Webmail
E-Learning
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា

ទីស្នាក់ការកណ្តាល

កាកបាទក្រហមកម្ពុជា បិទវគ្គបណ្តុះបណ្តាល ស្តីពី គន្លឹះដើម្បីភាព ជោគជ័យ និងភាព ជាអ្នកដឹកនាំនៅខេត្តកំពង់ឆ្នាំង

សាខាកក្រកខេត្តកំពង់ឆ្នាំង​ ៖​ ថ្ងៃ សុក្រ ៧ កើត ខែ ចេត្រ ឆ្នាំរកា ព.ស ២៥៦១ ត្រូវនឹងថ្ងៃទី ២៣ ខែ មីនា ឆ្នាំ ២០១៨ សាខាកក្រក ខេត្តកំពង់ឆ្នាំង សហការជាមួយ  កាកបាទក្រហមកម្ពុជា  បានរៀបចំ (Operacy) រយៈពេល ៤ថ្ងៃ គឺ ២០-២៣ ខែមីនា ឆ្នាំ ២០១៨​​ ក្រោម អធិបតីភាព ឯកឧត្តម យូ ឡាណា អគ្គលេខាធិកា រងទី ២ របស់កក្រក ឯកឧត្តម ហ៊ី​ ណាត ប្រធានគណៈកម្មាធិការសាខាកក្រកខេត្តកំពង់ឆ្នាំង លោកគ្រូ Christopher Lee ស្ថាបនិកមជ្ឈមណ្ឌល​អភិវឌ្ឍន៍​មនុស្ស និងផែនដី (HEDC) និងលោក លោកស្រីជាសិក្ខាកាម ដែលមាន​សមាសភាពមកពី​ សាខា​បាត់ដំបង ត្បូងឃ្មុំ ខេត្តព្រះសីហនុ​និងសាខាកំពង់ឆ្នាំង សរុប ៦០ នាក់ ស្រី ១៤នាក់ ស្ថិតក្នុង​ភូមិស្រែព្រីង សង្កាត់​កំពង់ឆ្នាំង ខេត្តកំពង់ឆ្នាំង នៅសណ្ឋាគារ​រស្មីសុខាញ៉ូយ៉ក។

ក្នុងនោះផងដែរ ឯកឧត្តម​អគ្គលេខាធិការរងទី២​ បានផ្តាំផ្ញើក្តី​នឹករលឹក​របស់សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កក្រក និងបានថ្លែងអំណរគុណ​យ៉ាងជ្រាលជ្រៅ​ចំពោះលោកគ្រូ​អ្នកគ្រូនឹងសិក្ខាកាមទាំងអស់​ដែលបានខិតខំ​សិក្សារៀនសូត្រ​ដោយយកចិត្ត​ទុកដាក់ និងទទួល​បានលទ្ធផល​ជោគជ័យ។

ចុងក្រោយ​ ឯកឧត្តម​ បានផ្តល់វត្តមានចែកវិញ្ញាបនបត្រជូនសិក្ខាកាម និងថតរូបជាអនុស្សាវរីយ៍ប្រកបដោយ​បរិយាកាសរីករាយ ។

សិក្ខាកាមទាំងអស់​មានក្តីសប្បាយរីករាយ នឹងសូមគោរពជូនពរ​ឯកឧត្តម នឹងសហការី​ជួបប្រទះព្រះពុទ្ធពរបួនប្រការគឺ អាយុ វណ្ណៈ សុខៈ ពលៈ កុំបីអាក់ខានឡើយ៕

 

កាកបាទក្រហមកម្ពុជា ផ្តល់អំណោយមនុស្សធម៌ ជូន ចាស់គ្មានទីពឹង កុមារកំព្រា ស្ត្រីមេម៉ាយ គ្រួសារជនពិការ និងអ្នករស់នៅជាមួយមេរោគអេដស៍ នៅ ខេត្តកំពត។

នៅព្រឹកថ្ងៃទី​ ២១​ ខែមីនា​ ឆ្នាំ២០១៧​ នេះ​ កាកបាទក្រហម​កម្ពុជា​ ដែលមាន​សម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ជាប្រធាន​ បានផ្តល់អំណោយ​មនុស្សធម៌ ជូន ចាស់គ្មានទីពឹង​ កុមារកំព្រា ស្ត្រីមេម៉ាយ គ្រួសារជនពិការ​ និងអ្នករស់នៅជាមួយ​មេរោគអេដស៍​ ចំនួន​ ៦៨៨គ្រួសារ​ ដែលរស់នៅ​ក្នុងភូមិចំនួន៣៩​ ឃុំចំនួន​ ៩​ នៃស្រុកជុំគិរី​ និងស្រុកឈូក​ ខេត្តកំពត។

 

