Webmail
E-Learning
សាខាកាកបាទក្រហមកម្ពុជា

សាខាកាកបាទក្រហមកម្ពុជា

ពិធីបំពាក់ឯកសណ្ឋានដល់យុវជនកាកបាទក្រហមកម្ពុជានៅវិទ្យាស្ថាន ពហុបច្ចេកទេសភូមិភាគតេជោសែន តាកែវ

ពិធី​បំពាក់​ឯកសណ្ឋាន​ដល់​យុវជន​កាកបាទ​ក្រហម​កម្ពុជា​ចំនួន ១០០នាក់ នៅ​វិទ្យាស្ថាន​ពហុ​បច្ចេកទេស​ភូមិភាគ​តេជោសែន​ខេត្តតាកែវ​នា​រសៀល​ថ្ងៃទី ១២ ខែ មករា ឆ្នាំ ២០១៦ ដោយ​មាន​ការ​ចូលរួម​ពី​សំណាក់​លោកជំទាវ នូ សុវណ្ណនី ប្រធាន​គណៈ​កម្មាធិការ សាខា​កាកបាទ​ក្រហម​កម្ពុជា​ខេត្តតាកែវ ។

 

លោកជំទាវ មាន​មោទនភាព​ណាស់​ដែល ក្មួយៗ​ទាំងអស់​ដែល​បាន​ស្ម័គ្រចិត្ត​ជា​យុវជន​កាកបាទ​ក្រហម​កម្ពុជា​សំដៅ​ជួយ​ដល់​ប្រជាពលរដ្ឋ​ទីទ័លក្រ និង​ជួប​នូវ​បញ្ហា​គ្រោះមហន្តរាយ​ផ្សេងៗ​ដូចជា គ្រោះ​ទឹកជំនន់ ភ្លើងឆេះផ្ទះ ខ្យល់​កន្ត្រាក់​ជាដើម។

 

លោកជំទាវ បាន​បន្ត​ថា យុវជន​ត្រូវតែ​ជា​គំរូ​មួយ​ក្នុង​សកម្មភាព​មនុស្សធម៌ ដែល​ជា​ប្រយោជន៏​ដល់​សង្គម ជា​ពិសេស​ការងារ​មនុស្សធម៌ ដែល​ការងារ​ទាំងអស់​នេះ​វា​បន្ថែម​លើ​ចំណេះដឹង​ដែលក្មួយៗ​បាន​សិក្សា​នៅ​ក្នុង​សាលា។

