Webmail
E-Learning
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា

ទីស្នាក់ការកណ្តាល

វគ្គផ្សព្វផ្សាយជាមូលដ្ឋានស្ដីពីគោលការណ៍គ្រឹះរបស់ចលនាអន្តរជាតិ និង ច្បាប់មនុស្សធម៌អន្តរជាតិនៅសាកលវិទ្យាល័យបញ្ញាជាតិ

កក្រក ៖ នាព្រឹកថ្ងៃព្រហស្បតិ៍ ៣កើត ខែជេស្ឋ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី ៤ ខែ កក្កដា ឆ្នាំ២០១៩នេះ ​កណ្ដាល​កាកបាទក្រហមកម្ពុជា​ បានចុះធ្វើការផ្សព្វផ្សាយ​ជាមូលដ្ឋានស្ដីពី​គោលការណ៍គ្រឹះ​របស់ចលនាអន្តរជាតិ​ កាកបាទក្រហមកម្ពុជា ​និងអឌ្ឍចន្ទក្រហម ​ច្បាប់មនុស្សធម៌អន្តរជាតិ​ ជូនដល់និស្សិតនៃសាកលវិទ្យាល័យបញ្ញាជាតិ ​ដែលមានការចូលរួម​ពីលោកគ្រូទីប្រឹក្សាយុវជន ​យុវជនកាកបាទក្រហម​កម្ពុជា ក្រុមការងារ​ផ្សព្វផ្សាយទីស្នាក់ការ​កណ្ដាលកាកបាទក្រហម​កម្ពុជា និងនិស្សិត​ចូលរួមសរុបចំនួន ៥៣នាក់ ដែលធ្វើឡើង​នៅសាលប្រជុំនៃ​សាកលវិទ្យាល័យ​បញ្ញាជាតិ។

ការផ្សព្វផ្សាយនេះ ​ប្រព្រឹត្តទៅនៅក្នុងគោលបំណង ​ដើម្បីឲ្យនិស្សិតមាន​ការយល់ដឹងអំពីប្រវត្តិ​របស់ចលនាកាកបាទក្រហម ​និងអឌ្ឍចន្ទក្រហម​ សមិទ្ធផល​របស់កាកបាទក្រហម​កម្ពុជា និងផ្សព្វផ្សាយ​បន្តទៅកាន់ទីសាធារណៈ សាលារៀន​ និងសហគមន៍​ផងដែរ៕

 

កិច្ចប្រជុំ គណៈកម្មការ និងអនុគណៈកម្មការ រៀបចំពិធីសំណេះសំណាលនិងបំពាក់កន្សែងយុវជនកាកបាទក្រហមកម្ពុជា

កក្រក​ ៖​ នៅទីស្នាក់ការកណ្តាល​ នារសៀលថ្ងៃអង្គារ​ ២កើត​ ខែអាសាឍ​ ឆ្នាំកុរ​ ឯកស័ក​​ ព.ស.២៥៦៣​ ត្រូវនឹងថ្ងៃទី ២​ ខែកក្កដា​ ឆ្នាំ២០១៩​ នេះ​ លោកជំទាវកិត្តិ​សង្គហបណ្ឌិត​​ ឃួន​ សុដារី​ អនុប្រធានកាកបាទក្រហមកម្ពុជា​ បានអញ្ជើញដឹកនាំ​កិច្ចប្រជុំ​ គណៈកម្មការ​ និងអនុគណៈកម្មការ​​ រៀបចំពិធី​សំណេះសំណាល​និងបំពាក់កន្សែង​យុវជនកាកបាទ​ក្រហមកម្ពុជា​ ដើម្បី​ត្រួតពិនិត្យលទ្ធផល​ការងារ និងទិសដៅអនុវត្តបន្ត​ ឈានឆ្ពោះការរៀបចំ​ពិធីសំណេះសំណាល​ និងបំពាក់​កន្សែង​យុវជនកាកបាទក្រហមកម្ពុជា​ នៅសាលមហោ​ស្រពកោះពេជ្រ​ នៅថ្ងៃទី​ ២០​ ខែកក្កដា​ ឆ្នាំ២០១៩​ ខាងមុខនេះ។

កាកបាទក្រហមកម្ពុជា នាំយកនូវព្រះរាជូបត្ថម្ភដ៏ថ្លៃថ្លារបស់ សម្តេចម៉ែ ចូលរួមរំលែកទុក្ខ គ្រួសារសពរងគ្រោះដោយសារឧបទ្ទវហេតុរលំអាគារកម្ពស់៧ជាន់

