ទីស្នាក់ការកណ្តាល
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទទួលជួបសវនាការ និងទទួលអំណោយសប្បុរសធម៌ពី សម្ព័ន្ធឧស្សាហកម្មកៅស៊ូវៀតណាម
នៅព្រឹក ថ្ងៃទី ២០ ខែ ឧសភា ឆ្នាំ ២០១៣ វេលាម៉ោង ១០:២០ ព្រឹក សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានទទួលជួបសវនាការ និងទទួលអំណោយសប្បុរសធម៌ពី សម័ន្ធឧស្សាហកម្ម កៅស៊ូវៀតណាម នៅទីស្នាក់ការកណ្តាលកាកបាទក្រហមកម្ពុជា។
ជាកិច្ចចាប់ផ្តើម សម្តេចកិត្តិព្រឹទ្ធបណ្ឌិត ប្រធាន កាកបាទក្រហមកម្ពុជា បានសម្តែងនូវ សេចក្តីសោមនស្សរីករាយ និងថ្លែងអំណរគុណចំពោះកាយវិការប្រកបដោយទឹកចិត្តមនុស្សធម៌ក្នុង ការចូលរួមចំណែក ជាមួយកាកបាទក្រហមកម្ពុជា។ សម្តេចកិត្តិព្រឹទ្ធបណ្ឌិត បាន លើកឡើងថានេះគឺជាលើកទី ៧ ហើយ ដែលក្រុមហ៊ុនបានផ្តល់អំណោយមនុស្សធម៌ដល់កាកបាទក្រហមកម្ពុជា និងតាងនាមអោយថ្នាក់ដឹកនាំ មន្ត្រី បុគ្គលិក កាកបាទក្រហម សូមថ្លែងនូវអំណរគុណយ៉ាងជ្រាលជ្រៅដល់គណៈប្រតិភូដែលបានពាំនាំ អំណោយដ៏ថ្លៃថ្លានេះ។
សម្តេចកិត្តិព្រឹទ្ធបណ្ឌិត បាន គូសបញ្ជាក់ថា កាកបាទក្រហមកម្ពុជាគឺជាអង្គការមិនមែនរដ្ឋាភិបាល គឺអាស្រ័យលើការរួមចំណែកពីសំណាក់សប្បុរសជនជាតិ និងអន្តរជាតិដើម្បីបង្កលក្ខណៈក្នុងការជួយជនដែលងាយរងគ្រោះ បានយ៉ាងមានប្រសិទ្ធភាព និងទាន់ពេលវេលា។ ហើយបច្ចុប្បន្ននេះ កាកបាទក្រហមកម្ពុជាមានទទួលនូវជំនឿទុកចិត្តកាន់តែច្រើនពីសំណាក់ សប្បុរសជន នៅក្នុងការប្រើប្រាស់អំណោយសប្បុរសធម៌ប្រកបដោយគណនីភាព អាស្រ័យហេតុនេះទើបកាកបាទក្រហមកម្ពុជា បានទទួលនូវសមិទ្ធផលជាច្រើននាពេលកន្លងមកនេះ។
បន្ថែមពីនេះទៀត សម្តេចកិត្តិព្រឹទ្ធបណ្ឌិត បាន កោតសរសើរដល់ក្រុមហ៊ុនក្នុងការបង្កើតការងារដល់ប្រជាជនបានរាប់ ពាន់នាក់ ដែលនេះជាការចូលរួមកាត់បន្ថយភាពក្រីក្រ និងបន្ទុករបស់រាជរដ្ឋាភិបាលកម្ពុជាផងដែរ។
ជាកិច្ចឆ្លើយតប លោក វ័រ ស៊ីលឹក ប្រធានក្រុមប្រឹក្សភិបាល បានថ្លែងងនូវអំណរគុណចំពោះ សម្តេចកិត្តិព្រឹទ្ធបណ្ឌិត ដែល បានអនុញ្ញាតអោយគណៈប្រតិភូ បានចូលសម្តែងការគួរសម និងរួមចំណែកជាមួយកាកបាទក្រហមកម្ពុជា ក្នុងវិស័យមនុស្សធម៌។ ហើយតាងនាមអោយសម្ព័ន្ធឧស្សាហកម្មកៅស៊ូវៀតណាម សូមសន្យាថាហ្នឹងបន្តជួយ ឧបត្ថម្ភគាំទ្រ និងរួមចំណែកជាមួយកាកបាទក្រហមកម្ពុជា ក្នុងការជួយដល់ប្រជាជនដែលរងគ្រោះដោយ វិបត្ត និងគ្រោះមហន្តរាយនានា។
ជាទីបញ្ចប់ សម្តេចកិត្តិព្រឹទ្ធបណ្ឌិត បានជូនពរដល់ គណៈប្រតិភូ បុគ្គលិក និងក្រុមហ៊ុន សូមអោយមាន សុខភាពល្អ ជោគជ័យក្នុងការប្រកបរបប និងសុភមង្គលក្នុងក្រុមគ្រួសារ។
