Webmail
E-Learning
សាខាកាកបាទក្រហមកម្ពុជា

សាខាកាកបាទក្រហមកម្ពុជា

សាខាកាកបាទក្រហមកម្ពុជាខេត្តកណ្តាល ចុះសួរសុខទុក្ខប្រជាពលរដ្ឋរងផលប៉ះពាល់ដោយគ្រោះមហន្តរាយស្រុតច្រាំងទន្លេនៅ ស្រុកមុខកំពូល

សាខា កក្រក ខេត្តកណ្តាល ៖ថ្ងៃសៅរ៍ ១៤កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១៩ ខែមករា ឆ្នាំ២ឲ១៩ ប្រតិភូ​សាខាកាកបាទក្រហម​កម្ពុជាខេត្តកណ្តាល ដឹកនាំដោយ​ឯកឧត្តមបណ្ឌិត ម៉ៅ ភិរុណ ប្រធាន​កិត្តិយសសាខា និងប្រតិភូរួម​ដំណើរ បានចុះ​សួរសុខទុក្ខ និងចែកអំណោយ​មនុស្សធម៌ ជូនប្រជាពលរដ្ឋរង​ផលប៉ះពាល់ដោយ​គ្រោះមហន្តរាយ​ស្រុតច្រាំង​ទន្លេ ចំនួន ៨៥ គ្រួសារ សមាជិក ៣៧០ នាក់ មកពីភូមិចំនួន៦ នៃឃុំចំនួន៣ ក្នុងនោះមាន ៖ ឃុំរកាកោងទី១ចំនួន ៥ គ្រួសារ ឃុំព្រែកដំបង ចំនួន ១៣ គ្រួសារ និងឃុំឫស្សីជ្រោយ ចំនួន ៦៧ គ្រួសារ ទីតាំចែកចាយអំណោយនៅចំណុចភូមិព្រែកយាយហុិន ២ ឃុំឫស្សីជ្រោយ ស្រុកមុខកំពូល ។

ឯកឧត្តមបណ្ឌិត ម៉ៅ ភិរុណ បានពាំនាំ​មកនូវប្រសាសន៍​ផ្តាំផ្ញើ​សាកសួរសុខទុក្ខ​ពីសំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហម​កម្ពុជា ជូនចំពោះគ្រួសាររងគ្រោះទាំងអស់ដោយក្តីនឹករឭក ។ ឯកឧត្តមបន្តថា កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន ជានិច្ចកាលសម្តេច​តែងតែយកចិត្តទុកដាក់​គិតគូរពីសុខទុក្ខ​ប្រជាពលរដ្ឋទូទៅដែលរងគ្រោះ និងងាយរងគ្រោះ​គ្រប់ពេលវេលា និងព្រមទាំងបាន​ចាត់តាំងឲ្យក្រុមការងារឲ្យចុះសួរសុខទុក្ខដល់ប្រជាពលរដ្ឋជាប្រចាំ ដោយ​មិនគិតពីវណ្ណៈ ពូជសាសន៍ សាសនា ពណ៌សម្បុរ ឬនិន្នាការនយោបាយអ្វីឡើយ ។ ជាមួយគ្នានេះ​ឯកឧត្តមក៏បានក្រើនរំឭកដល់​បងប្អូនប្រជាពលរដ្ឋទាំងអស់ ដែលមានលំនៅដ្ឋាន នៅជាប់មាត់ទន្លេ​ជិតចំណុចរងគ្រោះ សូមមេត្តាប្រុងប្រយ័ត្នខ្ពស់ បើចាំបាច់ត្រូវរុះរើលំនៅឋានបន្ទាន់ចេញពី​តំបន់គ្រោះថ្នាក់នេះ ចៀសវាងខ្លាច​វាបង្កឲ្យករណីរងគ្រោះ​បន្តទៀត បណ្តាល​  ឲ្យមានផលប៉ះពាល់​ដល់ទ្រព្យសម្បត្តិ និងអាយុជីវិតមនុស្សទៅមុខ ។