កាកបាទក្រហមកម្ពុជា ខេត្តព្រៃវែង បានរៀបចំអបអរសាទរទិវា អន្ដរជាតិនៃអ្នកស្ម័គ្រចិត្ត

កាល​ពីថ្ងៃ​ទី៧ ខែ ធ្នូ ឆ្នាំ ២០១៥ សាខាកាកបាទក្រហមកម្ពជា ខេត្តព្រៃវែង បាន​រៀប​ចំអបអរសាទរ​ទិវា​ អន្ដរជាតិ​នៃ​អ្នកស្ម័គ្រ​ចិត្ត​ ក្រោម​ប្រធាន​បទ​ «សំឡេង​អ្នក​ស្ម័គ្រ​ចិត្ត​ឮ​គ្រប់​ទិសទី»​ ដែល​មាន​ការ​ចូល​រួម​ពី គណៈកម្មាធិការ​សាខា​-អនុសាខា​ មន្ដ្រី​ប្រតិបត្តិ​សាខា​ យុវជន​ និង​អ្នក​ស្ម័គ្រ​​ចិត្ត​ មន្ទីរ​ពាក់ព័ន្ធ​ជុំវិញ​ខេត្ត​ សរុប​ចំនួន​ ៣៥០ នាក់។
ពិធី​នេះ​រៀប​ចំ​ឡើង​ក្រោម​អធិបតីភាព​ ឯកឧត្តម​ ហាស់ សារ៉េត ប្រធាន​គណៈ​កម្មាធិការ​សាខា​ ឯកឧត្តម​ យូ ឡាណា អគ្គលេធិការ​រងទី២​ កក្រក កញ្ញា ឡាក់ មុនីរស្មី តំណាង​សហព័ន្ធ​អន្ដរជាតិ​ប្រចាំ​នៅ​កម្ពុជា​ ឯក​ឧត្តមឧក​ញ៉ា​ សុខ ផេង អនុ​ប្រធាន​គណៈ​កម្មាធិការ​សាខា​ និង​លោក ហ៊ឹម សុផល អនុ​ប្រធាន​គណៈកម្មាធិការ​សាខា​។​ ទិវា​នេះ​រៀបចំ​ឡើង​ក្នុង​គោល​បំណង​សម្ដែង​នូវ​ការ​ដឹង​គុណ​ដល់​អ្នក​ស្ម័គ្រ​ចិត្ត​ ក្នុង​ការ​​ខិត​ខំ​​ប្រឹង​ប្រែង​​ទាំង​​កម្លាំង​​កាយ​ចិត្ត​ ប្រាជ្ញា​ ស្មារតី​ ចំណាយ​ធនធាន​ និង​ពេល​វេលា​ ក្នុង​សកម្មភាព​មនុស្សធម៌​ ដែល​ជា​ផ្នែក​មួយ​នៃ​ការ​ជួយ​សម្រាល​ទុក្ខ​លំបាក​ និង​កាត់​បន្ថយ​ភាព​ក្រីក្រ​តាម​មូលដ្ឋាន។​ ជាង​នេះ​ទៅ​ទៀត​នោះ​ ដើម្បី​លើក​ទឹក​ចិត្ត​ និង​ជំរុញ​អោយ​មាន​ការ​ចូល​រួម​កាន់​តែ​សកម្ម​ក្នុង​ការងារ​ស្ម័គ្រចិត្ត​ស្រប​តាម​តម្រូវ​ការ​របស់​សហគមន៍​ និង​សង្គម​ជាតិ​ទាំង​មូល។​
ជា​កិច្ច​ចាប់​ផ្ដើម​នៃ​ទិវា​នេះ​ លោក ហ៊ឹម សុផល អនុ​ប្រធាន​គណៈ​កម្មាធិការ​សាខា បាន​ផ្ដល់​នូវ​មតិ​ស្វាគមន៍​ និ​ង រាយការណ៍​នូវ​សកម្មភាព​សំខាន់ៗ​របស់​អ្នកស្ម័គ្រ​ចិត្ត​ដែល​បាន​អនុវត្ត​ក្នុង​ឆ្នាំ​២០១៥ និង​លើក​ទិស​ដៅ អនុវត្តបន្ដ ឆ្នាំ២០១៦។ ស្ថិត​ក្នុង​ឱកាស​នេះ​ដែរ​ ឯកឧត្តម​ យូ ឡាណា អគ្គលេខាធិការរងទី២​ កាកបាទ​ក្រហម​កម្ពុជា​ ក៏​បាន​ពាំនាំ​នូវការ​សាក​សួរ​សុខ​ទុក្ខ​ពីសំណាក់​ សម្ដេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និង​លើក​បញ្ជាក់​បន្ថែម​ពី​ប្រវត្តិ​នៃ​ការ​កើត​ឡើង​ការងារ​ស្ម័គ្រចិត្ត​នៅ​លើ​ពិភពលោក