Webmail
E-Learning
សាខាកាកបាទក្រហមកម្ពុជា

សាខាកាកបាទក្រហមកម្ពុជា

សាខាកាកបាទក្រហមកម្ពុជា ខេត្តព្រះសីហនុ សួរសុខទុក្ខ ប្រជាពលរដ្ឋក្រីក្រ នៅភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ

សាខាកក្រក​ខេត្តព្រះសីហនុ ៖ នៅព្រឹកថ្ងៃអាទិត្យ ១៤រោច ខែបុស្ស ឆ្នាំច សំរឹទ្ធស័ក ព.ស.២៥៦២ ត្រូវនឹងថ្ងៃទី ៣ ខែ កុម្ភៈ ឆ្នាំ២០១៩ សាខាកាកបាទក្រហម​កម្ពុជា ខេត្តព្រះសីហនុ ដឹកនាំដោយឯកឧត្តម យន្ត មីន ប្រធាន​កិត្តិយសសាខា រួមជាមួយនឹង​ លោក លោកស្រី ជាសមាជិក ​សមាជិកាគណៈកម្មាធិការសាខា ក្រុមប្រតិបត្តិសាខា ​អនុសាខា បានអញ្ជើញ​ជួបសំណេះសំណាល​សាកសួរសុខទុក្ខ ​និងនាំយកអំណោយ​មនុស្សធម៌​របស់កាកបាទក្រហម​កម្ពុជា ជូនដល់​ប្រជាពលរដ្ឋ​ក្រីក្រ ចំនួន ៥៨គ្រួសារ ស្ថិតនៅភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។

 

ក្នុងឱកាសនោះ ឯកឧត្តមប្រធាន បានពាំនាំ​ប្រសាសន៍ផ្ដាំផ្ញើ​សួរសុក្ខទុក្ខ​និងក្តីនឹករលឹក ពីសំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា ដែលជានិច្ចកាល សម្ដេចតែងតែគិតគូរ​សុខទុក្ខបងប្អូន​ប្រជាពលរដ្ឋក្រីក្រ ដែលមានទុក្ខលំបាក​ ជនរងគ្រោះ ជនងាយរងគ្រោះ គ្រប់ប្រភេទ ដោយមិនប្រកាន់​រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការ​នយោបាយអ្វីឡើយ។ លើសពីនេះ ឯកឧត្តម ក៏បានអំពាវនាវ​ដល់ប្រជាពលរដ្ឋ​ទាំងអស់ ឱ្យយកចិត្តទុកដាក់​ការថែទាំសុខភាពដោយបរិភោគទឹកស្អាត គេងក្នុង​មុងជានិច្ច និងសម្អាត​បរិស្ថាន បំបាត់ទឹកដក់​សំរាមស្អុយរលួយ បំបាត់ជម្រកសត្វមូស ជៀសវាង​ការកើតជំងឺគ្រុនចាញ់ គ្រុនឈាម និងជំងឺឆ្លងផ្សេងៗ។ ចំពោះស្រ្តីមាន​ផ្ទៃពោះ ត្រូវទៅពិនិត្យផ្ទៃពោះឱ្យបាន​ទៀងទាត់ អនុវត្ត​ការណែនាំរបស់​គ្រូពេទ្យដើម្បីជៀសវាង​ជំងឺឆ្លងផ្សេងៗ។ សូមគិតគូរពីសុវត្ថិភាព​ចរាចរណ៍ ដោយគោរព​ច្បាប់ចរាចរណ៍ និងប្រុងប្រយ័ត្ន​ជានិច្ចរាល់ពេលធ្វើដំណើរ ជៀសឲ្យឆ្ងាយពីគ្រឿងញៀន គ្រឿងស្រវឹង ល្បែងស៊ី​សងគ្រប់ប្រភេទ ដែលជាប្រភពនៃអំពើហិង្សា ចោរកម្ម។ល។

 

អំណោយដែល​បានផ្ដល់ជូនក្នុង​មួយគ្រួសារៗទទួលផលបាន ៖ អង្ករ ២៥គីឡូក្រាម មី ១កេស ត្រីខ ១០កំប៉ុង មុង១ ភួយ១ សារុង១ ក្រមា១ កន្ទេល១ អង្ករដំណើប កន្លះគីឡូ សណ្តេកខៀវ កន្លះគីឡូ ស្កសរ កន្លះគីឡូ និងថវិកាមួយចំនួនផងដែរ៕