អត្ថបទដោយ តាំង សាមឿន
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទទួលជួបសវនាការ និងប្រគល់ថវិកាជូនមន្ទីពេទ្យគន្ធបុប្ជា
នៅព្រឹក ថ្ងៃទី ២០ ខែ ឧសភា ឆ្នាំ ២០១៣ វេលាម៉ោង ១១:០០ ព្រឹក សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានទទួលជួបសវនាការ និងផ្តល់អំណោយសប្បុរសធម៌ជូន មន្ទីពេទ្យគន្ធបុប្ជា នៅទីស្នាក់ការកណ្តាលកាកបាទក្រហមកម្ពុជា។
ជាកិច្ចចាប់ផ្តើម សម្តេចកិត្តិព្រឹទ្ធបណ្ឌិត ប្រធាន កាកបាទក្រហមកម្ពុជា បានសម្តែងនូវសេចក្តីសោមនស្សរីករាយ និងថ្លែងអំណរគុណចំពោះកាយវិការប្រកបដោយទឹកចិត្តមនុស្សធម៌ក្នុង ការចូលរួមចំណែកជួយសង្គ្រោះព្យាបាល ដល់កុមារនៅទូទាំងប្រទេស។ សម្តេចកិត្តិព្រឹទ្ធបណ្ឌិត បាន កោតសរសើរចំពោះកិច្ចខិតខំទាំងយប់ទាំងថ្ងៃពី សំណាក់មន្ត្រី បុគ្គលិកដែលធ្វើការជាប្រចាំនៅគ្រប់សាខានៃមន្ទីរពេទ្យគន្ធបុ ប្ជា ដើម្បីជួយព្យាបាលកុមារបានទាន់ពេលវេលា និងប្រកបដោយប្រសិទ្ធភាពខ្ពស់។
ជាមួយគ្នានោះដែរ សម្តេចកិត្តិព្រឹទ្ធបណ្ឌិត បានលើកទឹកចិត្តអោយ ឯកឧត្តមរដ្ឋមន្ត្រី ក្រសួង សុខាភិបាល មេត្តាជួយ ពិចារណាលទ្ធភាពក្នុងការជួយបង្កើតនូវមន្ទីរពេទ្យបង្អែកអោយបាន គ្រប់ស្រុក និងជួយសម្រួលការដឹក ជញ្ជូនពេលស្ត្រីធ្វើការឆ្លងទន្លេ។ បន្ថែមពីនេះទៀត សម្តេចកិត្តិព្រឹទ្ធបណ្ឌិត បានលើកឡើងថា ថវិការសប្បុរសធម៌ នាពេលនេះគឺបានមកពីការចូលរួមពីសំណាក់សប្បុរសជនកាលពី ខួបលើកទី ១៥០នៃទិវាពិភពលោក កាកបាទក្រហម អឌ្ឍចន្ទក្រហម ដែលប្រារព្ធឡើងនៅស្នាក់ការកណ្តាលកាកបាទក្រហមកម្ពុជា ក្រោមអធិបតីភាព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ជាកិច្ចឆ្លើយតប លោកវិជ្ជបណ្ឌិត បេអាត រីចនើរ ប្រធានមូលនិធិគន្ធបុប្ជា បានថ្លែងងនូវអំណរគុណចំពោះ សម្តេចកិត្តិព្រឹទ្ធបណ្ឌិត ក៏ ដូចជាកាកបាទក្រហមកម្ពុជា ដែលបានប្រគល់ថវិកាចំនួន ១លាន ដុល្លា ដល់មន្ទីរពេទ្យ គន្ធបុប្ជា ដើម្បីបង្កលក្ខណៈរបស់ខ្លួន និងមានសារៈសំខាន់ណាស់ក្នុងការជួយសង្គ្រោះជីវិតកុមារ និងគាំពារបានកាន់តែប្រសើរឡើងថែមទៀត។ លោកវិជ្ជបណ្ឌិត បាន គូសបញ្ជាក់ថា ចាប់តាំងពីឆ្នាំ ១៩៩៣ រហូតដល់ ២០១២ មន្ទីរពេទ្យគន្ធបុប្ជាបានចំណាយថវិកាអស់ចំនួនជាង ៥០០លាន ដុល្លា ក្នុងការជួយទ្ររទ្រង់ព្យាបាលដល់កុមារ កម្ពុជា ហើយ លោកវិជ្ជបណ្ឌិត សង្ឃឹម ថាកាយវិការប្រកបដោយមនុស្សធម៌របស់កាកបាទក្រហមកម្ពុជា នឹងក្លាយជាគំរូដល់សប្បុរសជននានាដែលមានបំណងជួយដល់កុមារនានា នៅទូទាំងប្រទេស និងដើម្បីរួមគ្នាជួយកសាង អភិវឌ្ឍប្រទេសកម្ពុជាអោយកាន់តែប្រសើរឡើងថែមទៀត។
