អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
ដំណឹងសួរកបង-ប្អូន

ដំណឹងសួរកបង-ប្អូន

កាកបាទក្រហមកម្ពុជា បានទទួលពាក្យសុំស្រាវជ្រាវរកគ្រួសារ ដែលមានខ្លឹមសារដូចខាងក្រោម៖

នាងខ្ញុំឈ្មោះ សូត្រ ពៅ ភេទស្រី អាយុ ៤៨ឆ្នាំ សូមសួររកបងស្រីបងបង្កើតឈ្មោះ សូត្រ សើ ហៅ រី អាយុ ៥៧ ឆ្នាំ មុខរបរមុនបែក សិល្បៈតំបន់ មានឪពុកឈ្មោះ ស៊ុប សូត្រ ម្តាយឈ្មោះ គុច យ៉ាន មានបងប្អូនចំនួន៩នាក់ ដែលមានរាយនាមដូចខាងក្រោម៖

១. ឈ្មោះ សូត្រ សន ភេទ ស្រី អាយុ៦៩ឆ្នាំ ស្លាប់,

២. ឈ្មោះ សូត្រ ហុង ភេទស្រី អាយុ ៦៦ ឆ្នាំ

៣. ឈ្មោះ សូត្រ សូយ ភេទស្រី អាយុ ៥៩ឆ្នាំ (រស់)

៤.ឈ្មោះ សូត្រ សើ ភេទស្រី អាយុ៥៧ឆ្នាំ(បាត់ខ្លូន)

៥. ឈ្មោះ សូត្រ បូ ភេទប្រុស អាយុ៥៦ឆ្នាំ (រស់)

៦.ឈ្មោះសូត្រ ស៊ីម ភេទស្រី អាយុ ៥៦ឆ្នាំ (រស់)

៧.ឈ្មោះ សូត្រ សឹម ភេទស្រី អាយុ ៤៩ឆ្នាំ (រស់)

៨.ឈ្មោះសូត្រ ពៅ អាយុ ៤៨ឆ្នាំ (រស់)

៩.ឈ្មោះសូត្រ ប៊ន ភេទប្រុស អាយុ៤២ឆ្នាំ(ស្លាប់)

ទីកន្លែងកំណើត ភូមិត្រពាំងក្តុល ឃុំត្រាចទង់ ស្រុកឧត្តុង ខេត្តកំពង់ស្ពឺ អាស័យដ្ឋានចុងក្រោយ រស់នៅភូមិអន្លង់ជ្រែ ឃុំ ប្រាំបីមុំ ស្រុកថ្ពង់ ខេត្តកំពង់ស្ពឺ។ កាលពីឆ្នាំ 1979 ខ្មែរក្រហមបានជម្លៀស​គាត់ឡើងភ្នំ មានគេឃើញគាត់ហើមជើងនៅលើភ្នំ ចុះមកវិញជាមួយគេមិនរួច ហើយបាត់ដំណឹង​តាំងពីពេលនោះមក។ សព្វថ្ងៃមិនដឹងរស់នៅទីណា បើបងប្អូនណា​បានស្គាល់រឺមានដំណឹង​ពីបុគ្គល​ត្រូវរកសូមមេត្តា ជួយផ្តល់​ដំណឹងដល់ទីស្នាក់ការកាកបាទក្រហមកម្ពុជា នៅតាម ខេត្ត-រាជធានី ដែលនៅជិតលោកអ្នកដោយក្តីអនុគ្រោះ។

ប្រសិនជាបង-ប្អូនណាមានមានដំណឹង ឬស្គាល់ឈ្មោះដែលរកដូចខាងលើ​អាចទាក់ទង់​មកលេខទូរស័ព្ទលេខ 023 881 511 012 229 191 និង 016 777 158។ #CRCRFL_TR:004/17

 

៨ ឧសភា ២០១៨

សេចក្តីប្រកាសព័ត៌មាន

ស្តីពី

ការប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៨

 

jQuery Carousel
ព័ត៌មានថ្មីៗ

សាខាកាកបាទក្រហមកម្ពុជា ខេត្តកណ្តាល រៀបចំ ព្រះរាជពិធីបុណ្យចម្រើនព្រះជន្ម សម្តេចម៉ែ

