Webmail
E-Learning
សាខាកាកបាទក្រហមកម្ពុជា

កំពង់ស្ពឺ

សាខាកាកបាទក្រហមកម្ពុជា ខេត្តបាត់ដំបងប្រារព្ធសន្និបាត អាណត្តិទី៥

សាខាកក្រកខេត្តបាត់ដំបង ៖ នៅព្រឹកថ្ងៃ ចន្ទ១៣កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៨ ខែមីនា ឆ្នាំ២០១៩ សាខាកាកបាទក្រហម​កម្ពុជា ខេត្តបាត់ដំបងបានប្រារព្ធ​សន្និបាត​សាខាកាកបាទក្រហមកម្ពុជា ខេត្តបាត់ដំបង អាណត្តិទី៥ (២០១៩-២០២៥)។

សន្និបាតនេះ បានប្រព្រឹត្តទៅក្រោម​អធិបតីភាព លោកជំទាវ ពុំ ចន្ទីនី​ អគ្គលេខាធិការ ​កាកបាទក្រហមកម្ពុជា និងអញ្ជើញ​ចូលរួមពី ឯកឧត្តម អ៊ុយ រី អនុប្រធាន​កិត្តិយសសាខា ឯកឧត្តមបណ្ឌិត ប៊ុត គឹមស៊ាន ប្រធានគណៈកម្មាធិការសាខាអាណត្តិទី៤ និងជាប្រធានអង្គសន្និបាត ព្រមទាំង គណៈកិត្តិយស សមាជិក-សមាជិកាពេញសិទ្ធិ មន្ត្រីបច្ចេកទេស​ទីស្នាក់ការ​កណ្តាល យុវជនកាកបាទក្រហម​កម្ពុជា អ្នកស្ម័គ្រចិត្ត​សរុបចំនួន ២៤៨នាក់ នៅសាលប្រជុំ​សាលាខេត្តបាត់ដំបង។
គោលបំណង​សំខាន់នៃសន្និបាតនេះគឺ៖ 
១- ពិនិត្យ និងអនុម័ត​របាយការណ៍សកម្មភាព​ការងារ និងរបាយការណ៍​ហិរញ្ញវត្ថុ ក្នុងអាណត្តិទី៤ និងផែនការទិសដៅអាណត្តិទី៥ (២០១៩-២០២៥)
២- បោះឆ្នោតជ្រើសរើស​ គណៈកម្មាធិការសាខាអាណត្តិទី៥ 
៣- ប្រកាសសេចក្ដីសម្រេច​តែងតាំង ប្រធាន អនុប្រធានកិត្តិយសសាខា

ក្នុងឱកាសនោះ សន្និបាតសាខា​ បានបោះឆ្នោតជ្រើសរើស​សមាសភាពគណៈកម្មាធិការ​សាខា អាណត្តិទី៥ ដែលមានសមាសភាព ១៥រូប។ យោងកំណត់ហេតុ​កិច្ចប្រជុំលើកទី១នៃ​គណៈកម្មាធិការសាខា អាណត្តិទី៥ សម្រេចឯកភាពគ្នា​ជាឯកឆន្ទ ជ្រើសរើស ឯកឧត្តមបណ្ឌិត ប៊ុត គឹមស៊ាន ជាប្រធាន ឯកឧត្តម ងី សែត ឯកឧត្តមឱសថបណ្ឌិត វឿង ប៊ុនរេត អនុប្រធាន លោក កងប៊ន ​អនុប្រធានប្រចាំកា លោក សូស សុភក្ភ្រ័ ហេរញ្ញិក និងលោកស្រី ស៊ុត ម៉ិ ជាលេខាធិការ​គណៈកម្មាធិការសាខា។

