Webmail
E-Learning
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា

ទីស្នាក់ការកណ្តាល

កាកបាទក្រហមកម្ពុជា សួរសុខទុក្ខ អ្នកស្រី កប កក្កដា ដែលទើបសម្រាលកូនហើយមានជំងឺដុះសាច់សុដន់ធ្ងន់ធ្ងរ កំពុងសម្រាកវះកាត់ព្យាបាលនៅមន្ទីរពេទ្យកាល់ម៉ែត

កក្រក​ ៖​ នៅទីស្នាក់ការកណ្តាល​ នាព្រឹកថ្ងៃព្រហស្បតិ៍​ ទី​ ៧​ ខែកុម្ភៈ​ ឆ្នាំ២០១៩​ នេះ​ កាក​បាទក្រហមកម្ពុជា​ ដែលមានសម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ជាប្រធាន​ បានជួប​សួរសុខ​ទុក្ខ​ជាមួយ​លោក​ គ្រី​ សម្បត្តិ​ បុគ្គលិកទូរទស្សន៍អប្សរា​ ពីស្ថានភាពជំងឺភរិយារបស់លោក​ គឺអ្នកស្រី កប​ កក្កដា​ អាយុ​ ២៣ឆ្នាំ​ ដែលទេីបសម្រាលកូនហេីយមានជំងឺដុះសាច់សុដន់ធ្ងន់ធ្ងរ​ កំពុងសម្រាកវះកាត់ព្យាបាលនៅមន្ទីរពេទ្យកាល់ម៉ែត។

នៅក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា បានពាំនាំនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ​ ក្តីអាណិតអាសូរ​ ចំពោះក្រុមគ្រួសារ​លោកគ្រី​ សម្បត្តិ​ និងសូមផ្តាំផ្ញេីឱ្យថែទាំអ្នកជំងឺឱ្យបានល្អ​អនុវត្តតាមការណែនាំរបស់គ្រូពេទ្យ​ និងជូនពរឆាប់បានជាសះស្បើយឡើងវិញ។

ជាមួយគ្នានេះ​ លោក​ គ្រី​ សម្បត្តិ បានថ្លែងអំណរគុណយ៉ាងជ្រាលជ្រៅបំផុតចំពោះ​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ដែលបានយកចិត្តទុកដាក់ លើកទឹកចិត្ត​ និងផ្តល់អំណោយជួយសម្រាលការលំបាកផ្នែកជីវភាពខណៈដែល​ភរិយា​របស់លោកកំពុងវះកាត់ព្យាបាលនេះ។

អំណោយដែលបានផ្តល់ជូនរួមមាន​ អង្ករ​ មី​ ត្រីខ​ ទឹកដោះគោ​ ស្ករស​ ទឹកប្រទាលកន្ទុយក្រពេី​ មុង​ ភួយ​ សារុង​ ក្រមា​ អាវយឺត​ និងថវិកាមួយចំនួន៕

 

កាកបាទក្រហមកម្ពុជា សួរសុខទុក្ខ តារាកំប្លែងជើងចាស់ នាយក្តឹប មានជំងឺសម្ពាធសរសៃឈាមបេះដូងធ្ងន់ធ្ងរ កកឈាមក្នុងខួរក្បាល ទឹកនោមផ្អែម និងទឹកចូលសួត

កក្រក​ ៖​ នៅទីស្នាក់ការកណ្តាល​ នារសៀលថ្ងៃពុធ ទី​ ៦​ ខែកុម្ភៈ​ ឆ្នាំ២០១៩​ នេះ​ កាក​បាទក្រហមកម្ពុជា​ ដែលមានសម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ជាប្រធាន​ បានជួបសំណេះសំណាលសួរសុខទុក្ខ​ជាមួយ​អ្នកស្រី​ ហួន​ ថាត ពីស្ថានភាពជំងឺរបស់ស្វាមីអ្នកស្រី គឺតារាកំប្លែងជើងចាស់​ នាយក្តឹប អាយុ​ ៦០ឆ្នាំ មានជំងឺ​សម្ពាធសរសៃឈាមបេះដូងធ្ងន់ធ្ងរ​ កកឈាមក្នុងខួរក្បាល​ ទឹកនោមផ្អែម​ និងទឹកចូលសួត​ កំពុងសម្រាកព្យាបាលនៅគេហដ្ឋានស្ថិតនៅ​ភូមិខ្ទរ​ សង្កាត់ព្រែកលៀប​ ខណ្ឌជ្រោយចង្វារ​ រាជធានីភ្នំពេញ។

 