សាខា កក្រក ខេត្តកណ្តាល ៖រសៀល​ថ្ងៃពុធ ១កើត ខែអាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី​ ១៣ ខែ មិថុនា ឆ្នាំ២០១៨ សាខា​កាកបាទក្រហមកម្ពុជា​ខេត្តកណ្តាល​ បានរៀបចំ​ពិធីសូត្រមន្ត​ចម្រើន​ព្រះជន្មថ្វាយ សម្តេចព្រះមហាក្សត្រី ​នរោត្តម មុនិនាថ សីហនុ ព្រះវររាជមាតា​ជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល​ ព្រះប្រធានកិត្តិយស​កាកបាទក្រហម​កម្ពុជា នៅទីស្នាក់ការ​សាខាកាកបាទក្រហម​កម្ពុជាខេត្តកណ្តាល ។ ពិធីនេះមានកិត្តិយស​ដោយបានការអញ្ជើ​ញចូលរួមពី ឯកឧត្តម នួន ផា អនុប្រធានកិត្តិយសសាខា តំណាងឯកឧត្តមបណ្ឌិត ម៉ៅ ភិរុណ ប្រធានកិត្តិយសសាខា ព្រមទាំងមានការនិមន្ត និងអញ្ជើញចូលរួមពីព្រះសង្ឃចំនួន ៩ អង្គ លោកជំទាវភរិយាថ្នាក់ដឹកនាំខេត្ត គណៈអភិបាលខេត្ត សមាជិកសមាជិកាគណៈកិត្តិយសសាខា គណៈកម្មាធិការសាខា ថ្នាក់ដឹកនាំ មន្ទីរអង្គភាពជុំវិញខេត្ត អនុសាខាកាកបាទក្រហម​កម្ពុជាក្រុង​តាខ្មៅ យុវជនកាកបាទក្រហមកម្ពុជា និង តាជី​យាយជី​ជាពុទ្ធបរិស័ទ ប្រមាណជាង ៧០ អង្គ/នាក់ ។

 

ក្នុងឱកាសដ៏នក្ខត្តឫក្ស​នៃពិធីបុណ្យចម្រើន​ព្រះជន្មវស្សាថ្វាយ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតា​ជាតិខ្មែរ ព្រះប្រធានកិត្តិយស​កាកបាទក្រហមកម្ពុជា តាំងនាមទូលព្រះបង្គំ ខ្ញុំម្ចាស់ជាប្រធាន អនុប្រធាន​គណៈកិត្តិយស​សាខា សមាជិក​សមាជិកាគណៈកម្មាធិការសាខា អនុសាខាកាកបាទក្រហម កម្ពុជា​គ្រប់ស្រុក-ក្រុង មន្ត្រី បុគ្គលិក​ក្រុមប្រតិបត្តិសាខា ក្រុមកាកបាទក្រហម​ឃុំ/សង្កាត់ អ្នកស្ម័គ្រចិត្ត​កាកបាទក្រហម យុវជនកាក បាទក្រហមកម្ពុជាទូទាំង​ខេត្តកណ្តាល ទូលព្រះបង្គំយើងខ្ញុំទាំងអស់គ្នា សូមព្រះបរមរាជានុញ្ញាត​ដ៏ខ្ពង់ ខ្ពស់បំផុត លំឱនកាយ​លើកហត្ថប្រណម្យ​បួងសួងដល់គុណបុណ្យព្រះរតនត្រ័យ តេជះបារមីនៃទេវតាថែ រក្សាព្រះមហាស្វេតច្ឆ័ត្រ និងគុណបារមីនៃអតីតព្រះមហាក្សត្រ ព្រះមហាក្សត្រីយានីខ្មែរគ្រប់ព្រះអង្គ សូមព្រះមេត្តាប្រទានព្រះពរជ័យ សិរីមង្គលបវរមហាប្រសើរថ្វាយ សម្តេចព្រះមហាក្សត្រីព្រះវរ រាជមាតា ជាតិខ្មែរក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយស កាកបាទក្រហមកម្ពុជា ជាទីសក្ការៈដ៏ខ្ពង់ខ្ពស់បំផុត សូមព្រះអង្គប្រកបតែនឹងព្រះបរមសុខគ្រប់ ប្រការ ​ដើម្បីគង់ប្រថាប់​ជាម្លប់ដ៏ត្រជាក់​ត្រជុំ ជាទីជ្រកកោន​របស់ប្រជារាស្ត្រ​ទូទាំងព្រះរាជាណាចក្រ កម្ពុជា រស់នៅ​ដោយទទួល​បានសេចក្តីសុខសន្តិភាព​សុភមង្គល និងការអភិវឌ្ឍន៍​រីកចម្រើន​ថ្កុំថ្កើងរុងរឿង ជានិច្ចនិរន្តរ៍​តរៀងទៅ ៕

 

សាខាកាកបាទក្រហមកម្ពុជា ខេត្តកែប រៀបចំ ព្រះរាជពិធីបុណ្យចម្រើនព្រះជន្ម សម្តេចម៉ែ

សាខាកក្រកខេត្តកែប ៖ នៅព្រឹកថ្ងៃ ពុធ ១កើត ខែ បឋម​សាឍ ឆ្នាំច សំរឹទ្ធស័ក ព.ស.២៥៦២ ត្រូវនឹងថ្ងៃទី ១៣ ខែ មិថុនា ឆ្នាំ ២០១៨ សាខាកាកបាទក្រហម​កម្ពុជា ខេត្តកែប បានរៀបចំ​ពិធីសូត្រមន្ត ចម្រើនព្រះបរិត្ត និងរាប់បាត្រ​ព្រះសង្ឃជា​ច្រើនអង្គ ក្នុងឱកាសព្រះរាជ​ពិធីបុណ្យចម្រើន​ព្រះជន្ម សម្តេចព្រះមហាក្សត្រី នរោត្ដម​ មុនិនាថ សីហនុ ព្រះវររាជ​មាតាជាតិខ្មែរ និងជាព្រះប្រធាន​កិត្តិយស កាកបាទក្រហមកម្ពុជា ជាទីសក្ការៈដ៏ខ្ពង់ខ្ពស់​ក្នុងទិវាព្រះរាជ​ពិធីបុណ្យចម្រើន​ព្រះជន្មវស្សាគម្រប់ ៨២ យាងចូល ៨៣ព្រះវស្សា ត្រូវនឹងថ្ងៃទី ១៨ ខែ មិថុនា ឆ្នាំ ២០១៨ ខាងមុខ។

