Webmail
E-Learning
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា

ទីស្នាក់ការកណ្តាល

កាកបាទក្រហមកម្ពុជា ចែកអំណោយប្រជាជនរងគ្រោះដោយខ្យល់កន្ត្រាក់

នាព្រឹកថ្ងៃទី ២៥ ខែឧសភា ឆ្នាំ២០១៦ សម្តេច​កិត្តិព្រឹទ្ធបណ្ឌិត ​ប៊ុន រ៉ានី ហ៊ុនសែន ​ប្រធាន​កាកបាទក្រហមកម្ពុជា​ បានចាត់​លោកជំទាវ ពុំ ចន្ទីនី ​អគ្គលេខាធិការ​ និងសហការី ​ព្រមទាំង​សាខា​ខេត្តបន្ទាយមានជ័យ​ បានចុះសួរសុខទុក្ខ​ និងចែកអំណោយ​មនុស្សធម៌​របស់​សម្តេចកិត្តិព្រឹទ្ធបណ្ឌិត ​ជូនដល់​ប្រជាពលរដ្ឋ​រងគ្រោះ​ដោយសារ​ខ្យល់កន្ត្រាក់​ ចំនួន ១០៨គ្រួសារ មកពី១១ភូមិ ៥ឃុំ ស្រុកអូជ្រៅ ​ខេត្តបន្ទាយមានជ័យ ក្នុងបវេនវត្តពោធិសម្ភារ។

ក្នុងឱកាស​នៃពិធី​សំណេះសំណាល​ជាមួយ​បងប្អូន​ប្រជាពលរដ្ឋ​ លោកជំទាវ អគ្គលេខាធិការ ​ផ្តាំផ្ញើ​សាកសួរ​សុខទុក្ខ​ និងសេចក្តីនឹករលឹក ​ចូលរួម​សោកស្តាយ​ទ្រព្យសម្បត្តិ​ ដោយគ្រោះធម្មជាតិ ​ពីសំណាក់​សម្តេច​កិត្តិព្រឹទ្ធបណ្ឌិត​ប្រធាន​ និងពាំនាំ​នូវសារ​មួយចំនួន​របស់​សម្តេច​កិត្តិព្រឹទ្ធបណ្ឌិតប្រធាន​ ជម្រាប​ជូនបងប្អូន​ប្រជាពលរដ្ឋ​ ដែលមានខ្លឹមសារដូចតទៅ៖

 

១-គ្រោះមហន្តរាយមានពីរប្រភេទ៖
- គ្រោះមហន្តរាយ​ដោយធម្មជាតិ​មានដូចជា៖ ទឹកជំនន់ គ្រោះរាងស្ងួត ខ្យល់ព្យុះ ដោយរដូវវស្សា​ជិតចូលមក​ដល់នឹង​មានភ្លៀង​កក់ខែ​ សូមបងប្អូន​ប្រជាពលរដ្ឋ​ប្រុងប្រយ័ត្ន​ជាពិសេស ​ខ្យល់កន្ត្រាក់ ផ្គរ រន្ទះ ជៀសវាង​គ្រោះថ្នាក់​ដោយប្រការណាមួយ​ ដោយត្រូវ​សាងសង់ផ្ទះ​ឱ្យមានភាពធន់ ​- គ្រោះមហន្តរាយ​បង្កដោយ​មនុស្ស​មានដូចជា​៖ ភ្លើងឆេះផ្ទះ និងគ្រោះថ្នាក់​ចរាចរណ៍ ​ជាពិសេស​គ្រោះថ្នាក់ចរាចរណ៍​មានអ្នកស្លាប់​គិតជា​អតិបរមា​ ៦នាក់ក្នុង១ថ្ងៃ ​ដូច្នេះ​សូមបងប្អូន​ប្រជាពលរដ្ឋ ​ត្រូវគិតគូរ​ពីសុវត្ថិភាព​តាមដងផ្លូវ ​ជៀសវាង​គ្រោះថ្នាក់​ចរាចរណ៍​ ដោយត្រូវ​គោរព​ច្បាប់ចរាចរណ៍ ​ពាក់មួក​សុវត្ថិភាព​ក្នុងពេល​បើកបរ​ បើកបរ​ក្នុងល្បឿន​កំណត់ ​បើកបរ​កុំជែងគ្នា ​​និង​កុំបើកបរ​ក្រោមឥទ្ធិពល​នៃគ្រឿងស្រវឹង​។

