អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

កាកបាទក្រហម កម្ពុជា ផ្តល់អំណោយ មនុស្សធម៌ ជូនប្រជាពលរដ្ឋ ងាយរងគ្រោះ បំផុត នៅស្រុកឱរ៉ាល់ ខេត្តកំពង់ស្ពឺ។

កក្រក ៖ នាព្រឹកថ្ងៃ ព្រហស្បតិ៍ ៩កើត ខែ បឋមាសាឍ  ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២១ ខែមិថុនា ឆ្នាំ២០១៨ នេះ កាកបាទ​ក្រហម កម្ពុជា ដែលមាន  សម្តេច កិត្តិព្រឹទ្ធបណ្ឌិត  ប៊ុន រ៉ានី ហ៊ុនសែន ជាប្រធាន បានផ្តល់​អំណោយ​ មនុស្សធម៌ ជូន​ប្រជាពលរដ្ឋ ងាយរងគ្រោះ បំផុត ចាស់ជរាគ្មានទីពឹង ស្ត្រីមេម៉ាយ ជនពិការ ​សរុបចំនួន ៤៤២គ្រួសារ មក​ពី៨ភូមិ ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ។

ក្នុងឱកាសនោះ លោកជំទាវ ពុំ ចន្ទីនី អគ្គលេខាធិការ  បានពាំនាំ ប្រសាសន៍ របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម កម្ពុជា ដែលផ្តាំ​ផ្ញើសួរ សុខទុក្ខ និងគិតគូរពីសុខុមាលភាព​ មនុស្សវ័យចាស់ ជូនលោក​យាយ លោកតា និងប្រជាពលរដ្ឋ​ទាំងអស់ ព្រមទាំងផ្តាំផ្ញើឱ្យបរិភោគអាហារ​មានអនាម័យ ទឹកដាំពុះ ជៀងវាងការ​ប្រើប្រាស់​គ្រឿងញៀនឬគ្រឿងស្រវឹង ដែលជាហេតុបង្កឱ្យ​មានអំពើ​ហិង្សាឬបទល្មើសផ្សេងៗ និងចូលរួម​គោរពច្បាប់​ចរាចរណ៍​ដើម្បីសុវត្ថិភាព​របស់ខ្លួន។ ជាមួយ​គ្នានេះ លោកជំទាវ ​បានលើកទឹកចិត្ត​ដល់ប្រជាពលរដ្ឋ​បន្តខិតខំ​ដាំដំណាំ បន្លែ ដោយប្រើប្រាស់ជី​ធម្មជាតិ​ជៀសវាង​ថ្នាំគីមីលើសកម្រិត និងចូលរួម​លើកកម្ពស់​សេចក្តីថ្លៃថ្នូរ​របស់មនុស្សជាតិតាមរយៈការប្រើប្រាស់សិទ្ធិ​ស្របច្បាប់​របស់ខ្លួនបំពេញ​កាតព្វកិច្ចជា​ប្រជាពលរដ្ឋ ដើម្បីសុខសន្តិភាព ស្ថិរភាព និងការអភិវឌ្ឍ។

គ្រួសាររងគ្រោះទាំងអស់បានសំដែង​នូវក្តីរំភើបរីករាយ និងថ្លែងអំណរគុណ​យ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត​ប្រធានកាកបាទ​ក្រហមកម្ពុជា ដែលបានគិតគូរ មានក្តីមេត្តា ករុណា និងទឹកចិត្តជ្រះថ្លា ជួយដោះស្រាយ​ទុក្ខលំបាកដល់​ប្រជាជនរងគ្រោះ​ជួបការលំបាក​បានទាន់ពេលវេលា។

គ្រួសារនីមួយៗទទួលបាន ៖ អង្ករ ៣០គីឡូក្រាម មី ១កេស ត្រីខ ១០កំប៉ុង មុង១ សារុង១ ក្រមា១ ភួយ១ និងថវិកាមួយចំនួន។