 

ពិធីនេះដែរ ប្រារព្ធឡើងក្រោម​អធិបតីភាព ឯកឧត្តម កែន សត្ថា ប្រធាន​គណៈកម្មាធិការ​សាខា​កាកបាទក្រហមកម្ពុជា ខេត្តកែប ដែលមាន​ការអញ្ជើញ​ចូលរួមពី ឯកឧត្តម លោកជំទាវ លោក លោកស្រី ជាសមាជិក សមាជិកា​គណៈកម្មាធិការសាខា ក្រុមប្រតិបត្តិ​សាខា អនុសាខា អង្គភាព​ជុំវិញខេត្ត ព្រះសង្ឃ មន្រ្តីរាជការ អ្នកស្ម័គ្រចិត្ត យុវជ​នកាកបាទក្រហម​កម្ពុជា ជាច្រើន​អង្គ នាក់ ដែលប្រព្រឹត្ត​ទៅនៅ​សាលប្រជុំសាលា​ខេត្តកែប៕

 

កាកបាទក្រហមកម្ពុជាចុះសួរសុខទុក្ខ និងឧបត្ថម្ភ ថវិកា គ្រឿងឧបភោគ-បរិភោគ សម្ភារប្រើប្រាស់ ជូនដល់កុមារខ្សោយសតិបញ្ញា កុមារពិការ កុមារផ្ទុកមេរោគអេដស៍ កុមារកំព្រា នៅ សង្កាត់ចោមចៅ

កក្រក​ ៖ ដើម្បីអបអរខួបលើកទី​ ៦៩​ ទិវាកុមារអន្តរជាតិ​ ១​ មិថុនា​ និងខួបលើកទី១៧​ ទិវាពិភពលោកប្រឆាំងពលកម្មកុមារ​ ១២​ មិថុនា​ និងទិវាកុមារកម្ពុជា​ ឆ្នាំ២០១៨​ នៅព្រឹកថ្ងៃពុធ​ ១កើត​ ខែបឋមាសាឍ​ ឆ្នាំច​ សំរឹទ្ធិស័ក​ ព.ស.២៥៦២​ ត្រូវនឹងថ្ងៃទី ១៣​ ខែមិថុនា​ ឆ្នាំ២០១៨ នេះ កាកបាទក្រហមកម្ពុជា (កក្រក)​ ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចាត់ឱ្យមន្ត្រីចុះសួរសុខទុក្ខ​ និងឧបត្ថម្ភ​ ថវិកា គ្រឿងឧបភោគ-បរិភោគ​ សម្ភារប្រើប្រាស់​​ និងរៀបចំអាហារថ្ងៃត្រង់ ជាលើកទី​ ៣​ ចាប់ពីឆ្នាំ២០១៦​ ជូនដល់កុមារខ្សោយសតិបញ្ញា កុមារពិការ កុមារផ្ទុកមេរោគអេដស៍ កុមារកំព្រា​ គ្រូ​-បុគ្គលិក​ និងអ្នកស្ម័គ្រចិត្តបរទេស​ សរុបចំនួន​ ២២៤នាក់​ នៃបុរីទារក​ និងកុមារជាតិ​ ដែលមានទីតាំងស្ថិតនៅ ភូមិគោកចំបក​ សង្កាត់ចោមចៅ​ ខណ្ឌដង្កោ រាជធានីភ្នំពេញ។

 

ក្នុងឱកាសសំណេះសំណាល​នោះ លោកជំទាវ ពុំ​ ចន្ទីនី​ អគ្គលេខាធិការ​ កក្រក បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើការសួរ​សុខទុក្ខ ក្តីអាណិត ស្រឡាញ់ប្រកបដោយមនោសញ្ចេតនាយ៉ាងជ្រាលជ្រៅ​ ចំពោះកុមារ​ទាំងអស់​ និងថ្លែងនូវការកោតសរសើរចំពោះទឹកចិត្តដ៏ថ្លៃថ្លា​របស់គ្រូ-បុគ្គលិក​ អ្នកស្ម័គ្រចិត្ត ដែលបាន​យកអស់កម្លាំងកាយ-ចិត្ត​ រួមចំណែកលើកកម្ពស់តម្លៃមនុស្សធម៌​របស់មនុស្សជាតិ​ ពិសេសជួយឱ្យកុមារ​ពិការខ្សោយសតិបញ្ញា​ទាំងអស់​ បានរស់នៅប្រកបដោយសេចក្តីថ្លៃថ្នូរ​ មានការចិញ្ចឹមបីបាច់​ ផ្តល់ភាពកក់ក្តៅ​ ផ្តល់ការអប់រំ​ ការបណ្តុះបណ្តាលសិល្បៈ​។ល។

