Webmail
E-Learning
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា

ទីស្នាក់ការកណ្តាល

ពិធីបើកសិក្ខាសាលាស្តីពី “កំណត់​វិសាលភាព​គម្រោង​លើកកម្ពស់​សុខភាព​បរិស្ថាន​សាធារណៈ ដំណាក់កាល​ទី៣”

ថ្ងៃទី ៩ ខែ មិថុនា ឆ្នាំ ២០១៥ លោកជំទាវ ពុំ ចន្ទី​នី អគ្គលេខាធិការ​កាកបាទ​ក្រហម​កម្ពុជា បាន​អញ្ជើញ​ក្នុង​ពិធី​បើកសិក្ខាសាលា​ស្តីពី “កំណត់​វិសាលភាព​គម្រោង​លើកកម្ពស់​សុខភាព​បរិស្ថាន​សាធារណៈ ដំណាក់កាល​ទី៣” នៅ​សាលប្រជុំ​នៃ​មជ្ឈមណ្ឌល​សហប្រតិបត្តិ​ការ​កម្ពុជា-ជប៉ុន (CJCC) ក្នុង​គោលបំណង ដើម្បី​ធានាឱ្យមាន​ការឯកភាព​គ្នា​លើ​វិធីសាស្ត្រ​រួមមួយ​សម្រាប់​ដាក់បញ្ចូល​ក្នុង​គម្រោង​លើកកម្ពស់​សុខភាព​បរិស្ថាន​សាធារណៈ ដំណាក់កាល​ទី៣ រយៈពេល ៤ឆ្នាំ ទៀត។

ក្នុងឱកាស​នេះដែរ លោក Dicken Higgings អ្នកសម្របសម្រួល​កាក​បាទ​ក្រហម​ស្វី​ស ប្រចាំ​ប្រទេស​កម្ពុជា​បាន​ថ្លែងអំណរគុណ​ចំពោះ​កាកបាទក្រហមកម្ពុជា ដែល​តែងតែមាន​កិច្ចសហប្រតិបត្តិការ​ល្អ​ជាមួយ​កាកបាទក្រហម​ស្វី​ស ជាពិសេស ​លោកជំទាវ ពុំ ចន្ទី​នី ដែល​បានផ្តល់​កិត្តិយស​ចូលរួម​ក្នុង​ពិធី​បើក​សិក្ខាសាលា​នៅថ្ងៃនេះ ដែល​ញាំ​ង​ឱ្យ​អង្គសិក្ខាសាលា​ដំណើរការ​កាន់តែ​រលូន។

ជា​កិច្ច​បន្ទាប់ លោកជំទាវ​អគ្គលេខាធិការ បាន​ពាំនាំ​ការ​ផ្តាំផ្ញើ​សួរសុខទុក្ខ​ពី​សំណាក់ សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ដែល​ក្នុងនាម សម្តេច ជា​ឥស្សរជន​ឆ្នើម​ថ្នាក់ជាតិ​នៃ​ផែន​ការរួម​អគ្គលេខាធិការ​អង្គការសហប្រជាជាតិ ដើម្បី​សុខភាព​ស្ត្រី និង​កុមារ និង​ជា​ឥស្សរជន​ឆ្នើម​ថ្នាក់ជាតិ នៃ​វេទិកា​ភាពជា​អ្នកដឹកនាំ​តំបន់​អាស៊ី-ប៉ាស៊ីហ្វិក ចំពោះ​ការឆ្លើយតប​មេរោគ​អេដស៍ ជំងឺអេដស៍​នៅ​កម្ពុជា តែងតែ​យកចិត្តទុកដាក់​ដល់​ជីវិត​រស់នៅ​ប្រចាំថ្ងៃ​របស់​ប្រជាជន ជាពិសេស ការថែទាំ​សុខភាព។