កក្រក ៖ នារសៀលថ្ងៃ​សុក្រ ១១រោច ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹង​ថ្ងៃទី ២៨ ខែមិថុនា ឆ្នាំ២០១៩ កាកបាទក្រហមកម្ពុជា​ ដែលមានសម្ដេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ជាប្រធាន បានចាត់តាំង​ឲ្យក្រុមការងារ​ដឹកនាំដោយ ឯកឧត្តម​ កៀង វឌ្ឍនៈ ជំនួយការ​លេខាធិការដ្ឋាន​ កាកបាទក្រហម​កម្ពុជា និងសហ​ការី នាំយកនូវ​ព្រះរាជូបត្ថម្ភដ៏ថ្លៃថ្លា​របស់ សម្តេច​ព្រះមហាក្សត្រី នរោត្តម មុនិនាថ សីហនុ​ ព្រះវររាជមាតាជាតិខ្មែរ​ ព្រះប្រធានកិត្តិយស​កាកបាទក្រហមកម្ពុជា​ ព្រះរាជទ្រព្យ ​ចំនួន ២៥០ដុល្លារអាមេរិក ​និងចូលរួមរំលែកទុក្ខយ៉ាង​ក្រៀមក្រំជាមួយ​គ្រួសារសព​រងគ្រោះដោយសារ​ឧបទ្ទវហេតុរលំ​អាគារកម្ពស់៧ជាន់ ​កាលពីថ្ងៃទី ២២ ខែមិថុនា ឆ្នាំ២០១៩ កន្លងទៅ​ នៅខេត្តព្រះសីហនុ​ ដែលមានឈ្មោះ សាត ប៊ុនធីម​ អាយុ ៣៦ឆ្នាំ ​រស់នៅភូមិណាអូង​ ឃុំស្រែសំបូរ ស្រុកសៀមប៉ាង ​ខេត្តស្ទឹងត្រែង។

 

ក្នុងឱកាសដ៏សមាន​ទុក្ខនេះ ឯកឧត្តម ​បានសម្ដែងនូវក្ដី​រន្ធត់ចំពោះឧបទ្ទវហេតុ​រលំអាគារ​នេះ ធ្វើឲ្យ​បាត់បង់មនុស្ស​ជាទីស្រឡាញ់នៅ​ក្នុងគ្រួសារ និងសូម​បួងសួងដល់ដួង​វិញ្ញាក្ខន្ធនៃសព បានទៅកាន់​សុគតិភព ​កុំបីឃ្លៀងឃ្លាតឡើយ។

 

ជាមួយគ្នានេះដែរ ​កាកបាទក្រហមកម្ពុជា​ ក៏បានប្រគល់អំណោយ​មួយចំនួនរួមមាន៖ អង្ករ ១២០គីឡូក្រាម ត្រីខ ៥០កំប៉ុង ទឹកក្រូច ៥កេស និងថវិកា​ចំនួន ៥,០០០,០០០ រៀលផងដែរ៕

 

កាកបាទក្រហមកម្ពុជា សួរសុខទុក្ខ ព្រមទាំងនាំយកសម្ភារ-ថវិកា ផ្តល់ដល់អ្នករងរបួស ដែលកំពុងសម្រាកព្យាបាលនៅមន្ទីរពេទ្យខេត្តព្រះសីហនុ

កក្រក​​ ៖​ ទន្ទឹមនឹងការចាត់ឱ្យមន្ត្រី​ចូលរួមរំលែក​មរណទុក្ខដ៏ក្រៀមក្រំ​ជាមួយក្រុមគ្រួសារ​សពជនរងគ្រោះ​ទាំង​ ២៨នាក់​ដល់ស្រុកកំណើត​ ដែល​បានស្លាប់ដោយ​ការបាក់រលំអគារនោះ​ នៅថ្ងៃអង្គារ ទី​ ២៥​ ខែមិថុនា​ ឆ្នាំ២០១៩​ នេះ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធានកាកបាទក្រហមកម្ពុជា​ ក៏បានចាត់ឱ្យមន្ត្រី ចុះសួរសុខទុក្ខ​ ព្រមទាំងនាំយកសម្ភារ​-ថវិកា​ ​ផ្តល់ដល់អ្នករងរបួសចំនួន​ ២៥នាក់​ ដែលកំពុងសម្រាក​ព្យាបាលនៅមន្ទីរពេទ្យ​ខេត្តព្រះសីហនុ​ ដែលក្នុងនោះ​ ម្នាក់ៗ​ទទួលបាន​ថវិកា​ ១០០ដុល្លារអាមេរិក ​ជាព្រះរាជអំណោយ​ដ៏ឧត្តុង្គឧត្តម​របស់​ សម្តេចព្រះមហាក្សត្រី​ នរោត្តម​ មុនិនាថ​ សីហនុ​ ព្រះវររាជមាតាជាតិខ្មែរ​ ព្រះប្រធានកិត្តិយស​កាកបាទក្រហមកម្ពុជា​ ព្រមទាំងថវិកា​ ២លានរៀល​ទៀត ទឹកដោះគោស្រស់​ ២ប្រអប់​ មុង១​ ភួយ១​ សារុង១​ និងក្រមា១​ ជាអំណោយរបស់កាកបាទក្រហមកម្ពុជា​។