ជាទីបញ្ចប់ សម្តេចកិត្តិព្រឹទ្ធបណ្ឌិត បានជូនពរដល់ គណៈប្រតិភូបុគ្គលិកនៃមន្ទីរពេទ្យ សូមអោយមានសុខភាពល្អ ជោគជ័យក្នុងការបំពេញការងារមនុស្សធម៌ និងសុភមង្គលក្នុងក្រុមគ្រួសារ។
អត្ថបទដោយ តាំង សាមឿន
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទទួលជួបសវនាការ និងជំរាបលារបស់ឯកឧត្តមឯកអគ្គរដ្ឋទូតចិន ប្រចាំនៅកម្ពុជា
នៅព្រឹក ថ្ងៃទី ២០ ខែ ឧសភា ឆ្នាំ ២០១៣ វេលាម៉ោង ០៩:៤០ ព្រឹក សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានទទួលជួបសវនាការ និងជំរាបលារបស់ ឯកឧត្តម Pan Guangue ឯកអគ្គរដ្ឋទូតចិន ប្រចាំនៅកម្ពុជា នៅទីស្នាក់ការកណ្តាលកាកបាទក្រហមកម្ពុជា។
ជាកិច្ចចាប់ផ្តើម សម្តេចកិត្តិព្រឹទ្ធបណ្ឌិត ប្រធាន កាកបាទក្រហមកម្ពុជា បានសម្តែងនូវសេចក្តីសោមនស្សរីករាយ ចំពោះការអញ្ជើញមកដល់ស្នាក់ការកណ្តាលកាកបាទក្រហមកម្ពុជា និងកោតសរសើរចំពោះការបំពេញ បេសកកម្មការទូតរបស់ឯកឧត្តម ប្រចាំនៅព្រះរាជាណាចក្រកម្ពុជាក្នុងរយះពេល៣ឆ្នាំកន្លងមកនេះ។ សម្តេចកិត្តិព្រឹទ្ធបណ្ឌិត តាង នាមអោយថ្នាក់ដឹកនាំ មន្ត្រី បុគ្គលិកកាកបាទក្រហមកម្ពុជា បានថ្លែងនូវអំណរគុណយ៉ាងជ្រាលជ្រៅ ដល់រដ្ឋាភិបាល ប្រជាជន និងសមាគមជាតិកាកបាទក្រហមចិន ដែលបានជួយជាប្រចាំដល់កាកបាទក្រហមកម្ពុជា ទាំងផ្នែកថវិកា បច្ចេកទេស និងសម្ភារៈ ដើម្បីបុព្វហេតុមនុស្សធម៌ ជាពិសេសក្នុងពេលដែលប្រជាជនកម្ពុជាជួបប្រទះនូវគ្រោះមហន្តរាយ នានា។ ជាងនេះទៅទៀត សម្តេចកិត្តិព្រឹទ្ធបណ្ឌិត ក៏ បានកោតសរសើរដល់រាជរដ្ឋាភិបាល និងសមាគមជាតិកាកបាទក្រហមចិន ដែលបានជួយកសាងនូវរចនាសម័ន្ពដូចជា ស្ពាន ថ្នល់ជាច្រើន ព្រមទាំងការផ្តល់ជំនួយជាម៉ាស៊ីនប៉ូមទឹកដល់ខេត្តចំនួនបួន ដែលទាំងនេះបានជួយលើកកម្ពស់ដល់ជីវភាពរស់នៅប្រជាជនក្នុងការ កាត់បន្ថយភាពក្រីក្រ។
សម្តេចកិត្តិព្រឹទ្ធបណ្ឌិត ប្រធាន កាកបាទក្រហមកម្ពុជា បានសម្តែងនូវការដឹងគុណដល់រដ្ឋាភិបាលចិន ដែលតែងតែ ជួយថែរក្សាព្យាបាលព្រះសុខភាពជូន ដល់ព្រះវររាជមាតិជាតិខ្មែរ ព្រះប្រធានកិត្តិយសកាកបាទក្រហមកម្ពុជា និងព្រះមហាក្សត្យ នៃព្រះរាជាណាចក្រកម្ពុជា។
ជាកិច្ចឆ្លើយតប ឯកឧត្តមអគ្គរដ្ឋទូតចិន បានថ្លែងងនូវអំណរគុណចំពោះ សម្តេចកិត្តិព្រឹទ្ធបណ្ឌិត ដែលបានអនុញ្ញាតអោយរួបឯកឧត្តម បានចូលជួបដើម្បីជំរាបលាក្នុងការបញ្ចប់បេសកកម្មការទូតរបស់ខ្លួន។ ឯកឧត្តមអគ្គរដ្ឋទូតចិន បាន លើកឡើងថា រាដ្ឋាភិបាល និងសមាគមជាតិកាកបាទក្រហមចិន តែងតែពេញចិត្តក្នុងការជួយគាំទ្រ ដល់រាជរដ្ឋាភិបាល និងប្រជាជនកម្ពុជានៅគ្រប់កាលៈទេសៈ ហើយនឹងនៅតែបន្តជួយនាពេលអនាគតថែមទៀត។