នាឱកាសនោះឯកឧត្តម បណ្ឌិត ​ប៊ុតគឹមស៊ាន បានធ្វើការប្តេជ្ញា​ចិត្តយ៉ាងមុតមាំគឺ 
- កាន់ខ្ជាប់នូវគោលការណ៍​គ្រឹះទាំង៧ នៃចលនាអន្តរជាតិ​កាកបាទក្រហម និងអឌ្ឍចន្ទក្រហម មាន៖ -ភាពមនុស្សធម៌ -ភាពមិនលំអៀង -អព្យាក្រឹតភាព -ឯករាជភាព -សេវាកម្មស្ម័គ្រចិត្ត -ឯកភាព និងសកលភាព។
~ យកចិត្តទុកដាក់​ប្រតិបត្តិតាមគោលការណ៍​ណែនាំ របស់កាកបាទក្រហមកម្ពុជា ដើម្បីបំពេញ​ភារកិច្ចមនុស្សធម៌បានជោគជ័យ។
~ រក្សាសាមគ្គីភាពក្នុងជួរគណៈកម្មាធិការ​សាខា និងទទួលយកការប្រឹក្សា​ជាមួយគណៈកិត្តិយសសាខា និងឯកភាពរួមគ្នាដោះស្រាយបញ្ហាប្រឈម ​ដោយស្មារតីទទួលខុសត្រូវខ្ពស់។
- ដឹកនាំតម្រង់ទិស ក្រុមប្រតិបត្តិសាខា​ឱ្យអនុវត្តបានល្អនូវភារកិច្ច​ ស្របតាមយុទ្ធសាស្រ្ត​កាកបាទក្រហមកម្ពុជា ដែលក្នុងនោះមានវិស័យស្នូល៤រួមមាន៖ -ការគ្រប់គ្រងគ្រោះមហន្តរាយ -សុខភាព និងការថែទាំសុខភាពសហគមន៍ -លើកកម្ពស់គោលការណ៍គ្រឹះ ​និងតម្លៃមនុស្សធម៌របស់ចលនា -អភិវឌ្ឍស្ថាប័ន និងអភិវឌ្ឍធនធាន បង្កើនគំនិតក្នុងការកៀរគរ​រកមូលនិធិពីសប្បុរសជន​ពីគ្រប់មជ្ឈដ្ឋាន ដើម្បីបម្រើការ​មនុស្សធម៌របស់សាខា និងយកចិត្តទុកដាក់​ណែនាំអនុសាខា ឱ្យបំពេញភារកិច្ច​មនុស្សធម៌ឱ្យបានល្អ ស្របតាមវិស័យស្នូលទាំង៤នៃយុទ្ធសាស្រ្ត​កាកបាទក្រហមកម្ពុជា។ 
~ យកចិត្តទុកដាក់បន្តការងារ​ពង្រីកអ្នកស្ម័គ្រចិត្តកាកបាទក្រហម​កម្ពុជានៅមូលដ្ឋាន និងពង្រឹងសកម្មភាពអប់រំសុខភាពសហគមន៍។
- យកចិត្តទុកដាក់ពង្រីក ​និងពង្រឹងសកម្មភាពយុវជន​កាកបាទក្រហមកម្ពុជា ​នៅគ្រឹះស្ថានសិក្សា ជាគំរូក្នុងការងារមនុស្សធម៌ ក្នុងគ្រឹះស្ថានសិក្សា និងសង្គម។

 

សាខាកាកបាទក្រហមកម្ពុជា រាជធានីភ្នំពេញ សួរសុខទុក្ខ ប្រជាពលរដ្ឋដែលរងគ្រោះដោយសារអគ្គីភ័យ នៅ សង្កាត់ស្ទឹងមានជ័យទី២

