អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

សាខាកាកបាទក្រហមកម្ពុជាខេត្តស្វាយរៀង ផ្តល់អំណោយ ប្រជាពលរដ្ឋដែលរងគ្រោះដោយសារជំនន់ទឹកភ្លៀង ឃុំកំពង់ចំឡង ស្រុកស្វាយជ្រំ

សាខាកក្រកខេត្ត​ស្វាយរៀង៖ នៅទីស្នាក់ការ​សាខាកាកបាទក្រហម​កម្ពុជា​ខេត្តស្វាយរៀង ថ្ងៃព្រហស្បតិ៍ ១០រោច ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវ​នឹងថ្ងៃទី ៤ ខែ តុលា ឆ្នាំ ២០១៨ លោក ពៅ សារ៉េន ​នាយករង​សាខា​ បានផ្តល់​អំណោយ​មនុស្សធម៌របស់​សាខាដល់ប្រជាពលរដ្ឋដែលរងគ្រោះដោយសារ​ជំនន់ទឹកភ្លៀង ២ គ្រួសារ ​មកពី ឃុំកំពង់ចំឡង និងគ្រួសារក្រីក្រ​មានកូនច្រើន ១ គ្រួសារ មកពីឃុំ​ ចំបក់ស្រុក​ស្វាយជ្រំ សរុប ៣ គ្រួសារ ។ 


ក្នុងឱកាសនោះ​ លោក ពៅ សារ៉េន នាយករង​សាខា បានពាំនាំ​នូវបណ្តាំ​ផ្ញើរសាកសួរ​សុខទុក្ខពីសំណាក់ ឯកឧត្តម ម៉ែន វិបុល ប្រធាន​គណៈកម្មាធិការ​សាខា ចំពោះបងប្អូន​ទាំងអស់​ដោយក្តីនឹក​រលឹក និងផ្ដាំផ្ញើ​ឲ្យយក​ចិត្តទុកដាក់មើល​ថែរក្សា​កូនចៅ ព្រោះរដូវនេះ​ជារដូវវស្សា ទឹកកំពុងតែឡើងខ្លាំង ដើម្បីជៀសវាង​គ្រោះថ្នាក់កើត​ឡើងដោយសារ​ទឹកជំនន់ ។ 


ទន្ទឹមនឹងនោះ សូមរួមគ្នាគោរព​ច្បាប់ចរាចរណ៍ និងរាល់ពេល​ធ្វើដំណើរ​តាមដងផ្លូវ ត្រូវមាន​ការប្រុងប្រយ័ត្នខ្ពស់ ដើម្បីជៀសវាង​គ្រោះថ្នាក់កើតមាន​ឡើងជាយថា​ហេតុ ។ អំណោយដែល​បានចែកជូនទាំង ២ គ្រួសារ ក្នុង ១ គ្រួសារទទួលបាន អង្ករ ៣០ គ.ក្រ កៅស៊ូតង់ ១ ធុងទឹកជ័រ ១ ឆ្នាំងបាយ សម្លរ ២ កន្ទេលបត់ ១ មី ១ កេស ត្រីខ ១០ កំប៉ុង ទឹកស៊ីអ៊ីវ ៦ ដប មុង ១ ភួយ ១ ក្រម៉ា ១ សារ៉ុង ១ ថវិកា ៥០,០០០ រៀល ។

គ្រួសារក្រីក្រ ១ គ្រួសារទទួលបាន អង្ករ ៣០ គ.ក្រ មី ១ កេស កន្ទេលបត់ ១ ត្រីខ ១០ កំប៉ុង ទឹកស៊ីអ៊ីវ ៦ ដប មុង ១ ភួយ ១ ក្រម៉ា ១ សារ៉ុង ១ ឃីតសម្រាប់ទារក ១ ឈុត ថវិកា ៤០,០០០ រៀល ។

កាកបាទក្រហមកម្ពុជាចុះសួរសុខទុក្ខ អ្នកជំងឺកំពុងសម្រាកព្យាបាលជំងឺនៅមន្ទីរពេទ្យព្រះកេតុមាលា

