Webmail
E-Learning
សាខាកាកបាទក្រហមកម្ពុជា

ព្រះវិហារ

សាខាកក្រកខេត្តព្រះវិហារចុះសួរសុខទុក្ខអ្នកជម្ងឺនៅមន្ទីរពេទ្យខេត្ត

សាខាកក្រក​ខេត្តព្រះវិហារ៖នៅព្រឹក​ថ្ងៃទី៨ ខែកញ្ញា ​ឆ្នាំ២០១៧​ នេះឯកឧត្តម​ អ៊ុន ចាន់ដា​ ប្រធាន​កិត្តិយស​សាខាកាកបាទក្រហម​កម្ពុជា ខេត្តព្រះវិហារ​និង​ក្រុម ការងារ ​បាននាំយក​អំណោយ​មនុស្សធម៌​ចំនួន​ ១៥៤ នាក់ ផ្តល់ជូន​អ្នកជំងឺ​ដែលកំពុង​សម្រាក​ព្យាបាល​ជំងឺ នៅមន្ទីរពេទ្យ​បង្អែក ១៦ មករា ខេត្ត​ព្រះវិហារ​ ឋិតនៅ​ភូមិអណ្តូងពោធិ​ សង្កាត់​កំពង់ប្រណាក ក្រុង​ព្រះវិហារ ខេត្តព្រះវិហារ ។

 

មានប្រសាសន៍​ក្នុងឱកាសនោះ​ ឯកឧត្តម អ៊ុន ចាន់ដា បានពាំនាំនូវការផ្ដាំផ្ញើសួរ សុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដែលសម្តេចតែងតែព្រួយបារម្ភ និងយកចិត្តទុកដាក់​គិតគូ​ពីសុខទុក្ខ​របស់បងប្អូន​គ្រប់រូប​ដោយមិន​ប្រកាន់វណ្ណៈ ពណ៌សម្បុរ ​ជំនឿសាសនា ​ឬនិន្នាការនយោបាយ​ណាមួយឡើយ ។

 

អំណោយ​មនុស្សធម៌​ដែលបាន​ផ្ដល់ជូនក្នុង​មួយម្នាក់ៗទទួលបាន៖ ទឹកដោះគោ ៣ កំប៉ុង ស្ករសមួយមញ្ចប់ មុង១ ភួយ១ សារុង១ ក្រមា១ និងថវិកា​របស់ឯកឧត្តម​ប្រធានកិត្តិយស​ក្នុងម្នាក់ៗ មួយម៉ឺនរៀលផងដែរ ៕

 

យុវជនកក្រកវិទ្យាល័យជាំក្សាន្ត ខេត្តព្រះវិហារចូលរួមដាំដើមឈើ

សាខាកក្រកខេត្តព្រះវិហារ ៖ នាព្រឹកថ្ងៃទី ១៥ ខែ កក្កដា ឆ្នាំ ២០១៧ នេះ លោក វ៉ា ម៉ៅ ប្រធានកិត្តិយសក្លឹប និង​ទីប្រឹក្សា​យុវជន ​បានដឹកនាំ​យុវជន​កាកបាទក្រហម​កម្ពុជា​ប្រចាំ​វិទ្យាល័យ ​ជាំក្សាន្ត ​ដាំកូនឈឺ​ជុំវិញ ក្នុង​និង​ក្រៅបរិវេណ​ សាលា​វិទ្យាល័យ​ជាំក្សាន្តថ្មី ​ដែលជា​អំណោយ​ដ៏ថ្លៃថ្លា​របស់​សម្តេច​ អគ្គមហាសេនាបតីតេជោ​ ហ៊ុន សែន ស្ថិត​នៅឃុំជាំក្សាន្ត​ ស្រុក​ជាំក្សាន្ត ខេត្ត​ព្រះវិហារ។

 

