឌ បាន​ចំនួន ៥លើករួច​មកហើយ​ ហើយដែល​ថ្ងៃនេះ​ គឺជា​ការផ្តល់​ជូនលើក​ទី ៦៕

1 2 3 4 5 Next Last
ព័ត៌មានផ្សេងៗ
សេវាយើង

សាខាកក្រកខេត្តសៀមរាប ៖​នៅព្រឹក​ថ្ងៃទី​៣០​ ខែ​មីនា​ ឆ្នាំ​២០១៧​ លោកជំទាវ​ គួយ ណាលីន​ អនុប្រធាន​គណៈកម្មាធិការ​សាខា​កាកបាទក្រហម​កម្ពុជា​ខេត្ត​សៀមរាប​បានចូលរួម​ក្នុងពិធី​បំពាក់​កន្សែង​យុវជន​កាកបាទក្រហម​កម្ពុជា​ចំនួន​១០០​ នាក់​នៅ​វិទ្យាល័យ​ ១០ ​មករា ​១៩៧៩ ។

 

ក្នុងឱកាសនោះ ​តាងនាម​ឯកឧត្តម​បណ្ឌិត​ ឃឹម ប៊ុនសុង ​ប្រធាន​គណៈកម្មាធិការ​សាខា​កាកបាទក្រហម​កម្ពុជា​ខេត្ត​សៀមរាប​ លោកជំទាវ​បានមាន​ប្រសាសន៍​ថា៖ កាកបាទក្រហម​កម្ពុជា​ បាន​ទទួល​ស្គាល់​ថា យុវជន​កាកបាទក្រហម​កម្ពុជា​ គឺជា​អ្នកស្ម័គ្រចិត្ត​វ័យក្មេង​ ដែលជា​កម្លាំង​ស្នូល​មួយ​ដ៏មាន​សារៈសំខាន់​ និង​សកម្ម​បំផុត​ក្នុងការ​ផ្ដល់​នូវ​សេវាកម្ម​មនុស្សធម៌​ លោកជំទាវ​ បានជម្រាប​ជូនពី​តួនាទី​ភារកិច្ច​ដល់ប្អូនៗ​មានដូច​ខាងក្រោម៖


- ជាតំណាង​ឱ្យយុវជន​កាកបាទក្រហម​កម្ពុជា​ គ្រប់ស្រទាប់យុវវ័យ
- ជាទំពាំងស្នងឫស្សី ជាអ្នកបន្ត​វេនក្នុង​សកម្មភាព​មនុស្សធម៌​របស់កាកបាទក្រហមកម្ពុជា
-​ ត្រូវ​គោរព​វិន័យ​សាលា និងខិតខំរៀន​សូត្រឱ្យ​បានពូកែ ​ធ្វើជាគំរូ​ល្អគ្រប់​សម្មភាព​ក្នុងស្រទាប់​យុវវ័យ
-​ ផ្សព្វផ្សាយ​ពីគោលការណ៍គ្រឹះ​របស់​ចលនា​អន្តរជាតិ​កាកបាទក្រហម​អឌ្ឍចន្ទក្រហម​នៅក្នុង​សាលា និង​សហគមន៍
​- ចូលរួម​សកម្មភាព​មនុស្សធម៌ ​ទាំងក្នុង​សាលា​ និង​សហគមន៍
-​​ ធ្វើជា​គំរូល្អ​ក្នុងការ​គោរព​ច្បាប់​ចរាចរណ៍​ផ្លូវគោក​ ដើម្បី​រួមចំណែក​កាក់បន្ថយ​ អត្រា​គ្រោះថ្នាក់​ ស្លាប់ របួស ​និងពិការ​ដោយសារ​គ្រោះថ្នាក់​ចរាចរណ៍៕

 

អានបន្ថែម...