លោកជំទាវ​អគ្គលេខាធិការ បាន​គូសបញ្ជាក់ថា កាកបាទក្រហម​ស្វី​ស ជា​ដៃគូ​មួយ​ដ៏​ល្អ​ក្នុង​ការងារ​ថែទាំ​សុខភាព​តាម​សហគមន៍ អនាម័យ​ទឹកស្អាត ការគ្រប់គ្រង​គ្រោះមហន្តរាយ និង​ការអភិវឌ្ឍ​ស្ថាប័ន ចាប់តាំងពី ឆ្នាំ ២០០៦ មក​ម្លេះ ដែល​អនុវត្ត​ក្នុងស្រុក​បាទី ខេត្តតាកែវ និង៤ស្រុក​ទៀត ក្នុង​ខេត្តកោះកុង ដែល​ត្រូវ​បានបញ្ចប់​ដំណាក់កាល​ទី១ ក្នុង​ថ្ងៃទី ៣០ ខែ មិថុនា ឆ្នាំ ២០១១ ហើយ បាន និង​កំពុង​បន្តសកម្មភាព ក្នុងដំណាក់កាល​ទី ២ លើ​គម្រោង​លើកកម្ពស់​សុខភាព​បរិស្ថាន​សាធារណៈ ក្នុងស្រុក-ខេត្ត​ដដែល ចាប់តាំងពី ខែ កក្កដា ឆ្នាំ ២០១១ នឹង​បញ្ចប់​ក្នុង​ខែ ធ្នូ ឆ្នាំ ២០១៥ នេះ។

លោកជំទាវ​អគ្គលេខាធិការ បានស្នើ​សុំ​ដល់​កាកបាទក្រហម​ស្វី​ស ឱ្យ​បន្ត​ការឧបត្ថម្ភ​ដល់​សាខា​ខេត្ត​ទាំងពីរ ធ្វើយ៉ាងណា​សម្រេចបាន​តា​ម​គោលដៅ​របស់​គម្រោង​ដែល​នឹង​លើកឡើង​ក្នុង​សិក្ខាសាលា​នេះ និង​បាន​សំណូមពរ ដល់​សិក្ខាកាម​ទាំងអស់ ចូលរួម​បង្កើត​គំនិត​ថ្មី ផ្តល់​បទពិសោធន៍ល្អៗដើម្បី​បន្តការងារ​មនុស្សធម៌​រួមគ្នា​ជួយ​ដល់​ប្រជាជន​ឱ្យ​រួច​ផុតពី​ភាព​ងាយ​រងគ្រោះ។

ជាទី​បញ្ចប់ លោកជំទាវ​អគ្គលេខាធិការ បាន​ថ្លែងអំណរគុណ​ដល់ កាកបាទក្រហម​ស្វី​ស ដែល​ជួយឧបត្ថម្ភ​ដល់​កាកបាទក្រហមកម្ពុជា និង​ជូនពរ​សិក្ខាកាម​ទាំងអស់ មាន​សុខ​ភាពល្អ ជោគជ័យ​ក្នុង​ភារកិច្ច​ការងារ។

កាកបាទក្រហមកម្ពុជា ទទួលអំណោយពីក្រុមហ៊ុន សុខ គង់ អាហរ័ណ នីហរ័ណ (សូ​គី​មិច)

កាលពី​រសៀល​ថ្ងៃទី៩ ខែមិថុនា ឆ្នាំ២០១៥ លោកជំទាវ ពុំ ចន្ទី​នី អគ្គលេខាធិការ​កាកបាទ​ក្រហម​កម្ពុជា បាន​ជួប​សំណេះសំណាល និង​ទទួល​មួកសុវត្ថិភាព​ចំនួន ១០០មួក ដែល​សរុប​ជា​ថវិកា​សរុប​ចំនួន ១៥០០ដុល្លារ ពី​ក្រុមហ៊ុន សុខ គង់ អាហរ័ណ នីហរ័ណ (សូ​គី​មិច) នៅ​ទីស្នាក់ការ​កណ្តាល​កាកបាទក្រហមកម្ពុជា។

ក្នុងឱកាស​នោះ លោកជំទាវ​អគ្គលេខាធិការ បាន​សម្តែង​នូវ​ការស្វាគមន៍ និង​អរគុណ​ចំពោះ ក្រុមហ៊ុន សុខ គង់ អាហរ័ណ នីហរ័ណ (សូ​គី​មិច) ដែល​តែងតែ​គាំទ្រ និង​រួមចំណែក​ដល់​សកម្មភាព​មនុស្សធម៌​ជាមួយ​កាកបាទក្រហមកម្ពុជា​ក​ន្ល​ង​មក។ លោកជំទាវ បាន​បញ្ជាក់​ថា មួក​សុវត្ថិភាព​ចំនួន១០០​នេះ គម្រោង​យុវជន​កាកបាទ​ក្រហម​កម្ពុជា និង​សុវត្ថិភាព​ចរាចណ៍​នឹង​យក​ទៅ​ប្រើប្រាស់ ដើម្បី​ផ្សព្វផ្សាយ​ និង​ចំ​គោល​ដៅ​រ​បស់​គម្រោង។  