 

២- ក្នុងស្ថានភាព​ដែលប្រជាពលរដ្ឋ​ កំពុងខ្វះខាត​ទឹកប្រើប្រាស់​ប្រចាំថ្ងៃ​ កាកបាទ​ក្រហម​កម្ពុជា ​នឹងបង្កើន​ការផ្តល់ស្រះ-​អណ្តូង ស្តារស្រះ ជួសជុល​អណ្តូង ឲ្យបានច្រើន​ជាងនេះ​ទៅតាម​លទ្ធភាព ​ដើម្បី​ជួយបំពេញ​តម្រូវការ​របស់​ប្រជាពលរដ្ឋ។

 

៣- សូមឲ្យ​បងប្អូន​ប្រជាពលរដ្ឋ ​ផ្តោតសំខាន់​ទៅលើ​បញ្ហា​សុខភាព ធ្វើយ៉ាងណា​ថែទាំសុខភាព​ឲ្យបានល្អ​ មានអនាម័យល្អ ​ពិសារទឹកឆ្អិន ​លាងដៃ​ឲ្យបាន​ស្អាតមុន​ពេលហូប​អាហារ ​ពោលគឺ​ត្រូវចេះ ​ហូបស្អាត ​ផឹកស្អាត​ និងរស់នៅស្អាត

 

៤- ចំពោះស្ត្រី​មានផ្ទៃពោះ ​ត្រូវទៅរក​សេវា​សុខាភិបាល​ ដើម្បីថែរក្សា​ផ្ទៃពោះ ហើយត្រូវទៅ​ពិនិត្យ​ផ្ទៃពោះឲ្យ​បានទៀងទាត់ និង​សម្រាលកូននៅ​មន្ទីរពេទ្យ ឬ​​មណ្ឌលសុខភាព។ បើសង្ស័យថា ក្នុងខ្លួន​មានផ្ទុក​មេរោគអេដស៍​ សូមទៅ​ធ្វើ​តេស្តឈាម​ ហើយទទួល​យកថ្នាំ​ពន្យាជីវិត​ពីគ្រូពេទ្យ ​និង​វិធីទប់ស្កាត់​ការឆ្លងមេរោគ​ពីម្តាយ​ទៅកូន។

 

គ្រួសារ​នីមួយៗ​ទទួលបាន៖ ៣០គីឡូក្រាម មី ១កេស ត្រីខ ១០កំប៉ុង ឃីត១ (សារុង មុង ភួយ ក្រមា) និង​ថវិកា​មួយចំនួន។ ដោយឡែក​ប្រជាពលរដ្ឋ​រលំផ្ទះ​ ចំនួន ៤០ខ្នង ថែម​តង់១​បន្ថែមទៀត។

 

កាកបាទក្រហមកម្ពុជា ចូលរួមរំលែកទុក្ខ គ្រួសារសព ឯកឧត្តម ទៀ សុទ្ធ

កក្រក ៖ នៅព្រឹកថ្ងៃទី ២៥ ខែឧសភា ឆ្នាំ ២០១៦ នេះ​ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ​ហ៊ុនសែន​ប្រធាន​កាកបាទ​ក្រហម​កម្ពុជា​ ដឹកនាំ​ដោយ​ឯកឧត្តម​ អ៊ុយ សំអាត ​នាយក​ នាយកដ្ឋាន​គ្រប់គ្រង​គ្រោះមហន្តរាយ ​បាន​ចាត់ឲ្យ ​គណៈប្រតិភូ ​កាកបាទ​ក្រហម​កម្ពុជា​ ចូលរួម​រំលែកទុក្ខ ​យ៉ាងក្រៀមក្រំ​បំផុត​ជាមួយ​ក្រុមគ្រួសារ​លោកជំទាវ សន ចាំណុង​ដែលជាភរិយា​ របស់សព​ ឯកឧត្តម​ឧត្តមសេនីយ៍ឯក​ ទៀ សុទ្ធ​ អគ្គនាយករង ​អគ្គនាយកដ្ឋាន​សម្ភារៈ​បច្ចេកទេស ​ក្រសួងការពារជាតិ​ ដែលបាន​ទទួល​មរណភាព ​នៅវេលាម៉ោង ​៦ម៉២១នាទីព្រឹក ថ្ងៃ អាទិត្យ ទី ២២ ឆ្នាំ ២០១៦ ក្នុងជន្មាយុ ៧៣ឆ្នាំ ដោយ​រោគាពាធ​។

