Webmail
E-Learning
សាខាកាកបាទក្រហមកម្ពុជា

កំពត

សាខាកាកបាទក្រហមកម្ពុជា ខេត្តកំពត សួរសុខទុក្ខ ស្ត្រីទីទ័លក្រ នៅ ភូមិម៉ាក់ប្រាង ស្រុកទឹកឈូ

សាខាកក្រកខេត្តកំពត ៖ កាលពីព្រឹក​ថ្ងៃសុក្រ ៣រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ២២ ខែ កុម្ភៈ ឆ្នាំ ២០១៩ សាខា​កាកបាទក្រហម​កម្ពុជា ខេត្តកំពត ដឹកនាំដោយ​លោកស្រី ឡាយ សុភ័ក្ត្រ នាយិការង​សាខា និងសហការី បានចុះសួរសុខទុក្ខ និងនាំយកអំណោយ​មនុស្សធម៌​របស់កាកបាទក្រហមកម្ពុជា ផ្តល់ជូនគ្រួសារស្ត្រីទីទ័លក្រ សម្រាលកូន ចំនួន ១គ្រួសា​រដែលមានទីលំនៅស្ថិត​ក្នុងភូមិម៉ាក់ប្រាង ឃុំកំពង់គ្រែង ស្រុកទឹកឈូ ខេត្តកំពត។

នាឱកាសនោះ លោកស្រី បានពាំនាំ​មកនូវប្រសាសន៍ផ្តាំ​ផ្ញើសួរសុខទុក្ខ​ពីសំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ដែល​ជានិច្ចកាល​សម្តេចតែងតែ​គិតគូរពីសុខទុក្ខរបស់បងប្អូន​ប្រជាពលរដ្ឋ​ជួបការលំបាក ទីទ័លក្រ មានជំងឺ ជនងាយ​រងគ្រោះ ជនរងគ្រោះ​ដោយគ្រោះមហន្តរាយ​ផ្សេងៗ ដោយមិនប្រកាន់​រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយ​អ្វីឡើយ សូមឲ្យបងប្អូន​ប្រជាពលរដ្ឋទាំងអស់​ប្រកាន់យកនូវ​អនាម័យល្អ រស់នៅស្អាត ហូបស្អាត ផឹកស្អាត និងយកកូន​ទៅចាក់ថ្នាំបង្ការ​ឲ្យបានគ្រប់ចំនួនដង​តាមការណាត់ជួប​របស់គ្រូពេទ្យ។

អំណោយផ្តល់ជូនរួមមាន ៖ អង្ករ ២៥គីឡូក្រាម មី ១កេស ទឹកដោះគោខាប់ ៦កំប៉ុង ក្រមា១ មុង១ សារុង១ ភួយ១ ឃីតទារក ១ឈុត និងថវិកា​មួយចំនួនផងដែរ៕

 

ពិធីបំពាក់ឯកសណ្ឋានជូនដល់ យុវជនកាកបាទក្រហមកម្ពុជា នៅខេត្តកំពត

សាខាកក្រកខេត្តកំពត ៖ កាលពី​រសៀលថ្ងៃសុក្រ ១២ ​ខែបុស្ស ឆ្នាំច សំរឹទ្ធិស័ក ព.ស. ២៥៦២ ត្រូវនឹង​ថ្ងៃទី ១ ខែ កុម្ភៈ ឆ្នាំ ២០១៩ សាខា​កាកបាទក្រហមកម្ពុជា ​ខេត្តកំពត បានរៀបចំពិធីបំពាក់​ឯកសណ្ឋាន​ជូនដល់ យុវជនកាកបាទក្រហមកម្ពុជា​ ទើបជ្រើសថ្មី និងទួលបាន​ការបណ្តុះបណ្តាល​យល់ដឹងជាមូលដ្ឋាន​ស្តីពីប្រវត្តិ​ចលនាកាកបាទក្រហម​ អឌ្ឍចន្ទក្រហម និងវិជ្ជាសង្គ្រោះ​បឋម ចំនួន ៥៤៤នាក់ មកពីវិទ្យាល័យ​ចំនួន៥ និងអនុវិទ្យាល័យ នៅក្នុង​ខេត្តកំពត ក្រោមអធិបតីភាព​ឯកឧត្តម ជាវ តាយ​ ប្រធានកិត្តិយស​សាខា​កាកបាទក្រហមកម្ពុជា ខេត្តកំពត។