គួរ​បញ្ជាក់ថា ក្រុមហ៊ុន សុខ គង់ អាហរ័ណ នីហរ័ណ (សូ​គី​មិច) បាន​ចូលរួម​ជួយឧបត្ថម្ភ​គាំទ្រ ជូន​កាកបាទក្រហមកម្ពុជា បាន​ចំនួន ១១លើក​រួចមកហើយ គិត​ចាប់តាំងពី​ឆ្នាំ ២០០៥ មក​ម្លេះ ហើយ​នេះ​គឺជា​លើក​ទី ១២។          

តំណាង​ក្រុមហ៊ុន លោក កាង ម៉េង​ហ៊ាង ជំនួយការ​អគ្គនាយករង​ក្រុមហ៊ុន​សូ​គី​មិច បាន​ថ្លែងអំណរគុណ ដល់​កាកបាទក្រហមកម្ពុជា ដែល​អនុញ្ញាតឱ្យ​ក្រុមហ៊ុន​វិស័យ​ឯកជន​បាន​ចូលរួមចំណែក​ក្នុង​ការងារ​មនុស្សធម៌ និង​កាត់បន្ថយ​ចំនួន​អ្នកស្លាប់​ដោយ​គ្រោះថ្នាក់​ចរាចរណ៍​នៅលើ​ផ្លូវថ្នល់​ក្នុង​ព្រះរាជាណាចក្រ​កម្ពុជា និង​បាន​សន្យា​ជួយឧបត្ថម្ភ​ដល់​សាខា​កាកបាទក្រហមកម្ពុជា​រាជធានី​ភ្នំពេញ នូវ​ថវិកា ២លាន​រៀល ជា​រៀងរាល់ខែ។          

ជាទី​បញ្ចប់ លោកជំទាវ​អគ្គលេខាធិការ បាន​ជូនពរ​ដល់​ប្រតិភូ​ជា​ម្ចាស់​អំណោយ ឱ្យ​ជួបប្រទះ​នូវ​សំណាងល្អ និង​ជោគជ័យ​ក្នុង​ភារកិច្ច។

កាកបាទក្រហមកម្ពុជា ផ្តល់ថវិកាមនុស្សធម៌ជូន សមាគមតន្ត្រីសំនៀងជនពិការ ចំនួន ៥ម៉ឺន ដុល្លារសហរដ្ឋអាមេរិក

កាលពី​ព្រឹក​ថ្ងៃទី៨ ខែមិថុនា ឆ្នាំ២០១៥ លោកជំទាវ ពុំ ចន្ទី​នី អគ្គលេខាធិការ​កាកបាទ​ក្រហម​កម្ពុជា បានទទួល​ជួប​សំណេះសំណាល និង​ប្រគល់​ថវិកា​មនុស្សធម៌​ចំនួន ៥ម៉ឺន ដុល្លារ​សហរដ្ឋអាមេរិក ដែលជា​អំណោយ​ដ៏​ថ្លៃថ្លា​របស់ សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ជូន​ដល់​សមាគម​តន្ត្រី​សំនៀង​ជនពិការ ដើម្បី​ផ្តល់​លទ្ធភាព​ឲ្យ​ពួកគេ​បញ្ចប់​ការសង​សង់​មណ្ឌល​ស្នាក់នៅ និង​ធ្វើការ​បណ្តុះបណ្តាល​ជំនាញផ្សេងៗ សម្រាប់​ជនពិការ​កម្ពុជា។

ក្នុងឱកាស​នោះដែរ លោកជំទាវ ពុំ ចន្ទី​នី អគ្គលេខាធិការ បាន​ពាំនាំ​មតិ​ផ្តាំផ្ញើ​សួរសុខទុក្ខ​ពី​សំណាក់ សម្តេច​កិត្តិ​ព្រឹទ្ធ​បណ្ឌិត​ប្រធាន និង​លើកទឹកចិត្ត ដល់​ការតស៊ូ​របស់​ក្រុម​ជនពិការ ដើម្បី​រស់នៅក្នុង​សង្គម​ដោយ​ថ្លៃថ្នូរ និង​ស្មើមុខស្មើមាត់។

