Webmail
E-Learning
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា

ទីស្នាក់ការកណ្តាល

កាកបាទក្រហមកម្ពុជា ផ្តល់អំណោយមនុស្សធម៌ជូន សមាគមតន្ត្រីសំនៀងជនពិការ

ព្រឹកថ្ងៃទី១៦ ខែកុម្ភៈ ឆ្នាំ២០១៦ ​នេះ​ លោកជំទាវ ម៉ែន នារីសោភ័គ​ អគ្គលេខា​ធិការ​រង​ទី ១ កាកបាទ​ក្រហម​កម្ពុជា​ បានជួបសំណេះសំណាល​សួរសុខទុក្ខ ​និងប្រគល់​អំណោយ​មនុស្សធម៌​ដ៏ថ្លៃថ្លារ​បស់សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន​ ប្រធាន​កាកបាទក្រហមកម្ពុជា ​ជូនសមាគមតន្ត្រីសំនៀង​ជនពិការ​ដែលមាន​សមាជិក-សមាជិកា និង​បុគ្គលិក ចំនួន​ ៥២នាក់​ មានទីតាំង​បណ្តោះអាសន្ន​នៅភូមិ១ ឃុំស្វាយរលំ ស្រុកស្អាង ខេត្តកណ្តាល។

​ក្នុងឱកាស​នោះដែរ ​លោកជំទាវ ​បានពាំ​នាំមតិផ្តាំផ្ញើ​សួរសុខទុក្ខ​ពីសំណាក់​ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​និងលើកទឹកចិត្ត​ដល់ការតស៊ូ​របស់ក្រុម​ជនពិការដើម្បី​រស់នៅ​ក្នុង​សង្គម​ដោយថ្លៃថ្នូរ និង​ស្មើមុខស្មើមាត់ ​ព្រមទាំង​អំពាវនាវលើក ទឹកចិត្ត​ដល់​សប្បុរសជន​នានា មេត្តា​ជួយ​ឧបត្ថម្ភ​គាំទ្រ​បន្ថែម​ទៀតដល់​ជនពិការ​ ដើម្បីឈាន​ទៅ​លុបបំបាត់​ការរើសអើង​ចំពោះ​ជនពិការ​នៅ​កម្ពុជាយើង។

សូមបញ្ជាក់ថា ​ក្រោមការឧបត្ថម្ភ​ថវិកា ៥ម៉ឺនដុល្លារ ​របស់​សម្តេចកិត្តិព្រឹទ្ធបណ្ឌិត​  “មណ្ឌល​សមាគម​តន្ត្រីសំនៀង​ជនពិការ” នេះនឹង​បង្ហាញរូបរាង​ឡើង​ក្នុងពេល​ខាងមុខនេះ ហើយនឹង​ក្លាយជាមណ្ឌល​ផ្តល់​ពន្លឺជីវិតថ្មី​សម្រាប់ជនពិការ​ តាមរយៈ​ការបណ្តុះបណ្តាល​ជំនាញ ​ផ្សេងៗ ដូចជា តន្ត្រី បង្រៀន​ម៉ាស្សា អក្សរ​ប្រ៊ែល និងល្ខោនអប់រំ។ ​បន្ទាប់ពីពិធីនេះ​ចប់ សម្តេចកិត្តិព្រឹទ្ធបណ្ឌិត​ ក៏បានផ្តល់អាហារ​មួយពេល​ជូន​បងប្អូនជនពិការ​នៅភោជនីយដ្ឋាន​ទន្លេបាសាក់២ ផងដែរ។