អំណោយបានចែកជូនក្នុង១គ្រួសារមាន ៖ អង្ករ ៣០ គីឡូក្រាម មី១កេស ទឹកត្រី១យួរ ត្រីខ១យួរ ថវិកាចំនួន ៤០ ម៉ឺនរៀល ។ ដោយឡែកចំពោះ​គ្រួសារដែលមានក្មេងលង់ទឹកស្លាប់ ១ នាក់ នៅភូមិពាម ឃុំព្រែកដំបងបានឧបត្ថម្ភថវិកាចំនួន ១ លានរៀល និងសម្ភារគ្រឿងបរិភោគមួយចំនួន ៕

 

សាខាកក្រក ខេត្តស្ទឹងត្រែង សួរសុខទុក្ខ ប្រជាពលរដ្ឋ មានជីវភាពខ្វះខាត នៅភូមិកំភុន ស្រុកសេសាន ខេត្តស្ទឹងត្រែង។

សាខាកក្រក ខេត្តស្ទឹងត្រែង ៖ នៅព្រឹក​ថ្ងៃសុក្រ ១៣កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១៨ខែ មករា ឆ្នាំ ២០១៩នេះ លោក លោក អ៊ុក ធាវី សមាជិកគណៈកម្មាធិការ​សាខាខេត្តស្ទឹងត្រែង និងនាយក​ប្រតិបត្តិសាខា ក្រុមប្រតិបត្តិ​សាខា លោក លោកស្រី ប្រធាន អនុប្រធាន​គណៈកម្មាធិការអនុសាខាស្រុកសេសាន បានចុះ​សាកសួរសុខទុក្ខ និងផ្ដល់អំណោយ​មនុស្សធម៌ ជូនដល់ប្រជាពលរដ្ឋចំនួន ៥០គ្រួសារ​ដែលមាន​ជីវភាពខ្វះខាត នៅភូមិកំភុន ឃុំកំភុន ស្រុកសេសាន ខេត្តស្ទឹងត្រែង។

ឆ្លៀតក្នុងឱកាសនោះដែរ​លោក លោក អ៊ុក ធាវី សមាជិកគណៈកម្មាធិការ​សាខាខេត្ត បានពាំនាំនូវប្រសាសន៍ផ្ដាំផ្ញើសាកសួរសុខទុក្ខនិង​ក្ដីនឹករលឹកពីសំណាក់សម្ដេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា ដែលជានិច្ចកាល​សម្ដេចតែងតែគិតគូរ​សុខទុក្ខបងប្អូន​ប្រជាពលរដ្ឋក្រីក្រ ជនពិការ ចាស់ជរា ដែលមាន​ទុក្ខលំបាក ជនរងគ្រោះ ជនងាយរងគ្រោះគ្រប់្រភេទ ដោយមិនប្រកាន់រើសអើងវណ្ណៈ ជាតិសាសន៍ ពណ៍សម្បុរ ឬនិន្នាការនយោបាយអ្វីឡើយ។ លើសពីនេះទៀត លោកក៏បានអំពាវនាវដល់បងប្អូនប្រជាពលរដ្ឋទាំងអស់ សូមមេត្តាយកចិត្តទុកដាក់ថែរក្សាសុខភាពឲ្យបានល្អ ដោយប្រកាន់ខ្ជាប់នូវ ហូបស្អាត ផឹកស្អាត និងរស់នៅស្អាត សូមមើលថែទាំ ចាស់ជរា ជនពិការ និងកូនតូចៗឱ្យបានល្អជៀសវាង​គ្រោះថ្នាក់ដោយ​យថាហេតុផ្សេងៗ និងត្រូវប្រុងប្រយ័ត្ន​ចំពោះសត្វអាសិរពិសគ្រប់ប្រភេទ ហើយពេលគេង​ត្រូវដាក់មុងការពារកុំឲ្យមូសខ្លាខាំ ជៀសវាងនូវការកើតជំងឺគ្រុនឈាម និងជំងឺផ្សេងៗ បើមានបញ្ហា​សុខភាពសូមបងប្អូន​ប្រញាប់ទៅមណ្ឌល​សុខភាពឲ្យបាន​ឆាប់រហ័ស ហើយត្រូវខិតខំប្រកបមុខរបរ​បង្កបង្កើនផល ដើម្បីស្ដារជីវភាព​គ្រួសារឱ្យកាន់តែប្រសើរឡើង។