 

ស្ថិតក្នុង​សមានទុក្ខ​ដ៏សោក​សង្រេង​ខ្សឹបខ្សួល​រំជួលចិត្ត​យ៉ាងក្រៃលែងនេះ ​សម្តេចកិត្តិព្រឹទ្ធបណ្ឌិត តាមរយៈ​ គណៈប្រតិភូ ​បានជូន​សារលិខិត​ចូលរួម​រំលែកទុក្ខ​ជាមួយ​លោកជំទាវ សន ចាំណុង ​ដែល​ជាភរិយា​ របស់សព ឯកឧត្តម​ឧត្តមសេនីយ៍ឯក ​ទៀ សុទ្ធ​ ចំពោះ​ការបាត់បង់ ​ឧត្តម​ស្វាមី បិតា ជីតា ប្រកបដោយ​ព្រហ្មវិហារធម៌​និងជាការបាត់បង់​វីរជនកម្ពុជា​ដ៏ឆ្នើម ​ពោរពេញ​ដោយគុណធម៌​ សច្ចៈធម៌ ​បានធ្វើពលិកម្ម ​បូជាកម្លាំងកាយ ​ចិត្ត ប្រាជ្ញា ស្មារតី ចូលរួម​ដឹកនាំកម្លាំង​តស៊ូរំដោះ​ប្រទេស ​និងប្រជាពលរដ្ឋ​ ឲ្យរួចផុត​ពីរបបប្រល័យ​ពូជសាសន៍​ ប៉ុល ពត ​និងបាន​ចូលរួម​ចំណែក​យ៉ាងសកម្ម​ក្នុងការស្តារ ​កសាងប្រទេស​ឲ្យមានសុខសន្តិភាព​ ស្ថិរភាពនយោបាយ ​ដើម្បីវឌ្ឍនភាព ​វិបុលភាព និងការរីកចម្រើន​ឥតឈប់ឈរ​របស់ជាតិ​មាតុភូមិយើង។

ក្នុង​មរណទុក្ខ​ដ៏សែន​ក្តុកក្តួល​នេះដែរ សម្តេចកិត្តិព្រឹទ្ធបណ្ឌិត ​បាន​ចូលបុណ្យ​ជា​បច្ច័យចំនួន ៥លានរៀល​ និងសូមឧទ្ទិស​ដល់ដួង​វិញ្ញាណក្ខន្ធ ​ឯកឧត្តម​ឧត្តមសេនីយ៍ឯក ទៀ សុទ្ធ បានចាប់​បដិសន្ធិ​ក្នុងសុគតិភព​គ្រប់ៗជាតិ​ កុំបីឃ្លៀងឃ្លាតឡើយ៕

 

កាកបាទក្រហមកម្ពុជាចុះសួរសុខទុក្ខគ្រួសារកុមារពិការនៅខេត្តកណ្តាល

នៅព្រឹកថ្ងៃទី ២៤ ខែឧសភា ឆ្នាំ២០១៦ នេះ ​លោកជំទាវ​ ម៉ែន នារីសោភ័គ​ អគ្គលេខាធិការ​រងទី ១​ កាកបាទ​ក្រហម​កម្ពុជា​ តំណាង​ដ៏ខ្ពង់ខ្ពស់​ សម្តេច​កិត្តិព្រឹទ្ធ​បណ្ឌិត ​ប៊ុន រ៉ានី ហ៊ុនសែន​ ប្រធាន​កាកបាទ​ក្រហម​កម្ពុជា​ និងសហការី​ រួមជាមួយ​មន្រ្តី​សាខា​កាកបាទ​ក្រហម​កម្ពុជា​ ខេត្តកណ្តាល ​ចុះសួរសុខទុក្ខ​គ្រួសារ​កុមារ​ពិការ​បងប្អូន​ក្រីក្រ​ ឈ្មោះ ដូរ ចាន់វិសាល ១៣ ឆ្នាំ រៀនថ្នាក់ទី ៥ និងប្អូនប្រុសឈ្មោះ ដូរ ចាន់សិទ្ធ ៩ឆ្នាំ រៀនថ្នាក់ទី ១ ដែលរស់​នៅក្នុង​ ភូមិ កោះគ ឃុំ រការខ្ពស់ ស្រុក ស្អាង ​ខេត្ត កណ្តាល ដោយ ​បច្ចុប្បន្ននេះ ​កុមារទាំងពីរ ​គឺបានរស់​នៅក្នុង​បន្ទុក​ឪពុកម្តាយ ​និង​មានលោកយាយ​ជាអ្នកជួយ​បីបាច់ថែ​រក្សារាល់ថ្ងៃ​។ បន្ថែមពីនេះ​ ដោយមាន​ការពិបាក​ក្នុងការ​ធ្វើដំណើរ​ កុមារ​ទាំងពីរ​រូបក៏មាន​បំណង​បោះបង់​ការ សិក្សា​របស់ខ្លួន​។

