Webmail
E-Learning
សាខាកាកបាទក្រហមកម្ពុជា

សាខាកាកបាទក្រហមកម្ពុជា

គ្រួសាររងគ្រោះដោយអគ្គិភ័យនៅស្រុកឧត្តុងទទួលអំណោយពីសាខាកក្រកខេត្តកំពង់ស្ពឺ

សាខាកក្រកខេត្តកំពង់ស្ពឺ ៖ កាលពីព្រឹក​ ថ្ងៃទី ២ ខែ មករា ឆ្នាំ ២០១៨ សាខា​កាកបាទក្រហម​កម្ពុជា ខេត្តកំពង់ស្ពឺ ​ដឹកនាំ​ដោយ​លោកស្រី អោម ចន្នា នាយិកា​សាខា និងសហការី បានចុះសួរ​សុខទុក្ខ និងនាំយកអំណោយ​មនុស្សធម៌​របស់​កាកបាទក្រហម​កម្ពុជា ជូនលោកតា ឯម ធឹម ភេទប្រុស អាយុ ៧២ឆ្នាំ ដែលរងគ្រោះ​ដោយសារ​ភ្លើងឆេះផ្ទះ ស្ថិតនៅភូមិ​អង្គសណ្តាន់ ឃុំព្រះស្រែ ស្រុកឧដុង្គ ខេត្តកំពង់ស្ពឺ។

 

ក្នុងឱកាសនោះដែរ លោកស្រី បានសម្ដែងនូវការសោកស្ដាយចំពោះឧបទ្ទវហេតុភ្លើងឆេះផ្ទះនេះ ហើយកុំអស់សង្ឃឹម ត្រូវខិតខំប្រកប​របរចិញ្ចឹម​ជីវិត ដើម្បីសម្រាល​នូវជីវភាពរស់នៅ លើសពីនេះសូមបងប្អូន​ប្រជាពលរដ្ឋ​ទាំងអស់មេត្តា ប្រុងប្រយ័ត្ន​ភ្លើងទៀន ផ្សេងៗ ជៀសវាងកើត​ឡើងដូចករណីខាងលើ។

 

អំណោយដែលបាន​ផ្តល់ជូនរួមមាន ៖ អង្ករ ៥០គីឡូក្រាម មី ១កេស ត្រីខ ១០កំប៉ុង ប្រេងឆា ១ដប ទឹកត្រី​ទឹកស៊ីអ៊ីវ ១យួរទឹកដោះគោ ១កំប៉ុង តង់១ សារ៉ុង១ ក្រមា១ មុង១ កន្ទេល១ នំធុង ១ធុង និង​ថវិកាចំនួន ២០០,០០០រៀលផងដែរ៕

 

សាខាកក្រកខេត្តព្រះសីហនុផ្សព្វផ្សាយចរាចរណ៏តាមដងផ្លូវ

សាខាកក្រកខេត្តព្រះសីហនុ ៖ កាលពី​ថ្ងៃទី ២៩ ខែធ្នូ ឆ្នាំ២០១៧ សាខា​កាកបាទក្រហមកម្ពុជា ​ខេត្តព្រះសីហនុ ​សហការ​ជាមួយ​មន្ទីរសុខាភិបាល​ខេត្តព្រះសីហនុ បានរៀបចំ​ដាក់ក្រុមការងារ​ប្រចាំការ​សង្គ្រោះបឋម​ចំនួនពីរកន្លែង នៅរង្វង់មូល​ឆ្នេរឯករាជ្យ រហូតដល់ឆ្នេរអូរឈើទាល និងផ្សព្វផ្សាយ​ចរាចរណ៏​តាមដងផ្លូវ ដែលមានរយៈពេល ៣ថ្ងៃ ចាប់ពីថ្ងៃទី ២៩ ដល់ថ្ងៃទី ៣១ ខែ ធ្នូរ ឆ្នាំ ២០១៧ ក្រោម​ការដឹកនាំ​ដោយ ឯកឧត្តម យន្ត មីន ប្រធានកិត្តិយសសាខា រួមជាមួយនឹង លោក លោកស្រី ជាសមាជិក សមាជិកាគណៈកម្មាធិការសាខា អាជ្ញាធរដែនដី ក្រុមគ្រូពេទ្យស្ម័គ្រចិត្ត យុវជនកាកបាទក្រហមកម្ពុជា និងក្រុមការងារវិជ្ជាសង្រ្គោះបឋមជាច្រើនរូបទៀត ស្ថិតនៅក្រុងព្រះសីហនុ ខេត្តព្រះសីហនុ។

