Webmail
E-Learning
អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា

ទីស្នាក់ការកណ្តាល

កាកបាទក្រហមកម្ពុជា ជួបសំណេះសំណាលនិងពិភាក្សាជាមួយ ប្រធានក្រុមកម្រងប្រទេសសហព័ន្ធអន្តរជាតិ

កក្រក ៖ នៅថ្ងៃ ពុធ ១០រោច ខែពិសាខ ឆ្នាំច សំរិទ្ធ ស័ក ព.ស.២៥៦២ ត្រូវនឹង ថ្ងៃទី៩ ខែឧសភា ឆ្នាំ២០១៨ លោកជំទាវពុំ ចន្ទីនី ​អគ្គលេខាធិការ​កាកបាទក្រហមកម្ពុជា បានជួបសំណេះ​សំណាលនិងពិភាក្សាជាមួយ លោក ម៉ានវ៉ាន ជីទ្បានី ប្រធាន​ក្រុមកម្រងប្រទេ​សសហព័ន្ធអន្តរជាតិ ​ក្នុងគោលបំណងចែករំលែក​ព័ត៌មានស្តីពី​លទ្ធផលនៃការអនុវត្ត​សកម្មភាពការងារ​មួយចំនួន​នៅកម្ពុជាមានដូចជាសកម្មភាព​លើកកម្ពស់អនាម័យ​ទឹកស្អាតតាម​សហគមន៍ក្នុង ខេត្តក្រចេះ បន្ទាយមានជ័យ និងស្វាយរៀង ព្រមទាំងពិភាក្សាលើ​សកម្មភាពកាត់បន្ថយហានិភ័យ​គ្រោះមហន្តរាយ​និងសុខភាព យេនឌ័រនិងពិពិធភាព និងទិសដៅ​ការងារសម្រាប់ឆ្នាំ ២០១៨ និងឆ្នាំ២០១៩ ខាងមុខ។

លោកម៉ានវ៉ាន ជីទ្បានី បានសម្តែង​នូវការអបអរ​ចំពោះលទ្ធផលទិវា ៨ ឧសភា ឆ្នាំ២០១៨ និង កោតសរសើរស្នាដៃបំពេញការងារមនុស្សធម៌​របស់កាកបាទក្រហមកម្ពុជាក្រោមការដឹកនាំប្រកបដោយ      គ​តិបណ្ឌិតរបស់​សម្តេច​កិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ហើយ​សហព័ន្ធអន្តរជាតិ​ ប្តេជ្ញាចិត្តបន្តការគាំទ្រទាំង​ផ្នែកបច្ចេកទេស និង ថវិកាដល់​កាកបាទក្រហមកម្ពុជា៕

 

កាកបាទក្រហមកម្ពុជាប្រារព្ធ ខួបទី ១៥៥ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៨

កក្រក​ ៖​ នៅព្រឹកថ្ងៃ​អង្គារ ៩រោច ​ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹង​ថ្ងៃទី ៨ ខែឧសភា ឆ្នាំ២០១៨ នេះ កាកបាទក្រហម​កម្ពុជា ដែលមានសម្តេច​ព្រះមហាក្សត្រី នរោត្តម មុនិនាថ សីហនុ ព្រះវររាជមាតា​ជាតិខ្មែរ ជាព្រះប្រធាន​កិត្តិយស និងសម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានប្រារព្ធ​មិទ្ទីងថ្នាក់ជាតិ​ ដើម្បី​អបអរសាទរខួបទី ១៥៥ ទិវាពិភពលោក​កាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៨ ក្រោមអធិបតីភាព​ដ៏ខ្ពង់ខ្ពស់​សម្តេច​អគ្គមហាសេនាបតី​តេជោ ហ៊ុន សែន នាយករដ្ឋមន្ត្រីនៃ​ព្រះរាជាណាចក្រកម្ពុជា។

 