កក្រក​ ៖​ ក្នុងឱកាសពិធីកាន់បិណ្ឌនិងបុណ្យភ្ជុំបិណ្ឌ​នេះ​ នៅព្រឹកថ្ងៃព្រហស្បតិ៍​ ១០រោច​ ខែភទ្របទ​ ឆ្នាំច​ សំរឹទ្ធិស័ក​ ព.ស.២៥៦២​ ត្រូវនឹងថ្ងៃទី ៤​ ខែតុលា ឆ្នាំ២០១៨​ នេះ កាកបាទក្រហមកម្ពុជា​ (ហៅកាត់ថា​ កក្រក) ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចាត់ឱ្យគណៈប្រតិភូដឹកនាំដោយ​ លោកជំទាវ​ ពុំ​ ចន្ទីនី​ អគ្គលេខាធិការ​ ចុះសួរសុខទុក្ខ និងចែកអំណោយមនុស្សធម៌ជូនអ្នកជំងឺចំនួន ៤៤៧នាក់ (ក្នុងនោះមានកងទ័ពចំនួន​ ២១៦នាក់)​ ដែលកំពុងសម្រាកព្យាបាលជំងឺនៅមន្ទីរពេទ្យព្រះកេតុមាលា​ រាជធានីភ្នំពេញ។

 

អំណោយមនុស្សធម៌ដែលបានចែកជូនអ្នកជំងឺទាំង ៤៤៧នាក់ ក្នុងម្នាក់ៗទទួលបាន ៖ មី ១កេស ត្រីខ ១០កំប៉ុង ស្ករស ១គីឡូក្រាម ទឹកដោះគោខាប់ ៤កំប៉ុង នំប្រៃ​ ១កញ្ចប់​ មុង១ ភួយ១ សារុង១ ក្រមា១ អាវយ៉ឺត១​ និងថវិកា ៥០.០០០រៀល។​ ដោយឡែក​ កងទ័ពមានជំងឺចំនួន​ ២១៦នាក់​ ក្នុងម្នាក់ៗទទួលបាន​ មុងសុវត្ថិភាព​ចំនួន ១បន្ថែមទៀត៕

 

កាកបាទក្រហមកម្ពុជាចូលរួមអបអរសាទរទិវាមនុស្សចាស់កម្ពុជានិងទិវាមនុស្សចាស់អន្តរជាតិ

កក្រក​ ៖ ដើម្បីចូលរួម​អបអរសាទរទិវា​មនុស្សចាស់​កម្ពុជា និងទិវា​មនុស្សចាស់​អន្តរជាតិ ១ តុលា ២០១៨ ក្រោម​ប្រធានបទ "សមាគម​មនុស្សចាស់​ជាយន្តការ​ដ៏សំខាន់ ក្នុងការថែរក្សា​វប្បធម៌​គ្រួសារ និងសង្គមជាតិ" នៅព្រឹកថ្ងៃអង្គារ ៨រោច ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ២ ខែតុលា ឆ្នាំ២០១៨ នេះ កាកបាទក្រហម​កម្ពុជា (ហៅកាត់ថា កក្រក) ដែលមាន​សម្តេចកិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ជាប្រធាន​ បានរៀបចំ​ឱ្យមានពិធីជួបជុំ​និងសំណេះ​សំណាលជា​មួយព្រឹទ្ធាចារ្យ ជានិវត្តជនចំនួន ៥៨នាក់ ដែលធ្លាប់​បម្រើការងារ​មនុស្សធម៌យ៉ាង​សកម្មជាមួយ​កាកបាទក្រហម​កម្ពុជានាពេលកន្លងមក ហើយដែល​ពិធីនេះប្រព្រឹត្ត​ទៅនៅភោជនីយដ្ឋាន​ឡឺប្រេស៊ីដង់​ រាជធានីភ្នំពេញ។

 