គូស​បញ្ជាក់ផងដែរថា​ ក្រុមជនពិការ ដែលចងក្រង​គ្នាជា “សមាគម​តន្ត្រី​សំនៀងជន​ពិការ” តាំងពី​ឆ្នាំ២០១២ ដើម្បី​ស្វែងរក​ប្រាក់ចិញ្ចឹម​ជីវិត តាមរយៈការបង្ហើរ​សំនៀងស្វែង​រកមូលនិធិ​សប្បុរសធម៌គ្រប់ទី​កន្លែងច្រកល្ហក ​និងធ្លាប់​ទទួលបាន​ទទួលអំណោយ​ឧបត្ថម្ភជា​ស្បៀង សម្ភារៈ ​និងថវិកា​ពីកាកបាទ​ក្រហម​កម្ពុជា ចំនួន ៣ លើក​រួចមក ដែលថ្ងៃនេះ​ជាលើកទី ៤។

អំណោយ​ដែលបានប្រគល់ជូន​សមាគម​តន្ត្រីសំនៀង​ជនពិការ​ក្នុងថ្ងៃនេះ​រួមមាន៖ អង្ករ ២តោន មីយើង ២៥កេស ត្រីខ ៣កេស ទឹកស៊ីអ៊ីវ ១២ដប ទឹកត្រី ១២ដប ប្រេងឆា ២កេស ទឹកបរិសុទ្ធ ១០កេស ទឹកក្រូច ៦កេស ប្រេង​កូឡា ១កេស សាប៊ូ​កក់សក់ ៥កេស ម្សៅសាប៊ូ ៣កេស និងថវិកា ៥លានរៀល និងម្នាក់ៗទទួល​បាន ថវិកា ៥ម៉ឺនរៀល មុង១ ភួយ១ សារ៉ុង ១ និងក្រម៉ា១។

កាកបាទក្រហមកម្ពុជាបំពាក់គ្រឿងឥស្សរិយសជូនលោកស្រីអានឡឺឃ្លែ‬

លោកជំទាវ ឃួន សុដារី ​អនុ​ប្រធាន​កាកបាទក្រហមកម្ពុជា ​តំណាង​ដ៏ខ្ពង់ខ្ពស់​ សម្តេច​កិត្តិ​ព្រឹទ្ធ​បណ្ឌិត​ ប៊ុន រ៉ានី ហ៊ុនសែន ​បាន​ទទួល​ជួប​សវនាការ​ និង​បំពាក់​គ្រឿង​ឥស្សរិយស​ជូន លោកស្រី​ អាន អេលីសាប៊ែត ឡឺឃ្លែ ​(Anne Elisabeth LECLERC) ប្រធាន​ក្រុម​គាំទ្រ​កម្រង​ប្រទេស​ របស់​សហព័ន្ធ​អន្តរជាតិ​នៃសមាគម​កាកបាទក្រហម ​អឌ្ឍចន្ទ​ក្រហម ​ប្រចាំ​ទីក្រុង​បាងកក​ នៅ​ព្រឹក​ថ្ងៃទី ១៥ ខែ កុម្ភៈ ឆ្នាំ ២០១៦ នេះ នាទី​ស្នាក់ការ​កណ្តាល​កាកបាទ​ក្រហម​កម្ពុជា។

“គ្រឿង​ឥស្សរិយស​ សហ​មេត្រី​ ថ្នាក់​មហាសេនា​” ដែល​ប្រោស​ព្រះរាជ​ប្រទាន​ពី ព្រះបាទ​សម្តេច ព្រះបរមនាថ​ នរោត្តម សីហមុនី​ ព្រះមហាក្សត្រ​នៃ​ព្រះរាជាណាចក្រ​កម្ពុជា ​ជូនចំពោះ ​លោកស្រី ​គឺជាសក្ខីភាព​បញ្ជាក់​ពីការទទួលស្គាល់​នូវស្នាដៃ ​នៃការចូលរួម​ចំណែក​ និង​រាល់​សមិទ្ធផល​នានា​ជាច្រើន​របស់ លោកស្រី ក្នុងតួនាទីជា​ ប្រធាន​ប្រតិភូ​សហព័ន្ធ​អន្តរជាតិ​កាកបាទក្រហម​ អឌ្ឍចន្ទ​ក្រហម ប្រចាំ​ភូមិភាគ​អាស៊ី-អាគ្នេយ៍។

