Webmail
E-Learning
សាខាកាកបាទក្រហមកម្ពុជា

ស្ទឹងត្រែង

ប្រជាពលរដ្ឋរងគ្រោះដោយសារទឹកជំនន់ នៅឃុំកោះស្នែង ទទួលអំណោយពីសាខាកក្រកខេត្តស្ទឹងត្រែង

សាខាកក្រក ខេត្តស្ទឹងត្រែង ៖ នៅរសៀល​ថ្ងៃទី០៩ ខែសីហា ឆ្នាំ២០១៨ នេះ លោកស្រី សន សុខា អនុប្រធានគណៈកម្មាធិការ​សាខាកាកបាទក្រហម​កម្ពុជាខេត្ត​ស្ទឹងត្រែង សមាជិក សមាជិកា គណៈកម្មាធិការសាខា ក្រុមប្រតិបត្តិ​សាខា អនុសាខាស្រុក បាននាំយក​អំណោយ​មនុស្សធម៌ ចែកជូន​ដល់ប្រជាពលរដ្ឋរងគ្រោះ​ដោយសារ​ទឹកជំនន់ ចំនួន១៦០គ្រួសារ ដែលអញ្ជើញ​មកពី៤ភូមិ ក្នុងនោះមានភូមិកោះស្នែង កោះកី កោះ​ស្រឡៅនិង​ភូមិជាំធំ ឃុំកោះស្នែង ស្រុកថាឡា​បរិវ៉ាត់ ខេត្តស្ទឹងត្រែង។

 

នៅក្នុងឱកាសជួប​សំណេះសំណាលជាមួយ​នឹងប្រជាពលរដ្ឋដែល​រងគ្រោះដោយ​ទឹកជំនន់ លោកស្រីអនុប្រធាន បានពាំនាំ​នូវប្រសាសន៍ផ្តាំផ្ញើ​សួរសុខទុក្ខពី​សម្តេចកិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ដល់បងប្អូន​ប្រជាពលរដ្ឋ​ទាំងអស់ឱ្យ​ថែទាំសុខភាព​ឱ្យបានល្អ ត្រូវរស់នៅ​ស្អាត ពិសាទឹកឆ្អិន និងគេង​ក្នុងមុងជានិច្ច សូមជួយ​មើលថែទាំ​ចាស់ជរា និងកូនតូចៗឱ្យបានល្អ​ជៀសវាងគ្រោះថ្នាក់​ជាយថាហេតុណា​មួយកើតឡើងក្នុងពេល​ដែលមានគ្រោះទឹកជំនន់​នេះ។

អំណោយដែល​ចែក ក្នុង១គ្រួសារទទួលបាន : អង្ករ ៣០គីឡូក្រាម មី ១កេស ត្រីខ ១០កំប៉ុង និងឃីត ១កញ្ចប់។

 

សាខាកក្រក ខេត្តស្ទឹងត្រែងទទួលអំណោយមនុស្សធម៌ ពីព្រះចៅអធិការវត្តទួល ប្រាសាទនិងពុទ្ធបរិស័ទចំណុះជើងវត្តទួល ប្រាសាទ

សាខាកក្រក ខេត្តស្ទឹងត្រែង ៖ នាព្រឹកថ្ងៃទី៣ ខែសីហា ឆ្នាំ២០១៨ នេះ ឯកឧត្ដម​ ឈាង ឡាក់ ប្រធានគណៈកម្មាធិការ​សាខា​កាកបាទក្រហម​កម្ពុជាខេត្តស្ទឹងត្រែង​ បានទទួលអំណោយមនុស្សធម៌ជាអង្ករចំនួន ៥៥០ គក្រ មី ១៧កេស ត្រីខ ១កេសធំ ទឹកស៊ីអ៊ីវ២យួរ ប៊ីចេង ៨០ថង់ ទឹកដោះគោឆៅ ១យួរនិងបច្ច័យ​ ប្រាក់រៀលចំនួន ២៤០,០០០៛ ​និងប្រាក់ដុល្លារ​ចំនួន ៥០០$ ពីព្រះចៅអធិការវត្ត​ទួល ប្រាសាទ​និងពុទ្ធបរិស័ទចំណុះជើង​វត្តទួល ប្រាសាទ សម្រាប់ចាត់ចែង​ក្នុងការជួយ​សម្រាលទុក្ខលំបាក ប្រជាពលរដ្ឋ​ដែលរងគ្រោះដោយ​ទឹកជំនន់នៅ​ខេត្តស្ទឹងត្រែង ឱ្យបានទាន់​ពេលវេលា។