 

មានប្រសាសន៍​នាឱកាសនោះ ឯកឧត្តម ជាវ តាយ ប្រធានកិត្តិយស​សាខាកាកបាទក្រហម​កម្ពុជា ខេត្តកំពត បានលើកឡើងថា៖​ ដើម្បីបំពេញបន្ថែម​សមាជិកយុវជនដែលបាន​ប្រលងចេញ ឬត្រូវបន្ត​ការសិក្សានៅថ្នាក់ឧត្តមសិក្សា និងដើម្បីពង្រីក​សមាជិក​យុវជនថ្មី សម្រាប់បំពេញ​សកម្មភាពមនុស្សធម៌ ​និងបានចាត់ទុក​យុវជនជាធនធានគន្លឹះ ដែល​មានតម្លៃខ្ពស់​បំផុតសម្រាប់​ការអភិវឌ្ឍសេដ្ឋកិច្ច​ សង្គមកិច្ច វប្បធម៌ បរិស្ថាន និងការរក្សាសន្តិភាព ហើយនៅ​គ្រប់សម័យកាល គ្រប់សង្គម ​យុវជនជាកម្លាំង​ស្រួចដែលមាន​កម្លាំងកាយ-កម្លាំងចិត្ត និងស្មារតីភ្លឺស្វាង​ មានទឹកចិត្ត​ក្លាហាន ពុះពារមិន​រារែកគ្រប់ឧបសគ្គនានា ពិសេស​យុវជនគឺជាសសរទ្រូងរបស់ប្រទេសជាតិ​ទាំងនៅពេលបច្ចុប្បន្ន ​និងទៅអនាគត។

 

ជាមួយគ្នានេះ កាកបាទក្រហម​កម្ពុជា បានទទួលស្គាល់ថា​ យុវជនកាកបាទក្រហម​កម្ពុជា គឺជាអ្នកស្ម័គ្រចិត្តវ័យក្មេង ដែលជាកម្លាំងស្នូលមួយដ៏មាន​សារៈសំខាន់ និងសកម្ម​បំផុត ក្នុងការផ្ដល់​នូវសេវាកម្ម​មនុស្សធម៌ ប្រកបដោយ​ការប្ដេជ្ញាចិត្តខ្ពស់ និងការលះបង់​ឥតងាករេ ស្របតាម​ប្រធានបទ "យុវជនកំពុងនាំគ្នាធ្វើសកម្មភាពយុវជន ជាភ្នាក់ងារ​នៃការផ្លាស់ប្តូរឥរិយាបថ​ក្នុងសង្គម"។

 

ទន្ទឹមនឹងនោះដែរ ឯកឧត្តម ក៏បានបំពាក់កន្សែងជូន​ដល់យុវជន និងបានឧបត្ថម្ភថវិកាដល់យុវជនកាកបាទក្រហម​កម្ពុជា ចំនួន៥៤៤នាក់ ក្នុងម្នាក់ៗ ១០០០០រៀល ទីប្រឹក្សាយុវ​ជនកាកបាទក្រហមកម្ពុជា ចំនួន១២នាក់ ក្នុងម្នាក់ៗ ៤០០០០រៀលផងដែរ៕