អំណោយសម្រាប់គ្រួសារនិមួយៗទទួលបាន ៖ អង្ករ ៣០គីឡូក្រាម មី ១កេស ត្រីខ ១០កំប៉ុង ឃីត១ (មុង១ ភួយ១ សារុង១ ក្រមា១) ។

 

ប្រជុំបូកសរុបលទ្ធផលសកម្មភាពការងារប្រចាំឆ្នាំ ២០១៨ និងលើកទិសដៅអនុវត្តបន្ត ឆ្នាំ ២០១៩ នៅខេត្តស្វាយរៀង

សាខាកក្រក​ខេត្តស្វាយរៀង៖ នៅថ្ងៃព្រហស្បតិ៍ ១២កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ១៧ ខែ មករា ឆ្នាំ ២០១៩ នៅទីស្នាក់ការ​សាខាកាកបាទក្រហម​កម្ពុជា​ខេត្តស្វាយរៀង បានប្រជុំបូក​សរុបលទ្ធផល​សកម្មភាព​ការងារប្រចាំឆ្នាំ ២០១៨ និងលើកទិសដៅ​អនុវត្តបន្ត ឆ្នាំ ២០១៩ ក្រោមអធិបតីភាព ឯកឧត្តម ម៉ែន វិបុល ប្រធាន​គណៈកម្មាធិការ​សាខា លោកជំទាវ ហៅ ចន្ទ័សិរីទេពី ចៅ ភិរុណ អនុប្រធាន​គណៈកម្មាធិការសាខា ព្រមទាំង​ឯកឧត្តម លោកជំទាវ លោក លោកស្រីជាសមាជិក សមាជិកា​គណៈកម្មាធិការ​សាខា លោកស្រី ប្រធាន អនុប្រធានគណៈកម្មាធិការ​អនុសាខាក្រុង ស្រុកទាំង ៨ ព្រមទាំង​បុគ្គលិក​ក្រុមប្រតិបត្តិ​សាខាសរុបចំនួន ២៥ នាក់ ។ គោលបំណង​នៃកិច្ចប្រជុំនេះ គឺដើម្បីបូកសរុប​លទ្ធផលការងារ​ដែលសម្រច​បានក្នុងឆ្នាំ ២០១៨ ក៍ដូចជាបញ្ហាប្រឈមនានាដែលសាខា​ជួបប្រទះ និងធ្វើការ​ដោះស្រាយនូវ​សំណូមពរ​មួយចំនួន​ដែលមាន​នៅថ្នាក់សាខា និងអនុសាខា ។ 


មានប្រសាសន៍បើកកិច្ចប្រជុំ នាឱកាសនោះឯកឧត្តមប្រធានគណៈកម្មាធិការសាខា បានថ្លែងអំណរគុណចំពោះឯកឧត្តម លោកជំទាវ លោក លោកស្រីទាំងអស់ដែលមានវត្តមានចូលរួមប្រជុំដើម្បីបូកសរុបលទ្ធផលដែលសាខាសម្រេចបានរយៈពេល ១ ឆ្នាំ កន្លងទៅនេះ មានការខិតខំប្រឹងប្រែង យកចិត្តទុកដាក់ក្នុងសកម្មភាពការងារមនុស្សធម៌ដោយសហការគ្នាបានល្អប្រសើររបស់គណៈកម្មាធិការសាខា ក្រុមប្រតិបត្តិសាខា ក្នុងការរួមចំណែកជួយគ្នាទៅវិញទៅមក ចូលរួមយ៉ាងសកម្មទោះបី សមាជិក សមាជិការ ពេលខ្លះមិនបានចូលរួមដោយសារជាប់រវល់ការងារស្នូលច្រើន នេះជាសក្ខីភាពបញ្ជាក់អំពីដំណើរការល្អនាពេលកន្លងមក ។

