Webmail
E-Learning
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា

ទីស្នាក់ការកណ្តាល

ពិធីសំណេះសំណាលជាមួយនិវត្តន៍ជនកាកបាទក្រហមកម្ពុជា

កក្រក ៖ នាព្រឹកថ្ងៃពុធ ៦រោច ខែកត្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ២៨ ខែ វិច្ឆិកា ឆ្នាំ ២០១៨ នេះ លោកជំទាវ ​ពុំ ចន្ទីនី អគ្គលេខាធិការ​ កាកបាទក្រហម​កម្ពុជា បានអញ្ជើញ​ជួបសំណេះសំណាល​ជាមួយនិវត្តន៍ជន​កាកបាទក្រហម​កម្ពុជា សរុបចំនួន ៧១នាក់ ​ដែលប្រព្រឹត្ត​ទៅនៅទីស្នាក់ការ​កណ្ដាលកាកបាទក្រហម​កម្ពុជា។

កិច្ចប្រជុំនេះ​ ធ្វើឡើង​ក្នុងគោលបំណង​ដើម្បីផ្លាស់ប្ដូរ​បទពិសោធ​ន៍គ្នាទៅវិញទៅមក ​និងរៀបរាប់​អំពីសកម្មភាព​មនុស្សធម៌​របស់កាកបាទក្រហម​កម្ពុជាបាន​ធ្វើកន្លងមក។ លើសពីនេះទៀត​ កាកបាទក្រហមកម្ពុជា ក៏បានជួប​នឹងឧបសគ្គ​ជាច្រើនក្នុងការ​ចុះបេសកកម្ម​មនុស្សធម៌ ជាពិសេស​នៅតំបន់ដាច់ស្រយ៉ាល ក៏ប៉ុន្តែ​កាកបាទក្រហម​កម្ពុជា ពុះពារ​គ្រប់ឧបសគ្គ​ដើម្បីឆ្លើយតប​ទៅកាន់​ជនរងគ្រោះឲ្យបានទាន់ពេលវេលា ដូចទិសស្លោក “កាកបាទក្រហម​កម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល ”៕

 

កាកបាទក្រហមកម្ពុជា សួរសុខទុក្ខ ប្រជាពលរដ្ឋងាយរងគ្រោះ មកពី ស្រុកកោះញ៉ែក ខេត្តមណ្ឌលគិរី

កក្រក ៖ នាព្រឹកថ្ងៃសុក្រ ៩កើត ខែកត្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១៦ ខែ វិច្ឆិកា ឆ្នាំ ២០១៨ កាកបាទក្រហម​កម្ពុជា ដែលមាន​សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ជាប្រធាន បានចាត់ឲ្យ​ឯកឧត្តមវេជ្ជ. អ៊ុយ សំអាត នាយក នាយកដ្ឋាន​គ្រប់គ្រងគ្រោះមហន្តរាយ​កាកបាទក្រហមកម្ពុជា​ និងសាខាកាកបាទក្រហម​កម្ពុជា ខេត្តមណ្ឌលគិរី បន្តបេសកកម្ម​មនុស្សធម៌ ចុះសួរសុខទុក្ខ ​និងនាំយកអំណោយមនុស្សធម៌​របស់កាកបាទក្រហម​កម្ពុជា ជូនដល់​ប្រជាពលរដ្ឋ ជនចាស់ជរា​គ្មានទីពឹង ស្ត្រីមេម៉ាយ​កូនច្រើន កុមារកំព្រា ជនពិការ​ និងអ្នករស់​នៅជាមួយ​មេរោគអេដស៍​ សរុបចំនួន ៧៥៤គ្រួសារ ​មកពីភូមិចំនួន២៤ ឃុំចំនួន៦ ស្រុកកោះញ៉ែក ខេត្តមណ្ឌលគិរី។