សាខាកាកបាទក្រហមកម្ពុជាខេត្តឧត្តរមានជ័យផ្សព្វផ្សាយការងារស្តារទំនាក់ទំនងគ្រួសារ

កក្រកខេត្តឧត្តរមានជ័យ ៖ នៅព្រឹកថ្ងៃទី ២០ ខែ មិថុនា ឆ្នាំ ២០១៨ សាខាកាកបាទក្រហមកម្ពុជា ខេត្តឧត្តរមានជ័យ បានធ្វើការ​ផ្សព្វផ្សាយ​ស្តីអំពីការងារ​ស្តារទំនាក់ទំនង​គ្រួសារ ជូនដល់​ប្រជាពលរដ្ឋ ដែលដឹក​នាំដោយ លោក សរ សៀងហៀង នាយកសាខា​ និងមាន​ការចូលរួម​ពី លោក លោកស្រី ជាសមាជិក សមាជិកា​គណៈកម្មាធិការ​សាខា ព្រមទាំង​ប្រជាពលរដ្ឋ​ចំនួន ៤២នាក់ (ស្រី ២៨នាក់) ស្ថិតនៅភូមិ​ស្រែប្រាំង ឃុំជើងទៀន ស្រុកចុង​កាល់ ខេត្តឧត្តរមានជ័យ។

ការផ្សព្វផ្សាយ​នេះមាន​គោលបំណង ដើម្បីបង្រួប​បង្រួមគ្រួសារ​ដែលបានបែក​បាក់គ្នាកាលពីសម័យសង្រ្គាម និងផ្សព្វផ្សាយ​បន្តទៅដល់សហគមន៍រៀងៗខ្លួន។ កន្លងមក​ សាខាកាកបាទក្រហមកម្ពុជា ខេត្តឧត្តរមានជ័យ បានបង្រួប​បង្រួមគ្រួសារ​ដែលបានបែក​គ្នាចំនួន ៤ករណីមកហើយ។

សូមបញ្ជាក់ថា ៖ នៅថ្ងៃដដែលនេះដែរ លោកនាយក ក៏បានផ្តល់រទេះពិការជូន​ដល់លោកយាយ អាំ មានជំងឺលើស​ឈាម ពិការដើរមិនរួច ស្ថិតនៅ​ភូមិស្រែប្រាំង ឃុំជើងទៀន ស្រុកចុងកាល់ ខេត្តឧត្តរមានជ័យផងដែរ៕

 

សាខាកាកបាទក្រហមកម្ពុជាខេត្តព្រះសីហនុ ចុះសួរសុខទុក្ខប្រជាពលរដ្ឋរងគ្រោះដោយជំនន់ទឹកភ្លៀង នៅស្រុកកំពង់សីលា

សាខាកក្រកខេត្តព្រះសីហនុ ៖ នារសៀល​ថ្ងៃទី ១៩ ខែ មិថុនា ឆ្នាំ ២០១៨ សាខាកាក​បាទក្រហមកម្ពុជា​ ខេត្តព្រះសីហនុ ដឹកនាំដោយ ឯកឧត្តម ជាម ហ៊ីម អនុប្រធានកិត្តិយសសាខា និងសហការី បានអញ្ជើញ​ចុះសួរ​សុខទុក្ខ និងចែកអំណោយ​មនុស្សធម៌របស់​កាកបាទក្រហមកម្ពុជា​ ជូនដល់​ប្រជាពលរដ្ឋរងគ្រោះដោយ​ជំនន់ទឹកភ្លៀង ចាស់ជរាគ្មានទីពឹង ស្រីមេម៉ាយ ក្រីក្រ និងជនពិការ ៣៦៩គ្រួសារ មកពីឃុំចំនួន៤ ​ស្រុកកំពង់សីលា ខេត្តព្រះសីហនុ ដែលពិធីនេះ​ប្រព្រឹត្តទៅនៅវត្ត​កំពង់សីលា ស្រុកកំពង់សីលា ខេត្តព្រះសីហនុ។

ក្នុងឱកាសនោះដែរ ឯកឧត្តម ​បានពាំនាំ​ប្រសាសន៍​ផ្ដាំផ្ញើសាកសួរ​សុខទុក្ខ​និងក្ដីនឹក​រលឹក ពីសំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា ដែល​ជានិច្ចកាល សម្ដេ​ចតែងតែគិតគូរ​សុខទុក្ខ​បងប្អូន​ប្រជាពលរដ្ឋ​ក្រីក្រ មាន​ទុក្ខលំបាក​ ជនរងគ្រោះ ​ជនងាយរងគ្រោះ​ គ្រប់ប្រភេទ ដោយមិនប្រកាន់​រើសអើងវណ្ណៈ ជាតិសាសន៍ ពណ៍សម្បុរ ឬនិន្នាការនយោបាយអ្វីឡើយ។ ទន្ទឹមនោះដែរ ឯកឧត្តម ក៏បាន​អំពាវនាវដល់ប្រជាពលរដ្ឋ​ទាំងអស់ ត្រូវយកចិត្តទុកដាក់ចំពោះបញ្ហាសុខភាព-អនាម័យ ក្នុងការរស់​នៅប្រចាំថ្ងៃ ការបង្ការជំងឺឆ្លងនានា និងចូលរួមឈានឆ្ពោះបញ្ចប់មេរោគអេដស៍ កាត់បន្ថយគ្រោះថ្នាក់ចរាចរណ៍ ​លុបបំបាត់​គ្រឿងញៀន គ្រឿងស្រវឹង អំពើហិង្សា ល្បែងស៊ីសងគ្រប់ប្រភេទ ដែលអាចបង្កឱ្យមាន​អសន្តិសុខភាព​ក្នុងសង្គម។