សាខាកាកបាទក្រហមកម្ពុជា ខេត្តកំពង់ស្ពឺ សួរសុខទុក្ខជាពលរដ្ឋងាយរងគ្រោះបំផុតនៅឃុំត្រពាំងគង ស្រុកសំរោងទង

សាខាកក្រកខេត្តកំពង់ស្ពឺ ៖ នាព្រឹកថ្ងៃពុធ ១២កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១៦ ខែ មករា ឆ្នាំ ២០១៩ សាខាកាកបាទក្រហម​កម្ពុជា ខេត្ត​កំពង់ស្ពឺ ដឹកនាំដោយ​ឯកឧត្តម តុង សេង ប្រធាន​គណៈកម្មាធិការ​សាខា និងសហការី បាន​អញ្ជើញ​ចុះសួរសុខទុក្ខ និងនាំយក​អំណោយមនុស្សធម៌​របស់​កាកបាទក្រហមកម្ពុជា ជូនដល់​ប្រជាពលរដ្ឋ​ងាយរងគ្រោះបំផុត ចំនួន ៣៥គ្រួសារ និងប្រគល់ផ្ទះ១ខ្នងចំនួន ១គ្រួសារ ធ្វើ​អំពីដែក ប្រក់សង្ក័សី ជញ្ជាំងសង្ក័សី ព្រមទាំង​ស្ត្រីមេម៉ាយ​ដែលស្លាប់កំឡុងពេល​សម្រាលកូន ស្ថិតនៅ២ភូមិ ឃុំត្រពាំងគង ស្រុក​សំរោងទង ខេត្តកំពង់ស្ពឺ។

ក្នុងឱកាសនោះដែរ ឯកឧត្តមប្រធាន បានពាំនាំនូវ​ប្រសាសន៌ផ្តាំផ្ញើ​សាកសួរសុខទុក្ខ​និងក្តីនឹករលឹកពីសំណាក់សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធា​នកាកបាទក្រហមកម្ពុជា ដែលជានិច្ចកាល សម្តេចតែងតែគិតគូរ​ពីសុខទុក្ខរបស់បង​ប្អូនប្រជាពលរដ្ឋ​ក្រីក្រ ដែលមានទុក្ខ​លំបាកជន​រងគ្រោះ ជនងាយរងគ្រោះ​គ្រប់ប្រភេទ ដោយមិនប្រកាន់​រើសអើងវណ្ណៈ ជាតិសាសន៌ ពណ៍សម្បុរ ឫនិន្នាការនយោបាយអ្វីឡើយ។ លើសពីនេះទៀត ឯកឧត្តម បានអំពាវនាវ​ដល់បងប្អូន​ប្រជាពលរដ្ឋទាំងអស់ មេត្តាយកចិត្ត​ទុកដាក់ថែរក្សា​ឲ្យបានល្អ សម្អាតបរិស្ថាន​ជុំវិញផ្ទះ បរិភោគអាហារ​ដែលមានជីជាតិ ដោយប្រកាន់ខ្ជាប់នូវ ហូបស្អាត ផឹកស្អាត និងរស់នៅស្អាត និងត្រូវខិតខំប្រកបរបរ​ចិញ្ចឹមជីវិត ដើម្បីស្ដារជីវភាពគ្រួសារឡើងវិញ។