ទិវាពិភពលោកប្រយុទ្ធនឹងជំងឺអេដស៍ ១ធ្នូ ឆ្នាំ២០១៨នៅខេត្តកំពត

សាខាកក្រកខេត្តកំពត ៖ កាលពីព្រឹក​ថ្ងៃសៅរ៍ ១កើត ខែមិគសិរ ឆ្នាំច សំរិទ្ធិស័ក ព.ស. ២៥៦២ ត្រូវនឹង​ថ្ងៃទី ៨ ខែ ធ្នូ ឆ្នាំ ២០១៨ ដើម្បីអបអរសាទរ​ទិវាពិភពលោក​ប្រយុទ្ធនឹង​ជំងឺអេដស៍ ១ធ្នូ ឆ្នាំ២០១៨ ក្រោម​ប្រធានបទ " យើងប្តេជ្ញារួមគ្នា​បញ្ចប់បញ្ហា​អេដស៍នៅឆ្នាំ២០២៥ " និងទិវាអន្តរជាតិ​នៃអ្នកស្ម័គ្រចិត្ត ក្រោម​ប្រធានបទ " អ្នកស្ម័គ្រចិត្ត​ដើម្បីសហគមន៍យើង " សាខាកាកបាទក្រហម​កម្ពុជា ខេត្តកំពត ដឹកនាំដោយ ឯកឧត្តម ជាវ តាយ ប្រធាន​កិត្តិយស​សាខា​កាកបាទក្រហម​កម្ពុជា ខេត្តកំពត ដែលមាន​ការអញ្ជើញ​ចូលរួមពី​សំណាក់ឯកឧត្តម លោកជំទាវ លោក លោកស្រី សមាជិក សមាជិកា​គណៈកម្មាធិការ​សាខា អនុសាខា អ្នកស្ម័គ្រចិត្ត​ យុវជនកាកបាទក្រហម យុវជន​កាយរឹទ្ធ និងបុគ្គលិកពេទ្យ ​សរុបចំនួន ៤០០នាក់។ ទិវានេះរៀបចំ​ធ្វើឡើងនៅក្នុងបរិវេណ​មន្ទីរពេទ្យ​បង្អែកឈូក ស្ថិតនៅភូមិ​ឈើទាល ឃុំឈូក ស្រុកឈូក​ ខេត្តកំពត។

 

នាឱកាសនេះ ឯកឧត្តម​ប្រធាន បានពាំនាំមក​នូវប្រសាសន៍​ផ្តាំផ្ញើសួរសុខទុក្ខ​ពីសំណាក់​សម្តេចកិត្តិព្រឹទ្ធបណ្ឌិតប៊ុន រ៉ានី​ ហ៊ុនសែន ប្រធាន​កាកបាទក្រហម​កម្ពុជា ដែលជានិច្ចកាល​សម្តេចតែងតែ​គិតគូរ​ពីសុខទុក្ខរបស់បងប្អូន​ប្រជាពលរដ្ឋជួប​ការលំបាក ទីទ័លក្រ មានជំងឺ ជន​ងាយរងគ្រោះ ជនរងគ្រោះ​ដោយគ្រោះមហន្តរាយផ្សេងៗ ដោយមិនប្រកាន់​រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការ​នយោបាយអ្វីឡើយ និងបានពាំនាំអនុសាសន៍​របស់សម្តេច​កិត្តិព្រឹទ្ធបណ្ឌិតប្រធាន ​ជូនដល់បងប្អូន​ប្រជាពលរដ្ឋទាំងអស់ ដែលមានខ្លឹមសារដូចតទៅ៖
១.សូមបងប្អូនជនរួមជាតិ​ទាំងអស់​ជាពិសេសក្មួយៗ​ជាយុវជន យុវនារី​ត្រូវស្វែង​យល់ឱ្យបាន​ជាប្រចាំនូវ​ចំណេះដឹងស្តីពីការបង្ការខ្លួនយើង​ គ្រួសារយើង សហគមន៍យើង និងសង្គមជាតិយើង ពី​ការរីករាលដាល​នៃមេរោគអេដស៍


២.ប្រជាពលរដ្ឋដែល​បានប្រព្រឹត្ត ឬសង្ស័យ​ខ្លួនបានប្រឈម​នឹងការឆ្លងមេរោគអេដស៍​ សូមប្រញ៉ាប់រួសរាន់​ទៅស្វែងរកសេវា​ផ្តល់ប្រឹក្សា និង​ធ្វើតេស្តឈាមរក​មេរោគអេដស៍​ដោយស្ម័គ្រចិត្ត និងរក្សា​ការសម្ងាត់ នៅតាមសេវាសាធារណៈ សេវាអង្គការ​សង្គមស៊ីវិល សេវាឯកជន ។ល។ ដើម្បីឆាប់បានដឹងពីស្ថានភាពផ្ទុកមេរោគអេដស៍ ដែលអាចប្រើប្រាស់​ក្នុងការសម្រេចចិត្ត ទៅទទួល​សេវាថែទាំ និងព្យាបាល​បានទាន់ពេលវេលា


៣.ស្ត្រីមាន​ផ្ទៃពោះទាំងអស់ ​សូមប្រញ៉ាប់រួសរាន់​ទៅស្វែងរកសេវា​ថែទាំ និងពិនិត្យផ្ទៃពោះឱ្យបានត្រឹមត្រូវ និងទៀងទាត់តាមការណែនាំ​របស់បុគ្គលិកពេទ្យ ដើម្បីទប់ស្កាត់​ការចម្លងមេរោគ​អេដស៍ពីម្តាយ​ទៅទារក