អំណោយដែលបាន​ផ្ដល់ជូនរួមមាន ៖ អង្ករ ២៥គីឡូក្រាម មី ១កេស ត្រីខ ១០កំប៉ុង មុង១ ភួយ១ សារុង១ ក្រមា១ និងថវិកាចំនួន ២០,០០០រៀលផងដែរ៕

 

សាខាកាកបាទក្រហមកម្ពុជា ខេត្តកំពត បើកវគ្គបណ្តុះបណ្តាលជាមូលដ្ឋានស្តីពីប្រវត្តិចលនាកាកបាទក្រហម អឌ្ឍចន្ទក្រហម

សាខាកក្រកខេត្តកំពត ៖ នាព្រឹកថ្ងៃទី ១៩ ខែ មិថុនា ឆ្នាំ ២០១៨ សាខា​កាកបាទក្រហម​កម្ពុជា ខេត្តកំពត បានបើកវគ្គ​បណ្តុះបណ្តាលជាមូលដ្ឋាន​ស្តីពីប្រវត្តិចលនា​កាកបាទក្រហម អឌ្ឍចន្ទក្រហម​ ដល់យុវជនកាកបាទក្រហមកម្ពុជា​ទើបជ្រើសរើសថ្មី​ប្រចាំវិទ្យាល័យ​កន្សោមអក ក្រោមការដឹកនាំ​ដោយលោកស្រី ឡាយ សុភ័ក្ត្រ នាយិការង​សាខា ដែលមានការ​ចូលរួមពី លោក លោកស្រី ជាសមាជិក សមាជិកា​គណៈកម្មាធិការសាខា អនុសាខា ទីប្រឹក្សាយុវជន និងយុវជន​កាកបាទក្រហមកម្ពុជា សរុបចំនួន ៦៥នាក់ (ស្រី ៤៥នាក់) ស្ថិតក្នុងវិទ្យាល័យ​កន្សោមអក ខេត្តកំពត។

វគ្គបណ្តុះបណ្តាល​នេះមាន​គោលបំណង ដើម្បីពង្រឹងនិងពង្រីកសមត្ថភាព​ដល់យុវជន​កបាកបាទក្រហមកម្ពុជាបាន​យល់ដឹងពីប្រវត្តិចលនា​កាកបាទក្រហម អឌ្ឍចន្ទក្រហម និងធ្វើការផ្សព្វផ្សាយ​បន្តទៅដល់សាលារៀន មិត្តភក្តិ និងសហគមន៍រៀងៗខ្លួនផងដែរ៕

 

សាខាកាកបាទក្រហមកម្ពុជា ខេត្តកំពង់ឆ្នាំង រៀបចំពិធីសូត្រមន្តចម្រើនព្រះជន្មថ្វាយព្រះពរ សម្តេចព្រះមហាក្សត្រី នរោត្តម មុនិនាថ សីហនុ

សាខាកក្រកខេត្តកំពង់ឆ្នាំង ៖ កាលពីព្រឹកថ្ងៃ ព្រហស្បតិ៍ ២កើត ខែបឋមាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១៤ ខែ មិថុនា ឆ្នាំ២០១៨ ​សាខាកាកបាទក្រហម​កម្ពុជា​ ខេត្តកំពង់ឆ្នាំង បានរៀបចំពិធីសូត្រមន្ត​ចម្រើនព្រះជន្ម​ថ្វាយព្រះពរ សម្តេច​ព្រះមហាក្សត្រី ​នរោត្តម មុនិនាថ សីហនុ ព្រះវររាជមាតាជាតិ​ខ្មែរ និងជាព្រះប្រធាន​កិត្តិយសកាកបាទក្រហម​កម្ពុជា។