ក្នុងឱកាសនោះដែរ ឯកឧត្តមវេជ្ជ. ​បានពាំនាំនូវសារអប់រំ​របស់សម្ដេចកិត្តិព្រឹទ្ធបណ្ឌិតប្រធាន ជូនដល់ប្រជាពលរដ្ឋទាំងអស់ដែលមានខ្លឹមសារ​ដូចតទៅ៖ សូមបងប្អូន​យកចិត្តទុកដាក់​ក្នុងការរស់នៅប្រចាំថ្ងៃ ដោយថែរក្សាសុខភាពឲ្យបានល្អ សំអាត​បរិស្ថានជុំវិញផ្ទះ មានអនាម័យ​ក្នុងការរស់នៅ ដោយប្រកាន់​ខ្ជាប់នូវ ហូបស្អាត ផឹកស្អាត និងរស់នៅស្អាត គេងក្នុង​មុងជានិច្ច ការពារកុំឲ្យកើតជំងឺគ្រុនចាញ់-គ្រុនឈាម និងជំងឺឆ្លងផ្សេងៗ ត្រូវជៀសឲ្យឆ្ងាយពីគ្រឿងញៀន​ គោរពច្បាប់ចរាចរណ៍​ទាំងអស់គ្នា សូមកុំបើកបរ​ក្រោមឥទ្ធិពល​គ្រឿងស្រវឹង ហើយត្រូវខិតខំ​ប្រកបរបរ​រកស៊ីចិញ្ចឹមជីវិត ដើម្បីស្ដារ​សេដ្ឋកិច្ចគ្រួសារឡើងវិញ។ ចំណែកស្ត្រីមានផ្ទៃពោះ និងអ្នករស់នៅជាមួយមេរោគ​អេដស៍ ត្រូវទៅពិនិត្យ​សុខភាពនៅមណ្ឌលសុខភាព​ឲ្យបានទៀងទាត់​ និងលេបថ្នាំទៅតាមការ​ណែនាំរបស់គ្រូពេទ្យ។

ជាកិច្ចឆ្លើយតប ប្រជាពលរដ្ឋ​ទាំងអស់​ មានសេចក្ដីរីករាយ​ក្រៃលែង និងបាន​ថ្លែងអំណរអរគុណយ៉ាងជ្រាលជ្រៅចំពោះ​កាកបាទក្រហមកម្ពុជា ជាពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែ​មានក្ដីអាណិត​អាសូរ សន្តោសប្រណី​ ដល់ប្រជាពលរដ្ឋ និងសូមជូនពរដល់សម្ដេចឲ្យមានសេចក្ដីសុខសុភមង្គលក្នុងក្រុមគ្រួសារ និងទទួលបាននូវពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

អំណោយដែលបានផ្ដល់ជូនគ្រួសារនីមួយៗរួមមាន ៖ អង្ករ ៣០គីឡូក្រាម មី ១កេស ត្រីខ ១០កំប៉ុង មុង១ ភួយ១ សារុង១ ក្រមា១ អាវយឺត១​ ទឹកបរិសុទ្ធ ១ដប និងនំបុ័ង ១ដើម។ ជាមួយគ្នានេះ​ គ្រួសារនីមួយៗ​ នៅទទួលបាន ក្រណាត់ស ១ដុំ និងថវិកា១មុឺនរៀលទៀត​ ជាអំណោយ​របស់ សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត៕

 

កាកបាទក្រហមកម្ពុជា សួរសុខទុក្ខចាស់ជរាគ្មានទីពឹង ស្ត្រីមេម៉ាយកូនច្រើន កុមារកំព្រា ជនពិការ និងអ្នករស់នៅជាមួយមេរោគអេដស៍ នៅក្រុងសែនមនោរម្យ ខេត្តមណ្ឌលគិរី

កក្រក​ ៖​ នៅថ្ងៃព្រហស្បតិ៍​ ទី ១៥ ខែ​វិច្ឆិកា​ ឆ្នាំ​២០១៨​ នេះ​ សម្តេចកិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា​ និងគណៈប្រតិភូអម​ដំណើរ​ បានបន្តជួបសំណេះសំណាល​ សួរសុខទុក្ខ និងផ្តល់អំណោយ​មនុស្សធម៌​ដោយផ្ទាល់ ​ជូនដល់ចាស់ជរា​គ្មានទីពឹង​ ស្ត្រីមេម៉ាយកូនច្រើន​ កុមារកំព្រា ជនពិការ​ និងអ្នករស់នៅជាមួយ​មេរោគអេដស៍ ចំនួន​ ១,៣១៣គ្រួសារទៀត​ (ក្នុងនោះមានជនជាតិខ្មែរចំនួន​ ៧៤៦គ្រួសារ​ ជនជាតិព្នងចំនួន​ ៥៦៤គ្រួសារ​ និងជនជាតិ​ឥស្លាមចំនួន​ ៣គ្រួសារ)​ រស់នៅភូមិចំនួន​ ១៤​ សង្កាត់​ចំនួន​ ៤​ នៃក្រុងសែនមនោរម្យ ​ខេត្តមណ្ឌលគិរី។ កម្មវិធីនេះ​ បានប្រារព្ធធ្វើឡើងនៅក្រោមដើមស្រល់ ក្នុងភូមិអូរស្ពាន​ សង្កាត់ស្ពានមានជ័យ​ ក្រុងសែនមនោរម្យ​ ខេត្តមណ្ឌលគិរី។