ឯកឧត្តមអគ្គរដ្ឋទូតចិន បាន គូសបញ្ជាក់ថា ចំណងមិត្តភាពរវាងប្រទេស ប្រជាជន និងសមាគមជាតិទាំងពីរ គឺមានភាពយ៉ាងជិតស្និត និងស្មោះសរ ហើយ ឯកឧត្តមអគ្គរដ្ឋទូតចិន សង្ឃឹមយ៉ាងម៉ុតម៉ាំថាចំណងការទូតរវាងប្រទេសទាំងពីរ នឹងត្រូវបានពង្រឹងជាលំដាប់។
ជាទីបញ្ចប់ សម្តេចកិត្តិព្រឹទ្ធបណ្ឌិត បានជូនពរដល់ ឯកឧត្តមឯកអគ្គរដ្ឋទូតចិន សូមអោយមានសុខភាពល្អ ជោគជ័យក្នុងភារៈកិច្ចថ្មី និងសុភមង្គលក្នុងក្រុមគ្រួសារ។
អត្ថបទដោយ តាំង សាមឿន
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទទួលជួបសវនាការ និងសម្តែងការគួរសមភរិយាឯកឧត្តមឯកអគ្គរាជទូតប្រុយណេ ប្រចាំនៅកម្ពុជា
នៅព្រឹក ថ្ងៃទី ២០ ខែ ឧសភា ឆ្នាំ ២០១៣ វេលាម៉ោង ០៩០០ ព្រឹក សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន កាកបាទក្រហមកម្ពុជា បានទទួលជួបសវនាការ និងសម្តែងការគួរសម ភរិយាឯកឧត្តមឯកអគ្គរាជទូតប្រុយណេ ប្រចាំនៅកម្ពុជា នៅទីស្នាក់ការ កណ្តាលកាកបាទក្រហមកម្ពុជា។
ជាកិច្ចចាប់ផ្តើម សម្តេចកិត្តិព្រឹទ្ធបណ្ឌិត ប្រធាន កាកបាទក្រហមកម្ពុជា បានសម្តែងនូវការស្វាគមន៍យ៉ាងកក់ក្តៅចំពោះ ការអញ្ជើញមកដល់ស្នាក់ការកណ្តាលកាកបាទក្រហមកម្ពុជា ក៏ដូចជាការបំពេញបេសកកម្មការទូតរបស់លោកជំទាវ និងឯកឧត្តមឯកអគ្គរាជទូតប្រុយណេប្រចាំនៅព្រះរាជាណាចក្រកម្ពុជា។ សម្តេចកិត្តិព្រឹទ្ធបណ្ឌិត បានកោតសរសើរដល់ លោកជំទាវ ដែល បានកាន់តំណែងជាអនុប្រធានស្ត្រីអាស៊ាន ដែលនេះជាមោទនភាពចំពោះស្ត្រីមិនត្រឹមតែនៅក្នុង តំបន់នោះទេ តែសម្រាប់ស្ត្រីទូទាំងពិភពលោកផងដែរ។ សម្តេចកិត្តិព្រឹទ្ធបណ្ឌិត បាន រំលឹកឡើងវិញថា ក្រោយថ្ងៃរំដោះ ៧ មករា ពីរបបប្រល័យពូជសាសន៍ ប៉ុល ពត បានបន្សល់ទុកនូវស្ត្រីមេម៉ាយ និងកុមារកំព្រារាប់ពាន់នាក់ ហេតុដូច្នេះហើយ បានជាសម្តេចកិត្តិព្រឹទ្ធបណ្ឌិត បាន បង្កើតនូវមជ្ឈមណ្ឌលអភិវឌ្ឍន៍ ចំនួន ៤ កន្លែងនៅក្នុងខេត្ត ៤ ដោយបានផ្តល់នូវការបណ្តុះបណ្តាលជំនាញផ្សេងៗដូចជា កាត់ដេរ តែងការ និងជំនាញបច្ចេកទេសនានាដែលពួកគេអាចយកទៅប្រកបរបប សម្រាប់គ្រូសាររបស់ខ្លួន។ ជាងនេះទៅទៀត សម្តេចកិត្តិព្រឹទ្ធបណ្ឌិត ក៏ បានបង្កើតនូវមណ្ឌលចាស់កំព្រាគ្មានទីពឹង ដល់ជនដែលរងគ្រោះបាត់បងប្តី ប្រពន្ធ កូនចៅរបស់ខ្លួន កាលនៅក្នុងរបបនោះផងដែរ ដោយធ្វើការផ្តល់នូវការអានគម្ពីធម៌ដើម្បី កាត់បន្ថយភាពឈឺចាប់របស់ពួកគេ ដែលនោះជាមូលនិធិផ្ទាល់ខ្លួនរបស់សម្តេចកិត្តិព្រឹទ្ធបណ្ឌិត ។