ពិសេស​សង្កត់​ធ្ងន់​ទៅ​លើ​ការ​ចូល​រួម​ចំណែក​របស់​កាកបាទ​ក្រហម​កម្ពុជា​ ក្នុង​ការ​បង្កើត​បណ្ដាញ​អ្នកស្ម័គ្រ​ចិត្ត​ ដែល​មាន​ការ​កើន​ឡើង​ពី​មួយ​ឆ្នាំ​​ទៅ​មួយ​ឆ្នាំ​ ព្រម​ទាំង​បញ្ជាក់​ពី​សកម្មភាព​យ៉ាង​ផុស​ផុល​មិន​អាច​កាត់​ថ្លៃ​បាន​ ក្រោម​ការ​ដឹក​នាំ​ប្រកប​ដោយ​គ​តិបណ្ឌិត​របស់​ សម្ដេច​ប្រធាន​។ ស្រប​ជា​មួយ​គ្នា​នោះ​ដែរ​ ឯកឧត្ត​ម​ ហាស់ សារ៉េត ប្រធាន​គណៈកម្មាធិការ​សាខា​ ក៏​បាន​សម្ដែង​ នូវ​ក្ដី​សោមនស្ស​រីករាយ​ក្រៃ​លែង​ដែល​សាខា​មាន​កិត្តិយស​ សហកា​ជា​មួយ​កាកបាទ​ក្រហម​កម្ពុជា​ ថ្នាក់​កណ្ដាល​ ក្នុង​ការរៀបចំ​ទិវា​អន្ដរជាតិ​នៃ​អ្នកស្ម័គ្រ​ចិត្ត​ដ៏​មាន​សារៈ​សំខាន់​នេះ​។ លើស​ពីនេះ​ទៅ​ទៀត​នោះ​ ក្នុង​នាម​ថ្នាក់​ ដឹក​​នាំ​សាខា​ ឯកឧត្តម​ ក៏បានបេ្ដជ្ញាចិត្តជំរុញ និងលើកទឹកចិត្តដល់យុវជន និងអ្នកស្ម័គ្រចិត្ត នៅតាមមូលដ្ឋាន ទាំង ១៣ ក្រុង ស្រុក ក្នុងការបំពេញសកម្មភាពមនុស្សធម៌ក្រោមការដឹកនាំដ៏ត្រឹមត្រូវរបស់មាតាមនុស្សធម៌។ បន្ទាប់ពីនោះ តំណាងអ្នកស្ម័គ្រចិត្ត ១ រូបបានឡើងរៀបរាប់ពីសកម្មភាពអ្នកស្ម័គ្រចិត្ត ដែលបានអនុវត្តន៍កន្លងមកក៍ដូចជាពេលបច្ចុប្បន្នដោយបានលើកឡើងពីតួនាទី និងការទទួលខុសត្រូវរបស់ពួកគាត់។តំណាងអ្នកស្ម័គ្រចិត្ត ក៍បានបង្ហាញពីសុឆន្ទៈក្នុងការបំផុស នូវភាពក្លា​ហាន​របស់​អ្នក​ស្ម័គ្រ​ចិត្ត ក៍ដូចជាយុវជន ក្នុងការឆ្លើយសំណួរយករង្វាន់។
ស្ថិតក្នុងបរិយាសនេះដែរ ដើម្បីជាការលើកទឹកចិត្ត និងយកចិត្តទុកដាក់ខ្ពស់ពី សម្ដេចកិត្តិព្រឹទ្ធបណ្ឌិតប្រធានកាកបាទក្រហម្ពុជា គណៈអធិបតីក៏បាន ប្រគល់ប័ណ្ណសរសើរដែលមានចុះហត្ថលេខារបស់សម្ដេចប្រធាន ជូនដល់អ្នកស្ម័គ្រចិត្ត​ដែលបាន​បម្រើ​ការងា​រតាំងពីឆ្នាំ១៩៩៩ មកចំនួន ១៣៥ នាក់ ជាមួយគ្នានេះដែរ ក្រុមការងារថ្នាក់កណ្ដាលក៍បានយកនូវកញ្ចប់សម្ភារៈ និងថវិកាលើកទឹកចិត្តជូនដល់ យុវជន និងអ្នកស្ម័គ្រចិត្តសរុបប្រមាណ ៣០១ នាក់ ដែលក្នុងម្នាក់ៗទទួលបានឃីត១ (មុង១ ភួយ១ សារុង១ ក្រមា១) និងថវិកា ៥ ម៉ឺនរៀលដែលជាអំណោយរបស់សម្ដេចកិត្តិព្រឹទ្ធបណ្ឌិតប្រធានកាកបាទក្រហម្ពុជា។
 