សាខាកក្រករាជធានីភ្នំពេញ៖ នាព្រឹកថ្ងៃចន្ទ ១៣កេីត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ១៨​ ខែ មីនា​ ឆ្នាំ​ ២០១៩នេះ សាខាកាកបាទក្រហមកម្ពុជា​ រាជធានីភ្នំពេញ ដឹកនាំដោយ ឯកឧត្តម ឃួង​ ស្រេង​ ប្រធានគណៈកម្មាធិការសាខា បានចុះសាកសួរសុខទុក្ខ​ និងនាំយក​អំណោយមនុស្សធម៌​ទៅចែកជូនដល់ប្រជាពលរដ្ឋដែលរងគ្រោះ​ដោយសារអគ្គីភ័យចំនួន៥០គ្រួសារ ​កាលពីវេលា​ម៉ោង៣:០០រសៀល​ ថ្ងៃទី ១៧​ ខែ មីនា​ ឆ្នាំ ២០១៩ ស្ថិតនៅក្រុម៩ ភូមិព្រែកទាល់១​ សង្កាត់ស្ទឹងមានជ័យទី២ ខណ្ឌមានជ័យ ។

មានប្រសាសន៍​នាខណៈនោះ ឯកឧត្តម ឃួង​ ស្រេង​ បានពាំនាំនូវការចូលរួមសោកស្តាយពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជាមួយគ្រួសាររងគ្រោះ និងសូមឲ្យមេត្តាកាត់ចិត្ត កុំអស់សង្ឃឹម ឲ្យតែនៅ​មានជីវិតរស់នៅ គឺបងប្អូន​អាចប្រកបរបររកទទួលទាន ​ដើម្បីស្តារជីវភាពគ្រួសារឡើងវិញ ​ព្រមទាំងសូម​អំពាវនាវក្រើនរំលឹកដល់បងប្អូន​ប្រជាពលរដ្ឋទាំងអស់សូម​ប្រុងប្រយត័្នឲ្យបានខ្ពស់ក្នុងការបង្ការចំពោះគ្រោះអគ្គីភ័យនេះ ។ ជាមួយគ្នានោះ​ ឯកឧត្តមប្រធានគណៈកម្មាធិការសាខា ក៏បានគូសបញ្ជាក់ថា៖ សម្ដេចកិត្តិព្រឹទ្ធបណ្ឌិតប្រធាន ប៊ុន រ៉ានី ហ៊ុន សែន តែងតែយកចិត្តទុក​ដាក់គិតគូរជាប់ជានិច្ចចំពោះសុខទុក្ខ​ប្រជាពលរដ្ឋជាទូទៅ ជា​ពិសេសជនរងគ្រោះ និងងាយរងគ្រោះ​គ្រប់ប្រភេទ ដោយមិនប្រកាន់ពីវណ្ណៈ ពណ៌សម្បុរ ជំនឿសាសនា ឬនិន្នាការនយោបាយ​អ្វីឡើយ ពោល “កាកបាទក្រហមកម្ពុជា​មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល“ ៕

អំណោយមនុស្សធម៌​ដែលបានចែកជូនក្នុង១គ្រួសារៗទទួលបាន៖​ គ្រឿងឧបភោគបរិភោគ សម្ភារៈប្រេីប្រាស់ចំនួន១៣មុខ និងថវិកាចំនួន៥មុឺនរៀល ៕

 

បើកវគ្គបណ្តុះបណ្តាលជាមូលដ្ឋានស្តីពីប្រវត្តិចលនាកាកបាទក្រហម អឌ្ឍចន្ទក្រហម និងវិជ្ជាសង្គ្រោះបឋមនៅខេត្តសៀមរាប

សាខាកក្រកខេត្តស្វាយរៀង៖ នៅព្រឹកថ្ងៃចន្ទ ១៣កើត ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១៨ ខែ មីនា ឆ្នាំ ២០១៩ សាខាកាកបាទក្រហម​កម្ពុជាខេត្តស្វាយរៀង បាន​ បើកវគ្គបណ្តុះបណ្តាលជាមូលដ្ឋាន​ស្តីពីប្រវត្តិចលនា​កាកបាទក្រហម អឌ្ឍចន្ទក្រហម និងវិជ្ជាសង្គ្រោះបឋម ដល់ទីប្រឹក្សា និងយុវជន​កាកបាទក្រហមកម្ពុជា និងយុវជន​កាកបាទក្រហមកម្ពុជាទើប​ជ្រើសរើសថ្មីប្រចាំ​វិទ្យាល័យស្វាយរៀង សរុបចំនួន ៤០នាក់ ស្ត្រី ១៣ នាក់ ហើយ​នៅថ្ងៃបន្ទាប់សាខា នឹងបណ្តុះបណ្តាល​ដល់ទីប្រឹក្សា និងយុវជន​មកពីវិទ្យាល័យ ហ៊ុនសែន ចេក ចំនួន ២៧ នាក់ ។