គោលបំណង​នៃការដាំកូន​ឈើនេះ​គឺសំដៅ​ជួយការពារ​បរិស្ថាន  លម្អ​បរិវេណ​វិទ្យាល័យ និង​ធ្វើឲ្យ​សិស្សានុសិស្ស​ស្វែងយល់​ពីប្រភេទ​ដើមឈើ​។ល។

គ្រួសារក្រីក្ររងគ្រោះដោយគ្រោះថ្នាក់ចរាចរណ៍ទទួលអំណោយពីសាខាកក្រកខេត្តព្រះវិហារ

សាខាកក្រក​ខេត្តព្រះវិហារ៖នៅរសៀល​ថ្ងៃទី​ ៦ ខែ កក្កដា ឆ្នាំ ២០១៧ នេះ​ឯកឧត្តម​ យុង គឹមហ៊ាន នាយក​ប្រតិ បត្តិ​សាខា​កាកបាទក្រហម​កម្ពុជា ​ខេត្តព្រះវិហារ​ បាននាំ​យកអំណោយ​មនុស្សធម៌​ចំនួន ១​ គ្រួសារ​ ចូលរួម​រំលែកទុក្ខ​យ៉ាងក្រៀមក្រំ​ជាមួយ​គ្រួសារ​សពលោក​ងួន កន​ ក្រុម កាកបាទក្រហម​កម្ពុជា​ ឃុំឆែមពីរ ស្រុកឆែប ដែលទទួល​មរណភាព​ដោយគ្រោះថ្នាក់​ចរាចរ​កាលពី​ថ្ងៃទី ​៥ ខែ កក្កដា ឆ្នាំ ២០១៧ នៅភូមិណារ៉ុង ឃុំឆែបពីរ ស្រុកឆែប ខេត្តព្រះវិហារ ។

 

ក្នុងឱកាសនោះ​ឯកឧត្តម នាយក​ប្រតិបត្តិ​សាខា​កាកបាទក្រហម​កម្ពុជា ​ខេត្តព្រះវិហារ បានសំដែង​នូវការសោកស្តាយ​ចំពោះ​ការបាត់បង់​សាច់ ញាតិ​ជាទី ស្រឡាញ់របស់​គ្រួសារសព និង​សូមបួង សួងដល់វិញ្ញាណក្ខន្ធសពសូមបានទៅ កាន់សុគតិភព​កុំបីឃ្លៀងឃ្លាតឡើយ ។

 

ជាមួយគ្នា​នោះសាខា​បាននាំ​យកសម្ភារ​ផ្តល់ជូនរួមមាន ៖ អង្ករ ៤០ គីឡូ មី ១ កេស ត្រីខ ១០កំប៉ុង ទឹកស៊ីអុីវ១ យួរ ទឹកបរិសុទ្ធ ៤ កេស និងថវិកា​មួយចំនួន។

 

ពិធីបិទវគ្គយល់ដឹងជាមូលដ្ឋានជូនដល់យុវជនកាកបាទ ក្រហមកម្ពុជានៅវិទ្យាល័យជាំក្សាន្ត

សាខាកក្រកខេត្តព្រះវិហារ៖ នាល្ងាច​ថ្ងៃទី​ ១៧ ខែ​មិថុនា ឆ្នាំ​២០១៧​ នៅវិទ្យាល័យ​ជាំក្សាន្ត​ សាខា​កាកបាទក្រហម​កម្ពុជា​ ព្រះវិហារ​ បានរៀបចំ​ពិធីបិទ​វគ្គ​យល់ដឹង​ជាមូលដ្ឋាន​ជូន​ដល់​យុវជន​កាកបាទ ក្រហមកម្ពុជា​ ប្រចាំវិទ្យាល័យ សរុបចំនួន ១១៣ នាក់ ស្រី ៧៤ នាក់​ ក្រោម​វត្តមាន​ ឯកឧត្តម​ យុង គឹមហ៊ាន​ នាយក​ប្រតិបត្តិ នាយក​សាខា​កាកបាទក្រហមកម្ពុជា ​ខេត្តព្រះវិហារ​ ដែលវគ្គ​យល់ដឹងនេះ​បានចាប់​ដំណើរ​ការអស់រយៈពេល ​១ថ្ងៃ​កន្លងមក​ប្រកប​ដោយ​ជោគជ័យ​ ជាលទ្ធផល​យុវជន​ទទួលបាន​និទ្ទេស​ល្អចំនួន៧៥ ​ភាគរយ និងមធ្យម ២៥ ភាគរយ ។