គ្រួសារនីមួយៗទទួលបាន​ ៖ អង្ករ ៣០គីឡូក្រាម មី១កេស ត្រីខ១០កំប៉ុង មុង១ ភួយ១ សារុង១ ក្រមា១ អាវយឺត១​ ទឹកសុទ្ធ១ដប និងនំបុ័ង១ដើម។ ជាមួយគ្នានេះ​ គ្រួសារនីមួយៗ​ នៅទទួលបាន ​ក្រណាត់ស ១ដុំ និងថវិកា១មុឺនរៀលទៀត​ ជាអំណោយ​របស់ សម្តេចតេជោ​នាយករដ្ឋមន្ត្រី និង​សម្តេចកិត្តិព្រឹទ្ធបណ្ឌិត៕

 

កាកបាទក្រហមកម្ពុជា សួរសុខទុក្ខ ចាស់ជរាគ្មានទីពឹង ស្ត្រីមេម៉ាយកូនច្រើន កុមារកំព្រា ជនពិការ និងអ្នករស់នៅជាមួយមេរោគអេដស៍ នៅស្រុកកែវសីមា ខេត្តមណ្ឌលគិរី។

កក្រក​ ៖​ នៅព្រឹកថ្ងៃពុធ ទី ១៤​ ខែ​វិច្ឆិកា​ ឆ្នាំ​២០១៨​ នេះ​ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា​ និងគណៈប្រតិភូអមដំណើរ​ បានអញ្ជើញជួប​សំណេះសំណាល​ សួរសុខទុក្ខ និងផ្តល់​អំណោយមនុស្សធម៌​ដោយផ្ទាល់ ជូនដល់​ចាស់ជរាគ្មានទីពឹង​ ស្ត្រីមេម៉ាយកូនច្រើន​ កុមារកំព្រា ជនពិការ​ និងអ្នករស់នៅជាមួយ​មេរោគអេដស៍ ចំនួន​ ១,៣៥៨គ្រួសារ​ រស់នៅភូមិចំនួន​ ១៥​ ឃុំចំនួន​ ៣​ នៃស្រុកកែវសីមា​ ខេត្តមណ្ឌលគិរី។

គ្រួសារនីមួយៗទទួលបាន​ ៖ អង្ករ ៣០គីឡូក្រាម មី១កេស ត្រីខ១០កំប៉ុង មុង១ ភួយ១ សារុង១ ក្រមា១ អាវយឺត១​ ទឹកសុទ្ធ១ដប និងនំបុ័ង១ដើម។ ជាមួយគ្នានេះ​ គ្រួសារនីមួយៗ​ នៅទទួលបាន ក្រណាត់ស ១ដុំ និងថវិកា១មុឺនរៀលទៀត​ ជាអំណោយ​របស់ សម្តេចតេជោ​នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត។ ដោយឡែក​ សិស្សានុសិស្សចំនួន​ ២០០នាក់​ ក្នុងម្នាក់ៗទទួលបាន​ សៀវភៅសរសេរ​ ២ក្បាល​ ប៊​ិក​ ១ដើម​ និងថវិកា​ ១ម៉ឺនរៀល៕

 

កាកបាទក្រហមកម្ពុជា ផ្តល់ថវិកា និងគ្រឿងឧបភោគបរិភោគ ដល់កុមារា ធុច សាលីក មកពីខេត្តសៀមរាប