ពិធីបំពាក់ឯកសណ្ឋានជូនដល់យុវជនអនុសាខាកាកបាទក្រហមកម្ពុជាសំរោងទង

ចុងសប្តាហ៍ថ្មីៗនេះនៅបរិវេណសាលាស្រុកសំរោងទង សាខាកាកបាទក្រហមកម្ពុជាខេត្តរៀបចំបំពាក់ឯកសណ្ឋានជូនយុវជនកាកបាទក្រហម ក្រោមអធិបតីភាព ឯកឧត្តម តុង សេង ប្រធានគណៈកម្មាធិការសាខា និងមានការចូលរួមពីសមាជិកកិតិយសសាខា និងសមាជិកគណៈកម្មាធិការសាខា អនុសាខា ទីប្រឹក្សា យុវជន ព្រមទាំងយុវជន ចូលរួមសរុបចំនួន១៥៦ នាក់។
 
ក្រោយពីលោកស្រី យ៉ាវ ចនចាន់វច្ឆិកា ប្រធាន អនុសាខា បានអានរបាយការណ៍ស្វាគមន៍ រួចមក។ លោក ហង្ស រតនៈ ប្រធានរដ្ឋបាលស្រុក បានអានប្រកាសទទួលស្គាល់ ទីប្រឹក្សាយុវជន និងយុវជនកាកបាទក្រហមកម្ពុជា អនុសាខា  ទាំង៣ សាលាគោលដៅ របស់ស្រុកសំរោងទង និង ការប្តេជ្ញាចិត្តរបស់តំណាងយុវជនរួចមក ។
 
ឯកឧត្តម តុង សេង មានប្រសាសន៍ថា៖ នៅគ្រប់សម័យកាល គ្រប់សង្គម យុវជនជាកម្លាំងដ៏មុតស្រួច ប្រកប ដោយ កម្លាំងកាយ ប្រាជ្ញាស្មារតីភ្លឺស្វាង និងមានទឹកចិត្តក្លាហានមោះមុតពុះពារគ្រប់ឧបសគ្គ ទុក្ខលំបាកដោយមិនរា រែក ដែលលក្ខណៈពិសេសទាំងនេះ បានធ្វើអោយយុវជនក្លាយជាធនធានដ៏មានតម្លៃមិនអាចខ្វះបានឡើយ នៅក្នុង ចលនាកាកបាទក្រហម និងអឌ្ឍចន្ទក្រហម សម្រាប់បំពេញបេសកម្មយ៉ាងសកម្ម នៅពាសពេញពិភពលោកក្នុងបុព្វ ហេតុមនុស្សធម៌ និងរក្សាបានចេរភាពនៃការងារ។ ជាក់ស្តែងរហូតមកដល់បច្ចុប្បន្ននេះ ទូទាំង ខេត្តមានចលនាយុវជន និងបានកំពុងរួមគ្នាធ្វើសកម្មភាព ដើម្បីដោះស្រាយបញ្ហាប្រឈមធំៗ ដែលពាក់ព័ន្ធ និងភៀសខ្លួនដោយសារសង្គ្រាម, សុវត្ថិភាពចរាចរណ៌, ការអត់ឃ្លាន, អំពើហឹង្សា,  ជម្ងឺឆ្លង, ភាពក្រីក្រ, ក្មេងកំព្រា, ការសង្គ្រោះបឋម,  អនាម័យបរិស្ថាន  ។ល។   នៅក្នុងស្មារតីនេះសង្ឈឹមជឿជាក់ថាយុវជនកាកបាទក្រហមកម្ពុជា ខេត្តកំពង់ស្ពឺ ទាំងអស់ ដែលស្ថិតក្នុងជួរ សិស្សានុសិស្ស នៅក្នុងតំរិតមធ្យមសិក្សា, និងបន្តរនូវការខិតខំ ប្រឹងប្រែងយកចិត្តទុកដាក់ចូលរួម ដោះស្រាយ បញ្ហាទាំងអស់នេះ អោយអស់ពីកម្លាំងកាយចិត្តព្រមទាំង ធានាបាននូវសាមគ្គីភាពផ្ទៃក្នុងយ៉ាងរឹងមាំដើម្បី សំរាលទុក្ខ លំបាកនានា ដែលកើតមានឡើងដោយសារគ្រោះមហន្តរាយ, ការជួយសង្គ្រោះជីវិតមនុស្ស និងឈានទៅរកការ បញ្ឈប់ការរើសអើងគ្រប់ប្រភេទលប់បំបាត់គ្រឿងញៀន និងល្បែងពាលា ដែលបង្ករគ្រោះថ្នាក់ធ្ងន់ធ្ងរដល់យុវជន និងសង្គមជាតិ បន្តរក្សាបាននូវចេរភាព នៃកិច្ចអភិវឌ្ឈន៍បរិស្ថាន សន្តិភាព និងបន្តពង្រឹងពង្រីកកម្លាំង យុវជន អោយ ស្ថិតនៅជាកម្លាំងស្នូលសម្រាប់ការងារ ជួយសង្គ្រោះនានា រួមចំណែកដល់ការលើកកម្ពស់វឌ្ឍនភាព និងសេចក្តីថ្លៃ ថ្នូរ របស់មនុស្សជាតិ។ 
 

