Webmail
E-Learning
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា

ទីស្នាក់ការកណ្តាល

កាកបាទក្រហមកម្ពុជា ទទួលជំនួបសម្តែងការស្វាគមន៍ និងទទួលអំណោយមនុស្សធម៌

កាលពី​ព្រឹក​ថ្ងៃទី ៤ ខែឧសភា ឆ្នាំ២០១៥ នៅ​ទីស្នាក់ការ​កណ្តាល​កាកបាទក្រហមកម្ពុជា ដឹកនាំ​ដោយ លោកជំទាវ អា​ន្នី សុខ​អាន អនុប្រធាន តំណាង​ដ៏​ខ្ពស់​ខ្ពស់ សម្តេច​កិត្តិ​ព្រឹទ្ធ បណ្ឌិត ប៊ុន រ៉ានី ហ៊ុនសែន បានទទួល​ជំនួប​សម្តែង​ការគួរសម និង​ទទួល​អំណោយ​មនុស្សធម៌​ពី​គណៈប្រតិភូ​រួមមាន៖

1.    ក្រុមហ៊ុន អេ​ហ្សិត អ៊ី​ន​វេ​ស្មិ​ន និង​ក្រុមហ៊ុន អាយ អិន ជី ហូល​ឌី​

2.    ប្រធាន​សមាគម​ព្រះ​គុណ​អស្ចារ្យ

 

ជា​កិច្ច​ចាប់ផ្តើម លោកជំទាវ​អនុប្រធាន បាន​សម្តែង​នូវ​ការស្វាគមន៍ និង​អំណរគុណ ចំពោះ​គណៈប្រតិភូ​ដែលមាន​ទឹកចិត្ត​ប្រកប​ដ៏​ថ្លៃថ្លារ ក្នុងការ​ចូលរួម​សកម្មភាព​មនុស្សធម៌​ជាមួយ កាកបាទក្រហមកម្ពុជា។ លោកជំទាវ​អនុប្រធាន បាន​គូសបញ្ជាក់ថា កាកបាទក្រហមកម្ពុជា ដែលមាន​ការដឹកនាំ​ប្រកបដោយ​កិត្តិ​ព្រឹទ្ធ​បណ្ឌិត ពី​សំណាក់ សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ដែលជា​ប្រធាន គឺមាន​ការរីកចំរើន និង​ទទួលបាន​នូវ​សមិទ្ធផល​គួរ​ជាទី​មោទនៈ ព្រមទាំង​បានទទួល​នូវ​ទំនុកចិត្ត​ពី​សំណាក់​សប្បុរស​ជនជាតិ និង​អន្តរជាតិ។ បន្ថែម​ពីនេះ​ទៀត កាកបាទក្រហមកម្ពុជា បាន​ក្លាយជា​ជំនួយការ​ដល់​រាជរ​ជ្ឋា​ភិ​បាល ក្នុង​វិស័យ​មនុស្សធម៌ ប្រកបដោយ​ប្រសិទ្ធភាព​ផងដែរ។ ព្រម​ជាមួយគ្នានេះ​ផងដែរ កាកបាទក្រហមកម្ពុជា បាន​ក្លាយជា​សមាជិក​ដ៏​គំរូ នៅក្នុង​ចលនា​សមាគមជាតិ​កាកបាទក្រហម អឌ្ឍចន្ទ​ក្រហម ហើយ​ត្រូវបាន​សមាគមជាតិ​មួយចំនួន បាន​មកសុំ​សិក្សា​ពី​កាកបាទក្រហមកម្ពុជា​ផងដែរ។

 

តាមរយៈ​កិច្ចខិតខំ​ប្រឹងប្រែង​រប​ស់​កាកបាទក្រហមកម្ពុជា លោកជំទាវ​អនុប្រធាន បាន​សម្តែង​នូវ​មោទនភាព​ដែល សម្តេច​កិត្តិ​ព្រឹទ្ធ​បណ្ឌិត បានទទួល​នូវ​គោរមងារ នាម​ជា ឥស្សរជន​ឆ្នើម​ថ្នាក់ជាតិ​នៃ​វេទិកា​ភាពជា​អ្នកដឹកនាំ​តំបន់​អាស៊ី​ប៉ាស៊ីហ្វិក ចំពោះ​ការឆ្លើយតប មេរោគ​អេដស៍/ជំងឺអេដស៍ នៅ​កម្ពុជា និង​ជា ឥស្ស​ជន​ឆ្នើម​ថ្នាក់ជាតិ​នៃ​ផែនការ​សកម្មភាព​រួម​អគ្គលេខាធិការ អង្គការសហប្រជាជាតិ ដើម្បី​សុខភាព​ស្ត្រី និង​កុមារ។ បន្ថែម​ពីនេះ​ទៀត យុវជន​កាកបាទក្រហម​កម្ពុជា ក៏បាន​ចូលរួម យ៉ាងសកម្ម​ផងដែរ ជាពិសេស​ការជួយ​អប់រំ​ស្តីពី​ច្បាប់​ចរាចរណ៍​ផ្លូវគោក នៅតាម​បណ្តា​ផ្លូវ​នានា​នៅ​គ្រប់​រាជធានី-ខេត្ត​ទាំង ២។