ក្រុម​ជនពិការ​ទាំង ២៧រូប នៃ​សមាគម​តន្ត្រី​សំនៀង​ជនពិការ បាន​សម្តែង​ក្តីរំភើប​ឥតឧបមា បន្ទាប់ពី​ទទួលបាន​ការផ្តល់​ពន្លឺ​ជីវិត​ថ្មី ពី​សំណាក់ សម្តេច​កិត្តិ​ព្រឹទ្ធ​បណ្ឌិត​ប្រធាន ដើម្បី​ពួកគេ​តស៊ូ​ប្រយុទ្ធ​នឹង​ឧបសគ្គ​នៅក្នុង​ជីវិត។

លោក ចាប់ តូ បុរស​ពិការភ្នែក​ទាំងសងខាង​ដែល​អញ្ជើញ​មកពី​ក្រុង​បាវិត ខេត្តស្វាយរៀង បាន​ថ្លែង​ទាំង​សំឡេង​អួលដើមក​ថា ពួក​ខ្ញុំ​ទាំងអស់គ្នា​ជា​ជនពិការ រំភើប​គ្មានអ្វី​ប្រៀបផ្ទឹម​បានទេ នៅពេល​ឮដំណឹង​ថា សម្តេច​កិត្តិ​ព្រឹទ្ធ​បណ្ឌិត​ប្រធាន លោក​មេត្តា​សណ្តោស​ប្រណី​ផ្តល់​ថវិកា ៥ម៉ឺន​ដុល្លារ ឱ្យ​ពួក​ខ្ញុំ​សាងសង់​មណ្ឌល​សម្រាប់​ស្នាក់នៅ ដែល​ជំនួយ​ឧបត្ថម្ភ​នេះ ជាការ​ផ្តល់​ពន្លឺជីវិត ដ៏​ធំធេង​សម្រាប់​ពួក​ខ្ញុំ​ជា​ជនពិការលោក​បានបង្ហាញ​ពី​ក្តី​រំពឹងថា មណ្ឌល សមាគម​តន្ត្រី​សំនៀង​ជនពិការដែល​នឹង​បង្ហាញ​រូបរាង​ឡើង​ក្រោម​ការ ឧបត្ថម្ភ​របស់​កាកបាទ​ក្រហម​កម្ពុជា នឹង​ក្លាយជា​មណ្ឌល​ផ្តល់​ពន្លឺជីវិត​ថ្មី​សម្រាប់​ជនពិការ តាមរយៈ​ការបណ្តុះបណ្តាល​ជំនាញផ្សេងៗ ដូចជា តន្ត្រី បង្រៀន​ម៉ាស្សា អក្សរ​ប្រ៊ែ​ល និង​ល្ខោន​អប់រំ។

គូសបញ្ជាក់​ផងដែរ​ថា ក្រុម​ជនពិការ ដែល​ចងក្រង​គ្នា​ជា សមាគម​តន្ត្រី​សំនៀង​ជនពិការតាំងពី​ឆ្នាំ២០១២ ដើម្បី​ស្វែងរក​ប្រាក់​ចិញ្ចឹមជីវិត​តាមរយៈ ការ​បង្ហើរ​សំនៀង ស្វែងរក​មូលនិធិ​សប្បុរសធម៌​គ្រប់​ទីកន្លែង និង​ច្រកល្ហក ដែល​ធ្លាប់​ទទួលបាន​ទទួល​អំណោយ​ឧបត្ថម្ភ​ជា​ស្បៀង សម្ភារៈ និង​ថវិកា​ពី កាកបាទក្រហមកម្ពុជា ចំនួន ២ លើក​រួចមក ដែល​លើក​ទី ១ កាលពី​ថ្ងៃទី ៣ ខែ មីនា ឆ្នាំ ២០១៤ លើក​ទី ២ ថ្ងៃទី ៣ ខែ ធ្នូ ឆ្នាំ ២០១៤ និង​ថ្ងៃនេះ​ជា​លើក​ទី ៣។