សាខាកក្រករាជធានីភ្នំពេញ៖ ​នាល្ងាច​ថ្ងៃទី​២៧​ ខែ​មីនា​ ឆ្នាំ​២០១៧​ នេះ​នៅ​វិទ្យាល័យ​អនុវត្ត​សាខា​កាកបាទក្រហម​កម្ពុជា​រាជធានី​ភ្នំពេញ​បានរៀបចំ​ពិធី​បិទ​វគ្គ​យល់ដឹង​មូលដ្ឋាន​ជូន​ដល់​ទីប្រឹក្សា​យុវជន​ និង​យុវជន​កាកបាទក្រហម​កម្ពុជា​ប្រចាំ​វិទ្យាល័យ​សរុប​ចំនួន​១១៨នាក់​ (ស្រី៥៨នាក់)​ ដោយមានការចូលរួមពីសំណាក់​លោកជំទាវ មុំ សណ្តាប់ ហេរញ្ញឹក​គណៈកម្មាធិការ​សាខា​ដែល​វគ្គយល់ដឹង​នេះបាន​ចាប់​ដំណើរ​ការអស់​រយៈពេល១​ថ្ងៃកន្លង​មក​ ។

 

នាឱកាសនោះ​ លោកជំទាវ​ហេរញ្ញឹក​គណៈកម្មាធិការ​សាខា​ បាន​ពាំនាំ​នូវ​ការ​ផ្តាំផ្ញើ​សាកសួរ​សុខទុក្ខ​ពីសំណាក់​សម្តេច​កិត្តិព្រឹទ្ធបណ្ឌិត​ប្រធាន​ ប៊ុន រ៉ានី ហ៊ុន សែន​ ជូន​ដល់​ក្មួយៗ​យុវជ​នទាំង​អស់​ ព្រមទាំង​សូមកោតសរសើរ​វាយតម្លៃ​ខ្ពស់​ចំពោះ​លទ្ធផល​នៃការ​បញ្ចប់វគ្គ​នាថ្ងៃនេះ​ ។​

 

លោកជំទាវ​សង្ឃឹម​ និងជឿជាក់ថា​ បន្ទាប់ពី​ឆ្លងកាត់​វគ្គយល់ដឹងនេះ​ហើយ​ក្មួយៗពិត​ជាបាន​យល់ច្បាស់​ពីប្រវត្តិ​ចលនា​បដិរូប​ គោលការណ៍គ្រឹះ​ទាំង៧,​ តួនាទី​ភារកិច្ច​យុវជន​កាកបាទក្រហម,​ ការគ្រប់គ្រង​គ្រោះមហន្តរាយ,​ ច្បាប់ចរាចរណ៍​ និងវិជ្ជា​សង្គ្រោះ​បឋម​ ។ល។​ ដែលជាមុខ​វិជ្ជា​មូលដ្ឋាន​សម្រាប់​ជាគ្រឹះ​ឲ្យក្មួយៗ​យកទៅ​អនុវត្ត​សំដៅ​ជួយដល់​ជនរងគ្រោះ​ និងងាយរង​គ្រោះគ្រប់​ប្រភេទ​ ក៏ដូចជា​កម្មវិធី​មិត្ត​អប់រំ​មិត្ត​ ។

 

សូម​បញ្ជាក់ថា៖​ ក្នុងវគ្គ​យល់ដឹងនេះ​ជាលទ្ធផល​យុវជន​ទទួល​បាន​និទ្ទេស​ល្អចំនួន​៨០ភាគរយ និងមធ្យម​២០ភាគរយ​ ៕

 

អានបន្ថែម...