 

ពិធីនេះបានការអញ្ជើញ​ចូលរួមពីលោកជំទាវ ពៅ សុភាព ហេរញ្ញឹកគណៈកម្មាធិការសាខា និងមានការអញ្ជើញ​ចូលរួមពីលោក ពិន ដារ៉ា អនុប្រធាន​មន្ទីរអប់រំយុវជន និងកីឡាខេត្ត លោកនាយកសាខា លោកនាយកវិទ្យាល័យ​ស្វាយរៀង ក្រុមប្រតិបត្តិសាខា ទីប្រឹក្សា និងយុវជន​កាកបាទក្រហមកម្ពុជា សរុបចំនួន ៥០ នាក់ ដែលប្រព្រឹត្តទៅនៅទីស្នាក់ការសាខា ។


ក្នុងគោលបំណង ​ដើម្បីពង្រឹងនិងពង្រីក​សមត្ថភាពដល់​អ្នកស្ម័គ្រចិត្ត និងយុវជន​កាកបាទក្រហមកម្ពុជា បានយល់ដឹងពីប្រវត្តិ​ចលនាកាកបាទក្រហម អឌ្ឍចន្ទក្រហម​ និងវិជ្ជាសង្គ្រោះបឋម និងធ្វើការផ្សព្វផ្សាយបន្ត​ទៅដល់សាលារៀន មិត្តភ័ក្រ និងសហគមន៍​ដែលខ្លួនរស់នៅ ៕
ក្នុងពិធីបើកវគ្គ​បណ្ដុះបណ្ដាលនេះ លោកជំទាវ ពៅ សុភាព បានពាំនាំនូវ​ការផ្ដាំផ្ញើការ​សួរសុខទុក្ខដោយក្ដីស្រឡាញ់ និងនឹករលឹក​បំផុតពីសំណាក់ ឯកឧត្តម ម៉ែន វិបុល ប្រធានគណៈកម្មាធិការ​សាខា ជាពិសេស​សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា សូមមាន​សុខភាពល្អបរិបូរណ៍ ប្រាជ្ញាឈ្លាសវៃ ​កម្លាំងមាំមួន ដើម្បីបំពេញ​សកម្មភាពការងារ​មនុស្សធម៌ និងការងារសង្គមបន្ដទៀត។ ជាមួយគ្នានេះដែរ លោកជំទាវ បានថ្លែងនូវការ​កោតសរសើរចំពោះទីប្រឹក្សា និងយុវជនកាកបាទក្រហមកម្ពុជា​ទាំងអស់ ដែលតែងតែង​យកចិត្តទុកដាក់ពង្រឹង និងពង្រីក​សកម្មភាពមនុស្សធម៌របស់កាកបាទក្រហមកម្ពុជា ដូចភ្លៀង​រលឹមចាប់តាំងពីមុនមក រហូតមក​ដល់បច្ចុប្បន្ននេះ។