 

ជាមួយគ្នានោះ​ លោកស្រី​ ថោ​ ពៅ ប្រធានបុរីទារក​ និងកុមារជាតិ បានសម្តែងនូវការដឹងគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែគិតគូរពីសុខទុក្ខ ផ្តល់ភាពកក់ក្តៅ​ ភាពស្និទ្ធស្នាល​ ក្តីអាណិតស្រឡាញ់​ លើកទឹកចិត្ត​ ហើយបានឧបត្ថម្ភ​ជាបន្តបន្ទាប់​ចាប់តាំងពីឆ្នាំ​ ២០១៦​ និងសូមជូនពរដល់ សម្តេច​កិត្តិព្រឹទ្ធបណ្ឌិត មានសុខភាពល្អ ​កម្លាំងមាំមួន អាយុយ៉ឺនយូរ ដើម្បីនៅជាម្លប់ និងផ្តល់ក្តី​សង្ឃឹម ដល់ជនរងគ្រោះ​ និងងាយរងគ្រោះបំផុត។

 

សូមបញ្ជាក់ថា​​ អំណោយប្រគល់ជូនបុរីទារកនិងកុមារជាតិ​ រួមមាន​ ៖​ អង្ករ​ ២តោន​​ មីយើង​ ៤០កេស​ ត្រីខ​ ៨កេស​ (ស្មើ​ ៨០០កំប៉ុង)​ ទឹកក្រូច​ ១៥កេស​ ទឹកសុទ្ធ​ ១៥កេស​ ទឹកត្រី​ ២៤ដប​ ទឹកស៊ីអ៊ីវ​ ២៤ដប​ ប្រេងឆា​ ២៤ដប​ ម្សៅកូដូម៉ូ ៥កេស​ (ស្មើ​ ៣៦០កំប៉ុង​) ផ្លែប៉ោម​ ២កេស​ នំក្រៀប​ ៨ថង់​ ថវិកា​ ១០លានរៀល​ និងអាហារថ្ងៃត្រង់មួយពេល​ (មាន​ ២៤តុ)។ ដោយឡែក​ សម្រាប់ គ្រូ-បុគ្គលិក​ អ្នកស្ម័គ្រចិត្ត​ ចំនួន​ ៨៤នាក់​ ក្នុងម្នាក់ៗ​ទទួលបាន​ អង្ករ​ ៣០គីឡូក្រាម​ មី​ ១កេស​ ត្រីខ​ ១០កំប៉ុង​ មុង១​ ភួយ១​ សារុង​១​ ក្រមា១​ និងថវិកា​ ១០ម៉ឺនរៀល៕

 

កាកបាទក្រហម កម្ពុជា ផ្តល់ថវិកា គ្រឿងបរិភោគ និងសម្ភារ ជូនបុរសពោះម៉ាយឈ្មោះ ធួក ម៉ៅ

កក្រក​ ៖​ នៅរសៀលថ្ងៃចន្ទ ១៣រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១១ ខែមិថុនា ឆ្នាំ២០១៨ នេះ កាកបាទក្រហម​កម្ពុជា (កក្រក) ដែលមាន សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់ថវិកា គ្រឿងបរិភោគ និង​សម្ភារប្រើប្រាស់​មួយចំនួន ជូនបុរសពោះម៉ាយឈ្មោះ ធួក ម៉ៅ អាយុ ៣៦ឆ្នាំ ដើម្បីសម្រាល​ដល់ការស្នាក់នៅ ក្នុងពេលមើលថែទាំ​កូនតូចអាយុ ៤ឆ្នាំ ដែលនឹងត្រូវវះកាត់ព្យាបាលជំងឺត្បៀតពោះវៀន នៅមន្ទីរពេទ្យ។

ក្នុងឱកាសនោះ​ លោកជំទាវ ម៉ែន នារីសោភ័គ អគ្គលេខាធិការរងទី ១ កក្រក បានពាំនាំប្រសាសន៍របស់ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ដែលផ្តាំផ្ញើ​សួរសុខទុក្ខ និងលើកទឹកចិត្ត​ដល់ លោក ធួក ម៉ៅ ឱ្យបន្តខិតខំ​តស៊ូប្រកបរបរ​ចិញ្ចឹមជីវិត និងមើលថែទាំកូនឱ្យ​បានល្អ អនុវត្តតាម​ការណែនាំរបស់គ្រូពេទ្យ។

លោក ធួក ម៉ៅ បានថ្លែងអំណរគុណ​យ៉ាងជ្រាលជ្រៅ​ចំពោះ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានជួយ​ឧបត្ថម្ភ លើកទឹកចិត្ត និងផ្តល់ក្តីសង្ឃឹមដល់ប្រជាជន​ជួបការលំបាកដោយគ្មានការរើសអើង​អ្វីឡើយ៕

កាកបាទក្រហមកម្ពុជាសម្រេចផ្តល់អណ្តូងស្នប់ ជូនប្រជាពលរដ្ឋខ្វះខាតទឹកប្រើប្រាស់ នៅខេត្តក្រចេះ, ស្ទឹងត្រែង និង ខេត្តមណ្ឌលគិរី