ក្នុងឱកាសសំណេះសំណាល​នោះ លោកជំទាវ​ ម៉ែន​ នារីសោភ័គ​ អគ្គលេខាធិការរងទី ១​ កាកបាទក្រហមកម្ពុជា បានពាំនាំ​ប្រសាសន៍ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា​ ដែលផ្តាំផ្ញើគិតគូរ​ សួរសុខទុក្ខ​ និងអនុសាសន៍ចំពោះ​ប្រជាពលរដ្ឋទាំងអស់រួមមាន​ ៖​

 

១/​ សូមត្រៀមបង្ការចំពោះការកើនឡើងកម្តៅខ្លាំង​ និងកង្វះទឹកប្រើប្រាស់ក្នុងរដូវប្រាំងនេះ។​

២/​ សូមប្រុងប្រយ័ត្នចំពោះ​ ខ្យល់កន្ត្រាក់​ ខ្យល់ព្យុះ​ និងភ្លើងឆេះផ្ទះ។​

៣​/​ សូមពិសារទឹកដាំឆ្អិន​ និងពិសារឱ្យបានច្រើនដើម្បីសុខភាពល្អ។​

៤/​ សូមគោរពច្បាប់ចរាចរណ៍​ និងជៀសវាងការបើកបរក្រោមឥទ្ធិពលនៃគ្រឿងស្រវឹង​ ដើម្បីកាត់បន្ថយគ្រោះថ្នាក់នៅតាមដងផ្លូវ។​

៥/​ សូមអាណាព្យាបាលណែនាំកូន-ក្មួយ​ ឱ្យជៀសឆ្ងាយពីគ្រឿងញៀន​ ដែលជាប្រភពនៃអំពើហិង្សា​ ចោរកម្ម​ ចារកម្ម​ និងអសន្តិសុខ។​

៦/​ សូមស្ត្រីមានផ្ទៃពោះ​ ទៅពិនិត្យផ្ទៃពោះឱ្យបានទៀងទាត់​ និងទៅសម្រាលកូននៅមណ្ឌលសុខភាពដើម្បីសុខភាព​ និងសុវត្ថិភាពទាំងម្តាយ​ និងកូន។

ប្រជាពលរដ្ឋទាំងអស់​ មានក្តីរំភើប​ និងសប្បាយរីករាយឥតឧបមា​ ព្រោះបានកាកបាទក្រហមកម្ពុជា​ ក្រោមការដឹកនាំរបស់សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន ចុះជួយសម្រាលទុក្ខលំបាកដល់ពួកគាត់បានទាន់ពេលវេលា​ និងមិនមានការរើសអើងអ្វីឡើយ។​

គ្រួសារនីមួយៗទទួលបាន ៖ អង្ករ​ ៣០គីឡូក្រាម​ មី​ ១កេស​ ត្រីខ​ ១០កំប៉ុង​ នំប៉័ង​ ១ដើម​ ទឹកសុទ្ធ​ ១ដប មុង​ ១​ ភួយ​ ១​ សារុង​ ១​ និងក្រមា​ ១។​ ដោយឡែក​ ប្រគេនព្រះសង្ឃគង់នៅវត្តអង្គចក​នូវ​ ៖​ អង្ករ​ ៩០គីឡូក្រាម​ មី​ ៥កេស​ ត្រីខ​ ៥០កំប៉ុង​ និងបច្ច័យ​ ៤០០.០០០រៀល៕

 

កាកបាទក្រហមកម្ពុជា ផ្តល់អណ្តូងទឹកស្អាត ជូនប្រជាជនស្រុកលំផាត់ ខេត្តរតនគិរី

កក្រក ៖ នាព្រឹកថ្ងៃអង្គារ ៤កើត ខែចេត្រ ឆ្នាំរកា ព.ស ២៥៦១ ត្រូវនឹងថ្ងៃទី២០ ខែមីនាឆ្នាំ២០១៨ កាកបាទក្រហម​កម្ពុជា ដែលមាន សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ​បានសម្ពោធ​ឱ្យប្រើប្រាស់អណ្តូងទឹកស្អាត ចំនួន ១២ (មានលេខរៀងចាប់ពី ៦២ ដល់លេខរៀងទី ៧៣) ក្រោមអធិបតីភាព ឯកឧត្ដម​វេជ្ជ. អ៊ុយ សំអាត នាយក នាយដ្ឋានគ្រប់គ្រង​គ្រោះមហន្តរាយ និងឯកឧត្តម គិត ទ្រី អនុប្រធានគណៈកម្មាធិការ សាខា កក្រក ខេត្តរតនគិរី ជូនប្រជាជនខ្វះខាតទឹកប្រើប្រាស់ចំនួន ៣០០ គ្រួសារ ស្មើនឹង ១,១៧២នាក់ រស់​នៅក្នុងឃុំចំនួន០៦ គឺឃុំបាតាង ឃុំជ័យឧត្តម ឃុំកាឡែង ឃុំល្បាំង១ ឃុំល្បាំង២ និងសេដា នៃ​ស្រុកលំផាត់ ខេត្តរតនគិរី ។