ក្នុងនោះដែរ លោកជំទាវសំណូមពរ​ឲ្យអ្នកចូលរួមទាំងអស់ ខិតខំយកចិត្តទុកដាក់ ក្រេបជញ្ជក់​ចំណេះដឹងពីគ្រូបង្ហាត់ឲ្យបានល្អ ដើម្បីចូលរួមក្នុង​សកម្មភាពមនុស្សធម៌​ឲ្យកាន់តែល្អបន្ថែមទៀត ហើយត្រូវ​យកចំណេះដឹងទាំងអស់នេះ​ទៅផ្សព្វផ្សាយបន្ត ដល់មិត្តភ័ក្រ​នៅសាលា និងនៅសហគមន៍​ដែលខ្លួនរស់នៅ ត្រូវគោរពច្បាប់ចរាចរណ៍ ជៀសឲ្យឆ្ងាយ ពីល្បែងពាលា​អាវាសែ និងគ្រឿញៀន ដែលបង្ករគ្រោះថ្នាក់​ធ្ងន់ធ្ងរដល់យុវជន និងសង្គមជាតិ បន្តរក្សាបាននូវ​ស្ថេរភាព នៃកិច្ចអភិវឌ្ឈន៍​បរិស្ថាន សន្តិភាព និងបន្តពង្រីកកម្លាំងយុវជន ឲ្យ ស្ថិតនៅ​ជាកម្លាំងស្នូល​សម្រាប់ការងារ ជួយសង្គ្រោះ​នានា រួមចំណែក​ដល់ការលើក​កម្ពស់វឌ្ឍនភាព និងសេចក្តីថ្លៃ​ ថ្នូរ របស់មនុស្សជាតិ ។

សាខាកក្រក ខេត្តព្រៃវែង ចុះសួរសុខទុក្ខ ប្រជាពលរដ្ឋរងគ្រោះដោយសារភ្លើងឆេះតូប ផ្សារក្រុងព្រៃវែង

សាខាកក្រក​ ខេត្តព្រៃវែង ៖ នៅថ្ងៃចន្ទ ១៣កើត ខែផល្គុន ឆ្នាំច សំរឹទ្ធិស័ក ព.ស. ២៥៦២ ត្រូវនឹង ថ្ងៃទី១៨ ខែមីនា ឆ្នាំ២០១៩ ឯកឧត្តម ជា សុមេធី ​ប្រធានគណៈកម្មាធិការសាខា​ខេត្ត បានដឹកនាំក្រុមប្រតិបត្ត​សាខា ក្រុមការងារ​អនុសាខា​ក្រុងព្រៃវែង និងយុវជន​កក្រក ចុះសួរសុខទុក្ខ និងនាំយកអំណោយ​មនុស្សធម៌​របស់កាកបាទក្រហម​កម្ពុជា ផ្តល់ជូនប្រជាពលរដ្ឋ​រងគ្រោះដោយសារ​ភ្លើងឆេះតូបចំនួន ៤តូប ស្មើនឹង ៤គ្រួសារ នៅផ្សារ​ក្រុងព្រៃវែង ភូមិ០៣ សង្កាត់កំពង់លាវ ក្រុងព្រៃវែង ខេត្តព្រៃវែង ។

 

នាឱកាសនោះ ឯកឧត្តម ជា សុមេធី ប្រធានគណៈកម្មាធិការ​សាខាខេត្ត បានពាំនាំមកនូវប្រសាសន៍ផ្តាំផ្ញើសាកសួរសុខទុក្ខ និងក្ដីនឹករលឹកពីសំណាក់ ​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចតែងតែ​គិតគូរពីសុខទុក្ខរបស់បងប្អូនប្រជាពលរដ្ឋ ដែលជួបការលំបាក​ ទីទ័លក្រ មានជំងឺ ជនងាយ​រងគ្រោះ ជនរងគ្រោះដោយគ្រោះ​មហន្តរាយផ្សេងៗ ដោយមិនប្រកាន់​រើសអើងវណ្ណៈ ជាតិសាសន៍ ពណ៌សម្បុរ​ឬនិន្នាការនយោបាយ​អ្វីឡើយ និងសូមឲ្យបងប្អូនប្រជាពលរដ្ឋ​ទាំងអស់ប្រកាន់​យកនូវអនាម័យ​ល្អ រស់នៅស្អាត ហូបស្អាត ផឹកស្អាត និងមុនពេលចេញពីផ្ទះសូមឱ្យមាន​ការប្រុងប្រយ័ត្ន​ចំពោះភ្លើងធូប ភ្លើងទៀន ភ្លើងចង្ក្រាន ធុងហ្គាស និងបិទ​កុងតាក់ភ្លើងមុនពេល​ចេញពីផ្ទះ ជៀសវាងកើតឡើង​ដូចករណីខាងលើ។