 

លោកជំទាវ​អនុប្រធាន ក៏បាន​ជម្រាបជូន​គណៈប្រតិភូ​ថា កាកបាទក្រហមកម្ពុជា គឺជា​អង្គការ មនុស្សធម៌ ដោយ​អនុវត្ត​ការងារ​របស់ខ្លួន​ទៅតាម​ថវិកា​ដែល​ទទួល​បានមក​ពីស​ប្បុរ​សជន ជាតិ និង​អន្តរជាតិ ហើយ​ជា​រៀងរាល់ឆ្នាំ កាកបាទក្រហមកម្ពុជា​បាន​ឆ្លៀត​យក​ឱកាស​ទិវា ៨ ឧសភា ជា​ទិវា​នៃ​ការស្វែងរក​មូលនិធិ​ពី​សប្បុរសជន​មកពី​គ្រប់​មជ្ឈដ្ឋាន ចំណែក​ថ្នាក់​សាខា​ក៏បាន​រៀបចំ​ប្រារព្ធ​ពិធី​ដូចគ្នា​ផងដែរ ទៅតាម​សមត្ថភាព​របស់ខ្លួន។

 

ជា​កិច្ច​ឆ្លើយតប គណៈប្រតិភូ​ទាំងអស់ បាន​សម្តែង​នូវ​ការ​អរគុណ​ចំពោះ លោកជំទាវ​អនុប្រធាន ដែល​បាន​ស្វាគមន៍​យ៉ាង​កក់ក្តៅ និង​បាន​ផ្តល់នូវ​ឱកាស​ឲ្យ​ពួកគេ​បាន ចូលរួម​នៅក្នុង​ការងារ​មនុស្សធម៌​ជាមួយ​កាកបាទក្រហមកម្ពុជា។ គណៈប្រតិភូ​បានលើកឡើង​ថា ជានិច្ច​ជា​កាល សកម្មភាព​កាកបាទក្រហមកម្ពុជា ដែល​ដឹកនាំ​ដោយ សម្តេច​កិត្តិ​ព្រឹទ្ធ​បណ្ឌិត បាននិងកំពុង​ជួយ​ដល់​ជនរងគ្រោះ និង​ងាយ​រងគ្រោះ នៅ​គ្រប់ទិសទី​ក្នុងប្រទេស​កម្ពុជា ដែល​សកម្មភាព​ទាំងនេះ បាន​លើកទឹកចិត្ត​ដល់​ដល់​ពួកគេ​ក្នុងការ​ចូលរួមចំណែក​ជាមួយ​កាកបាទក្រហមកម្ពុជា។ គណៈប្រតិភូ បាន​សម្តែង​នូវ​ការកោតសរសើរ​ដល់ សម្តេច​កិត្តិ​ព្រឹទ្ធ​បណ្ឌិត ដែល​បាន​ខិតខំ​ជួយ​សម្រួល​ដល់​ជីវភាព​រស់នៅ​របស់​ប្រជាជន​នៅ​ទូទាំងប្រទេស និង​សន្យាថា​នឹង​បន្ត​ចូលរួមចំណែក​ជាមួយ​កាកបាទក្រហមកម្ពុជា នៅពេល អនាគត​បន្តទៀត។

 

លោកជំទាវ​អនុប្រធាន ក៏​ថ្លែងអំណរគុណ​ដល់​គណៈប្រតិភូ និង​បាន​ជូនពរ​សូម​ឲ្យ​មាន សុខភាព​ល្អ និង​សុភមង្គល ព្រមទាំង​ជោគជ័យ​ក្នុង​ការងារ​បន្ថែមទៀត។


 

កម្មវិធីផ្តល់រង្វាន់គំនូរកុមារប្រចាំឆ្នាំ២០១៥ ទីស្នាក់ការកណ្តាល កាកបាទក្រហមកម្ពុជា