កក្រក​ ៖ ដើម្បីបន្តដោះស្រាយ​តម្រូវការទឹក​នៅតាមទីជនបទ​ដាច់ស្រយាល នៅថ្ងៃទី ៧ ខែមិថុនា ឆ្នាំ២០១៨ នេះ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា បានសម្រេច​ផ្តល់អណ្តូង​ស្នប់ធំ ចំនួន ៤១អណ្តូង គិតជាទឹកប្រាក់​ចំនួន ៩៩.៨៧២ដុល្លារ​អាមេរិក (ប្រាំបួនម៉ឺនប្រាំបួនពាន់ប្រាំបីរយ​ចិតសិប​ពីរដុល្លារអាមេរិក) ជូនប្រជាពលរដ្ឋ​ខ្វះខាត​ទឹកប្រើប្រាស់​ចំនួន ៧៧៣គ្រួសារ ស្មើមនុស្ស ៣.៨៨០នាក់ រស់នៅតំបន់​ដាច់ស្រយាល និងតាមបណ្តោយ​ព្រំដែនកម្ពុជា-ឡាវ ក្នុងនោះ អណ្តូង​ចំនួន ១៥ សម្រាប់ខេត្តក្រចេះ, ១៤អណ្តូង សម្រាប់ខេត្តស្ទឹងត្រែង និង ១២អណ្តូង សម្រាប់ខេត្តមណ្ឌលគិរី។

សូមបញ្ជាក់ថា គិតចាប់តាំង​ពីឆ្នាំ ២០១០ រហូតដល់​បច្ចុប្បន្ននេះ កាកបាទក្រហម​កម្ពុជា បានដោះស្រាយបញ្ហាទឹកស្អាត​ជូនប្រជាពលរដ្ឋ​រាប់ម៉ឺនគ្រួសារ​នៅទូទាំងប្រទេស ក្នុងនោះ បានផ្តល់អណ្តូងទឹកស្អាត (អណ្តូងស្នប់-លូ) ស្រះទឹកសហគមន៍ និងស៊ីទែនទឹក។ល។ ជាក់ស្តែង ក្នុងឆ្នាំ ២០១៧ កន្លងទៅ បានផ្តល់អណ្តូងសរុបចំនួន ៤៣៣ និងជីក-ស្តារស្រះទឹកចំនួន ៧ ដែលជាប្រយោជន៍​សម្រាប់ប្រជាពលរដ្ឋចំនួន ១០.៤៦៩គ្រួសារ។ ដោយឡែក ក្នុងឆមាសទី ១ ឆ្នាំ២០១៨ នេះ កាកបាទក្រហមកម្ពុជា បានប្រគល់អណ្តូង​ឱ្យប្រើប្រាស់​ជាផ្លូវការចំនួន ៦៦ រួចមកហើយ ហើយ​អណ្តូងទាំង ៤១ ដែលសម្រេចផ្តល់​នៅពេលនេះ នឹងធ្វើពិធីប្រគល់​ជាបន្តបន្ទាប់៕

 

គ្រួសារងគ្រោះដោយខ្យល់កន្ត្រាក់ នៅភូមិគូលែនត្បូង ទទួលអំណោយពីសាខាកក្រកខេត្តព្រះវិហារ

សាខាកក្រកខេត្តព្រះវិហារ៖នៅព្រឹកថ្ងៃទី ៧ ខែមីថុនា ឆ្នាំ២០១៨នេះ​លោក រ៉ាត់ សោភា​ អនុប្រធានគណ:កម្មាធិការសាខា​កាកបាទក្រហម​កម្ពុជា ខេត្តព្រះវិហារ រួមជាមួយ​គណ:កម្មាធិការអនុសាខាកាកបាទ ក្រហម​ស្រុកគូលែន បាននាំ​យកអំណោយ​មនុស្សធម៌​ទៅផ្តល់ជូន​ដល់គ្រួសារងគ្រោះ​ដោយខ្យល់កន្ត្រាក់​កាលពីល្ងាចថ្ងៃទី ៦ ខែ មិថុនា ឆ្នាំ ២០១៨ ដែលបណ្តាល​អោយរលំធ្លាក់​ផ្ទះចេញពី ជើងតាងដល់ដី ចំនួន ២ខ្នងផ្ទះ និងរបើកដំបូល ១ខ្នងផ្ទះ សរុបចំនួន ៣ ខ្នងផ្ទះ ឋិត នៅភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ។

ក្នុងឧកាសនោះ​លោក រ៉ាត់ សោភា​ បានពាំនាំនូវ​ប្រសាសន៍​ផ្តាំផ្ញើសាក សួរសុខទុក្ខ​ពីសំណាក់ សម្តេចកិតិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា ដែលលោកតែងតែ​គិតគូរដល់សុខទុក្ខរបស់បងប្អូនគ្រប់ទីកន្លែង ដោយមិន​ប្រកាន់ពូជន៍សាសន៍ ព៍ណ៌សំបូរអ្វីឡើយ ពិសេសបងប្អូនដែលរងគ្រោះដោយគ្រោះថ្នាក់ដូចពេលនេះ ។