លោកជំទាវ ញ៉ែម មរកត អនុរដ្ឋលេខាធិការ​ក្រសួង​កិច្ចការនារី និង​ជា​សមាជិក​ក្រុមប្រឹក្សា​សកម្មភាព​ជនពិការ ដែលជា​ម្តាយធម៌​របស់​ជនពិកា​រទាំង ២៧នាក់ និង​ជា​អ្នក​ធ្លាប់ជួយ​សម្របសម្រួល​អ​ន្ត​រាគ​មន៍ ដោយ​យកចិត្តទុកដាក់​បំផុត​រាល់ពេល​ពួកគេ​ជួប​ទុក្ខលំបាក បាន​សម្តែង​ក្តីរំភើប​រីករាយ នៅពេល​ទទួល​បានការ​ជួយឧបត្ថម្ភ​ពី​សំណាក់ សម្តេច​កិត្តិ​ព្រឹទ្ធ​បណ្ឌិត​ប្រធាន ដែល​នេះ​ជា​កាយវិការ​ដ៏​ឧ​ត្តុ​ង​ឧ​ត្ត​មរ​បស់ សម្តេច ដោយបាន​យកចិត្តទុកដាក់​គ្រប់ពេលវេលា ចំពោះ​សុខទុក្ខ​របស់​ជនពិកា​រ​នៅ​កម្ពុជា។

ចុងបញ្ចប់ លោកជំទាវ ពុំ ចន្ទី​នី បាន​អំពាវនាវ និង​លើកទឹកចិត្ត​ដល់​សប្បុរសជន​នានា មេត្តាជួយ​ឧបត្ថម្ភ​គាំទ្រ​បន្ថែមទៀត​ដល់​ជនពិការ​កម្ពុជា​យើង។

កាកបាទ​ក្រហមកម្ពុជា ទទួល​អំណោយ​មនុស្សធម៌​ពី​សប្បុរសជន

កាលពី​ព្រឹក​ថ្ងៃទី ១៩ ខែឧសភា ឆ្នាំ២០១៥ សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទ​ក្រហ​កម្ពុជា បានទទួល​ជំនួប​សវនាកា និង​ទទួល​ថវិកា​មនុស្សធម៌ ចំនួន ១ម៉ឺន ដុល្លារ សហរ​ជ្ឋ​អាមេរិក និងអង្ករ៥តោន ពី លោកជំទាវ​ឧកញ៉ា​មហា​ឧបាសិកា​ធម្ម​បណ្ឌិត ញ៉ឹក ប៊ុន​ថា នៅ​ទី​ស្នាក់​កណ្តាល​កាកបាទក្រហមកម្ពុជា។

 

ជា​កិច្ច​ចាប់ផ្តើម សម្តេច​កិត្តិ​ព្រឹទ្ធ​បណ្ឌិត​ប្រធាន បាន​សម្តែង​ការស្វាគមន៍​សារជាថ្មី និង​ថ្លែងអំណរគុណ ចំពោះ ឧបាសិកា ដែល​តែងតែ​គាំទ្រ និង​ចូលរួមចំណែក​ដល់​សកម្ម​ភាព មនុស្សធម៌​កាកបាទក្រហមកម្ពុជា នាពេល​កន្លងមកនេះ។ សម្តេច​កិត្តិ​ព្រឹទ្ធ​បណ្ឌិត​ប្រធាន ក៏បាន​ជម្រាបជូន​ផងដែរ​ថា ថវិកា​ដែល​ទទួលបាន​នេះ កាកបាទក្រហមកម្ពុជា នឹងធ្វើ​ការបែងចែក​ក្នុងការ​ជួយ​ដល់​ជន​ដែល​ងាយ​រងគ្រោះ​នៅ​ទូទាំងប្រទេស ជាពិសេស​អ្នក​ដែល​បាន​រង​ផលប៉ះពាល់​ដោយសារ​គ្រោះមហន្តរាយ​នានា។

 

ជា​កិច្ច​ឆ្លើយតប លោកជំទាវ​ឧកញ៉ា​មហា​ឧបាសិកា​ធម្ម​បណ្ឌិត បាន​សម្តែង​នូវ​ការ​អរគុណ ចំពោះ សម្តេច​កិត្តិ​ព្រឹទ្ធ​បណ្ឌិត​ប្រធាន ដែល​បានអនុញ្ញាត​ទទួល​ជួប​សវ​កា​នាពេលនេះ ហើយក៏​សន្យាថា​នឹង​នៅតែ​បន្ត​ជួយ​ដល់​សកម្មភាព​កាកបាទក្រហម​កម្ពុជ​នាពេល​អ​នាគ​ទៅទៀត។