កក្រក​ ៖ ដោយមានការ​ចាប់អារម្មណ៍​យ៉ាងខ្លាំង​ពីទេពកោសល្យ​របស់កុមារា​ពីរនាក់​បងប្អូន​ ដែលអាចនិយាយបានច្រើន​ភាសាក្នុងពេល​លក់វត្ថុអនុស្សាវរីយ៍​នោះ នៅថ្ងៃចន្ទ ទី ១២ ខែវិច្ឆិកា ឆ្នាំ២០១៨ នេះ សម្តេចកិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន​ ប្រធាន​កាកបាទក្រហមកម្ពុជា ​បានសម្រេចផ្តល់ថវិកា​ និងគ្រឿងឧបភោគបរិភោគ​មួយចំនួនដល់កុមារា ​ធុច សាលីក អាយុ ១៤ឆ្នាំ និងកុមារា​ ធុច ទិត្យា អាយុ ១១ឆ្នាំ សម្រាប់ផ្គត់ផ្គង់​ក្នុងជីវភាពរស់នៅ ​និងបន្តការសិក្សា​រហូតដល់ចប់ចុង​ចប់ដើមក្លាយ​ជាធនធាន​មនុស្សដ៏ពូកែ​របស់សង្គមជាតិ។

តាមរយៈ លោកជំទាវ ម៉ែន នារីសោភ័គ អគ្គលេខាធិការរងទី ១ ដែលប្រគល់​អំណោយ​នាពេលនោះ​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បាន​កោតសរសើរដល់​ទេពកោសល្យ​ពូកែចងចាំ​ភាសារបស់ចៅៗទាំងពីរនាក់ ​និងផ្តាំផ្ញើឱ្យ​យកចិត្តទុកដាក់​បន្តការសិក្សារៀនសូត្រ​ឱ្យចេះច្បាស់លាស់​ទាំងការនិយាយ និងការសរសេរ ​លើភាសាខ្មែរ ​និងភាសាបរទេស។ បន្ថែមពីនេះ ត្រូវចាប់​យកជំនាញ ឬឯកទេសអ្វីមួយឱ្យ​បានច្បាស់លាស់ ​ឱ្យមានសមត្ថភាព​គ្រប់គ្រាន់​ដើម្បីអនាគតភ្លឺស្វាង​ព្រោះការចេះភាសា​និយាយតែ​មួយមុខមិនទាន់​គ្រប់គ្រាន់​នៅឡើយទេ។ ជាមួយគ្នានេះ សម្តេចកិត្តិព្រឹទ្ធបណ្ឌិត​ ក៏បានផ្តាំផ្ញើថ្លែងអំណរគុណ​ដល់ឪពុក​ដែលប្រកបរបរ​ជាជាងគំនូរ​ និងម្តាយជា​អ្នកលក់វត្ថុអនុស្សាវរីយ៍​ ដែលបានអប់រំប្រៀនប្រដៅ ​បណ្តុះបណ្តាលកូនៗ ឱ្យបានរៀនសូត្រ​គ្រប់គ្នា។ បន្ថែមពីនេះ​ សូមថ្លែងអំណរគុណដល់​ ឧកញ៉ា​ ឌួង​ ឆាយ​ ដែលនឹងជួយឧបត្ថម្ភដល់ការរៀនសូត្ររបស់កុមាររហូតដល់ចប់មហាវិទ្យាល័យ​ ក៏ដូចជា​សប្បុរសជនទាំងអស់​ដែលជួយឧបត្ថម្ភ​ជាបន្តបន្ទាប់ដើម្បី​លើកទឹកចិត្ត​ និងជួយ​សម្រាលការលំបាកក្នុងជីវភាព​រស់នៅ​របស់កុមារទាំងពីរ​នាក់នេះផងដែរ។

ទន្ទឹមនឹងនេះ កុមារាទាំងពីរ​នាក់បងប្អូន បានសម្តែងក្តីរំភើបរីករាយ​ឥតឧបមាដោយ​ទទួលបានការលើកទឹកចិត្តយ៉ាងកក់ក្តៅ ពីលោកយាយ​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ហើយចៅៗសូមប្តេជ្ញាខិតខំសិក្សារៀនសូត្រ​ឱ្យបានពូកែចាប់យក​ជំនាញច្បាស់លាស់ ធ្វើជាកូនល្អ សិស្សល្អ ពលរដ្ឋល្អនៅក្នុងសង្គម។

Fist Prev 1 2 3 4 5 Next Last