ក្នុងឱកាសប្រគល់អណ្តូង​ទឹកនោះ ឯកឧត្តមវេជ្ជ. បានពាំនាំប្រសាសន៍ សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ដែលផ្តាំផ្ញើសួរ​សុខទុក្ខ ក្តីនឹករលឹកជូនលោកយាយ​លោកតា និងសូមផ្តាំផ្ញើឱ្យយកចិត្តទុកដាក់ថែទាំសុខភាព​ឱ្យបានល្អ ពិសេសត្រូវបរិភោគ​ទឹកដាំពុះ និងចូលរួមដាំ​ដំណាំ ឬបន្លែផ្សេងៗនៅក្បែរ​អណ្តូង ដើម្បីជាប្រយោជន៍ដល់​គ្រួសារ និងសហគមន៍ ហើយត្រូវថែរក្សា​រាល់សមិទ្ធផលទាំងនេះឱ្យបានគង់វង្សយូរអង្វែង។

ប្រជាពលរដ្ឋដែលចូលរួមក្នុង​ឱកាសនោះ ស្ត្រីម្នាក់ៗទទួលបាន សារុង១ និងបុរសៗ ទទួលបាន ក្រមា១។ ក្រោយពីទទួលបានសមិទ្ធផលនេះ បានសំដែងនូវក្តី​រំភើបរីករាយ ដោយបានការយកចិត្តទុក​ដាក់ពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជួយដោះស្រាយ​បញ្ហាទឹកស្អាត​ជូនប្រជាពលរដ្ឋខ្វះខាតទឹកប្រើប្រាស់ ហើយដែល​ពួកគាត់មិន​ពិបាកទៅរែក​ទឹកអូរនៅឆ្ងាយផ្ទះ ឬចំណាយ​ថវិកាទិញទឹកគេដូចមុនទៀតឡើយ។

សូមបញ្ជាក់ថា ប្រជាពលរដ្ឋ​ក្នុងខេត្តរតនគិរី បានទទួលអណ្តូង​ទឹកស្អាតពី កក្រក សរុបចំនួន ៤៦ អណ្តូង ចាប់ពីឆ្នាំ២០១៧ មកដល់បច្ចុប្បន្ន៕

 

កាកបាទក្រហមកម្ពុជាអញ្ជើញជាវាគ្មិនកិត្តិយស កម្មវិធីអប្សរាការពិត របស់ស្ថានីយ៍ទូរទស្សន៍អប្សរា

កក្រក​ ៖​ នៅថ្ងៃព្រហស្បតិ៍ ១៤រោច​ ខែផល្គុន​ ឆ្នាំរកា នព្វស័ក ព.ស.២៥៦១ ត្រូវ​នឹងថ្ងៃ​ទី ១៥ ខែមីនា ឆ្នាំ២០១៨ នេះ​ លោកជំទាវ ម៉ែន នារីសោភ័គ​ អគ្គលេខាធិការ​រងទី ១ កាកបាទក្រហម​កម្ពុជា​ បានអញ្ជើញ​ជាវាគ្មិន​កិត្តិយស ក្នុងកម្មវិធី​អប្សរាការពិត​ របស់ស្ថានីយ៍​ទូរទស្សន៍អប្សរា​ លើកិច្ច​ពិភាក្សា​ក្រោមប្រធានបទ ៖​ "ការប្រារព្ធ​ទិវាពិភព​លោក​កាកបាទក្រហម​ អឌ្ឍចន្ទក្រហម ៨ ឧសភា"។

សូមបញ្ជាក់​ជូនថា ៖ កាកបាទក្រហម​កម្ពុជានឹងប្រារឰ​មិទ្ទីងថ្នាក់ជាតិ ​ដើម្បីអបអរ​ខួបទី ១៥៥ ទិវាពិភពលោក កាកបាទក្រហម អឌ្ឍចន្ទ​ក្រហម ៨ ឧសភា ២០១៨​ "កាកបាទក្រហមកម្ពុជាមានគ្រប់ទីកន្លែង​ សម្រាប់គ្រប់ៗគ្នា​ -​ មិនទុកនរណាម្នាក់ចោល"​ នៅទីស្នាក់ការ​កណ្ដាល កាកបាទក្រហម​កម្ពុជា នាព្រឹកថ្ងៃអង្គារ ៩រោច​ ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹង ថ្ងៃទី ៨ ខែ ឧសភា ឆ្នាំ ២០១៨ នៅវេលាម៉ោង ៨ ព្រឹក ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហា​សេនាបតី​តេជោ ហ៊ុន សែន នាយករដ្ឋមន្ដ្រី នៃ​ព្រះរាជាណាចក្រកម្ពុជា៕