ព្រឹក​ថ្ងៃទី ៣០ ខែមេសា ឆ្នាំ២០១៥ នៅ​ទីស្នាក់ការ​កណ្តាល​កាកបាទក្រហមកម្ពុជា បាន​ប្រារព្ធ​ពិធី​​ផ្តល់រ​ង្វាន់​គំនូរជ័យលាភីលេខ១ថ្នាកជាតិប្រចាំឆ្នាំជូន​ដល់​កុមារកុមារ កុមារី ដែលទទួលចំណាត់ថ្នាក់​លេខ១ ចំនួន ៣រូប មកពី សាខាកាកបាទក្រហមកម្ពុជា ខេត្តសៀមរាប ខេត្តព្រៃវែង និង​រាជធានី​ភ្នំពេញ។ គំនូរទាំងអស់ផ្តោតលើសកម្មភាព​ចម្រុះ​វិស័យ កាកបាទក្រហម ក្រោម​ប្រធានបទ “កម្លាំង​មនុស្សធម៌ : គោលការណ៍​គ្រឹះ​ក្នុង​សកម្មភាព” ក្រោម​អធិបតីភាព លោកជំទាវ ម៉ែន នារី​សោ​ភ័គ អគ្គលេខាធិការរង​ទី១ និង​គណៈកម្មាធិការ​សាខា​កាកបាទក្រហមកម្ពុជា រាជធានីភ្នំពេញ លោកជំទាវ ឯកឧត្ដម លោក លោកស្រី លោកគ្រូ អ្នកគ្រូ និងក្មួយៗ សិស្សានុសិស្ស​មកពី​រាជធានី សរុប​ចំនួន ១១០នាក់។

ជា​កិច្ច​ចាប់ផ្តើម លោកជំទាវ​អគ្គលេខាធិការរង​ទី១ បាន​កោតសរសើរ​ដល់ក្មួយៗទាំងអស់​ដែលមាន​ទេពកោសល្យ និង​ប៉ិន​ប្រសព្វ​ក្នុងការ​គូ​គំនូរ​ស្តីពី​សកម្មភាព​ចម្រុះ​វិស័យ កាកបាទ​ក្រហម​កម្ពុជា នេះ​សរ​បញ្ជាក់​ឲ្យ​ឃើញថា ក្មួយៗពិតជា​យល់ច្បាស់​ពី​សកម្មភាព​មនុស្សធម៌​របស់ កាកបាទ​ក្រហម​កម្ពុជា ទើបក្មួយៗអាច​គូស​គំនូរ​នូវ​សកម្មភាព​ដ៏​រស់​រវើក​នេះ​បាន។

លោកជំទាវ​បាន​បន្តទៀតថា ការប្រលង​គំនូរ​នេះ​គឺមាន​ការចូល​រួមទាំង២៣ សាខា(រឺ​ឯ​សាខា ២គឺ ខេត្តតាកែវ និង​កោះកុង ពុំបាន​ចូលរួម​រៀបចំ​ការ ប្រ​ទ្ប​ង​គូរគំនូរ​ទេ) សិស្សានុសិស្ស​តាម​សាលា​គោលដៅ​ចំនួន១០៨ និង​មាន​សិស្សានុសិស្ស​ចូលរួម​គូរគំនូរ​សរុប​ចំនួន ១.៨៣៨នាក់។ គណៈកម្មការ​ដាក់ពិន្ទុ​តាម​សាខា​ចំនួន ២២ បាន​បញ្ជូន​គំនូរ​ជាប់​ចំណាត់​ពី​ថ្នាក់​លេខ ១ ដល់​លេខ៣ សរុប​ចំនួន ៣ ផ្ទាំង​ក្នុង​មួយ​សាខា មក​ចូលរួម​ប្រកួត​នៅ​ថ្នាក់កណ្តាល។ ដោយ​ទ្បែ​ក​សាខា​រាជធានី​ភ្នំពេញ មាន​ចំនួន ១២ខណ្ឌ​បាន​ចូលរួម​ការ​ប្រ​ទ្ប​ង​គំនូរ​កុមារ ក្នុង​មួយ​ខណ្ឌ បាន​បញ្ជូន​គំនូរ​ចំនួន៣ផ្ទាំង មក​ទីស្នាក់ការ​កណ្តាល ចូលរួម​ប្រកួត នៅ​ថ្នាក់កណ្តាល​ដែរ។សរុប​គំនូរ​កុមារ ដែល​ទីស្នាក់ការ​កណ្តាល បានទទួល​មាន​ចំនួន ១០២ ផ្ទាំង។ ដូច្នេះ​ថ្នាក់កណ្តាល​បានជ្រើសរើស​គំនូរ៣ផ្ទាំង​ដែលជា​ប់​ជ័យលាភី​លេខ១គឺ៖