ពិធីនេះប្រព្រឹត្តទៅដោយមានការអញ្ជើញ​ចូលរួមពី ឯកឧត្តម ឈួរ ច័ន្ទឌឿន ប្រធានកិត្តិយសាខា និងលោកជំទាវ កែ​ ច័ន្ទមុនី​ អនុប្រធានកិត្តិយស​សាខា រួមជាមួយនឹង ឯកឧត្តម លោកជំទាវ លោក លោកស្រី ជាសមាជិក សមាជិកាគណៈកម្មាធិការ​សាខា អនុសាខា​កាកបាទក្រហមកម្ពុជា ៨ក្រុង ស្រុក មន្ទីរអង្គភាពជុំវិញខេត្ត ​យុវជនសហភាពសហព័ន្ធ​យុវជនកម្ពុជា យុវជនកាយរិទ្ធ​ អ្នកស្ម័គ្រចិត្ត​ យុវជនកាកបាទក្រហមកម្ពុជា បងប្អូន​ប្រជាពលរដ្ឋពុទ្ធបរិស័ទ និងសាសនិកខ្មែរ​ឥស្លាមសរុបចំនួន ៦៧៤នាក់។

ពិធីបុណ្យនេះ បានប្រារព្ធឡើង​ដោយព្រះរាជពិធី​ថ្វាយគ្រឿង​សក្ការៈបូជា ថ្វាយ​ចំពោះព្រះពុទ្ធរូបស្នងអង្គព្រះសម្មាសម្ពុទ្ធ ព្រះបរមគ្រូនៃយើង​ និងបានប្រារព្ធនូវបទ​មនសិការថ្វាយបង្គំ ព្រះសមាទានសីល ដើម្បីគោរពរំឭក​ដល់គុណបុណ្យ​ព្រះរតនត្រ័យ កែវទាំងបី មានព្រះពុទ្ធ ព្រះធម៌ និងព្រះសង្ឃ ព្រមទាំងបាននិមន្តព្រះសង្ឃចំនួន ៩អង្គ ស្វាធ្យាយ​ជយន្តោ ចម្រើនព្រះបរិត្ត ពុទ្ធពរ ជ័យមង្គល ថ្វាយព្រះករុណាជាអម្ចាស់ជីវិតតម្កល់លើត្បូងជាទីសក្ការៈដ៏ខ្ពង់ខ្ពស់បំផុត សូមសម្ដេចព្រះមហាក្សត្រី បានប្រកបតែនឹងសិរីសួស្តីជ័យមង្គល និងព្រះពុទ្ធពរគ្រប់​ប្រការកុំបីឃ្លៀងឃ្លាតឡើយ៕

សាខាកាកបាទក្រហមកម្ពុជា ខេត្តកណ្តាល រៀបចំ ព្រះរាជពិធីបុណ្យចម្រើនព្រះជន្ម សម្តេចម៉ែ

សាខា កក្រក ខេត្តកណ្តាល ៖រសៀល​ថ្ងៃពុធ ១កើត ខែអាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី​ ១៣ ខែ មិថុនា ឆ្នាំ២០១៨ សាខា​កាកបាទក្រហមកម្ពុជា​ខេត្តកណ្តាល​ បានរៀបចំ​ពិធីសូត្រមន្ត​ចម្រើន​ព្រះជន្មថ្វាយ សម្តេចព្រះមហាក្សត្រី ​នរោត្តម មុនិនាថ សីហនុ ព្រះវររាជមាតា​ជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល​ ព្រះប្រធានកិត្តិយស​កាកបាទក្រហម​កម្ពុជា នៅទីស្នាក់ការ​សាខាកាកបាទក្រហម​កម្ពុជាខេត្តកណ្តាល ។ ពិធីនេះមានកិត្តិយស​ដោយបានការអញ្ជើ​ញចូលរួមពី ឯកឧត្តម នួន ផា អនុប្រធានកិត្តិយសសាខា តំណាងឯកឧត្តមបណ្ឌិត ម៉ៅ ភិរុណ ប្រធានកិត្តិយសសាខា ព្រមទាំងមានការនិមន្ត និងអញ្ជើញចូលរួមពីព្រះសង្ឃចំនួន ៩ អង្គ លោកជំទាវភរិយាថ្នាក់ដឹកនាំខេត្ត គណៈអភិបាលខេត្ត សមាជិកសមាជិកាគណៈកិត្តិយសសាខា គណៈកម្មាធិការសាខា ថ្នាក់ដឹកនាំ មន្ទីរអង្គភាពជុំវិញខេត្ត អនុសាខាកាកបាទក្រហម​កម្ពុជាក្រុង​តាខ្មៅ យុវជនកាកបាទក្រហមកម្ពុជា និង តាជី​យាយជី​ជាពុទ្ធបរិស័ទ ប្រមាណជាង ៧០ អង្គ/នាក់ ។