សម្តេចកិត្តិព្រឹទ្ធបណ្ឌិត បាន ថ្លែងអំណរគុណដល់រាជរដ្ឋាភិបាល និងប្រជាជនប្រុយណេ ដែលតែងតែជួយឧបត្ថម្ភគាំទ្រ ដល់រាជរដ្ឋាភិបាល និងប្រជាជនកម្ពុជា ទាំងផ្នែកថវិកា និងបច្ចេកទេស ជាពិសេសជំនួយសង្គ្រោះបន្ទាន់ ក្នុងដែលប្រទេស កម្ពុជាបានជួបនៅគ្រោះទឹកជំនន់កាលពីឆ្នាំ ២០១២។ សម្តេចកិត្តិព្រឹទ្ធបណ្ឌិត ក៏បានជូនពរអោយចំណងមិត្តភាពរវាង ប្រទេសទាំងពីរបានស្ថិតស្ថេរជារៀងរហូត។
ជាកិច្ចឆ្លើយតប លោកជំទាវភរិយា បានធ្វើការកោតសរសើរដល់វីរភាពដឹកនាំរបស់សម្តេចកិត្តិព្រឹទ្ធបណ្ឌិត ក្នុង កិច្ចការមនុស្សធម៌ ដោយបានជួយដល់ប្រជាជនដែលរងគ្រោះនៅទូទាំងប្រទេស បានយ៉ាងមានប្រសិទ្ធភាព និងទាន់ពេលវេលា។ លោកជំទាវភរិយា បាន សន្យាថានឹងបន្តជួយដល់រាជរជ្ឋាភិបាល និងកាកបាទក្រហមកម្ពុជា ព្រមទាំងប្រជាជនកម្ពុជា នៅក្នុងរយះពេលនៃការបំពេញបេសកម្មការទូតរបស់ឯកឧត្តមឯកអគ្គរាជទូត ដើម្បីចូលរួមអភិវឌ្ឍន៍ប្រទេសកម្ពុជា។
ជាទីបញ្ចប់ សម្តេចកិត្តិព្រឹទ្ធបណ្ឌិត បានជូនពរដល់ លោកជំទាវភរិយា និងឯកឧត្តមឯកអគ្គរាជទូត សូមអោយមាន សុខភាពល្អ ជោគជ័យ និងសុភមង្គលក្នុងក្រុមគ្រួសារ។
អត្ថបទដោយ តាំង សាមឿន
កាកបាទក្រហមកម្ពុជា អបអរសាទរ ខួបលើកទី ១៥០ ទិវាពិភពលោក កាកបាទក្រហម អឌ្ឍចន្ទក្រហម
កាល ពីព្រឹកថ្ងៃទី ០៨ ឧសភា ឆ្នាំ ២០១៣ នៅទីស្នាក់ការកណ្តាលកាកបាទក្រហមកម្ពុជា បានប្រារព្ធពិធីខួបលើកទី ១៥០ ទិវាពិភពលោក កាកបាទក្រហម អឌ្ឍចន្ទក្រហម ក្រោមប្រធានបទ ១៥០ ឆ្នាំ នៃសកម្មភាពមនុស្សធម៌ ក្រោមអធិបតីភាពដ៏ខ្ពង់ខ្ពស់ សមេ្តច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង សមេ្តច កិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ព្រមទាំងសប្បុរសជន និង មហាជនដែលមានចំនួនជាង ប្រាំពាន់នាក់ផងដែរ។
នៅក្នុងសុន្ទរកថាស្វាគមន៍ សម្តេចកិត្តិព្រឹទ្ធបណ្ឌិត ប្រធាន កាកបាទក្រហមកម្ពុជា បានថ្លែងអំណរគុណយ៉ាងជ្រាលជ្រៅ ចំពោះវត្ដមានរបស់ សម្ដេច ព្រះអង្គម្ចាស់ក្សត្រីយ៍ ឯកឧត្ដម លោកជំទាវ លោកឧកញ៉ា លោក លោកស្រី នាងកញ្ញា សប្បុរសជនជាតិ អន្ដរជាតិ សមាជិក សមាជិកា អ្នកស្ន័គ្រចិត្ដ យុវជនកាកបាទក្រហមកម្ពុជា ដែលបានចំណាយពេលវេលាដ៏មានតម្លៃ អញ្ជើញចូលរួមនៅក្នុងអង្គមិទ្ទីញនាពេលនេះ ដែលមិនត្រឹមតែ ឆ្លុះបញ្ចាំងអំពីការយកចិត្ដទុកដាក់ និងការជួយគាំទ្រ ចំពោះសកម្មភាពមនុស្សធម៌ របស់កាកបាទក្រហមកម្ពុជា ប៉ុណ្ណោះ ទេ ប៉ុន្ដែថែមទាំងជាប្រភពនៃកម្លាំងសាមគ្គីភាព និង សប្បុរសធម៌ ដើម្បីបុព្វហេតុមនុស្សធម៌ ជួយដល់ជនរងគ្រោះ និងជនងាយរងគ្រោះ គ្រប់ប្រភេទទៀតផង ។ បន្ថែមពីនេះទៀត កាកបាទក្រហមកម្ពុជា បានឈានឆ្ពោះទៅមុខ មុនរួចជាស្រេច ក្នុងការបំពេញតួនាទីដ៏មានសារៈសំខាន់របស់ខ្លួន