 

ការចុះប្រតិបត្តិការ​នេះមាន​គោលបំណង ដើម្បីជួយ​សង្រ្គោះបឋម​ដល់បងប្អូន​ប្រជាពលរដ្ឋ ភ្ញៀវ​ទេសចរណ៍ ផ្សព្វផ្សាយពី​វិជ្ជាសង្គ្រោះ​បឋម ឲ្យពួកគាត់បា​នដឹងផងដែរឲ្យបងប្អូនប្រជាពលរដ្ឋ​បានយល់ពី​ច្បាប់ចរាចរណ៏ ការពាក់មួក​សុវត្ថិភាព តាមរយៈផ្តល់ខិតប័ណ្ណ និងសារមួយ​ចំនួនផងដែរ

 

កិច្ចប្រជុំបូកសរុបលទ្ធផលការងារសាខាឆ្នាំ ២០១៧ និងលើកទិសដៅរបស់ខេត្តព្រៃវែង

សាខាកក្រកខេត្តព្រៃវែង៖ នៅព្រឹក​ថ្ងៃពុធ ១០កើត ខែបុស្ស ឆ្នាំរការ​នព្វស័ក ព.ស ២៥៦១ ត្រូវនឹង ថ្ងៃទី ២៧ ខែ ធ្នូ គ.ស ២០១៧ នៅសាខា​កាកបាទក្រហម​ កម្ពុជា ខេត្តព្រៃវែង បានបើកកិច្ច​ប្រជុំបូក​សរុបលទ្ធផល​ការងារ​សាខាឆ្នាំ ២០១៧​​ និងលើកទិសដៅ​អនុវត្ត​បន្ត និងពិធី​ប្រគល់​ទទួល​​ ថវិកា​សមាជិកភាព និងថវិកាហឹបសង្រ្គោះ ដោយមានការចូលរួមពី ឯកឧត្តមឧកញ៉ា សុខ ផេង អនុប្រធាន​អចិន្រ្តៃយ៍​គណៈកម្មាធិការ​សាខា តំណាង​ឯកឧត្តម ជា សុមេធី ប្រធានគណៈ​កម្មាធិការសាខា និងមានការ​អញ្ជើញចូលរួមពី សមាជិក សមាជិកា គណៈកម្មាធិការ​សាខា ក្រុមប្រតិបត្តិសាខា ក្រុមកាកបាទក្រហមមន្ទី អង្គភាព អនុសាខា​ក្រុង ស្រុក ទាំង១៣ សរុបមានអ្នកចូលរួម ចំនួន ១៣៥នាក់។

 

គោលបំណងនៃកិច្ចប្រជុំនេះ គឺដើម្បីពិនិត្យមើលលទ្ធផល​ការងារដែលសម្រច​បាន​កន្លងមក ក៍ដូចជាបញ្ហាប្រឈមនានា​ដែលសាខា​ជួបប្រទះ និងធ្វើការដោះស្រាយ​នូវសំណូមពរមួយចំនួន​ដែលមាននៅក្នុងសាខា និងអនុសាខា ព្រមទាំងបំផុស​ចលនា​កៀរគរប្រមូល​ថវិកាសមាជិកភាព និងថវិកា​ហឹបសង្រ្គោះប្រចាំឆ្នាំ ដើម្បីជួយគាំទ្រដល់សកម្មភាព​មនុស្សធម៌របស់សាខា។

 

មានប្រសាសន៍ក្នុងពិធីនេះ ឯកឧត្តម​ឧកញ៉ា អនុប្រធាន​អចិន្រ្តៃយ៍គណៈកម្មាធិការសាខា សូមសំដែងនូវអំណរគុណយ៉ាងជ្រាលជ្រៅចំពោះលោក លោកស្រី ដែលតែង​ចូលរួម​បរិច្ចាគថវិកាសមាជិកភាពប្រចាំឆ្នាំ​ជូនដល់​ សាខាកាកបាទក្រហមកម្ពុជា ខេត្តព្រៃវែង សម្រាប់ទុក​បម្រើការងារមនុស្សធម៌។ តាមរយះនៃការចូលរួមនេះ​ បានបង្ហាញ​អោយ​​ឃើញពីការជឿជាក់ និងមានទំនុកចិត្តមកលើកាកបាទ​ក្រហម​កម្ពុជា ក្រោមការដឹកនាំដ៍ប៉ិនប្រសប់ របស់ សម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ។ ថវិកាដែល​សាខា​ទទួលបាន​​ក្នុង​ពិធី​នេះមាន​ចំនួន ១០០,០៧១,៦០០រៀល។