- កុមារា ចូក សុវណ្ណ​រិ​ទ្ធិ         ថ្នាក់​ទី៦ខ មកពី​សាលាបឋមសិក្សា ត្រពាំង​សាលា រាជធានី​ភ្នំពេញ

- កុមារី វី ណា​រី ដា​វីត ថ្នាក់​ទី៦ខ មកពី​សាលាបឋមសិក្សា បាគង សាខា​សៀមរាប

- កុមារា អាត សុធា​រ៉ា  ថ្នាក់​ទី៦ឃ មកពី​សាលាបឋមសិក្សា​ព្រៃវែង​ក្រុង សាខា​ព្រៃវែង

រង្វាន់​ជ័យលាភីលេខ១​ថ្នាក់ជាតិ​រួមមាន ៖ សំពៀត​ប្លា​ស្ទិ​ក០១ សៀវភៅ​គូររូប០១ក្បាល សៀវភៅ​សរសេរ ០៦ក្បាល ប៊ិច០៣ដើម ខ្មៅ​ដៃ០១ប្រអប់ ខ្មៅ​ដៃ​ពណ៌០១ប្រអប់ ដែកខួង០១ ជ័រលុប០១ ដែក​ឈាន០១ បន្ទាត់១សម្រាប់ កាបូប​ដាក់​ប៊ិច០១ និង​ថវិកា ចំនួន ៣០០,០០០។

ជាទីបញ្ចប់លោកជំទាវ​អគ្គលេខាធិការរង​ទី១ ថ្លែងអំណរគុណ​ចំពោះ ឯកឧត្ដម លោកជំទាវ លោក លោកស្រី លោកគ្រូ អ្នកគ្រូ សិស្សានុសិស្ស​ចូលរួម​គូរគំនូរ ដែល​បាន​ចូលរួម​សហការ​យ៉ាង​ជិតស្និទ្ធ ក្នុង​ការរៀបចំ​កម្មវិធី​គូរគំនូរ​មនុស្សធម៌ កាកបាទក្រហមកម្ពុជា រហូត​ទទួលបាន​ជោគជ័យ និង​សូម​ជូ​ប​តែ​ពុទ្ធពរ​ទាំង​បួន​ប្រការ​គឺ អាយុ វណ្ណៈ សុ​ខៈ ពលៈ កុំបី​ឃ្លៀងឃ្លាត​ឡើយ។

ពិធី​ប្រគល់​ប្រាក់កម្ចី​ខ្នាតតូច​ឥត​ការប្រាក់ របស់​កាកបាទក្រហម​កម្ពុជា មូលនិធិ​វើ​ល​ម៉េ​ត

កាលពី​ថ្ងៃទី ២៦ មីនា ២០១៥ វេលា​ម៉ោង១៤ម៉០០នាទី នៅ​ទីស្នាក់ការ​អនុសាខា ក​ក្រក ស្រុក​លើកដែក ខេត្តកណ្តាល ឯកឧត្តម កៀង វឌ្ឍនៈ រួមជាមួយ គណៈកម្មាធិការ​អនុសាខា​ស្រុក​លើកដែក និង អាជ្ញាធរ​មូលដ្ឋាន​បានរៀបចំ​ពិធី​ប្រគល់​ប្រាក់កម្ចី ខ្នាតតូច​ឥត​ការប្រាក់​ជូន​ដល់​ប្រជាជន នៅ​ភូមិ​ព្រែក​តូច និង​ភូមិ​ព្រែក​ដាច់ ស្រុក​លើកដែក ខេត្តកណ្តាល ចំនួន១៤គ្រួសារ ដើម្បី​យកទៅ​ប្រកបមុខរបរ​អាជីវក​ម្ម​គ្រួសារ បង្កើន​ចំណូល​សម្រាប់​ទ្រទ្រង់​ជីវភាព​រស់នៅ ឱ្យបាន​ប្រសើរ ។
 