 

ក្នុងឱកាស​សួរសុខទុក្ខ​ជាមួយ​ក្រុមគ្រួសារ​នៃកុមារ​ពិការ​បងប្អូន​ទាំងពីរ​នាក់នោះ ​លោកជំទាវ​អគ្គលេខាធិការ​រងទី១ ​បានជម្រាប​ជូន នូវប្រសាសន៍​ផ្តាំសួរ​សុខទុក្ខ ​និង​ក្តីអាណិតអាសូរ​យ៉ាងខ្លាំង​ពីសំណាក់ ​សម្តេចកិត្តិ​ព្រឹទ្ធបណ្ឌិត ​ព្រមទាំង​ការ កោតសរសើរ​ដល់ឱពុកម្តាយ​ និងជីដូន​ ចំពោះ​ការតស៊ូ​របស់ពួកគាត់​ ដែលបាន​ខិតខំ​ប្រឹងប្រែង​ថែរក្សា​កុមារ​ដ៏កំសត់​ទាំងពីររូបនេះ​។ លោកជំទាវ ​អគ្គលេខារងទី ១ ​ក៏បាន​លើកទឹក​ចិត្តដល់ ​លោកឱពុក​ អ៊ុក រីដូរ អាយុ ៣៤ ឆ្នាំ​ ដែលមាន​មុខរបរ​ជាកម្មករ​រោងចក្រ​ និងលោកស្រី​ គយផល ៣៦ ឆ្នាំ ​ដែលជាម្តាយ​របស់កុមារ​ទាំងពីរ​រូបនោះ ​សូមបន្ត​បង្កលទ្ធភាព​ដល់កូនទាំងពីរ ​ឱ្យបាន​សិក្សាថែមទៀត​ ដើម្បី​ឱ្យមាន​អនាគត​ល្អពេលពួកគេ​ពេញវ័យ​ ដោយក្នុងនោះ​កាកបាទក្រហម​កម្ពុជា ​នឹងពិភាក្សា​ជាមួយ​មន្រ្តីសាខា​របស់ខ្លួន​ ដើម្បី​ស្វែងរក​គ្រូបង្ហាត់​ស្ម័គ្រចិត្ត​ ឱ្យជួយបង្ហាត់​ដល់ពួកគេ​ទាំងពីរ​នៅផ្ទះ​ផ្ទាល់តែម្តង។

អំណោយចែកជូនរួមមាន៖ រទេះពិការ ២ អង្ករ ៦០ គីឡូ ត្រីខ ២ កេស មី២ កេស សម្ភារ:ឃីត ២ ឈុត (មុង សារុង និងភួយ ) និងថវិកា ១ លាន រៀល។ បន្ថែមពីនេះ ឯ.ឧ ឃឹម សោភ័ណ្ឌ ប្រធាន​គណ:ពង្រឹង​ឃុំ រការខ្ពស់ ​ក៏បាន​ចូលរួម ​ឧបត្ថម្ភ​ថវិកា​បន្ថែម​ចំនួន ២០ម៉ឺុន រៀល​ជូនដល់កុមារ​ពិការបងប្អូន​ទាំងពីរ​ផងដែរ។

 