បន្ទាប់ពីការអានជូននូវសារលិខិត​របស់សម្តេចអគ្គមហាសេនា​បតីតេជោ ហ៊ុន សែន នាយក​រដ្ឋមន្ត្រី ក្នុងឱកាសទិវាមនុស្ស​ចាស់កម្ពុជា និងទិវា​មនុស្សចាស់​អន្តរជាតិ ១ តុលា ២០១៨ ដោយលោក​ជំទាវ ម៉ែន នារីសោភ័គ​ អគ្គលេខាធិការ​រងទី ១ រួចមក លោកជំទាវ ពុំ ចន្ទីនី អគ្គលេខា​ធិការ បានពាំនាំ​ប្រសាសន៍របស់ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំ​ផ្ញើសួរសុខ​ទុក្ខ ការគិតគូរ​ចំពោះគុណ​បំណាច់របស់និវត្តជន​ទាំងអស់ ដែល​ធ្លាប់មាន​អនុស្សាវរីយ៍​ដ៏សែន​កំសត់ និង​ការពុះពារ​គ្រប់ឧបសគ្គ​តាមដងផ្លូវដ៏សែនលំបាក​ ដើរឆ្លងកាត់​ចម្ការមីន កាត់វាល ចូលព្រៃ និងទីជនបទដាច់​ស្រយាល ក្នុងប្រតិបត្តិការមនុស្សធម៌ធំៗកន្លងមក ដើម្បីនាំយក​អំណោយជូន​ដល់ដៃ​ជនរងគ្រោះ។

 

គួររំលឹកថា ការប្រារព្ធទិវានេះ គឺស្របទៅ​នឹងគោលនយោបាយ​របស់រាជរដ្ឋាភិបាល​កម្ពុជា និង​ស្របតាមសេចក្តីសម្រេច​របស់អង្គការ​សហប្រជាជាតិ ដែលបាន​ឆ្លុះបញ្ចាំង​ឱ្យឃើញថា មនុស្សវ័យចាស់ បានបន្សល់​ទុកស្នាដៃ គុណូបការៈ និងការអប់រំ​ប្រៀនប្រដៅ​ប្រកបដោយ​គតិបណ្ឌិត ហើយបាន​ធ្វើឱ្យព្រះរាជាណាចក្រ​កម្ពុជាយើង​មានប្រពៃណី ទំនៀមទម្លាប់ដ៏ល្អ កេរមរតកសម្បត្តិ​វប្បធម៌ដែល​សម្បូណ៌បែប និងសមិទ្ធផល​ទាំងឡាយ ត្រូវបានរក្សា​គង់វង្សរហូតដល់សព្វថ្ងៃនេះ។

ជាមួយគ្នានោះ និវត្តជនបានថ្លែងថា ​ទោះបីពួកគាត់​បាន ចូលនិវត្តរ៍​ហើយក្តី តែពួកគាត់​មានមោទនភាព ចំពោះ​វឌ្ឍនភាព និងសមិទ្ធផល​ធំធេងរបស់​កាកបាទក្រហមកម្ពុជា ក្រោមការដឹកនាំ​ប្រកបដោយគតិបណ្ឌិតនៃ​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបាន​ធ្វើឱ្យកាកបាទក្រហមកម្ពុជា ​មានការទទួលស្គាល់​ទាំងថ្នាក់ជាតិ និងនៅលើឆាក​អន្តរជាតិ។

 

ជាចំណងដៃក្នុងឱកាស​ជួបជុំនេះ និវត្តជន​ទាំង ៥៨នាក់ បានទទួល​អំណោយ​មនុស្សធម៌ ក្នុងម្នាក់ៗ ថវិកា ២លាន​រៀល មុងសុវត្ថិភាព​មួយ និងការពិសារ​អាហារ​សាមគ្គីមួយ​ពេលទៀតផង៕

វគ្គបំប៉ន ស្តីពីការផលិតព័ត៌មាន ជូនដល់មន្ត្រីទទួលបន្ទុកព័ត៌មានកាកបាទក្រហមកម្ពុជា

កក្រក​ ៖​ នៅទីស្នាក់ការកណ្តាល​ នាថ្ងៃ​ សុក្រ​ ទី​ ២៨​ ខែ​ កញ្ញា​ ឆ្នាំ២០១៨​ នេះ​ កាកបាទក្រហមកម្ពុជា​ (ហៅកាត់ថា​ កក្រក)​ ដែលមាន​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុន​សែន​ ជាប្រធាន​ បានរៀបចំឱ្យមានវគ្គបំប៉ន​ ស្តីពី​ការផលិតព័ត៌មាន ជូនដល់មន្ត្រីទទួលបន្ទុកព័ត៌មាននៃសាខាទាំង​ ២៥រាជធានី​ ខេត្ត​ សរុបចំនួន​ ៤០នាក់។

