Webmail
E-Learning
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា

ទីស្នាក់ការកណ្តាល

វគ្គបំប៉ន និងតម្រង់ទិសលើខ្លឹមសារសម្រាប់ពិភាក្សាក្នុងវេទិកាយុវជន ស្តីពី "កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា - មិនទុកនរណាម្នាក់ចោល"

កក្រក​ ៖​ ថ្ងៃសៅរ៍ ៧កើត ខែពិសាខ ឆ្នាំច សំរឹទ្ធិស័ក ព.ស.២៥៦១ ត្រូវនឹងថ្ងៃទី ២១​ ខែមេសា ឆ្នាំ២០១៨ នេះ លោកជំទាវ​ ម៉ែន​ នារីសោភ័គ​ អគ្គលេខាធិការរងទី១​ កាកបាទក្រហមកម្ពុជា និងក្រុមការងារវេទិកាយុវជន បានបើកវគ្គបំប៉ន និងតម្រង់​ទិសលើខ្លឹមសារ​សម្រាប់ពិភាក្សា​ក្នុងវេទិកា​យុវជន ស្តីពី "កាកបាទក្រហមកម្ពុជាមានគ្រប់ទីកន្លែង​ សម្រាប់គ្រប់ៗគ្នា​ -​ មិនទុកនរណា​ម្នាក់ចោល" ដល់វាគ្មិនទាំង​ ១០នាក់​ និងអ្នកគាំទ្រ​ ២០នាក់​ មកពីសាកល​វិទ្យាល័យបៀលប្រាយ​ និងសាកល​វិទ្យាល័យអាស៊ីអឺរ៉ុប។

 

វគ្គបំប៉ន​ និងតម្រង់ទិស​នេះធ្វើឡើងក្នុង​គោលបំណងពង្រឹង​សមត្ថភាពបន្ថែម និង​បញ្ជ្រាបការយល់ដឹងស្តីពីប្រធានបទ​នៃវេទិកា​យុវជន ដែលវាគ្មិនទាំង​ ១០នាក់​ នឹងត្រូវចូលរួម​ពិភាក្សា​ និងបកស្រាយនៅស្ថានីយ៍ទូរទស្សន៍​ជាតិកម្ពុជា​ ដែលនឹង​ប្រព្រឹត្តទៅ​នៅថ្ងៃទី ២៨​ ខែមេសា ឆ្នាំ២០១៨​ ខាងមុខនេះ៕

 

កាកបាទក្រហមកម្ពុជា ឧបត្ថម្ភថវិកា គ្រឿងបរិភោគ និងសម្ភារៈប្រើប្រាស់ ជូនលោក ចៅ ច័ន្ទណារី

កក្រក​ ៖​ ថ្ងៃព្រហស្បតិ៍ ៥កើត ខែពិសាខ ឆ្នាំច សំរឹទ្ធិស័ក ព.ស.២៥៦១ ត្រូវនឹង​ថ្ងៃទី ១៩ ខែមេសា ឆ្នាំ២០១៨ នេះ កាកបាទក្រហ​មកម្ពុជា (កក្រក) ដែលមានសម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានឧបត្ថម្ភ​ថវិកា គ្រឿងបរិភោគ និង​សម្ភារៈប្រើប្រាស់​មួយចំនួនជូន​លោក ចៅ ច័ន្ទណារី អាយុ ៦៤ឆ្នាំ ជាតារាសម្តែង​ជើងចាស់ធ្លាប់​ទទួលបាន​ពានរង្វាន់លេខ ១ ទូទាំងប្រទេស ក្នុងការប្រកួត​ខ្សែភាពយន្ត​ខ្មែរ ក្នុងឆ្នាំ១៩៩១​ ក្នុងការសម្តែង​ជាតួឯកក្នុងរឿង​ "ស្មានមិនដល់"​ និងមានស្នាដៃ​សម្តែងជាច្រើនទៀត។

 

ក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី ១ កក្រក បានពាំនាំ​ប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ និងគិតគូរចំពោះស្ថានភាពរស់នៅរបស់​លោក ចៅ ច័ន្ទណារី ដែលជាសិល្បៈករ​ជើងចាស់ បានបន្សល់ទុក​ស្នាដៃសម្តែង​ជាច្រើនសម្រាប់អ្នកជំនាន់ក្រោយ​។​ ជាមួយគ្នានេះ​ លោកជំទាវ​ បានផ្តាំផ្ញើឱ្យ​ខិតខំថែរក្សាសុខភាព​ឱ្យបានល្អ និងបន្តប្រឹងប្រែង​ប្រកបរបរចិញ្ចឹម​ជីវិតដើម្បី​អនាគតប្រពន្ធ-កូនតទៅមុខទៀត។