បន្ទាប់មកទៀត ​លោកជំទាវ​អគ្គលេខារងទី ១​ និងក្រុមការងារ​ក៏បានបន្ត​អញ្ជើញចុះ​សួរសុខទុក្ខ ​និងចែកអំណោយ​មនុស្សធម៌​របស់ ​សម្តេច​កិត្តិព្រឹទ្ធបណ្ធិត​ ប្រធាន​កាកបាទ​ក្រហម​កម្ពុជា ​ជាស្បៀង ​សម្ភារ:​និងថវិកា​ ដល់ចាស់ជរា ​គ្រួសារក្រីក្រ​ និងជនគ្នាន​ទីពឹង​មាន​ជំងឺធ្ងន់ធ្ងរ ដែលកំពុង​ជួបការ​លំបាក​ចំនួន ២០ គ្រួសារ​នៅតាម​ខ្នងផ្ទះ។ នាពេល​នោះ លោកជំទាវ អគ្គលេខាធិការ​រងទី ១ ក៏បានផ្តាំផ្ញើការសួរសុខទុក្ខ និងការយកចិត្តយ៉ាងខ្លាំង ពីសំណាក់សម្តេចកិត្តិព្រឹទ្ធបណ្ឌិត ពីសុខុមាលភាពចាស់ជរា គ្រួសារក្រីក្រ និងជនគ្មានទីពឹងគ្រប់រូប ជាពិសេសលោកយាយ លោកតា ដែលមានជីវភាពលំបាកនៅតាមមូលដ្ឋាន។ បន្ថែមពីនេះទៀត សម្តេចកិត្តិព្រឹទ្ធបណ្ឌិត តាមរយៈ លោកជំទាវអគ្គលេខាធិការរងទី ១ បានលើកទឹកចិត្តដល់លោកយាយ លោកតានិងគ្រួសារក្រីក្រទាំងអស់ សូមយកចិត្តទុកដាក់ថែរក្សាសុខភាពខ្លួន និងសូមជូនពរឱ្យមានសុភមង្គលក្នុងក្រុមគ្រួសារ។ 


បន្ទាប់មក លោកជំទាវ អគ្គលេខាធិការរងទី ១ ក៏បានចុះសួរសុខទុក្ខជនគ្មានទីពឹង ដែលកំពុងមានជំងឺបូសថ្លើមយ៉ាងធ្ងន់ធ្ងរផងដែរ ដែលបានកំពុងសម្រាកព្យាបាលនៅក្រោមចំការដើមស្វាយរបស់គេ។ 


អំណាយមនុស្សធម៌ចែកជូនក្រុមគ្រួសារនីមួយៗរួមមាន៖ អង្ករ ៣០ គីឡូ មី ១ កេស ត្រីខ ១ យួរ សម្ភារ:ឃីត ១ (មុង សារុង និងភួយ) និងថវិកា ១០ម៉ឺុន រៀល

 

កាកបាទក្រហមកម្ពុជាទទួលអំណោយជាមួកសុវត្ថិភាពពីក្រុមហ៊ុនប្រេងឥន្ធនៈសូគីម៉ិច

កក្រក៖ នាថ្ងៃទី ២៣ ខែឧសភា ឆ្នាំ២០១៦​ លោកជំទាវ​ ពុំ ចន្ទីនី ​អគ្គលេខាធិការ ​កាកបាទក្រហម​កម្ពុជា ​បានជួប​សំណេះសំណាល​ និងទទួល​មួក​សុវត្ថិភាព​ ចំនួន ១០០មួក​ ពី លោក កាង មេងហ៊ាង ​ប្រធាន​ការិយាល័យ​ផ្នែកលក់ ​ក្រុមហ៊ុន​ សុខ គង់​ អាហ័រណ នីហ័រណ​ (ក្រុមហ៊ុន​ប្រេង​ឥន្ធនៈ​សូគីម៉ិច​) នៅទីស្នាក់ការ​កណ្តាល​កាកបាទ​ក្រហម​កម្ពុជា។


