Webmail
E-Learning
សាខាកាកបាទក្រហមកម្ពុជា

សាខាកាកបាទក្រហមកម្ពុជា

កិច្ចប្រជុំស្តីពី ការត្រៀមរៀបចំកម្មវិធីចាក់ពុម្ពត្រចៀករបស់សាខាកាកបាទក្រហមកម្ពុជារាជធានីភ្នំពេញ

សាខាកក្រករាជធានីភ្នំពេញ៖ នាល្ងាចថ្ងៃទី​២៥​ខែ​មករា​ឆ្នាំ ២០១៧នេះ​នៅទីស្នាក់ការ​សាខាកាកបាទក្រហមកម្ពុជា​រាជធានីភ្នំពេញ​បានរៀបចំ​កិច្ចប្រជុំ​ស្តីពីការត្រៀមរៀបចំ​កម្មវិធី​ចាក់ពុម្ព​ត្រចៀក​ជូនដល់​ប្រជាពលរដ្ឋ​នាខែកុម្ភៈខាងមុខ​និងការងារផ្សេងៗ​ដោយមាន​ការចូលរួម​ពីសំណាក់​លោកជំទាវ ឡោក ខេង អនុប្រធានគណៈកម្មាធិការសាខាព្រមទាំងមានការចូលរួម​ពីមន្ត្រី​ប្រតិបត្តិសាខា និងបុគ្គលិក​មូលនិធិ​ស្តារឃីសរុបចំនួន២៥នាក់ ។

នាឱកាសនោះ លោកជំទាវ​អនុប្រធានគណៈកម្មាធិការ​សាខាបានលើកឡើងថា៖ សាខាកាកបាទក្រហមកម្ពុជា​រាជធានីភ្នំពេញ បានសហការជាមួយ​មូលនិធិ​ស្តារឃីលើការងារពិនិត្យ​ចាក់ពុម្ពត្រចៀក និងការផ្តល់ជូនឧបករណ៍​ជំនួយសំឡេង​ដោយឥតគិតថ្លៃ​ដល់ប្រជាពលរដ្ឋ​គរ ថ្លង់ ចំនួន៨០០នាក់ មកពី​ខេត្តបន្ទាយមានជ័យ បាត់ដំបង ពោធិសាត់ ព្រៃវែង និងរាជធានីភ្នំពេញហើយ​យើងមាន​គម្រោង​ធ្វើកម្មវិធីនេះ​នាថ្ងៃទី១៤ ដល់ថ្ងៃទី១៦ ខែកុម្ភៈ ឆ្នាំ២០១៧ខាងមុខ នៅខណ្ឌឬស្សីកែវដោយក្នុងនោះលោកជំទាវ បានបែងចែក​ភារកិច្ច​ដល់មន្ត្រី​បុគ្គលិកសាខា​ទៅតាមជំនាញ​ព្រមទាំងផ្តល់​អនុសាសន៍ល្អៗ សំដៅជំរុញ​ឲ្យការរៀបចំ​កម្មវិធីនេះ​ប្រព្រឹត្តទៅដោយភាពរលូន និងទទួលបាននូវជោគជ័យ ៕

 

សាខាកាកបាទក្រហមកម្ពុជារាជធានីភ្នំពេញទទួលទេយ្យទានពីព្រះចៅអធិការវត្តសិរីមង្គលគៀនឃ្លាំង

សាខាកក្រករាជធានីភ្នំពេញ៖ នៅវត្ត​សិរីមង្គលគៀនឃ្លាំង​ ក្នុងសង្កាត់ជ្រោយចង្វារ​នាថ្ងៃទី២៤​ ខែ​មករា​ ឆ្នាំ​២០១៧នេះ ក្រុមការងារអនុសាខាកាកបាទក្រហមកម្ពុជា​ខណ្ឌជ្រោយចង្វារ​ដឹកនាំដោយលោកស្រីអ៊ួង សុផល្លា ឃ្លាំង ហួត ប្រធានក្រុមការងារអនុសាខា បានអញ្ជើញទៅទទួលទេយ្យទានសប្បុរសធម៌ពីព្រះចរណៈវិសុទ្ធិ​ វេង​ សេងពេជ​ ព្រះអនុគណខណ្ឌជ្រោយចង្វារ​ និងជាព្រះចៅអធិការវត្ត​សិរីមង្គលគៀនឃ្លាំង​ ព្រមទាំងព្រះមង្គលវិសុទ្ធិ សុខ​ សុភាព​ រាជាគណៈថ្នាក់កិត្តិយស​ ព្រះវិន័យធរ​អនុគណខណ្ឌ​ និងជាព្រះចៅអធិការវត្តវារិន្ទ​ព្រែកលៀប​ ។

 

នាឱកាសនោះ ព្រះចៅអធិការវត្តទាំងពីរ បានមានព្រះថេរដីកាគាំទ្រ និងមានទឹកព្រះទ័យរីករាយ ក្នុងការចូលរួមចំណែកជាមួយសកម្មភាពមនុស្សធម៌របស់កាកបាទក្រហមកម្ពុជា ។