៤.ត្រូវ​ប្រញ៉ាប់ដាច់ខាត​នៅគ្រប់ទម្រង់​រើសអើង ឬមាក់ងាយ​ទៅលើអ្នកផ្ទុក​មេរោគអេដស៍ និងជំងឺអេដស៍ ព្រោះជាអំពើ​ផ្ទុយទៅ​នឹងច្បាប់ស្តី​ពីការបង្ការ និងទប់ស្កាត់​ការរីករាលដាល​មេរោគអេដស៍ និងជំងឺអេដស៍នៅកម្ពុជា


៥.ប្រជាពលរដ្ឋទាំងឡាយ​ដែលមានមុខរបរ ​ឬមានការប្រព្រឹត្ត​ប្រឈមខ្ពស់​និងការឆ្លងមេរោគ​អេដស៍ សូមប្រើប្រាស់ស្រោម​អនាម័យឱ្យបាន១០០% នៅរៀងរាល់​ពេលដែលមានទំនាក់ទំនងរួមភេទ។

 

អំណោយផ្តល់​អ្នករស់នៅជាមួយ​មេរោគអេដស៍​ចំនួន ៦៥គ្រួសារ​រួមមាន ៖ អង្ករ ២៥គីឡូក្រាម​ មី ១កេស ស្ករស ១គីឡូក្រាម ទឹកដោះគោខាប់ ២កំប៉ុង ទឹកដោះគោឆៅ ១ឡូ អាវយឺត១ និងថវិកាមួយចំនួន។

 

សូមបញ្ជាក់ជូនថា បន្ទាប់ពី​ចែកអំណោយជូន​ដល់អ្នករស់នៅ​ជាមួយមេរោគ​អេដស៍ ឯកឧត្តម​បានបន្តចុះសួរសុខទុក្ខអ្នកជំងឺ​កំពុងសម្រាក​ព្យាបាលជំងឺ​នៅមន្ទីរពេទ្យ ចំនួន ៣៩នាក់ ក្នុងម្នាក់ៗ​ទទួលបាន៖ មី ១កេស ស្ករស ១គីឡូក្រាម ទឹកដោគាខាប់ ២កំប៉ុង ទឹកដោះគោឆៅ ១ឡូ មុងសុវត្ថិភាព១ និងថវិកាមួយចំនួនផងដែរ៕

 

សាខាកាកបាទក្រហមកម្ពុជា ខេត្តកំពត ទទួលទេយ្យទានមនុស្សធម៌ពីព្រះតេជគុណភិក្ខុចន្ទប្បជោតោ រ៉ឹក ធូ ព្រះចៅអធិការវត្ត ពិជ័យឧត្តុង្គ ស្ថិតក្នុងសង្កាត់ក្រាំងអំពិល ក្រុងកំពត

សាខាកក្រកខេត្តកំពត ៖ នារសៀលថ្ងៃ​ព្រហស្បតិ៍ ១រោច ខែអស្សុជ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី ២៥ ខែ តុលា ឆ្នាំ ២០១៨នេះ សាខាកាកបាទក្រហម​កម្ពុជា ខេត្តកំពត ​ដឹកនាំដោយ​លោកជំទាវ យូ សុគន្ធ​ ប្រធានគណៈកម្មាធិការ​សាខា និងសហការី​បានអញ្ជើញ​ទទួលទេយ្យទាន​មនុស្សធម៌ពីព្រះតេជគុណ​ភិក្ខុចន្ទប្បជោតោ រ៉ឹក ធូ​ ព្រះចៅអធិការវត្ត​ ព្រមទាំងព្រះសង្ឃ និងគណៈកម្មការ​អាចារ្យវត្ត នៅវត្តពិជ័យឧត្តុង្គ​ ស្ថិតក្នុងសង្កាត់​ក្រាំងអំពិល ក្រុងកំពត ខេត្តកំពត។

ក្នុងឱកាសនោះ​ ព្រះតេជគុណភិក្ខុចន្ទប្បជោតោ រ៉ឹក ធូ ព្រះចៅអធិការ​ បានមានព្រះថេរដីកាប្រកបដោយសេចក្តី​សោមនស្សរីករាយ​ និងគាំទ្រជានិច្ច ​ក្នុងការចូលរួម​ចំណែកជាមួយសកម្មភាពមនុស្សធម៌​របស់កាកបាទក្រហមកម្ពុជា​ ក្រោមការដឹកនាំ​របស់សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា។