បន្ថែមពីលើ​មេរៀនបំប៉ន​ពេញមួយថ្ងៃនេះ​ ក្នុងឱកាសបិទវគ្គនេះ​ លោកជំទាវ​ ម៉ែន​ នារីសោភ័គ​ អគ្គលេខាធិការស្តីទី​ កក្រក​​ បានចង្អុលបង្ហាញ​ និងផ្តល់នូវ​គន្លឹះសំខាន់​ៗទាក់ទង​នឹងរបៀប​នៃការសរសេរអត្ថបទព័ត៌មាន​ និង​ថតរូបភាព​ ឱ្យបានកាន់តែល្អប្រសើរ​ ពេញលេញ​ ខ្លីហើយខ្លឹម​ និងមាន​អត្ថន័យគ្រប់គ្រាន់​ ដែល​សិក្ខាកាម​ទាំងអស់ប្តេជ្ញា​អនុវត្ត​ឱ្យកាន់តែ​មានប្រសិទ្ធភាព​ក្នុងការផ្សព្វផ្សាយ​ទូលំទូលាយដល់​សាធារណជន​ពីសកម្មភាព​មនុស្សធម៌​របស់កាកបាទក្រហម​កម្ពុជា៕

 

សាខាកាកបាទក្រហមកម្ពុជាខេត្តស្វាយរៀង ចុះសួរសុខទុក្ខ ចាស់ជរា កុមារកំព្រា និងគ្រួសារមានជីវភាពខ្វះខាត មកពី ១០ ឃុំ ក្នុងស្រុកស្វាយជ្រំ

សាខាកក្រកខេត្តស្វាយរៀង៖នៅថ្ងៃព្រហស្បតិ៍​ ៣រោជ ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ២៧ ខែ កញ្ញា ឆ្នាំ ២០១៨ នៅទីស្នាក់ការ​អនុសាខា​កាកបាទក្រហម​កម្ពុជា​ស្រុកស្វាយជ្រំ ​ក្រុមការងារសាខា​កាកបាទក្រហមកម្ពុជា​ខេត្តស្វាយរៀង ដឹកនាំដោយ​លោកជំទាវ ដួង វណ្ណា អនុប្រធានកិត្តិយសសាខា​ និងសហការី ​បាននាំយក អំណោយ​មនុស្សធម៌ទៅ​សួរសុខទុក្ខ និងចែកជូន​ចាស់ជរា ៧៣ គ្រួសារ កុមារ​កំព្រា ២ គ្រួសារ និងគ្រួសារ​មានជីវភាព​ខ្វះខាត ៨៨ គ្រួសារ សរុប ១៦៣ គ្រួសារ មកពី ១០ ឃុំ ក្នុងស្រុក​ស្វាយជ្រំ ។


មានប្រសាសន៍សំណេះសំណាល​នាឱកាសនោះ​លោកជំទាវ ដួង វណ្ណា អនុប្រធាន​កិត្តិយសសាខា បានពាំនាំ​នូវសេចក្ដីនឹករលឹក​ពីសំណាក់​សម្ដេចកិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា​ ដែលតែង​តែគិតគូរសុខ​ទុក្ខប្រជាពលរដ្ឋ​ក្រីក្រ ពិសេស ចាស់ជរា​គ្មានទីពឹង ​កុមារកំព្រា ស្រ្តីមេម៉ាយ និងបានផ្ដាំ​ផ្ញើដល់ពួកគាត់​ឲ្យខិតខំថែរក្សា​សុខភាព មាន​អនាម័យក្នុង​ការរស់នៅ ហើយត្រូវប្រកាន់ខ្ជាប់នូវការ​ហូបស្អាត ផឹកស្អាត និង រស់នៅស្អាត ដើម្បីការពារ​ជម្ងឺឆ្លងនានា​ដែលបណ្តាល​មកពីការកង្វះ​អនាម័យ ។