បន្ថែមពីការថ្លែង​អំពីវឌ្ឍនភាព​របស់កាកបាទក្រហម​កម្ពុជា ក្នុងឱកាសនោះ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា បានក្រាបបង្គំ​ទូលថ្វាយនូវព្រះមហា​ករុណាទិគុណដ៏ជ្រាលជ្រៅ​បំផុតថ្វាយ ព្រះករុណា​ព្រះមហាក្សត្រ និងសម្តេច​ព្រះមហាក្សត្រី ព្រះវររាជ​មាតាជាតិខ្មែរ ជាទីគោរពសក្ការៈ​ដ៏ខ្ពង់ខ្ពស់បំផុត ដែលជា​និច្ចកាល ព្រះអង្គតែងប្រទាន​ព្រះរាជូបត្ថម្ភ​ដ៏ថ្លៃថ្លានូវព្រះរាជទ្រព្យគាំទ្រដល់​កាកបាទក្រហមកម្ពុជា និងថ្លែងអំណរគុណ​ចំពោះ សម្តេចតេជោ​នាយករដ្ឋមន្ត្រី ឯកឧត្តម លោកជំទាវ អ្នកឧកញ៉ា លោកឧកញ៉ា លោក លោកស្រី ជាសប្បុរស​ជនជាតិ អន្តរជាតិ ព្រមទាំងអង្គពិធីទាំងមូលផងដែរ។

 

ជាមួយគ្នានោះ សម្តេច​អគ្គមហាសេនាបតី​តេជោ ហ៊ុន សែន នាយករដ្ឋ​មន្ត្រីនៃ​ព្រះរាជាណាចក្រកម្ពុជា បានសម្តែង​នូវក្តីរីករាយ និងអបអរសាទរ​ចំពោះការប្រារព្ធ​ទិវាពិភពលោក​កាកបាទក្រហម អឌ្ឍចន្ទក្រហម ព្រមទាំងបាន​វាយតម្លៃខ្ពស់​ចំពោះសកម្មភាព​របស់កាកបាទក្រហមកម្ពុជា ដែលបានធ្វើសកម្មភាពមនុស្សធម៌​កន្លងមកក្នុងការជួយ​ដល់ប្រជាពលរដ្ឋ​ងាយរងគ្រោះបំផុតបានទាន់​ពេលវេលា ដែលធ្វើឱ្យ​ពួកគាត់ទទួល​បានភាពល្អប្រសើរ។

ទន្ទឹមនឹងនេះ សម្តេចតេជោ​នាយករដ្ឋមន្ត្រី បានកោតសរសើរ និងថ្លែងអំណរគុណ​យ៉ាងជ្រាលជ្រៅដល់ សប្បុរសជន ជាតិ និងអន្តរជាតិ​ទាំងអស់ ដែលបាន​ចំណាយនូវថវិកា​ទ្រព្យធនផ្ទាល់ខ្លួន ចូលរួមចំណែកជាមួយសកម្មភាព​មនុស្សធម៌របស់​កាកបាទក្រហមកម្ពុជា​ដើម្បីបម្រើ​លើវិស័យមនុស្សធម៌ ហើយតាមរយៈប្រធានបទឆ្នាំនេះ “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា - មិនទុកនរណាម្នាក់ចោល” គឺពិតជាមានន័យគ្រប់គ្រាន់​សម្រាប់សកម្មភាពរួម​របស់កាកបាទក្រហមកម្ពុជាដែលបាននិងកំពុងធ្វើសកម្មភាពរៀងរាល់ថ្ងៃនេះ។

 

សូមបញ្ជាក់ថា តួលេខ​បឋមនៃមូលនិធិ​ដែលកាកបាទក្រហមកម្ពុជា​ទទួលបានពី សប្បុរស​ជនជាតិ និងអន្តរជាតិ ក្នុងពិធីប្រារព្ធខួបលើកទី ១៥៥ ទិវាពិភពលោក កាកបាទក្រហម អឌ្ឍចន្ទក្រហម គឺមានចំនួនសរុប ១៨.០២៨.៦៦៨$ (ដប់ប្រាំបីលាន ពីរម៉ឺន ប្រាំបីពាន់ ប្រាំមួយរយ ហុកសិបប្រាំបី ដុល្លារអាមេរិក)៕