សាខាកាកបាទក្រហមកម្ពុជាខេត្តកំពង់ស្ពឺ បើកវគ្គបណ្តុះបណ្តាលស្តីអំពីផលប៉ះពាល់ នៃការបើកបរក្រោមឥទ្ធិពលគ្រឿងស្រវឹង

នៅសាខាកាកបាទក្រហមកម្ពុជា ខេត្តកំពង់ស្ពឺ បានបើកវគ្គបណ្តុះ បណ្តាលសុវត្ថិភាពចរាចរណ៍ផ្តោតលើផលប៉ះពាល់នៃការបើកបរក្រោមឥទ្ធិពលគ្រឿងស្រវឹងដល់យុវជន និងអ្នកស្ម័គ្រចិត្តសាខាកាកបាទក្រហមកម្ពុជា ខេត្តកំពង់ស្ពឺ ពីថ្ងៃទី   ២៧  ដល់  ២៨   ខែសីហា   ឆ្នាំ ២០១៥  ឧបត្ថម្ភថវិកាដោយអង្គការសម្ព័ន្ធអន្តរជាតិ ដើម្បីទប់ស្កាត់ផលប៉ះពាល់នៃគ្រឿងស្រវឹង ហៅថា អាយអាដ IARD ក្រោមអធិបតីភាព ឯកឧត្ត តុង សេង ប្រធានគណៈកម្មាធិការសាខា មានការចូលរួម ពីមន្ត្រីគំរោងសុវត្ថិភាពចរាចរណ៌កាកបាទក្រហមកម្ពុជា តំណាងអង្គការសម្ព័ន្ធអន្តរជាតិ ដើម្បីទប់ស្កាត់ផលប៉ះពាល់គ្រឿងស្រវឹង ហៅថា អាយអាត  មន្ត្រីនគរបាលចរាចរណ៍ មន្ត្រីសាខាមានសិក្ខាកាមជា អ្នកស្ម័គ្រចិត្ត១៥នាក់  និងយុវជនសាខាកាកបាទក្រហមចំនួន១០នាក់  ។ វគ្គបណ្តុះបណ្តាលមានគោលបំណងចង់អោយអ្នកស្ម័គ្រចិត្ត និងយុវជនកាកបាទក្រហម ចេះយល់ដឹងអោយបានច្បាស់ពីខ្លឹមសារមេរៀននិង វិធីសាស្ត្រអប់រំផ្សព្វផ្សាយទាក់ទងនឹងផលប៉ះពាល់នៃការបើកបរក្រោមឥទ្ធិពលនៃគ្រឿងស្រវឹង  ហើយយកចំណេះដឹងទាំងនេះទៅផ្សព្វផ្សាយបន្តដល់សាលរៀន និងប្រជាពលរដ្ឋតាមសហគមន៌ ដើម្បីរួមណែកទប់ស្កាត់ និងកាត់បន្ថយពីសេពគ្រឿងស្រវឹងក្នុងពេលបើកបរទទួលបានជោគជ័យ និងមានប្រសិទ្ធិភាពខ្ពស់។  
 
ប្រធានបទដែលបានយកមកបណ្តុះបណ្តាលនាពេលនេះរួមមាន៖ គ្រោះថ្នាក់ចរាចរណ៌ជាសកលនិងគ្រោះថ្នាក់ចរាចរណ៌នៅក្នុងប្រទេសកម្ពុជាផ្តោតសំខាន់លើផលប៉ះពាល់នៃគ្រឿងស្រវឹង,ច្បាប់ចរាចរណ៌ផ្លូវគោកថ្មី និតិវិធីរិតបន្តឹង អប់រំច្បាប់ពេលយប់ របស់នគរបាលចរាចរណ៌ , ផែនការយុទ្ធសាស្ត្រគម្រោងសុវត្ថិភាពចរាចរណ៌ឆ្នាំ២០១៥ ដល់២០២០ របស់កាកបាទក្រហមកម្ពុជា ។   
 