លោកជំទាវបាន​សំណូមពរ​សូមឲ្យបងប្អូន​ដែលរស់នៅក្នុង​សហគមន៍​ទាំងអស់ ត្រូវមាន​ការសាមគ្គីគ្នា ចេះជួយទុក្ខធុរៈ​គ្នាទៅវិញទៅមក និង ជៀសឲ្យឆ្ងាយ​ពីអំពើអសកម្មនានា​ដែលសង្គម​ជាតិស្អប់ខ្ពើម ណែនាំកូនចៅឲ្យគោរព​ច្បាប់ចរាចរណ៍ ជៀសឲ្យ​ឆ្ងាយពីគ្រឿនញៀន​ ដើម្បីឲ្យសហគមន៍​យើងរស់នៅប្រកបដោយភាពសុខដុមរមនា ។ អំណោយដែលចែកជូនទាំង ១៦៣ គ្រួសារ ក្នុង ១ គ្រួសារទទួលបាន អង្ករ ៣០ គ.ក្រ កន្ទេលបត់ ១ មី ១ កេស ត្រីខ ១០ កំប៉ុង ទឹកស៊ីអ៊ីវ ៦ ដប មុង ១ ភួយ ១ ក្រមា ១ សារុង ១ និងថវិកា ៤០.០០០ រៀល ។

កាកបាទក្រហមកម្ពុជា ចុះសួរសុខទុក្ខ ប្រជាពលរដ្ឋរងគ្រោះដោយទឹកជំនន់ មកពីឃុំចំនួន៥ ស្រុកកំពង់លែង ខេត្តកំពង់ឆ្នាំង

កក្រក ៖ នៅព្រឹកថ្ងៃពុធ​ ២កើត ខែភទ្របទ​ ឆ្នាំច សំរឹទ្ធិស័ក ព.ស. ២៥៦២​ ត្រូវនឹងថ្ងៃ​ទី ២៦ ខែ កញ្ញា ឆ្នាំ ២០១៨ នេះ​ កាកបាទក្រហមកម្ពុជា​ ដែលមានសម្ដេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ជាប្រធាន បានចាត់ក្រុមការងារ​ដឹកនាំដោយ​ឯកឧត្តមវេជ្ជ. អ៊ុយ សំអាត នាយក​ នាយកដ្ឋានគ្រប់គ្រង​គ្រោះមហន្តរាយ កាកបាទក្រហមកម្ពុជា​ បន្តបេសកកម្ម​របស់សម្ដេច​ចៅហ្វាវាំង គង់ សំអុល ​អនុប្រធានអចិន្ត្រៃយ៍ ​កាកបាទក្រហមកម្ពុជា​ អញ្ជើញ​ចុះសួរសុខទុក្ខ​ និងនាំយក​អំណោយមនុស្សធម៌​ ជូនប្រជាពលរដ្ឋ​រងគ្រោះដោយទឹកជំនន់ចំនួន ២២១គ្រួសារ មកពីឃុំ​ចំនួន៥ ស្រុក​កំពង់លែង ខេត្តកំពង់ឆ្នាំង។

ក្នុងឱកាសនោះដែរ ឯកឧត្តមវេជ្ជ.​ បានពាំនាំនូវព្រះរាជ​បណ្ដាំរបស់ ព្រះមហាក្សត្រី​ នរោត្តម មុនិនាថ​ សីហនុ ព្រះប្រធានកិត្តិយស និងប្រសាសន៍របស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្ដាំផ្ញើ​សួរសុខទុក្ខ ក្ដីនឹករលឹក​ និងអាណិត​ស្រលាញ់ដ៏ជ្រាលជ្រៅ ​ចំពោះប្រជាពលរដ្ឋ និងសូមផ្ដាំផ្ញើដល់បងប្អូនឲ្យយកចិត្តទុក​ដាក់មើលថែរក្សា​កូនចៅ មាន​អនាម័យក្នុងការរស់នៅ​ ដោយប្រកាន់ខ្ជាប់​នូវ ហូបស្អាត ផឹកស្អាត និង​រស់នៅស្អាត។ សូមប្រជាពលរដ្ឋ​ថែរក្សាទឹកទុក​សម្រាប់ប្រើប្រាស់​នៅរដូវប្រាំង។ ទន្ទឹមនឹងនោះ សូមប្រជាពលរដ្ឋ​រួមគ្នាគោរព​ច្បាប់ចរាចរណ៍ផ្លូវគោក​ និងរាល់ពេលធ្វើដំណើរ​តាមដងផ្លូវ ​ត្រូវមានការប្រុងប្រយ័ត្នខ្ពស់​ ដើម្បីជៀសវាង​គ្រោះថ្នាក់កើត​មានឡើងជាយថាហេតុ។