ជាការឆ្លើយតប លោកស្រីប្រធានក្រុមការងារអនុសាខា បានមានប្រសាសន៍សូមថ្លែងអំណរព្រះគុណ​ អំណរគុណចំពោះព្រះចៅអធិការ​ ព្រះសង្ឃ​ គណៈកម្មការ​ អាចារ្យវត្តទាំងពីរ ព្រមទាំងបានសន្យានឹងចាត់ចែងប្រើប្រាស់នូវទេយ្យទានទាំងនេះជួយឲ្យដល់ដៃជនរងគ្រោះគ្រប់ប្រភេទ ឲ្យស្របតាមគោលការណ៍គ្រឹះទាំង៧ប្រការរបស់ចលនាកាកបាទក្រហម ។

 

ទេយ្យទានដែលអនុសាខាបានទទួលរួមមាន៖
-១/​ វត្តសិរីមង្គលគៀនឃ្លាំង៖​ គ្រឿងឧបភោគបរិភោគ សម្ភារៈប្រើប្រាស់​ចំនួន១២មុខ និងថវិកាចំនួន២លានរៀល​ ដែលសរុបគិតជាទឹកប្រាក់ទាំងអស់ស្មើ​នឹង២២.៦៦១.០០០រៀល​ ។


-២/​ រវត្តវារិន្ទ​ព្រែកលៀប​៖​ គ្រឿងឧបភោគបរិភោគ សម្ភារៈប្រើប្រាស់​ចំនួន៥មុខ និងថវិកាចំនួន១លានរៀល​ ដែលសរុបគិតជាទឹកប្រាក់ទាំងអស់ស្មើ​នឹង៤.១០០.០០០រៀល ៕

 

ប្រជាជនរងគ្រោះដោយអគ្គីភ័យនៅស្រុកគីរីវង្សទទួលអំណោយពីសាខាកាកបាទក្រហមកម្ពុជាខេត្តតាកែវ

ខេត្តតាកែវ​ ៖ក្រោយទទួលព័ត៏មាន​ថានៅ​ស្រុកគិរីវង់​មានករណី​អគ្គីភ័យ​បណ្តាល​ឱ្យឆេះផ្ទះ​ប្រជាពលរដ្ឋ​ចំនួនប្រាំខ្នង​រួចមក នារសៀលថ្ងៃទី ២៤ ខែមករា ឆ្នាំ២០១៧នេះ​ សាខាកាកបាទក្រហមកម្ពុជា​ខេត្តតាកែវ​ ដឹកនាំដោយ​ឯកឧត្តម ហ៊ុន សារឿន អនុប្រធានគណៈកម្មាធិការសាខា រួមដំណើរដោយលោកនាយកសាខា មន្ត្រីសាខា អនុសាខាបានចុះសួរសុខទុក្ខ និងនាំយក​អំណោយមនុស្សធម៍​ ទៅចែកជូន​ប្រជាពលរដ្ឋ​ដែលបាន​ជួបអគ្គីភ័យ​ទាំងនោះ។ 


នាឱកាសនោះឯកឧត្តម បានពាំនាំការផ្តាំផ្ញើ​សួរសុខទុក្ខ​ពីសំណាក់ ឯកឧត្តមប្រធានកិត្តិយសសាខា ជាពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល​យកចិត្តទុកដាក់​ចំពោះបងប្អូន​ប្រជាពលរដ្ឋ​ដែលបានជួបការលំបាក​ដោយមិនរើសអើង​ មិនប្រកាន់វណ្ណៈ​ ពូជសាសន៍​ ឬនិន្នាការនយោបាយអ្វីឡើយ។

អំណោយ​ដែលចែកជូន​នាពេលនោះរួមមាន ៖ អង្ករ២៥គីឡូក្រាម មុង១ សារុង១ ក្រមា១ ភួយ១ កន្ទេល១ តង់ធំ១ ដោយឡែក៣ផ្ទះដែលឆេះអស់ទាំងស្រុង បានផ្តល់សង្ក័សី២៥ សន្លឹកក្នុងមួយផ្ទះៗ និងថវិកាមួយចំនួន។


សូមបញ្ជាក់ថាគ្រោះអគ្គីភ័យនេះបានកើតឡើងកាលពីម៉ោង៨និង៣០នាទីព្រឹកថ្ងៃទី២៤ ខែមករា ឆ្នាំ២០១៧ ស្ថិតក្នុងភូមិត្រពាំងព្រីង ឃុំគោកព្រេច ស្រុកគិរីវង់ ខេត្តតាកែវ បណ្តាលឱ្យឆេះផ្ទះអស់ទាំងស្រុង៣ខ្នង និងឆេះមួយចំហៀង២ខ្នង។

 

កម្មករកាត់ដេរដែលរងគ្រោះថ្នាក់ចរាចរណ៍ទទួលអំណោយពីសាខាកាកបាទក្រហមកម្ពុជា ខេត្តកំពង់ស្ពឺ