 

ពិធីបំពាក់ឯកសណ្ឋានជូនដល់ យុវជនកាកបាទក្រហមកម្ពុជា នៅខេត្តកំពត

សាខាកក្រកខេត្តកំពត ៖ កាលពី​រសៀលថ្ងៃសុក្រ ១២ ​ខែបុស្ស ឆ្នាំច សំរឹទ្ធិស័ក ព.ស. ២៥៦២ ត្រូវនឹង​ថ្ងៃទី ១ ខែ កុម្ភៈ ឆ្នាំ ២០១៩ សាខា​កាកបាទក្រហមកម្ពុជា ​ខេត្តកំពត បានរៀបចំពិធីបំពាក់​ឯកសណ្ឋាន​ជូនដល់ យុវជនកាកបាទក្រហមកម្ពុជា​ ទើបជ្រើសថ្មី និងទួលបាន​ការបណ្តុះបណ្តាល​យល់ដឹងជាមូលដ្ឋាន​ស្តីពីប្រវត្តិ​ចលនាកាកបាទក្រហម​ អឌ្ឍចន្ទក្រហម និងវិជ្ជាសង្គ្រោះ​បឋម ចំនួន ៥៤៤នាក់ មកពីវិទ្យាល័យ​ចំនួន៥ និងអនុវិទ្យាល័យ នៅក្នុង​ខេត្តកំពត ក្រោមអធិបតីភាព​ឯកឧត្តម ជាវ តាយ​ ប្រធានកិត្តិយស​សាខា​កាកបាទក្រហមកម្ពុជា ខេត្តកំពត។

 

មានប្រសាសន៍​នាឱកាសនោះ ឯកឧត្តម ជាវ តាយ ប្រធានកិត្តិយស​សាខាកាកបាទក្រហម​កម្ពុជា ខេត្តកំពត បានលើកឡើងថា៖​ ដើម្បីបំពេញបន្ថែម​សមាជិកយុវជនដែលបាន​ប្រលងចេញ ឬត្រូវបន្ត​ការសិក្សានៅថ្នាក់ឧត្តមសិក្សា និងដើម្បីពង្រីក​សមាជិក​យុវជនថ្មី សម្រាប់បំពេញ​សកម្មភាពមនុស្សធម៌ ​និងបានចាត់ទុក​យុវជនជាធនធានគន្លឹះ ដែល​មានតម្លៃខ្ពស់​បំផុតសម្រាប់​ការអភិវឌ្ឍសេដ្ឋកិច្ច​ សង្គមកិច្ច វប្បធម៌ បរិស្ថាន និងការរក្សាសន្តិភាព ហើយនៅ​គ្រប់សម័យកាល គ្រប់សង្គម ​យុវជនជាកម្លាំង​ស្រួចដែលមាន​កម្លាំងកាយ-កម្លាំងចិត្ត និងស្មារតីភ្លឺស្វាង​ មានទឹកចិត្ត​ក្លាហាន ពុះពារមិន​រារែកគ្រប់ឧបសគ្គនានា ពិសេស​យុវជនគឺជាសសរទ្រូងរបស់ប្រទេសជាតិ​ទាំងនៅពេលបច្ចុប្បន្ន ​និងទៅអនាគត។

 

ជាមួយគ្នានេះ កាកបាទក្រហម​កម្ពុជា បានទទួលស្គាល់ថា​ យុវជនកាកបាទក្រហម​កម្ពុជា គឺជាអ្នកស្ម័គ្រចិត្តវ័យក្មេង ដែលជាកម្លាំងស្នូលមួយដ៏មាន​សារៈសំខាន់ និងសកម្ម​បំផុត ក្នុងការផ្ដល់​នូវសេវាកម្ម​មនុស្សធម៌ ប្រកបដោយ​ការប្ដេជ្ញាចិត្តខ្ពស់ និងការលះបង់​ឥតងាករេ ស្របតាម​ប្រធានបទ "យុវជនកំពុងនាំគ្នាធ្វើសកម្មភាពយុវជន ជាភ្នាក់ងារ​នៃការផ្លាស់ប្តូរឥរិយាបថ​ក្នុងសង្គម"។