ក្នុងឱកាស​នេះ ឯកឧត្តម បាន​មានប្រសាសន៍ថា​កាកបាទក្រហមកម្ពុជា ដែលជា​អង្គការ​មនុស្សធម៌​ធំជាងគេ ក្រោម​ការដឹកនាំ​របស់​សម្តេច​កិត្តិ​ព្រឺ​ទ្ធ​បណ្ឌិត​ប៊ុនរ៉ានី​ហ៊ុនសែន ជា​ប្រធាន បានទទួល​ថវិកា​ជា​មូលនិធិ​របស់​អង្ក​ការ ៉​វើ​ល​ម៉េ​ត ៉ សម្រាប់ធ្វើ​សកម្មភាព​ផ្តល់ប្រាក់​កម្ចី​ឥត​ការប្រាក់​នៅតាម​សាខា​ចំនួន ៤ ក្នុងនោះ​ស្រុក​លើកដែក បាននិងកំពុង​អនុវត្ត​កម្មវិធី​ប្រាក់​នៅក្នុង​ឃុំ​ព្រែក​ដាច់ និង​ឃុំ​កំពង់ធំ គិតពី​ឆ្នាំ២០១២ ដល់​ប​ច្ច​ប្បន្ន​មាន​អ្នកទទួលផល​សរុប២៧២ គ្រួសារ​ដែល​អ្នកមាន​ជីវភាព​ធូរធារ​រស់នៅ​ធូរធារ។ ចំពោះ​ឆ្នាំ២០១៥នេះ គិត​ត្រឹម​ត្រីមាស​ទី១ កម្មវិធី​បាន និង​កំពុងផ្តល់​ប្រាក់កម្ចី​ដល់​អ្នកទទួលផល​សរុប​ចំនួន ៨៨ គ្រួសារ នៅតាម​ឃុំ​ទាំងពីរ​ខាងលើ។
 
លោកស្រី ឈឹម អ៊ុត សមាជិក​គណៈកម្មាធិកា​រ​អនុសាខា​ស្រុក​លើកដែក បានបញ្ជាក់​អំពី​គោលការណ៍​ប្រាក់កម្ចី​ឥត​ការប្រាក់ របស់​កាកបាទក្រហម​កម្ពុជា ដែលមាន​គោលការណ៍​ផ្តល់ប្រាក់​កម្ចី ក្នុង១គ្រួសារ ទទួលបាន១ លាន​រៀល​ខ្ពស់បំផុត  ហើយ​បងប្អូន​ត្រូវ​បង់​រំលស់ រយៈពេល១០ខែ ក្នុង១ខែ​ត្រូវ​បង់១០%នៃ​ប្រាក់​ដើម និង បង់​នៅ​រៀងរាល់​ថ្ងៃទី២៦ ដល់​ជន បង្គោល​ប្រចាំ​ភូមិនីមួយៗ ព្រោះថា ប្រាក់​ដែល​ប្រមូលបាន​ពី​បង់​រំលស់​នេះ យកទៅ​ផ្តល់ជូន​ឲ្យ ប្រជាពលរដ្ឋ មិនទាន់​បានទទួល ហើយ​ពួកគាត់​ក៍​មានបំណង​ចង់​ទទួល​ប្រាក់កម្ចី​នេះ យកទៅ​ធ្វើ​អាជីវកម្មផ្សេងៗផងដែរ។
 
ឯកឧត្តម ក៏បាន​បន្តទៀតថា ការផ្តល់ប្រាក់​កម្ចី​នេះ គឺ​មិន​គិតពី​និ​ន្នា​នយោបាយ​ណាមួយ​ទេ គឺ​ផ្តល់ជូន​ទាំងអស់​ឲ្យ​តែ​បងប្អូន​ប្រជាពលរដ្ឋ​ណា ដែល​ក្រីក្រ​ខ្វះខាត ចង់​បង្កើន​ជីវភាព​គ្រួសារ ដោយ​មិន​គិតការ​ប្រាក់​ឡើយ ។

កាកបាទក្រហមកម្ពុជា​ទទួល​ជំនួប​សវនាការ និង​សម្តែង​ការគួរសម​ជាមួយ ប្រតិភូ​ភរិយា​អង្គទូត​ប្រចាំ​នៅ​ព្រះរាជាណាចក្រ​កម្ពុជា

កាលពី​ព្រឹក​ថ្ងៃទី ២៦ ខែ មីនា ឆ្នាំ ២០១៥ វេលា​ម៉ោង ០៩:០០ នៅ​ទីស្នាក់ការ​កណ្តាល​កាកបាទ​ក្រហម​កម្ពុជា សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា បានទទួល​ជួប​សវនាការ​ និងសម្តែង​ការគួរសម​ជាមួយ​ប្រតិភូ​ភរិយា​អង្គទូត​ប្រចាំ​នៅ​ព្រះរាជាណាចក្រ​កម្ពុជា។

 