សម្ភារដែលផ្តល់​ជូនក្នុងមួយគ្រួសារៗ រួមមាន៖អង្ករ ២៥ គីឡូ មី ១ កេស ត្រីខ ១យួរ និង ទឹកស៊ីអ៉ីវ ១យួរ និងថវិកាមយយចំនួន ដោយ ឡែកគ្រួសារដែលផ្ទះធ្លាក់ពីជើងតាំង ០២ខ្នងផ្ទះ ទទួលបានតង់ ១ និង មុង១ ភួយ១ សារ៉ុង១ ក្រម៉ា១ ។

សាខាកក្រកខេត្តតាកែវ បំពាក់ឯកសណ្ឋានដល់យុវជន កាកបាទក្រហមកម្ពុជាវិទ្យាល័យគិរីវង់

ថ្ងៃអង្គារ ៧ រោច ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ៥ខែមិថុនា ឆ្នាំ ២០១៨ នៅក្នុងបរិវេនវិទ្យាល័យគិរីវង់ ស្រុកគិរីវង់​ ខេត្តតាកែវ មានកម្មវិធីបំពាក់ឯក​សណ្ឋានដល់យុវជន កាកបាទក្រហមកម្ពុជា ស្ថិតក្រោមអធីបតីភាព ឯកឧត្តម អ៊ូច ភា ​ប្រធានកិត្តិយសសាខា​កាកបាទក្រហមកម្ពុជា ខេត្តតាកែវ រួមដំណើរដោយ​លោកជំទាវ​ប្រធានគណៈកម្មាធិការ​សាខា សមាជិក សមាជិការ​គណៈកម្មាធិការសាខា ក្រុមប្រតិបត្តិ​សាខា អនុសាខាស្រុកគិរីវង់ បានបំពាក់​ឯកសណ្ឋាន​ដល់យុវជន​កាកបាទក្រហមចំនួន ២០០នាក់ និងទីប្រឹក្សារ៨នាក់ នាយក៤នាក់ និងមន្ត្រីការិយាល័យស្រុក១នាក់ សរុប២០១៣នាក់ មកពី៤វិទ្យាល័យ គឺ៖វិទ្យាល័យសុខអាន ទន្លាប់ ៥៣នាក់ វិទ្យាល័យសុខអាន សូបិណ៥៣នាក់  វិទ្យាល័យ សុខអាន ភ្នំ៥៣នាក់   និងវិទ្យាល័យ គិរីវង់៥៣នាក់ ដែលបានទទួល​វគ្គបណ្តុះបណ្តាល​មូលដ្ឋានស្តីពី គោលការណ៍គ្រឹះ​ចលនា វិជ្ជាសង្គ្រោះ​បឋម និងគោលនយោបាយ​យុវជន អ្នកស្ម័គ្រចិត្ត​កាកបាទក្រហមកម្ពុជា។
ក្រោយពីបំពាក់​ឯកសណ្ឋានរួច​ក៏បានផ្តល់ថវិកា​សម្រាប់ការធ្វើ​ដំណើរដល់យុវជន​កាកបាទក្រហមទាំង២០១៣នាក់ និងថតរូប​ទុកជាអនុស្សាវរីយ៍ផងដែរ។

កាកបាទក្រហមកម្ពុជា ប្រគល់អំណោយជាថវិកា អង្ករ និងមួកសុវត្ថិភាព ជូនដល់អនុសាខាកាកបាទក្រហមកម្ពុជា ខណ្ឌទាំង ១២ ក្នុងរាជធានីភ្នំពេញ

កក្រក​ ៖ នៅទីស្នាក់ការ​កណ្តាល នា​ព្រឹកថ្ងៃអង្គារ​ ៨កើត​ ខែជេស្ឋ ឆ្នាំច​ សំរឹទ្ធិស័ក​ ព.ស.២៥៦២​ ត្រូវនឹងថ្ងៃទី​ ២២ ខែឧសភា​ ឆ្នាំ២០១៨​ នេះ កាកបាទក្រហម​កម្ពុជា (កក្រក)​ ដែលមាន សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បាន​ប្រគល់អំណោយ​ជាថវិកាចំនួន​ ១២០លានរៀល​ អង្ករចំនួន ១០៨តោន ​និងមួក​សុវត្ថិភាពចំនួន​ ៦០០​ (ជាអំណោយ​ទទួលបានក្នុង​ឱកាសទិវា​ ៨​ ឧសភា​ ២០១៨)​ ជូនដល់​អនុសាខា​កាកបាទក្រហម​កម្ពុជា ខណ្ឌទាំង​ ១២ ក្នុងរាជធានីភ្នំពេញ​ ដោយ​អនុសាខានីមួយៗទទួលបានថវិកា​ ១០លានរៀល​ អង្ករចំនួន ៣០០ការុង ស្មើនឹង ៩តោន​ និងមួកសុវត្ថិភាព​ចំនួន​ ៥០។

 