សាខាកក្រកខេត្តស្វាយរៀង៖ ​នៅថ្ងៃ​ទី​២៧​ ខែ​មីនា​ ឆ្នាំ​២០១៧​ នៅទី​ស្នាក់ការ​សាខា​កាកបាទក្រហម​កម្ពុជា​ខេត្តស្វាយរៀង​បានរៀបចំ​ពិធី​ប្រលង​គំនូរ​កុមារ​លើកកម្ពស់​ស្នាដៃ​អំពី​សកម្មភាព​របស់​កាកបាទក្រហម​កម្ពុជា​ ដើម្បី​ចូលរួម​អបអរសាទរ​ខួបលើក​ទី១៥៤​ ទិវា​ពិភព​លោក​កាកបាទក្រហម​ អឌ្ឍចន្ទក្រហម​ ៨ ឧសភា ២០១៧ ក្រោម​ប្រធានបទ​សកម្មភាព​ចម្រុះវិស័យ​របស់​កាកបាទក្រហម​កម្ពុជា​សាខា​បានផ្សព្វផ្សាយ​នឹងណែនាំ​រូបភាព​ពីវិស័យ​ស្នួល​ទាំងបួន​ដើម្បី​ឲ្យសិស្សា​នុសិស្ស​ជ្រើសរើស​យកគំនូរ​ដែលខ្លួន​ពេញចិត្ត​សម្រាប់គូរ​រួចជ្រើសរើស​យក​អ្នកមាន​សា្នដៃ​ល្អពី​លេខ ១​ ដល់លេខ ​៣ ​យកទៅ​ប្រកូត​ប្រជែង​ទូទាំង​ប្រទេស​នៅទីស្នាក់ការ​កណ្តាល​កាកបាទក្រហម​កម្ពុជា​ ។

 

ពិធី​នេះបាន​ការអញ្ជើញ​ចូលរួម​ពីលោកជំទាវ ពៅ សុភាព ហេរ​ញ្ញិក​គណៈកម្មាធិការ​សាខា​ មន្ទីរអប់រំ​យុវជន​ និងកីឡាខេត្ត​ លោកនាយក​សាលា ​លោកគ្រូ អ្នកគ្រូ និងសិស្សានុសិស្ស​មកពី​សាលា​បឋម​សិក្សា​អនុវត្តន៍​១០នាក់ សាលា​បឋមសិក្សា​ស្វាយជ្រំ៤នាក់ និង​សាលា​បឋម​សិក្សា​ឬស្សីព្រៃ១០នាក់ សរុប ២៤នាក់ ស្រី្ត១២នាក់ ។ ដោយមុន​នឹងគូ​គំនូរ​ក្រុមប្រត្តិបត្តិ​សាខា ​បានធ្វើការ​ផ្សព្វផ្សាយ​ដល់សាលា​ទាំង ៣​ ដើម្បីទទួល​ការណែនាំ​អំពី​ការគូរ​គំនូរ​ទាក់ទង​ទៅនឹង​ប្រធានបទ​ខាងលើ​ដោយសំដៅ​ទៅលើ​អត្ថន័យ​ សោភ័ណភាព​ និងស្នាដៃ​តាមស្ថានភាព​ជាក់ស្តែង​ជាលក្ខណៈបុគ្គល​ ផ្តោត​ លើនិមិត្ត​សញ្ញា​កាកបាទក្រហម ។ ក្រោយពី​បានវាយ​តម្លៃ​រូបភាព​នីមួយៗ​ បានទទួល​ចំណាត់​ថ្នាក់លេខ​ ១ ទៅលើ​សិស្ស​ឈ្មោះ ហ៊ន ធាន សិស្សថ្នាក់ទី ៦ (ក)សាលាបឋមសិក្សាស្វាយជ្រំ លេខ ២ ឈ្មោះ សំ ឆដា សិស្សថ្នាក់ទី ៦ (ខ) សាលាបឋម​សិក្សាអនុវត្តន៍ និងលេខ ៣ ឈ្មោះ ពេជ្រ ម៉ូលី​ណា សិស្ស​ថ្នាក់ទី ៦ (ខ)សាលា​បឋមសិក្សា​អនុវត្តន៍ ។

 

ក្នុងពិធី​នោះដែរ​លោកជំទាវ ​ពៅ សុភាព បានផ្តល់​ប័ណ្ណ​សរសើរ ​និងរង្វាន់​សំភារៈសិក្សាជា​អនុស្សាវរីយ៍១កញ្ចប់ដល់សិស្ស​ដែលជាប់​ចំណាត់ថ្នាក់​លេខ១ និងថវិកា៥ ម៉ឺនរៀល លេខ២ ថវិកា៤ ម៉ឺនរៀល និងលេខ៣ ថវិកា៣ ម៉ឺនរៀល និងសិស្សានុសិស្ស​ដែលមិនបាន​ទទួល​ជ័យ​លាភីទទួល​បានសំភារៈ​សិក្សា​ និងថវិកា២ ម៉ឺនរៀលក្នុងម្នាក់ៗ ។

អានបន្ថែម...