ក្នុងឱកាសពិធី​ប្រគល់ ទទួល នោះ ព្រះចៅ​អធិការវត្តទួល ប្រាសាទនិងពុទ្ធបរិស័ទ​ចំណុះជើងវត្ត បានផ្តាំផ្ញើ​សួរសុខទុក្ខ ប្រជាពលរដ្ឋ​នៅតាមបណ្តាស្រុកមួយ​ចំនួនក្នុងខេត្តស្ទឹងត្រែង ដែលកំពុងទទួលរងផលប៉ះពាល់​ដោយគ្រោះធម្មជាតិ​ទឹកជំនន់ និងថ្លែង​ការកោតសរសើរ​ដល់ លោក លោកស្រី ក្រុមប្រតិបត្តិសាខា អនុសាខា​កាកបាទក្រហមកម្ពុជា​ខេត្តស្ទឹងត្រែង​ដែលបានយកចិត្តទុកដាក់​គិតគូរ តាមដានជាប់ជា​ប្រចាំដើម្បី​ត្រៀមជួយ​ប្រជាពលរដ្ឋ​រងគ្រោះឱ្យបានទាន់ពេល។

ក្នុងឱកាសនោះដែរ ឯកឧត្ដម ឈាង ឡាក់ ប្រធានគណៈកម្មាធិការសាខា បានថ្លែងអំណរគុណ​ដល់ ព្រះចៅអធិការ​វត្តទួល ប្រាសាទ​និងពុទ្ធបរិស័ទ​ចំណុះជើងវត្ត ដែលបាន​រួមចំណែកជួយឧបត្ថម្ភ​គាំទ្រក្នុងបុព្វេហតុ​មនុស្សធម៌ជួយ​ដល់ជនរងគ្រោះ​ដែលត្រូវការ​ជំនួយ និងការឧបត្ថម្ភនានា។

តាមរយៈអំណោយទាំងនេះ សាខា​កក្រក ខេត្តស្ទឹងត្រែង នឹងចាត់ចែង​ផ្តល់ជូន​ជនរងគ្រោះឱ្យបានទាន់ពេលវេលាឱ្យស្របតាម​គោលការណ៍គ្រឹះទាំង ៧ប្រការ របស់​ចលនាកាកបាទក្រហម អឌ្ឍចន្ទក្រហម៕

 

វគ្គផ្សព្វផ្សាយស្តីពីគោលកាណ៍គ្រឹះរបស់ចលនាកាកបាទក្រហម អឌ្ឍចន្ទក្រហម ច្បាប់មនុស្សធម៌អន្តរជាតិ និងកាកបាទក្រហមកម្ពុជា

កក្រក ៖ នាព្រឹកថ្ងៃទី ២៩ ខែ វិច្ឆិកា ឆ្នាំ២០១៧ កាកបាទក្រហម​កម្ពុជា រួមជាមួយ​គណ:កម្មាធិការ​អន្តរជាតិ ​កាកបាទក្រហម ( អាយ ស៊ី អរ ស៊ី ) បានបើក​ វគ្គផ្សព្វផ្សាយ​ស្តីពី​គោលកាណ៍គ្រឹះ​របស់​ចលនាកាកបាទក្រហម អឌ្ឍចន្ទក្រហម ច្បាប់​មនុស្សធម៌​អន្តរជាតិ និង​កាកបាទក្រហម​កម្ពុជា នៅសាលប្រជុំ​ វរៈសេនាតូច​កងនគរបាល ការពារព្រំដែន​គោកលេខ ៧០១ នៅភូមិដុង​ក្រឡ ឃុំអូរ​ស្វាយ ​ខេត្តស្ទឹងត្រែង ដោយមាន​ការចូលរួមពី​សំណាក់ លោក រ៉ូម៉ាន់ ផារ៉ាម៉ូនូវ ​ប្រធាន​បេសកកម្ម ​អាយ ស៊ី អរ ស៊ី ប្រចាំ​កម្ពុជា និងលោក ឧត្តមសេនីយ៍ត្រីយ៍ ឯក ស៊ីវណ្ណដន ស្នងការរង​នគបាលខេត្ត​ស្ទឹងត្រែង ដែលមានវត្តមាន​កងនគរបាល​ចូលរួមចំនួន ៧០ នាក់ ។