 

សាខាកាកបាទក្រហមកម្ពុជាខេត្តព្រះសីហនុ ចូលរួមទិវាអន្តរជាតិនៃអ្នកស្ម័គ្រចិត្ត

សាខាកក្រកខេត្តព្រះសីហនុ ៖ កាលពី​រសៀល​ថ្ងៃទី ២៦ ខែ ធ្នូ ឆ្នាំ ២០១៧ សាខា​កាកបាទក្រហម​កម្ពុជា ខេត្តព្រះសីហនុ​ ដែលមាន​សម្ដេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជា​ប្រធាន បានប្រារព្ធ​ទិវាអន្តរជាតិ​នៃអ្នកស្ម័គ្រចិត្ត ៥ធ្នូ ២០១៧ ក្រោម​ប្រធានបទ "អ្នកស្ម័គ្រចិត្ត ដើម្បី​អភិវឌ្ឍន៍​ខ្លួនអ្នក និងសង្គម" ដោយមានការអញ្ជើញ​ចូលរួមពី ឯកឧត្ដម សំ សំអាត អនុប្រធាន​គណៈកម្មាធិការ​សាខា រួមជាមួយ​នឹង សមាជិក សមាជិក​គណៈកម្មាធិការសាខា អនុសាខា ថ្នាក់ដឹកនាំ-មន្ត្រីអនុសាខា មន្ត្រីប្រតិបត្តិសាខា អ្នកស្ម័គ្រចិត្ត ទីប្រឹក្សាយុវជន និងយុវជនកាកបាទក្រហមកម្ពុជាសរុបចំនួន ១០៥នាក់ (ស្រ្តី ៤៦នាក់) ស្ថិតនៅស្រុកកំពង់សីលា ខេត្តព្រះសីហនុ។

 

ក្នុងឱកាសនោះដែរ ឯកឧត្ដម បានពាំនាំ​ប្រសាសន៍​របស់ឯកឧត្តមប្រធាន​កិត្តិយសសាខា ឯកឧត្តមប្រធានគណះកម្មាធិការសាខា ពិសេសសម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្តាំផ្ញើសួរសុខទុក្ខ ថ្លែងអំណរគុណ និងកោតសរសើរយ៉ាងជ្រាលជ្រៅចំពោះអ្នកស្ម័គ្រចិត្តទាំងអស់ ដែលបានបរិច្ចាគ ធនធាន ពេលវេលា កម្លាំងកាយ-ចិត្ត ចូលរួមចំណែកជួយដល់ជនរងគ្រោះ និងជនងាយរងគ្រោះនៅក្នុងសហគមន៍ និងនៅតាមគ្រឹះស្ថានសិក្សានានា។

 

ឯកឧត្ដម បានគូសបញ្ជាក់បន្ថែមថាទិវាអន្តរជាតិនៃអ្នកស្ម័គ្រចិត្ត គឺជាការលើកកម្ពស់ការចូលរួមដោយស្ម័គ្រចិត្តក្នុងការងារមនុស្សធម៌របស់ចលនាកាកបាទក្រហម អឌ្ឍចន្ទក្រហម ដែលមានអាយុកាល ១៥៤ឆ្នាំមកហើយ។ ទិវានេះ បានផ្តោតលើគុណ​តម្លៃនៃការងារស្ម័គ្រចិត្ត ដែល​ជាឆ្អឹងខ្នងរបស់ចលនាកាកបាទក្រហម អឌ្ឍចន្ទក្រហម និងជាកម្លាំងប្រតិបត្តិករ​មនុស្សធម៌ប្រកប​ដោយប្រសិទ្ធភាព និងទាន់​ពេលវេលា។ ជាក់ស្តែងអ្នកស្ម័គ្រចិត្ត​កាកបាទក្រហមកម្ពុជា​បានធ្វើសកម្មភាពយ៉ាងសកម្ម ក្នុងការផ្តល់​ក្តីសង្ឃឹម និងភាពកក់​ក្តៅដល់អ្នកងាយរងគ្រោះបំផុតបានទាន់ពេលវេលា និងគ្រប់ទីកន្លែង ។