 

ទន្ទឹមនឹងនោះដែរ ឯកឧត្តម ក៏បានបំពាក់កន្សែងជូន​ដល់យុវជន និងបានឧបត្ថម្ភថវិកាដល់យុវជនកាកបាទក្រហម​កម្ពុជា ចំនួន៥៤៤នាក់ ក្នុងម្នាក់ៗ ១០០០០រៀល ទីប្រឹក្សាយុវ​ជនកាកបាទក្រហមកម្ពុជា ចំនួន១២នាក់ ក្នុងម្នាក់ៗ ៤០០០០រៀលផងដែរ៕

សាខាកាកបាទក្រហមកម្ពុជាខេត្តស្ទឹងត្រែង ធ្វើរបងលួសបន្លាព័ទ្ធជុំរិញស្រះទឹក នៅភូមិ កោះព្រះ ឃុំកោះព្រះ ស្រុកសៀមបូក ខេត្តស្ទឹងត្រែង

នៅថ្ងៃអាទិត្យ ៧រោច ខែបុស្ស ឆ្នាំ ច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៧ ខែ មករា ឆ្នាំ ២០១៩ នេះ សាខាកាកបាទក្រហមកម្ពុជា​ខេត្តស្ទឹងត្រែង សហការ​ជាអាជ្ញាធរ រួមជា​មួយកម្លាំងប្រជាពលរដ្ឋ​ចំនួនប្រមាណ១០គ្រួសារ សរុបចំនួន ៤៥នាក់ បានរួមគ្នា ធ្វើរបង​លួសបន្លាព័ទ្ធជុំរិញស្រះទឹកការពារកុំឱ្យហូរចូល​នូវទឹកកខ្វក់ឫសត្វពាហនៈចូលដើម្បីរក្សា​ទឹកស្អាតសម្រាប់ប្រើប្រាស់​នារដូវប្រាំងដែលខ្វះទឹកប្រើប្រាស់ដែល ស្រះនោះមានទំហំ៤០ម៉ែត្រ គុណ២៥ម៉ែត្រជាអំណោយ​របស់សាខាកាកបាទក្រហមកម្ពុជា​ខេត្តស្ទឹងត្រែង ដែលមាន​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន មានទីតាំង​ស្ថិតនៅភូមិ កោះព្រះ ឃុំកោះព្រះ​ ស្រុកសៀមបូក ខេត្តស្ទឹងត្រែង។

សូមបញ្ជាក់ថាសាខា​បានផ្តល់ជូន​បន្លាលួសចំនួន ១០០គីឡូ ស្នើនឹង ៥០០ម៉ែត្រផងដែរ ។

យុវជនកាកបាទក្រហមកម្ពុជា ក្រុងតាខ្មៅ ចូលរួមជួយសម្រួលចរាចរណ៍

សាខា កក្រក​ ខេត្តកណ្តាល ៖ នៅព្រឹក​ថ្ងៃអាទិត្យ ៧រោច ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ២៧ ខែ មករា ឆ្នាំ២០១៩ សាខា​កាកបាទក្រហម​កម្ពុជាខេត្ត បានដឹកនាំ​កម្លាំងយុវជន​កាកបាទក្រហម​កម្ពុជា មកពីវិទ្យាល័យ​ចំនួន២ក្នុងក្រុងតាខ្មៅ គឺ ៖ វិទ្យាល័យ​ហ៊ុនសែនតាខ្មៅ ១៤ នាក់ និងវិទ្យាល័យ​ហ៊ុនសែនសេរីភាព ១៤ នាក់ សរុបរួម ២៨ នាក់ ស្រី ១៣ នាក់ ចុះជួយ​សម្រួល​ចរាចរណ៍នៅចំណុច​ផ្លូវកែងស្តុប​ចំនួន ២កន្លែង ៖ ចំណុចទី១ ផ្លូវកែង​ស្តុប ( ១១៥- ២១ ) និងចំណុចទី២ ផ្លូវកែងស្តុប ( ១១០- ២១) ។