ជា​កិច្ច​ចាប់ផ្តើម សម្តេច​កិត្តិ​ព្រឹទ្ធ​បណ្ឌិត​ប្រធាន តាងនាម​ឲ្យ​មន្ត្រី បុគ្គលិក និង​ប្រជាជន​កម្ពុជា បាន​សម្តែង​នូវ​ការស្វាគមន៍​យ៉ាង​កក់ក្តៅ​ចំពោះ​គណៈប្រតិភូ និង​បាន​កោតសរសើរ​ដល់​ទឹកចិត្ត​ប្រកប​ដោយ​មនុស្សធម៌ ពី​សំណាក់​លោកជំទាវ​អង្គទូត​ទាំងអស់។ សម្តេច​កិត្តិ​ព្រឹទ្ធ​បណ្ឌិតប្រធាន ក៏បាន​សម្តែង​នូវ​មោទនភាព​ចំពោះ​កិច្ច​ខិតខំប្រឹងប្រែង​ពី​សំណាក់​ភិ​រិ​យាអង្គ​ទូត​ប្រចាំ​ដែល​បាន​ចូលរួម​បំពេញបេសកកម្ម​ការទូត​ជាមួយ​ឯកឧត្តម​អង្គទូត ប្រចាំ​នៅ​ព្រះរាជា​ណាចក្រ​កម្ពុជា។

 

ជា​កិច្ច​ឆ្លើយតប លោកជំទាវ Sonia Cautain ភរិយា​ព្រឹទ្ធបុរស​សហភាព​អឺរ៉ុប និង​ជា​ប្រធាន​គណៈប្រតិភូ បាន​សម្តែង​នូវ​ការថ្លែង​អំណរគុណ​យ៉ាង​ជ្រាលជ្រៅ ចំពោះ​សម្តេច​កិត្តិ​ព្រឹទ្ធ​បណ្ឌិត​ប្រធាន ដែល​បាន​អនុញ្ញាត ឲ្យ​​គណៈប្រតិភូ​បាន​ចូល​សម្តែង​ការគួរសម និង​បានមក​ស្តាប់​នូវ​ការ​ចែក​រំលែកបទ​ពិសោធន៍​ពី​សកម្មភាព ការងារ​កាកបាទ​ក្រហម​កម្ពុជា។ លោកជំទាវ បាន​លើកឡើងថា ជានិច្ច​ជា​កាល​សកម្មភាព​កាកបាទ​ក្រហមកម្ពុជា​ត្រូវបាន​ផ្សព្វផ្សាយ​នៅតាម​រយៈ​សារ​ព័ត៌មាន​ជាតិ និង​អន្តរជាតិ ព្រមទាំង​បាន​ទទួល​ស្គាល់ និង​ការ​ទុកចិ​ត្តិ​ពី​សំណាក់​សប្បុរសជន​ក្នុង និង​ក្រៅប្រទេស​ផង​ដែរ។ បន្ថែម​ពី​នេះ​ទៀត ដំណើរ​ទស្សនកិច្ច​នេះ​ក៏​នឹងជួយ​ដល់​គណៈប្រតិភូ​នូវ​ការ​ប្រមូល​ផ្តុំ​គំនិត​ក្នុង​ការផ្តល់​នូវកាស​ឲ្យ​ភរិយា​អង្គទូត​បាន​ចូលរួម​ជួយ​បន្ថែម ទៀត​ដល់​ការងារ​របស់​គ្រួសារ​ខ្លួន។

 

សម្តេច​កិត្តិ​ព្រឹទ្ធ​បណ្ឌិតប្រធាន ក៏បាន​ជម្រាប់​ជូន​គណៈប្រតិភូ​ថា ជាទូទៅ​កាកបាទ​ក្រហម​កម្ពុជា​តែងតែមាន​កិច្ចប្រជុំ របស់​ខ្លួន​ជា​រៀង​រាល់​ឆ្នាំ ដើម្បី​ត្រៀម​ឆ្លើយតប​ទៅនឹង​គ្រោះមហន្តរាយ​ដែល​អាច​កើតមានឡើង។ បន្ថែម​ពីនេះ កាកបាទ​ក្រហម​កម្ពុជា ក៏​មាន​បណ្តាញ​អ្នកស្ម័គ្រចិត្ត និង​យុវជន​នៅ​តាម​សាខា និង​សហគមន៍ ជាហេតុ​ធ្វើឲ្យ​ការ​ឆ្លើយ​តប​មាន​ភាព​ទាន់​ពេលវេលា និង​ប្រកបដោយ​ប្រសិទ្ធភាព​ខ្ពស់។ នៅក្នុង​នោះ កាកបាទ​ក្រហម​កម្ពុជា ក៏​នៅ​មាន​ដៃគូរ​ជាមួយ​សមាគមន៍​ជាតិ​ផ្សេងៗ​ផងដែរ ដោយ​បាន​អនុវត្ត​នូវ​គម្រោងទៅតាម​កម្មវិធី ដែល ម្ចាស់​ជំនួយ​ចង់​សហការ។

 