 

ក្នុងឱកាសដ៏នក្ខត្តឫក្ស​នៃពិធីបុណ្យចម្រើន​ព្រះជន្មវស្សាថ្វាយ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតា​ជាតិខ្មែរ ព្រះប្រធានកិត្តិយស​កាកបាទក្រហមកម្ពុជា តាំងនាមទូលព្រះបង្គំ ខ្ញុំម្ចាស់ជាប្រធាន អនុប្រធាន​គណៈកិត្តិយស​សាខា សមាជិក​សមាជិកាគណៈកម្មាធិការសាខា អនុសាខាកាកបាទក្រហម កម្ពុជា​គ្រប់ស្រុក-ក្រុង មន្ត្រី បុគ្គលិក​ក្រុមប្រតិបត្តិសាខា ក្រុមកាកបាទក្រហម​ឃុំ/សង្កាត់ អ្នកស្ម័គ្រចិត្ត​កាកបាទក្រហម យុវជនកាក បាទក្រហមកម្ពុជាទូទាំង​ខេត្តកណ្តាល ទូលព្រះបង្គំយើងខ្ញុំទាំងអស់គ្នា សូមព្រះបរមរាជានុញ្ញាត​ដ៏ខ្ពង់ ខ្ពស់បំផុត លំឱនកាយ​លើកហត្ថប្រណម្យ​បួងសួងដល់គុណបុណ្យព្រះរតនត្រ័យ តេជះបារមីនៃទេវតាថែ រក្សាព្រះមហាស្វេតច្ឆ័ត្រ និងគុណបារមីនៃអតីតព្រះមហាក្សត្រ ព្រះមហាក្សត្រីយានីខ្មែរគ្រប់ព្រះអង្គ សូមព្រះមេត្តាប្រទានព្រះពរជ័យ សិរីមង្គលបវរមហាប្រសើរថ្វាយ សម្តេចព្រះមហាក្សត្រីព្រះវរ រាជមាតា ជាតិខ្មែរក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយស កាកបាទក្រហមកម្ពុជា ជាទីសក្ការៈដ៏ខ្ពង់ខ្ពស់បំផុត សូមព្រះអង្គប្រកបតែនឹងព្រះបរមសុខគ្រប់ ប្រការ ​ដើម្បីគង់ប្រថាប់​ជាម្លប់ដ៏ត្រជាក់​ត្រជុំ ជាទីជ្រកកោន​របស់ប្រជារាស្ត្រ​ទូទាំងព្រះរាជាណាចក្រ កម្ពុជា រស់នៅ​ដោយទទួល​បានសេចក្តីសុខសន្តិភាព​សុភមង្គល និងការអភិវឌ្ឍន៍​រីកចម្រើន​ថ្កុំថ្កើងរុងរឿង ជានិច្ចនិរន្តរ៍​តរៀងទៅ ៕

 

សាខាកាកបាទក្រហមកម្ពុជា ខេត្តកែប រៀបចំ ព្រះរាជពិធីបុណ្យចម្រើនព្រះជន្ម សម្តេចម៉ែ

សាខាកក្រកខេត្តកែប ៖ នៅព្រឹកថ្ងៃ ពុធ ១កើត ខែ បឋម​សាឍ ឆ្នាំច សំរឹទ្ធស័ក ព.ស.២៥៦២ ត្រូវនឹងថ្ងៃទី ១៣ ខែ មិថុនា ឆ្នាំ ២០១៨ សាខាកាកបាទក្រហម​កម្ពុជា ខេត្តកែប បានរៀបចំ​ពិធីសូត្រមន្ត ចម្រើនព្រះបរិត្ត និងរាប់បាត្រ​ព្រះសង្ឃជា​ច្រើនអង្គ ក្នុងឱកាសព្រះរាជ​ពិធីបុណ្យចម្រើន​ព្រះជន្ម សម្តេចព្រះមហាក្សត្រី នរោត្ដម​ មុនិនាថ សីហនុ ព្រះវររាជ​មាតាជាតិខ្មែរ និងជាព្រះប្រធាន​កិត្តិយស កាកបាទក្រហមកម្ពុជា ជាទីសក្ការៈដ៏ខ្ពង់ខ្ពស់​ក្នុងទិវាព្រះរាជ​ពិធីបុណ្យចម្រើន​ព្រះជន្មវស្សាគម្រប់ ៨២ យាងចូល ៨៣ព្រះវស្សា ត្រូវនឹងថ្ងៃទី ១៨ ខែ មិថុនា ឆ្នាំ ២០១៨ ខាងមុខ។