ក្នុងឱកាសនោះ លោកជំទាវ ពុំ ចន្ទីនី អគ្គលេខាធិការ​កក្រក បានពាំនាំ​នូវប្រសាសន៍​របស់ សម្តេចកិត្តិព្រឹទ្ធបណ្ឌិតប្រធាន ​ដែលផ្តាំ​សួរសុខទុក្ខ និង​កោតសរសើរ​ ដល់អនុសាខា​ខណ្ឌទាំង១២ ដែលតែងតែចុះជួយ​ប្រជាពលរដ្ឋ​ងាយរងគ្រោះបំផុត ​និងអ្នកដែលត្រូវការ​ឱ្យជួយដល់​លំនៅឋាន​ដោយមិនទុកនរណាម្នាក់ចោល​ ក្នុងនោះមាន ​ចាស់ជរាឥតទីពឹង ​ជនពិការ កុមារកំព្រា​ ស្ត្រីមេម៉ាយ អ្នកមាន​ជំងឺរ៉ាំរ៉ៃ អ្នករស់នៅជាមួយ​មេរោគអេដស៍។ល។

 

តំណាង​អនុសាខានីមួយៗ​ បានថ្លែង​អំណរគុណ​យ៉ាងជ្រាលជ្រៅ​ចំពោះសម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ដែលដឹកនាំ​កាកបាទក្រហមកម្ពុជា​ ប្រកបដោយគតិបណ្ឌិត​ ការគិតគូរ​ យកចិត្តទុកដាក់​ តាមដាន​ និងដោះស្រាយភ្លាមៗដល់ទុក្ខលំបាក​របស់ប្រជាពលរដ្ឋ​។​ សម្រាប់អំណោយ​ដែលទីស្នាក់ការកណ្តាលបាន​ផ្តល់ជូនក្នុងថ្ងៃនេះ​ អនុសាខានីមួយៗ នឹងយកទៅ​ចាត់ចែងផ្តល់ជូន​ដល់អ្នកងាយ​រងគ្រោះបំផុត​ក្នុងបូរណភាពទឹកដី​នៃខណ្ឌ​នីមួយៗឲ្យមាន​ប្រសិទ្ធភាព ដោយមិនមាន​ការរើសអើង ប្រកាន់វណ្ណៈ ពូជសាសន៍ ព័ណ៌សម្បុរ ឬនិន្នាការ​នយោបាយអ្វីឡើយ។

 

សូមបញ្ជាក់ជូនថា កាកបាទក្រហម​កម្ពុជា បានផ្តល់​អំណោយ​មនុស្សធម៌ ដល់​អនុសាខាទាំង ១២ខណ្ឌ បានចំនួន ៧លើករួច​មកហើយ ហើយដែល​ថ្ងៃនេះ គឺជាការផ្តល់​ជូនលើកទី ៨​ ពីឆ្នាំ​ ២០១៥៕

 

សាខាកាកបាទក្រហមកម្ពុជា ខេត្តបាត់ដំបង ប្រារព្ធទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ ២០១៨

សាខាកក្រក​ខេត្តបាត់ដំបង៖ នៅព្រឹក​ថ្ងៃទី ២២ ខែ ឧសភា ឆ្នាំ ២០១៨ សាខា​កាកបាទក្រហម​កម្ពុជា ខេត្តបាត់ដំប​ង បានប្រារព្ធ​ទិវាពិភពលោក​កាកបាទក្រហម អឌ្ឍចន្ទក្រហម ៨ ឧសភា ឆ្នាំ ២០១៨ ខួបលើកទី ១៥៥ ក្រោមប្រធានបទ “កាកបាទក្រហម​កម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល”និងបំពាក់ឯកសណ្ឋាន​យុវជនកក្រក​ចំនួន១០០នាក់ ក្រោម​អធិបតីភាព ឯកឧត្តម ងួន រតនៈ​ប្រធានកិត្តិយស​សាខា​ កាកបាទក្រហម​កម្ពុជា ខេត្តបាត់ដំប​ង ឯកឧត្តម អ៊ុយ រី ​អនុប្រធាន​កិត្តិយស​សាខា​ឯកឧត្តម ចន្ទ័ សុផល​ទីប្រឹក្សា​រាជរដ្ឋាភិបាល និងឯកឧត្តមបណ្ឌិត ប៊ុត​គឹមស៊ាន​ប្រធានគណៈកម្មាធិការ​សាខា​ ដោយមាន​ការអញ្ជើញ​ចូលរួមពី ឯកឧត្តម លោកជំទាវ លោកឧកញ៉ា លោក លោកស្រី ​ជាសមាជិក សមាជិកាគណៈកម្មាធិការ​សាខា អនុសាខា ក្រុ​មប្រតិបត្តិសាខា មន្រ្តីរាជការ អង្គភាព​ជុំវិញខេត្ត យុវជន​កាយរិទ្ធិ សសយក យុវជន​កាកបាទក្រហម​កម្ពុជា សប្បុរសជនសរុបចំនួន ៧០០នាក់ ដែលប្រារព្ធ​ឡើងនៅសាលមហោ​ស្រប​ស្ទឹងសង្កែ​ក្រុងបាត់ដំបង។​

 