អំណោយ​ដែលផ្ដល់ជូន​គ្រួសារនីមួយៗទទួលបានផ្ទះមានដូចជា ៖ អង្ករ ៥០គីឡូក្រាម មី ១កេស ត្រីខ ១០កំប៉ុង ប្រេងឆា ១ដប ទឹកត្រីទឹកស៊ីអ៊ីវ ១យួរ ទឹកដោះគោ ១កំប៉ុង នំធុង ១ធុង មុង១ ភួយ១ សារុង១ ក្រមា១ និងថវិកាមួយចំនួន។
សម្រាប់​ប្រជាពលរដ្ឋងាយ​រងគ្រោះបំផុតទទួលបាន ៖ អង្ករ ២៥គីឡូក្រាម មី ១កេស ត្រីខ ១០កំប៉ុង ប្រេងឆា ១ដប ទឹកត្រីទឹកស៊ីអ៊ីវ ១យួរ នំធុង ១ធុង ទឹកដោះគោ ១កំប៉ុង និងថវិកាមួយចំនួន។
ចំណែកឯស្ត្រីដែល​ស្លាប់កំឡុងពេល​សម្រាលកូនរួមមាន ៖ អង្ករ ២៥គីឡូក្រាម មី ១ ទឹកត្រីទឹកស៊ីអ៊ីវ ១យួរ នំធុង ១ធុង ត្រីខ ១យួរ ប្រេងឆា ១ដប ទឹកដោះគោ ១កំប៉ុង ឃីតកូនក្មេង ១កញ្ចប់ និងថវិកាមួយចំនួនផងដែរ៕

យុវជនកាកបាទក្រហមកម្ពុជាក្រុងតាខ្មៅ ជួយសម្រួលចរាចណ៍នៅចំណុចផ្លូវកែងស្តុប

សាខា កក្រក ខេត្តកណ្តាល ៖ នៅព្រឹកថ្ងៃអាទិត្យ ៨កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១៣ ខែ មករា ឆ្នាំ២០១៩នេះ សាខាកាកបាទក្រហម​កម្ពុជាខេត្ត បានដឹកនាំ​កម្លាំងយុវជនកាកបាទក្រហមកម្ពុជា មកពីវិទ្យាល័យ​ចំនួន២ក្នុងក្រុងតាខ្មៅ គឺ ៖ វិទ្យាល័យហ៊ុនសែន​តាខ្មៅ ១៤ នាក់ និងវិទ្យាល័យហ៊ុនសែន​សេរីភាព ១៤ នាក់ សរុបរួម ២៨ នាក់ ស្រី ១៥ នាក់ ចុះជួយសម្រួល​ចរាចណ៍នៅចំណុចផ្លូវកែង​ស្តុបចំនួន ២កន្លែង ៖ ចំណុចទី១ ផ្លូវកែងស្តុប ( ១១៥- ២១ ) និងចំណុចទី២ ផ្លូវកែងស្តុប ( ១១០- ២១) ។ ចំពោះការងារនេះ​ក៏មានការចូលរួម​សហការ​ពីកម្លាំង​នគរបាលចរាចរណ៍ខេត្តកណ្តាល​ផងដែរ ។

សកម្មភាព​អនុវត្តការងារ​សុវត្ថិភាពចរាចរណ៍​នៅចំណុចគោលដៅ​ខាងលើ គឺក្នុងគោលបំណង​ជួយផ្សព្វផ្សាយ​ដល់សាធារណជន​ទូទៅ ដើម្បីឲ្យបាន​យល់ដឹងកាន់តែប្រសើរ​ពីច្បាប់ចរាចរណ៍​ផ្លូវគោកនៃព្រះរាជាណាចក្រ​កម្ពុជា និងដើម្បី​ចូលរួមកាត់បន្ថយ​នូវអត្រារងគ្រោះថ្នាក់​ផ្សេងៗ ដែលបណ្តាល​មកពីការបើកបរ​មិនគោរព​ច្បាប់ចរាចរណ៍ និងការ​បើកបរដោយខ្វះការប្រុង​ប្រយ័ត្នជាដើម ។

ដោយឡែក​ការងារខាងលើនេះ ក៏មានការចាប់​អារម្មណ៍ និងការគាំទ្រ​ពីមជ្ឈដ្ឋាន​ទូទៅ ព្រមទាំង​មានការកោតសរសើរ​ពីសកម្មភាព​របស៉យុវជន​កាកបាទក្រហមកម្ពុជា ដែលបានលះបង់​នូវពេលវេលាក្រៅម៉ោងសិក្សា​មកចូលរួមជួយ​ដល់កាងារសង្គម ៕

 

Fist Prev 2 3 4 5 6 Next Last