 

លោក ចៅ ច័ន្ទណារី និងភរិយា ដែលមកពីភូមិវាលតូច ឃុំសេដា ស្រុកតំបែរ ខេត្តត្បូងឃ្មុំ​ បានថ្លែងអំណរគុណយ៉ាង​ជ្រាលជ្រៅចំពោះ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និង សម្តេចតេជោ ហ៊ុន សែន ដែលតែងតែមាន​មេត្តាធម៌ មានក្តីករុណា ចំពោះសុខទុក្ខ​របស់សិល្បករ​ជើងចាស់ និងប្រជាជនទូទៅជួបការ​លំបាកដោយគ្មាន​ការរើសអើងអ្វីឡើយ៕

 

កាកបាទក្រហមកម្ពុជា រៀបចំពិធីសូត្រមន្ត ចំរើនព្រះបរិត្ត និងរាប់បាត្រប្រគេនព្រះសង្ឃ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ

កក្រក​ ៖​ នៅព្រឹកថ្ងៃពុធ​ ១១រោច​ ខែចេត្រ​ ឆ្នាំរកា​ នព្វស័ក​ ព.ស.២៥៦១​ ត្រូវនឹងថ្ងៃទី ១១ ខែមេសា ឆ្នាំ២០១៨ នេះ ទីស្នាក់ការកណ្តាល​កាកបាទក្រហមកម្ពុជា បានរៀបចំ​ពិធីសូត្រមន្ត ចំរើនព្រះបរិត្ត និងរាប់បាត្រប្រគេនព្រះសង្ឃចំនួន ៧អង្គ ក្នុង​ឱកាសបុណ្យចូល​ឆ្នាំថ្មីប្រពៃណីជាតិខ្មែរ ឆ្នាំច សំរឹទ្ធិស័ក​ ព.ស.២៥៦២​ ដោយមានការអញ្ជើញ​ចូលរួមពី លោកជំទាវ ពុំ​ ចន្ទីនី​ អគ្គលេខាធិការ​ កាកបាទក្រហមកម្ពុជា រួមជាមួយថ្នាក់ដឹកនាំ​-មន្ត្រី​ ទីស្នាក់ការកណ្តាល​ ​ជាច្រើននាក់។

ស្ថិតក្នុងឱកាសឆ្នាំថ្មីនេះ សូមបួងសួងដល់តេជបារមី​នៃវត្ថុស័ក្តិសិទ្ធិ​ទាំងអស់ក្នុងលោក ទេវតារក្សាព្រះរាជាណាចក្រកម្ពុជា ជាពិសេសទេវតាឆ្នាំថ្មី ព្រះនាម មហោទរាទេវី សូមជួយអភិបាលគ្រងរក្សា ប្រោះព្រំ ប្រសិទ្ធពរ បវរមហា​ប្រសើរជូន សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា និងថ្នាក់ដឹកនាំ មន្ត្រី បុគ្គលិក អ្នកស្ម័គ្រចិត្ត យុវជន​កាកបាទក្រហមកម្ពុជា​ទាំងអស់ សូមបានប្រកបដោយពុទ្ធពរទាំង ៤ ប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕

 

កាកបាទក្រហមកម្ពុជា ចុះសួរសុខទុក្ខ និងចែកអំណោយមនុស្សធម៌ជូនជនជាតិដើមភាគតិច

កក្រក​ ៖​ នៅរសៀលថ្ងៃទី​ ៨ ខែមេសា​ ឆ្នាំ២០១៨​ នេះ​ លោកជំទាវ​ ម៉ែន​ នារីសោភ័គ​ អគ្គលេខាធិការរងទី ១​ កាកបាទក្រហមកម្ពុជា​ និងសហការី​ រួមជាមួយថ្នាក់ដឹកនាំ-មន្ត្រីសាខាកាកបាទក្រហមកម្ពុជា​ ខេត្តមណ្ឌលគិរី​ បានអញ្ជើញចុះសួរសុខទុក្ខ​ និងចែកអំណោយមនុស្សធម៌ជូនជនជាតិដើមភាគតិច​ (ជនជាតិព្នង)​ ដែលជាចាស់ៗ​ អ្នកពិការ​ និងស្ត្រីមានផ្ទៃពោះ​ ​ចំនួន​ ៨គ្រួសារ​ រស់នៅភូមិ​ពូត្រំ ឃុំ​រមនា ក្រុងសែនមនោរម្យ ខេត្តមណ្ឌលគិរី។