 

ពិធីនេះដែរ ប្រារព្ធឡើងក្រោម​អធិបតីភាព ឯកឧត្តម កែន សត្ថា ប្រធាន​គណៈកម្មាធិការ​សាខា​កាកបាទក្រហមកម្ពុជា ខេត្តកែប ដែលមាន​ការអញ្ជើញ​ចូលរួមពី ឯកឧត្តម លោកជំទាវ លោក លោកស្រី ជាសមាជិក សមាជិកា​គណៈកម្មាធិការសាខា ក្រុមប្រតិបត្តិ​សាខា អនុសាខា អង្គភាព​ជុំវិញខេត្ត ព្រះសង្ឃ មន្រ្តីរាជការ អ្នកស្ម័គ្រចិត្ត យុវជ​នកាកបាទក្រហម​កម្ពុជា ជាច្រើន​អង្គ នាក់ ដែលប្រព្រឹត្ត​ទៅនៅ​សាលប្រជុំសាលា​ខេត្តកែប៕

 

កាកបាទក្រហមកម្ពុជាចុះសួរសុខទុក្ខ និងឧបត្ថម្ភ ថវិកា គ្រឿងឧបភោគ-បរិភោគ សម្ភារប្រើប្រាស់ ជូនដល់កុមារខ្សោយសតិបញ្ញា កុមារពិការ កុមារផ្ទុកមេរោគអេដស៍ កុមារកំព្រា នៅ សង្កាត់ចោមចៅ

កក្រក​ ៖ ដើម្បីអបអរខួបលើកទី​ ៦៩​ ទិវាកុមារអន្តរជាតិ​ ១​ មិថុនា​ និងខួបលើកទី១៧​ ទិវាពិភពលោកប្រឆាំងពលកម្មកុមារ​ ១២​ មិថុនា​ និងទិវាកុមារកម្ពុជា​ ឆ្នាំ២០១៨​ នៅព្រឹកថ្ងៃពុធ​ ១កើត​ ខែបឋមាសាឍ​ ឆ្នាំច​ សំរឹទ្ធិស័ក​ ព.ស.២៥៦២​ ត្រូវនឹងថ្ងៃទី ១៣​ ខែមិថុនា​ ឆ្នាំ២០១៨ នេះ កាកបាទក្រហមកម្ពុជា (កក្រក)​ ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចាត់ឱ្យមន្ត្រីចុះសួរសុខទុក្ខ​ និងឧបត្ថម្ភ​ ថវិកា គ្រឿងឧបភោគ-បរិភោគ​ សម្ភារប្រើប្រាស់​​ និងរៀបចំអាហារថ្ងៃត្រង់ ជាលើកទី​ ៣​ ចាប់ពីឆ្នាំ២០១៦​ ជូនដល់កុមារខ្សោយសតិបញ្ញា កុមារពិការ កុមារផ្ទុកមេរោគអេដស៍ កុមារកំព្រា​ គ្រូ​-បុគ្គលិក​ និងអ្នកស្ម័គ្រចិត្តបរទេស​ សរុបចំនួន​ ២២៤នាក់​ នៃបុរីទារក​ និងកុមារជាតិ​ ដែលមានទីតាំងស្ថិតនៅ ភូមិគោកចំបក​ សង្កាត់ចោមចៅ​ ខណ្ឌដង្កោ រាជធានីភ្នំពេញ។

 