 

ជាទី​បញ្ចប់ សម្តេច​កិត្តិ​ព្រឹទ្ធ​បណ្ឌិត បាន​ជូនពរ​ដល់​លោកជំទាវ​ឧកញ៉ា​មហា​ឧបាសិកា​ធម្ម​បណ្ឌិត ឲ្យមាន​សុភាព​ល្អ និង​ជោគជ័យ​ក្នុង​ជីវិត។

អត្ថបទ​ដោយ ឯ.. តាំង សាមឿន

 

កាកបាទក្រហមកម្ពុជា ផ្តល់​ថវិកា​មនុស្សធម៌​ជូន​មន្ទី​ពេទ្យ​គន្ធ​បុ​ប្ឆា​ចំនួន ១ លាន ដុល្លារ​សហរ​ជ្ឋ​អាមេរិក

កាលពី​ព្រឹក​ថ្ងៃទី ១៩ ខែឧសភា ឆ្នាំ២០១៥ សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទ​ក្រហ​កម្ពុជា បានទទួល​ជំនួប​សវនាកា និង​ប្រគល់​ថវិកា​មនុស្សធម៌ ចំនួន  លាន ដុល្លារ ដល់ មូលនិធិ​មន្ទី​ពេទ្យ​គន្ធ​បុ​ប្ឆា នៅ​ទី​ស្នាក់​កណ្តាល​កាកបាទក្រហមកម្ពុជា។

 

ជា​កិច្ច​ចាប់ផ្តើម ម្តេច​កិត្តិ​ព្រឹទ្ធ​បណ្ឌិត​ប្រធាន បាន​សម្តែង​នូវ​ការស្វាគមន៍ និង​កោតសរសើរ​ដល់​គណៈប្រតិភូ​ដែល​បាន​ខិតខំ​បម្រើកា​រងារ​នៅក្នុង​វិស័យ​សេវាកម្ម​សាធារណៈ ជាពិសេស​ការជួយ​លើកកម្ពស់​ដល់​សុខភាព​មាតា កុមារ និង​ទារក នៅក្នុង​ព្រះរាជាណាចក្រ​កម្ពុជា។ ក្នុងនោះ សម្តេច​កិត្តិ​ព្រឹទ្ធ​បណ្ឌិត​ប្រធាន បាន​គូសបញ្ជាក់ថា ជា​រៀងរាល់ថ្ងៃ បុគ្គលិក និង​វិ​ជ្ជ​បណ្ឌិត​នៅ​មន្ទី​ពេទ្យ​គន្ធ​បុ​ប្ឆា​នៅ​គ្រប់​សាខា បាន​នឹង​កំពុង​បំពេញភារកិច្ច របស់ខ្លួន​បាន​យ៉ាង​ល្អប្រសើរ និង​ប្រកបដោយ​ការទទួលខុសត្រូវ​ខ្ពស់​ផងដែរ។ បន្ថែម​ពីនេះ គឺ​មន្ទី​ពេទ្យ​បានទទួល​នូវ​កេ​រ្តិ៍ឈ្មោះ និង​ការទទួលស្គាល់​ពី​មជ្ឈដ្ឋាន​សាធារណៈ ថា​ជា មន្ទី​ពេទ្យ​ដែលមាន​វិជ្ជាជីវៈ​ខ្ពស់ និង​មាន​ទំនុក​ចិត្តបាន​យ៉ាង​ល្អ​ពី​មហាជន។

 

ជា​កិច្ច​ឆ្លើយតប ឯកឧត្តម ម៉ម ប៊ុន ហេង រ​ជ្ឋ​មន្ត្រី​ក្រសួងសុខាភិបាល បាន​សម្តែង​នូវ​ការ​អរគុណ ចំពោះ​ទឹកចិត្ត​មនុស្សធម៌ ក្នុងការ​ចូលរួមចំណែក​ដល់​កា​ជួយ​ជីវិត​កុមារ​បាន​រាប់ពាន់នាក់ នៅ​ទូទាំងប្រទេស។ ឯកឧត្តម ក៏បាន​ថ្លែងអំណរគុណ​ដល់​រាជរ​ជ្ឋា​ភិ​បាល ដែល​តែងតែ​ជួយ​គាំទ្រ​ដល់​វិស័យ​សុខាភិបាល ដែល​នេះ​ជាការ​ជួយ​ចូលរួមចំណែក​សម្រេច​ឲ្យបាន​នូវ​ផែនការ​អភិវឌ្ឍ​សហសវត្ស​របស់​អង្គការសហប្រជាជាតិ​ផងដែរ។