សម្តេច​កិត្តិ​ព្រឹទ្ធ​បណ្ឌិតប្រធាន ក៏បាន​គូ​សបញ្ជាក់​ថា កាកបាទ​ក្រហម​កម្ពុជា គឺជា​ស្ថាប័ន​អង្គការ​ក្រៅ​រដ្ឋាភិបាល ហើយ​ការអនុវត្ត​នូវ​សកម្មភាព​របស់​ខ្លួន គឺ​ទទួល​បាន​ដោយមាន​ការឧបត្ថម្ភ​ពី​សំណាក់​សប្បុរស​ជនជាតិ និង​អន្តរជាតិ ហើយ​ជា​រៀង​រាល់​ឆ្នាំ កាកបាទ​ក្រហម​កម្ពុជា បាន​យក​ពិធី ៨ ឧសភា ទិវា​ពិភពលោក​កាកបាទ​ក្រហម អឌ្ឍចន្ទ​ក្រហម ជា​ទិវា​នៃ​ការស្វែងរក​នូវ​អំណោយ​មនុស្សធម៌​ពី​សំណាក់​សប្បុរសជន​គ្រប់​មជ្ឈដ្ឋាន ដោយមាន​ការចូលរួម​លើក​ទឹក​ចិ​ត្តិ​ពី​សំណាក់ សម្តេច​អគ្គ​មហា​សេនា​បតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជា​ណាចក្រ​កម្ពុជា ជា​អធិបតីភាព។

 

ជាទី​បញ្ចប់ សម្តេច​កិត្តិ​ព្រឹទ្ធ​បណ្ឌិត​ប្រធាន បាន​ជូនពរ​ដល់​គណៈប្រតិភូ និង​ស្វាមី​របស់​របស់គេ សូម​ឲ្យ​មាន​សេចក្តីសុខ និង​ជោគជ័យ​ក្នុងការ​បំពេញបេសកកម្ម​ការទូត​របស់ខ្លួន​នៅក្នុង​ព្រះ​រាជា​ណា​ចក្រ​កម្ពុជា នៅក្នុង​ឆ្នាំ​ថ្មី​ខាងមុខនេះ​ផងដែរ។

អត្ថបទ​ដោយ ឯ.. តាំង សាមឿន

កិច្ច​ប្រជុំ​គណៈ​កម្មាធិការ និង​អនុកម្មាធិការ ដើម្បី​រៀប​ចំ​ខួប​ទី ១៥២ ទិវា​ពិភព​លោក​ កាកបាទ​ក្រហម អឌ្ឍចន្ទ​ក្រហម ៨ ឧសភា ២០១៥

នា​រសៀល​ថ្ងៃទី ២៣ខែ មីនា ឆ្នាំ ២០១៥ នៅ​ទីស្នាក់ការ​កណ្តាល កាកបាទ​ក្រហម​កម្ពុជា មាន​រៀបចំ​កិច្ចប្រជុំ ដើម្បី​ត្រៀម​រៀបចំ​ខួប​លើក​ទី១៥២ ទិវា​ពិភពលោក​កាកបាទក្រហម អឌ្ឍចន្ទ​ក្រហម ៨ឧសភា ឆ្នាំ២០១៥ ក្រោម​អធិបតីភាព សម្ដេច​ចៅ​ហ្វា​វាំង គង់ សំអុល អនុប្រធាន​អចិន្ត្រៃយ៍​កាកបាទ​ក្រហម​កម្ពុជា និង​ជា​ប្រធាន​គណៈកម្មការ​រៀបចំ​ខួប​លើក​ទី ១៥២ ទិវា​ទិវា​ពិភពលោក​កាកបាទ​ក្រហម អឌ្ឍចន្ទ​ក្រហម៨ឧសភា ឆ្នាំ២០១។  

កិច្ចប្រជុំ​មាន​គោលបំណង​ផ្សព្វផ្សាយ​សេចក្តីសម្រេច​លេខ០០១ ក​ក្រក ធ​ធ​ចត ស្តីពី​ការចាត់តាំង​គណៈកម្មកា​រ​រៀបចំ​ខួប​លើក​ទី ១៥២ ទិវា​ពិភពលោក កាកបាទ​ក្រហម អឌ្ឍចន្ទ​ក្រហម និង​ដើម្បី​ពិនិត្យ​លទ្ធផល​ការងារ​ដែល​អនុគណៈកម្មកា​រទាំង៤សម្រេចបាន បញ្ហា​ប្រឈម​ក្នុង​ការងារ​បំពេញ​ការងារ និង​ទិសដៅ​សម្រាប់​អនុគណៈកម្មការ​ទាំង៤អនុវត្ត​បន្ត ធ្វើ​យ៉ាង​ឲ្យ​ខួប​លើក​ទី ១៥២ ទិវា ៨ ឧសភា ២០១៥ នេះ​ទទួលបាន​ជោគជ័យ​ដូច​ឆ្នាំកន្លងមក​ផងដែរ។