កាកបាទក្រហមកម្ពុជាចូលរួមប្រារព្វទិវាឆ្មបជាតិ អន្តរជាតិ

កក្រក ៖ ដើម្បីចូលរួម​អបអរទិវា​ឆ្មបជាតិ អន្តរជាតិ ៥ឧសភា ខាងមុខនេះ​នៅព្រឹកថ្ងៃអង្គារ ២រោច ខែពិសាខ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១ ខែឧសភា ឆ្នាំ២០១៨ ឯកឧត្តម ពិត ចំណាន សមាជិកគណៈកម្មាធិការ​កណ្តាលកាកបាទក្រហម​កម្ពុជា រួមជាមួយ ឯកឧត្តម​ សាផុន វឌ្ឍនៈ សាកលវិទ្យាធិការ និងជាប្រធាន​កិត្តិយសក្លឹបយុវជន កាកបាទក្រហម​កម្ពុជា នៃសាកល​វិទ្យាល័យ​វិទ្យាសាស្ត្រសុខាភិបាល ព្រមទាំងគ្រូ​ទីប្រឹក្សាយុវជន អ្នកគ្រូ លោកគ្រូ​ជាវេជ្ជបណ្ឌិត ព្រមទាំង​សមាជិក​យុវជន កាកបាទក្រហម​កម្ពុជា ជានិសិ្សតពេទ្យ​ផ្នែកថែទាំ​វិជ្ជាសាស្រ្ត ពេទ្យឆ្មប អាជ្ញាធរ​មូលដ្ឋាន និងយុវជនសហភាព​សហព័ន្ធយុវជន​កម្ពុជា ឃុំពាមរាំង សរុបចំនួន ៣៥នាក់ បានចុះសួរ​សុខទុក្ខ ពិនិត្យផ្ទៃពោះ ព្រមទាំងផ្តល់​ប្រឹក្សាយោបល់ និងផ្ដល់ថ្នាំ​វីតាមីន ថ្នាំជាតិដែក​មួយចំនួន ដល់ស្ត្រី​មានផ្ទៃពោះ ចំនួន ៥៧នាក់ រស់នៅក្នុង​ភូមិចំនួន៣ ក្នុងឃុំពាមរាំង ស្រុក​លើកដែក។

 

ក្នុងមតិសំណេះសំណាល​របស់ឯកឧត្តម បានពាំនាំ​នូវប្រសាសន៍​ផ្តាំផ្ញើសាកសួរ​សុខទុក្ខរបស់​សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន កាកបាទក្រ​ហមកម្ពុជា ក៏ដូចជម្រាប​ជូនសារលិខិតសេចក្តីអំពាវនាវរបស់​សម្តេចប្រធាន ក្នុងឱកាសទិវា ឆ្មបជាតិ អន្តរជាតិ ៥ ឧសភា សម្តេច​បានសំណូមពរគ្រប់ស្ថាប័នពាក់ព័ន្ធ អង្គការជាតិ-អន្តរជាតិ បន្ដជួយវិនិយោគ​ផ្នែកការងារឆ្មប ដើម្បី​សង្រ្គោះជីវិតស្រ្តីជាមាតា ទារក និងកុមារនៅកម្ពុជា។ តាមរយៈសារលិខិត​ចូលរួមអបអរសាទរ​ទិវាឆ្មបជាតិ និងអន្ដរជាតិ ក្រោមប្រធានបទ«ឆ្មបនាំមកនូវការ​ថែទាំប្រកបដោយ​គុណភាព» សម្តេចបាន​អំពាវនាវដល់​បងប្អូនក្មួយៗជាស្រ្តីគ្រប់រូប​សូមមក​ទទួលការពិនិត្យ ថែទាំឱ្យបាន​ទៀងទាត់ ពីឆ្មបជំនាញ​ដែលបានទទួល​ការបណ្តុះបណ្តាល ត្រឹមត្រូវ ទាំងក្នុង​ពេលពរពោះ ពេល​សម្រាលកូន និងក្រោយពេល​សម្រាល​តាមការកំណត់ណាត់ជួប​របស់គ្រូទេព្យ ដើម្បីទទួល​បានសុខភាព​ល្អប្រសើរទាំងមាតា និងទារក។

សូមបញ្ជាក់​ផងដែរថា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា ជាឥស្សរជន​ឆ្នើមថ្នាក់ជាតិ ​នៃផែនការ​សកម្មភាពរួម​អគ្គលេខាធិការអង្គការ​សហប្រជាជាតិ ​ដើម្បីសុខភាពស្ដ្រី និងកុមារ។

 

សាខាកាកបាទក្រហមកម្ពុជា ខេត្តខេត្តឧត្តរមានជ័យ ប្រារព្ធ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ ២០១៨