ជាការឆ្លើយតប​ លោកជំទាវ យូ សុគន្ធ ប្រធានគណៈកម្មាធិការ​សាខា បានមានប្រសាសន៍​ពាំនាំនូវសេចក្តីផ្តាំផ្ញើសាកសួរសុខទុក្ខ​ពីសំណា​ក់សម្តេចកិត្តិព្រឹទ្ធបណ្ឌិតប្រធាន ប៊ុន រ៉ានី ហ៊ុន សែន ព្រមទាំងសូមថ្លែងអំណរព្រះគុណ​យ៉ាងជ្រាលជ្រៅបំផុត​ចំពោះព្រះសង្ឃគ្រប់​ព្រះអង្គ និងគណៈកម្មការ​អារ្យវត្ត ដែលព្រះអង្គតែងតែ​បានខិតខំ​អំពាវនាវ​ចលនាព្រះសង្ឃក្នុង​ខេត្ត អោយការ​ចូលរួម​ជាមួយសកម្មភាព​មនុស្សធម៌របស់កាកបាទក្រហម​កម្ពុជា​ ហើយសាខា​សន្យានឹង​ចាត់ចែងប្រើប្រាស់​នូវទេយ្យទាន​ទាំងនេះជួយឲ្យដល់ដៃជនរងគ្រោះ​គ្រប់ប្រភេទ ឲ្យស្របតាម​គោលការណ៍គ្រឹះទាំង៧​ប្រការរបស់​ចលនាកាកបាទក្រហម។

ទេយ្យទានទាំងនោះរួមមាន ៖ អង្ករ ១តោន មី ១៥កេស ទឹកក្រូច ៥កេស បន្លុង៥ និងថវិកាចំនួន ៣០០,០០០រៀលផងដែរ៕

 

វគ្គបណ្តុះបណ្តាល ស្តីអំពី" អនាម័យទឹកស្អាត ក្នុងគ្រោះអាសន្ន"នៅខេត្តកំពត

សាខាកក្រក​ខេត្តកំពត ៖ កាលពីព្រឹកថ្ងៃពុធ ១១កើត ខែស្រាពណ៍​ ឆ្នាំច សំរិទ្ធស័ក ព.ស. ២៥៦២ ត្រូវនឹងថ្ងៃទី ២២ ខែ សីហា ឆ្នាំ ២០១៨ សាខា​កាកបាទក្រហម​កម្ពុជា ខេត្តកំពត ​បានរៀបចំ​បើកវគ្គ​បណ្តុះបណ្តាល​ដល់ប្រធានក្រុម​អ្នកស្ម័គ្រចិត្ត​កាកបាទក្រហម​ស្តីអំពី" អនាម័យទឹកស្អាត ក្នុងគ្រោះអាសន្ន" ដែលមានរយៈពេល​៣ថ្ងៃគិតចាប់​ពីថ្ងៃទី ២២ ដល់ថ្ងៃទី ២៤ ខែសីហា ឆ្នាំ២០១៨ ក្រោមការ​ដឹកនាំដោយ​លោកជំទាវ យូ សុគន្ធ ប្រធាន​គណៈកម្មាធិការ​សាខា និងមានការ​ចូលរួមពី ក្រុមការងារការិយាល័យ​ការពារ​ជំងឺឆ្លង និងមិនឆ្លង ទីស្នាក់ការ​កណ្តាល​កាកបាទក្រហម​កម្ពុជា និងអ្នកស្ម័គ្រកាកបាទក្រហម​កម្ពុជា សរុបចំនួន ២៥នាក់ (ស្រី ៩នាក់) ដែលប្រព្រឹត្ត​ទៅនៅខេត្តកំពត។

 

វគ្គបណ្តុះបណ្តាល​នេះមានគោលបំណង​ ដើម្បីពង្រឹង​សមត្ថភាពដល់​អ្នកស្ម័គ្រចិត្ត អំពីអនាម័យ​ទឹកស្អាត ក្នុង​គ្រោះអាសន្ន និងធ្វើការ​អប់រំ​ផ្សព្វផ្សាយ​បន្តដល់​មិត្តភក្តិ និងសហគមន៍​រៀងៗខ្លួនផងដែរ៕

 

1 2 3 4 5 Next Last