 

ទាញយក៖ សុន្ទរកថា លោកជំទាវ ឃួន សុដារី

កាកបាទក្រហមកម្ពុជា ប្រគល់ថវិកាជូនប្រជាជនខ្មែរ-ឥស្លាម នៅស្ទឹងស្លូត ខេត្តព្រៃវែង

ថ្ងៃទី ១២ ខែ កុម្ភៈ ឆ្នាំ ២០១៦ នេះ នៅទីស្នាក់ការកណ្ដាល​កាកបាទ​ក្រហម​កម្ពុជា​ លោកជំទាវ ​ម៉ែន នារី​សោភ័គ​ អគ្គលេខា​ធិការ​រងទី ១ ​កាកបាទ​ក្រហម​កម្ពុជា ​បាន​ទទួល​ស្វាគមន៍ ​និង​ប្រគល់​ថវិកា​ចំនួន ១៣,០០០ ​ដុល្លារអាមេរិក​ ដែលជា​អំណោយ​របស់​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ប្រធាន​កាកបាទ​ក្រហម​កម្ពុជា​ ជូន​បងប្អូន​ខ្មែរ-ឥស្លាម​ ដែល​អញ្ជើញ​មកពី ​ភូមិស្ទឹងស្លូត ​(ហៅរ៉ាម៉ី) ឃុំអ្នកលឿង​ ស្រុកពាមរក៍ ​ខេត្តព្រៃវែង។

 សូមបញ្ជាក់ថា​ បងប្អូនខ្មែរ-ឥស្លាម បាន​អំពាវនាវ​រក ថវិកា​ពី​សប្បុរសជន​ដើម្បី​ទិញដី​សាងសង់​តារាង​បាល់ទាត់​ដែលជា​ទីកន្លែង សម្រាប់​សហគមន៍​ ហាត់ប្រាណ​លើក​កម្ពស់​សុខភាព​ និង​ដើម្បី​យុវជន​ខ្មែរ-ឥស្លាម​ ហ្វឹកហាត់​ចូលរួម​ការប្រកួត​ នៅតាម​បណ្តា​ខេត្ត​នានា។  តំណាងខ្មែរ-​ឥស្លាម​ បាន​សម្តែង​នូវអំណរគុណ​ចំពោះ ​សម្តេច​កិត្តិព្រឹទ្ធបណ្ឌិត​ ព្រោះថា​ទង្វើនេះ​ពិតជា​ជួយ​ដល់​ប្រជាជន​ខ្វះខាត ​ដោយ​មិនមាន​ការរើសអើង​សាសនា ​និង​ពូជសាសន៍​ អ្វី​ឡើយ។

 

លោកជំទាវ ពុំ ចន្ទីនី ជួបសំដែងការគួរសមជាមួយប្រតិភូ មូលនិធិ Cartier Charitable Foundation

ព្រឹក​ថ្ងៃទី ១២ ខែ កុម្ភៈ ឆ្នាំ ២០១៦ ​នៅទីស្នាក់ការកណ្តាល ​កាកបាទ​ក្រហម​កម្ពុជា ​លោកជំទាវ ​ពុំ ចន្ទីនី ​អគ្គលេខា​ធិការ ​បាន​ជួប​សំដែង​ការគួរសម​ជា​មួយ​ ប្រតិភូ ​មូល​និធិ ​Cartier ​Charitable Foundation ​ ដឹកនាំ​ដោយ​លោកស្រី​ អូ ឡាក់ ប៊ែសែត ​។ មូលនិធិ​នេះ​ គឺជួយ​ផ្តល់​ថវិកា​ដល់​គម្រោង​អនាម័យ​ទឹកស្អាត​ មាន​ជាអាទិ​ អណ្តូងទឹក​ បង្គន់​អនាម័យ ​ជាដើម​តាមរយៈ ​សហពន្ធ័​អន្តរជាតិ​ប្រចាំ​កម្ពុជា​។​