បងប្អូនប្រជាពលរដ្ឋ​រងគ្រោះទាំងអស់​ មានសេចក្ដីសប្បាយ​រីករាយយ៉ាងខ្លាំង និង​សូមថ្លែងអំណរ​អរគុណយ៉ាងជ្រាលជ្រៅ ចំពោះ​កាកបាទក្រហម​កម្ពុជា ដែលតែង​តែយកចិត្តទុកដាក់​ចំពោះប្រជាពលរដ្ឋ​ក្រីក្រ ជួបការលំបាក ជនងាយ​រងគ្រោះ និងរងគ្រោះ​ដោយសារគ្រោះមហន្តរាយ​ផ្សេងៗ ជាពិសេសគ្រោះ​ទឹកជំនន់នាពេលនេះ ដោយមិនប្រកាន់​វណ្ណៈ ពូជសាសន៍ ពណ៌សម្បុរ ឬនិន្នាការនយោបាយអ្វីឡើយ។

គ្រួសាៗនីមួយៗទទួល​បាន ៖ អង្ករ ៣០គីឡូក្រាម មី ១កេស ត្រីខ ១០កំប៉ុង សារុង១ មុង១ ភួយ១ ក្រមា១ អាវ១ និងថវិកាមួយចំនួន៕

 

វគ្គបណ្តុះបណ្តាលស្តីពី "អនាម័យទឹកស្អាត ក្នុងគ្រោះអាសន្ន "នៅក្រុងព្រះវិហារ

សាខា​កក្រកខេត្ត​ព្រះវិហារ៖នៅព្រឹកថ្ងៃទី១៨ ខែ​កញ្ញា ឆ្នាំ២០១៨ នេះ ឯកឧត្តម យុង គឹមហ៊ាន ​នាយកប្រតិបត្តិ​សាខា​កាកបាទក្រហម​កម្ពុជា ខេត្តព្រះវិហារ និងលោកបណ្ឌិត វ៉ា សុភ័ក្ត្រ ប្រធាន​ការិយាល័យជំងឺ ឆ្លង និងមិនឆ្លង​នាយកដ្ឋានសុខភាព​កាកបាទក្រហម​កម្ពុជា បានបើកវគ្គ​បណ្តុះបណ្តាល​ស្តីពី "អនាម័យទឹកស្អាត ក្នុងគ្រោះអាសន្ន "ជូនដល់អ្នកស្មគ្រ័ចិត្ត​កាកបាទក្រហមភូមិ មកពីសង្កាត់ទាំងពីរ របស់ក្រុងព្រះវិហារ សរុប​ចំនួន ២៥នាក់ ស្រី១៩នាក់ ក្រោមការ​សម្របសម្រួល​ពីមន្ត្រីមកពី​ទីស្នាក់ការ​កណ្តាលកាកបាទក្រហម​កម្ពុជា ដែលមានរយៈ​ ពេល០៣ថ្ងៃ (ចាប់ពីថ្ងៃទី ១៨ ដល់ថ្ងៃទី ២០ ខែកញ្ញា ឆ្នាំ២០១៨) នៅសាលប្រជុំទីស្នាក់ការ​សាខាកាកបាទក្រហម​កម្ពុជា ខេត្តព្រះវិហារ

កាកបាទក្រហម កម្ពុជា បានផ្តល់អំណោយមនុស្សធម៌ ជូនអ្នកស្រី ខាន ចិន្តា ដែលមានជំងឺប្រចាំកាយ