 

ក្នុងវគ្គនេះ​បានធ្វើការ​សំណេះ​សំណាល និងធ្វើបទ​បង្ហាញដោយ​លោក រ៉ូម៉ាន់ ផារ៉ាម៉ូនូវ ស្តីអំពី​ច្បាប់មនុស្សធម៌​អន្តរជាតិ និងសកម្មភាព​មនុស្សធម៌​របស់ចលនា​កាកបាទក្រហម​អឌ្ឍចន្ទក្រហម។

 

វគ្គនេះបង្កើតឡើង​ក្នុងគោលបំណង​បង្កើនការយល់ដឹង​ដល់កងនគរបាល​ស្តីអំពីច្បាប់មនុស្សធម៍​អន្តរជាតិ និងសកម្មភាព​មនុស្សធម៍​របស់ចលនា​កាកបាទក្រហម ការប្រើប្រាស់ និងការការពារ​បដិរូប កាកបាទក្រហម អឌ្ឍចន្ទក្រហម ជាពិសេស ពីបេសកកម្ម​របស់កាកបាទក្រហម​កម្ពុជា។

លោកឧត្តមសេនីយ៍ត្រីយ៍ ឯក ស៊ីវណ្ណដន បានថ្លែងអំណរគុណ​យ៉ាងជ្រាលជ្រៅ​ចំពោះ​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានដឹកនាំ​កាកបាទក្រហមកម្ពុជា​ប្រកបដោយ​កិត្តិបណ្ឌិតព្រមទាំងបានផ្តល់វគ្គផ្សព្វផ្សាយ​ដល់វរៈសេនាតូច​កងនគរបាល ការពារព្រំដែនលេខ ៧០១ នេះក្នុងនោះ លោកបានផ្តាំផ្ញើ និងសំណូមពរ​ឲ្យបងប្អូនសិក្ខាកាម​ខិតខំយកចិត្តទុកដាក់​ក្នុងការសិក្សាវគ្គនេះ​ដើម្បីយល់ដឹង​ឲ្យបានច្បាស់អំពីមេរៀន​ទាំងអស់ក្នុងវគ្គ និងបានថ្លែងអំណរគុណ​ដល់ក្រុមការងារ​កាកបាទក្រហម។ ទន្ទឹមនោះដែរ លោកស្នងការរង សង្ឃឹមថា នឹងមានវគ្គផ្សព្វផ្សាយនេះ ជាបន្តបន្ទាប់នៅឆ្នាំក្រោយទៀត។

 

វគ្គផ្សព្វផ្សាយនេះ​ដំណើរការបាន​ដោយមានកិច្ចសហការ​ និងឧបត្ថម្ភពី គណ:កម្មាធិការ​អន្តរជាតិ កាកបាទក្រហម។

 

គ្រួសារសពទីទ័លក្រទទួលអំណោយមនុស្សធម៌ពីអនុសាខាកក្រកស្រុកថាឡាបរិវ៉ាត់

សាខាកក្រក ខេត្តស្ទឹងត្រែង ៖ នាព្រឹកថ្ងៃទី១៨ ខែតុលា ​ ឆ្នាំ២០១៧ លោក ឈុន ពុទ្ធី ​ប្រធាន​គណៈកម្មាធិការ​អនុសាខា​ស្រុកថាឡាបរិវ៉ាត់​និង សហការី​ បាននាំយក​អំណោយ​មនុស្សធម៌​ចូលរួម​រំលែកទុក្ខ​យ៉ាងក្រៀមក្រំ​ជាមួយគ្រួសារ​សពលោក ពេជ្រ ចាន់ថន អាយុ ៦៣ឆ្នាំ ដែលមាន​ជីវភាពខ្វះខាត​នៅភូមិ​កាំងតេជោ ឃុំថាឡាបរិវ៉ាត់ ស្រុក​ថាឡាបរិវ៉ាត់ ខេត្តស្ទឹងត្រែង ។

 

ក្នុងឱកាសនោះដែរ ​លោក​ប្រធានគណៈកម្មាធិការ​អនុសាខាស្រុក​ បានសំដែង​នូវការសោកស្តាយ​ចំពោះការបាត់បង់​សាច់ញាតិ​ជាទីស្រឡាញ់​របស់ក្រុមគ្រួសារ​សព និងសូមបួងសួង​ដល់​វិញ្ញាណក្ខន្ធសព​សូមបានទៅកាន់សុគតិភព​កុំបីឃ្លៀងឃ្លាត​ឡើយ។