សម្ភារៈដែលបាន​ផ្តល់ជូនរួមមាន ៖ អង្ករ ៥០គីឡូក្រាម ឃីត ១កញ្ចប់(មុង ភួយ ក្រមា សារ៉ុង) មី ៥កេស ត្រី ខ ២យួរ ទឹកត្រី ២យួរ ទឹកស៊ីអ៊ីវ ២យួរ និងថវិកាចំនួន ៤០០,០០០រៀល។ នាឱកាសនោះ ឯកឧត្តម ជា សុមេធី ប្រធានគណៈកម្មាធិការ​សាខា បានឧបត្ថម្ភថវិកា​ផ្ទាល់ខ្លួនបន្ថែម​ចំនួន២០០,០០០រៀល សរុប ៨០០,០០០រៀល និងឯកឧត្តម អ៊ុក សិទ្ធិជាតិ ប្រធានក្រុមការងារចុះជួយក្រុងព្រៃវែង ឧបត្ថម្ភថវិកា​បន្ថែមចំនួន ២០០,០០០រៀល សរុប ៨០០,០០០រៀល។

 

សាខាកាកបាទក្រហមកម្ពុជា ខេត្តកែប ចុះសួរសុខទុក្ខ ប្រជាពលរដ្ឋរងគ្រោះដោយសារខ្យល់កន្ត្រាក់ នៅស្រុកដំណាក់ចង្អើរ ខេត្តកែប

សាខាកក្រកខេត្តកែប ៖ កាលពីរសៀលថ្ងៃសៅរ៍ ១១កើត ខែផល្គុន ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី ១៦ ខែ មីនា ឆ្នាំ២០១៩ សាខា​កាកបាទក្រហម​កម្ពុជា ខេត្តកែប ដឹកនាំដោយ​ឯកឧត្តម កែន សត្ថា​ ប្រធានគណៈកម្មាធិការ​សាខា និងសហការី បានចុះសួរសុខទុក្ខ និងនាំយក​អំណោយមនុស្សធម៌របស់​កាកបាទក្រហម​កម្ពុជា​ ជូនដល់​ប្រជាពលរដ្ឋ​រងគ្រោះដោយសារ​ខ្យល់កន្ត្រាក់ ចំនួន ១គ្រួសារ ស្ថិតនៅ​ស្រុកដំណាក់ចង្អើរ​ ខេត្តកែប។

នាឱកាសនោះ ឯកឧត្តមប្រធាន បានសំដែងនូវការ​សោកស្ដាយជាមួយ​ក្រុមគ្រួសារ​រងគ្រោះដែលនឹកស្មានមិនដល់​ ហើយក៏បានផ្តាំផ្ញើការ​សួរសុខទុក្ខ ពីសំណាក់ ​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា ដែលជានិច្ចកាល​សម្តេចតែងតែ​យកចិត្តទុកដាក់​ចំពោះបងប្អូនប្រជាពលរដ្ឋ​ដែលបានជួបការ​លំបាកដោយ​មិនរើសអើង​ មិនប្រកាន់វណ្ណៈ ​ពូជសាសន៍ ​ឬនិន្នាការ​នយោបាយអ្វីឡើយ។

សម្ភារដែលបាន​ផ្ដល់ជូនរួមមាន ៖ អង្ករ ៥០គីឡូក្រាម មី ២កេស ​ទឹកត្រី ២ឡូ ត្រីខ ១០កំប៉ុង សង្ក័សី ៤០សន្លឹក អាវយឺតថ្មី៤ និងថវិកាមួយចំនួន៕

Fist Prev 4 5 6 7 8 Next Last