កក្រក ៖ នាព្រឹកថ្ងៃទី ៨កើត ខែភទ្របទ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី ១៧ ខែកញ្ញា ឆ្នាំ២០១៨ នេះ ឯកឧត្តមវេជ្ជ. អ៊ុយ សំអាត​ នាយក នាយកដ្ឋានគ្រប់គ្រងគ្រោះមហន្តរាយ កាកបាទក្រហមកម្ពុជា បានប្រគល់​អំណោយ​មនុស្សធម៌​ ជូនដល់អ្នកស្រី ខាន ចិន្តា អាយុ ៤៣ឆ្នាំ មានជំងឺប្រចាំកាយ មានកូនស្រីម្នាក់ អាយុ ៩ឆ្នាំ មានជីវភាពក្រីក្រ ពុំមានទីលំនៅច្បាស់លាស់ក្នុងរាជធានីភ្នំពេញ ចង់ត្រលប់​ទៅស្រុកកំណើត​វិញនៅឯភូមិវិហារសួគ៌​ខាងជើង ឃុំវិហាសួគ៌ ស្រុកខ្សាច់កណ្ដាល ខេត្តកណ្ដាល។

ក្នុងឱកាសនោះដែរ​ ឯកឧត្តមវេជ្ជ. ក៏បានលើកទឹក​ចិត្តដល់អ្នកស្រី សូមកុំអស់សង្ឃឹម ត្រូវយកចិត្តទុកដាក់​ថែរក្សាសុខភាព​ឲ្យបានល្អ មានអនាម័យ​ក្នុងការរស់នៅ ដោយប្រកាន់​ខ្ជាប់នូវ ហូបស្អាត ផឹកស្អាត និងរស់នៅ​ស្អាត ហើយ​ខិតខំ​ប្រករបររក​ស៊ីចិញ្ចឹមជីវិត។

អំណោយ​ដែលបាន​ផ្ដល់ជូនរួមមាន ៖ អង្ករ ៣០គីឡូក្រាម មី ១កេស ត្រីខ ១០កំប៉ុង សារុង១ ភួយ១ មុង១ ក្រមា១ និងថវិកាមួយចំនួន៕

 

លោកជំទាវ ម៉ែន នារីសោភ័គ ជួបសំណេះសំណាល គណៈប្រតិភូសហព័ន្ធអន្តរជាតិនៃសមាគមកាកបាទក្រហម និងអឌ្ឍចន្ទក្រហម

កក្រក ៖ នៅទីស្នាក់ការ​កណ្តាល នាថ្ងៃចន្ទ ៨កើត ខែភទ្របទ ឆ្នាំច សំរឹទ្ធស័ក ព.ស.២៥៦២ ត្រូវនឹងថ្ងៃទី ១៧ ខែកញ្ញា ឆ្នាំ២០១៨ នេះ ​លោកជំទាវ​ ម៉ែន នារីសោភ័គ​ អគ្គលេខាធិការ​ស្តីទី កាកបាទ​ក្រហមកម្ពុជា ​បានទទួល​ស្វាគមន៍ និងជួបសំណេះសំណាល​ គណៈប្រតិភូ​សហព័ន្ធ​អន្តរជាតិ​នៃសមាគមកាកបាទក្រហម​ និង​អឌ្ឍចន្ទក្រហម (សហព័ន្ធអន្តរជាតិ) ចំនួន ៩នាក់ ដែល​ដឹកនាំដោយ​ លោកស្រី Nancy Claxton មន្ត្រីជាន់ខ្ពស់​ផ្នែកលើកកម្ពស់​សុខភាព​សហគមន៍​និងសង្គ្រោះបឋម​នៃសហព័ន្ធអន្តរជាតិ ប្រចាំទីក្រុងហ្សឺណែវ ​ប្រទេសស្វីស។

ក្នុងពេលជួប​សំណេះសំណាល​ជាមួយ​គណៈប្រតិភូ​ លោកជំទាវ​អគ្គលេខាធិការស្តី​ទី បានពាំនាំប្រសាសន៍ផ្តាំ​សួរសុខទុក្ខពី​សំណាក់ សម្តេចកិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ​ជូនគណៈប្រតិភូ​ដែលបានអញ្ជើញ​ជួបសម្តែងការ​គួរសមក្នុង​គោលបំណង​រាយការណ៍ពីបេសកកម្ម​របស់គណៈប្រតិភូ​រយៈពេលជាងដប់ថ្ងៃ​នៅក្នុងប្រទេសកម្ពុជា​ ក្នុងការសាកល្បង​អនុវត្តឯកសារថ្មី​ ស្តីពី ការងារសុខភាព ​លើកកម្ពស់អនាម័យ ​ទឹកស្អាត វិជ្ជាសង្គ្រោះបឋម​។ល។ ការសាកល្បងអនុវត្ត​ឯកសារថ្មីនេះ ទទួលបាន​ជោគជ័យ និងមានសារៈសំខាន់​សម្រាប់កាកបាទក្រហម​កម្ពុជា និងសមាគមជាតិ​ដទៃទៀត សម្រាប់​អប់រំ ផ្សព្វផ្សាយ​ជូនដល់ប្រជាពលរដ្ឋ​នៅតាម​សហគមន៍។