ក្នុងឱកាសសំណេះសំណាល​នោះ លោកជំទាវ ពុំ​ ចន្ទីនី​ អគ្គលេខាធិការ​ កក្រក បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើការសួរ​សុខទុក្ខ ក្តីអាណិត ស្រឡាញ់ប្រកបដោយមនោសញ្ចេតនាយ៉ាងជ្រាលជ្រៅ​ ចំពោះកុមារ​ទាំងអស់​ និងថ្លែងនូវការកោតសរសើរចំពោះទឹកចិត្តដ៏ថ្លៃថ្លា​របស់គ្រូ-បុគ្គលិក​ អ្នកស្ម័គ្រចិត្ត ដែលបាន​យកអស់កម្លាំងកាយ-ចិត្ត​ រួមចំណែកលើកកម្ពស់តម្លៃមនុស្សធម៌​របស់មនុស្សជាតិ​ ពិសេសជួយឱ្យកុមារ​ពិការខ្សោយសតិបញ្ញា​ទាំងអស់​ បានរស់នៅប្រកបដោយសេចក្តីថ្លៃថ្នូរ​ មានការចិញ្ចឹមបីបាច់​ ផ្តល់ភាពកក់ក្តៅ​ ផ្តល់ការអប់រំ​ ការបណ្តុះបណ្តាលសិល្បៈ​។ល។

 

ជាមួយគ្នានោះ​ លោកស្រី​ ថោ​ ពៅ ប្រធានបុរីទារក​ និងកុមារជាតិ បានសម្តែងនូវការដឹងគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែគិតគូរពីសុខទុក្ខ ផ្តល់ភាពកក់ក្តៅ​ ភាពស្និទ្ធស្នាល​ ក្តីអាណិតស្រឡាញ់​ លើកទឹកចិត្ត​ ហើយបានឧបត្ថម្ភ​ជាបន្តបន្ទាប់​ចាប់តាំងពីឆ្នាំ​ ២០១៦​ និងសូមជូនពរដល់ សម្តេច​កិត្តិព្រឹទ្ធបណ្ឌិត មានសុខភាពល្អ ​កម្លាំងមាំមួន អាយុយ៉ឺនយូរ ដើម្បីនៅជាម្លប់ និងផ្តល់ក្តី​សង្ឃឹម ដល់ជនរងគ្រោះ​ និងងាយរងគ្រោះបំផុត។

 

សូមបញ្ជាក់ថា​​ អំណោយប្រគល់ជូនបុរីទារកនិងកុមារជាតិ​ រួមមាន​ ៖​ អង្ករ​ ២តោន​​ មីយើង​ ៤០កេស​ ត្រីខ​ ៨កេស​ (ស្មើ​ ៨០០កំប៉ុង)​ ទឹកក្រូច​ ១៥កេស​ ទឹកសុទ្ធ​ ១៥កេស​ ទឹកត្រី​ ២៤ដប​ ទឹកស៊ីអ៊ីវ​ ២៤ដប​ ប្រេងឆា​ ២៤ដប​ ម្សៅកូដូម៉ូ ៥កេស​ (ស្មើ​ ៣៦០កំប៉ុង​) ផ្លែប៉ោម​ ២កេស​ នំក្រៀប​ ៨ថង់​ ថវិកា​ ១០លានរៀល​ និងអាហារថ្ងៃត្រង់មួយពេល​ (មាន​ ២៤តុ)។ ដោយឡែក​ សម្រាប់ គ្រូ-បុគ្គលិក​ អ្នកស្ម័គ្រចិត្ត​ ចំនួន​ ៨៤នាក់​ ក្នុងម្នាក់ៗ​ទទួលបាន​ អង្ករ​ ៣០គីឡូក្រាម​ មី​ ១កេស​ ត្រីខ​ ១០កំប៉ុង​ មុង១​ ភួយ១​ សារុង​១​ ក្រមា១​ និងថវិកា​ ១០ម៉ឺនរៀល៕

 

កាកបាទក្រហម កម្ពុជា ផ្តល់ថវិកា គ្រឿងបរិភោគ និងសម្ភារ ជូនបុរសពោះម៉ាយឈ្មោះ ធួក ម៉ៅ

កក្រក​ ៖​ នៅរសៀលថ្ងៃចន្ទ ១៣រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១១ ខែមិថុនា ឆ្នាំ២០១៨ នេះ កាកបាទក្រហម​កម្ពុជា (កក្រក) ដែលមាន សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់ថវិកា គ្រឿងបរិភោគ និង​សម្ភារប្រើប្រាស់​មួយចំនួន ជូនបុរសពោះម៉ាយឈ្មោះ ធួក ម៉ៅ អាយុ ៣៦ឆ្នាំ ដើម្បីសម្រាល​ដល់ការស្នាក់នៅ ក្នុងពេលមើលថែទាំ​កូនតូចអាយុ ៤ឆ្នាំ ដែលនឹងត្រូវវះកាត់ព្យាបាលជំងឺត្បៀតពោះវៀន នៅមន្ទីរពេទ្យ។