 

អំណោយ​ផ្តល់ជូន​រួមមានៈ អង្ករ៣០គក្រ ទឹកត្រី១យួរ ទឹកស៊ីអ៊ីវ១យួរ ត្រីខ១យួរ មី០១កេស កន្ទេល០១ ឃីត០១កញ្ចប់ និង ថវិកាមួយ​ចំនួនផងដែរ ។

 

អ្នកជំងឺសម្រាកព្យាបាលនៅមន្ទីរពេទ្យ បង្អែកទទួលអំណោយពីសាខាកក្រកខេត្តស្ទឹងត្រែង

សាខាកក្រក ខេត្តស្ទឹងត្រែង ៖ នាព្រឹកថ្ងៃទី ១៥ ខែកញ្ញា ឆ្នាំ២០១៧ ឯកឧត្តម ម៉ុម សារឿន ប្រធានកិត្តិយស​សាខា​កាកបាទក្រហមកម្ពុជា​ខេត្តស្ទឹងត្រែង​ និងសហការី ​បានអញ្ជើញចុះ​សាកសួរ​សុខទុក្ខ​ និង ផ្តល់​អំណោយ​មនុស្សធម៌​ជូនដល់​អ្នកជំងឺ​ផ្នែកសម្ភព​ចំនួន ២០នាក់ និងផ្នែក​កុមារ ចំនួន ៤៣នាក់​ ដែលកំពុង​សម្រាក​ព្យាបាល​នៅមន្ទីរពេទ្យ បង្អែកខេត្តស្ទឹងត្រែង ។

 

ក្នុងឱកាសនោះដែ​រ ឯកឧត្តម​ប្រធានកិត្តិយស ព្រមទាំង​សហការី បានអញ្ជើញ​ជួបផ្ទាល់​តាមគ្រែ​របស់អ្នកជំងឺ ដោយ​បានពាំនាំ​នូវប្រសាសន៍​របស់ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើ​ការសួរ​សុខទុក្ខ យកចិត្ត​ទុកដាក់ និងគិតគូរ​ចំពោះអ្នកជំងឺ​ទាំងអស់ ព្រមទាំងផ្តាំ​ផ្ញើសូមថែរក្សា​សុខភាព​ឱ្យបាន​ល្អ មានអនាម័យស្អាត​ក្នុងការបរិភោគ-រស់នៅ ពិសេស ត្រូវជៀសវាង​ការប្រើប្រាស់​គ្រឿងញៀន ពិសាបារី និងសេព​គ្រឿងស្រវឹង ដែលជាហេតុ​នៃអំពើហិង្សា និងធ្វើ​ឱ្យសុខភាព​ចុះខ្សោយ សេដ្ឋកិច្ច​គ្រួសារធ្លាក់ចុះ។

 

ជាមួយគ្នានេះ សូម​ប្រជាពលរដ្ឋ​ទាំងអស់ ចូលរួម​គោរពច្បាប់​ចរាចរណ៍ដោយ​ពាក់មួក​សុវត្ថិភាព​ឱ្យបានត្រឹមត្រូវ កុំបើកបរក្រោមឥទ្ធិពលនៃគ្រឿងស្រវឹង។ល។ ទន្ទឹមនឹងនេះ ឯកឧត្តម​បាន​ថ្លែងអំណរគុណ​ចំពោះ​ក្រុមគ្រូពេទ្យ ដែលបានខិតខំយកចិត្តទុកដាក់ព្យាបាលអ្នកជំងឺ អស់ពី​សមត្ថភាព ​មានវិជ្ជាជីវៈច្បាស់លាស់ និងពោរពេញ​ដោយក្តីមេត្តា ករុណា មនុស្សធម៌ចំពោះអ្នកជំងឺ។

 

អំណោយផ្តល់​ជូនរួមមានៈ ត្រីខ១យួរ មី០១កេស ទឹកដោះគោខាប់ ០៥កំប៉ុង ស្ករស០១គ.ក្រ ឃីត០១កញ្ចប់ ថវិកាមួយ​ចំនួនផ្តល់​ថវិកាជូន​ដល់ក្រុម​គ្រូពេទ្យ ចំនួនផងដែរ ។

 

1 2 3 4 5 Next Last