 

បន្ទាប់មក លោក Beat Richnner បាន​ជម្រាបជូន​នូវ​ការថ្លែងអំណរគុណ​ដល់​ទឹកចិត្ត​មនុស្សធម៌​ពី​សំណាក់​កាកបាទក្រហមកម្ពុជា ដែល​តែងតែ​ចាត់ទុក​បញ្ហា​សុខភាព​មាតា និង​ទារក​ជា​អទិភាព​ចម្បង។ លោក Richnnerក៏បានជម្រាប់ជូន​នូវ​ស្ថានភាព​បច្ចុប្បន្ន​ដែល​មន្ទី​ពេទ្យ បាន​អនុវត្ត​នូវ​ការងារ​របស់ខ្លួន និង​សំណូមពរ​ដល់ សម្តេច​កិត្តិ​ព្រឹទ្ធ​បណ្ឌិត​ប្រធាន មេត្តា​ជូន​អំពាវនាវ​ដល់​មន្ទី​ពេទ្យ​ឯកជន សូម​គិតពី​សុខភាព​មាតា និង​ទារក​ជា​ចម្បង​ផងដែរ។

 

សម្តេច​កិត្តិ​ព្រឹទ្ធ​បណ្ឌិត​ប្រធាន បាន​ជម្រាបជូន​គណៈប្រតិភូ​ថា ជានិច្ចកាល​កាកបាទក្រហមកម្ពុជា បានធ្វើ​ការចុះ​ដល់​សហគមន៍ និង​ក្នុង​ពិធី​ចែក​អំណោយ​មនុស្សធម៌ គឺ​បានធ្វើការផ្សព្វផ្សាយ​ពី​បញ្ហា​សុខភាព​មាតា កុមារ និង​ទារក​ដល់​បងប្អូន​ប្រជាជន ឲ្យ​យល់​កាន់តែ​ជ្រួល​ជ្រាប​បន្ថែមទៀត។ ជាពិសេស គឺ​បាន​អំពាវនាវ​ដល់​ស្ត្រី​ដែលមាន​ផ្ទៃពោះ និង​ស្ត្រី ដែលជា​មាតា ឲ្យ​ឧស្សាហ៍​ទៅពិនិត្យ​សុខភាព​ឲ្យ​បាន​ទៀងទាត់ តាម​ការកំណត់​របស់​ពេទ្យ។ ម្តេច​កិត្តិ​ព្រឹទ្ធ​បណ្ឌិត​ប្រធាន បាន​លើ​ឡើង​ថា ក្រោម​កិច្ចខិតខំ​ប្រឹងប្រែង​រប​ស់ ក្រសួងសុខាភិបាល និង​មន្ទី​ពេទ្យ​គន្ធ​បុ​ប្ឆា គឺ​បាន​ជួយ​សម្រាល​បន្ទុក​ជាច្រើន​ដល់ រាជរ​ជ្ឋា​ភិ​បាល​កម្ពុជា។

 

ជាទី​បញ្ចប់ សម្តេច​កិត្តិ​ព្រឹទ្ធ​បណ្ឌិត​ប្រធាន ក៏បាន​លើកឡើងថា ថវិកា​មនុស្សធម៌​នេះ គឺ​បានមកពី​ការចូលរួម​បរិច្ចាគ​ពី​សំណាក់​សប្បុរស​ជនជាតិ និង​អន្តរជាតិ ដើម្បី​ជួយ​ចូលរួម​បន្ត គាំទ្រ​ដល់​សកម្មភាព​មនុស្សធម៌​របស់​កាកបាទក្រហម​កម្ពុជា។ សម្តេច​កិត្តិ​ព្រឹទ្ធ​បណ្ឌិតប្រធាន​ បាន​ជូនពរ​ដល់​គណៈប្រតិភូ ឲ្យ​មាន​សុខា​ភព​ល្អ និង​ជោគជ័យ​បន្ថែមទៀតនាពេល​អនាគត។

អត្ថបទ​ដោយ ឯ.. តាំង សាមឿន

 

Fist Prev 105 106 107 108 109 Next Last