សាខាកក្រកខេត្តស្ទឹងត្រែង ៖ កាលពី ថ្ងៃទី ២០ -២១  ខែមីនា  ឆ្នាំ២០១៧  សាខាកាកបាទ ក្រហមកម្ពុជាខេត្តស្ទឹងត្រែង បានរៀបចំ វគ្គបណ្ដុះបណ្ដាលជាមូលដ្ឋានដល់យុវជនកាកបាទ​ក្រហម​កម្ពុជា​ចំនួន៨០​ នាក់​ នៃវិទ្យាល័យ​ ហ៊ុន សែន​ ស្ទឹងត្រែង​ ដោយមាន​ការអញ្ជើញ​ចូលរួម​ពីលោក​ សាយ ព្រលឹង នាយក​សាខា​កក្រក​ខេត្តស្ទឹងត្រែង​ តំណាង​មន្រ្តី​ការិយាល័យ​អភិវឌ្ឍន៍​ទីស្នាក់ការ​កណ្ដាល​ នាយករង​សាខា​ និងនាយករង​វិទ្យាល័យ ​ហ៊ុន សែន​ ស្ទឹងត្រែង ​ជាគណៈអធិបតី​ក្នុង​ពិធី​បើក-បិទវគ្គបណ្ដុះ​បណ្ដាល​ជាមូលដ្ឋាន​ និង​បំពាក់​ឯកសណ្ឋាន​ជូន​យុវជន​កាកបាទ​ក្រហម​កម្ពុជា​ថ្មីចំនួន​៨០ នាក់ ផងដែរ។

 

វគ្គ​បណ្ដុះបណ្ដាល​នេះរៀបចំ​ឡើង​ក្នុងគោល​បំណង​បញ្ជ្រាប​ចំណេះដឹង​ពាក់ព័ន្ធ ​ពង្រឹង​សមត្ថភាព ​និងតួនាទី​របស់​យុវជន កក្រក ក្នុង​ការចូលរួម​សកម្មភាព​មនុស្សធម៌ ​ប្រកប​ដោយប្រសិទ្ធភាព​និរន្តរន៍ភាព ​តាមរយៈកាកបាទក្រហម​កម្ពុជា។ វគ្គបណ្ដុះបណ្ដាល​នេះផ្ដោត​សំខាន់​លើប្រធាន​បទរួមមាន៖
-ប្រវត្តិចលនា​កាកបាទក្រហម ​អឌ្ឍចន្ទក្រហម ​និងច្បាប់មនុស្សធម៌អន្ដរជាតិ
-មូលដ្ឋានគ្រឹះនៃវិជ្ជាសង្គ្រោះបឋម
-ការងារគ្រប់គ្រងក្លឹបយុវជន និងគោលនយោបាយ យុវជន កក្រក និង
-ស្ថានភាពសុវត្ថិភាពចរាចរណ៍ផ្លូវគោក

បន្ទាប់ពី​ទទួលបាន​វគ្គបណ្ដុះបណ្ដាល​ជាមូលដ្ឋាន​នេះ យុវជនកក្រកថ្មីទាំងអស់នឹងត្រូវ​ចូលរួម​បំពេញសកម្មភាព​មនុស្សធម៌ ការងារ​សង្គម ​ការងារ​បរិស្ថាន​ អនាម័យ​ នៅក្នុងពិធី​បុណ្យ​ទន្លេ ​ដែលប្រព្រឹត្ត​នៅក្រុង​ស្ទឹងត្រែង នាពេល​ខាងមុខនេះ៕

 

អានបន្ថែម...

ព័ត៌មានផ្សេងៗ