នៅក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា បានពាំនាំនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើនូវការសួរសុខទុក្ខចំពោះសិល្បករជើងចាស់ធ្លាប់មានទេពកោសល្យ​ និងបន្សល់ទុកស្នាដៃសិល្បៈកំប្លែងជាច្រើន​។ ជាមួយគ្នានេះ​ លោកជំទាវ​ បានផ្តាំផ្ញើ​ឱ្យក្រុមគ្រួសារនាយក្តឹប​ ខិតខំថែទាំសុខភាពស្វាមី​ ឪពុក​ ​ឱ្យបានល្អ ហេីយអនុវត្តតាមការណែនាំរបស់គ្រូពេទ្យ​ និងជូនពរឆាប់បានជាសះស្បើយឡើងវិញ។

 

ទន្ទឹមនឹងនេះ​ អ្នកស្រី​ ហួន​ ថាត​ និងកូនប្រុស​ បានសំដែងក្តីរំភើបឥតឧបមា​ និងថ្លែងអំណរគុណយ៉ាងជ្រាលជ្រៅចំពោះ​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ដែលបានយកចិត្តទុកដាក់ គិតគូរជួយសម្រាលទុក្ខលំបាក​ និងលើកទឹកចិត្តដល់​ នាយក្តឹប​ ក៏ដូចជាអ្នកដែលជួបទុក្ខលំបាកទូទៅដោយគ្មានការរើសអើង​អ្វី​ឡើយ​។

 

អំណោយផ្តល់ជូនលេីកទី​ ២​ នេះ​ រួមមាន​ អង្ករ​ មី​ ត្រីខ​ ទឹកដោះគោ​ ស្ករស​ ទឹកប្រទាលកន្ទុយក្រពេី​ ទឹកត្រចៀកកាំ​ មុង​ ភួយ​ សារុង​ ក្រមា​ និងថវិកាមួយចំនួន៕

 

សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស ប្រទានព្រះរាជអំណោយ ដល់កាកបាទក្រហមកម្ពុជា

កក្រក​ ៖​ នៅរសៀលថ្ងៃចន្ទ ១៥រោច ខែបុស្ស ឆ្នាំច សំរឹទ្ធិស័ក​ ព.ស.២៥៦២ ត្រូវនឹងថ្ងៃទី ៤​ ខែកុម្ភៈ ឆ្នាំ២០១៩ នេះ សម្តេចព្រះ​អគ្គមហាសង្ឃរាជាធិបតី​ កិត្តិឧទ្ទេសបណ្ឌិត​ ទេព​ វង្ស​ សម្តេចព្រះមហាសង្ឃរាជនៃព្រះរាជា​ណាចក្រកម្ពុជា​ បានប្រទានព្រះរាជអំណោយជាថវិកាចំនួន ៥,០០០ដុល្លារ (ប្រាំពាន់ដុល្លារអាមេរិក) ដល់កាកបាទក្រហមកម្ពុជា ដេីម្បីរួមចំណែកក្នុងសកម្មភាពមនុស្សធម៌​។

 

ក្នុងឱកាសនោះ លោកជំទាវ ម៉ែន​ នារីសោភ័គ​ អគ្គលេខាធិការរងទី​ ១​ កាកបាទក្រហមកម្ពុជា បានពាំនាំប្រសាសន៍របស់ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា​ ដែលផ្តាំផ្ញេីទូលប្រគេនថ្វាយព្រះពរ​ សម្តេចព្រះ​អគ្គមហាសង្ឃរាជាធិបតី​ កិត្តិឧទ្ទេសបណ្ឌិត​ ដែលព្រះអង្គ​បានប្រទានព្រះរាជអំណោយ​គាំទ្រដល់កាកបាទក្រហមកម្ពុជា​ ក្នុងការរួមចំណែកក្នុងសកម្មភាពមនុស្សធម៌ជួយដល់ប្រជាពលរដ្ឋងាយរងគ្រោះបំផុត។ ជំនួសមុខ​ សម្តេចកិត្តិព្រឹទ្ធបណ្ឌិត​ប្រធាន លោកជំទាវអគ្គលេខាធិការរងទី​ ១ បានប្រគេនថ្វាយព្រះពរ​ សម្តេចព្រះ​អគ្គមហាសង្ឃរាជាធិបតី​ កិត្តិឧទ្ទេសបណ្ឌិត​ សូមមានព្រះរាជសុខភាពល្អបរិបូរណ៍ ព្រះជន្មាយុយ៉ឺនយូរ ដើម្បីជួយទ្រទ្រង់ដល់វិស័យព្រះពុទ្ធសាសនា បានគង់វង្សយូរអង្វែងតទៅ៕

