សាខាកាកបាទក្រហមកម្ពុជា
ខេត្តកំពង់ធំ ធ្វើការវាយតម្លៃជ្រើសរើសដាក់ចំណាត់ថ្នាក់លើផ្ទាំងគំនូររបស់កុមារ
សាខាសាខាកក្រក ខេត្តកំពង់ធំ ៖ នាព្រឹកថ្ងៃទី ២៨ខែ មីនា ឆ្នាំ ២០១៨ នេះ លោកកែវ សំបូរ នាយករងសាខា កាកបាទក្រហមកម្ពុជា ខេត្តកំពង់ធំ និងមន្ត្រីសាខា អនុសាខាក្រុងស្ទឹងសែន សហការជាមួយមន្ទីរអប់រំ យុវជន និងកីឡា ខេត្តកំពង់ធំ បានធ្វើការវាយតម្លៃជ្រើសរើសដាក់ចំណាត់ថ្នាក់លើផ្ទាំងគំនូររបស់កុមារ ដែលបានប្រឡងគូរគំនូរកុមារ ក្រោមប្រធានបទ "កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា - មិនទុកនរណាម្នាក់ចោល" កាលពីថ្ងៃទី ១៥ ១៦ ខែ មីនា ឆ្នាំ ២០១៨ កន្លងទៅ ។
មានប្រសាសន៍នាឱកាសនោះ នាយករងសាខា សូមឲ្យមន្ត្រីប្រតិបត្តិសាខា អនុសាខា និងលោកគ្រូ អ្នកគ្រូ ទាំងអស់ ពិនិត្យ វាយតម្លៃ និងជ្រើសរើសឲ្យបានម៉ត់ចត់លើផ្ទាំងគំនូរណាដែលគូរមានភាពរស់រវើក និងប្រកបដោយអត្ថន័យគ្រប់គ្រាន់ ដែលស្របទៅនឹងសកម្មភាពមនុស្សធម៌ចម្រុះវិស័យរបស់កាកបាទក្រហមកម្ពុជា ។
បន្ទាប់ពីបានពិនិត្យវាយតម្លៃយ៉ាងយកចិត្តទុកដាក់រួចមក ជាលទ្ធផល៖
-ចំណាត់ថ្នាក់លេខ១ បានទៅ៖ កុមារីឈ្មោះ ឆម កញ្ញា រៀនថ្នាក់ទី៥គ មកពីសាលាបឋមសិក្សាអនុវត្តហ៊ុនសែនអាចារ្យលាក់ ។
-ចំណាត់ថ្នាក់លេខ២៖ កុមារីឈ្មោះ ទ្រី ចន្ទសុបញ្ញា រៀនថ្នាក់ទី៥ក មកពីសាលាបឋមសិក្សា អនុវត្ត ហ៊ុនសែន អាចារ្យលាក់ ។
-ចំណាត់ថ្នាក់លេខ៣៖ កុមារាឈ្មោះ លាំង ស៊ី រៀនថ្នាក់ទី ៥គ មកពីសាលាបឋមសិក្សាកំពង់ធំក្រុង។
ពិធីប្រឡង គំនូរកុមារ នៅខេត្តកំពត
សាខាកក្រកខេត្តកំពត ៖ នាព្រឹក ថ្ងៃទី ២៦ ខែមីនា ឆ្នាំ២០១៨ សាខាកាកបាទក្រហមកម្ពុជា ខេត្តកំពត បានរៀបចំការប្រឡងគំនូរកុមារ ក្រោមប្រធានបទ «កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល» ដែលការដឹកនាំដោយលោកវេជ្ជ. កែវ សុផាន់ នាយកសាខា និងមានការអញ្ជើញចូលរួមពី លោក លោកស្រី សមាជិក សមាជិកាគណៈកម្មាធិការសាខា លោកគ្រូ អ្នកគ្រូ និងសិស្សានុសិស្សចំនួន ២៣នាក់ (ស្រី១៦នាក់) មកពីសាលាគោលដៅចំនួន១៣ ក្នុងក្រុង-ស្រុកទាំង៧ ខេត្តកំពត។