សកម្មភាពការងារ​សុវត្ថិភាពចរាចរណ៍​នៅចំណុច​គោលដៅនេះ គឺក្នុងគោលបំណង​ជួយផ្សព្វផ្សាយ​ដល់សាធារណជនទូទៅ ដើម្បីយល់ដឹង​ជាមូលដ្ឋានអំពីច្បាប់​ចរាចរណ៍ផ្លូវគោក​នៃព្រះរាជាណាចក្រ​កម្ពុជា ឲ្យបានកាន់តែប្រសើរ និងដើម្បី​ចូលរួមកាត់បន្ថយនូវ​អត្រារងគ្រោះថ្នាក់​ផ្សេងៗ ដែលបណ្តាល​មកពីការបើកបរខ្វះ​ការប្រុងប្រយ័ត្ន និងការមិនគោរព​ច្បាប់ចរាចរណ៍ជាដើម ៕

 

វគ្គ ជាមូលដ្ឋានសម្រាប់យុវជនកាក បាទក្រហមកម្ពុជា វិទ្យាល័យជាំក្សាន្តខេត្តព្រះវិហារ

សាខាកក្រកខេត្តព្រះវិហារ៖នៅថ្ងៃទី ២៦ ខែ មករា ឆ្នាំ២០១៩ នេះសាខា​កាកបាទក្រហមកម្ពុជា ​ខេត្តព្រះវិហារ បានបើកវគ្គ ជាមូលដ្ឋាន​យុវជនកាកបាទក្រហម​កម្ពុជា សម្រាប់​វិទ្យាល័យជាំក្សាន្ត ចំនួន ១២០ នាក់ និង​ធ្វើពិធី​បំពាក់ កន្សែងជូន​យុវជនទើបរើសថ្មីចំនួន ៦៨ នាក់ ស្រី ៣៧ នាក់ ក្រោមវត្ត ​មាន ឯកឧត្តម យុង គឹមហ៊ាន នាយកប្រតិបត្តិ​សាខាកាកបាទក្រហម​កម្ពុជា​ខេត្តព្រះវិហារ ។

នៅក្នុងឱកាសនោះឯកឧត្តម​នាយកសាខា​បានលើកឡើងថា ​ដើម្បីបន្ថែម​សមាជិកយុវជន​ដែលបានប្រឡង ជាប់ហើយទៅ​បន្តការសិក្សា​ សាលាបានរើស​យុវជនបំពេញ និង​បើកវគ្គជាមូលដ្ឋាន​យុវជនកាក បាទក្រហមកម្ពុជា ជូននាពេលនេះ គោលបំណងដើម្បីអោយប្អូនបានដឹងអំពីប្រវត្តិ គោលការណ៍គ្រឹះ តួនាទីរបស់យុវជនកាកបាទ ក្រហម​ ពិសេសវិជ្ជាសង្គ្រោះ​បឋម ។ ជាមួយគ្នានោះ​ដែរក៏បានធ្វើការផ្តាំ​ផ្ញើដល់ប្អូនៗ​ត្រូវខិតខំ៖
-រៀនសូត្រ​អោយក្លាយ​ជាកូនល្អ សិស្សល្អ មិត្តល្អ
-ជៀសអោយឆ្ងាយពីគ្រឿង
-គោរពច្បាប់ចរាចរ​អោយជាប់ជួន
-ចូលរួមថែរក្សាអនាម័យ​និងសំអាតនៅសាលា​និងតាមកន្លែងផ្សេងៗ។
-ជួយកិច្ចការផ្ទះ បន្ទាប់​ពីការសិក្សា រៀនសូត្រ។

បន្ទាប់មកឯកឧត្តម និងក្រុមការបានចុះពិនិត្យ​អណ្តូងដែល​កាកបាទ ក្រហមកម្ពុជា បានផ្តល់​ប្រជាពលរដ្ឋក្នុងភូមិចាត់តាំង​ និងភូមិ​ទឹកក្រហម ក្នុងឃុំទឹកក្រហម​ ក្នុងឆ្នាំ២០១៧ កន្លងមកផងដែរ។

 

Fist Prev 1 2 3 4 5 Next Last