ដោយថែមទាំងទទួលបានជោគជ័យថ្មីៗ បន្ថែមទៀត ក្នុងការបម្រើនូវសកម្មភាពមនុស្សធម៌ និងដោយប្រកាន់យ៉ាងខ្ជាប់ខ្ជួន នូវគោលការណ៍គ្រឹះទាំង ៧ របស់ចលនាកាកបាទ ក្រហម អឌ្ឍចន្ទក្រហម និងទៅតាមវិស័យស្នូលទាំង ៤ នៃយុទ្ធសាស្ដ្រ ២០១១-២០២០ របស់កាកបាទក្រហម កម្ពុជា ដែលនោះគឺជាការគ្រប់គ្រងគ្រោះមហន្ដរាយ ការអប់រំថែទាំសុខភាពតាមសហគមន៍ ការលើកកម្ពស់គោលការណ៍គ្រឹះ តម្លៃមនុស្សធម៌ សេចក្ដីថ្លៃថ្នូររបស់មនុស្សជាតិ និងវប្បធម៌អហិង្សា និងការអភិវឌ្ឍស្ថាប័ន ការអភិវឌ្ឍ ធនធាន ដើម្បីរួមចំណែកជាមួយរាជរដ្ឋាភិបាល ក្នុងការកាត់បន្ថយភាពក្រីក្រ និងជួយដល់ជនរងគ្រោះ និងជនងាយ រងគ្រោះ នៅគ្រប់ទីកន្លែង ក្នុងគ្រប់កាលៈទេសៈ តាមទិសស្លោក “ ទីណាមានទុក្ខលំបាក ទីនោះមានកាកបាទក្រហម កម្ពុជា ” និង ” រួមកម្លាំងគ្នា ដើម្បីមនុស្សធម៌ ”។
បន្ទាប់មក សមេ្តចអគ្គមហាសេនាបតីតេជោ ហ៊ុន សែន នាយក រដ្ឋមន្ត្រីនៃព្រះរាជាណាចក្រ កម្ពុជា បានអាននូវសន្ទរកថា ចាប់អារម្មណ៍ ដោយបានគូសបញ្ជាក់ថា ពិធីនេះត្រូវបានរៀបចំឡើង ក្នុងគោលដៅរួមចំណែកលើកទឹកចិត្ដខ្ពស់ដល់កិច្ចប្រតិបត្ដិការ និងការអនុវត្ដការងារនៅក្នុងបុព្វហេតុមនុស្សធម៌ ពិសេសការជួយសម្រាលទុក្ខលំបាករបស់បងប្អូនប្រជាជន ដែលទទួលរងគ្រោះថ្នាក់ដោយសារគ្រោះមហន្ដរាយ នានា និងកំពុងត្រូវការនូវជំនួយសង្គ្រោះបន្ទាន់ ។ ការប្រារឰពិធីមិទ្ទីញនាពេលនេះ ក៏បានបង្ហាញឱ្យប្រជាជនកម្ពុជា គ្រប់ៗរូបបានយល់ និងជ្រួតជ្រាបកាន់តែច្បាស់ផងដែរ ពីសកម្មភាពមនុស្សធម៌ និងបញ្ហាប្រឈមជាសកលនានា ដែលជាក្ដីកង្វល់រួមរបស់ចលនា កាកបាទក្រហម អឌ្ឍចន្ទក្រហម ដើម្បីរួមគ្នាបន្ដគិតគូរ និងរកដំណោះស្រាយ សម្រាប់ជួយសង្គ្រោះជនរងគ្រោះឱ្យបានទាន់ពេលវេលា និងកាន់តែមានប្រសិទ្ធភាពខ្ពស់ ។ ជារួមកិច្ចការជួយ សង្គ្រោះជនរងគ្រោះ ជាការរួមចំណែកយ៉ាងសំខាន់ជាមួយរាជរដ្ឋាភិបាលក្នុង ការដោះស្រាយបាននូវទុក្ខលំបាកមួយ ចំនួនរបស់ប្រជាជន និងការកាត់បន្ថយនូវអត្រាភាពក្រីក្ររបស់ប្រជាជន ។ ប្រការទាំងអស់នេះ បានគូសបញ្ជាក់ យ៉ាងច្បាស់ថា កាកបាទក្រហមកម្ពុជា បានចូលរួមយ៉ាងសកម្មជាមួយរាជរដ្ឋាភិបាល លើការងារមនុស្សធម៌ និង ការងារអភិវឌ្ឍសង្គម សេដ្ឋកិច្ចជាតិ ។