លោកស្រី Nancy Claxton បានថ្លែងអំណរគុណ​ដល់កាកបាទក្រហម​កម្ពុជា ដែលបាន​ចែករំលែកនូវបទពិសោធន៍​ការងារក្នុង​ការអប់រំ ផ្សព្វផ្សាយ លើកកម្ពស់​សុខុមាលភាព​របស់ប្រជាពលរដ្ឋ​ ជូនដល់សមាគមជាតិ​ដទៃទៀតនៅ​ក្នុងតំបន់ និងបានថ្លែង​អំណរគុណ​ចំពោះថ្នាក់ដឹកនាំ​កាកបាទក្រហមកម្ពុជា ដែលបានឯកភាព​បញ្ជូនមន្ត្រី​ជំនាញឱ្យទៅ​ជួយប្រទេសហ្វី​លីពីន ក្នុងការសាកល្បង​អនុវត្តឯកសារ​ស្តីពីការងារ​សុខភាព​ខាងលើនេះ។ លោកស្រី បានបន្តថា កាកបាទ​ក្រហមកម្ពុជា ​គឺជាដៃគូកិច្ច​សហប្រតិបត្តិការដ៏ល្អជាមួយ​សហព័ន្ធ​អន្តរជាតិ ក៏ដូចជា​សមាគមជាតិ​កាកបាទក្រហម​ អឌ្ឍចន្ទក្រហម ​ដទៃទៀត៕

កាកបាទក្រហមកម្ពុជា ផ្តល់មុងជូនសាខាកាកបាទក្រហមកម្ពុជាខេត្តព្រះសីហនុ

ខេត្តក្រុង​ព្រះសីហនុ៖ នៅថ្ងៃ សៅរ៍ ៦កើត ខែភទ្របទ​ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ១៥ ខែ កញ្ញា ឆ្នាំ ២០១៨ លោកជំទាវ​ ម៉ែន នារីសោភ័គ ​អគ្គលេខាធិការងទី ១ កាកបាទក្រហម​កម្ពុជាបានប្រគល់មុង​សុវត្ថិភាពចំនួន​ ៦០០ មុង និងអាវ ​២០កេស ជូនដល់​សាខា​កាកបាទក្រហមកម្ពុជា​ខេត្តព្រះសីហនុ (ជាខេត្តទី២៥នៃ​បេសកកម្ម​ចែកមុង​សុវត្ថិភាព ជូនសាខា) ដើម្បីបន្តជួយ​ដល់ប្រជាពលរដ្ឋងាយរង​គ្រោះបំផុត ប្រឈមជម្ងឺ​គ្រុនឈាម ​និងគ្រុនចាញ់ ។

សូមបញ្ជាក់ថា​ មុងសុវត្ថិភាព​ជាអំណោយរបស់​ សាខាកាកបាទក្រហមចិន​ ខេត្តក្វាងស៊ី​ ដែលបានផ្តល់ជូន​កាកបាទក្រហមកម្ពុជា​ ចំនួន​ ២០.០០០មុង​ កាលពីថ្ងៃទី​ ២២​ ខែសីហា​ ឆ្នាំ២០១៨​ កន្លងទៅ​ ត្រូវបាន​កាកបាទក្រហម​កម្ពុជា​ ប្រគល់ជូនសាខា​កាកបាទក្រហម​កម្ពុជា​ ទាំង​ ២៥រាជធានី​ ខេត្ត​ រួចគ្រប់​ចំនួនហើយ៕

 

1 2 3 4 5 Next Last