 

ដើម្បីលើកទឹកចិត្តដល់អ្នកស្ម័គ្រចិត្ត និងយុវជនកាកបាទក្រហមកម្ពុជាទាំង ១០៥នាក់ ដែលចូលរួមក្នុងឱកាសនោះ សាខាបានផ្តល់ក្នុងម្នាក់ៗរួមមាន ៖ អាវ១ មួក១ ភួយ១ មុង១ ក្រមា១ សារុង១ និងថវិកាមួយចំនួនផងដែរ៕

 

សាខាកាកបាទក្រហមកម្ពុជាខេត្តកណ្តាល ចូលរួមទិវាអន្តរជាតិនៃអ្នកស្ម័គ្រចិត្ត

ព្រឹកថ្ងៃ អង្គារ ៩កើត ខែបុស្ស​ ឆ្នាំរកា នព្វស័ក ព.ស.២៥៦១ ត្រូវនឹង​ថ្ងៃទី ២៦ ខែ"ធ្នូ ឆ្នាំ២០១៧ សាខាកាកបាទក្រហម​កម្ពុជា​ខេត្តកណ្តាល បានរៀបចំ​អបអរ សាទរ​ទិវាអន្តរជាតិ​នៃអ្នកស្ម័គ្រចិត្ត ​ក្រោមប្រធានបទ " អ្នកស្ម័គ្រចិត្ត​ដើម្បីអភិវឌ្ឍខ្លួន​អ្នកនិង​សង្គម " ដោយមាន​ការចូលរួមពី​ឯកឧត្តមបណ្ឌិត ម៉ៅ ភិរុណ ប្រធានកិត្តិយស​សាខាកាកបាទក្រហម​កម្ពុជាខេត្ត ឯកឧត្តម ជាវ តាយ ប្រធានគណៈកម្មាធិកាសាខា និងលោកជំទាវ គឹង ចាន់ឌី គន់ គីម អនុប្រធានកិត្តិយសសាខា និងមានការអញ្ជើញ​ចូលរួមជាកិត្ត្តិយសពីសំណាក់ថ្នាក់​កិត្តិយសសាខា គណៈកម្មាធិការ​សាខា មន្ទីរអង្គភាព​ជុំវិញខេត្ត អនុសាខាក្រុង-ស្រុក អ្នកស្ម័គ្រចិត្ត យុវជន​កាកបាទក្រហម សរុប​ប្រមាណជាង ៧០០ នាក់ នៅក្នុងបរិវេណទីស្នាក់ការសាខា ។ ជាមួយគ្នានេះដែរ​ក៏មានការប្រគល់​ប័ណ្ណសរសើរ​ជូនដល់អ្នកស្ម័គ្រចិត្ត ​ចំនួន ២៩០ នាក់ និងយុវជនកាកបាទក្រហមកម្ពុជា ចំនួន ៩២ នាក់ផងដែរ ។


ឯកឧត្តមបណ្ឌិត​ប្រធានកិត្តិយសសាខា បាននាំមក​នូវការផ្តាំផ្ញើ​សាកសួរ សុខទុក្ខ​ពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហមកម្ពុជា ជូនចំពោះ​អ្នកស្ម័គ្រចិត្ត ក្មួយៗយុវជន​កាកបាទក្រហម ឯកឧត្តម លោកជំទាវ លោកឧកញ៉ា លោក លោកស្រី នាងកញ្ញាទាំងអស់​ដោយក្តីនឹករលឹក បំផុត ។

 

ឯកឧត្តមបណ្ឌិតក៏បានថ្លែងអំណរគុណចំពោះអ្នកស្ម័គចិត្ត និងយុវជនកាកបាទ​ក្រហមទាំងអស់ ដែលកន្លងមកបានលះបង់កម្លាំងកាយចិត្ត ចូលរួមបម្រើ​សកម្មភាពមនុស្សធម៌ដោយ​ស្ម័គ្រចិត្តក្នុងឆន្ទៈគាំទ្រចលនាកាកបាទក្រហម អឌ្ឍចន្ទក្រហម​អន្តរជាតិ ពិសេសចលនា​កាបាទក្រហម​នៅកម្ពុជា ក្រោមការដឹកនាំ ដ៏ឈ្លាសវៃរបស់សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ៕

Fist Prev 1 2 3 4 5 Next Last