សម្តេចអគ្គមហាសេនាបតីតេជោ នាយករដ្ឋមន្ត្រី ក៏ បានសម្ដែងនូវការលើកទឹកចិត្ដខ្ពស់ និងបន្ដផ្ដល់នូវ ការគាំទ្រចំពោះថ្នាក់ដឹកនាំ មន្ដ្រីបុគ្គលិក អ្នកស្ម័គ្រចិត្ដ យុវជនកាកបាទក្រហមកម្ពុជា ក្នុងបេសកកម្ម បំពេញការងារ និងសកម្មភាពមនុស្សធម៌របស់ខ្លួនទៅតាមទិសស្លោក “ទីណាមានទុក្ខលំបាក ទីនោះមានកាកបាទក្រហមកម្ពុជា” និង “រួមកម្លាំងគ្នាដើម្បីមនុស្សធម៌ “ដោយឈរលើនយោបាយអព្យាក្រឹត្យ មិនប្រកាន់ជាតិសាសន៍ និន្នាការ នយោបាយ ឬ គណបក្សនយោបាយណាមួយឡើយ ។សម្តេចអគ្គមហាសេនាបតីតេជោ នាយករដ្ឋមន្ត្រី ក៏ មានការជឿជាក់ថា កាកបាទក្រហមកម្ពុជា ដែលជាអង្គការសមាគមជាតិមួយនាំមុខគេ ក្នុងវិស័យមនុស្សធម៌ ក្រោមការដឹកនាំរបស់ សម្តេចកិត្ដិ ព្រឹទ្ធបណ្ឌិតប្រធាន ប្រកបដោយការទទួលខុសត្រូវខ្ពស់ មានសមត្ថភាពក្នុង ការចាត់ចែងគ្រប់គ្រង និងប្រើប្រាស់ធនធានហិរញ្ញវត្ថុប្រកបដោយតម្លាភាពនោះ នឹងបន្ដពង្រឹងតួនាទីរបស់ខ្លួន បន្ថែមទៀត ក្នុងនាមជាជំនួយការដ៏សំខាន់ឱ្យរាជរដ្ឋាភិបាល លើការងារមនុស្សធម៌នេះ ដើម្បីរួមចំណែកជួយ សម្រាលទុក្ខលំបាកទាំងឡាយថ្មីៗទៀត សម្រាប់ជាឧត្ដមប្រយោជន៍ជាតិ និងប្រជាជនរបស់យើង នឹងទទួលបាននូវ ការគាំទ្របន្ថែមទៀតពីស្ថាប័នជាតិ-អ ន្ដរជាតិ ដៃគូអភិវឌ្ឍន៍ សប្បុរសជនជាតិ អន្ដរជាតិ ទាំងក្នុងនិងក្រៅប្រទេស ក៏ដូចជាប្រជាជនកម្ពុជានៅទូទាំងប្រទេស តទៅថ្ងៃមុខទៀតផងដែរ ។
ឆ្លៀតក្នុងឱកាសនោះ សម្តេចអគ្គមហាសេនាបតីតេជោ នាយករដ្ឋមន្ត្រី ក៏បានផ្តល់នូវអនុសាសន៍មួយចំនួនដូចជា ៖
ទី១ ” កាកបាទក្រហមកម្ពុជា និងគណៈកម្មាធិការជាតិគ្រប់គ្រងគ្រោះមហន្ដរាយ ត្រូវរួមសហការគ្នាឱ្យបានល្អ ជាមួយក្រសួង-ស្ថា ប័ន អង្គភាព មន្ទីររដ្ឋបាលពាក់ព័ន្ធថ្នាក់ក្រោមជាតិ និងដៃគូអភិវឌ្ឍន៍នានា ដើម្បីត្រៀមលក្ខណៈ ក្នុងការឆ្លើយតបជាបន្ទាន់ទៅនឹងសេចក្ដីត្រូវការបន្ទាន់របស់ ប្រជាជនយើង នៅពេលដែលគ្រោះមហន្ដរាយធម្មជាតិ និងគ្រោះថ្នាក់ដោយប្រការផ្សេងៗ កើតមានឡើងជាយថាហេតុនោះ ។
ទី២ “ ក្រសួង ធនធានទឹក និងឧតុនិយមត្រូវផ្ដល់សេចក្ដីជូនដំណឹងអំពីការប្រែប្រួលអាកាស ធាតុ ដែលជាហេតុបង្កឱ្យមានខ្យល់ព្យុះ រន្ទះបាញ់ គ្រោះទឹកជំនន់ គ្រោះរាំងស្ងួតដែលនឹងកើតឡើង ដើម្បីឱ្យកាកបាទក្រហមកម្ពុជា និងគណៈកម្មាធិការជាតិគ្រប់គ្រងគ្រោះមហន្ដរាយ ក៏ដូចជាក្រសួង¬ស្ថាប័នពាក់ព័ន្ធដទៃទៀត អាចប៉ាន់ស្មានទុកជាមុន ក្នុងការត្រៀមលក្ខណៈជួយសង្គ្រោះឱ្យបានទាន់ពេលវេលា ។
ទី៣ “ កាកបាទក្រហមកម្ពុជា ត្រូវបន្ដពង្រឹង និងពង្រីកកម្លាំងយុវជន និងអ្នកស្ម័គ្រចិត្ដឱ្យបានច្រើនថែម ទៀត និងត្រូវបង្កើនការបណ្ដុះបណ្ដាលផ្នែកចំណេះដឹង និងជំនាញផ្សេងៗដល់ពួកគេក្នុងការត្រៀមធ្វើជាកម្លាំងឈានមុខ និងធ្វើជាធនធានដ៏រឹងមាំ ប្រកបដោយសមត្ថភាពគ្រប់គ្រាន់ក្នុងការចូលរួមចំណែកបម្រើសកម្មភាព មនុស្សធម៌ជាមួយ កាកបាទក្រហមកម្ពុជា ស្របតាមពាក្យស្លោកលើកថា ៖ យុវជន និងអ្នកស្ម័គ្រចិត្ដ គឺជាឆ្អឹងខ្នងរបស់ចលនាកាកបាទក្រហម