ទិវានេះប្រព្រឹត្ត​ទៅនៅក្នុងគោលបំណង៖
-រំលឹកដល់ថ្ងៃកំណើតរបស់​លោក ហង់រី ឌុយណង់ ដែលជាស្ថាបនិក​របស់កាកបាទក្រហម
-យល់ដឹងអំពីប្រវត្តិចលនារបស់​កាកបាទក្រហម អឌ្ឍចន្ទក្រហម និងច្បាប់មនុស្សធម៌​អន្តរជាតិ
-កៀរគររកមូលនិធិ​ពីសប្បុរសជន​ទាំងអស់ និងឆ្លើយតបឲ្យបានទាន់ពេលវេលាក្នុងការ​ជួយសង្រ្គោះ និងជនងាយរងគ្រោះ​ផងដែរ។

 

សូមបញ្ជាក់ថា៖ ក្នុងទិវានេះដែរ សាខាកាកបាទក្រហម​កម្ពុជា ខេត្តបាត់ដំបងបាន​ទទួលថវិកា​បណ្តោះអាសន្នពី​សប្បុរសជន​ទាំងអស់​បានចំនួន ១២២​,២១៦ដុល្លា (ដប់ពីម៉ឺនពីរពាន់ពីរយដប់ប្រាំមួយដុល្លារ) សម្រាប់​បន្តបំពេញ​បេសកកម្ម​មនុស្សធម៌​ក្នុងខេត្តបាត់ដំបង​បន្តទៀត៕​

 

សាខាកាកបាទក្រហមកម្ពុជាខេត្តស្វាយរៀង ប្រារព្វ ខួបទី ១៥៥ ទិវាពិភពលោកកាកបាទក្រហម អឌ្ឈចន្ទក្រហម ៨ ឧសភា ២០១៨

សាខាកក្រកខេត្តស្វាយរៀង៖ ថ្ងៃចន្ទ ៧កើត ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ២១ ខែ ឧសភា ឆ្នាំ ២០១៨ នៅសាលប្រជុំ​សាលាខេត្តស្វាយរៀង សាខាកាកបាទក្រហម​កម្ពុជាខេត្តស្វាយរៀង បានប្រារព្វ​អង្គមេទិញ ដើម្បីអបអរ​សាទរខួបទី ១៥៥ ទិវាពិភពលោក​កាកបាទក្រហម អឌ្ឈចន្ទក្រហម ៨ ឧសភា ២០១៨ ក្រោម​ប្រធានបទ កាកបាទក្រហមកម្ពុជា​មានគ្រប់ទីកន្លែង សម្រាប់គ្រប់ៗគ្នា មិនទុក​នរណាមា្នក់​ចោល ។


ពិធីនេះបានការអញ្ជើញ​ចូលរួមពីលោកជំទាវ​កិត្តិសង្គហបណ្ឌិត ម៉ែន សំអន ឧបនាយក​រដ្ឋមន្ត្រី រដ្ឋមន្ត្រីក្រសួងទំនាក់ទំនង​ជាមួយរដ្ឋសភា ព្រឹទ្ធសភា និង អធិការកិច្ច ឯកឧត្តម សៅ សុខា អគ្គមេបញ្ជាការរងកងយោទ្ធពលខេមរភូមិន្ទ និងជាមេបញ្ជារកាកងរាជអាវុធហត្ថលើផ្ទៃប្រទេស លោកជំទាវ ពុំ ចន្ទីនី អគ្គលេខាធិការ កាកបាទក្រហម​កម្ពុជា ឯកឧត្តម ម៉ែន វិបុល អភិបាលខេត្ត និងជាប្រធានគណៈកម្មាធិការសាខា ឯកឧត្តម លោកជំទាវ លោក លោកស្រីជា​ថ្នាក់ដឹកនាំ មន្ត្រីរាជការ បុគ្គលិក​ក្រុមហ៊ុនឯកជននានា សប្បុរសជន ទីប្រឹក្សា និង​យុវជនកាកបាទក្រហម​កម្ពុជា អ្នកស្មគ្រ័ចិត្ត ​ក្រុមកាយរិទ្ធិ សហភាពយុវជន សរុបចំនួន ៤៥០ នាក់ ។ 


លោកជំទាវកិត្តិសង្គហបណ្តិត ម៉ែន សំអន ក្នុងនាមសម្តេចកិត្តិ ព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសំដែងនូវការកោតសរសើរ និងថ្លែងអំណរគុណ ជូនចំពោះឯកឧត្តម លោកជំទាវ លោកឧកញ៉ា លោក លោកស្រី ដែលបានអញ្ជើញចូលរួម និងបានផ្តល់ថវិកា ដ៍សន្ធឹកសន្ធាប់នាពេលនេះ ជាទឹកចិត្តដ៍ប្រពៃ និងថ្លៃថ្លាបំផុត សម្រាប់​សកម្មភាពមនុស្សធម៌​នៅថ្នាក់សាខា ដើម្បីឆ្លើយតបឲ្យបានទាន់ពេលវេលា​ជូនជនរងគ្រោះមហន្តរាយក្នុងខេត្ត ។ ក្នុងអង្គពិធីនេះ សាខាបាន​ទទួលថវិកាមុន និងក្រោយពិធីសរុបចំនួន​ប្រមាណជាង ៥០០.០០០ ដុល្លារ ។

 

1 2 3 4 5 Next Last