ក្នុងឱកាសនោះ​ លោកជំទាវ ម៉ែន នារីសោភ័គ អគ្គលេខាធិការរងទី ១ កក្រក បានពាំនាំប្រសាសន៍របស់ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ដែលផ្តាំផ្ញើ​សួរសុខទុក្ខ និងលើកទឹកចិត្ត​ដល់ លោក ធួក ម៉ៅ ឱ្យបន្តខិតខំ​តស៊ូប្រកបរបរ​ចិញ្ចឹមជីវិត និងមើលថែទាំកូនឱ្យ​បានល្អ អនុវត្តតាម​ការណែនាំរបស់គ្រូពេទ្យ។

លោក ធួក ម៉ៅ បានថ្លែងអំណរគុណ​យ៉ាងជ្រាលជ្រៅ​ចំពោះ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានជួយ​ឧបត្ថម្ភ លើកទឹកចិត្ត និងផ្តល់ក្តីសង្ឃឹមដល់ប្រជាជន​ជួបការលំបាកដោយគ្មានការរើសអើង​អ្វីឡើយ៕

កាកបាទក្រហមកម្ពុជាសម្រេចផ្តល់អណ្តូងស្នប់ ជូនប្រជាពលរដ្ឋខ្វះខាតទឹកប្រើប្រាស់ នៅខេត្តក្រចេះ, ស្ទឹងត្រែង និង ខេត្តមណ្ឌលគិរី

កក្រក​ ៖ ដើម្បីបន្តដោះស្រាយ​តម្រូវការទឹក​នៅតាមទីជនបទ​ដាច់ស្រយាល នៅថ្ងៃទី ៧ ខែមិថុនា ឆ្នាំ២០១៨ នេះ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា បានសម្រេច​ផ្តល់អណ្តូង​ស្នប់ធំ ចំនួន ៤១អណ្តូង គិតជាទឹកប្រាក់​ចំនួន ៩៩.៨៧២ដុល្លារ​អាមេរិក (ប្រាំបួនម៉ឺនប្រាំបួនពាន់ប្រាំបីរយ​ចិតសិប​ពីរដុល្លារអាមេរិក) ជូនប្រជាពលរដ្ឋ​ខ្វះខាត​ទឹកប្រើប្រាស់​ចំនួន ៧៧៣គ្រួសារ ស្មើមនុស្ស ៣.៨៨០នាក់ រស់នៅតំបន់​ដាច់ស្រយាល និងតាមបណ្តោយ​ព្រំដែនកម្ពុជា-ឡាវ ក្នុងនោះ អណ្តូង​ចំនួន ១៥ សម្រាប់ខេត្តក្រចេះ, ១៤អណ្តូង សម្រាប់ខេត្តស្ទឹងត្រែង និង ១២អណ្តូង សម្រាប់ខេត្តមណ្ឌលគិរី។

សូមបញ្ជាក់ថា គិតចាប់តាំង​ពីឆ្នាំ ២០១០ រហូតដល់​បច្ចុប្បន្ននេះ កាកបាទក្រហម​កម្ពុជា បានដោះស្រាយបញ្ហាទឹកស្អាត​ជូនប្រជាពលរដ្ឋ​រាប់ម៉ឺនគ្រួសារ​នៅទូទាំងប្រទេស ក្នុងនោះ បានផ្តល់អណ្តូងទឹកស្អាត (អណ្តូងស្នប់-លូ) ស្រះទឹកសហគមន៍ និងស៊ីទែនទឹក។ល។ ជាក់ស្តែង ក្នុងឆ្នាំ ២០១៧ កន្លងទៅ បានផ្តល់អណ្តូងសរុបចំនួន ៤៣៣ និងជីក-ស្តារស្រះទឹកចំនួន ៧ ដែលជាប្រយោជន៍​សម្រាប់ប្រជាពលរដ្ឋចំនួន ១០.៤៦៩គ្រួសារ។ ដោយឡែក ក្នុងឆមាសទី ១ ឆ្នាំ២០១៨ នេះ កាកបាទក្រហមកម្ពុជា បានប្រគល់អណ្តូង​ឱ្យប្រើប្រាស់​ជាផ្លូវការចំនួន ៦៦ រួចមកហើយ ហើយ​អណ្តូងទាំង ៤១ ដែលសម្រេចផ្តល់​នៅពេលនេះ នឹងធ្វើពិធីប្រគល់​ជាបន្តបន្ទាប់៕

 

1 2 3 4 5 Next Last