អឌ្ឍចន្ទក្រហម នោះ ។ ក្នុងការអនុវត្ដនូវស្មារតីនេះ យើងនឹងអាចឆ្លើយតបទៅនឹងការពង្រឹងសហគមន៍ឱ្យធន់ទៅនឹងគ្រោះម ហន្ដរាយ លើកកម្ពស់សេវាសុខភាពជូនប្រជាជននៅជនបទ និងកសាងវប្បធម៌អហិង្សា និងសន្ដិភាព ។ នេះជាលក្ខណៈពិសេសរបស់យុវជន ដែលបានធ្វើឱ្យយុវជននៅគ្រប់សម័យកាល ក្លាយជាកម្លាំងដ៏ស្រួចស្រាវ ជាធនធានដ៏មានតម្លៃ មិនចេះរីងស្ងួត និងមិនអាចខ្វះបានឡើយ ក្នុងចលនាមនុស្សធម៌របស់កាកបាទក្រហម អឌ្ឍច័ន្ទក្រហមនោះ ។ ចំពោះមុខនេះ ខ្ញុំសូមស្នើដល់ កាកបាទក្រហមកម្ពុ ជា ត្រូវបន្ដពង្រឹង និងយកចិត្ដទុកដាក់ទប់ស្កាត់ការរីករាលដាលមេរោគ អេដស៍ទៅតាមយុទ្ធសាស្ដ្រសូន្យបី គឺ សូន្យ ការមិនចម្លងពីម្ដាយទៅកូន សូន្យ ការស្លាប់ដោយមេរោគអេដស៍ សូន្យ ការមិនរើសអើង ។ ក្នុងនោះ ត្រូវបន្ដកៀរគរវិស័យឯកជន និងសប្បុរសជននានាឱ្យចូលរួមឧបត្ថម្ភគាំទ្រកាន់តែច្រើនឡើងថែម ទៀត ដើម្បីបន្ដពង្រីកលទ្ធភាពនៃការអនុវត្ដការងារមនុស្សធម៌របស់ខ្លួន ។
ទី៤ “ ក្រសួង មហាផ្ទៃ ជាពិសេសអង្គភាពរថយន្ដពន្លត់អគ្គីភ័យត្រូវប្រុងប្រៀប និងត្រៀមលក្ខណៈជានិច្ច ក្នុងការជួយសង្គ្រោះដល់ប្រជាជន នៅពេលមានគ្រោះអគ្គីភ័យកើតឡើង ។ ទន្ទឹមនេះយើងត្រូវរួមគ្នាអនុវត្ដទិសស្លោក -ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍កើតឡើងជាដាច់ខាត ផងដែរ ។
ទី៥ ” យុ វជន និង អ្នកស្ម័គ្រចិត្ដកាកបាទក្រហមកម្ពុជា តាមរយៈចលនាមិត្ដអប់រំមិត្ដដ៏សកម្មផុលផុសនោះ ត្រូវរួម គ្នាជួយទប់ស្កាត់នូវការផលិត ការចែកចាយ ការប្រើប្រាស់គ្រឿងញៀន ការរំលោភ ការជួញដូរស្ដ្រីនិង កុមារ និងអំពើហិង្សានានា ដែលជាបញ្ហាសង្គម និងការធ្វើឱ្យបាត់បង់សេចក្ដីថ្លៃថ្នូររបស់មនុស្សជាតិ ។ ទន្ទឹមនេះ អាជ្ញាធរដែនដីត្រូវបន្ដពង្រឹងការអនុវត្ដភូមិ ឃុំមានសុវត្ថិភាព ធ្វើឱ្យបានសកម្មក្នុងការលុបបំបាត់គ្រឿងញៀន ល្បែងស៊ីសង ក្រុមក្មេងទំនើង ដែលជាទង្វើនាំឱ្យកើតមានអំពើហឹង្សាក្នុងគ្រួសារ ដែលនាំមកនូវភាពក្រីក្រ បាត់បង់សេចក្ដីថ្លៃថ្នូររបស់មនុស្ស និងអំពើអសីលធម៌ ហើយកិច្ចការនេះ គឺជាការរួមចំណែកដល់ការងារមនុស្សធម៌ផងដែរ ។
ជាទីបញ្ចប់ សម្តេចអគ្គមហាសេនាបតីតេជោ ហ៊ុន សែន នាយក រដ្ឋមន្ត្រីនៃព្រះរាជាណាចក្រកម្ពុជា ព្រះអង្គម្ចាស់ក្សត្រីយ៍ ឯកឧត្ដម លោកជំទាវ លោកឧកញ៉ា លោក លោកស្រី នាងកញ្ញា ភ្ញៀវកិត្ដិយសជាតិ អន្ដរជាតិ សប្បុរសជនក្នុង និងក្រៅប្រទេស អ្នកស្ម័គ្រចិត្ដ យុវជនកាកបាទក្រហមកម្ពុជា និងសមាជិក- សមាជិកាទាំងអស់នៃអង្គពិធីទាំងមូល សូមបានប្រកបដោយព្រះពុទ្ធពរទាំង ៤ ប្រការ អាយុ វណ្ណៈសុខៈ ពលៈ កុំបី ឃ្លៀងឃ្លាតឡើយ ។