 

កាកបាទក្រហមកម្ពុជា ប្រគេនថ្វាយព្រះសព្ទសាធុការពរជ័យ ថ្វាយសម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស

កក្រក​​ ៖​ នៅក្នុងឱកាសដ៏មហានក្ខត្តឫក្សប្រសេីរថ្លៃថ្លា​ នៃព្រះរាជ​ពិធី​ចម្រើនអាយុវឌ្ឍនមង្គល​ និងស្រង់​ព្រះសុគន្ធវារី​ ថ្វាយ សម្តេចព្រះ​អគ្គមហាសង្ឃរាជាធិបតី​ កិត្តិឧទ្ទេសបណ្ឌិត​ ទេព​ វង្ស​ សម្តេចព្រះមហាសង្ឃរាជនៃព្រះរាជា​ណាចក្រកម្ពុជា​ ក្នុងព្រះជន្មាយុ​ ៨៧​ យាងចូល​ ៨៨ព្រះវស្សា​​ នៅព្រឹកថ្ងៃសុក្រ​ ១២រោច​ ខែបុស្ស​ ឆ្នាំច​ សំរឹទ្ធិស័ក​ ព.ស.២៥៦២​ ត្រូវនឹងថ្ងៃទី​ ១ ខែកុម្ភៈ​ ឆ្នាំ២០១៩​ នេះ​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធានកាកបាទក្រហមកម្ពុជា​ បានចាត់ឱ្យ​ លោកជំទាវ​ ម៉ែន​ នារីសោភ័គ​ អគ្គលេខាធិការរងទី​ ១​ និងសហការី​ ចូលក្រាបបង្គំគាល់​ ដើម្បីប្រគេនថ្វាយព្រះសព្ទសាធុការពរ​ជ័យ​ បវរសួស្តី​ សិរីវឌ្ឍនា​ វិបុលសុខមហាប្រសេីរ​ គ្រប់ប្រការ​ ប្រកបដោយកត្តញូកតវេទិតាធម៌​ ថ្វាយ​ សម្តេចព្រះ​អគ្គមហាសង្ឃរាជាធិបតី​ កិត្តិឧទ្ទេសបណ្ឌិត​ ជាទីសក្ការៈដ៏ខ្ពង់ខ្ពស់បំផុត។

 

ក្នុងសារលិខិតថ្វាយព្រះពរ​របស់ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ បានលេីកឡេីងថា​ «ព្រះមហាករុណាទិគុណ និងព្រះព្រហ្មវិហារធម៌ សម្ដេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត សម្ដេចព្រះមហាសង្ឃរាជ នៃព្រះរាជាណាចក្រកម្ពុជា ដែលព្រះអង្គតែងតែបានបរិច្ចាគថវិកា និងដឹកនាំយ៉ាងសកម្មក្នុងការអប់រំព្រះធម៌ ផ្សព្វផ្សាយព្រះធម៌ ដល់ព្រះសង្ឃ និងពុទ្ធសាសនិកជន នៅទូទាំងព្រះរាជាណាចក្រកម្ពុជា ឱ្យមានធម៌ខន្ដី រួបរួមសាមគ្គីគ្នាជាធ្លុងមួយ លើកស្ទួយតម្លៃព្រះពុទ្ធសាសនា ដើម្បីសុខ​សន្តិភាព ស្ថិរភាពរឹងមាំ ក្រោមអគ្គមគ្គុទេ្ទសក៍ដ៏ឧត្ដុង្គឧត្ដម សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងក្រោមម្លប់ដ៏ត្រជាក់ នៃ ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា»។

 

ក្នុងឱកាសនោះ​ដែរ​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ បានប្រគេនថ្វាយ​ សម្តេចព្រះ​អគ្គមហាសង្ឃរាជាធិបតី​ កិត្តិឧទ្ទេសបណ្ឌិត​ នូវ​ផ្លែឈេីមួយកន្ត្រក​ បាច់ផ្កាមួយកន្ត្រក និងបច្ច័យចំនួន​ ១០លានរៀល​ តាមរយៈ​ លោកជំទាវ​អគ្គលេខាធិការរងទី​ ១​ និងសហការី។

 