ក្នុងឱកាសនោះ លោកជំទាវ​អគ្គលេខាធិការរងទី ១​ បានពាំនាំប្រសាសន៍របស់​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា​ ដែលផ្តាំផ្ញើសួរសុខទុក្ខ​ចំពោះប្រជាពលរដ្ឋ​ទាំងអស់​ និង​សូមផ្តាំផ្ញើឱ្យថែទាំសុខភាពឱ្យបានល្អ មានអនាម័យក្នុងការរស់នៅ​ និងខិតខំបន្តប្រកបរបរចិញ្ចឹមជីវិតដោយសេចក្តីថ្លៃថ្នូរ​ក្នុងប្រទេសដែល​មានសុខសន្តិភាព​ ស្ថិរភាព​ និងការអភិវឌ្ឍនេះ។

ប្រជាពលរដ្ឋទាំងអស់បានថ្លែងអំណរគុណចំពោះ សម្តេចកិត្តិព្រឹទ្ធបណ្ឌិត ប៊ុន​ រ៉ានី​ ហ៊ុនសែន​ ប្រធានកាកបាទក្រហមកម្ពុជា​ ដែលបានគិតគូរពីទុក្ខ​លំបាករបស់ប្រជាពលរដ្ឋ​ដោយគ្មានការរើសអើង​ពូជសាសន៍​ សាសនា​ ឬនិន្នាការ​នយោបាយអ្វីឡើយ។

គ្រួសារនីមួយៗទទួលបាន ថវិកាមួយចំនួនពីកាកបាទក្រហមកម្ពុជា​ថ្នាក់កណ្តាល​ និងទទួលបានពីសាខាកាកបាទក្រហមកម្ពុជា​ ខេត្តមណ្ឌលគិរី​ នូវ​គ្រឿងឧបភោគ-បរិភោគ​ សម្ភារៈប្រើប្រាស់​ និងថវិកាមួយចំនួនទៀត៕

 

កាកបាទក្រហមកម្ពុជា បំពាក់គ្រឿងឥស្សរិយយសមេដាយសហមេត្រី ថ្នាក់សេនា ជូន ម្ចាស់មូលនិធិអង្គការ Camsafe

កក្រក​ ៖​ នៅថ្ងៃចន្ទ ១០កើត ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី ២៦ ខែមីនា ឆ្នាំ២០១៨ នេះ លោកជំទាវ ពុំ ចន្ទីនី អគ្គលេខាធិការ​ កាកបាទក្រហម​កម្ពុជា បានទទួល​ជួបសម្តែងការគួរសម និងបំពាក់គ្រឿង​ឥស្សរិយយស​មេដាយ​សហមេត្រី​ ថ្នាក់សេនា​ ជូន បណ្ឌិត រ៉េ ស៊ូអ៊ី (Dr. REY SHUEY) ម្ចាស់មូល​និធិអង្គការ Camsafe ដែលប្រព្រឹត្ត​ទៅនៅទីស្នាក់ការ​កណ្តាល​កាកបាទក្រហមកម្ពុជា។

ក្នុងឱកាសនោះ ​លោកជំទាវ​អគ្គលេខាធិការ បានពាំនាំ​ប្រសាសន៍ផ្តាំសួរ​សុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា និងថ្លែងអំណរគុណ​ចំពោះអង្គការ Camsafe ដែលជាដៃគូ​សហប្រតិបត្តិការ​ជាមួយ​កាកបាទក្រហមកម្ពុជា​លើការងារ​សុវត្ថិភាព​ចរាចរណ៍ ការងារគ្រប់គ្រង​គ្រោះមហន្តរាយ និងការងារ​សុខភាព។

ជាមួយគ្នានោះ បណ្ឌិត រ៉េ ស៊ូអ៊ី បានថ្លែងអំណរគុណ​យ៉ាងជ្រាលជ្រៅ​ចំពោះកាកបាទក្រហម​កម្ពុជា ដែលមានសម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានអនុញ្ញាត​ឱ្យចូលជួប​សម្តែងការគួរសម និងចូលរួម​ចំណែកការងារ​មនុស្សធម៌ជាមួយ​កាកបាទក្រហមកម្ពុជា៕

 

1 2 3 4 5 Next Last