 

នាឱកាសនោះ​ឯកឧត្តម​នាយក​សាខា បានពាំនាំ​នូវការផ្តាំផ្ញើ​សាកសួរ​សុខទុក្ខ​ពីសំណាក់​សម្តេច​កិត្តិព្រឹទ្ធបណ្ឌិត​ប្រធាន​ ប៊ុន រ៉ានី ហ៊ុន សែន​ ជូនដល់​ក្មួយៗយុវជ​នទាំងអស់​ ព្រមទាំង​សូមកោត​សរសើរ​និងវាយតម្លៃ​ខ្ពស់ចំពោះ​លទ្ធផល​នៃការបញ្ចប់​វគ្គនា​ថ្ងៃនេះ​ ។​​ ឯកឧត្តម​នាយក​សាខា​សង្ឃឹម​ និងជឿជាក់​ថា​បន្ទាប់ពី​ប្អនៗសិស្សានុសិស្ស​បានឆ្លង​កាត់វគ្គ​យល់ដឹង​ជាមូលដ្ឋាន​នេះហើយ​ពិតជា​បានយល់​ច្បាស់​ពីប្រវត្តិ​ចលនា​ បដិរូប​ គោលការណ៍​គ្រឹះទាំង៧,​ តួនាទី​ភារកិច្ច​យុវជន​កាកបាទក្រហម​ និងវិជ្ជា​សង្គ្រោះបឋម​​ ដែលជាមុខ​វិជ្ជា​មូលដ្ឋាន​សម្រាប់​ជាគ្រឹះឲ្យ​ប្អូនៗយក​ទៅ​អនុវត្ត​សំដៅ​ជួយដល់​ជនរងគ្រោះ​ និងងាយរង​គ្រោះ​គ្រប់ប្រភេទ​ និងបាន​ផ្តាំផ្ញើ​អោយប្អូន​ៗជៀសឆ្ងាយ​ពីគ្រឿងញៀន បើកបរ​ត្រូវគោរព​ ច្បាប់ចរាចរ។ និងបាន​ផ្តល់ថវិកា​ចំនួន ២០០,០០០ រៀលគត់ និងសំពាធ​សង្រ្គោះ​បឋមមួយ ​សម្រាប់ប្រើប្រាស់​ក្នុងក្លឹប។

 

យុវជនកាកបាទក្រហមកម្ពុជា វិទ្យាល័យគូលែនចូលរួមទិវាបរិស្ថានជាតិ និងបរិស្ថានពិភពលោក

សាខាកក្រក​ខេត្តព្រះវិហារ​៖ នៅព្រឹក​ថ្ងៃទី ​១៥ ខែ មិថុនា​ ឆ្នាំ ២០១៧​ នេះ​យុវជន​កាកបាទក្រហម​កម្ពុជា​ វិទ្យាល័យ​គូលែន​ ចំនួន ៤០ នាក់ ស្រី ២៥ នាក់ បាន​ចូលរួម​អបអរសាទរ​ទិវា​បរិស្ថានជាតិ ​និង​បរិស្ថាន​ពិភពលោក​ ៥ មិថុនា ក្រោម​ប្រធានបទ " ផ្សារភ្ជាប់​ទំនាក់ទំនង​រវាងមនុស្ស​ និងធម្មជាតិ ​" ដែលរៀប​ចំដោយ​មន្ទីរបរិស្ថាន​ខេត្តព្រះវិហារ​ នៅក្នុង​បរិវេណ​វិទ្យាល័យ​គូលែន ស្រុក​គូលែន ខេត្តព្រះវិហារ។

1 2 3 4 5 Next Last