ខួប​ទី១៥២ ទិវា​ពិភពលោក កាកបាទ​ក្រហម អឌ្ឍចន្ទ​ក្រហម ៨ឧសភា ឆ្នាំ២០១៥ នឹងធ្វើ​ឡើង​ក្រោម​ប្រធានបទ កម្លាំង​មនុស្សធម៌ : គោលការណ៍​គ្រឹះ​នៅក្នុង​សកម្មភាពនៅ​ទីស្នាក់ការ​កណ្ដាល​កាកបាទ​ក្រហមកម្ពុជា នា​ថ្ងៃទី ០៨ ខែឧសភា ឆ្នាំ២០១៥ ក្រោម​អធិបតី ភាព​សម្ដេច​អគ្គមហា​សេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​សម្ដេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន និង​មានការ​អញ្ជើញ​ចូលរួម​ពី​ឥស្សរជន មកពី​ស្ថាប័ន​នីតិបញ្ញត្តិ នីតិប្រតិបត្តិ ប្រតិភូ​មកពី​ចលនា កាកបាទក្រហម សហ​ព​ន្ធ័​អន្តរជាតិ កាកបាទក្រហម អឌ្ឍចន្ទ​ក្រហម តំណាង​អង្គទូត សប្បុរស​ជនជាតិ អន្តរជាតិ វិស័យ​ឯកជន ដៃគូ​សហប្រតិបត្តិការ មហាជន​ក្នុង​រាជធានី​ភ្នំពេញ សមាជិក សមាជិកា អ្នកស្ម័គ្រចិត្ត និង​យុវជន​កាកបាទក្រហម​កម្ពុជា​ប្រមាណ៥.០០០នាក់។


សម្ដេចចៅហ្វា​វាំង ប្រធាន​អង្គ​ប្រជុំបាន​ថ្លែងអំណរគុណ​ចំពោះ​ការខិតខំ​របស់​សមាជិក សមាជិកា អនុគណៈកម្មការ​ទាំង​អស់​ដែល​បាន​ខិតខំ​ប្រឹងប្រែង​ប្រកបដោយ​ស្មារតី​ទទួលខុសត្រូវ ឆ្ពោះទៅ​សម្រេច​ឲ្យ​បាន​នូវ​ភារៈកិច្ច​មនុស្សធម៌​ជូន​កាកបាទ​ក្រហម​កម្ពុជា ក៏ដូចជា​លើកកម្ពស់​មុខមាត់ និង​កេរ្តិ៍ឈ្មោះ​របស់​ចលនា​អន្តជាតិ កាកបាទ​ក្រហម អឌ្ឍចន្ទ​ក្រហម នៅលើ​សកលលោក។

ជាពិសេស​កាកបាទ​ក្រហម​កម្ពុជា ឋិត​នៅក្នុង​ស្ថានភាព ដែល​វិសាលភាព​ប្រតិបត្តិការ​កាន់តែ​មាន​ទំហំ​ធំឡើងៗ​ជា​រៀងរាល់ឆ្នាំ ដើម្បី​ប្រសិទ្ធភាព​នៃ​ការ​ផ្តល់​សេវា​មនុស្សធម៌​ជួយ​ដល់​ជន​ងាយ​រងគ្រោះ និង​អ្នករងគ្រោះ​ដោយ​គ្រោះមហន្តរាយ និង​ឧបទ្ទវហេតុផ្សេងៗ ជាពិសេស​បង្កដោយ​ការប្រែប្រួល​អាកាសធាតុ​នោះ​កាកបាទក្រហមកម្ពុជា សូម​អំពាវនាវ​ដល់​ស​ប្បុរ​សជន​ជាតិ អន្តរជាតិ​ជួយឧបត្ថម្ភ​គាំទ្រ និង​ធ្វើការ​បរិច្ចាគ​ជា​សំភារៈ ថវិកា​ដល់​កាកបាទក្រហមកម្ពុជា​នៅ​ថ្ងៃទី០៨ ខែឧសភា ឆ្នាំ២០១។ កាកបាទក្រហមកម្ពុជា សង្ឃឹម​យ៉ាង​មុតមាំ​ពី​ការចូលរួម​របស់​សប្បុ​រស​ជន​នានា ដែលជា​សក្ខីភាព​បញ្ជាក់​អោយឃើញ​ពី​វប្បធម៌​នៃ​ការចែករំលែក និង​ការចូលរួម​កម្លាំង​មនុស្សធម៌ ដើម្បី​បុព្វហេតុ​មនុស្សជាតិ៕

Fist Prev 102 103 104 105 106 Next Last