ជាមួយគ្នានេះ​ គណៈប្រតិភូ​ បានរាប់បាត្រប្រគេនព្រះសង្ឃ ១០៨អង្គ​ ក្នុង​ ១អង្គៗ​ បច្ច័យចំនួន​ ៥០,០០០រៀល។ ជូនយាយជីតាជី​ ចំនួន​ ៥០នាក់​ ក្នុងម្នាក់ៗ​ ក្រណាត់ស​ ១ដុំ​ ថវិកា​ ១០,០០០រៀល។ ជូនចាស់ជរាគ្មានទីពឹង​​មកពីស្រុកកណ្តាល​ស្ទឹង​ ខេត្តកណ្តាល​ ចំនួន​ ៥០នាក់​ ក្នុងម្នាក់ៗ​ ក្រណាត់ស​ ១ដុំ​ ថវិកា​ ១០,០០០រៀល។ ជូនលោកគ្រូអ្នកគ្រូ​នៃសាលាបឋមសិក្សានរោត្តម​ និងសាលាបឋមសិក្សាចតុមុខ​ ចំនួន ៥០នាក់​ ក្នុងម្នាក់ៗ​ ថវិកា​ ២០,០០០រៀល​ ​ និងជូនសិស្សានុសិស្ស​​នៃសាលា​បឋមសិក្សានរោត្តម​ និងសាលាបឋមសិក្សាចតុមុខ​ ចំនួន​ ១៥០នាក់​ ក្នុងម្នាក់ៗ​ ថវិកា​ ៥,០០០រៀល។

កិច្ចប្រជុំស្តីពីការត្រៀមរៀបចំសន្និបាតសាខាកាកបាទក្រហមកម្ពុជា ទាំង២៥ រាជធានីខេត្ត

កក្រក ៖ នាព្រឹកថ្ងៃទី២៩ ខែ មករាឆ្នាំ២០១៩ នៅទីស្នាក់ការកណ្តាល​កាកបាទក្រហម​កម្ពុជាមាន កិច្ចប្រជុំស្តីពី​ការត្រៀមរៀបចំ​សន្និបាត​សាខាកាកបាទក្រហម​កម្ពុជា ទាំង២៥ រាជធានីខេត្ត អាណត្តិទី៥ ក្រោមអធិបតីភាព​ លោកជំទាវ ពុំ ចន្ទីនី អគ្គលេខាធិការ​កាកបាទក្រហមកម្ពុជា និងមាន​ការចូលរួមពីសំណាក់​ឯកឧត្តម លោកជំទាវ លោក លោកស្រី​សមាជិក សមាជិកា ក្រុមការងារ​អភិវឌ្ឍន៍ស្ថាប័ន សរុបប្រមាណ ៣១នាក់។

កិច្ចប្រជុំបាន​ធ្វើការពិភាក្សា អំពីចំណុចខ្លាំង ចំណុចខ្សោយ និងបទពិសោធន៍​នៃការរៀបចំសន្និបាតសាខាអាណត្តិទី៤ឆ្នាំ(២០១៣-២០១៩) ដែលបានប្រព្រឹត្តទៅដោយ​រលូន និងទទួលជោគជ័យខ្ពស់ក្នុងការបោះឆ្នោតជ្រើសរើស​គណកម្មាធិការសាខា ប្រកបដោយ​ថាមពល និងសុឆន្ទៈ ក្នុងដឹកនាំនិងគ្រប់គ្រង​បំពេញ បេសកកម្ម​មនុស្សធម៌ នៅតាមរដ្ឋបាល​ដែនដី រាជធានីខេត្ត ក្នុងអាណត្តិ​កន្លងមក ក្រោមការដឹកនាំ​ដ៏ឧត្តុងឧត្តម​របស់សម្តេច​កិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធាន​កាកបាទក្រហមកម្ពុជា។

សន្និបាតសាខាអាណត្តិទី ៥ គឺជាការងារ​អាទិភាពមួយ​ក្នុងឆ្នាំ២០១៩ ហេតុនេះ​ដើម្បីត្រៀមលក្ខណៈ​ក្នុងការជួយរៀបចំ​សន្និបាតសាខា​ឲ្យបានទាន់ពេលវេលា​និងមានប្រសិទ្ធភាពខ្ពស់​ ស្របតាម​លក្តន្តិកៈកាកបាទក្រហម​កម្ពុជា ទីស្នាក់ការកណ្តាល​កាកបាទក្រហមកម្ពុជា​នឹងបង្កើត​គណកម្មាការ​ជួយរៀបចំសន្និបាតសាខា​កាកបាទក្រហម​កម្ពុជា មានការចូលរួម​ពីគ្រប់​នាយកដ្ឋាន​ជំនាញទាំង៥ និងការបង្កើតឯកសារគោលមួយ​ចំនួនទៀត សម្រាប់សាខា​ធ្វើជាមូលដ្ឋាន​ក្នុងការគិតគូរ​រៀបចំសន្និបាតសាខា។

 

1 2 3 4 5 Next Last