សាខាកក្រកខេត្តឧត្តរមានជ័យ ៖ នៅរសៀល​ថ្ងៃទី ៣០ ខែ មេសា ឆ្នាំ ២០១៨ សាខា​កាកបាទក្រហមកម្ពុជា ខេត្តឧត្តរមានជ័យ បានប្រារព្ធ​ខួបអបអរទី ១៥៥ នៃទិវាពិភព​លោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ ២០១៨ ក្រោមប្រធានបទ «កាកបាទក្រហម​កម្ពុជា មានគ្រប់​ទីកន្លែង សម្រាប់គ្រប់ៗគ្នា-មិនទុក​នរណាម្នាក់ចោល» ក្រោម​អធិបតីភាព ឯកឧត្តម គន់ គីម គណៈកិត្តិយស សាខាកាកបាទក្រហមកម្ពុជាខេត្ត ដែលមានការអញ្ជើញ​ចូលរួមពី ឯកឧត្តម លោកជំទាវ លោក លោកស្រី ជាសមាជិក សមាជិកា​គណៈកម្មាធិការ​សាខា អនុសាខា ក្រុមប្រតិបត្តិ​សាខា អនុសាខា​ អាជ្ញាធរ​ដែនដី អង្គភាពមន្ទីរជុំវិញខេត្ត ​យុវជន​កាយរឹទ្ធជាតិកម្ពុជា និងយុវជន​កាកបាទក្រហម​កម្ពុជា សរុបចំនួន ៧៧៦នាក់ ដែលធ្វើឡើង​នៅសាល​ប្រជុំមន្ទីរ​ទំនាក់ទំនងសភា​ខេត្តឧត្តរមានជ័យ។

ទិវានេះប្រព្រឹត្តទៅ​នៅក្នុងគោលបំណង​ដូចតទៅ៖
_ រំលឹកដល់ថ្ងៃកំណើត​របស់លោក ហង់រី ឌុយណង់ ដែលជា​ស្ថាបនិករបស់កាកបាទក្រហម
_ យល់ដឹងអំពីប្រវត្តិ​ចលនារបស់​កាកបាទក្រហម អឌ្ឍចន្ទក្រហម និងច្បាប់មនុស្សធម៌អន្តរជាតិ
_ គៀរគររកមូលនិធិ​ពីសប្បុរសជនទាំងអស់​ និងឆ្លើយតប​ឲ្យបានទាន់ពេលវេលា​ក្នុងការជួយសង្រ្គោះ និងជនងាយរងគ្រោះផងដែរ៕

 

សាខាកាកបាទក្រហមកម្ពុជា ខេត្តសៀមរាប ទទួលអំណោយជាអង្ករពីក្រុមហ៊ុន Cambodia Airports

សាខា កក្រក ខេត្តសៀមរាប៖ នៅព្រឹកថ្ងៃសៅរ៍ ១៤កើត ខែពិសាខ ឆ្នាំច សំរឹទ្ធិ ព.ស ២៥៦២ ត្រូវនឹងថ្ងៃទី ២៨ ខែមេសា ឆ្នាំ២០១៨ លោកជំទាវ គួយ ណាលីន​ ឃឹមប៊ុនសុង អនុប្រធាន​គណៈកម្មាធិការសាខាកាកបាទក្រហមកម្ពុជា​ ខេត្តសៀមរាប បានអញ្ជើញជួបសំណេះសំណាល ​និងទទួលអំណោយជាអង្ករពីក្រុមហ៊ុន Cambodia Airports ចំនួន១២តោន ៥០០គីឡូក្រាម ។ មានប្រសានស៍នាឱកាសនោះ ​លោកជំទាវ គួយ ណាលីន ក្នុងនាមសម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា ក៏ដូចជា​ឯកឧត្តម​បណ្ឌិតប្រធានគណៈកម្មាធិការសាខា បានធ្វើការថ្លែងគុណយ៉ាងជ្រាលជ្រៅចំពោះក្រុមហ៊ុន Cambodia Airports ដែលបាន​ឧបត្ថម្ភជាអង្ករ ពេលនេះ ដើម្បីអបអរ​ខួបលើកទី ១៥៥ ទិវាពិភពលោក​កាកបាទក្រហម អឌ្ឍចន្ទក្រហម​ នៅខេត្តសៀមរាប ។ លោកជំទាវបន្តថា ដើម្បីលើក​កម្ពស់កម្លាំង​មនុស្សធម៌ នៅលើ​ពិភពលោក និងការអនុវត្តន៍ផែនការយុទ្ធសាស្រ្តកាកបាទ​ក្រហមកម្ពុជា ២០១១-២០២០នោះ សាខាននឹង​យកចិត្តទុកដាក់​ប្រើប្រាស់អំណោយដែលទទួលបានទទួលនេះ ក្នុងបុព្វហេតុមនុស្សធម៌ ​ស្របតាមគោលការណ៍​គ្រឹះទាំង៧ របស់ចលនាកាកបាទ​ក្រហម អឌ្ឍចន្ទក្រហម ឱ្យមានប្រសិទ្ធភាព​ខ្ពស់ ពិសេសស្របតាម​ប្រធានបទដែលលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល” ។

 

1 2 3 4 5 Next Last