ការប្រឡងគំនូរកុមារនេះមានគោលបំណង ដើម្បីឲ្យសិស្សា នុសិស្សទាំងអស់បានយល់ដឹងពីប្រវត្តិចលនាកាកបាទក្រហម អឌ្ឍចន្ទក្រហម បណ្តុះគំនិត ទឹកចិត្តជ្រះថ្លា និងស្រឡាញ់ការងារមនុស្សធម៌ ដែលជុំរុញឲ្យកុមារ ក្លាយជាទំពាំងស្នងឬស្សីនាពេលអនាគត និងជាផ្នែកមួយនៃដំណើរឆ្ពោះទៅអបអរខួបទី១៥៥ នៃទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ ២០១៨ ខាងមុខនេះ
គ្រួសាររងគ្រោះដោយអគ្គីភ័យនៅភូមិត្រពាំងទឹម ស្រុកស្វាយលើ ទទួលអំណោយមនុស្សធម៌
សាខាកក្រកខេត្តសៀមរាប៖ នៅព្រឹកថ្ងៃសុក្រ ៧កើត ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ២៣ ខែមីនា ឆ្នាំ២០១៨ លោក ស៊ិក ប៊ុនស៊ីន ប្រធានគណៈកម្មាធិការអនុសាខាកាកបាទក្រហមកម្ពុជា ស្រុកស្វាយលើ និងសហរីនាំយកអំណោយមនុស្សធម៌ផ្ដល់ជូនគ្រួសារ អ្នកមីង សុង សូយ អាយុ៥០ឆ្នាំ ជាស្ត្រីមេម៉ាយទីទ័លក្រ មានកូន៣នាក់ រងគ្រោះដោយ ខេត្តសៀមរាប។
នាឱកាសនោះ លោក ស៊ិក ប៊ុនស៊ីន បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តមបណ្ឌិត ឃឹម ប៊ុនសុង ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល” ។ លោកក៏បានបន្តថា សូមកុំអស់សង្ឃឹម ត្រូវព្យាយាមតស៊ូបន្តទៀត ដើម្បីមើលថែកូនៗឱ្យពួកបានចូលសាលារៀនសូត្រឆ្ពោះទៅទទួលបានអនាគតភ្លឺស្វាង។
អំណោយមនុស្សធម៌ដែលបានផ្ដល់ជូនរួមមាន៖ សង្ក័សី១០សន្លឹក អង្ករ២៥គីឡូក្រាម មុង១ ភួយ១ សារុង១ ក្រមា១ កន្ទេល១ ចាន៥ ស្លាបព្រា៥ ធុងទឹក២ ឆ្នាំង១ និងថវិកា១សែនរៀល ។ ជាមួយគ្នានេះដែរឃុំបានជួយឧបត្ថម្ភ កង់១គ្រឿងផងដែរ។
គ្រួសាររងគ្រោះដោយខ្យល់កន្ត្រាក់ នៅឃុំស្ទឹងត្រង់ ស្រុកសាលាក្រៅ ខេត្តប៉ៃលិនទទួលអំណោយមនុស្សធម៌
សាខាកក្រកខេត្តប៉ៃលិន ៖ កាលពីថ្ងៃទី ២២ ខែមីនា ឆ្នាំ២០១៨ សាខាកាកបាទក្រហមកម្ពុជា ខេត្តប៉ៃលិន ដឹកនាំដោយ ឯកឧត្តម សៅ សារ៉ាត់ អនុប្រធានគណៈកម្មាធិការសាខា និងសហការី បានចុះសួរសុខទុក្ខ និងនាំយកអំណោយមនុស្សធម៌របស់កាកបាទក្រហមកម្ពុជា ជូនដល់គ្រួសាររងគ្រោះដោយសារខ្យល់កន្ត្រាក់ចំនួន ៣២គ្រួសារ ស្ថិតនៅភូមិកោះកែវ ភូមិអន្លុងរក្សា ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។