 

 

កាកបាទក្រហមកម្ពុជា ទទួលថវិកា ៣.០០០ដុល្លារ ពីព្រះអរិយមគ្គញ្ញាណ សូរ សារិទ្ធិ៍ ព្រះគ្រូសូធ្យស្តាំវត្តលង្កា

កក្រក​ ៖ នៅព្រឹក​ចន្ទ ១១រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹង​ថ្ងៃទី ១២ ខែមីនា ឆ្នាំ២០១៨ នេះ កាកបាទក្រហម​កម្ពុជា ដែលមាន​សម្ដេច​កិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បាន​ទទួលជួប​សវនាការ និងទទួលអំណោយ​មនុស្សធម៌ជាទឹកប្រាក់ ៣.០០០ដុល្លារ (បីពាន់ដុល្លារអាមេរិក) ពីព្រះអរិយ​មគ្គញ្ញាណ សូរ សារិទ្ធិ៍ ព្រះគ្រូសូធ្យ​ស្តាំវត្តលង្កា​ព្រះកុសុមារាម និងជាព្រះ​ចៅអធិការវត្តពុទ្ធិការាម រដ្ឋយូថាហ៍ សហរដ្ឋ​អាមេរិក ដោយមានការ​និមន្តជូនដំណើរ​ពី សម្តេចព្រះមហា​អរិយវង្ស សៅរ៍ ចន្ទថុល្ល ព្រះចៅអធិការ​វត្តលង្កា ព្រះកុសុមារាម ដែលពិធីនេះ​ប្រព្រឹត្ដទៅ​នៅទីស្នាក់ការ​កណ្តាលកាកបាទក្រហម​កម្ពុជា។

 

ក្នុងឱកាសនោះ លោកជំទាវ ពុំ ចន្ទីនី អគ្គលេខាធិការ បានពាំនាំ​ប្រសាសន៍របស់ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំសួរសុខទុក្ខ​ប្រគេនពរ​ចំពោះព្រះអង្គទាំងទ្វេ ដែលបាននិមន្តមកលើកទឹកចិត្ត និងគាំទ្រដល់​កាកបាទក្រហម​កម្ពុជា ដែលនេះជាកាយវិការដ៏ល្អប្រពៃរបស់ព្រះអង្គក្នុងការរួមចំណែកក្នុង​សកម្មភាពមនុស្សធម៌។ លោកជំទាវ បានមានប្រសាសន៍​បន្ថែមថាៈ ចំពោះអំណោយជាថវិកា​ក្នុងថ្ងៃនេះ កាកបាទក្រហម​កម្ពុជា នឹងយកទៅ​ប្រើប្រាស់ ប្រកបដោយ​តម្លាភាព ជាពិសេស​ជួយដល់ ប្រជាជន​ដែលទទួលរង​គ្រោះមហន្តរាយផ្សេងៗ និងជនងាយ​រងគ្រោះបំផុត ដែលកំពុង​ត្រូវការឱ្យជួយជាចាំបាច់។ ជាមួយគ្នានេះ ជំនួសមុខ សម្តេច​កិត្តិព្រឹទ្ធបណ្ឌិតប្រធាន លោកជំទាវអគ្គលេខាធិការ បានប្រគេនពរដល់​ព្រះអង្គទាំងទ្វេ សូមមានព្រះសុខភាព​ល្អបរិបូរណ៍ ជន្មាយុយ៉ឺនយូរ ដើម្បីជួយទ្រទ្រង់ដល់វិស័យព្រះពុទ្ធសាសនា បានគង់វង្សយូរអង្វែងតទៅ។

 

សម្តេចព្រះមហាអរិយវង្ស សៅរ៍ ចន្ទថុល្ល និង​ព្រះអរិយមគ្គញ្ញាណ សូរ សារិទ្ធិ៍ បានមាន​សង្ឃដីការ ថ្លែងអំណរគុណចំពោះ កាកបាទក្រហមកម្ពុជា ដែលអនុញ្ញាត​ឱ្យចូលជួបសម្តែងការ​គួរសម និងជូនបច្ច័យ ដើម្បីចូលរួមចំណែកការងារ​មនុស្សធម៌ជាមួយ​កាកបាទក្រហមកម្ពុជា និងជូនពរ​ដល់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសហការី ឱ្យទទួលបានជោគជ័យបន្ថែមទៀតក្នុង​ការងារមនុស្សធម៌ និងជួបប្រទះតែព្រះពុទ្ធពរ​ ៥ប្រការ​ កុំបីឃ្លៀងឃ្លាតឡើយ៕

 

Fist Prev 3 4 5 6 7 Next Last