 

ដោយឡែក​ អ្នករបួសធ្ងន់ធ្ងរ​ ១នាក់​ កំពុងសម្រាកព្យាបាល​នៅមន្ទីរពេទ្យព្រះកុសុមៈ​ រាជធានីភ្នំពេញ​ ទទួលបាន​ថវិកា​ ៥០០ដុល្លារ​ ជាព្រះរាជអំណោយ​ សម្តេចព្រះមហាក្សត្រី​ ព្រះវររាជមាតាជាតិខ្មែរ​ ព្រមទាំងថវិកា​ ៥លាន​រៀល​ ទឹកដោះគោស្រស់​ ២ប្រអប់​ មុង១​ ភួយ១​ សារុង១​ និងក្រមា១​ ជាអំណោយរបស់កាកបាទក្រហមកម្ពុជា​។

 

សូមបញ្ជាក់ថា​ ក្នុងឧបទ្ទវហេតុបាក់រលំ​អគារនៅខេត្តព្រះសីហនុ​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធានកាកបាទក្រហមកម្ពុជា​ សូមសម្តែងនូវការសោកស្តាយ​ចំពោះសោកនាដកម្ម​ដែលជារឿងឈឺចាប់ ជាពិសេសក្រុមគ្រួសារ​នៃអ្នកដែលបាន​បាត់បង់ជីវិត​ និងសូមឧទ្ទិសបួងសួង​ដល់ដួងវិញ្ញាណក្ខន្ធជនរងគ្រោះទាំងអស់​ បានទៅកាន់ទីសុគតិភព​កុំបីឃ្លៀងឃ្លាតឡើយ​។ ជាមួយគ្នានេះ​ សូមលេីកទឹកចិត្តដល់អ្នករង​របួសទាំងអស់ខិតខំ​យកចិត្តទុកដាក់ព្យាបាល​ អនុវត្តតាមវេជ្ជបញ្ជា​គ្រូពេទ្យ​ និងជូនពរឆាប់បានជាសះស្បើយ​វិលត្រឡប់ជួបជុំ​គ្រួសារឡើងវិញ៕

 

កាកបាទក្រហមកម្ពុជាទទួល ព្រះរាជទ្រព្យដ៏ឧត្តុង្គឧត្តមរបស់ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ

កក្រក​ ៖ ភ្លាមៗបន្ទាប់ពី​ទទួលបាននូវ​ព្រះរាជទ្រព្យដ៏ឧត្តុង្គ​ឧត្តមចំនួន​ ១ម៉ឺនដុល្លារអាមេរិក​របស់​ សម្តេចព្រះមហាក្សត្រី​ នរោត្តម​ មុនិនាថ​ សីហនុ​ ព្រះវររាជមាតាជាតិខ្មែរ​ ព្រះប្រធានកិត្តិយស​កាកបាទក្រហមកម្ពុជា​ នៅថ្ងៃអង្គារ​ ទី​ ២៥​ ខែមិថុនា​ ឆ្នាំ២០១៩​ នេះ​ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា​ បានចាត់មន្រ្តីទីស្នាក់ការ​កណ្ដាល ចុះសួរសុខទុក្ខ​ ចូលរួមរំលែកទុក្ខ និង​នាំយកព្រះរាជអំណោយ​ដ៏ឧត្តុង្គឧត្តម​នេះ​ ទៅប្រគល់ជូន​ក្រុមគ្រួសារសព​ និងអ្នករងរបួស​ នៅមន្ទីរពេទ្យ​ និងតាមខេត្ត​ស្រុកកំណើតរបស់​ជនរងគ្រោះ។

សូមបញ្ជាក់ថា​ ព្រះរាជអំណោយ​ដ៏ឧត្តុង្គឧត្តម​ចំនួន​ ១ម៉ឺន​ ដុល្លារអាមេរិក​ នឹងត្រូវប្រគល់​ជូនក្រុមគ្រួសារអ្នកស្លាប់ទាំង​ ២៨នាក់​ ក្នុងម្នាក់ៗ​ ២៥០ដុល្លារ​ និងអ្នករបួសកំពុងសម្រាក​ព្យាបាលនៅមន្ទីរពេទ្យ​បង្អែកខេត្តព្រះសីហនុទាំង​ ២៥នាក់​ ក្នុងម្នាក់ៗ​ ១០០ដុល្លារ​។ ដោយឡែក​ អ្នករងរបួស​ធ្ងន់ធ្ងរ​ ១នាក់​ កំពុងសម្រាកព្យាបាល​នៅមន្ទីរពេទ្យព្រះកុសុមៈ​ ទទួលបាន​ ៥០០ដុល្លារ៕

 

Fist Prev 3 4 5 6 7 Next Last