នាឱកាសនោះដែរ ឯកឧត្តម បានពាំនាំនូវប្រសាសន៍ផ្ដាំផ្ញើសាកសួរសុខទុក្ខនិងក្ដីនឹករលឹកពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្ដេចតែងតែគិតគូរសុខទុក្ខបងប្អូនប្រជាពលរដ្ឋក្រីក្រ ដែលមានទុក្ខលំបាក ជនរងគ្រោះ និងជនងាយរងគ្រោះដោយសារគ្រោះមហន្តរាយផ្សេងៗ ជាពិសេសជនរងគ្រោះដោយសារខ្យល់កន្ត្រាក់ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ។
អំណោយដែលបានផ្ដល់ជូនរួមមាន ៖ អង្ករ ៥០គីឡូក្រាម មុង១ ក្រម៉ា១ ភួយ១ សារ៉ុង១ សម្ភារៈផ្ទះបាយ ស័ង្កសី ៣០សន្លឹក និងថវិកាចំនួន ១០០,០០០រៀល។ គ្រួសាររងគ្រោះមួយចំនួនទៀតទទួលបាន ស័ង្កសី ២០សន្លឹក និងថវិកាចំនួន ១០០,០០០រៀល ព្រមទាំងថវិកាសប្បុរសជនមួយចំនួនផងដែរ៕
សាខាកាកបាទក្រហមកម្ពុជា ខេត្តត្បូងឃ្មុំ ចុះសួរសុខទុក្ខ គ្រួសារជួបគ្រោះថ្នាក់ចរាចរណ៍
សាខាកក្រក ខេតត្តត្បូងឃ្មុំ ៖ នៅថ្ងៃទី ១៩ ខែ មីនា ឆ្នាំ ២០១៨ លោក រស់ សុខន នាយករង សាខាកាកបាទក្រហមកម្ពុជា ខេត្តត្បូងឃ្មុំ និងសហការី បានចុះសួរសុខទុក្ខ និងអំណោយ ទៅផ្តល់ជូនលោកស្រី យាម ភត្រា អាយុ ២៧ ឆ្នាំ នៅភូមិអង្គរជយ័ ឃុំ ស្រឡប់ ស្រុកត្បូងឃ្មុំ ខេត្តត្បូងឃ្មុំ ដែលបានជួបគ្រោះថ្នាក់ចរាចរណ៍កន្លងមក បានបណ្តាលឲ្យស្លាប់ម្តាយ និងកូនប្រុសជាទីស្រឡាញ់ និងលោកស្រីក៏បាន បាក់ឆ្អឹងដងកាំបិត ហើយដែលបាននិងកំពុងសម្រាកព្យាបាលរបួស នៅមន្ទីរពេទ្យ ខេត្តកំពង់ចាម ។
នៅក្នុងឱកាសនោះ លោកបាន សំដែងនូវការសោកស្តាយចំពោះ គ្រោះថ្នាក់ដែលបានកើតឡើង បណ្តាលឲ្យគ្រួសារស្ត្រីរងគ្រោះត្រូវស្លាប់ម្តាយ និងកូនប្រុស នៅក្នុងហេតុការណ៍នៃគ្រោះថ្នាក់ចរាចរណ៍នេះ ហើយក៏បានពាំនាំនូវការផ្តាំផ្ញើនិងការចូលរួមរំលែកទុក្ខ ពីសំណាក់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ជូនជនរងគ្រោះ ព្រមទាំងគ្រួសារ ដោយបានជូនពរឲ្យឆាប់បានជាសះស្បើយពីមុខរបួស ឆាប់បានវិលត្រឡប់ទៅកាន់ទីលំនៅវិញ ។
អំណោយដែលផ្តល់ជូនរួមមាន ៖ ទឹកដោះគោឆៅ ២ឡូតិ៍ និងស្ករស ១គីឡូ និងថវិកាមួយចំនួន។