សាខាកក្រកខេត្តកំពង់ស្ពឺ ៖ កាលពីព្រឹកថ្ងៃទី២៣ ខែមករា ឆ្នាំ២០១៧ ​លោកស៊ុម អ៊ុយហាវ​នាយករងសាខា​កាកបាទក្រហមកម្ពុជាខេត្តកំពង់ស្ពឺ និងសហការី​បានចុះសួរសុខទុក្ខ​និងនាំយកថវិកា​មួយចំនួន​របស់កាកបាទក្រហមកម្ពុជា​ដែលមាន​សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ជាប្រធាន​ជូនដល់​កម្មកររោងចក្រកាត់ដេរ​ដែលរងគ្រោះដោយសារគ្រោះថ្នាក់ចរាចរណ៍ របួសស្រាល ធ្ងន់ ចំនួន ២៩នាក់ ស្ថិតនៅ២ភូមិ ឃុំជើងរាស់ ស្រុកឧដុង្គ ខេត្តកំពង់ស្ពឺ។

 

នាឱកាសនោះដែរ លោកនាយករង បានពាំនាំនូវប្រសាសន៍ផ្ដាំផ្ញើនិងក្ដីនឹករលឹកពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្ដេចតែងតែគិតគូរសុខទុក្ខប្រជាពលរដ្ឋក្រីក្រ ដែលមានទុក្ខលំបាក ជនរងគ្រោះ ជនងាយរងគ្រោះ គ្រប់ប្រភេទ ជាពិសេសជនរងគ្រោះដោយសារគ្រោះថា្នក់ចរាចរណ៍ ដោយមិនប្រកាន់រើសអើង វណ្ណៈ ជាតិសាសន៍ ពណ៍សម្បុរ ឬនិន្នាការនយោបាយអ្វីឡើយ និងសូមឲ្យប្រជាពលរដ្ឋទាំងអស់មេត្តាប្រុងប្រយ័ត្នក្នុងពេលធ្វើដំណើរមិនថាទីជិត ឆ្ងាយក្ដី បើកបរត្រូវពាក់មួកសុវត្ថិភាព ឬពាក់ខ្សែក្រវ៉ាត់ កុំពិសាគ្រឿងស្រវឹងពេលកំពុងបើកបរ។

 

ថវិកាក្នុងម្នាក់ៗទទួលបាន៖ របួសធ្ងន់ ១៥០,០០០រៀល មធ្យម ១០០,០០០រៀល និងស្រាលចំនួន ៥០,០០០រៀលផងដែរ៕

 

ប្រជាជនងាយរងគ្រោះខណ្ឌទួលគោកទទួលអំណោយពីអនុសាខាកាកបាទក្រហមកម្ពុជាខណ្ឌ

សាខាកក្រករាជធានីភ្នំពេញ៖​ នាល្ងាចថ្ងៃទី​២៣ ខែ​មករា​ឆ្នាំ២០១៧​នេះ​ នៅសាលា​សង្កាត់​ផ្សារដេប៉ូទី២​ក្រុមការងារ​អនុសាខាកាកបាទក្រហមកម្ពុជា​ខណ្ឌទួលគោក​ លោកស្រីញ៉ែម មុំប្រធាន​ក្រុមការងារអនុសាខា​បានចុះសាកសួរសុខទុក្ខ​ និងចែកអំណោយ​មនុស្សធម៌ជូនដល់ចាស់ជរា​ ជនពិការ​ ប្រជាពលរដ្ឋមាន​ជីវភាពខ្វះខាត និងអ្នករស់នៅជាមួយមេរោគអេដស៍​សរុបចំនួន១០០គ្រួសារ រស់នៅសង្កាត់​ផ្សារដេប៉ូទី២ ។

 

នាឱកាសនោះ លោកស្រីប្រធានក្រុមកាងារ​បានលើកឡើងពី​ការយកចិត្តទុកដាក់គិតគូរខ្ពស់ពីសំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា​ ចំពោះសុខទុក្ខប្រជាពលរដ្ឋយើងជាទូទៅ​ ជាពិសេសអ្នកដែលរងគ្រោះ​ និងងាយរងគ្រោះគ្រប់ប្រភេទ​ ដោយមិនប្រកាន់ពីនិន្នាការនយោបាយ ជាតិសាសន៍​ សាសនា វណ្ណៈ​ ពណ៌សម្បុរអ្វីទាំងអស់​​ពោល​ (​ទីណាមានការលំបាក​ ទីនោះមានកាកបាទក្រហមកម្ពុជា) ។

 

អំណោយមនុស្សធម៌ដែលបានចែកជូនក្នុង១គ្រួសារៗទទួលបាន៖​ អង្ករ១០គីទ្បូក្រាម​ ឃីត២កញ្ចប់​ និងថវិកាចំនួន២ម៉ឺនរៀល ៕

 

Fist Prev 58 59 60 61 62 Next Last