គម្រោង​នេះ​បាន​ដំណើរ​ការ​របស់ខ្លួន​នៅ ​ខេត្ត​គោលដៅ​ចំនួន​ ៣  គឺ ​ខេត្ត​ស្វាយរៀង ​ក្រចេះ ​បន្ទាយមានជ័យ ​និង​មានរយៈពេល ​៣ឆ្នាំ គឺ ចាប់ពីឆ្នាំ ២០១៥ - ២០១៧  គោលបំណង​នៃការ​ជួប​សំណេះ​សំណាល​នេះ គឺ​ដើម្បី​ពង្រឹង​ភាពជា​ដៃគូ ​និង ​ទំនាក់​ទំនង ​រវាង ​មូល​និធិ​ កាជេ ​សហព័ន្ធ​អន្តរជាតិ ​និង កាកបាទ​ក្រហម​កម្ពុជា​ ហើយ​ប្រតិភូ​និង ​ធ្វើ​ដំណើរ​ចុះទៅ​ពិនិត្យ ​សកម្មភាព​គម្រោង​ដែល​បានអនុវត្ត​នៅ ​តាម​ខេត្ត៣​ខាងលើ​ ។

អ្នកជំងឺមហារីកសុដន់ទទួលអំណោយមនុស្សធម៌ពីកាកបាទក្រហមកម្ពុជា

រសៀល​ថ្ងៃទី ១១ ខែ​កុម្ភៈ ឆ្នាំ២០១៦​នេះ​ លោកជំទាវ ​ម៉ែន ​នារីសោភ័គ​ អគ្គ​លេខាធិការ​រង​ទី​១ កាកបាទ​ក្រហម​កម្ពុជា ​បាន​ជួប​សំណេះ​សំណាល ​សួរសុខទុក្ខ​ពី​ស្ថានភាព​អ្នកជំងឺ ​លោកស្រីយិន សុធារី ​អាយុ ៥៤ ឆ្នាំ មាន​ជំងឺ​មហារីក​សុដន់​យ៉ាង​ធ្ងន់ធ្ងរ ​តាមរយ:លោក​ ភិន ​សុវណ្ណ​ ជាស្វាមី ​ប្រកប​របរ​រត់ម៉ូតូឌុប​មានជីវភាព​ខ្វះខាត ​រកព្រឹកខ្វះល្ងាច ​រស់នៅ​ភូមិតាង៉ៅ​លើ សង្កាត់និរោធន៍​ ខណ្ឌច្បារអំពៅ​ រាជធានីភ្នំពេញ។

ស្ថិត​ក្រោម​ការ​ជួយ​ជ្រោមជ្រែង​ពី​កាកបាទ​ក្រហមកម្ពុជា ​និង​មណ្ឌល​ក្តី​សង្ឃឹម​ "Hope" ​នៃ​មន្ទីរពេទ្យ​ព្រះ​សីហនុ លោកស្រី ​យិន សុធារី បាន​និង​កំពុងប្រើ​ថ្នាំពេទ្យ​បំបាត់ការ​ឈឺចាប់ ​មុននឹងឈាន​ដល់​ការ​ត្រួតពិនិត្យ​ស្ថានភាព​សុខភាព​ជាថ្មី​ ដើម្បី​ឈាន​ដល់​ការវះ​កាត់​។  ជាមួយ​គ្នានោះ​ដែរ​ លោកជំទាវ ក៏បាន​នាំយក​អំណោយ​សម្តេច​កិត្តិ​ព្រឹទ្ធ​បណ្ឌិត ជូន​អ្នក​ជំងឺ ​រួម​មាន៖គ្រឿង​ឧបភោគ-​បរិភោគ​មួយ​ចំនួន និង​ថវិកា​ ៥០ម៉ឺន​រៀល។

 

Fist Prev 71 72 73 74 75 Next Last