ឯកឧត្តម តុង សេង ប្រធានគណកម្មាធិការសាខា មានប្រសាសន៍ ក្នុងពិធីបើក វគ្គបណ្តុះបណ្តាលនោះថា៖ ឯកឧត្តមសូមថ្លែងអំណរគុណចំពោះអង្គការសម្ព័ន្ធអន្តរជាតិដើម្បីទប់ស្កាត់ផលប៉ះពាល់នៃគ្រឿងស្រវឹង ដែលបានផ្តល់វគ្គបណ្តុះបណ្តាលនេះឡើង និងកោតសរសើ ចំពោះសិក្ខាកាមទាំងអស់ ដែលបានចំណាយពេលវេលាដើម្បីស្វែងយល់ អំពីច្បាប់ចរាចារណ៍ផ្លូវគោក ផលប៉ះ ពាល់នៃគ្រឿងស្រវឹង សូមអោយសិក្ខាកាមត្រូវខិតត្រងត្រាប់ រៀនសូត្រក្រេបយកចំណេះដឹងនិងវិធីសាស្ត្រសម្របសម្រួល ច្បាប់ស្តីពីចរាចរណ៍ផ្លូវ គោក ទាក់ទងការបើកបរ ក្រោមឥទ្ធិពល គ្រឿងស្រវឹង ដំណោះស្រាយចំពោះការមិនបើកបរ ក្រោមឥទ្ធិពលគ្រឿងស្រវឹង ឯកឧត្តមបានផ្តាំផ្ញើដល់សិក្ខាកាមចូលរួមទទួលបាននូវចំណះដឹងនិងអំពីវិធីសាស្ត្រសម្រប អំពីសុវត្ថិភាពចរាចរណ៍ ជាពិសេសផ្តោតលើផលប៉ះពាល់នៃគ្រឿងស្រវឹង សិក្ខាកាមយកចំណេះដឹងទាំងនេះ ទៅអប់រំ និងផ្សព្វផ្សាយបន្តនៅតាមសាលារៀន និងតាមសហគមន៍គោលដៅទទួលបានជោកជ័យ និងមានប្រសិទ្ធិភាព។
 

កិច្ចប្រជុំប៉ាន់ប្រមាណសមត្ថភាពសាខាកាកបាទក្រហមកម្ពុជា ខេត្តព្រះវិហារ

កិច្ចប្រជុំស្តីពី ការប៉ាន់ប្រមាណសមត្ថភាពសាខាកាកបាទក្រហមកម្ពុជាខេត្ត ព្រះវិហារ បានប្រព្រឹត្តទៅចំនួន ០២ថ្ងៃ (ពីថ្ងៃទី០២ ដល់ថ្ងៃទី០៣) ខែកញ្ញា ឆ្នាំ២០១៥ នៅស្នាក់ការសាខាកាកបាទក្រហមខេត្ត ដោយមានការចូលរួមពីសំណាក់ ឯកឧត្តម យូ ឡាណា អគ្គលេខាធិការរងទី២ កាកបាទក្រហមកម្ពុជា ។
 
មានមតិស្វាគមន៍ ក្នុងឱកាសបើកកិច្ចប្រជុំនាពេលនោះ លោក រ៉ាត់ សោភា ប្រធានស្តីទីគណះកម្មាធិការសាខាកាកបាទក្រហមកម្ពុជា ខេត្តព្រះវិហារ បានគូសបញ្ជាក់ថា កិច្ចប្រជុំដើម្បី ប៉ាន់ប្រមាណសមត្ថភាពសាខានៅពេលនេះ បានដំណើរការស្របពេលដែលសាខាកាកបាទក្រហមខេត្ត អនុសាខាស្រុក-ក្រុង អ្នកស្ម័គ្រចិត្ត និងយុវជនកាកាបាទក្រហមកម្ពុជា បាននិងកំពុងខិតខំបំពេញការងារមនុស្សធម៌នៅក្នុងខេត្ត ដើម្បីជួយដល់ជនរងគ្រោះ និងជនដែលងាយរងគ្រោះទទួលបានជោគជ័យ និងការទទួលខុសត្រូវខ្ពស់ ដោយ យើង បានដោះស្រាយទាន់ពេលវេលាជូនដល់បងប្អូនរងគ្រោះ និងងាយរងគ្រោះ ទាំងអស់នោះ។
 