ក្នុងឱកាសនោះដែរ​ លោកជំទាវ​អគ្គលេខាធិការ ​បានពាំនាំ​ការផ្តាំផ្ញើ​សាកសួរ​សុខទុក្ខ​ និង​អំណរគុណ​ពីសំណាក់​សម្តេច​កិត្តិព្រឹទ្ធ​បណ្ឌិត​ ប៊ុន រ៉ានី ហ៊ុនសែន​ ប្រធាន​កាកបាទក្រហមកម្ពុជា​ ចំពោះ​ទឹកចិត្ត​មនុស្សធម៌​របស់ក្រុមហ៊ុន​ ដែលបាន​ឧបត្ថម្ភ​ជាមួក​សុវត្ថិភាព​ជូន​កាកបាទ​ក្រហម​កម្ពុជា ដើម្បី​ចូលរួម​ចំណែក​កាត់បន្ថយ​គ្រោះថ្នាក់​ចរាចរណ៍​ដល់ជីវិត​អ្នកធ្វើ​ដំណើរ​តាមទោចក្រ​យានយន្ត។ លោកជំទាវ​អគ្គលេខាធិការ​ បានសំណូមពរ​ក្រុមហ៊ុន​ ជួយ​បន្ត​ឧបត្ថម្ភគាំទ្រ​ដល់សកម្មភាព​មនុស្សធម៌​របស់​កាកបាទក្រហមកម្ពុជា​ ទាំងថ្នាក់កណ្តាល ​និងសាខា ​ដើម្បីឲ្យ​កាកបាទក្រហមកម្ពុជា​មានលទ្ធភាព ​ក្នុងការផ្សព្វផ្សាយ​ និងលើកកម្ពស់​សុវត្ថិភាព​ចរាចរណ៍​ឲ្យកាន់តែ​ទូលំទូលាយ​ថែមទៀត។

 

ជាកិច្ច​ឆ្លើយតប ​លោក កាង មេងហ៊ាង​ បានមាន​ប្រសាសន៍ថា៖ ក្នុងនាម​ជាតំណាង​ក្រុមហ៊ុន ខ្ញុំ​សូមថ្លែងអំណរគុណ​ដល់​កាកបាទ​ក្រហម​កម្ពុជា ដែលបាន​ឲ្យក្រុមហ៊ុន​ចូលរួម​សកម្មភាព​មនុស្សធម៌​ជាមួយ​កាកបាទ​ក្រហម​កម្ពុជា។

នេះជាលើទី២​ហើយ ដែល​ក្រុមហ៊ុន​ឧបត្ថម្ភ​មួកសុវត្ថិភាព​ជូន​កាកបាទក្រហមកម្ពុជា ​ហើយ​ក្រុមហ៊ុន​នឹងបន្ត​គាំទ្ររាល់សកម្មភាព​មនុស្សធម៌​របស់​កាកបាទក្រហមកម្ពុជា ​នាពេល​បច្ចុប្បន្ន​ និងអនាគត។

 

កាកបាទក្រហមកម្ពុជា ប្រគល់ថវិកា ចំនួន ២០លានរៀល ជូនអង្គការគ្រួសារថ្មី

កក្រក៖ នាថ្ងៃទី ១៨ ខែឧសភា​ ឆ្នាំ២០១៦​ លោកជំទាវ ពុំ ចន្ទីនី​ អគ្គលេខាធិការ​កាកបាទ​ក្រហម​កម្ពុជា​ បានជួប​សំណេះសំណាល​ និងប្រគល់​ថវិកា ​លើកទី ៦​ ចំនួន ២០លានរៀល​ ជូនដល់​អង្គការ​គ្រួសារ​ថ្មី ​ដើម្បី​ទ្រទ្រង់ ​និងឲ្យក្មេងៗ​ក្នុងអង្គការ​មានការស្លៀកពាក់ ​និងហូបចុក​គ្រប់គ្រាន់ ​នៅទីស្នាក់ការ​កណ្តាល​កាកបាទ​ក្រហម​កម្ពុជា។


ក្នុងឱកាសនោះដែរ ​លោកជំទាវ​អគ្គលេខាធិការ​ បានពាំនាំ​ការសាកសួរ​សុខទុក្ខ ​ពីសំណាក់ ​សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន​ ប្រធាន​កាកបាទក្រហមកម្ពុជា ​តាមរយៈ ​លោក អូរៃ អូន ​ប្រធាន​អង្គការ​គ្រួសារថ្មី​ ដល់ក្មួយៗ​នៅក្នុង​អង្គការ​ សូមឲ្យមាន​សុខភាពល្អ ​ហើយថវិកា​ដែលប្រគល់​ជូននូវពេលនេះ​ គឺយើងបាន​មកពីការ​ឧបត្ថម្ភពី​សប្បុរសជន ​ក្នុងទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០១៦។

 

ជារៀងរាល់​ឆ្នាំ កាកបាទក្រហមកម្ពុជា​ តែងតែ​ឧបត្ថម្ភ អាហារ​ជុំគ្នា ក្នុង១ឆ្នាំ២ដង​ផងដែរ។

Fist Prev 66 67 68 69 70 Next Last