លោក រ៉ាត់ សោភា បានបន្តទៀតថា ដើម្បីអោយដំណើរការនៃការងារ មនុស្សធម៌ក្នុងខេត្តអោយកាន់តែល្អប្រសើរថែមទៀតនោះ យើងទាំងអស់គ្នាជា ថ្នាក់ដឹកនាំគ្រប់លំដាប់ថ្នាក់ត្រូវធ្វើការប៉ាន់ប្រមាណសមត្ថភាពសាខា-អនុសាខាយើងថាតើ មកទល់បច្ចុប្បន្ននេះ យើងមានកំរិតសមត្ថភាពការងាត្រឹមណា? តើមានចំណុចខ្លាំង ចំណុចខ្សោយ និងបញ្ហាប្រឈមអ្វីខ្លះ? ដែលយើងចាំបាច់ត្រូវតែពិនិត្យពិចារណា អោយបានច្បាស់លាស់ ដើម្បីយកបញ្ហាទាំងអស់នេះដាក់ចេញជាសកម្មភាពប្រតិបត្តិ របស់យើងនាពេលខាងមុខអោយបានសមស្របតាមគោលដៅយុទ្ធសាស្ត្ររបស់កាកបាទក្រហមកម្ពុជាយើង និងដើម្បីកិច្ចការមនុស្សធម៌ក្នុងខេត្តយើងអោយកាន់តែមាន ប្រសិទ្ធភាពថែមទៀត ។
 
មានមតិបិទអង្គប្រជុំ នាឱកាសនេះ ឯកឧត្តម យូ ឡាណា អគ្គលេខាធិការរងទី២ កាកបាទក្រហមកម្ពុជា មានប្រសាសន៍ថា កិច្ចប្រជុំដើម្បីប៉ាន់ប្រមាណសមត្ថភាព សាខាខេត្តព្រះវិហាររបស់យើងនៅពេលនេះ ថ្វីត្បិតតែមានរយៈពេល ០២ថ្ងៃក៏ពិតមែន តែលទ្ធផលដែលយើងទទួលបានគឺធំធេងណាស់ អាស្រ័យដោយបងប្អូនជាសមាជិក សមាជិកាចូលរួមទាំងអស់បានបញ្ចេញមតិពិភាក្សាលើប្រធានបទយ៉ាងផុសផុល ហើយអ្វីដែលគួរអោយកត់សម្គាល់នោះគឺ អង្គប្រជុំទាំងមូលបានឯកភាពគ្នារកឃើញ ចំណុចខ្លាំង ចំណុខ្សោយ ដែលយើងបានអនុវត្តលើការងារមនុស្សធម៌កន្លងមក និងបានដាក់ចេញនូវចំណុចជាអាទិភាពសំខាន់ៗមួយចំនួនចូលក្នុងទិសដៅការងាររបស់យើង ដើម្បីយកទៅអនុវត្តនាពេលខាងមុខ។
 
ឯកឧត្តម បានបន្តទៀតថា កិច្ចប្រជុំ ស្តីពីការប៉ាន់ប្រមាណសមត្ថភាពស្ថាប័ន និងការរួមបញ្ជូលជាមួយនូវ លក្ខណៈវិនិច្ឆ័យ សាខាមានដំណើរការល្អនៅពេលនេះ គោលបំណងជាសំខាន់គឺ ដើម្បីស្វែងយល់ ស៊ីជម្រៅលើសមត្ថភាព និងរបៀបបំពេញការងាររបស់សាខាក្នុងស្ថានភាពបច្ចុប្បន្ន ដើម្បីយើងមាន មូលដ្ឋានក្នុងការកសាងផែនការសកម្មភាពនៅពេលខាងមុខ អោយ បានសមស្រប និងប្រកបដោយតម្លាភាពក្នុងកិច្ចការងារមនុស្សធម៌របស់យើង ។
 
ជាចុងក្រោយ ឯកឧត្តម ក៏បានសំណូមពរដល់កិច្ចប្រជុំទាំងមូល សូមមេត្តាខិតខំប្រឹងប្រែងអនុវត្តអោយបានល្អប្រសើនូវគោលការណ៍ជាអាទិភាពទាំងឡាយ ដែលអង្គប្រជុំក្នុងរយៈពេល ០២ថ្ងៃកន្លងមកនេះ បានសម្រេចដាក់ចេញដើម្បី ប្រែក្លាយសកម្មភាពការងារមនុស្សធម៌ក្នុងខេត្តព្រះវិហារ អោយកាន់តែសកម្ម កាន់តែ ច្រើនជាងមុន កាន់តែស៊ីជម្រៅជាងមុន និងអោយកាន់តែឆ្ងាយជាមុន ៕
 
Fist Prev 89 90 91 92 93 Next Last